Dr. Bassma A. Owis

الف مبروووك لبنتي الكبيره وصاحبتي واختي علي التخرج واللي ان شاء الله هتبقي اشطر مهندسه ديكور♥️♥️ ،،فرحتي بيكي متتوصفش ابدا وانا شايفاكي قدامي بتكبري وبتتخرجي ،، انتي عارفه انتي بالنسبالي ايه ،، ربنا يخليكي ليا واشوفك اشطر وانجح واحلي واحده في الدنيا 😍😍😍
وطبعا كل بمجهود وتعب ست الكل اللي من غيرها كلنا ولا حاجه ،، ربنا يخليكي لينا اقوي واجمل ام في الدنيا و يقدرنا نرد ولو جزء بسيط من تعبك معانا ♥️♥️

من سنه تقريبا لما قررت ادرس الهيلث كوتشينج ،مكانتش دي احسن فتره في حياتي ولا كنت عارفه هلاقي وقت منين وخاصه ان السيشن مرتين في الاسبوع كل مره ٥ ساعات تقريبا  ،،
بس كنت طول الوقت شايفه وانا شغاله مع حالات التغذيه ان الموضوع اكبر من اكل وشرب ورياضه🥦🥤🏃،، وطول الوقت حاسه ان في فجوه بين اللي بننصح بيه كدكاتره وبين اللي الناس مش عارفه تنفذه وبيفضلوا يلفوا في دايره مفرغه حتي لو حققوا الهدف بتاعهم 🙇‍♀️ ،، القصه داخل فيها تفاصيل كتير اووي بتاثر علي قراراتنا اليوميه البسيطه ، وفعلا بعد ما درست وفهمت يعني ايه تعديل سلوك وتغيير عادات واسلوب حياه و فهمت ان الموضوع اكبر بكتير من ورقه تاخدها وتمشي عليها اسبوع وترجع تاخد ورقه غيرها ،،وازاي مشاعرنا وافكارنا بتتحكم في ابسط تصرفات في يومنا ،، وان البني ادمين ممكن فعلا يتغيروا بس محتاجين يفهموا هما ليه بيعملوا اللي متعودين يعملوه! والحقيقه ان دراستي للكوتشينج مش بس فادتني في شغلي في العياده لا فرقت معايا انا شخصيا في حياتي وشخصيتي وافكاري ونظرتي لكل حاجه اختلفت..

ولاني اكتشفت ان نسبه كبيره جدا من الناس الي بتعاني من زياده الوزن مشكلتها الاكبر في التعامل مع مشاعرها ونظرتها لجسمها مش في انهم مش عارفين ياكلوا ايه ومياكلوش ايه ، فقررت اني اتخصص في الاكل العاطفي واداره الضغط العصبي
Emotional eating & stress management coach 👩‍🎓✌️
بحمد ربنا وبشكر فضله انه وفقني اني اخد خطوه مهمه زي دي في حياتي ويا رب اقدر اساعد ناس تانيه انها تتغير وحياتها تبقي احسن والعلم ميقفش عندي 🤲.. 

وشكرا لدكتوره نشوي♥️ اللي ليا الفخر اني اتعلمت علي ايديها وكنت من اول خمس دفعات تتخرج في مصر والشرق الاوسط في مجال الهيلث كوتشينج ..

وشكرا ل انهم وفرولنا فرصه زي دي واد ايه الموضوع كان منظم وممنهج وكل حاجه كانت واضحه من البدايه ..
و شكرا لكل ال batch اللي كل واحد فيهم اثر فيا بشكل مختلف وطلعت باصحاب جدعان زيهم ♥️

واخيرا شكرا لعيلتي انهم طول الوقت في ضهري وبيشجعوني وبيستحملوا تقصيري🙏♥️

كام مره عملت دايت وقررت انك تلتزم واول ما حصلت مشكله عندك رحت تفش غلك في الاكل وبوظت كل حاجه ؟!

كام مره اتخانقت او اتضايقت من حد بتحبه و جريت تطلب اكل عشان تهدي نفسك وتنسي اللي مضايقك ؟!

وكام مره اتبسطت و كنت عامل انجاز و قررت تكافئ نفسك باكله حلوه كده تبسطك اكتر؟ !

لو انت بيحصلك كل ده وبتعاني من زياده وزن ونفسك تخس الحل مش في الدايت ,, لان اصلا مشكلتك مش في الورقه وجايز تكون عارف كويس اووي ايه الاكل الصحي والاكل الغير صحي ،،
مشكلتك الحقيقيه في طريقه التعامل مع مشاعرك سواء كانت سلبيه فانت بتحاول تتناساها وتلهي نفسك بالاكل وتطلع غلبك فيه او مشاعر ايجابيه فعايز تزودها وتعليها بالاكل ،،
وعشان انت متعود ان الحاجه الوحيده اللي بتسعدك الاكل فبتجري عليه ،،هو ده الاكل العاطفي وده اللي بيخلي اغلب الناس اللي تنزل في وزنها ترجع تاني ويمكن اكتر ،،

طيب ايه الحل ؟!
الحل اننا نتعلم نتعامل مع مشاعرنا ونواجهها ازاي ونفهم ايه احتياجتنا تجاه المشاعر دي ،، لان كل شعور غير مريح بيجيلك هو بيجيلك برساله عايز يوصلهالك و لما مش بتواجهه بيزيد وممكن يوصلك قدام لمشاكل اكبر ،، كمان محتاجين اننا منخافش من اي شعور غير مريح بنعدي بيه وسيب نفسك تعيشه عشان يعدي بلاش تقاومه ..

قولولي كام مره نوبات الاكل العاطفي بوظلك دايت كنت عامله وملتزم بيه🤔 ؟؟

لو عايز تفهم مشاعرك وتعرف ازاي تتعامل معاها وازاي تتعامل مع نوبات الاكل العاطفي عن طريق كوتشينج سيشنز ،،ابعتلي رساله وهبعتلك التفاصيل📩

coach & emotional eating coach

راقب نفسك!🧐
بلاش نقنقه عمال علي بطال.
مش لازم طول الوقت يبقي بقنا شغال🤐، لازم نركز في الكميات اللي بناكلها و هل انا اصلا جعان و لا باكل زهق !! 🙄فكرة إن أي حاجة معدية قدامي في أي وقت ممكن أكلها ومن غير حسابات ولا اعتبارات، دي من اكتر الحاجات اللي بتخلينا نزيد في الوزن واحنا مش حاسيين !😢

You always have a choice!
جملة استوقفتني كتير أول ما سمعتها، اكتشفت إني طول الوقت مسؤولة عن اختياراتي و ده فرق معايا كتير حتي في أبسط قرارتي.
صحيح في حاجات كتير مش بنختارها أو مبنقدرش نغيرها لأنها برا دايرة تحكمنا، زي إن انت أو حد بتحبه تتعبوا، لكن ده مش معناه إن مفيش في إيدنا حاجة نعملها! طيب ازاي؟🤔
يعني لو تعرضت لأي مرض فأنا مش مسؤول عن مرضي لكن مسؤول عن تعاملي مع المرض ده و صحتي النفسية و محاولة التعافي منه قدر المستطاع، زي تماما لو بمر بأي أزمة فا أنا مسؤول عن قرارتي و محاولتي للخروج من الأزمة. 💪
طول الوقت انت عندك فرصة إنك تقرر وتختار بس احنا دايما بنقول غصب عننا و مش بإيدنا بس ده مش حقيقي!🙄
ركز شوية! تحمل مسؤولية قراراتك اللي في دايرة تحكمك، فكر فيها بعناية، صدقني حاجات كتير هتتغير 😊
و أخيرا فكر شوية و اسأل نفسك هو أنا لما بتعرض لأزمة ايه أول حاجة بفكر فيها؟❗️

مين قال ان لازم أبقي بروح جيم عشان أعمل دايت؟ 🤔
لو مش متاح انك تروح جيم فا في حلول تانية ممكن نعملها زي اننا نلعب كارديو لمدة عشر دقائق في البيت، أو نحاول نزود عدد خطاوتنا علي مدار اليوم، لأن كل ما زودنا خطواتنا كل ما الحرق بيعلي.
و أخيرا متستناش كل الظروف تبقي متاحة قدامك عشان تبدأ دايت دور علي حلول بسيطة و سهلة و في امكانياتك !💪

كلنا عندنا حاجة معينة مبنقدرش نقاومها و دايما بتخلينا نبوظ الدايت، طيب نعمل ايه؟ 🤔
أسهل حل هو اننا منحطش الحاجة دي قدامنا و تكون دايما كل الاختيارات اللي قدامنا صحية، ده هيساعدنا أكتر في الاستمرارية لأنك لو قاومت مرة او اتنين التالتة هتستسلم، قولولي ايه أكتر حاجة بتخليكم تبوظوا الدايت ؟

تفتكروا أنهي أفضل في الدايت ناخد سكر عادي ولا سكر دايت ؟
الحقيقه أنا مبفضلش السكر الدايت ومبنصحش بيه لو بناخد سكر عادي نقلله واحدة واحدة بالتدريج لحد ما نوقفه..
طيب وايه المشكلة اننا ناخد سكر دايت ما ههو سعرات أقل من السكر العادي ؟
اولا :طول ما بتاخد سكر دايت مش هتحاول تبطله لأنك مقتنع انه مفيهوش سعرات ومش هيتخن
ثانيا :سكر الدايت علي المدي البعيد ليه اضرار كتير وبيزود النهم تجاه السكريات ❌
واخيرا لأننا هدفنا نرجع حلمات التذوق لأصلها و انك تبدأ تحس بطعم الحاجه من غير سكر فنقلل السكر بالتدريج لحد ما نوقفه أفضل ✅

أكتر حاحة بتسعدني هي إحساس إني ساعدت في تغيير حياة إنسان للأفضل، و اني أقدر أحقق المعادلة اللي ممكن تكون صعبة بالنسبة لناس كتير و هي إنك تكون بتخس أو ماشي علي نظام غذائي بدون أي إحساس بالحرمان أو ضغط عصبي .
سارة من أشطر الناس اللي متابعة معايا و خست لحد دلوقتي 9 كيلو و لسة مكملين 💪
يلا انتو كمان ابدأوا من النهاردة و مش لازم يوم السبت لأن يوم السبت مبيجيش 😅
و قولولي ايه أكتر حاجة بتكرهوها في الدايت ؟؟

لحد فترة قريبة مكنتش مدركة مدي أهمية وجود علاقات صحية في حياتنا، لحد ما درست Health coaching وعرفت قد ايه وجود علاقات صحية بناس نحس معاهم بالأمان والتقبل بيفرق في صحتنا النفسية والجسدية🧘‍♀️، عشان كدا حاولوا دايما تدوروا علي علاقات مريحة تخلق بيئة تحسوا فيها بالتقبل والحب والأمان، و ابعدوا عن أي علاقة بتسببلكم ضغط نفسي لأنها هتأثر بالسلب علي كل جوانب حياتكم من غير ما تاخدوا بالكم. 🙇‍♀️

بكرا الساعة 12 الضهر 😍

انتظرونا غدا يوم الخميس 30/12/2021 بث مباشر الساعة 12 ظهرا للدكتورة بسمة أحمد اخصائية التغذية هتكلم فيه عن الدهون الموضعية مع اعلان مفاجأت رأس السنة من عروض وخصومات.❤🎁

اللي عنده اي اسئلة ومحتاج اجابتها اكتبوا فى التعليقات والدكتورة هتواجبكم في البث المباشر على👌

مش منطقي إنك تتوقع من نفسك إن الوزن اللي زيدته في سنين، تخسه في شهر، وتقول علي نفسك فاشل لما متعرفش تعمل ده..

جاهزين تبدأوا السنة الجديدة بصحة أحسن وشكل أحلي 💪
كل سنة و انتو طيبين و يلا نبدأ مع بعض سنة جديدة و بداية جديدة🥳🔥
اسالوا عن عروض السنة الجديدة للمتابعات الاونلاين لحد ٥ يناير📛
Are you ready to start a new year with a good shape ??💪
Happy new year🥳
Ask for our online packages and new year offers till 5 of jan. 📛

تفتكروا ليه ٩٠ % من اللي بيفقدوا وزنهم بيرجعوا تاني في الوزن اللي خسروه إن لم يكن أكتر؟؟؟
أول حاجه هنتكلم عنها النهارده هي :-
أغلب الناس لما بتقرر تتبع أي نظام صحي بتكون معتقدة إنها فترة كلها حرمان و صعبة وهتخلص بمجرد ما أوصل للي انا عايزه وبعدها أرجع بقي لحياتي الطبيعية و الحاجات اللي بحبها.
طيب وايه المشكلة لما أفكر بالطريقة دي ؟؟!!!
المشكلة إن بكون مستعجل أوصل للي عايزه فبالتالي بفكر أحرم نفسي من كل حاجة عشان أنزل اكبر وزن ممكن في فترة قصيرة سواء بشكل صحي أو لا فبتالي بفقد عضلات كتير و بزود نسبة الدهون في جسمه.
كمان لو قدرت أكمل و أوصل للوزن اللي عايزه هبتدي بعدها أرجع لحياتي الطبيعية فهيكون عندي نهم تجاه كل الأكل اللي بحبه بعد فترة الحرمان اللي عملناها فهاكل منه كتير جدا بدون وعي فالباتالي هرجع أزيد في الوزن تاني .

طيب وايه الحل؟!❗️
1-أتعامل مع الأكل الصحي أنه أسلوب حياة مش مجرد فترة مؤقتة
2-محرمش نفسي من كل الأكل اللي بحبه، أفكر إزاي اعمله بطريقة صحية أكتر و أدور علي بدائل تعلي من قيمته الغذائية.
3-مجبرش نفسي أكل حاجه مبحبهاش لمجرد انها صحية، ممكن أحاول أكلها بطريقة بحبها أو أغير في طعمها شوية
4- كمان بلاش نعمل الاكل بطريقه تسد نفسي من الأكل و أبتدي أكل لوحدي كأني بعاقب نفسي، كل دي ممكن تكون فروقات بسيطة لكن هتفرق في الاستمرارية و كمان نفسيتنا أثناء النظام الصحي .