Nofal's Practice

و مع الوقت بينتهي الألم و بيفضل من الجرح مجرد علامه .

دعم الطفل نفسيا في ظل مرض الكورونا

1/حافظ على هدوئك واسمع طفلك

الأب أو الأم هم المثل الأعلى للطفل..والطفل بيراقب ردود فعلك في كل موقف وبيتأثر بيها ويتصرف على اساسها..فحاول تحتفظ بهدوئك

2/خلي بالك من كلامك

كلامك عن انتشار المرض وطبيعته ممكن يزيد أو يقلل من مخاوف طفلك وركز في حديثك عالهاتف ان لو كلامك مش مناسب بمعني فيه خبر يقلق ان الطفل مش المفروض يسمعك

3/فكر ابنك دايما انك موجود عشان تساعده وانك هتبذل اقصي مافي وسعك عشان تحميه من المرض

4/اسمع لطفلك
اسمع لطفلك ولمخاوفه وما تنكرش عليه مخاوفه وطمنه من غير ما تكدب عليه

5/اشرح لابنك سبب العزل الاجتماعي
هو مش فاهم هو محبوس ليه ومش مسموح له يلعب مع اصحابه ..حاول تشرحله سبب العزل بدون مبالغه أو استخفاف..يعني قول له ان بعد الناس عن بعض طريقه للقضاء على المرض..ممكن ترسم رسمه بسيطه توضح له ان التلامس والكحه والعطس بينقلوا المرض

6/الطفل في سن المراهقه
ممكن تشرح له ان انتهاء وقت العزل غير معروف بس كل اللي نقدر عليه اننا ننفذ تعليمات الاطباء والمنظمات العلاجيه..المراهق كل اللي محتاجه الوضوح بس المرض جديد ومعلوماته قليله جدا

7/تمرينات التنفس
ممكن تعمل مع طفلك تمرينات تنفس كل يوم..تمرينات التنفس مريحه للأعصاب للطفل وللأسره كلها

8/ركز على الايجابيات
اعتبر ان العزل فرصه للترابط الأسري وانكم تقضوا مع بعض جو لطيف بقدر الامكان .حاول يكون البيت فيه جو بهجه زي ضحكه .فيلم كوميدي.العاب
جماعيه ولو موجود بلكونه أو حديقه بيساعد الطفل انه يكون على تواصل مع الطبيعه ومع العالم الخارجي

9/حافظ على روتين ثابت يوميا
مش معنى ان ما فيش مدرسه ولا التزامات اننا نفضل قاعدين بلبس النوم 24 ساعه .. النظام الثابت بيعمل احساس بالهدوء وبيحسس الطفل بقيمة الوقت وترتيب اليوم بيعمل احساس بالأمان

10/فكر مع طفلك في نشاط يساعد به الآخرين

مثلا ممكن يكتب جواب للجار اللي عايش لوحده أو يرسم لوحه عشان عيد ميلاد جده قرب ..لكن ما تفكرش بالنيابه عنه عشان ما يكونش زنان ويفضل يسألك طول اليوم هنعمل ايه..هو نفسه المفروض يطلع بأفكار يساعد بيها الآخرين ..وده هيخليه يحس بقيمة الوقت وقيمة نفسه انه استثمر الوقت في شىء مفيد ويحس بقيمة التجربه اللي بيمر بيها

10/احذر من الاخبار عاطل على باطل
لصحتك النفسيه ولصحتك أولادك مش المفروض تسمع كل الاخبار من أي مصدر لأن الحديث عن المرض طول الوقت بيسبب توتر
نتابع الخبر من مصدر موثوق فيه في وقت محدد باليوم.

11/تحاشى الاشاعات
تجنب الاشاعات حول المرض وانصح طفلك المراهق انه يتحاشى الاشاعات واشرح له ان المعلومات عن الفيروس قليله جدا والمفروض ناخد معلوماتنا من مصادر موثوق فيها

12/اتكلم مع اطفالك

اتكلم معاهم وجاوب على اسئلتهم بدون تفاصيل مش هتفيدهم او مش هيقدروا يستوعبوها عشان ده سبب لفزع الاطفال

13/المهام الصغيره للطفل يوميا

الطفل ممكن يعمل كل يوم بعض المهام الصغيره في البيت..ده بيحسسه انه متحكم في يومه ونافع وده بيقلل الخوف عنده

14/خليك صادق مع الطفل

عقل الطفل بيتخيل المواقف بطريقه ابشع كتير من الواقع لذلك شرح الحقائق ببساطه وصدق بيقلل الخوف عند الطفل ..بدون مبالغه ولا استخفاف

15/تحاشي التدليل المفرط

ابنك مش ضحية الفيروس
مش المفروض يتدلل زياده وبلاش العقاب عاطل على باطل أو النقد المستمر..لازم الطفل يكون له مساحه من الحريه في البيت لأن الظروف مش عادي
الوسط حلو ..لا تعنيف ولا تدليل عاطل على باطل

الرجاء شير البوسط للأمهات و الأبهات إللي تعرفهم .
شكر خاص للسيده رحمه تهامي علي الادتنج . Rahma Taha

مجرد إنك شايل حمولك و ألآمك النفسية و بتعدي بيهم اليوم، ده في حد ذاته إنجاز .
إنجاز يستحق إنك تشكر نفسك عليه .

يا بخت اللي ربي و يا بخت اللي أتربي .
في بني آدم أتربي علي انه يضرب بني آدم و بعدها يشتكي من اللي ضربه علشان أيده وجعته و هو بيضربه .
و في بني آدم أتربي علي انه يعتذر بعد ما ينضرب .

اللعب هو أول طريق للطفل للتعرف علي الواقع .
عمو فرويد .

من كان "منا" بلا خطيئة "فليرجم نفسه" بحجر!!
الكاتبة مريم نعوم

موسم الأعياد إللي هو موسم الفرح و الروحانيات .
عند بعض الناس وقت عصيب جداً .
بيتحول لموسم نكد .
مش فارق بأه ، هو المسيح أتولد و لا إبراهيم مش مضطر يدبح أبنه ألخ ألخ
في عيل ماما ما كنتش قادره تعلمه يفرح لفرح الآخرين و يحزن لحزن الآخرين .
سميها إعاقة مناسبات.

العيل ده في الأوقات إللي الناس كلها فرحانه بيضرب لخمه .
أوم إيه ؟
ينكد علي البشريه المحيطه .
و في الغالب بينكد علي اقرب الناس ،الناس إللي بيثق فيهم و بالذات الناس المظأططه منهم.
مش بيكون واعي إنه بيحبط فرحة إنسان عزيز عليه .
للأسف بيبقي عنده سيناريو (قص و لزق ) بيديه كل الأعذار .
أغلب خلق الله .
دول ديتهم تحن عليهم سيكه ( لو عندك طاقة ) و تعيش عيدك .
كل سنه و هم طيبيين .

الحنان من عند الله .

الحزن زي المد و الجزر ، بياخد مداه و يرجع البحر تاني .

لما حد يقول لك (لا قبلك و لا بعدك ) يبقي أنت في ورطه .

لما واحد يقول للتاني (انت جميل )و التاني يرد (أنت إللي عيونك بتشوف الجميل )
ده صح جداً .

النجاح مش ديما إللي بنشوفه .

نوبة فزع .
لاموأخذه (panic attack)

الفزع عموماً له وظيفة في حياتنا .
علي سبيل المثال .
و انا بعدي الطريق جات عربية حدفت عليا ، اتفزعت فا اتنطرت علي الرصيف .
قدر و لطف .
انما احيانا لاسباب كتييييير زورار الفزع بيعلق و يدي فزع بدون سبب وقتي ، بدون اسباب مباشره .

بناء عليه تبقي قاعد في أمان الله او نايم في أمان الله و تحس بالآتي :
صعوبة في التنفس .
الم في الصدر.
تنميل في اطرافك .
احساس ضعيف بالواقع إللي حوليك .
دوخة .احساس غريب .
نوبة فزع إذاً .

لغاية هنا مهانة السنين بس مقدور عليها .
بس البلوظه (المخ ) بيجي يعمل حاجة سخيفة جداً .
يبتدي يترجم الاعراض .

صعوبة في التنفس ..... أختناق .
ألم في الصدر ......أزمة قلبية .
تنميل .....جلطه.
احساس ضعيف بالواقع ........مرض نفسي.
دوخة ..........إغماء.
احساس غريب .......موت.

ترجمة المخ زودت البلة طينة .
و تدخل في دايرة .
و فزع يجيب فزع.
و عمر ما حد مات من نوبة فزع .ً
آه ممكن واحد قلبه يقف من الفزع لو بينه و بين الاسد الجعان كام متر .
بس النوبة ده حدوتة تانية خالص.

أول حل إنك تبقي عارف إيه أللي بيحصل .
إنت أكيد في تجربة لا تحسد عليها .
بس ترجمة مخك للي بيحصل بتحولها لجحيم .

حد جميل لطيف يظهر في حياتك يقرب و يقرب ...
و بعدين تلاقي دنيتك اتلخبطت حبتين حلوين .
أُوم ايه تقعد تلت و تعجن معاه و في الغالب بتبقي مش سامع غير صوتك .
تطلع من الحوار بجملة ( أنا آسف ) بصوت مسكين .
و حزمة وعود تحت شعار ( حا احاول )
الوعود في اليمين و الافعال في الشمال و بينهم المخدر ( وعود من الصنف المغشوش)

لما تتحول لظابط مباحث في علاقة يبقي في حاجة غلط .

ساعات بيبقي الحل مش سهل بس ممكن .

جنب كل صالة سفر في صالة وصول .

عمو فرويد عرف اللعب بأنه طريقة الطفل للتعرف علي الواقع .
ايه كانت لعبتك المفضله ؟

الدنيا بخير .

في ناس عمر ما تصرفاتهم المؤلمة ها تتغير .
الشيء الوحيد إللي ممكن يتغير هو انفعالنا و ردود افعالنا تجاه التصرفات ده .
#بالبلدي