Ahmed Khedr El Zayat أحمد خضر الزيات

مساء الخيرات ❤️
كتير بنقول إننا راضيين والحمد لله وكله تمام - والحقيقة إن مفهوم "الرضا" في الأصل مش واضح لنا بالشكل الصحيح
علشان كدة حبيت أوضّح ليا وليك النقاط المهمة دي ❤️
من علامات الرضا عن الله :
1- ترك الإختيار قبل القضاء
"يعني تبقى عارف ومؤمن ومليان يقين بإن كل اللي يجيبه ربنا كويس ومن قبل ما يحصل أصلاً وتدرّب نفسك طول الوقت على كدة - كل اللي تجيبه يارب أنا راضي بيه ❤️"

2- فقدان المرارة بعد القضاء
"يعني مهما يحصل عُمرك ما تحسش بضيق ومايبقاش فيه حاجة إسمها : ليه يارب تعمل فيا كدة ؟ و إشمعنى أنا بالذات يحصل لي كدة ؟ أو ياريتني ما عملت كزا كان زماني مش عارف إيه"

3- ألاّ تقل محبتك لله عز و جل عند البلاء
"يعني لما يقع البلاء إوعى عبادتك تقل أياً كان نوع العبادة أو تقصّر في علاقتك بربنا - و إلا هاتبقى دليل وحجة عليك بعدم الرضا عن الله"

❤️
إسمعوا بقى الحتة دي كمان 👌
يقول إبن القيّم :
الرضا
باب الله الأعظم
و مُستراح العابدين
و جنّة الدُنيا
❤️
وصلت يا طيبين ؟؟؟
#١٨٠درجة

19/09/2023

لما تعمل خير لشخص
وتكون مُحبط جداً لما تحتاج لنفس الشخص وماتلاقيهوش - فالكلام الجاي ده ليك 👌💖
⛔ خد بالك ⛔
إنتظارك لرد الخير ده أو "الجِميل" هايوقّعك في مشكلتين :
أولاً - اللي عملته هايبقى فيه شُبهة إنه ماكانش خالِص لوجه الله - لإنك منتظر المُقابل من العبد وليس الرب.

ثانياً - إنتظارك ده ممكن يطوّل - لإن في الغالب الناس "بعض الناس" بتعتبر مساعدتك ليهم حق مُكتسب لدرجة إنهم حتى مابيقولوش شكراً !!!
وغير الحق المكتسب هما ممكن أصلاً يكونوا مفتقدين لثقافة الشكر 🙂
وده أمر هايسيبلك إحباط كبير وخيبة أمل في الناس بشكل عام وبالتالي ممكن بسهولة جداً تتخلى عن إنسانيتك وماتساعدش حد أبداً ، ولا قدر الله يتطور الأمر لإنك ماتساعدش حتى نفسك بعد ما تُصاب بخيبة أمل في كل حاجة حتى نفسك !!!

⚠️ علشان كدة خلّي النقط دي في ذهنك طول الوقت :
١- دايماً خلّي "الله" هو اللي قصاد عينيك - مش الناس ، ساعتها هاتتضح الصورة أكتر وتعرف إنت بتعمل الشيء ده علشان إيه بالظبط.

٢- إعتبر إن كل اللي بتعمله معاهم مش فضل منك ، إنت مجرد وسيلة ربّنا بيسخّرها في وقت معين علشان تساعد بيها حد معين محتاج - يعني يا أخي يبقى ربنا عاوز يساعد حد عن طريقك وتقف إنت قصاده وتقول لأ ؟؟؟ تيجي إزاي دي ؟ 🙂

٣- مسيرك هاتحتاج لموقف زي ده في يوم من الأيام - دايرة وبتدور على الكُل صدقني - واللي هاتزرعه اليوم هاتحصده بكرة 🌱

٤- لو فكّرت فيها من منظور win - win situation أو "نظرية الربح المشترك" ، هاتلاقي إن الشخص ده لما بتساعده إنت بتستفيد معاه وزي ما حاجته بتُقضى إنت كمان بتُثاب ، يعني من الآخر تجارة رابحة هاتفيدك كدة كدة في الآخرة 💖

نصيحة أخيرة :
والله العظيم شوية وكلنا ماشيين - فياريت نركز في ورقتنا وبس 👌
💖
#١٨٠درجة

18/09/2023

أكتر الحالات اللي بنتعرض فيها للخذلان من الناس
سببها الرئيسي إننا كنا مستنيين منهم حاجة معينة في وقت معين وماحصلتش
مع إن ممكن جداً نكون ولا على بالهم أصلاً
أو مثلاً ماكانوش يقصدوا ده
كل المشكلة في "مستنيين" دي
واللي سببها الوحيد هو " إننا " ..
فرحتنا بوجودهم بتعمينا عن وضعنا الحقيقي ف حياتهم
كلامهم لينا بنعتبره إصطفاء !!!
إبتسامتهم معانا بنعتبرها شرف ومدعاة للفخر !!!
ولما بيغيبوا بنفضل نجري وراهم - وبيكون رد فعلهم سخييييف لما بنلاقيه بيوصّفنا كإننا بنطاردهم وهما مش عاوزيننا !!!
"كان نفسي أكون معاك عشان بوجودك هابقى أحسن" كام مرة قولناها ؟؟؟
إيه اللي بنعمله ف نفسنا ده ؟!
ياريت
- نحاول مانتعشمش بزيادة عشان في الآخر إحنا اللي هانتعب
- نحاول نعتمد على نفسنا أكتر لإن في النهاية إحنا اللي هانتأثر
- نحاول نفصل كويس جداً بين "المعرفة والقُرب"
وبين "العشم"
لإنهم مش شرط أبداً يكونو متلازمين - ده وهم رسمناه واعتبرناه من المسلّمات لمجرد بس إنه حصل معانا مرة أو شُفناه بيحصل مع غيرنا ، واللي بسببه دايماً بنخبط في صخرة بتكسرنا وبتوجعنا قوي إسمها "الحقيقة"
الحقيقة إن ماحدش معاك
أيوة
قاسية الجملة ؟
أبسّطهالك ؟
طيب الحقيقة إن ماحدش معاك دايماً
واللي معاك النهارده مش هايبقى معاك بكرة
زي ما اللي كان معاك إمبارح مابقاش معاك النهارده
لو عملت حساب الحقيقة دي بجد
هاتلاقي إن الوحيد اللي محتاج كل الجهد والتعب والتركيز والعشم ووووو
هو نفسك
وساعتها بس هايبقى الإكتفاء سيد الموقف
وساعتها كمان
ممكن
تحقق كل اللي كنت بتحتاج لغيرك فيه
واللي إنت بنفسك كنت شايفه صعب
❤️

#١٨٠درجة

18/09/2023

مساء الفل 🌸
من خلال الجلسات أو الاستشارات اللي باعملها بالاقي إن معظمنا واقع في فخ كبير قوي
وهو الإنبهار
جزء كبير منه بيحصل بسبب إنك ماعرفتش أو ماشوفتش غير "ده"
ومع ظهور "ده" وإحتياجك الشديد لسد فجوة معينة
بتشوف الـ"بعض" منه بمثابة الـ"كل" !!!
و"القليل" منه بمثابة "الكتير قوي" لدرجة إنك بتسكتره على نفسك شخصياً !!!
وبتوصل بيك المرحلة إنك بتبرر أي إساءة بتجيلك منه أو إهمال أو تقصير وبتختلق لها ألف حجة علشان بس الفجوة اللي إتملت دي ماتفضاش تاني "الخوف من الفقد"
ممكن تفضل عايش طول عمرك في الحالة دي - بسبب قلة خبرتك "أول حد عيني تشوفه - أول حد أرتاحله - أول شغل ف حياتي ... إلخ"
وممكن تفضل عايش فيها لفترة - وتتفاجىء بإنك كنت في وهم كبير خصوصاً بعد ظهور "الآخر" الحقيقي
وممكن تفضل عايش فيها لفترة
وتقرر من نفسك ماتكمِلش
لإن فعلياً الفجوة ماتسدّتش - هي إتملت بشوية واقع صغيرين والباقي من خيالك إنت !!!
كل المطلوب منك تركيز مش أكتر
وجرأة في الإختيار - حتى لو هاتقول لأ
هاتتعب شوية في الأول أحسن ما تندم ندم كبير بعدين
هاتدوّر كتير وحتى لو ماوصلتش بس أكيد هاتكون عالتراك الصح فإنت برضه ماخسرتش
هاتعاني إنك لوحدك بس أكيد أكرملك بدل الوهم اللي إنت عايش فيه
كل حاجة بتحصل حواليك بتكون منك إنت
مش من أي حد تاني
سماحك ليهم بالملئ المزيف هو في الأصل منك
قبولك للشيء وتعظيمك ليه وكإنه "كُل" مش "جُزء" ده نابع من جواك
ماتنبهرش لمجرد إنك نفسك تنبهر
وماتعظّمش حاجة لمجرد إنك عاوز تعيش اللحظة
خلّي كل حاجة تاخد حقّها الطبيعي
ساعتها بس
كل حاجة هاتبقى ف مكانها الصح
وأوّلها إنت
❤️

#١٨٠درجة

16/09/2023

صباح السعادة ❤️
يا صديقي
مش كل تصرفاتك هاتتفهم صح
فماتشغلش بالك بالتبرير ومحاولات التفسير
إنت مش مُطالَب أصلاً بده "غير في أضيق الحدود ومع ناس معينة وفي مواقف معينة"
اللي بيحبك
هايفهمك وهايقدّرك وهايلتمسلك بدل العُذر عشرة
واللي بيكرهك
هايتصيّدلك أي تصرُّف منك علشان يخدِّم على قضيته - الكُره - والكُره فقط
نركز بقى ونصحصح
ماشي ؟
❤️
#١٨٠درجة

16/09/2023

صباح الخير 🌸
من أصعب الأدوار اللي ممكن تتلعب عليك وتأثر على إستقرارك النفسي والعاطفي واالي ممكن إنك كمان تتقمصه وتعيشه هو دور الضحية
دور الضحية لطيف قوي
حاجة كدة حلوة وكيوت
بيقدر يكسب تعاطف كل اللي حواليه
وخطة في منتهى الذكاء للهروب من المسئولية
مسئولية التقصير
مسئولية الخطأ
مابيعملش أي حاجة وبيتّهم اللي معاه إنهم هما اللي مابيعملوش
ويشهّد ده على ده
ويتأزّم نفسياً من ده "شكلاً بس"
ويتعقّد ويجيله إكتئاب بسبب ده "شكلاً برضه بس"
المشكلة مش في اللي بيتقمّص الدور ده
المشكلة الفعلية في الناس اللي حواليه
مهما طال الوقت لازم هايسيبوه
ماهو طبيعي يعني واحد عايش معاه ومصمم يقنع نفسه ويقنعني إنه مظلوم ومابيغلطش وفل ولوز اللوز
وإن أنا والكون بما فيه متحاملين عليه وظالمينه طول الوقت
هاكمّل معاه ليه ؟؟؟
دور الضحية للأسف مابيأكلّش عيش
هو بيأكّل الشهد "في الأول بس والناس متعاطفة معاك"
وبعد كدة بح "لما يعرفوا حقيقتك"
عشان كدة نصيحة ليّا وليكم بلاش نعيش دور الضحية كتير
هاتبقى ورطة كبيرة لو صدقنا نفسنا ومش هانعرف نخرج منها
لو غلطت إعترف بالغلط
لو قصرت إعترف بالتقصير
مش عيب إنك تعترف
العيب
إنك تنكر وتلبّسها في اللي المفروض تعترفله
❤️
#١٨٠درجة

11/09/2023

اللهُمَّ راحةَ بال
وبُعداً عن القيلِ والقال
وبُعداً عن هوانِ الحاجة والسؤال
وثباتاً على السكينة بعيداً عن تقلُّبِ الأحوال
آمين 🤲🏻
❤️

10/09/2023

I've just reached 500 followers! Thank you for continuing support. I could never have made it without each one of you. 🙏🤗🎉 شكراً لكم ❤️

08/09/2023

اللهم إنا نسألك أن تفتح لأدعية أحبتنا أبواب الإجابة يا من إذا سأله المضطر أجاب، يا من يقول للشيء كن فيكون، اللهم لا تردهم خائبين، اللهم ولا تصرفهم عن بحر جودك خاسرين ولا ضالين ولا مضلين، واغفر لنا ولهم إلى يوم الدين برحمتك يا أرحم الرحمين 🤲

07/09/2023

أهلاً بيكم جميعاً على الصفحة الجديدة ❤️
شكراً لوجودكم وتفاعلكم عليها مقدماً
وبإذن الله ثم وجودكم نقدر نوصل بيها زي الصفحة القديمة وأكتر كمان
❤️

Claim ownership or report listing

Want your business to be the top-listed Media Company in Cairo?
Click here to claim your Sponsored Listing.