يلا نبلش ريجيم

من العيادة مباشرة للنادي....

آخر وجبة البارحة ٣ العصر ، بالليل آرام ما خلاني نام منيح ، الصبح طلعت عالدوام نص فايق ..... طريق الرجعة يمر جنب النادي ..اول شي قلت لحالي خليني روح عالبيت آكل ونام مشان اطلع للنادي نشيط.....بعدين اتخذت القرار الي يعتبر دائما صح :

كيف ما كان و امتى ما كان العب رياضة ، لا تستنى الظرف والوقت المناسب لانو ما رح يجي.....

طبعا الافضل الواحد يكون مرتاح و نايم منيح قبل الرياضة ......
قلة النوم بتخليك تعبان و بتحس بالجوع و السترس و بتضعف قدرتك الذهنية على مقاومة الاكل و الالتزام بالحمية .....

اسوأ الفترات اللي مرت علي خلال مسيرتي الريجيمية و طلعت فيها من السيستم ، كانت الفترات اللي عانيت فيها من الارق وقلة النوم....

مافي ريجيم بدون نوم كافي ......

رابط البوست المثبت ، فيه تجميعة البوستات الاساسية بالصفحة.....

اللي فايت جديد وحابب يجمع شوية معلومات......

https://m.facebook.com/story.php?story_fbid=666406995693843&id=100069736466371

بوست مكرر....

شي من تجربتي مع الريجيم ،
اول سنة (٢٠٢٠-٢٠٢١) ، اللي نزلت فيها ٤٢ كغ ، كانت اسهل مرحلة مريت فيها .
النظام كان واضح ، صريح....ضبط الحريرات ، رياضة يومية.....نقطة انتهى.
المرحلة الاصعب هي من سنتين لهلا....والسؤال ،كيف رح كمل ؟ اي نظام ؟ اي حمية؟؟؟
مافيك ترجع لعاداتك القديمة ، وبنفس الوقت مافيك تضل ملتزم باكل خاص فيك لحالك و رياضة يومية متل اول مرحلة.
بهالسنتين ضليت عم راوح ، مافي نظام محدد .
جربت آكل مع الولاد أكل عادي مع حذف الممنوعات ، بلشت انجرف شوي شوي ، ما حسنت اتحكم بالكميات.
، جربت ما آكل ابدا طبخ ، حواضر و نواشف صحية ( شوفان موفان) ، صرت عم افقد الطاقة اللازمة للرياضة .
جربت اطبخ اكل لحالي ، متل الاول ، وبالعطلة اكل مع البيت ، صرت عم خبص بايام العطل والاجازات.
طبعا دائما وابدا الصيام والرياضة مستمرين ، اكل البيت كمان اقرب للصحي و مطابق تقريبا للمعايير.

النتيجة:
الحمية والريجيم هو نظام حياتك الدائم بعد مرحلة تنزيل الوزن ،هو كيف رح تحافظ على جسمك رشيق وصحي و قوي . الاف الاشخاص تمكنوا من تنزيل وزنهم ، قليلون جدا من حافظوا على الوزن الجديد ، وهاد هو سبب فشل عمليات تصغير المعدة اغلب الاحيان .

افضل حل برأيي :
البيت كله لازم يبتعد عن جو الاكل.......قولا واحدا.
جو الاكل يعني الطبخ والنفخ كل يوم ،وتحضير اشهى الاكلات ،والاهتمام بتفاصيل الاكل ، و ملأ رفوف المطبخ بالنقرشات والتسالي .
الفطور شوية حبوب ،بذور ، جبنة ، بيض .
الغدا شي صحي سهل ،لحمة ،خضرا باي شكل بسيط ،بدون احتفالات.
والاهم الاهم التعود على هيك جو...
التعود التعود....رح يخلصك من المغنطيس اللي بيجذبك للاكل.
اذا ماتعودت ، ما رح تحافظ على حالك ...مافي حدا بالتاريخ قدر يقاوم المغنطيس طول عمرو .......

اول يوم بعد العاصفة ، واول طلوع للشمس بعد طول اعتكاف، واول مشوار جري عالنهر بهانوفر ........

بمحل سكني القديم ، كانت الطبيعة متداخلة مع البيوت ، بدقيقتين تصير بجبال العنب .....هون كمان نحن باطراف المدينة وفي مساحات خضرا حوالينا .....

من بعد ما سجلت بالنادي صرت بلعب حديد اكتر من الكارديو ، عم قول لحالي : مادام جيت وجيت خليني العب حديد ، بالبيت كمان فيني العب كارديو.....

صباح الخير.....

مباشر....

😊😊😊😊

ملوخية بالشوفان .....قبل و بعد....😁😁

الولاد اكلوا رز مع الملوخية ، بس هن لسا صغار و ما عندهم سوابق مع البدانة والضغط متلي ، مسموحلهم ما ليس مسموحا لي.....

اللي بده يضعف أو بده يعيش حياة صحية لازم يتعامل مع الأكل كأنه عم يتعامل مع الأدوية بصراحة..... الكمية والمحتوى أهم من الطعم والشكل .....دائما وابدا لازم تغير من نظام وطريقة الأكل اللي عملت فيك هيك......غير هيك ما رح تتغير.

......
😌🤢😌

بيض و خضرة وزيتون وجبنة ، وكله معمول بالزبدة....
فطور مشبع ، مغذي .....بشرط ....تاكلو بدون خبز....

😁😁😁

يوم تمرين الارجل + المعدة ، اصعب يوم ، أول يوم بعد التمرين يمر عادي ....ابتداءا من تاني يوم بضل أعرج يومين تلاتة.....بس بيكون احساس حلو بالتعضيل......

لا البوتوكس ولا الفيلر ولا المكياج رح يشدوا الجسم و يحسنوا البشرة و يأخروا علامات العمر.....
السكري والشحوم وامراض القلب و ترهل العضلات و ترققةالعظام هن اللي بيسرعوا ظهور علامات تقدم العمر ....
التغذية الصحية والرياضة المنتظمة هن اللي رح يعطوك المنظر والقوام والرشاقة ، وأقل تكلفة جسدية و مادية من محاولات اخفاء تجاعيدك .....


😊😊😊😊😊😊

الأكلة الوحيدة المشتركة بين شعب الريجيم والشعب العادي.....

فروج مشوي بالفرن ، على خضرة مشكلة ...

كلشي دفعة واحدة ، بروتين و دهون مشبعة من اللحم و كارب من البطاطا و الخضرة ...
العيب الوحيد انو الدهون عالية هون ، فلازم تنتبه لأكلك باقي النهار وما تتجاوز حدودك المسموحة من الحريرات...أنا بيوم الفروج بعتمد عليه كوجبة وحيدة ......

الدهون الحيوانية ضرورية للجسم وتعطي شعور مديد بالشبع بحيث ما تضطر تاكل كل ساعتين اكل خفيف و غير صحي ، بس لازم تتناولها بحساب ، لان حريراتها عالية و الاكثار منها مضر للجسم...

فائدة الصيام المتقطع انها بتحميك من الاكل المسلي ، او الاكل لتمضية الوقت .
لو انا ما كنت صايم ، كنت أكلت شي الف حريرة بدون ما حس ، بغض النظر اذا هالاكل صحي او لا ......
القاعدة الاساسية بالحمية هي الكمية ، النوعية تجي بالدرجة التانية.....

٣ب ١
فاصوليا حب على لحم بقر ( بروتين نباتي وحيواني ، كربوهيدرات )
برغل أسمر (قمح كامل الحبة ) ( كربوهيدرات والياف)
صدر فروج مع خضرة مشكلة ( بروتين و كربوهيدرات والياف )

كله معمول بكمية قليلة من السمن الحيواني ( عملناه من الزبدة الحيوانية الخالية من الزيوت المهدرجة ) .

الغدا كان مرقة بامية و رز ، أنا حطيت شوفان بدل الرز .

الرز والبرغل لسا عم ينطبخوا عنا بالبيت ، مع أنهم يعتبروا كربوهيدرات خفيفة او سريعة الامتصاص، طبعا بدون خبز و بكميات قليلة و تواتر قليل ، ودائما مع لحمة و خضرة لتخفيف الأضرار و جعلها وجبة غنية. انا بعتبرهم أكتر أكل مخالف مسموح به .

البدائل الافضل هي الرز البني والبرغل الأسمر والفريكة والقمح الكامل ، بس لسا ما عرفنا ندخلها بنظامنا اليومي .

الولاد و الشباب والرياضيين مسموح لهم ما ليس مسموح للبدينين و مرضى السكر والقلب .......

الوجبة الاولى : مرقة بطاطا وصدر فروج بدون زيت ...حاف بدون تفننات...هاي مشاني
الوجبة التانية : بطاطا محشية لحم مفروم وخضرة وموزريللا ومشوية بقلاية الهوا.....مشان الولاد

هلا الوجبتين يعتبروا صحيات ، بروتين و كربوهيدرات صحية ودهون مشبعة حيوانية وخضرة....
بس أنا برأيي ان أكل الريجيم هو الاكل بأبسط اشكاله ، أكل المرضى والمشافي على قولة ستي، حتى ولو على حساب الطعمة والشكل ، لازم تاكلو لتعبي مصادر الطاقة عندك مو لتستمتع .
احيانا كتير بالتعليقات المتابعون يقترحوا علي طرق تحضير وجبات بتكون معقدة شوي بهدف تحسين الطعم والشكل ، طبعا مشكورين ويمكن مو كل الناس تقدر تستسيغ ( يمكن أنا أول واحد كردي يستعمل هالكلمة 😁) الاكل البسيط ، بس أنا دائما بدفع باتجاه دفع الاولاد بعيدا عن اجواء الاحتفال بالاكل ، فرزا اليوم أمهم حبت تبسطهم...😁.

تانيا : البطاطا المشوية نسبة الكارب اعلى بكتير من البروتين ، رح تضطر تاكل كمية كبيرة لتوصل على حاجتك من البروتين ( دائما وابدا ١غ لكل ١كغ من وزنك ) ، وهاد بالنسبة للعائلة مو كتير غلط ،بس غير مناسب لشخص وزنه كبير وعم يتبع حمية تنشيف .

اليوم عملت نص ساعة جهاز الدرج ، ما يعادل صعود ١٠٨ طوابق ....

شقد تتوقعوا حرقت ....؟؟؟

اقل من ٣٠٠ كيلو كالوري....😔😔😔

تعرفوا شو هي ٣٠٠ ك.ك ؟؟؟

هي رغيف خبز واحد ...
هي قطعة تويكس....
هي مثلث بيتزا صغير...
هي ٥٠ غ مكسرات...

لذلك المهم بتنزيل الوزن هو تخفيف الاكل....الرياضة بحياتها ما رح تلحق تحرق المصايب اللي عم ناكلها....

لما عم نحكي عن قطع السكر ، فهاد يعني عمليا التقليل منه قدر الامكان.....السكر رح تاكلو رح تاكلو شئت أم أبيت....اما بشكل صريح على شكل حلويات و مشروبات و معجنات ، او مخفي بالمعلبات والاكل الجاهز والمغلف....

السكر المخفي هالمرة فات على بيتنا بطريقة ذكية....

انا بعرف انو دبس الرمان فيه نسبة سكر ، بس انو توصل الامور انو ما يحتوي على أي نسبة من عصير الرمان فهاد عار كبير .....

المكونات : 0%, دهون 0% بروتين ،31 % سكر ....😔😔

يعني عمليا ماء وسكر و ملونات صناعية......

والاحلى انهم كاتبين كلشي ومعترفين ، بس هم معتمدين على جهلنا و ضعف ثقافتنا الغذائي ....

طبعا لحسن الحظ العلبة بتضل شهور بالبيت وما تخلص ، بس تشتي نةخوةش نة خوشة......( الاستغباء مو زين )....

آسفين.....😊😊😊

مباشر.....
😊😊

نروح عالنادي ولا ما نروح ؟؟؟؟؟
السؤال الذي غير وجه الأرض.....😊😊😊😊

بناء على رغبة الجمهور ، وجبة اليوم لحم خروف ....بس بالطريقة البسيطة ، مو مندي ولا مظبي ولا مدفون....😁😁😁😁

كيف هالاكلة المعباية دهون تخليها صحية قدر الامكان ....؟
تاكل اللحم الاحمر فقط بدون دهن ، شوية مرقة مو مشكلة ، ماتاكل خبز .....
الولاد أكلوا خبز ، جبتلن خبز من الفرن التركي خصوصي ، انا ما أكلت خبز .....

طبعا الدهون هي دهون حيوانية طبيعية و ليست دهون مصنعة او مهدرجة ، بس المشكلة ان حريراتها مرتفعة جدا ، فالكمية يجب ان تكون محسوبة.
( حتى الاكل الصحي المفيد يجب الحذر بالكميات ، متل المكسرات او زيت الزيتون مثلا)

كعك صحي....

دقيق اسمر،شوفان، مكسرات، زبدة حيوانية ،سكر ستيفيا .....

😊😊

الفن التجريدي تحول لشوربة ( قرع ،جزر،بطاطا ، بصل )
والشوربة بدها اضافات مشان تصير وجبة كاملة...
شوية خلطة شوفان ، بذور شمس ، كريمة وبتصير جاهزة....
ينقصنا بروتين ، اكلنا طون معها....
😊😊😊😊

الفن التجريدي....
😊😊😊😊

حصة الكارديو اليوم كانت :
٣٠ د جهاز الدرج ، صعود ما يعادل ١١٠ طوابق ، حوالي ٣٠٠ كيلوكالوري
١٠ د جهاز التجذيف....
٣٠ د بساط المشي مع ميلان للاعلى ، اقل من ٣٠٠ ك.ك....

كنت لسا صايم صارلي ١٨ ساعة ......

قهوة سريعة قبل الذهاب للنادي ....
مو متل قهوة العشاق والمثقفين
ولا قهوة النسوان لما يجاكرو بعض ....😊
اليوم ناوي العب كارديو ....بعد يومين ورا بعض حديد ....😁

تذكير:
انا عم نزل تجربتي الشخصية اللي انا نزلت عليها ٤٠ كغ وكملتها و مرتاح عليها ، بس المعلومات النظرية عن التغذية ثابتة تقريبا وتنطبق عالكل.
شفت الصيام المتقطع افضل حل لتحديد كمية الاكل و السيطرة على الجوع وفوضى الاكل، بمجرد مابلش صوم عم حس بالالتزام واقدر اظبط اعداداتي بقوة . الرياضة عم العبها مشان صحتي ولياقتي ونفسيتي ، ما عاد الها علاقة بوزني ، اصلا انا نسيت الميزان ، تيابي وشكل جسمي وعضلاتي هن مقياسي ....

انت مو ضروري ابدا تطبق طريقتي ، مو ضروري تضل صايم ساعات طويلة اذا عم تحسن تسيطر على كميات اكلك . بدك تعرف شقد لازم تاكل و شو تاكل فقط ، باي طريقة تشوفها مناسبة لنفسيتك و وقتك . يعني شخص عم ياكل ٤-٥ وجبات صحية صغيرة محسوبة افضل بكتير من شخص يصوم ٢٠ ساعة وبعدها يخبص ، هالشي انا وضحته بالتفاصيل بالبوستات القديمة . طبعا مع تكرار مرات الاكل فانت معرض للاخطاء اكثر ومعرض انك تطلع لفوق بالحريرات اكتر.....

الرياضة مرتين تلاتة بالاسبوع ،شو ماكانت ووين ماكانت ، انا ضليت ٣ سنين العب حديد بالبيت ، افتح اليوتيوب على شي اسمه تمارين بوزن الجسم بالبيت و شوف جسمك كيف بيتغير ، جيب بسكليت صغير عالبيت، اي حاجة .....
شوية التزام وحركة رح توصل ل٧٠-٨٠% من هدفك وتصير ريجيمفان 😁، بعدها رح تفوت بالجو وتعرف شو المناسب الك ،تشيل من هون تحط هون ، انا لهلا عم غير نظامي كل فترة.....

وصباح الخير........عصبتوني .....😁

قبل ٩ دقايق.....

😊😊😊😊

قبل ٩ سنوات....
😊😊😊

فطور اخوات آرام ....
بيتزا الشوفان ....
كالعادة خلطت الشوفان والبيض واللبن ( عالتوكل ) بالمقلاية وصارو متل العجينة ....
حطيت فوقهم جبنة و زيتون و صدر فروج وفليفلة وكتشب وغطيتهم ....
مدة التحضير ١٠ دقائق....

المخالفة الوحيدة : السكر اللي جوا الكتشب

انا ما اكلت ....صايم.....

😊😊😊😊😊

فطور آرام اليوم :
جبنة ( كمصدر للبروتين والدهون المشبعة )
موز ( كمصدر للكربوهيدرات والفيتامينات والمعادن )
بندورة ( الياف وفيتامينات ومعادن )
توست اسمر ( كربوهيدرات صحية والياف )

دائما :
الدهون تعطي احساس طويل بالشبع
البروتينات هي الهيكل الاساسي لبناء العضلات والعظام
الكارب هو مصدر الطاقة

وصباح الخير....
😊😊

جمعت بعض البوستات اللي كتبتهم ببداية انشاء الصفحة من سنتين ، فيهم المعلومات الاساسية ،خاصة للي فايت جديد عالصفحة .
رح ثبت البوست وحاول اجمع باقي البوستات ....
بالتوفيق للكل...
😍😍

هلا اذا الواحد بأول عمره و ماعنده مشكلة بدانة أو أمراض مرتبطة بالتغذية ، فبيكون عنده هامش ياكل اكل عادي او بالاحرى اكل جماعي ، ويحسن يحكي عن الاعتدال والتوازن ...

بس بلشت بالتلاتين وعندك كرش ( حتى لو وزنك عادي) ،او بلشت عندك امراض استقلابية ( سكري،شحوم ،كبد دهني، حمض بول، ضغط وقلب ، تصلب شرايين ) فانت لازم تصنف حالك مريض او حالة خاصة بالبيت ، لازم اكلك يكون مخصص مو متل اكل غيرك .
مافي واحد بينزل وزن وهو عم يعبي صحنه من الطنجرة او ياكل بنفس الصحن مع غيره . مافي حدا ينزل وزن بدون مايحسب سعراته .

مو مشكلة اذا اكلت شوي من اكلهم ،اذا اكلهم بيناسب حميتك ، بس هالشوي لازم يكون محسوب ، باقي حاجتك تاخدهم من اكلك الخاص .
مثلا : انا عندي شغلات دائما موجودة بالبيت ( خلطة الشوفان، لبنة عالية البروتين، بيض مسلوق ، خضار مجمدة ، تونة ، بروتين بودرة ) ، هدول هن الهيكل الاساسي لحميتي ، باخد منن ٦٠-٧٠% من حاجتي اليومية . اذا اكل البيت ناسبني فباكل معن وبكمل حاجتي اليومية ، اذا مو ناسبني فبحضر لحالي شي خاص فيني ،او ما باكل .

(غدا البارحة: صدر فروج مسلوق ، مرقة فاصوليا ، خضار مشكلة مسلوقة (بروكولي، زهرة،بازلا) ...

أنا عملت هالصفحة بالأساس من أجل التفاعل ومشاركة التجارب والآراء ، و بنبسط كتير بالأخذ والرد مع الأصدقاء والمتابعين .
صديقي د.مسعود طرح مشكورا تساؤلا جميلا بأحد التعليقات :

Massoud Ahmad Ahmad

- الله يعطيك و يعطيه العافية ، بس أنا عندي ملاحظتين من بعد إذنك الأولى إنك شبعت من متاع الحياة و الحمد لله و أكلت خيرات الله سكريات و ممنوعات ليش عم تحرم هالطفل البريء من هالمتع يعني صغير و ما ياكل بحياته علكة مدورة و لا مصاصة يعني مو ظابطة معي ، تاني شي هالاكل اللي عم تاكلو اكيد صحي و لا هي شركات التسويق هي اللي عم تفرض آراءها علينا يعني من كذا سنة قامت الدنيا على السمن و بلشت الناس بالزيوت المهدرجة و هلا بلشت الناس عم تترك هالزيوت بقا انا من رأيي المتواضع انو الانسان يضل معتدل بكل شي و تقبل مروري و شوكرن.

أنا جاوبت على شكل عدة نقاط :

ملاحظاتك حلوة .. متاع الحياة كما تسمى هي سبب اغلب الامراض التي اصابتتي واصابت عائلتي ، البدانة والضغط والسكري والشحوم ، وهدف الريجيم الاساسي هو القضاء على هذه الفكرة ، فكرة ان متع الحياة هي الحلويات والمشروبات الغازية والنقرشات.
نحن غير ملتزمون ١٠٠ % بالحمية الصحية ، نحاول ان نصل لنسبة ٧٠-٨٠% مثلا . نأكل التوست الاسمر عالفطور الجماعي، الرز والبرغل بدون خبز على الغداء ، كل فترة أكلة مخالفة ، في العطل نخرج ونأكل من السوق ، الاولاد يأكلون الحلوى والشيبسات أحيانا .
موضوع شركات التسويق صحيح نسبيا ،ولكن بنطاق ضيق ( مثلا بذور الكينوا،ملح هيمالايا ، مكملات الفيتامينات والاوميغا، شاي المابعرف شو ) ، الثوابت معروفة و مثبتة وتاريخية ، واذا التزمنا بها فقط فسنقضي على ٩٠% من اسباب البدانة . في الطب مثلا هناك مراجع ثابتة بنسبة ٩٠% ، وكل سنة تصدر اصدارات جديدة منها ،هامش التغيير ليس اكثر من ١٠% . ببداية ثورتي تابعت هذه المواضيع بتفاصيلها، الآن التزم بالثوابت فقط .
السمن الذي كنا نستعمله كان سمن نباتي متحول ، وفعلا الزيت النباتي يبقى افضل من السمن النباتي . الدهون الحيوانية افضل من الاثنين ولكن مشكلة شعبنا بالكميات الكبيرة التي يستهلكها .
نظامنا الغذائي التقليدي سئ جدا ولاينفع معه الاعتدال والوسطية ، والدليل هو نسبة انتشار الامراض المرتبطة بالتغذية السيئة بمجتمعنا.

😍😍

مابعرف ليش انتو عم تحسوا ان ولادي بياكلوا هالاكلات غصبا عنن ...
انا فتت عالمطبخ ظبط لحالي وجبة مشان روح عالنادي ، سألت هيمن اذا ياكل معي .....قال مابدها سؤال مادام رح تعمل شي تخبيصة من اختراعاتك...😊😊😊
اسهل واغنى وجبة فطور ، بيتزا او كعكة او عجة ( سموها على كيفكن ) ...خفقت البيض ( ٨ ) مع خلطة الشوفان و اللبن بلحسة زيت ، غطيت المقلاية خمس دقايق وهاي النتيجة......

طبعا فيكم تضيفوا كتشب اوجبنة او زيتون .....يعني تطوروها لبيتزا على كيفكم....

هلا أحيانا كتير عم تصير قصة الريجيم والحريرات والشوفان مصدر للنكتة والسخرية....مابعرف شو أصل هالشعور...

بس القصة ابدا مو ترف وبطر .....ولا قصة نحافة ورشاقة وجمال ...

القصة قصة حياة وموت ....

اهلنا و رفقاتنا عم يفارقونا بأعمار صغيرة بسبب أمراض يمكن تجنبها بشوية ثقافة صحية....

ابن عمتي ، من جيلي، ٤٥ سنة ، البارحة صار معه جلطة قلبية ، حتى بالقسطرة ما حسنوا يفتحوا الشريان المغذي للقلب ، اضطروا يعملوا عملية قلب مفتوح بنفس اليوم........ انكتبله عمر جديد....

صبت حالي بالعين...
كنت بزيارة لبوخوم ، هنيك ضليت محافظ عالرياضة بالنادي اسبوع كامل...
بآخر الزيارة بلشت تطلع معنا أعراض كورونا ....
اسبوع كامل بالفرشة ، واسبوع اللي بعده نقاهة.....
اليوم لرجعت للرياضة عالخفيف....
😔😔😔😔

عملت لحالي وجبة شوفان مع حليب و قطع تفاح كوجبة قبل التمرين..
آرام شافني عم آكل ، فتحت شهيته و بلش ياكل معي...
😉😉😉

حزورة اليوم :
آرام شو عم ياكل ؟؟؟؟
😊😊😊

نرجع لموضوع الدعاية و سياسة دس السم بالعسل....

هالعصير اسمه hohes C ، يعني فيتامين سي عالي ، مع كتابة كبيرة عن فيتامين د من الشمس ( كيف من الشمس ؟ مابعرف )...

بدن يعملوا ايحاء للمستهلك انه رح يشرب عصير صحي غني بالفيتامينات ....
طبعا بس تقرا المكونات ،اللي مكتوبة بخط صغير ، يبين معك كارثة السكر ، تقريبا ١٠ غ لكل ١٠٠ مل ، يعني كل كاسة عصير فيها ٢٥ غ سكر ، خمسة ملاعق وسط او خمس مكعبات .....طبعا سلملي عالبطل اللي بيكتفي بكاسة وحدة .....😊😊

نرجع ونقول ، المصيبة بهيك منتجات انك عم تستهلكها علاساس هي صحية ، فبتاخد كميات غير محسوبة و بتعطيها لولادك كمان.....

.....

باعتبار آرام بيحب البيض ، فعم نحاول نمرق من خلالها الأكلات اللي بدنا ياها .
اليوم حطيت مع البيض شوية خلطة شوفان ( شوفان، نخالة قمح،بذور كتان، لوز ) مع ملعقتين لبن ، صاروا متل العجة او عجينة البيتزا....
فطور كامل ( بروتين ،دهون صحية ،كارب صحي ) ...
صفر سكر، صفر زيوت نباتية ، صفر كارب خفيف...

على اساس وحدة الو وتنين الي ، بس هو شفط حصته وبلش ياكل من عندي....
😁😁😁

مثال بسيط عن علبة أكل الطفل :
بطاطا مسلوقة ، إجاص، توت بري.....

قد يتساءل سائل : شو هالبطاطا المسلوقة اللي عم تطلع بكل الصور..؟

أنا مرة كتبت إنو لازم يكون في بالبراد دائما شي صحي تلجأ اليه عند اللزوم كسناك ، اذا اجو ولادك من المدرسة ومافي اكل جاهز ،او بين الوجبات كسناك ، وذكرت مثال الحمص المسلوق ، العدس المسلوق، البطاطا المسلوقة ، خضار مشكلة ، بيض مسلوق .

هالفترة نحن مرضانين ومانتحمل الاكل التقيل و عم نسلق بطاطا كل يوم ......كمان كان في عرض على جوال البطاطا بالكاوفلاند واضطرينا نجيبه كله ، فعم ناكله قبل ما يخرب.....

😁😁😁😁😁😁