BAC 2022 MATH DZ

شحال كاين أفراد باك 2023 بلاك نحطلكم ملخصات و مراجعة نهائية ؟؟ اذا كاين مهتمين يخلو تعليق 🤛🏻🤜🏻

الذكاء الاصطناعي 🫤

مليحا لاناليز في هدوء الليل هه

العب العب مبعدا كي تخلاص لاكوب دوموند ابدا تخمم كيفاش طلع العام هه

تشفاو يامات الباك كنت نقلكم تطلعو للجامعة و تندمو هه

جيبو 20 ف l'analyse نمدلكم iphone 13 pro max 😂

واش من تخصص راهو بقوة فالصفحة 💡 تقدرو تتبادلو المعلومات فالتعليقات

⭐ بالنسبة لي راح يديرو اقامة نعطيكم بعض النصائح المهمة اول حاجة 💫 حاول تنظم الغرفة تاعك علابالي مكاش إمكانيات مادية مي اتفاهم نتا و زميلك فالغرفة اشرو اشرو فاشات للباب ادا ما كانش فيه و راني ناكد خاصة ادا كان عندك pc 🖥️ بسك كاين السريقة و كي تخير الغرفة شوف لي فيها الكونيكسيو مليحة بسك راح تحتاجها بزاف 📐🖋️ الحاجة الثانية ادا قدرت ادي معاك مصباح صغير بلاك لي معاك فالشمبرة يحب يرقد فليل و نتا تحب تخبش ما تبقاوش دايرين دبزة على الضو اقرى بيها برك 🔦💡 و اتفاهم معا صاحبك تع الغرفة كيفاش تنقوها ماللول يعني الوقت لي تنقو فيه و رد بالك على pc تاعك و على صوالحك ادا قدرت زيد ادي معاك كادنا ولا و ادي معاك قشك كامل سورتو لي راح يبعدو باش مشي تبقى تغسل كل يوم بدل و اغسلهم ضربة وحدة و ادا شفت بلي الكونيكسيو كاين مليحا فالطابق السفلي خير طابق السفلي على جال الما بلاك ما يطلعش الفوق و حاول تاكل الماكلة تع المطعم مشي تدخلها غير تشري بسك راح تصرف بزاف 💢

⭐ بالنسبة للمواقع لي تقدرو تجبدو منهم لي سيري ولا الاختبارات حوستو عليهم بزاف تلقاوهم فالتعليقات 🖍️📙👇🏻

⭐ كيفاش تبدى سنة جامعية مليحة نصائح مهمة :
من النصائح لي نمدهملكم أبدا تقرى مالنهار اللول سيي تدخل فالجو تع القرايا مشي تديها غير لعب ما راك حاكم والو حتى يلحقو لي زيڨزامان و نتا ما علابالكش كامل لي مودول لي راك تقرى فيهم الحاجة الثانية سيي تحفظ المصطلحات العلمية مالشرح تع البروف ديراكت يقول كلمة طلعها تما في راسك مشي تروح دير ورقة و تحفظ فيها بسك تنسا المصطلحات تكتسبهم من التمارين الكور تحفظهم و سيي تستعملهم في هدرتك الحاجة الثالثة ما تلعبهاش خباش كيما فالليسي بسك راح تشوف ناس ما يهدرش كامل يدخل يشوف الكور و يخرج نتا تقول هدا ما راه فاهم والو من بعد تصيبو معا لي ماجور ادا حبيت تخبش اخبش فالشمبرة معا صحابك ولا وحدك من الافضل معا صحابك يفيدوك و تفيدهم كل واحد يمد فكرة و على هديك نقلك خير صحابك لي تقرا معاهم و خيرهم مليح ديرو جماعة و ابداو تقراو كيف كيف تروحو للمكتبة و اهم حاجة شوف كيفاش تشوف الاختبارات تع لعوام لي فاتو بسك الاغلبية يتعاودو كيما الباك راكم فاهمين يبدلو غير الارقام ابار دي مودول كيما لانفورماتيك ولا هدو ما يتعاودوش بسك كاين بزاف افكار (لي راح يقراو انفورماتيك ESI ولا ما تنخلعو ما والو هه ) مي الباقي عادي مشي صعيبة اقرأ تدي أن شاء الله 🤲🏻
💫ادا حبيتو مزيد من النصائح و راكم مهتمين راح نكمل نحطلكم طيلة العام 🖍️📙

⭐ نبداو بتخصص mi مام المدارس العليا كيما ESI ولا enp تقراو قريب نفس بروڨرام فالرياضيات عندكم 💢 analyse التحليل و💢 algèbre الجبر هدو بين زوج رياضيات analyse تقراو الدوال التكامل المتتاليات ... و algèbre تقراو صوالح جدد عليكم شوية كيما المنطق و الفضاء الشعاعي ... هادو يسموهم les chapitres ولا المحاور كيما كنتو تقولولهم فالليسي و informatique مشي كيف كيف سواسوا البروڤرام تع mi و ESI راح يكون شارجي باينا ادا ما كانش عندك pc تقدر تقرا بالتيليفون عادي مشي ڨراف و النسبة لل st راح تقراو مودول واحد يسموه math فيه شوية اناليز و شوية جبر تقدرو تشوفو هادو القنوات من اليوتيوب:
Djamel maths ✏️
Warda maths 📎
Asma kf 🧠
Exo 7 math
Exo Maroc 🖍️
15 min math Lr 📗
Mohssine El miski 📙
Jaicompris maths ✏️
هادو كامل قنوات يعاونوكم فالرياضيات حتى بالنسبة للمدرسة العليا الاساتذة علوم دقيقة و ربي يوفقكم
هادي كانت بالنسبة للرياضيات من بعد نحط تع بيولوجي و ميدسين ... و التخصصات لي بقاو

⭐ نزيد نمدلكم نصائح علابالي كاين بزاف لي راهم مشوشين بسك راح يتبدل عليك الجو تع القراية من الثانوية للجامعة 🧠 ضك نفهمكم اول حاجة راح تتبدل اللغة لي تقرا بيها كانت العربية ضكا راح تولي فرنسية ولا كاين حتى لي يقراو بالانجليزية عادي ادا كنت ما تعرفش ما تقلق روحك ما والو 🌝 كاين مصطلحات تكتاسبهم معا الايام من بعد تولي العربية جيك صعيبة كاين لي دخلو معايا 0 فالفرنسية والو و ولاو خايفين و ولاو من لي ماجور الحاجة 2 فالثانوية كنت تقرا مواد فالجامعة كيف كيف مي يقولولهم les modules 💢 و كل مودول عندو استاذ يقريه عادي بالنسبة لطريقة الدراسة كيفاش تقرى انا ننصحك اقرأ كل يوم وراح تبدا تسهر و تشرب القهوة خاصة اليامات تع الامتحانات عادي مشي كيما فالليسي ترقد على 10 تع الليل هه 💤 خاصة لي يقراو انفورماتيك ولا بوليتاك ولا ميدسين لازملك تتعب 🖥️ و كاين دروس فاليوتوب كيما فالليسي مي مشي كيما فالليسي سواسوا هه تقدر تقرى عند اي استاذ من العالم وين تصيب الكور تاعك حط العنوان و يخرجلك مي مشي كامل لي مودول كاين لي ما تلقاش و ادا ما فهمتش شوف معا صحابك عاونهم و يعاونوك خاصة ادا كنت فالاقامة لازم تقراو معا بعض خير 🧠 ادا دخلت و ما فهمتش كاش حاجة مشي تكره و تقول خلاص انا فاشل عاوها حتى تفهم و ادا ما جبتش مليح مكلاه تدخل في حالة اكتىاب كاين لي كان يجيب 19 المعدل فالليسي يدخل يفوت يجيب 9 / 7 نرمال ما تنخلع ما والو خاصة الاختبار اللول من بعد تفهم كيفاش القراية تحكم روحك صاي 💯 بالنسبة لليسيت و قنوات اليوتوب ضك نحطلكم تع اغلب التخصصات لي نعرفهم و ربي يوفقكم ان شاء الله 🤲🏻
ادا عجبوكم النصائح و المعلومات نزيد نحطلكم 🌝

⭐المهم نقلكم ضكا السيستام كيفاش يمشي فلافاك جامعة ولا مدرسة عليا تقراو 💫les cours و تقراو💫 les TD ضك نفهمكم الكور يجي البروف يشرح الدرس في لومفيي كبير سما راح يكون شوية عدد كبير من طلبة مشي كيما اللليسي في كلاصة صغيرة و TD يمدولكم سيري تع تمارين على واش قريتو فالكور و تحلوها و يكون عدد الطلبة قليل شوية المهم كنصيحة ادا حبيت تنجح اقرا مشي تطلع مالليسي تقول خلاص تطلق القرايا بسك لوكان ما تقراش تقدر تعاود عادي جدا + كاين لي يقلك نحضر الكور و TD ما نروحش اخطيك بسك طفرها غير في روحك اقرا كامل سوايعك و ريفيزي كي تروح لشمبرة تاعك ضك نبدا نحطلكم ليسيري تع كل سبيسياليتي و لي سيت لي تجبدو منهم + ادا حبيت تخبش ما تلعبهاش خباش و تشارك كيما الليسي اخبش في صمت هه و سيي تماجوري (الماجور دو برومو) هو الخباش كامل فالبرومو يعني من اللولين بسك ادا كان كاين كونكور ولا يقدرو يخيروك فلاليست 💤
ادا صبت بزاف ناس انتيريسي نكمل نحطلكم 🌝 و ربي يوفقكم ان شاء الله 🤲🏻

نرجعوها صفحة تع جامعة ؟ (تعليم العالي) نحطو فيها
Les pdf les cours les TD ?!

⭐ واش درتو فيها ؟ كيفاش كانو النتائج ؟
مبروك لي نجحو و لي ما نجحوش ان شاء الله العام المقبل و ما تكرهوش بزاف عاودو و نجحو بمعدلات ملاح

⭐ما بقاش بزاف على النتائج ما تخافوش انساو مي يبقاو ساعات باش تخرج ابداو تخافو استمتع بالعيد و كي يخرجو نحطلكم على التخصصات لي كاينين و لي تقدرو ديروهم بسك الاختيار مهم بزاف ان شاء الله كامل جيبوه و ديرو واش راكم حابين ضكا أستمتع بالعيد ما تخممش فيه و صح عيدكم ✨

مي كي خلاص الباك كيفاش طلقتو راسكم هه راني نستنا فالنتيجة ان شاء الله كامل تنجحو 🤲🏻✨

الفيد صح ؟ هه

المشكل كي يخلاص الباك يروحلك الرقاد و التيليفون لي كانو وقت القراية هه 🤦🏻‍♂️

ربي يوفقكم يا جماعة و ان شاء الله كامل راكم ناجحين خاصة لي قرا و تعب و اهم حاجة ما تخاافوش برك

الحالة قربت يا جماعة هه كيفاش راكم واش راكم دايرين فيها ؟! ربي معاكم ان شاء الله 🤲🏻

🌟 قبل ما تخاف مالباك خمم علاش راك خايف ؟؟
🤦🏻‍♂️ : راني خايف يكون صعيب ٫ راني خايف ما نخدمش ٫ راني خايف ما نجيبوش ٫ راني خايف مالتصحيح ...
✨ اهم حاجة ديرها في بالك بلي نتا قريت و تعبت مكاش كيفاش ما تديش لي قرا يدي صح منين ذاك تقرى و ما تديش حق تعبك علابالي مي تدي مكاش منها تقرى و ما تدي والو ما تخافش خلاص 👌 الباقي يعود لنتى و طريقة الدراسة تاعك و الذكاء كل واحد و كيفاش كاين لي يقدر يحفظ كاين لي ذكي هذي ما نقدروش نتحكمو فيها حنا ✔️ ازدم و ما تخافش + الموضوع ما راحش يكون صعيب كامل كنا نقولو هكا زعما تع العام لي فات جا ساهل معناها تع هذا العام صعيب ••• هذي كامل مكاش منها و اذا تحل سوجي و تحصل مشي معناها خلاص راح الباك عادي ادي الفكرة هذاك هو الصح و حل تمارين فيهم افكار مخلطين مشي فكرة وحدة تبقى تعاود فيها تحس روحك فور و تضيع جهدك و وقتك + قلتلكم بلي مام لوكان يزيدولك عام وحدوخر ما تقدرش تقول راني كملت كامل الافكار بسك هذاك لي يجيب 20 قادر لوكان يعاودولو موضوع بفكرة وحدوخرة ما يجيبش 20 عادي اهم حاجة ما تتوترش و ربي يوفقكم 🙏

🌟 كيفاش دير نهار الامتحان :
كيفاش كنت ندير ✨ اول حاجة كي يمدولك السوجي يجي كشغل ورقة مزدوجة جهة فيها سوجي و الجهة الثانية فيها الموضوع 2 عادي اول حاجة ديت معايا ستيلو حمر كنت نحكم السوجي اللول نقراه كالمي روحك ما تنخلع ما والو 👌 و السؤال لي نشوف روحي نقدر نجاوب عليه ندير عليه ✔️ من بعد شوف سوجي دوزيام لي تصيب فيه تقدر جاوب مليح خلاص تقوم تخير مكلاه تقول نبدل خاصة إذا كنت بديت في تمرين و فات وقت انا مثلا فالسوجي تع الرياضيات اكبر معامل 7 قريت السوجي اللول برك شفت روحي نقدر نجاوب على قريب كامل الاسئلة خيرتو و رد بالك تبقى تبع في صحابك واش خيرو ما تشوف في حتى واحد ولا تصيبهم بداو نتا تنخلع نن عادي و كنت كي نبدا تمرين رد بالك تزدم تحل فالاسئلة ديراكت تقول نربح الوقت ولا كنت نقرى المقدمة عين كامل المعلومات تع التمرين كنت ناطر عليهم باش يبانولك و السؤال ثان اقراه مليح و سطر عليه الحاجة الثالثة كي تعرف تحل و جيك الفكرة تع السؤال اكتبها خفيف ما ترخفش روحك اربح الوقت
🌟أكثر خطأ تقدر طيح فيه و طاحو فيه بزاف تخلط الموضوعين معناها تحل تمرين من السوجي اللول و نص مالسوجي الدوزيام بزاف داروها بلا ما يفيقو و مالخوف انا كنت نقطع السوجي غير يمدوهولي نفصلهم باش ما تغلط ما والو

🌟 كي كنت نجوز فالباك نشفا النهار تع العيد كيما اليوم كنت نقرى الدوال الاصلية هه مور الفطور ضربتها برقدة و نضت حفظت مصطلحات و فليل قريت فيزياء الاهتزازات مزلت متفكر 😂🙆🏻‍♂️ يامات ما تنساوهمش و نتوما واش راكم دايرين فيها ؟

🌟 صح عيدكم كل عام و انتم بخير 🌜🤲 و ان شاء الله كامل ناجحين في شهادة البكالوريا 🙆🏻‍♂️🥳✨

كل ما يخص وحدة التحولات النووية..

ملخص سهل و بسييط في الادب العربي ان شاء الله يفييدكم 👌👇

🌟 أكثر غلطة درتها فالباك هي فالفلسفة و ننصحكم باش ما ديروهاش هي المشكلة مشي ما حفظتش اول حاجة كنت نحفظ المقالة كيما راهي كلمة بكلمة و هذي غلطة كبير بسك حياتك ما راحش تكمل ثاني حاجة بعد عناء طويل و جيدة كبيرة حفظت 4 مقالات كانو مرشحين و طاحت وحدة فيهم مي المشكل ما كنتش نعرف نبدل من جدل لاستقصاء هه طاحتلنا استقصاء و انا كنت حاظها جدل أيا حدث ما حدث كتبت غير المقدمة و الخاتمة و خرجت مزية كان آخر امتحان نفوتوه هردتها و رحت لدار ضربتها برقدة ربعيام على التوالي هه شمبيونز ليڨ تع رقاد هذي الغلطة بلاك ديروها تتعلم تبدلو و ما تنساوش تحليل نص اعرفوه كاين لي مدولهم وله غير كاين على الأقل ما تديش 5 و ربي يوفقكم ان شاء الله 🙏
اذا حبيتو نصائح من التجربة تاعي فالباك قوليلي فالتعليقات