Petroleum Ring

تتقدم منصة Petroleum Ring بتقديم أرقي التهاني للدكتورة/ رحاب المغربي، لتوليها منصب رئيس قسم هندسة تكرير البترول و البتروكيماويات بكلية هندسة البترول و التعدين جامعة السويس.💖

تمنياتنا لها بدوام التوفيق والمزيد من التقدم🌸
.

تتقدم منصه Petroleum Ring بتقديم ارقي التهاني للاستاذه الدكتوره /عبير شعيب.

"أول سيدة تكلف بمنصب عميد كلية هندسة البترول والتعدين منذ نشأتها فى 1961"

كل الشكر والتقدير والامتنان لمعالي الاستاذ الدكتور/
السيد عبدالعظيم الشرقاوى - رئيس جامعة السوييس

ومليون مبروك للاستاذة الدكتورة/ عبير محمود شعيب تكليفها بمهام (باختصاصات) عميد كلية هندسة البترول والتعدين.

متمنيين لها دوام التوفيق والتميز والنجاحات فى مختلف المجالات.

.

لسه مكملين معاكم كلامنا عن العمل الجماعي 👥
مؤشرات لتبني منهجية العمل ضمن الفريق:
🔹زيادة في نغمة التذمر بين الموظفين والتركيز على مصلحتهم الفردية.
🔹الصراعات بتزيد.
🔹كتمان الموظف للمعلومات، وعدم مشاركتها.
🔹عدم وضح المهام.
🔹ضعف الالتزام، وظهور بوادر اللامبالاة بين الأفراد.
🔹قلة الفاعلية داخل الاجتماعات.
🔹ضعف روح الابداع.
🔹معارضة التغيير.
دي كلها بتوضح أننا لازم نشتغل داخل فريق 🤝🤩
طب أكيد مش كلنا زي بعض وكل واحد عنده نمط مختلف أو ميل عام لنمط أو إتنين...
طب عندنا أربع أنماط لتشكيل الفريق المتكامل :
🔸أولا: المنطقي المتسائل :
▪️بيحاول يعرف طريقة عمل الأمور.
▪️يحلل المعلومات بالحدس وينظر إلى الصورة الكبرى.
▪️صناعة القرار عنده تعتمد على المنطق أكثر من المشاعر.
🔹أهميته داخل الفريق 🤔
بيحافظ على سير الأمور ويعتمد عليه في الالتزام بالأوقات المحددة، ويشارك المعلومات مع أعضاء الفريق.
يراه الآخرين شخص يعتمد عليه ، عملي ، كفء.
يحتاج أن يهتم بالآخرين ومشاكلهم بشكل أكبر.
🔸ثانيا: المثالي الواقعي :
▪️بطبيعته معلم ومرشد.
▪️يحب القصص والتشبيهات أكثر من الأرقام و الإحصائيات.
▪️صناعة القرار عنده تعتمد على المشاعر أكثر من المنطق.
🔹أهميته داخل الفريق 🤔
يهتم للعلاقات ويستمع للآخرين ، يهتم باهتماماتهم ، يقدم المعلومات بطريقة واقعيه أكتر.
يراه الآخرين كشخص محمس ، داعم ومشجع.
يحتاج إلى الالتزام أكثر بإجراءات العمل ومواعيد التسليم.
لسه مخلصناش كلامنا عن العمل ضمن فريق استنوا البوست الجاي 😍🤝

العمل الجماعي أفضل ولا الفردي 🤔
العمل الجماعي طبعا تعالوا نشوف فوايده اي بس الأول خلينا نشوف القصة دي 👇
في إحدى القرى كان في مزارع بيعيش فيها هو وزوجته وعندهم مجموعة من الحيوانات.. في يوم من الأيام زوجة المزارع شافت فأر يركض في القبو فخافت وذهبت للسوق واشترت مصايد الفئران ووضعتها في كل مكان في القبو.. لما شاف الفأر المصايد خاف😵 وقال لازم أطلب المساعدة من حد وراح للديك طلب منه المساعدة فرفض الديك مساعدته لأن المشكلة مش متعلقة بيه.. في طريق الفأر للعودة وهو حزين صادف الخروف فترجاه بإنه يساعده ولكن الخروف لديه وظائف عليه الاعتناء بها فرفض المساعده.. وهو راجع فاقد الأمل افتكر الثور الضخم اللي الحيوانات بيعتبروه كبير المزرعة فركض عنده وشرح له المشكلة ولكن رفض الثور المساعدة للاعتقاد أن الفأر غير مهم بالمزرعة فبدأ الفأر بالاستخباء في أقصى مكان ممكن😭و في مساء يوم ما سمعت الزوجة صوت المصيدة العالي جداا.. فنزلت إلى القبو معتقدة أن الفأر دخل المصيدة ولكن لقت حية كبيرة تهجم على الزوجة ولدغتها فمرضت🤒 فزوجها عايز يساعدها ويحضر لها شوربة ف أخذ الديك وذبحه وحضر لها منه شوربة.. مع مرور الأيام صحة الزوجة تسوء فسمع الجيران عنها.. وبدأوا في زيارتها ولكثرة عددهم اضطر المزارع أن يذبح الخروف لتأمين مأكلهم.. وفي نهاية الأسبوع تتوفى الزوجة من اللدغة😔 ومع كثرة المزين فأكيد المزارع هيذبح الثور الضخم.. ف اللحظة دي وقف الفأر ملقيا اللوم على الحيوانات في قرارة نفسة لأنهم لو كانوا ساعدوه ماكان حدث هذا.
نستنج من القصة ان فوائد العمل الجماعي هي : خلق بيئة عمل محفزة لتحسين العلاقات داخل المؤسسات حتى نشجع التواصل وزيادة الشفافية لبناء روح الثقة والتعاون بين الناس حتى نحل المشاكل مع بعضنا البعض ونقدر الاختلافات الفردية بين الناس ونتعامل بشكل صحيح مع التغيير.
لسه مخلصناش كلامنا عن العمل الجماعي استنوا البوست الجاي🤩💥

في مثل صيني بيقولك "وراء كل قادر يوجد دائما أناس قادرون".... ومثل آخر " أفضل أن عشرة رجال يقومون بأداء العمل من أن أقوم بعمل عشرة رجال"
من الأمثال دي نستنج أنه العمل الجماعي أو العمل في فريق أفضل وهو ده الموضوع إللي هنتكلم فيه 🤝
طب أي هو الفريق : هو مجموعة من الأشخاص بيشتغلوا مع بعض في نفس الاتجاه لتحقيق أهداف محددة تهتم بالمصلحة العامة.
أو أفراد يتميزون بمهارات فردية بيكملوا بعضهم البعض بغرض تحقيق الأهداف المشتركة... ده معناه إن أعضاء الفريق الواحد بيتفقوا على هدف معين وعلى الطريقة لتحقيق هذا الهدف وبيشتغلوا مع بعض نحوه.
الفرق ف العمل تنقسم إلى عدة أنواع :
🔹مجموعات العمل : وهم زملاء في نفس المكتب يقودهم مدير أو أكثر تربطهم الوظائف والمهام و مساحات العمل.
🔹فرق العمل : بيشتغلوا على مشروع واحد و بيكملوا بعضهم البعض.
🔹فرق الإدارة : مجموعة من المدراء مع مديرهم الأعلى.
🔹فرق المشاريع المتخصصة : بتكون لمرة وآحده بيشتغلوا على مشروع معين ومعه ينتهي الفريق.
🔹الفرق الافتراضية : أعضاء الفريق بيشتغلوا عبر البلدان أو القارات عن طريق البريد الالكتروني أو الرسائل الرقمية دون الحاجة للإجتماع في نفس المكان.
والعمل الجماعي ليه فوائد كتير جدااا استنوا البوست الجاي عشان تتعرفوا عليها 🤩🤩

عرفنا إن من مبادئ تحفيز الذات : تحفيز مواد السعادة نكمل بقى باقي المبادئ 👇
2- تأجيل الاستمتاع: تأجيل مكافأة النفس.. يعني بدل ما اكافئ نفسي بعد كل صفحة وأخد بريك بسيط أكمل شابتر كامل واخد بريك طويل.
طب إزاي أأجل المتعة 🤔
أتجنب.. أحاول أقاوم.. أركز على النتايج بحيث كل ما استحمل أكتر هاضغط نفسي آكتر ف هاخد مكافأة أكبر.. وابدا دايما بالمهم وأجل الغير مهم.
3- بناء فريق عمل ممتاز : الاشخاص المحيطين بيك لازم يكونوا بيساعدوك ويحفزوك.
🔹التعاطف :
هو معرفة وفهم مشاعر الغير.. إزاي افهم واستوعب الشخص إللي قدامي عن طريق تعبيرات الوجه ولغة الجسد ونبرات الصوت.. في دراسة اثبتت إن تعبيرات الوجه ولغة الجسد بتأثر بنسبة 55% ونبرات الصوت بنسبة 38% و 7% لطريقة الكلام.. وكمان إن أول انطباع بيتكون عندك عن أي شخص بيكون بعد أربع دقايق من الكلام معاه.
الانصات العاطفي عن طريق خمس خطوات :
🔸بفهم الشخص إللي قدامي أي شعوره.
🔸بسأله بعض الأسئلة عشان أقدر اعرف أكبر قدر من المعلومات عنه واجمع داتا أكبر للموضوع إللي بيتكلم فيه.
🔸اسمع آكتر الموضوع والطرف الاخر من خلال تعبيرات الوجه ونبرة الصوت ولغة الجسد.
🔸بفهم الاجابات إللي سالت عليها وبالتالي جمعت قدر كبير من المعلومات عن الموضوع إللي بيتكلم عنه الطرف الاخر.
🔸التعاطف مع الشخص.
🔹المهارات الاجتماعية :
وهي الوصول لحل يرضي جميع الاطراف✳️

نكمل كلامنا عن الذكاء الابداعي اتكلمنا عن الوعي بالذات والتحكم بالذات هنتكلم النهاردة عن تحفيز الذات 👇
هنتكلم عن ثلاث مشاعر مختلفة وإزاي استغلهم لصالحي :
▪️العصبية والغضب : هل ممكن يكون ليهم فايدة ؟ أكيد ليهم... بيخليك تراجع نفسك من تآني وتغير سلوكك.
▪️القلق:محدش مش بيقلق وحبذا لو في إمتحان ويبدأ تتوارد ليك أفكار زي لو جبت كذا ممكن ماما تزعل... طب دا حاجة وحشة🤔بص لنص الكوباية المليان... لما بتقلق بتتنبأ بمستقبلك وكمان بتبص لمستقبلك وتخطط له بس لازم القلق دا يكون بحدود.
طب أعمل أيه علشان أتغلب علي القلق دا؟ إشرب حاجه تهديك...إلعب رياضه... غير منظور التفكير في إنك تنجح ومامتك تكافئك.
▪️الكآبة: مين فينا مش كئيب وخصوصا ف الايام إللي فاتت دي وكل الدنيا متقفلة والقعده ف البيت، أي شخص ممكن يطلع منها شخص تآني خالص.. حاول ترفه عن نفسك.. العب رياضة.. ساعد الناس وقرب من ربنا وصلي.
🔹تحفيز الذات :
إزاي احفز نفسي عشان أحقق هدف معين 🤔
تحفيز الذات هو توجيه العواطف لعمل شئ معين زي لو حد بيذاكر يقول أنا بحب المذاكرة عشان يقدر يذاكر بصورة أفضل.
مبادئ تحفيز الذات :
1- تحفيز مواد السعادة : هي مواد تفرز من الدماغ نتيجة السعادة لموقف معين.
مواد السعادة :
▪️هرمون الدوبامين: أول ما يفرز ف دماغنا بيدينا طاقة أكبر ، بيحمسنا نحو الهدف آكتر ، طب إزاي احفزه 🤔
حط هدف قدامك.
خد خطوة ناحية هدفك.
كافئ نفسك.
دي الطريقة المعنوية إما الطريقة المادية بقى (الاكل زي الزيوت ، الكربوهيدرات ، اضحك كتير ، العب رياضة).
▪️هرمون السيروتين: هرمون المدح يفرز لما أي شخص يمدحك. 💥
▪️هرمون الاكسيتوسين : هو هرمون الحب يفزر لما تقعد مع ناس بتحبهم ومرتاح معاهم ف الكلام و النقاش💖
طولنا عليكم بس لسه مخلصناش كلامنا عن مبادئ التحفيز استنوا البوست الجاي 🤩

اتكلمنا المرة إللي فاتت عن الذكاء العاطفي وعرفنا إنه ليه 5 مكونات ، واتكلمنا عن أول حاجة ( الوعي بالذات) تعالوا نكمل باقي المكونات 👇
2- التحكم بالذات :
▪️الإعتقاد أو التفكير السلبي :
ردة الفعل الأولى إللي بتجيلك لما تشوف حاجة من بعيد واول ما تقرب تلاقي حاجة مختلفة.
إزاي بقى احول الإعتقاد السلبي لاعتقاد إيجابي أو تفكير منطقي 🤔
العالم البرت اليس حط نظرية سماها نظرية التفكير والشعور والسلوك.. طب ليه سماها كده 🤔
لأن الإنسان عبارة عن تفكير وشعور وسلوك... التلاتة مرتبطين ببعض يعني لو حاجة اتغيرت تلقائياً التانين هيتغيروا.
لو مثلا عندي طالب فشل ف الامتحان لكن هو مش فشل عشان هو فاشل لا...لكن لإنه شايف نفسه فاشل 🙄 لو الامتحان من 100 وهو جاي 95 بيعتبر نفسه فاشل وده من أنواع التفكير السلبي أو التفكير الثنائي المزدوج 😵
طب إزاي تحول التفكير ده لايجابي 🤔
لو الطالب أقتنع إنه مش لازم يقفل الامتحان وإنه لو نقص ومش مقفل معناها إنه ناجح برضو وده هيزود حماسه إنه الامتحان الجاي يجتهد آكتر وممكن يقفل كمان 🤩
▪️العادة :
تراكمات عليك من زمان... يعني أنا متعود من وأنا صغير لو غلطت ماما تزعقلي.. فتولدت في منطقة ما من دماغي تسمى limbic system عادة بتقولك دايما إنك كل ما تاخد قرار هتتعاقب
▪️ديناميكا المشاعر :
العالم هوبكنز لقى إن أي إنسان بيشتغل بالمكافآت... مثلا البياع ف السوبر ماركت بيدي الناس مكافآت عشان تشتري زي العروض كده.
(إحنا عندنا عادي بتودي بروتين بتودي لمكافاة) 🤩
لو أنا شخص بتعصب من الصوت العالي واول ما ادخل البيت ألاقي دوشة ف اتعصب (عادة) ، ازعق لحد ما الكل يسكت (روتين) ، وبرتاح (مكافأة).
مش عيب إن العصبية من عاداتك بس العيب إنك تفضل ع نفس الروتين.. طب أغيره إزاي ؟!
اتدايقت من الصوت العالي متزعقش أغسل وشك.. أشرب ماء... أعمل اي شئ ينسيك العصبية.. ثم انسحب بهدوء.
لسه مكملين كلامنا عن الذكاء العاطفي استنونا 💖

بعد مرحلة تقييم الطبقات .. تم التأكيد ان الخزان ده تجاري و فيه كمية كبيرة و تم اتخاذ قرار بانتاجه
المرحلة الأخيرة معانا في الصناعة هي مرحلة الانتاج و فيها هيتم استخراج البترول من باطن الارض لغاية ما يوصل عالسطح.

المرحلة دي بنتعامل فيها مع قدرة الخزان علي الانتاج و دي بتيجي من خواص زي الpermeability. و الطاقة اللي موجودة في الخزان متمثلة في الضغط و عوامل تانية هنتكلم عنها باستفاضة .... و كذلك انتاجية البير نفسه و دي بنشوف فيها كمية الضغط اللي هيتم فقده في البير عن طريق وزن عمود البترول في البير و بيأثر فيه كثافة البترول و عمق البير و كذلك الضغط المفقود في الاحتكاك و هيأثر فيه طول البير و نوع المواسير اللي ماشي فيها البترول و معدل انتاج البترول نفسه .

المرحلة دي برده بنحاول فيها اننا نشيل اي restrictions موجودة في النظام بتاعنا المتمثل في الخزان و البير و الي منها ان الpermeability بتقل حوالي البير لأسباب كتير و برده مع الزمن طاقة الخزان بتقل و بيترتب عليه ان ضغط الخزان بيبقا اقل من الضغط المفقود في البير و بالتالي مش هيوصل البترول للسطح و هنا لازم نتدخل و نبدأ نركب ادوات الرفع الصناعي Artificial lift
ممكن كمان يبقي المشكلة في الخزان نفسه و ان الزيت بيخرج من الخزان بمعدل بطئ و هنا بنبدأ نزق احنا البترول من مكانه فيما يعرف بالsecondary recovery و كذلك عمليات الEOR
عندنا برده عمليات تانية بنزود بيها الإنتاجية و هي عمليات تحفيز الابار stimulation و فيها بنحاول نشيل اي معوقات حوالي البير و نزود الconductivity للبترول ...

ده كان اخر بوست معاكم في المقدمة عن المجال بتاعنا ...
استنونا ان شاء الله من المرات الجاية و كلام عن كل خطوة في حياة الصناعة و استنوا تفاصيل اكتر
Stay tuned ⁦⁦❤️⁩

اتكلمنا في البوست اللي فات عن نشأة الارض ومكوناتها، وجه الوقت اننا نتعرف ع المعادن الموجوده جواها ...

طب يعني ايه معدن !
اي ماده لازم بتوافر فيها 5 مواصفات عشان اقدر اقول عليها انها معدن 👇
⚪️ يتكون بشكل طبيعي، يعني ميكونش الانسان هو اللي صنعه.
⚪️ غير عضوي، يعني مش منتج من خلال كائن حي.
⚪️ صلب، يعني لو كان سائل او غازي مينفعش اقول عليه معدن.
⚪️مكونات كيميائية محددة، يعني كل حالات المعدن دا ليها مكون كيميائي بيتغير ضمن نطاق محدد.
⚪️ التركيب الداخلي المنتظم، يعني ذرات المعدن مرتبة بنمط منتظم ومكرر.

يعني ايه ذرات المعدن مرتبة بنمط منتظم !
المعادن موجوده في الطبيعة بأشكال بلوريه مختلفة، والبلوره هي جسم من وسط صلب متجانس التركيب الكيميائي وبيحدها اسطح ومستويات طبيعية معروفه بإسم اوجه البلوره وبتتميز بوجود علاقات تماثل معينه.
البلورات دي عادة بتتقسم لـ سبع نظم بلورية والتقسيم دا علي اساس اطوال المحاور البلورية أ، ب، ج والزوايا البلورية α ، β ، γ ، والنظم دي هي :
1-نظام المكعب (Cubic):
بيتميز النظام دا بثلاث محاور بلورية متساوية ومتعامدة. يعني:
أ = ب = ﺟ , α = β = γ = 90° وتمثل هذا النظام بلورة الألماس.

2- نظام الرباعي (Tetragonal):
بيتميز النظام دا بثلاث محاور بلورية متعامدة، المحورين الأفقيين متساويين والمحور الثالث رأسي وهو أطول وأقصر منهم، يعني:
أ = ب ≠ ج ، α = β = γ = 90° ويمثل هذا النظام معدن الزيركون.

3- نظام السداسي (Hexagonal):
بيتميز النظام دا بأربع محاور بلورية ، ثلاثة منهاl أفقية ومتساوية ومتبادلة وبتتقاطع في زوايا مقدارها 120° درجة والمحور الرابع رأسي أطول أو أقصر منها وعمودي على مستواها، يعني:
أ1 = أ 2 = أ 3 ≠90°، γ = 120° ويمثل هذا النظام بلورة البيريل.

4- نظام الثلاثي (Trigonal):
بيتميز النظام دا بأربع محاور بلورية زي النظام السداسي. وهما متشابهين من حيث عدد المحاور البلورية وكيفية توزيعها والاختلاف الوحيد بينهم هو أن المحور ( ﺟ ) في النظام الثلاثي محور تماثل لكن في النظام السداسي محور تماثل سداسي. وتمثل هذا النظام بلورة الكوراندوم.

5- نظام المعيني القائم (Orthorhombic):
بيتميز النظام دا بثلاث محاور بلورية غير متساوية ولكن متعامدة، يعني:
أ ≠ ب ≠ ﺟ ، γ = β = α = 90° وتمثل هذا النظام بلورة الكبريت المعين.

6- نظام احادي الميل(Monoclinic):
بيتميز النظام دا بثلاث محاور مش متساويه والمحور ( ب ) عمودي على مستوى أ ، ﺟ لكن المحور ميل على مستو المحورين ب ، ﺟ ، يعني:
أ ≠ ب ≠ ﺟ ، γ = α = 90° ≠β ، وتمثل هذا النظام بلورة الأورثوكليز.

7- نظام ثلاثي الميل (Triclinic):
بيتميز النظام دا بثلاث محاور بلورية غير متساوية وتتقاطع في زوايا مش متساوية أيضاً، يعني :
أ ≠ ب ≠ ﺟ ، α≠β≠γ = 90° ويمثل هذا النظام بلورة الميكروكلين.

كده عرفنا يعني ايه معدن وايه هما الانظمة البلورية (Crystal systems) المكونه للمعدن. ✔️

في البوست اللي جاي بإذن الله هنتعرف علي الخواص الطبيعية للمعادن ونتكلم بالتفصيل عن خاصيه منهم .. تابعونا 😍

هنتكلم النهاردة عن الذكاء العاطفي 💥خلونا نتخيل مع بعض معني الذكاء العاطفي 🤔 يعني مثلا لو عندنا لاعبين كرة واترمى عليهم موز جوا المعلب من الجمهور ف واحد اتعصب واظهر غضبه و التاني خد الموزة واكلها... هنا بقى يبان معنى الذكاء العاطفي 🤩
بيتلخص الذكاء العاطفي ف ٣ حجات :
🔹القدرة على الفهم وإدارة المشاعر.
🔹القدرة على الفهم وإدارة مشاعر الاخرين.
🔹القدرة على تحفيز النفس وتحفيز الاخرين.
تعالوا نشوف أي مكونات الذكاء العاطفي 🤔
🔹أولا الوعي بالذات :
على حسب الطبيعة البشرية ينقسم الاشخاص إلى :
▪️الشخص الواعي لنفسه (متحكم بنفسه بشكل إيجابي).
▪️الشخص الغارق ف انفعالاته(غير واع وغير متحكم بنفسه).
▪️الشخص المتقبل مشاعره وواعي لكن غير متحكم.
التفكير السلبي التلقائي والنظرية المعرفية السلوكية:
قسمت الافكار السلبية إلى 10 أنواع :
1- التفكير الثنائي (المزدوج) : أي أن الشخص ياخذ كل شئ أو لا شئ... بمعنى ينجح ويجيب 100%.. لكن لو جاب 99% يتصور إنه فاشل.
2- الاستنتاج العشوائي : لو حصل موقف بيفضل يحطله استنتاجات عشوائية سلبيه.
3- التصفيه العلانية : بيصفي عقله من كل الافكار الإيجابية ويركز على السلبية فقط.
4- التعمم الزائد : بيعمم الحالات السلبية إللي حصلتله أيا كان الموقف إيجابي.
5- التضخيم السلبي والتقليل الايجابي : بيضخم الاحداث السلبية بشكل زائد.
6- الشخصنة : يربط نفسه أو شخصيته بالموقف إللي حصل... يعني مثلا الموقف ده حصل بسببي ، لو مكنتش عملت مكنش حصل.
7- اللوم الزائد : الشخص يلوم نفسه بشكل مفرط.. يعني مثلا لو عملت كذا كان هيبقى أفضل.
8- التاثير الانفعالي : بيفسر سلوك الأفراد إللي قدامه من خلال تأثيره الانفعالي.
9- عبارات الوجوب : العبارات الالزامية.. يعني مثلا لازم يعمل كده.
10- التقليل من شأن الاحداث الايجابية والاعلاء من شأن الاحداث السلبية.
البوست خلص بس كلامنا عن الذكاء العاطفي لسه مخلصش استنوا البوست الجاي 👌🤩🔥

"You have to learn the rules of the game. And then you have to play better than anyone else." Albert Einstein

انهاردة هنقول اجابة السؤال. ببساطة شديدة الفرق بين ظهور الجرافيت اللى بيدينى حديد زهر رمادى أو السمنتيت اللى بيدينى حديد زهر أبيض هو معدل التبريد. كل ما زاد معدل التبريد هتتكون الحالة الصلبة بدون ما تسمح للذرات تاخد مكانها المفضل. يعنى فى معدلات التبريد العالية بتضطر ٣ ذرات كربون ترتبط مع ذرة حديد و يدينا سمنتيت و بالتالى حديد زهر ابيض.

انما على النقيض لو الأمور تمت بالصبر و معدلات تبريد منخفضة الكربون هيفضل يرتبط مع الكربون فى صورة جرافيت و بالتالى هيظهر معانا حديد زهر رمادى. و الفرق فى الكلمتين دول.

Graphite is a Stable Phase
Cementite (Fe3C) is a Metastable phase

نكمل كلامنا عن النوع التالت و هو الmalleable Cast Iron
هو عبترة عن حديد زهر أبيض عملناله معالجة حرارية تدينا حديد زهر رمادى. لكن التسمية اختلفت لاختلاف المنتج فى طريقة التكوين و الخواص النهائية. لأن الجرافيت فى المنتج ده بيكون فى صورة أصغر و بيكون عنده قدرة أعلى للتشكيل و حاليا ليه تطبيقات كتير. أهمها المنتجات الصغيرة اللى مقدرش انتجها بالتشكيل بس محتاج فيها مرونة عن حديد الزهر الأبيض.

رابعا هو ال Ductile Cast Iron
و ده يعتبر بشكل كبير زى اللى قبله بس الفرق انه بيمتاز بمرونة أعلى بالاضافة لمقاومة شديدة للصدم و الأجهادات المترددة (fatigue). و لكل نتيجة سبب و هو ان الجرافيت فى المنتج الماليبول كاست ايرون بيكون فى صورة مستطالة شبه الفول السودانى الى حد ما. انما هنا الجرافيت بيكون اقرب ما يكون للكرة او شبيه بالكرة الأرضية. و بالتالى قدرة أعلى على التشكيل بدون ما تتكسر و تسمح بنشأة كراك.

و نيجى خامسا لدور مقولة اينشتاين ايه لازمتها هنا؟! فى شركة (س) قررت انها هتعمل عمود نقل الحركة فى عربياتها بالكامل من حديد الزهر و ده كان تحدى تحول لكارت رابح خلاها شركة رائدة فى مصر لفترات طويلة. بس التحدى كان انك كمهندس ماتريال تنتج حاجة صلدة فى منطقة تستحمل الاحتكاك و فى نفس الوقت قلبها لدن و يستحمل اجهادات عصر و فاتيج (اجهادات مترددة). و من هنا استخدموا تكنولوجيا تعرف باسم ال
Chilled Cast Iron
بالعربى هو مصفح او عليه صدفة من الخارج بتكون من حديد الزهر الأبيض و بتستحمل الاحتكاك الكبير فى نقل الحركة من الجير بوكس و بتقاوم التآكل الناتج من الاحتكاك ده. و فى قلبها بيكون ماليبول او داكتيل كاست ايرون يستحمل اجهادات العصر و خلافه. طبعا شاركات تانية حاولت و عارفين النتيجة و لكن تظل كيفية صناعته تعتبر معلومات لا تقدر بثمن للشركة (س).

ولسه مكملين كلامنا عن الابداع 🤩 تعالو نشوف بقى عوامل الابداع 👇
عوامل التعلم الابداعي :
🔹التأثير أو التفكير المعاكس : لو عندي مشكلة معينه بفكر إزاي أزود المشكلة أو إزاي أهلي الوضع معقد آكتر ويمكن ده غريب شوية 🙄 تعالى اقولك إزاي.. محمد شغال ف شركة أتغير فيها نظام تسديد الفواتير وبدأ العملاء بالشكاوي ، فعمل اجتماع وبدأ يسأل إزاي أخلي العميل يتدايق آكتر طبعا حاجة غريبة إزاي ده 🤔 ولكن جاوبوا الناس اعغلاق الهاتف بوجه العميل ، التعامل معه بوقاحة، تغير طريقة تسديد الفواتير تآني، عدم تقديم توضيحات لهم.
فرد عليهم محمد : تمام نعكس كل الكلام ده بقى... يعني كن مهذبا ، اصبر مع العميل عند السؤال ، اخباره بأن التغير ده لفترة معينه.
🔹الربط الإجباري : إجبار النفس لربط المشكلة بغرض معين ، زي شخص شاف عيون القطط بتنور ف الظلام ف قرر يعمل مصابيح إنارة ف آلشآرع.
🔹صندوق الافكار : ده بيكون لتطوير منتج أو فكرة معينه... مثلا عايزة أعمل اباجورة بقسم المنتج لاجزاء وببدأ بتقسيم كل جزء على شخص ، ونبدأ بعدها بطرح الافكار بطريقة مبتكرة.
✳️واخيرا بعض الارشادات المهمة لك :
▪️كن إنسان مبدع.
▪️كن مثابرا ولا تستسلم امام المشاكل والصعوبات.
▪️لا تفكر ثم تنسى الفكرة بذرة.. تابع.
▪️طور الفكرة.. ف الافكار الغير مكتملة لا تأتي بناتج.
▪️كن فضوليا و اسال.
▪️لاحظ ولا تكن غافلا.
▪️جرب تعمل حاجة جديدة.
▪️درب عقلك دايما.
▪️سجل أفكارك.
▪️نم مبدعا واستقيظ مبدعا وعش مبدعا... لبكن قرارك ومسارك الابداع وانظر إلى العالم بغير منظارك.
وكده اتكلمنا عن الابداع وعرفنا كل نواحي الابداع وخليك واثق إن جواك إنسان مبدع 🤩💪

عمرك سمعت عن إن الدماغ مقسومة نصين 🤔 تعالوا نشوف كده الموضوع ده 👇
الدماغ له نصفين : النصف الايمن - النصف الأيسر.
🔹النصف الايمن مسؤول عن الخيال ، الحواس ، المشاعر.
🔹النصف الأيسر مسؤول عن المنطق والحساب.
طبعا لو هنتكلم عن الابداع ف الجزء الايمن هو إللي هيجي ف بالنا طبعا وهو المسؤول عنه.
تعالوا بقى نتعرف على أدوات توليد الافكار الابداعية :
🔹العصف الذهني : تعني الجلوس مع الاخرين ومناقشتهم ومن خلال ذلك سوف تستخرج أفكار وحلول.. وممكن كمان تستخرج فكرة مكنتش موجودة.
🔹التقمص : تعني كل شخص يتقمص شخصية معينه ويبدأ بالتفكير بنفس العقلية.. وإزاي يعرف يتعامل مع المشكلة.
🔹القبعات الست :وهم ست أشخاص بست شخصيات مختلفة.
▪️الشخصية الأولى : شخصية حيادية تتحدث بالحقائق ولا تتحيز.
▪️الشخصية الثانية : شخصية عاطفية تركز على الحدس وتهتم بردود أفعال الناس.
▪️الشخصية الثالثة : تركز على الامور السلبية وتفترض الاسوأ وتظهر نقاط الضعف.
▪️الشخصية الرابعة : تفكر ب إيجابية ومتفائلة ، تشجع وسط الاحباط والصعوبات.
▪️الشخصية الخامسة : تعطي حلول مبدعة ولاتنتقد الافكار وتفكر خارج المألوف.
▪️الشخصية السادسة : شخصية استنتاجية ، تضبط القرارات وتوجه الجميع.
🔹الخريطة الذهنية : تستخدم عند تنظيم فكرة معينة لمواضيع فرعية ، مثل السفر لمكان معين يعتبر الفكرة الرئيسية إما الافكار المتفرعة تعتبر زي جواز السفر وتجهيز الشنط وغيرها.
🔹الاستعارة والتشبيه : تعتبرمن أفضل الأدوات إللي بتساعد ف العصف الذهني ، مثل الوقت كالسيف إن لم تقطعه قطعك⏰
استنوا البوست الجاي ولسه مكملين رحلتنا مع الابداع 🤩

المهندس أحمد وقف معانا ان البير الاستكشافي اتحفر ... دلوقتي الخطوة اللي بعدها هي اننا نحاول ندرس الطبقة اللي تحت و نعرف خصائصها و كل حاجة عنها في سبيل اننا نعمل الخطة المظيوطة لانتاج البترول ده .

العملية دي تسمي بتقييم الطبقات formation evaluation .... العملية دي هي عيونك اللي بتبص بيها عالطبقة اللي علي عمق لا يقل عن كيلو متر في الأرض ..
العملية دي بيتم بيها التعرف علي خصائص البترول اللي موجود في الطبقة و كميته و كمان خصائص الطبقة نفسها او ما يعرف بالخزان و الخصائص دي هي النفاذية و المسامية و سمك الطبقة و مكوناتها و غيرها كتير .

الطرق المستخدمة في عمليات التقييم ممكن نقول خمسة :
1- Well logging
2- Coring
3- Fluid sampling
4- Transient tests
5- Production tests
الطرق دي كل حاجة منهم بنعرف بيها خصائص معينة للصخر و بتجميع و تربيط المعلومات اللي بنحصل عليها من كل طريقة و كمان المعلومات الجيولوجية بنقدر اننا نوصل لنموذج محاكي للخزان البترولي تحت و نشوف هنقدر نستخلص اعلي كمية من البترول ازاي باقل التكاليف الممكنة .وبكده يبقى المهندس أحمد وضحلنا تقييم الطبقات بشكل بسيط وهيتكلم معانا عنها اكتر ف مرات تاني

جاينلكم النهارده بالكورس الذي ينتظره الكثير🔥
تعلن منصة Petroleum Ring عن تقديم كورس ال"Aspen Hysys" في لايف علي جروب المنصة يوم الأحد القادم الساعة 9:00 مساءاً، سيقدمه م/سيد عمار.💥
إنضم لجروب المنصة وتابع الكورس كاملا من خلال اللينك التالي 👇
https://www.facebook.com/groups/571377596836832/?ref=share
.

نشأة الأرض ومكوناتها 🌎

اتكون كوكب الأرض من حوالي 4.54 مليار سنه، يعني عمره هو ثلث عمر الكون ( عمر الكون 13.7 مليار سنه تقريبا). قالنا ايه بقا العلم عن نشأة الأرض؟

في نظريات كتير فسرت اصل وتكوين الكرة الارضية ومن ضمن النظريات دي و بإختصار:

_ نظريه (Kant) و ظهرت في عام 1755 ودي كانت بتقول ان المجموعة الشمسيه (الشمس والقمر والارض وجميع الكواكب) كانت كلها متراكبة مع بعض ونتيجة الاحتكاك بين الاجسام دي اتولدت حرارة شديدة ادت لتفتت الكتلة الكبيرة دي إلي اجزاء صغيرة هي الارض وباقي الكواكب.

- نظريه (Laplace) و ظهرت في عام 1796 ودي افترضت ان المجموعة الشمسية كانت عبارة عن كتله كروية من الغازات اللي درجة حرارتها عالية و بتدور حول نفسها حركه منتظمة، بعد كده الغازات دي اتحولت بالتبريد لسائل وصلب فتكونت الكرة الارضية.

-و في عام 1905 قدم العالمان تشميرلين ومولتين نظريتهما اللي معروفة بإسم الكويكبات واللي قالت ان الكرة الارضية وباقي الكواكب انفصلت من الشمس نتيجة لمرور نجم عظيم الحجم بالقرب من مدار الشمس.

كده عرفنا نظريات نشأة الارض طب اي هي مكوناتها ؟!

طبقات الأرض اتقسمت تبعا للخصائص الكيميائية لـ ثلاثة طبقات رئيسية:
1- The Crust
دي سمكها حوالي 8 كيلومتر تحت المحيطات بمسمي (Oceanic crust)، وسمكها بيوصل لـ 32 كيلومتر تحت القارات بمسمي (Continental crust)

2- Mantle
بتتكون الطبقة دي بشكل رئيسي من الحديد والمغنسيوم والألومنيوم والأكسجين، والسيليكون.
وبتتقسم لطبقتين هما (Upper mantle) اللي بيوصل لمسافة حوالي 670 كم تحت الـ Crust و (Lower mantle) اللي بيترواح عمقه من 670 كم الي 2890 كم تقريبا تحت الـ Crust.
3- Core
بتمتد الطبقة دي من تحت طبقة الـ Mantle الي مركز الأرض، وبتتكون من عنصري النيكل والحديد عشان كده هو مصدراً للمجال المغناطيسي الخاص بكوكب الأرض وبيشكل حوالي ثلث اجمالي كتلتها وبينقسم الـ Core لقسمين هما الـ Outer Core السائل ، والـ Inner Core الصلب.

وبكده نكون عرفنا بعض نظريات نشأة الأرض ومكوناتها ☑️
هنركز بقا ع القشرة الارضية (Crust) وهنتعرف ع الصخور والمعادن اللي بتحتويها ...
تابعونا في بوست جديد علشان نكمل رحلتنا ان شاء الله 👷‍♀️👷‍♂️

سؤال بقا 🤔
ازاي بيفضل اللب الداخلي للأرض (Inner Core) صلب ومبينصهرش رغم حرارته المهوله؟!

هو أنا مبدع 🤔 سؤال كتير بنسأله لنفنسا.. طب تعالى شوف صفات بتميز المبدعين 🤩
🔹شخص فضولي دايما بيسأل.
🔹بيتمتع بالتحدي... يعتبر المشكلة تحدي إللي عنده تحدي ليه إنه يقدر يحلها و يجبلها أفكار مختلفة لحلول المشكلة.
🔹لا يستسلم بسهولة.
🔹متفائل... بيشوف دايما المشاكل فيها حلول مش مشكلة ملهاش حل.
🔹فكاهي... يعتبر الفكاهة والضحك والمرح نوع من أنواع الابداع.
🔹مقدر للأشياء.
🔹خيالي.
🔹غير تقليدي... مش بيحب البديهة والنمطية دايما بيفكر بطريقة مختلفه وف حاجة جديدة.
🔹محب المخاطرة.
🔹واثق من نفسه.
🔹مرت ف تعامله مع الآخرين.
هو ده الشخص المبدع ☝️
طب قلنا إن الابداع مرتبط بالتفكير وعندنا 4 انماط للتفكير الابداعي :
🔹الشخص الجسور :
شخص بيحب كل حاجة جديدة.. بيحب المخاطرة.. بيشارك أفكاره.. مش بيتردد إنها ممكن تترفض.. مهم جداا لأي مكان عمل لإنه بيحارب بفكرته.
🔹الشخص الفضولي :
الشخص الباحث.. شديد الملاحظة.. بيهتم بالتفاصيل.. ودا شخص مهم جداا لإنه بيضيف ع الفكرة الأساسية حاجة جديدة.. لإنه دايما بينظر للأمر من جميع زواياه.
🔹الشخص المتقبل :
الشخص ده بيتقبل أفكار الاخرين مش بيقول لا لفكرة.. وده شخص متفتح الذهن.. مش بيحكم ع الفكرة غير لما يسمعها ويفهمها.
🔹الشخص المحفز :
بيحول أي فكرة لشئ ملموس او تطبيق.. ودايما متفاعل مع الآخرين.
💥أي مؤسسة محتاجة الشخص الجسور لإنه بيخلق الفكرة الجنونية.. والشخص الفضولي عشان يحطلها ابعاد اضافيه.. والشخص المتقبل عشان يتقبل الفكرة ويفهمها... والشخص المحفز عشان يحول الفكرة لواقع ملموس 🤩
استنوا البوست الجاي هنكمل كلامنا عن الابداع 😉🤩

كما قال العظيم البرت اينشتين:

"The Measure of Intelligence is the ability to change"

اتكلمنا فى البوستين اللى فاتوا عن فرن شبه منقرض؛ و زى ما بيقيس ذكاء البشر هنقيس قيمة الIron بقدرته على التغيير و انه يطاوع احتياج المستهلك.

فعلا لحد فترة قريبة كان استخدامه محدود جدا (مقارنة بالستيل). بس اليوم فى اكثر من نوع للحديد الزهر و فى اكثر من معالجة حرارية ليه و اصبح مميز جدا، و مش بنبالغ لو قولنا ان فى بعض انواعه بتنافس الستيل بشراسة.

الفرق الرئيسى بين الستيل و الكاست ايرن هو نسبة الكربون و دى معلومة لا تخفى عن الذهن، اقصى نسبة كربون فى الستيل هى ٢% و ده فى حالة الاوستينيتك ستيل و نادر جدا ما نستخدم النسبة دى. انما الكاست ايرن بيعدى النسبة دى و ساعات بيصل الى ٤% كربون. بس النسبة مش الفرق انما هى سبب للفرق! الفرق الحقيقى هو الماتريكس بتكون Homogenous فى الستيل و بتكون Heterogeneous فى الايرن و ده يخلى الخواص تختلف كتير زى ما درسنا (أ-ب-ت) ميتالورجى.

فى انواع عديدة جدا ليه و مسميات فى كل نوع أكتر و أكتر و على سبيل المثال و ليس الحصر:

1. Gray Iron

2. White Iron

3. Malleable Iron

4. Ductile (Nodular) Iron

5. Compacted Graphite Iron

جه وقت اننا نشرح ايه هتروجينيس و هوموجينيس اللى قولناهم دول، الستيل بطبعه لما بيتصلب بيكون حبيبات كلها من الحديد اللى دايب فيه كربون يعنى phase وحيدة فى الميكرو ستراكشر. على عكس الحديد الزهر نسبة الكربون الكبيرة بتخليه يرسب phase تانية و هى الجرافيت او السمنتيت و فى فرق بينهم بردو، ببساطة فى الستيل كله فررايت او اوستينيت انما فى الحديد الزهر واحد من الاتنين دول معاه حاجة تانية.

هنتكلم باختصار شديد عن أول نوعين و أولهم هو حديد الزهر الرمادى GCI و ده الماتركس بتكون خليط من الفا فررايت و جرافيت (بيور كربون). و بيبقى الكربون فى شكل flakes و موضوع الشكل ده كبير مش صغير لأنه فى السلوك الميكانيكى و أثناء التشغيل بيفرق كتير و بيرتبط بتوليد الCrack. بالاضافة لان الجرافيت ده هو سبب اللون الرمادى (المطفى).

النوع التانى هو حديد الزهر الأبيض WCI و ده الماتريكس بردو بتكون الفا فيررايت بس مع سيمنتيت Fe3C و ده بيخليه يمتاز بمقاومة للتآكل بالاحتكاك بصورة عالية جدا. و ده سبب لونه الأبيض (لامع).

طبعا نفس التركيب الكيميائى ممكن يطلع حديد زهر رمادى او حديد زهر ابيض مع اختلاف كبير بينهم فى الخواص و هنا هنسيبكم مع سؤالين، الأول ايه السبب اللى يخلى التجمد يدينى ابيض او رمادى؟ و السؤال التانى ايه الفرق (Thermodynamically) بين السمنتيت و الجرافيت فى طريقة تكوينهم؟ اللى يعرف يجاوب ع السؤالين نحب نقولك رسالة ثق فى نفسك جدا انت ميتالورجيست 💪.

إبداع... ابتكار... تجديد 💞
٣ كلمات بنستخدمهم كتير بس ياترى أي الفرق بينهم 🤔
أحيانا الأمر بيختلط علينا لأننا بنستخدمهم تقريبا كأنهم واحد،ولكنهم ف الحقيقة متباينين ، كل مصطلح فيهم ليه معنى مختلف 💥
🔹الابداع :
هو خلق شئ من لاشئ ودايما مختص بالفكرة عشان كده دايما ترافقه كلمه "التفكير الابداعي" يعني بختلق فكرة جديدة🔥
🔹الابتكار :
ممكن استخدم فكرة موجودة واحولها لشئ ملموس وهو دايما مختص بالمخترعين عشان كده بنقول شخص اخترع حاجة أو "ابتكرها" يعني تحويل الشئ الغير ملموس لواقع ملموس.
🔹التجديد:
يعتبر هو المكمل ليهم هما آلأتنين ويعني التطوير ، يعني الشئ الملموس إللي عندي مش هيفضل طول عمره بالجمود ده ، وده مهم جداا لأي شركة أو أي إنسان إنه يطور من نفسه عشان يواكب العصر بتاعه.
💠يبقى الابداع هو الفكرة.. الابتكار إني احولها لواقع ملموس.. التجديد إني دايما بطور فيها عشان تناسب متطلبات العصر ✳️
طب ليه إحنا محتاجين الابداع والابتكار والتجديد ف حياتنا 🤔
طبعا محتاجينها لحجات كتير منها اننا نطور الامكانيات ونستخرج أفضل ما فيها... منها القدرة على حل المشاكل بطريقة آكتر كفاءة 👌 وكمان نتميز عن غيرنا 🤩وكمان بنحرك ذهننا ف حجات أفضل.. والحياة بتكون أكتر تشويق ودايما بتكون بعيده عن الملل والنمطية.
أول ما بنشوف كلمة إبداع بيجي ف خيالنا أي 🤔
المهندس.. الدكتور.. الفنان.. الخياط؟! هما فعلا مبدعين
بس ي ترى بقى أنت كمان مبدع 🤔
طبعاا كلنا مبدعين "كل منا مبدع بطريقة ما" يعني أنا دلوقتي مبدع ؟! آه طبعا.... الدليل على كده اننا وإحنا صغيرين مثلا كنا بنستخدم إزاة الميه ك مايك... أو بنحط الحلة على راسنا كأنها طاقيه.. كانت أفكار بسيطة ولكن ف الحقيقه دي إبداع، يعني أنت طلعت مبدع اهوو 🤩💥
بس المبدعين ليهم صفات لو عايزين تعرفوها استنوا البوست الجاي ✳️

لو اتكلمنا عن التقطير هنلاقي ان تعريفه ببساطة هو عملية استخراج او تجزئ خليط متجانس للمواد اللي بيتكون منها و تقطير النفط الخام استُخدم من زمن طويل اوي.. اجدادنا المصريين العظماء و اليونانيين و الرومان كانوا بيقدروا يستخرجوا مواد بتشتعل من بعض النفط الخام اللي بيتسرب للسطح.

بدأ التقطير بشكله الحالي يُعرف في القرن ال 19 و ال 20 لما اكتشفوا حفر أبار النفط و بدأ الموضوع ينتشر بشكل تجاري و كان التقطير وقتها بدائي و بيستخدم في انتاج الكيروسين و كان اسمه (زيت الاضاءة) و استخدامه كان بينحصر كزيت اضاءة #بديهيات
و تاني منتج هو شكل من اشكال الجازولين و كان اسمه بنزين و اخيراً ال residue و دة كان بيستخدم في سد الشقوق و غلقها خصوصاً في السفن و دة طبعاً لانه بيقدر يصد المياه.

و بعدها بفترة قدرنا ننتج قطفة اخف اسمها Naphtha و استخدامها انحصر برضو ف اغراض الاضاءة عن طريق نوع خاص اسمه pressurized lamps و كانت العملية بتتم عن طريق حاجة اسمه still و هي عبارة عن وعاء شبه ال shell بتاعت المبادل الحراري.. الخام كان بيدخل اول وعاء و يتسخن لحد درجة تبخير الكيروسين و بعدين يتجمع و يتكثف في وعاء تاني و باقي الخام يخش علي still تانية و يتسخن لدرجة حرارة اعلي و هي درجة تبخير البنزين و يتم تجميعه و اخراج ال residue علي وعاء ثالث عشان يتسخن شوية كمان عشان لو فيه اي كيروسين تاني.. ال residue اللي بيتبقي من ال still دي عبارة عن fuel oil خفيف اوي و اللي ممكن بتسخين اكتر ينتج قطفة تاني تستخدم كوقود و اللي هتُعرف بعد كدة باسم ال diesel او ال gas oil و اللي بتستخدم في محركات الديز diesel engines.

البخار بقي اللي كان بيطلع من كل still بيعدي علي جزء اسمه Packed Wash Section قبل ما يتم تكثيفه و تجميعه في ال condensate drum و جزء من السائل اللي في ال condensate drum بيرجع لأعلي ال wash section عشان يستخدم ك washing liquid حاجة كدة زي ال reflux بتاعنا بس علي الضيق 🌚

فضل النوع دة من التقطير شغال لحد بعد الحرب العالمية الثانية في بعض مصانع التكرير و شركات كبيرة النهاردة لسة بتسمي التقطير "pipestill"
و David S. Jones احد مؤلفي كتاب Handbook of Petroleum Refining بيقول انه شاف ال stills دي شغالة في سنة 1956 في المصنع اللي كان بيشتغل فيه بالاضافة الي 3 وحدات من وحدات التقطير الحديثة اللي احنا نعرفها و اللي هنكمل كلام عنها المرة الجاية.
تقدر تشاركنا بأي معلومة تاريخية او تقنية عن النوع دة من التقطير في الكومنتات.