Irvin Moyo Mzingwane

Umalukazana kaTatazela 30

Irvin Moyo Mzingwane

77171890

Kwezwakala ubumaye! Maye ! Abantu bewuhlaba bewulawula umkhosi .Nanko umbhobho udume kabili .

UShandu ulele daca phansi ngesisu walingana lomhlabathi .

Ixhegu elinguGatsheni lathi ngokuzwa umsindo wombhobho lazibuza ukuthi ngubani lowu osedlala ngombhobho emzini walo .Lathatha inkalakatha yenkafulakufa , laphuma endlini yalo ligxadazela okwenkabi yebula endala ,waphuma eyikhombe phezulu inkalakatha yenkafulakufa uGatsheni engathi iyamsinda .

"Hheyi! lina Ngubani odelela umuzi wami ,ngubani otshaya isibhamu emzini wami ?" Wayetsho engasakhangeleki uGatsheni ,amehlo akhe alokoza ulaka .

Wonke umuntu usadidekile lapha enkundleni ,bonke bethukile .

Abafana bakoMdluli bonele ukudubula babona ukuthi bamkhuthile uShandu bangena emoteni babaleka .

UPhumlani laye akasabonwa ,bamdonsile abafowabo enjalo efuthelwa zinduma azifakwe nguShandu ekhanda .

Akula muntu owaphendula uGatsheni ukuthi ngubani obedubula ,ngoba bonke ababonanga ukuthi ngubani obefuna ukutshaya uShandu .

Bamchazela kuphela ukuthi bekudibene uShandu lo Phumlani enkundleni yenduku ,kuthe uPhumlani esenqotshiwe kwezwakala ukukhwaza kwenganunu.

"Ungaphi yena uPhumlani wakhona?" Kubuza uGatsheni.

Wadingwa waswelakala uPhumlani ,kwaba sobala ukuthi abafana bakaMdluli yibo abagile umkhuba bedubula .

"Liyitshele imdwembe yakoMdluli ukuthi lapho esiyahlangana khona akuyikumila utshani ,kumele ngiye emagumeni koMdluli ngiyebikela uyise walaba bafana ukuthi kumele ahlawule ngenkomo ethi muu! Sibili ,ngezake bebuye lapha kwami bezophazamisa umthimba omuhle

"kuthetha uGatsheni .

Laqhubeka idili baze bachithekana abantu ,uShandu wabuyela ekhaya .

Abafana bakoMdluli bonela ukubaleka emthimbeni ngemva kokukhutha uShandu ngenganunu bahlela ukuthi ebusuku bayahlasela emaMbatheni bafuna ukuqothula uShandu .

Lathi lisithi qophi ilanga ,uShandu usemagumeni akibo ,wakhangwa ngumtshova oza ugijima uqonde khona emaMbatheni .

Wakubona ukuthi sekuyiyo impi yezigilamkhuba zakoMdluli lomlungu wazo .

Wagijima wangena emkulwini ,watshela ugogo wakhe labazukulu ukuthi bacatshe ngemva kwesivalo ngoba izitha nanzi zingena ekhaya.

Kazange abale amabala engwe uMaNgubane waqoqa abazukulu bakhe wabafihla ngemva kwesivalo phela nanko sebengemva kwesikhathi nanku umtshova ususondela ekhaya .

Wathi engafihla abazukulu bakhe uMaNgubane waditshazela eqonda emsamo wafika wavula iqhaga elidala .

Wathulula okuphakathi ,

kwakhithika ivolovolo i holster emnyama , wayithatha wayithintitha uthuli .

"Bhekumuzi ,nansi isikhali esasisetshenziswa ngu yihlomkhulu esaphila ,yinduku yamavaka leyi etshaya indoda isesekude le" Satsho isalukazi esinguMaNgubane sibobotheka .

Waphelelwa ngamazwi uShandu ebona isalukazi sakhe sihlala lovolovolo emkulwini phakathi kweqhaga .

Walithatha uShandu walibuka wabona ligcwele phamu inhlamvu phakathi ,wahlekelela .

"Catshani gogo ,ngike ngikhombise laba bantu ukuthi akudlalelwa emaMbatheni "kutsho uShandu ephuma ngentuba yefasitele ,wayakuthi jiti! phansi phandle wabhoda ngomkulu ,ufuna ukuba thutshela kuhle eceleni laba bantu.

Wahohoba ngomduli ,ngapha ebambe uvolovolo lwakhe ngesandla .

Khaxa! wayikhokho i trigger wavela wakhomba khonale ,phela sebengenile ekhaya .

Kwehla u Peace egqoke umfaniswano wabonogada ,ulandelwa zinkabi ezinhlanu lazo zigqoke imfaniswano zigaxe inganunu .

" Peace !Nguwe lowu nkunzi mina ngithi sengihlaselwe ,bengithi kumbe lifika kusasa . "Kutsho uShandu efaka uvolovolo enqulwini ,usejabule nampo o Peace sebefike ngesikhathi.

" Shandu kaNdaba Mthiya, ngibone ukuthi ngingaphozisi maseko ,hlezi izitha zikugabadele ngingasindwa yizinyawo "kutsho uPeace bexhawulana lo Shandu .

UMaNgubane waphuma labazukulu bakhe ngemva kwesivalo esesizwa ukuthi akusozitha lezi ezifikileyo ngabangane .

Kwabingelelwana kwabamnandi uShandu watshela ugogowakhe ukuthi uPeace labafana bakhe bazomelekelela kuleyimpi .

" Manje labuya libahlanu nje Peace abanye bangaphi !"kubuza uShandu .

"Abanye bayalandela ,bebesamelele izikhali ,bazafika kusasa ntambama ,lapha ngibuye labalutshwane sesiphuthuma ukuza lapha"

"Hhayi ngiyakuzwa nkunzi ,ngibongile ukuthi ube lenyawo ezitshetshayo "

UMaNgubane wahle wathi akuhlatshwe imbuzi ezimbili ukuze abantu badle .

Bazidumela imbuzi ezimbili njengokutsho kwesalukazi bazihlinza .

Kwathi kusibamnyama sebemise itende egumeni ukuze balale khona selokhu izindlu zinganeli lapha ekhaya ,lexhiba balitshisile abafana bakoMdluli .

****

Kwathi ebusuku sekuthe cwaka akusazwakali msindo ,abafana bakoMdluli behlukana lomlungu wabo uJohn Moore bamtshela ukuthi bafuna ukugudluza uShandu engathi usefuna ukuba lelunda lapha endaweni .

"Lileqiniso lokuthi lizamgudluza lilodwa madoda ,ngeke lifune usizo lwezinye inkabi zami ?" Kubuza uJohn Moore

"Ngitsho mlungu ,ngamanzi amancane lawa ,njalo uyedwa lumfana ngeke simdingele ithimba lonke ,wena buyela enkambeni yakho ,thina sizasala simsusela amanqe

" kutsho uPhumlani .

"Kulungile ke madoda ,make sure liqeda ngaye " watshibilikisa imota yakhe uJohn Moore wabuyela emuva .

UPhumulani labafowabo banyonyoba beqonda emaMbatheni baphethe izibhamu amapistols bayisikhombisa bonke .

Bagqoke ezimnyama tshu kababonakali ebunyameni .

UShandu wayesanda kujumeka balele etendeni ,wezwa umgaxo wakhe ubamba mfi umkhama ,wavuka gubhu! wama ngezinyawo wadobha uvolovolo lwakhe aluphiwe ngugogo wakhe .

UPeace ubelele eceleni kwakhe laye wavuka wama ngezinyawo .

"Zitshani Shandu kaNdaba ,wavuka okomvundla uvuka esikhundleni ?" Kubuza uPeace .

"Ikhona ingozi esinyenyelayo Peace kasihlale siqhaphile ...

" kasawaqedanga amagama akhe uShandu kwangena u MK insizwa eyinkabi kaPeace nguye obeku duty yokulinda ebusuku bayatshintshana ukulinda nxa abanye belele omunye uyabe elindile phandle ekhangele okwenzakalayo .

"Boss kulabantu abeza lapha bayanyenya ,ngibone bekhanyise ngefoni ,kukhanya bazohlasela " kutsho u MK .

Zavuka zonke inkabi zikaPeace zahloma ngamavovolo .

"OK majita ,wena MK phuma lo Sipho ligugube liyecatsha enyakatho kweguma ,wena Sticks lo Sam qondani ezansi liyecatsha khona ,mina lo Mathousands kanye Shandu sizakwehlela empumalanga siyecatsha khona ,kumele sibayekele bangene egumeni besesibavimbezela sebephakathi ,sibathutshele amacele wonke " kutsho uPeace.

Bachithekana ngokuphazima kwelihlo ,babenyenya ukuze izitha zingaboni lutho .

Iyaqhubeka

Umalukazana kaTatazela 31

Irvin Moyo Mzingwane

77171890

"Lamhla siyayibamba kahle inyoni yethu ,uyalibona itende leli ?

Kutsho ukuthi ulele kilo siyahle simcobodisele phakathi kwalo " kutsho uPhumlani ehlekelela ekhuluma labafo abo.

Sebengenile egumeni emaMbatheni izibhamu baziphethe ngezandla.

Banyonyoba baze baze bafika etendeni ,bakhokha izibhamu bavula itende bekhanyise ngomakhalekhukhwini.

Phaaaa! Kuduma ivolovolo bengananzelele ,inhlamvu yatshaya omunye wabo esandleni walahla isibhamu sakhe isandla sesivuza igazi .

Akula owatshela omunye ukuthi nansi impi ,bahuba phansi njengezinyoka ,begiqika befuna ukubona ukuthi umsindo wevolovolo uvelela ngaphi .

Kwathuliseka zwi omunye lomunye uqaphile ukuthi kungavele kuthi khwatsha! Adubule eqondise khona .

Phaaaa !Phaaa ! Zaduma zilandela inhlamvu zivelela enyakatho komuzi kudubula uMk lo Sipho .

EkaPhumlani yonela ukuzwa ukuthi omadubula basenyakatho komuzi ,bagasela beqonda khona .

Kwathi lowo olimele esandleni bamfaka phakathi kwabo kasenelisi ukudubula bamtshaye ithambo lesandla ,sebehamba bemvikela .

Lokhe bedubulana laboMK loSipho bezwa uSticks lo Sam sebebadubula ngezansi manje .

Zanetha inhlamvu kubo Phumlani bazithola sebehanqwe nxazonke ,o Peace labo Shandu labo sebedubula bevelela empumalanga .

Ngemva kokudubulana okukhulu,

basila ngentunjana oPhumlani labafowabo

baphulukundlela emnyameni ,inengi labo balimele kakhulu bayazibuza ukuthi uShandu ubelabobani .

Ekuseni batshela umlungu wabo ukuthi bahlangane lembila zithutha emaMbatheni .

Wazonda waba bomvu gebhu uJohn Moore ,ethethisa oPhumlani ukuthi yindaba besekelela uShandu echanasa lapha esigabeni .

"Boss yikuthi besingalindelanga ukuthi singamthola ele backup umjida lowana ,thina sibone sesihanqiwe nxazonke " nguPhumlani ezama ukuziphendulela

"Shut up Phumlani ,uyazi ukuthi nxa singavunyelwa ukunqotshwa yizakhamizi ibhizimisi lethu lenkomo lizakuwa?Ngeke sisakwazi ukutshontsha inkomo "

Wathetha uJohn Moore waqeda watshayela abangane bakhe abasebenza amatekisi erenk eGoli ,yizigebenga ezinkulu ke lezo ezingesabiyo ukubulala umuntu ,isibhamu sihlala sikhala njalo nje erenki .

"Ola Jamuri omhlophe ngaphandle kodwa emnyama ngaphakathi ." kusabela indoda elelizwi elijiyileyo ecingweni .

"Ngelengele ? Phuthuma lezinkabi zakho zonke uze ngapha eHluhluwe ,kulesimo engifuna lizongilungisela sona " kutsho uJohn Moore .

"Ungabe usakhala boss ,siyeza ngokuphazima kwelihlo " yavala ucingo lindoda abayibiza ngoNgelengele .

Wahlekelela uJohn wambambatha uPhumlani emahlombe ,

"Ungakhathazeki khandakhulu ,iyeza ibackup, wena khathesi ongakwenza yikuthi welaphise abafowenu amanxeba lawa awokudutshulwa "

Lathi lisiyatshona ilanga inkabi zikaPeace sezihlangene zonke sezithe gwaqa! Sekufike abanye bekhokhelwe ngu jaha abambiza ngo Major ozalwa eTsholotsho ,yingcitshi kwezobulembu ,I computer uyazi phandle laphakathi .

"Yizo Major wenzile ngokufika masinya vele besesilinde lina, izolo silele sihlaselwe ngokuzimfundankwelo kwalapha . Wohle uhlanyele izinto zakho ndoda

" kutsho uPeace ku Major .

Wathatha isikhwama sakhe uMajor wabhodabhoda egumeni akwaziwa ukuthi wenzani ,kwazi yena kuphela .

Iyaqhubeka

Umalukazana kaTatazela 29

Irvin Moyo Mzingwane

77171890

"Baba Ndonsi ngiyathaba ukuthi kusasekhona abantu abakwazi ukumela iqiniso emphakathini njengawe . Ungijabulisile enkundleni ngesikhathi ubatshela iqiniso,kutsho khona ukuthi lisesekhona ithemba lokuthi indawo yakithi isangaphinda ibuyele esimweni sayo sakudala lapho kwakungela bugebenga ." kususa uShandu besemoteni loCele .

"Uyabona Mthiya ilizwe lethu selimi manzonzo ,izigebengu ziyaqolotsha santando zibulala abantu abangela cala . Imfuyo yethu iyatshontshwa mihla yonke kodwa thina sisonge izandla kasenzi lutho ,silindele ukuthi umthetho udlale indima yawo ,induna kayithathi nyathelo kodwa ibukele nje izigilamkhuba zigila imikhuba ntando yazo . "

"Baba Ndonsi utsho ukuthi ngempela induna kayilasandla kulokhu ?" Kungenela uShandu .

"Yikho lami ebengithi ngizakukhuluma Mthiya ,induna uLuthuli ilutshaya indiva loludaba ,okwakhe yikuhlala esithi yekelani abomthetho kube yibo abaphatha loludaba ,lokhu lami kungitshiya ngilembuzo eminengi ngoLuthuli . "

"Kunzima manje nxa kunjalo Ndonsi ,ngoba Indawo engela nkokheli eziqondileyo vele ifile . "

" Laze lafa elakithi elihle madoda ilizwe selibuswa ngamaphathasibhamu ,sesihlalela evalweni zonke izikhathi .,ULuthuli kalabo ubuduna egazini lakhe Mthiya ,into engasiza umphakathi wakithi wakithi yikuthi sibisele ubuduna endlini efaneleyo ,sokuyisikhathi sokuthi simkhiphe uLuthuli ,uzabona izinto zihamba kuhle " kutsho uCele ekhangela uShandu emehlweni .

"Ngabe uqonde ukuthini babuCele ?" Kubuza uShandu engena esangweni lakoCele wayiqobotsha imota yakhe .

"Bhekumuzi Mbatha ,ngizakutshela into ongayaziyo ,kangazi kumbe seyake yafika endlebeni zakho,ubuduna balapha ngobendlini yangakini emaMbatheni , ukhokho wakho ozala uyihlomkhulu kwakuyinduna eyayithandeka kakhulu lapha kwelakithi njalo ekwazi ukwahlulela abantu ,enjalo nje elomusa lozwelo kwabahluphekileyo ,ubuduna bazongena koLuthuli ngendaba zokuthi uyihlomkhulu okunguye okwakumele abuthathe ubuduna wayengakafiki ebangeni lokuthi engaphatha abantu ,yikho umphakathi wakhetha uLuthuli onguyisemkhulu kaMadlanduna yenalo obusayo manje ukuthi abe ebambile .Kwahle kwaba yikho ukuwela kwenduku yobuduna endlini yakoLuthuli ,mina ngithi Bhekumuzi ndodana sokumele livuse amakhanda lithathe okungokwenu . "

"Ngiyakuzwa babaNdonsi ,sizabuye sixoxe kabanzi ngaloludaba ,okwamanje ngisake ngiyepholisa ikhanda ,ngicela uhlale uqaphele baba ngoba laba bantu sebengakuzingela bacine bekuthumba bayekubulala ,ngibabonile indlela ekade bekulandela ngakhona . "kutsho uShandu.

" Ngiyabonga ndodana ukusiza umphefumulo wami kungayisuwe ngabe sengilele kobandayo ,kusobala ungaba yinduna engasiza umphakathi "kubonga uLuthuli.

" Ngiyabonga Ndonsi "kutsho uShandu evalelisa ku Cele ,wayitshaya yatshibilika yadla amahabula iqonda ekhaya emaMbatheni

Endleleni wakhangwa ludwendwe lwamantombazana ehamba ehlabela ,kutsho ukuthi ikhona intombi esiqomile esilungiselela usuku lomgcagco .

Kutsho ukuthi lawa mantombazana alubhekise kajaha ,kutsho ukuthi kuzakuba ledili ,kuzahlangana izinsizwa lezintombi ,kudliwa kunathwa ,kusinwa kumnandi .

Edilini lakhona kuvame ukuthi izinsizwa zike zizwane amandla ngamunye ngamunye ziqwaqwazane kuze kubonakale ezazehlula zonke

Lakanjani insizwa zakoMdluli zizabe zikhona kulelidili ,wacabanga kabili kathathu uShandu waqeda wayimisa imota wakhipha ikhanda wabobotheka eqweba intombi eyodwa kulezi eziludwendwe .

Yabuya ngokuphangisa intombi phela yayijabula ukubizwa yinsizwa ehamba ngemota enhle kangaka .

" Uxolo dadewethu ,ngabe lilubhekise ngaphi?"kubuza uShandu.

Silubhekise ko Ndlovu uGatsheni udadewethu uThobile uyaqoma khona "

"Oh kulungile dadewethu .Ngiyabonga "

Wayinyathela uShandu wayangena esangweni kubo

"Uhambe njani kodwa Mthiya omuhle " kutsho isalukazi esinguMaNgubane ,sibingelela uShandu.

"Kuhle kakhulu gogo ,akuzange kube lenkinga ,kuphela umlungu nguye obefuna ungizondisa ngiphose ngamsukela phambi kwenduna ngaphinda ngazibamba "

*******

Kwasa njengayo yonke imihla ,uShandu wake watshayela uPeace ucingo embuza ukuthi usemi ngaphi ,wathembisa ukufika ntambama lenkabi zakhe ezingonogada .

Ngezikhathi zantambama uShandu wathatha ihawu lakhe lenduku yakhe ,wavalelisa kugogo wakhe walubhekisa edilini ,ufuna ukuyahlangana labafana bakoMdluli ,uzizwa ewomele impi ,intelezi zikaNgududu yezulu ziyamluma .

"Manje uhamba ngenyawo utshiya imota Bhekumuzi ?" Kubuza uMaNgubane .

"Ngifuna ukwelula amathambo gogo ,kumele ngizifundise ukuhamba ngenyawo kwesinye isikhathi ,ngingahlala ngisemoteni ngeke ngilunge . "

Wanyathela ngamandla uShandu ,wabamba umgaxo wakhe entanyeni wawuzwa umi kahle .

Wahamba waze wayafika edilini wathola sekunyakazela amajaha lezintombi kanye labadala .

Babehlabela kusinwa kumnandi edilini .

Zangena insizwa enkundleni zidlala induku .

Ziyaqwaqwazana kabuhlungu ,lezo ezivele zibambelene izikhwili ziyabizelana enkundleni zizwane amandla zitshayane kuze kuvuze igazi .

UPhumlani insizwa yakoMdluli nguye odume ngenduku isigodi sonke.

Bayazi bonke abantu ukuthi phambi kwakhe akulansizwa engama .

Zangena zitshintshana izinsizwa enkundleni uPhumlani ezilahla phansi ngenduku .

Wayemile phakathi kwabantu uShandu ,amehlo akhe atshayisana lakaPhumlani .

Wabobotheka kancane uPhumlani wasekhomba uShandu ngenduku ,okutsho ukuthi uyambiza ukuthi bezoqwaqwazana .

Kazange aphozise amaseko uShandu waphendla abantu waze wayafika enkundleni .

Bama bajamelana lo Phumlani ,wayetshengisa ukuzethemba okukhulu uPhumlani ,weqa yeqa edlalisa induku yakhe ebhula ngayo ihawu lakhe .

Zayisusa ingoma insizwa zakoMdluli zibongela uPhumlani.

"Wathinta thina

Wathint' abangathintwayo

Safa saphela saphe-

nduki njebomvu "

Zaziyivuma ingoma zitshaya amahawu ngezinduku ,zitshaya amakhwelo zigiya ziqephuza kwathunta uthuli lwabopha nki!.

Kwakucaca lakubani ukuthi uShandu uhlangane loxamu omdala lapha ,ngendlela uPhumlani adlalisa ngayo induku kuyacaca ukuthi uyingcitshi ngokwayo .

Weza uPhumlani egiya phambi kukaShandu ,wathi uyayiphosa induku ,akezwanga ukuthi uShandu wagadla nini, wezwa sokuduma ekhanda .

Esathithibele wezwa kuduma embanjeni wagomela waguqa ngamadolo walahla ihawu ebambe imbambo .

Lapho uShandu usegiya phambi kwakhe utshayelela unyawo phansi uyazibongela .

"Ngadla mina Shandu kaNdaba .

UMthiya kaSontshikazi,

Kangihambi ngedwa ,

Ngihamba lengududu yezulu,

Insingizi emnyama tshu!

Eyakhala ekuseni kwathi

Liphakama lana elikazamcolo .

Ngiyinkunzi emidwayidwa

Eyathubela yayawela kwelikaMzilikazi kwelabaThwakazi,

Yabuya ibhonga ibheke KwaZulu Natal ,

Ngithi gwedlani bafana isifikile ingqwele yenu"

Wagiya uShandu lavungama ibandla lonke,insizwa zakoMdluli zathula cwaka zabamba owangaphansi ,ngokokuqala ngqa uPhumlani etshaywa enkundleni kudlalwa induku .

uShandu wadobha induku kaPhumlani wayiphakamisela phezulu waqeda wamsakaza futhi embanjeni ngayo .

Kwezwakala umdumo wovolovolo ,uvelela ebantwini ,ukhona osevulele inhlamvu ezibhekise kuShandu .

Wawela phansi uShandu wathi daca .....

Iyaqhubeka

Umalukazana kaTatazela 28

Irvin Moyo Mzingwane

77171890

Njengoba isimo simi kubi esigodini esiphethwe yinduna uLuthuli ,abantu bafa malanga wonke ,izifuyo zitshontshwa malanga wonke .

Bayaphambana abantu enduneni besiyabika udaba olufanayo .Zolo bekunguNdosi usekaSibusiso lamuhla ngumfana wako Mthwethwa othathwele umhlambi ekweluseni.

Induna uLuthuli yabona ukuthi ingahlala iluthatha kancane loludaba njengoba ihlala isenza ,kuzonakala .

Ekuqaleni ubeluthatha kancane ngoba laye esazi ukuthi uyingxenye yezigilamkhuba eseziqede izwe udla lazo mganu munye .

Baqala ukukhonona abantu ngokuthi induna kayisukumeli phezulu kulindaba ,kodwa babesesaba ukuphumela egcekeni ngokukhonona kwabo besesaba ukubulawa .

Layo induna yaze yabona ukuthi kungcono yenze izaba nje ibize umhlangano kukhulunywe ngayo lindaba ukuze abantu behlise umoya.

Sagijima isigijimi sibikela wonke umuntu ukuthi abantu kabaphuthume enkundleni yenduna kulomhlangano.

UShandu wabona kulithuba elihle ukuthi laye ayefika enkundleni yenduna ayezibonela izitha zakhe mathupha ,uzimisele ukuthi okwenzakalayo kwenzakale.

"Bhekumuzi uleqiniso lokuthi kulicebo elihle ukuthi uhambe enkundleni yenduna ?,

Njengoba zolo lokhu ulele uhlaselwe ngabantu ,kwazibani mhlawumbe izitha zakho zobe zikhona enkundleni zihle zikubone ukuthi uyaphila awufelanga emlilweni? Besezicabanga amanye amasu okukugudluza?" Kubuza uMaNgubane ngokukhathazeka.

"Khululeka gogo,ngeke bangenze lutho,vele impi sebeyiqalile ,ukucatsha ngeke kungisize,babulala uSibusiso ngibakhangele ngazithulela ,bazama ukungitshisela endlini manje sekumele nginyakaze ,aah! Phela nginganyelwa ngamadoda emakhanda ngibhekile

" NguShandu lowo engena endlini kagogo wakhe wafika wathatha induku lehawu okwakungokukayisemkhulu .

Wagqoka lesikhipha sombala wengwe kanye lebhulugwe elimnyama ,enyaweni ufake amathenisi e addidas.

Waphuma ebhula ihawu ngenduku lathintitheka

uthuli ,kuyacaca ukuthi kudala lahlala lelihawu lingasetshenziswa muntu.

"Hehehe waze wakhuluma njengoyihlomkhulu,wayethi nxa esezondile umuzwe ethi nginganyelwa ngamanye amadoda ekhanda"

Kuhleka uMaNgubane ebukele uShandu ethintitha ihawu.

Wazizwa evukwa lusinga lwempi uShandu ,selokhe welatshwa nguNgududu uzizwa elesibindi sesilwane uqobo lwaso.

"Gogo kade sagoqa izandla abantu bedlalela esizweni sakithi ,sokuyisikhathi sokuthi lathi sinyakaze"

UMaNgubane wabamba owangaphansi ebona ukuzimisela lesibindi sikaShandu,wazibuza ukuthi usithathangaphi isibindi esingaka phela ukhule engayisuye uphumasilwe womfana uShandu .

"Gogo usale kuhle ngisake ngithi tshelele! Enkundleni yenduna ,ngiyathembisa akulanto embi engenzeka kimi " Watsho uShandu ezibamba umgaxo wakhe awufakwa nguNgududu ewuzwa ukuthi uhlezi kuhle.

Wangena emoteni wayitshaya yazula ekhangele enkundleni yenduna.

(ENKUNDLENI YENDUNA ULUTHULI)

Kugcwele abantu bathe wathalala ,kukhanya ngamakhanda amnyama lampunga ,bamelele induna ukuthi ifike.

Kuyaxokozela bayaxoxa abantu ,nanguyana uCele uSekaSibusiso ukhona laye , nguye ozwakalela phezulu ngokukhuluma.

Nanguyana umlungu uJohn Moore laye usefikile uhlezi esihlalweni afike laso ,uphahlwe ngamadoda ayizidlakela alezingalo engathi ziyapontshwa ,abafana bako Mdluli labo bahlezi ngemva kwakhe bathulwe zwi engathi balinde impi .

Yafika induna ihamba kancane kancane iphethe intonga yayo ihamba lamapholisa ayo amabili.

Bathula abantu ukuxokozela behlonipha induna .

Yafika yahlala esihlalweni sayo.

"Bantu bakithi ngiyabingelela " Kutsho induna ihlala esihlalweni.

Lavungama ibandla livuma.

UCele waphakamisa isandla ngokuphazima kwelihlo.

"Kuyini futhi Ndonsi singakaqali umsebenzi wena usuphakamisa isandla asikavuli inkundla?" Kuthetha induna.

"Madlanduna ,ngiyahlonipha kuwe nduna yethu ,singakayi khatshana bengicela ukubuza ukuthi kanti lapha silenduna ezingaki? Ngoba nanku ngibona wena uhlezi esihlalweni nango futhi lalo mfokazi undlebezikhanya ilanga uJamuri ubuye lesihlalo laye uhlezi esihlalweni kodwa thina sihlezi phansi sitshengisa inhlonipho kuwe " kubuza uCele.

"Ndonsi yekela ukuthanda umsindo ngento ezingela ncedo ,ungahluphi uJamuri ngoba lapha emphakathini ulusizo olukhulu uqhatshe abasakhulayo balindawo bayasenza kuye ngakho kumele simphathe ngezandla ezifudumalayo " kutsho induna.

"Ngezinye indlela umupha laye ingxenye yobuduna bakho? Njengoba sehlale walinganisana lawe nje esihlalweni?"

"Lokhu okwesihlalo akutsho lutho Ndonsi ,lina angithi liyazi ukuthi induna yenu yimi ,yekela uJamuri ehlale esihlalweni phela yena ngumlungu kajwayelanga ukuhlala phansi"

"Thina esihlala phansi asisobantu balutho?" Kubuza uCele.

"Ndonsi ibambe lapho ndoda, kangifuni kuphikisana lawe"

Yakhwaza induna wathula uCele.

Yaqhubela induna "bantu bakithi lapha size ngodaba oseluhlupha endaweni ,izifuyo ziyatshontshwa abantu bayabulawa malanga wonke ,kodwa akwaziwa ukuthi abenzi bobubi ngobani ukuze bajeziswe "

Yakhokha umoya induna.

Wafika uShandu ngemota yakhe wayimisa emthunzini ,wathatha ihawu lakhe lenduku yakhe wahweda eqonda enkundleni.

Abafana bakoMdluli bakhangelana ngokumangala bembona ephila bayazibuza ukuthi usile njani kuleliyana langabi ,njalo ukhanya engatshanga ngitsho .

Wafika wahlala phansi laye enkundleni.

Yaqhubeka induna "ngicela bantu bakithi sibambisaneni ,ukuze sinqobe lezi zigilamkhuba ezingaziwayo ,abalemibono bengaphawula labo" kuqhuba induna,

Baphakamisa abantu izandla.

"Yebo Mkhize khuluma"

Wasukuma uMkhize waphawula "mina nduna njengomuntu ozihlalelela le! khonale emadolobheni eGoli ,kangilalwazi olungako ngezehlakalo zalapha kodwa ngilombuzo lapha,Kanti njengoba abantu bebulawa malanga wonke akula mumtu ocatshangelwayo ukuthi engaba lesandla kulokhu kuganga?"

wabuza maqede

Wahlala phansi uMkhize .

UCele laye aphakamise isandla kafuni loku kusibeka phansi ,induna kayifuni kumqamba ngoba iyamazi ukuthi uthanda ukukhuluma njalo iqiniso uyalimela .

Yaze yamqamba induna "yebo Cele khuluma sizwe"

"Mina Madlanduna ,angiboni ukuthi ukutshona sibhodisana njengabantwana abancane kuzasisiza ,iqiniso siyalazi ukuthi lokhe kwafika uJamuri lapha asikutholi ukuphumula,imfuyo icatsha mihla yonke ,abantu bafa mihla yonke,isibhamu siduma mihla yonke " kuthetha uNdosi.

"Ndonsi musa ukugcona uJamuri ungelabo ubufakazi ,kulicala ukugcona umuntu ungelabo ubufakazi "

Kutsho induna.

"Madlanduna ,lapha endaweni yakithi yikuthi sekwasala amavaka kuphela angalimeli iqiniso ,akusela madoda sekusele oSidwaba kuphela ,ngabe bayangifakazela lokho engikutshoyo "

Lahleka ibandla lisizwa elikaSidwaba ,yakhuza induna .

"Ndonsi ngikukhuza okokucina ngoJamuri hlukana laye,uJamuri ulusizo emphakathini ,uqhatshe abantwabethu ,wena awuqhatshanga ngitsho loyedwa njalo ungabizi abantu ngaboSidwaba "

"USidwaba ngusidwaba Madlanduna akutshintshi

UShandu waphakamisa isandla .

"Yebo Mthiya khuluma"kutsho induna

Wasukuma uShandu ,abafana bakoMdluli lomlungu wabo uJamuri babonakala bengasacwayizi bayazibuza ukuthi ufuna ukuthini ,ibandla lathula zwi ,lisindwa yisithunzi esesikuShandu ,nxa esukumile kungathi kusukume induna ngokwayo.

"Bantu bakithi ngiyabingelela ,elami lithi kasingatshayini inja sifihla umphini ,mina ngikhulele lapha eHluhluwe ,kwakungekho konke lokhu ukutshontshwa kwezifuyo lokubulawa kwabantu ,kodwa nanku ngithola sekulomlungu uJohn Moore ,abantu bayabulawa ,izifuyo ziyatshontshwa ,alikuboni lina khonokhu ukuthi kunuka santungwana ,mina ngivumelana laye uNdosi "

Wahlala phansi uShandu, ibandla selingunguna akuzwakali ukuthi bathini .

Wasukuma uJamuri engaphakamisanga lesandla .

"Nduna mina cela kubuza kuthi why lomfana delela kangaka ,yena khuluma kuthi mina bulala bantu ,yena bonile mina ngaphi bulala bantu or ntshontsha zifuyo?" NguJohn Moore esecaphukile ,amehlo lawa aseluhlaza ,ihwanqa lakhe selisukuma ngenxa yolaka.

Wasukuma uShandu ephethe ihawu lakhe lenduku yakhe waqonda kuye wafika wamtshela emkhangele emehlweni .

"Mlungundini mina angikwesabi ,ngiyakutshela ngelinye ilanga uzayikhonta imbenge yomile "

"Mtshele mzukulu kaBhedalitshone,satsha ngokuhlukunyezwa libhunu umuntu wokufika " kutsho uCele laye esukuma .

Kwaxokozela enkundleni ,induna yaze yakhuza ,yabachithekanisa abantu yathi umhlangano uphelile.

UShandu wangena indlela eqonda kibo ,wafika emehlukwaneni ezindlela ,wezwa umgaxo wakhe ubophana ,umoya wakhe wamtshela ukuthi kathathe indlela yesandla yokudla.

Wayivuthela imota yakhe ,wathi uvusa amehlo wabona imota kaJohn Moore labafana bakhe ,ihamba kancane phambi kwakhe.

Nanguyana uCele uhamba yedwa ,wakubona ukuthi hlezi laba bantu banyenyela uCele.

Wayinyathela wadlula etshaya ihhuta ephakamisela umlungu labafana bakhe isandla.

Wafika wamisa imota phambi kukaCele.

"Ngena Ndonsi ngikuhambise ekhaya"

Kutsho uShandu.

Iyaqhubeka

Umalukazana kaTatazela 27

Irvin Moyo Mzingwane

77171890

Wethuka uShandu lapho ebona ixhiba lakhe lilavuka amalangabi omlilo ,wakubona ukuthi bekumele atshele phakathi endlini . Ngempela kusebenze umdali.

Wavusa amehlo

,wabona izithunzi zabantu zifohla ucingo lweguma zigijima.

Kwamcacela ukuthi yibo laba bantu ababezomtshisela endlini, kusebenze umdali labaphansi nje wasinda ngokuya esambuzini.

Bavuka bonke abantu lapha ekhaya bevuswa yikutsha kwendlu,lesalukazi esinguMaNgubane savuka sagijimela khona,omakhelwane babuya ngobunengi babo belethwa yikho

Ukutsha kwendlu, babuya ukuzoncedisa ukucitsha umlilo , kodwa kwasekungemva kwendaba ngoba yalotha indlu ngenhlanhla isikhwama sikaShandu ebesilezinto zakhe eziqakathekileyo ezinjengesithupha zisendlini kaMaNgubane .

Into etshele endlini yizigqoko zabafana kanye lebhulugwe likaShandu ebelile wallet elenkulungwane yama rands ,phela ubehambe esambuzini egqoke ukabhudula ngenhla .

"Bhekumuzi qina mzukulu lokhu kuseseyikuqala kokulingwa ,abantu laba bebefuna ukukutshisela endlini abaphansi balile lawe mzukulu wami ."NgesinguMaNgubane leso ngelivevezelayo sibamba uShandu emahlombe simqinisa .

"Kuzamele ngihlale ngiqaphile gogo ,kumbe ngigadle kuqala ,nxa sekunje kutsho ukuthi isisukile impi akuselakubuyeka emuva ,nxa befuna impi bazayithola kimi lapha ."

NguShandu lowo ngokucaphuka okukhulu ,inhliziyo yakhe ithi ayefika koMdluli afike abhubhise yonke into .

EZimbabwe.

USithembile uvela emfuleni uthwele inkonxa ekhanda ,uhamba ezihlabelela ingoma yothando njengoba ekhumbule uShandu wakhe .

Wezwa amazwi abantu besifazana ezihlahleni zemangwe bayobula ingxoza bayaxoxa .

"Hehehe ! NakaSitombi ,uthi izinto zakuleyindawo ziyindidane ngokwayo madoda ,ngithi insambatheka ngokwayo inkemenkeme ,uSithembile ngoselotsholwa nguShandu ,uShandu umakotijaha kaVusumuzi? Wake wakubona ngaphi lokho ." kuhleka uMaNdlovu ezixukwini.

"Hehehe okwakoTatazela khona kungakutshiya unkemile Batayi! Zolo lokhu uVusa ubuye lenkonkoni egumeni ethi ngumalukazana ,sathi yebo sibonile dukuduku ! Nango uVusa ezibophela efela inkonkoni sathi yebo sibonile ,zukuzuku uSithembile ngose Puropozwa (proposed) ngumakotijaha emfuna umtshado laye wavuma .

UTatazela laye ngamadevu acijele eceleni wavuma ,phela ngizwe kuthiwa ngelanga lepuropozali (proposal)yakhona waye skida ngemota esenza izimanga uTatazela ethela abantu ngothulu hehehe ."

"Hhayi! Phela lawe okunye usuvukwa ngumona MaNcube ,angikhohlwanga ukuthi wawungalaliseki ufuna ukuzidlisa satshanyana kuShandu ,phela uyazifela ngojamludi imamba yezihotsha esayizwa ngendumela hhaha " kuhleka uMaNdlovu .

"Ungenzi engani wena wawungamfuni ikanti ke wena nguwe owawukhuluma ngaye kakhulu kkkklereee ree! USithembile usehluthunile kudala nguye osezazitika ngemamba hehehe."

"Yekela uSithembile laye ende yooh! Kunini waba ngusimayedwa njengelanga . "

Wayebalalele uSithembile inkulumo yabo ,wezwa egcwalelana ngolaka ,wazibuza ukuthi abantu banjani bathanda indaba zabantu kangaka? Wafisa ukuthi ngabe uyehlisa umgqomo aqonde kibo labo mama afike ababhonye ngenqindi kungabindabazalutho ,kodwa wabahlonipha ngoba bengabantu abadala .

Wabuyela ekhaya umoya wakhe ungajabulanga inyembezi zithonta .

"Sithembile mntanami kwangathi uyakhala nje kutheni ?" Kubuza uTatazela .

"Baba ngikhubekile emoyeni, abantu bahamba bengikhuluma kabi phandle lapha"

"Bathi wenzeni? Ngobani labo ?"

Wahambisa inkonxa emkulwini uSithembile wabuyela kuyise wafika wamtshela konke akuzwileyo .

"Musa ukukhathazeka ndodakazi ,ngizayilungisa lindaba,abantu bahamba begiya ngomuzi wami hehehe! Bacelana amakhowa ngomuzi wami? Bagavelana igwayi ngezehlakalo ezingehlelayo ,ngizama ukulungisa indaba zomuzi wami bona bahamba behaza! Amanga ,

they will see me today ,they will know who am i,

mina ngingu tatazela kutsheke ibhetshu lendoda ,

umtshayi wendoda iyeceba kugogowayo .

Ngiyabuya MaMoyo "

Watsho edobha iwisa lakhe uTatazela usekhohliwe lokuthi ugqoke ukabhudula omfitshane levesi yombala wengwe ayithengelwa nguVusumuzi ,enyaweni ufake amanyathela amakhulu .

Wahweda eqonda koKhumalo .

Wathi engena koKhumalo uTatazela uMaNcube umkaKhumalo laye esanda kungena ebeka ingxoza engalanini.

"Ekuhle Khumalo baba " Wakhuleka ngamandla uTatazela.

Waphuma uKhumalo ekhiphe phezulu isikipha wasala ngebhulugwe elilezigamba .

"Fika Mpangazitha " wavuma uKhumalo .

"Khumalo angizanga ngobuhle lapha ekhaya ngize ngendaba enzima "

"Ndaba bani Dlodo ?"

"Umkakho uhamba etshwatshwatha indaba zakwami . Kanti kengibuze Khumalo ? Kalilamuzi wenu yini okumele liwunake loMaNcube litshwatshwathe ngawo ukuze abantwabenu behlale bejabule?" Wabuza edlalisa isagila sewisa lakhe elilekhanda elingangelomntwana uTatazela.

"Umuzi silawo nje! Dlodlo yiwo lowu esihlala kuyo " kuphendula uKhumalo.

"Manje umkakho ukuthathaphi ukuhamba etshwatshwatha ezakwami ezingeke zimnike ngitsho i gain ,etshiya ezomuzi wakhe ezidinga ukuqondiswa ?"

"Usetheni futhi uMaNcube makhelwane ? Hhayi lomfazi uyahlupha bantu" kuthetha uKhumalo.

Wayibika injengokuba indaba uTatazela kazange atshiye lutho .

"Khumalo lawe uyakwazi ukuthi ngavelelwa ngamatshwa emzini wami ,kodwa ngazama ngazo zonke indlela ukuthi indaba zakwami ngizilungise ngendlela yami ,kodwa umkakho ulesibindi soku hleka umntanami ethi yini ndaba ethathwa nguShandu obesenza ukungcola loVusa .

Lokho akudingi yena nix ,babangisa umntanami indoda ngenxa yomona ngizwa bethi bayamhalela uShandu. Khumalo lingamadoda anjani bungaphi ubudoda benu ?

Abafazi benu bahamba bekhuluma ngabojamludi bakweminye imizi?"

Wathi esizwa lelo uKhumalo kwangathi sebembasele umlilo nguTatazela ,phela kayikho indoda efuna ukweyiswa ngendaba zasekamelweni ,lokho kuyikwehlisa isithuzi sendoda .

"Wena Sizakele khemani buya lapha uzongitshela ukuthi usithathangaphi isibindi sokuhamba utshwatshwatha indaba zakweminye imizi ,usukhuluma ngabojamludi bakweminye imizi awulasimilo Sizakele hu?" Wavutha engabaselwe uKhumalo ,wahuba eqonda emkulwini wethula isitilobho ,wagadla ephindelela kuMaNcube.

"Ngiyaxolisa baba , nguMandlovu okade ekhuluma lezizinto " Kuncenga uMaNcube.

"Shut up! UMaNdlovu wakho lowo nguye okufundisa ukungaziphathi wena ungumfazi omdala huh?

Kusukela lamuhla hlukana loMaNdlovu ,ukukubona uhamba loMaNdlovu ngizakubulala zhi!"

Watsho emtshaya waze wazithambisela uMaNcube phela uligwala lokuba ligwala .

UTatazela yena wayethi " tshana nyamazana .Ngabe indoda yakho ayikutshayanga ubuzatshaywa yimi uqobo,manje mina bengizakubhonya ngewisa lami leli "

Wavalelisa uTatazela waqonda komaNdlovu wayakwenza esifanayo uTatazela .

******

EHluhluwe

Ngelanga elilandelayo uShandu wathatha umakhalekhukhwini wakhe watshayela uPeace.

"Hello Peace ,isukile lapha ndoda ,ngicela uhlanganise inkabi zakho lime ngomumo "

Iyaqhubeka