Kareem El-Din - كريم الدين

تجميعة لأهم محتوى تم نشره على قناة اليوتيوب والموقع
[[تحديث شهر مايو]]

(الكورسات):
1- كورس تعليم (أدوبي فوتوشوب):
https://bit.ly/PhotoshopEssentials_keo

2- كورس الإظهار المعماري:
https://kareemeldin.com/architecture-post-production-course

__________________

(الفيديوهات):
3- تخطيط العام الجديد (الفيديو الأول)
https://bit.ly/NewYearPlanVideo

4- تخطيط العام الجديد (الفيديو الثاني)
https://bit.ly/NewYearPlanVideo2

5- إختبار تحديد الشخصية (MBTI):
https://kareemeldin.com/mbti-personality-test/

6- ثلاث أساليب لزيادة الإنتاجية:
https://bit.ly/DoMoreInLessTimeVideo

7- تحليل سوات - SWOT ANALYSIS:
https://kareemeldin.com/swot-analysis/

8- شرح (Google Keep) أسهل تطبيق لتدوين الملاحظات والأفكار:
https://bit.ly/GoogleKeep_KEO

__________________

(المقالات):
9- قائمة الـ100 هدف:
https://kareemeldin.com/100-goals-list/

10- تحدي الـ 30 يوم:
https://kareemeldin.com/30-days-challenge/

11- دليلك الشامل لدخول عالم تصميم الجرافيك:
https://kareemeldin.com/your-full-guide-to-enter-graphic-design-world

12- أفضل طريقة لتعلم أي مهارة جديدة:
https://kareemeldin.com/best-way-to-learn-new-skill/

__________________
الإشتراك في قناة التيليجرام:
https://t.me/kareemeosama

الإشتراك في قناة اليوتيوب:
https://bit.ly/KareemEldinYT

رابط الموقع:
www.kareemeldin.com

هقولك على حاجة إتعلمتها في التعامل مع الناس يمكن تفيدك، رقم ٥ ستغير حياتك للأحسن:
١- لو حد قالك إنه مريض؛ ما تسألوش عن نوع المرض عشان ممكن مرض محرج يعرفك تفاصيله.
٢- لو حد قالك إنه إشترى حاجة؛ ما تسألوش جابها بكام إلا لو هو من نفسه قالك.
٣- لو حد عايز منك خدمة / مساعدة وإنت مش هتقدر تعملها؛ عرفه إنك مش هتقدر تساعده، لكن بلاش تسيبه متعشم على الفاضي.
٤- لو عرفت -بالصدفة- حاجة عن شخص وهو كان مخبيها عنك، بلاش تحرجه وتعرفه إنك عارف الحاجة دي.
٥- لو عرفت -بالصدفة- حاجة عن شخص وهو كان مخبيها عنك، بلاش تقوله: إنت إزاي ما تقوليش ولا تعرفني؟! كل واحد له ظروفه.

حسبي الله ونعم الوكيل في الدكاترة اللي بيدرسولنا.

((البوست هياخد من وقتك 4 دقايق))
أو لو عايز تسمع التسجيل اشترك في قناة التيليجرام:
https://t.me/kareemeosama

في هندسة قسم عمارة كان عندنا مادة اسمها (تصميم معماري)، المادة دي بتبدأ من أول فصل دراسي في أولى عمارة وحتى التخرج.
المادة طول الفصل الدراسي بتعتمد على تصميم مشروع بيتم تحديده من قِبل الدكاترة ربنا يبارك في عِلمهم وعُمرهم، ممكن يبقى فيلا، بعد كده بيبقى مول، مستشفى، بنك، مطار، إلخ ...
وفي نهاية كل فصل دراسي بنسلم المشروع وبنحصل على درجات، من أول 0 لحد 100، والمشاريع المتميزة الدكاترة بتحتفظ بيها في الكلية وبنقول إن المشروع ده (KEPT).

لما دخلت قسم عمارة كنت شايف إني هقدر أتميز بسهولة، بيس يعني الموضوع مش محتاج مجهود كبير 😅 واللي حصل كالآتي:

أولى عمارة - الفصل الأول: جبت في مشروع مادة التصميم 67/100، طبعا لساني انهال بالحسبنة على الدكاترة الظالمـ ـين اللي مش مقدرين مجهودي.

أولى عمارة - الفصل الثاني: جبت بردو 67/100، قولت هما الدكاترة مستقصدين يعطوني درجات متدنية، مش عارف ليه بيكرهوني كده.

ثانية عمارة - الفصل الأول: يا للعجب، والثالثة ثابتة جبت بردو 67/100 🤦 ساعتها بدأت أفكر إن المشكلة عندي أكيد، مش معقول كل الدكاترة دول مستقصدينّي.

ثانية عمارة - الفصل الثاني: قولت أجرب فقررت أهتم أكثر بمادة التصميم وأبذل فيها مجهود أكبر، وسبحان الله جبت 85/100، وساعتها أيقنت إن المشكلة عندي، المشكلة فيا وفي طريقة تفكيري وفي مقدار المجهود اللي ببذله، وأخذت قرار بيني وبين نفسي:
بص يا كيمو، أنا عارف إني مش أكثر شخص مبدع وموهوب في الدفعة، بس بعيدا عن أي إعذار، المشروع الجاي هجيب درجة أكبر 90/100 والمشروع هيتاخد (KEPT).

ثالثة عمارة - الفصل الأول: بدأت الفصل الدراسي وأنا مازلت مصمم على قراري: المشروع هيتاخد (كِبت)، ولسوء الحظ جالنا مشروع ثقيل وكبير - كان بيتاخد لمشاريع التخرج ساعتها - ورغم كده كنت مازلت عند قراري.
ضاعفت الوقت والمجهود والبحث والاسكتشات ومتابعاتي مع المعيدين داخل الكلية عشان أوصل لهدفي، والحمد لله بنهاية الفصل الدراسي جبت 92/100 والمشروع اتاخد (KEPT) وحققت هدفي الحمد لله ...

ليه بحكيلك القصة دي؟
عشان لو في حاجة إنت نفسك فيها وماحققتهاش فأنت بنسبة 90% عندك مشكلة في:
1- طريقة تفكيرك وقناعاتك.
2- مابذلتش الجهد المطلوب للوصول للهدف.

وعلى فكرة مش لازم تبقى موهوب ومبدع يعني، اتوكل على الله واعمل اللي عليك ...

Kareem El-Din | كريم الدين جرافيكس - عمل حر - مهارات

صباح الخير 🙏

بعد ما ضحكنا شوية حلوين، اسمح لي أكلمك جد.

(البوست هياخد منك ٣ دقايق)

فلنفترض إن في طفل اتولد في أسرة فقيرة، مش قادرة توفر له تعليم كويس أو توفر له غذاء كافي، ووجد إن أبوه مدمن مـ ـخدرات وغير متحمل للمسؤولية.
في رأيك، إيه المسارات المتاحة لمستقبل الطفل ده؟
أعتقد إن هناك مسارين ٢ فقط لا غير:
١- الطفل يطلع مُـ ـدمن زي أبوه.
٢- الطفل ده يبدأ يكبر ويتحمل مسؤولية حياته اللي مليانة مشاكل، رغم إن مش هو اللي اتسبب في المشاكل دي.

طبعاً المسار الثاني أصعب، وهياخد وقت ومجهود أكبر بكثير من طفل تاني اتولد وسط أسرة ميسورة الحال والأب والأم موفرين عيشة كريمة للطفل ده، والله أعلم هل الطفل الأول الفقير هينجح في تجاوز التحديات ولا لأ، الطفل الأول ممكن يعيش حياته كلها بيكافح عشان يحظى ب٥٠٪ من الفرص والإمكانيات اللي هي متوفرة على الجاهز أصلا للطفل الثاني.

الطفل الأول الفقير هيبذل مجهود أكبر في التعليم، والفرص المتاحة قدامه هتكون أقل من الطفل الثاني اللي أهله بيساعدوه من يوم ما اتولد، لكن في النهاية الحياة مش بتعترف غير بالإنجازات سواء إنت عملتها بكفاح ولا عملتها بسهولة أو حتى جاتلك على طبق من ذهب لإنك اتولدت في بيئة مسهلة عليك كل حاجة، المهم إنك تنجز وتوصل، هي دي الحقيقة سواء اتفقنا أو اختلفنا على الحسبة دي بس هي الدنيا ماشية كده.

نقدر نعمل إسقاط لحالة الطفل الأول على مقياس أكبر شوية:
مواطن/ة موجود في بلد نامي، إقتصاد هش، حالة إجتماعية مزرية، الأغلبية الساحقة تكافح ليس من أجل شراء فيراري أو لامبورجيني، لكن فقط من أجل توفير لقمة عيش مع قليل من الفول أوالجبنة.
بالتأكيد إن هذا المواطن/ة ليس هو المتسبب في هذه الحياة البائسة، لكن إيه المسارات المتاحة لهذا المواطن المسكين؟
أعتقد إنه لا يوجد غير مسارين ٢ فقط:
١- يفضل طول الوقت يندب حظه ويلـ ـعن الأقدار اللي وضعته في الظروف دي.
٢- يتحمل مسؤولية حل مشاكله رغم إنه مش هو اللي اتسبب فيها.

ويؤسفني أقولك إن اللي اتسبب في الأزمة والمشكلة مش هيساعدك تحلها أو على الأقل تتجاوزها بأقل الخسائر الممكنة، هو سايبك تـ ـغرق لوحدك، عشان كده مفيش غير الحل رقم ٢: اتحمل مسؤولية حل مشاكلك، عشان للأسف محدش هيسمي عليك يوم ما تقع ...
أنا عارف إن الكلام ده يبدو إنه "تنظير" لكن خليك واقعي، مفيش قدامك وقدامي وقدام الجميع غير الحل رقم ٢ وربنا يعيننا كلنا على الفترة القادمة ...

إيه الطريقة العملية اللي تقدر تتعلم بيها حاجة جديدة؟
البوست ده هياخد من وقتك دقيقتين:
اللي في الصورة دي (داتا بيز) عملتها على "نوشن" عشان أكتب فيها المصادر اللي عايز أتعلم منها، القائمة فيها حوالي 130 كورس وكتاب ومقالة وسلسلة صوتية، بالإضافة كمان لحوالي 270 كورس موجودين على يوديمي.
زمان كنت لما أحب أبدأ أعمل حاجة جديدة كنت بتفرج على 20 كورس وأشوف 50 فيديو عشان أكون مُلمّ بكل جوانب الموضوع، وده مشكلته حاجتين:
1- بيضيع مني وقت كتير وأنا بتعلم.
2- بنسى أغلب الحاجات اللي أتعلمتها قبل ما ابدأ أشتغل أصلا.
دلوقتي أنا بعتمد طريقة مختلفة للمذاكرة:
1- أشوف كورس مناسب لمستوايا أو مرحلتي.
2- ابدأ تنفيذ وشغل وده بيساعدني أثبت المعلومات اللي أتعلمتها من الكورسات.
3- أتعلم من أخطائي وأسيب مساحة للتجربة والتعرف على المشاكل ومحاولة حل المشاكل من خلال البحث على جوجل ويوتيوب.
4- أنتقل للمستوى الأعلى وأبدأ أكرر الخطوات (1و2و3) ...
وده كان مفيد بالنسبة ليا جدا، إزاي؟
لو هفترض - مثلا - عندي 30 يوم:
الطريقة الأولى: أذاكر 20 يوم وأشتغل 10 أيام وهتقابلني مشاكل هتاخد مني وقت طويل في الحل.
دلوقتي بذاكر 10 أيام وأشتغل 20 يوم، وطبعا الشغل وحل المشاكل بيخليني أتعلم أكثر من الإعتماد على الكورسات -فقط.

هل تعتقد أن تعلم الفوتوشوب وإتقانه هو مجرد رفاهية؟ وأنك لست بحاجة لأن تتعلم الفوتوشوب إلا إذا كنت تريد أن تصبح مصور فوتوجرافي أو مصمم جرافيك؟ إذاً يجب عليك قراءة هذا المقال لأنك ستتعرف على:
- ما هو تصميم الجرافيك
- ما هي أشهر برامج الجرافيك واستخداماتها.
- ما هو الفوتوشوب وفيما يتم استخدامه
- من يحتاج لتعلم الفوتوشوب والعمل به
- لماذا يجب عليك تعلم الفوتوشوب
- ما هي أفضل طريقة لتعلم برامج الجرافيك
- أفضل مصادر لتعلم الفوتوشوب.

رابط المقال في أول تعليق.

#للتوثيق:
من أكثر الحاجات اللي ساعدتني من 2015 وحتى الآن هو مبدأ الـمينيماليزم Minimalism، أو ما يطلق عليه (تبسيط الحياة)، اللايف ستايل ده مريح نفسياً وذهنياً ومادياً بطريقة ساحرة.

وأكثر حاجة استفدتها هي إني "تملَّصت" -تقدر تقول استخبيت- من ثقافة الإستهلاك المسيطرة على الكوكب واللهث وراء كل ما هو جديد وحديث ...

احنا يوميا بنتعرض لعشرات الإعلانات في كل مكان حوالين مننا، ولما بنقعد في البيت الاعلانات بتجيلنا على فيسبوك ويوتيوب:
- كومباوندات سكنية فاخرة.
- سيارات مريحة وفارهة.
- موبايلات بتكنولوچيا متطورة.
- مطاعم جديدة.
- سفريات ومصايف روعة.
وإعلانات تانية كثير ومش بتخلص

من 2015 ولحد اليوم بقيت (إنسان حر)، مش بدور على أحدث تيليفون، أو ساعة سمارت فيها أعلى مواصفات، ولا سيارة فيها تكنولوچيا عالية، ولا ملابس من براند غالي!
لما بحب اشتري حاجة جديدة بشوف إيه المواصفات اللي أنا عايزها تحت سقف إمكانياتي المادية، وشكراً.

من فترة زميل لي في الشغل اقترح عليا أبيع عربيتي القديمة نسبيا لأنها كثيرة الأعطال، وقالي: (بيع عربيتك واشتري عربية جديدة وباقي المبلغ يبقى أقساط على 5 سنين، وتركب عربية جديدة وحلوة ومريحة!).
وكان ردي بدون تفكير: (أنا مش هورط نفسي في أقساط على حاجة أنا مش محتاجها؛ أنا فعلا "عايز" عربية جديدة، لكن مش "محتاج" عربية جديدة، وفي فرق كبير بين "عايز" وبين "محتاج"!).

الأول كنت بشتري موبايل جديد كل سنة، ولازم أحدث الكمبيوتر كل فترة، وكل 3 أو 4 شهور أشتري لبس جديد! حاليا مش بشتري غير اللي أنا محتاجه، لا أكثر ولا أقل.

اتحررت من حب النفس في الظهور بشكل يعجب الناس، واتحررت من سيطرة رجال التسويق في خلق الاحتياج للشراء، واتحررت من تقييم الناس لي ومن تقييمي لنفسي على حسب ملابسي وبراند الساعة والنظارة وموديل العربية!

تخيل تبقى عايش تحت ضغط وبتطحن نفسك -باستمرار- عشان تجيب أحدث موبايل وأفخم عربية وأقوى كمبيوتر وأجدد ملابس على أحدث موضة! عمرك هيخلص وإنت بتجري في مكانك، لأن اللي هتشتريه جديد النهاردة، بكرة هيبقي في حاجة أحدث منه، إنت بتجري ورا سراب مالوش نهاية.
الحياة أسهل وأبسط من تضييعها في سبيل شراء كل ما هو جديد.

آخر فيديو على يوتيوب: ازاي تكتسب مهارة الانضباط الذاتي ...
اللينك في أول كومنت

Life is full of Variables, and you are here right now for a reason ...
في تفاصيل كثير في حياتك لو اتغيرت كان وضعك اتغير تماما:
• بلدك / مدينتك.
• تخصصك الدراسي.
• چيناتك الوراثية.
• والدك ووالدتك.
• الزمن اللي انت فيه
• مستوى أهلك التعليمي.
• مستوى أهلك المالي.
• طبيعة جسمك.
• مدرستك.
• جامعتك.
• أصحابك.
• دايرة علاقاتك.
• اهتماماتك.
• هواياتك.
• اهتمامك بعقلك وتفكيرك.
أي حاجة من الحاجات اللي فاتت دي لو اتغيرت، حياتك هتبقى متغيرة تماما عن دلوقتي.
في حاجات مش في إيدك تغيرها، تقبلها زي ما هي، وافتكر إن ربنا خلقك لسبب معين ...
You are here for a reason ...

‎Kareem El-Din - كريم الدين‎ updated their website address.

"هل اللي بيحصل دلوقتي هيبقى مهم بعد سنة؟ ولا هيكون اتنسى ومالوش تأثير؟"
السؤال ده بسأله لنفسي من 15 لـ 20 مرة يومياً !!
وبناءً على النتيجة بقرر هل الموضوع يستحق العناء ولا أتجاهل الموضوع ...

على سبيل المثال:
⚠️ سايق العربية وحد زنّق عليا ولسه هتعصب عليه ⚠️
"هل اللي بيحصل دلوقتي هيبقى مهم بعد سنة؟ ولا هيكون اتنسى ومالوش تأثير؟"
✅ مالوش تأثير، كبر مخك ✅

⚠️ حوارات في الشغل وناس بتخزوق بعض ⚠️
"هل اللي بيحصل دلوقتي هيبقى مهم بعد سنة؟ ولا هيكون اتنسى ومالوش تأثير؟"
✅ مالوش تأثير، كبر مخك ✅

⚠️ محدود العقل كاتب كلام محدود المنطق ⚠️
"هل اللي بيحصل دلوقتي هيبقى مهم بعد سنة؟ ولا هيكون اتنسى ومالوش تأثير؟"
✅ مالوش تأثير، كبر مخك ✅

⚠️ موقف مستفز ويحرق الدم ⚠️
"هل اللي بيحصل دلوقتي هيبقى مهم بعد سنة؟ ولا هيكون اتنسى ومالوش تأثير؟"
✅ مالوش تأثير، كبر مخك ✅

وهكذا على مدار اليوم مع المواقف الكثير المختلفة ...

قبل ما تستنزف طاقتك ووقتك ومجهودك اسأل نفسك:
"هل اللي بيحصل دلوقتي هيبقى مهم بعد سنة؟ ولا هيكون اتنسى ومالوش تأثير؟"

لماذا لا تحقق إي إنجاز في حياتك؟
أنا بشتغل كثير وبقضي وقت كبير من يومي وأنا شغال على (الأنشطة / المهام / الأعمال) المطلوبة مني، لكن رغم كده مش بنجز كثير، وفي أغلب الوقت الشغل بيكون ناقص، فيه غلطات كثير، وكمان بخلص المطلوب مني بعد معاده، سواء مذاكرة في الجامعة أو وظيفة أو عمل حر أو أي نشاط آخر ...
لو عندك المشكلة دي، كمل قراءة لحد النهاية، ولو تعرف حد عنده نفس المشكلة، أرسل له المقالة دي عشان هتفيده.
مبدئيا كده في فرق بين إنك "تشتغل" وبين إنك "تنجز"، عشان كده أنصحك بقراءة المقالة السابقة عشان تعرف الفرق، ده لينك المقالة https://bit.ly/WorkVsProductivity.
بعد ما قرات المقالة السابقة، تعالى دلوقتي نعرف إزاي "نضاعف" من الإنجاز بتاعنا في نفس عدد الساعات اللي بنشتغلها:
1- اقطع المشتتات:
إيه فايدة إنك تشتغل 24 ساعة طول اليوم لكن بدون تركيز؟! في عصرنا الحالي المشتتات كثير، تيليفزيون وسوشيال ميديا وإشعارات بـ"ترنّ" طول اليوم على الموبايل، طبيعي جدا إن إي إنسان بيتعرّض لهذا الكم من التشويش إنه ميعرفش يركّز، عشان كده مطلوب منك إنك تقطع المشتتات طول اليوم بأكبر قدر ممكن، ده لمصلحتك والله.
2- أخرج من إطار منطقة الراحة:
العقل بيحب يستريح ومايبذلش أي مجهود، فمع الوقت هتلاقي إن معدل إنجاز بقى ثابت، رغم إنك المفروض لما بتتعود على حاجة معينة أكثر تنجز فيها أكثر، لكن ده مش بيحصل طول ما عقلك في منطقة الراحة، أخرج بره منطقة الراحة وجرّب طرق جديدة للمذاكرة أو الشغل أو التعلّم ...
3- توقف عن التسويف والتأجيل:
التسويف والتأجيل هو داء البشرية كلها، إنت عمرك بيضيع -حرفيا- بسبب كلمة "بعدين" وكلمة "هبقى أعمل" و"هبقى أبدأ" ...
مش لازم تنتظر بداية الأسبوع أو بداية الشهر أو بداية السنة عشان تتحرك تجاه أهدافك وأحلامك، النهاردة هو فرصة مثالية للبدء من جديد، "دلوقتي" هو أحسن وقت عشان تبدأ تتشتغل.
"أنصحك بالمقالة دي" https://bit.ly/Ta2geelWTasweef
4- توقف عن "عدم الاستمرارية":
تخيل نفسك في أول الشارع وعايز توصل لبيتك، والمشوار ده هياخد منك مشي 5 دقايق، تخيل بقى لو إنت مشيت خطوتين ووقفت شوية، مشيت خطوتين ووقفت شوية، وهكذا ...
هتوصل امتى؟ يمكن بعد يوم أو يومين. تخيل المشوار اللي بياخد وقت 5 دقايق في العادي، أخد منك 48 ساعة لأنك مشيت ووقفت كل شوية، هو ده اللي بيحصل في أي حاجة بتعملها لما بتنقطع عنها كل شوية، دايت، تعلم لغة، تعلم برنامج، مشروعك الخاص، تطوير مهاراتك، الحاجات اللي ممكن تاخد منك شهرين أو 3 شهور هتاخد منك سنة أو أكثر ...

دلوقتي إنت كده عرفت إيه الحاجات اللي لو عملتها هتقدر تضاعف إنجازك، المفروض دلوقتي تعمل حاجتين: إنك تبدأ تنفذ الكلام ده بقدر الإمكان، وإنك تنشر الكلام ده عشان الناس تستفيد 😎.
وماتنساش تتابعنا على البروفايل/الصفحة/يوتيوب.
وتدخل جروب @180 Degrees

الفرق بين الشغل والإنجاز
ليه لازم تعرف الفرق بين إنك "تشتغل" وبين إنك "تنجز"؟
لأنه ببساطة إنت عمرك ممكن يتسرق منك -حرفيا- وتكتشف في الآخر وإنت محققتش إن نجاح يذكر، رغم إنك كنت بتشتغل كثير وبتسعى باستمرار، وده ممكن يحصل لكذا سبب، من ضمنهم إنك كنت بتشتغل بدون إنجاز فعلي، يعني بإختصار "كنت عامل نفسك بتشتغل" ...
تعالى في الأول نعرف إيه الفرق بين إنك "تشتغل" وبين إنك "تنجز"؟
"الشغل" هو إنك تقضي عدد ساعات معينة في نشاط معين.
"الإنجاز" هو إنك تخلص أكبر قدر ممكن من الأنشطة في عدد ساعات محدد.
يعني ممكن يكون عندنا 2 موظفين "بيشتغلوا" من 8 لـ 4، مطلوب منهم مثلا كتابة 5,000 كلمة على الكمبيوتر. الموظف الأول كتب 4,800 كلمة والموظف الثاني كتب 3,000 كلمة فقط.
رغم إن الإثنين اشتغلوا نفس عدد الساعات (من 8 لـ 4) لكن الموظف الأول أنجز المهمة بنسبة 96% والموظف الثاني أنجزها بنسبة 60%، وهو ده الفرق بين "الشغل" والإنجاز".
طيب برده الكلام ده هيفيدنا بإيه في حياتنا اليومية؟
تعالوا نذكر بعض النماذج العملية اللي كلنا بنتعرض ليها بشكل أو بآخر:
- حضرتك روحت من الكلية للبيت واستريحت شوية وقررت تبدأ تذاكر، هتبدأ مذاكرة مثلا من الساعة 8 مساءً لحد الساعة 12، وأول ما هتبدأ تذاكر شوية هيجيلك "نوتفيكيشن" من الفيسبوك: أحمد عمل كومنت على البوست بتاعك، فتفتح الموبايل وتشوف الكومنت وترد على أحمد ... بعد شوية هتجيلك رسالة على واتساب، هتسيب المذاكرة وتقعد تـ"شات"، هترجع تذاكر تاني لكن بعد شوية هتقوم تشوف حاجة تأكلها أو تشربها، وهكذا الحال لحد ما تيجي الساعة 12 ... وفجأة تلاقي إنك مذاكرتش نص كمية المذاكرة اللي كنت عايز تذاكرها، وحتى الشوية اللي ذاكرتهم إنت مش فاكرهم وحاسس إنك مشتت ... إنت صحيح قعدت تذاكر، لكن فعليا إنت ماذاكرتش، وفي إمتحان نهاية الفصل الدراسي، اللي هينجحك هو "إنجازك الفعلي في المذاكرة" مش "عدد الساعات" اللي قعدت فيها على الكرسي وكنت مقرر إنك تذاكر ...
- ممكن تنزل الجيم وتقعد ساعتين، لكن لما تخلص تلاقي إن أغلب وقتك في الجيم ضاع وإنت بتتكلم مع زمايلك الوحوش و"عاش يا كابتن" و"عاش يا كوتش"، أو وإنت ماسك الموبايل بتقلب التراكات اللي عايز تسمعها وإنت بتتمرن ...
نفس اللي حصل في المذاكرة، وفي الجيم بيحصل في كل حاجة تانية محتاجة تركيز وإنت بتعملها، في وظيفتك، لو إنت فريلانسر، لو مخصص وقت يوميا تتعلم فيه، أو أي نشاط تاني؛ في فرق كبير جدا بين عدد الساعات اللي بتقضيها في النشاط ده وبين نسبة الإنجاز فعلياً، حاول قدر الإمكان إنك تهتم بالإنجاز الفعلي، مش بعدد الساعات وخلاص ...
لو إنت بتشتغل كثير لكن نسبة إنجاز قليلة وعايز تعرف إزاي تنجز أكثر، تابعنا على الصفحة والبروفايل عشان المقالة الجاية هنتكلم فيها عن 4 حاجات لو توقفت عنها هتزود إنجازك "أضعاف"

لو عجبك المقال إنزل اكتب كومنت وتقول لنا رأيك، وتقدر تتابعنا على الصفحة/البروفايل/يوتيوب عشان تتابع المقالات والفيديوهات القادمة، ومتنساش تشترك في جروب 180° Degrees

كتب لازم تقرأها السنة دي ...
من أذكى الحاجات اللي ممكن تعملها في حياتك هي إنك تتعلم من الآخرين وخبراتهم وتجاربهم، ده هيوفر عليك سنين من المجهود والأخطاء والخسائر اللي ممكن تتعرضلها، وأفضل طريقة للتعلم من خبرات الآخرين هي القراءة، عشان كده هتلاقي في المقال ده قائمة بأفضل الكتب -من وجهة نظري- اللي هتساعدك تغير تفكيرك وأسلوب حياتك للأحسن، وتحت كل كتاب موجود نبذة عن أفكار الكتب دي.

1-لك (وائل برهان):
واحد من أفضل الكتب اللي ممكن تقرأها في حياتك كلها -بدون مبالغة، الكتاب بيتكلم عن الحضارة الإنسانية، الإيجو الفردي والإيجو الجماعي وإزاي الإيجو ممكن يدمر الحضارات، ليه البشر بيحاربوا بعض من بداية الخلق وحتى اليوم.
والفكرة الأهم والأساسية في الكتاب هي: الحياة تحت سماء مركزية الله.

2-إدارة الوقت (طارق السويدان):
كتاب رائع جدا، وكعادة دكتور طارق، أسلوب ممتع ومنظم وعملي وقابل للتنفيذ بعيدا عن المثالية الزائفة، الكتاب هيعلمك المفاهيم الأساسية لإدارة وقتك وأولوياتك واستغلالهم بطريقة ممتازة.

3-دليل العظمة (روبن شارما):
الكتاب مكون من جزئين، بيتكلم عن بعض المفاهيم الأساسية للحياة -من وجهة نظر المؤلف- اللي هتساعدك تفهم الحياة وتعيشها بطريقة أحسن وأفضل، الكتاب حلو جدا والأفكار واضحة وبسيطة جدا بدون أي تعقيد.

4-The Personal MBA (جوش كوفمان):
البيزنس !! الكتاب ده من أفضل الكتب اللي ممكن تقرأها في مجال البيزنس، لأنه في شرح لحوالي 250 كونسبت (مبدأ) من مباديء البيزنس والتسويق والمبيعات ومش مجرد شرح نظري أو أكاديمي، الشرح سلس وسهل وواضح جدا، من وجهة نظري إن أهم حاجة في الكتاب ده مش إنه بيعرفك المباديء دي، لكن أهم حاجة إنه مع تركيزك وقراءتك للكتاب هتلاقي تفكيرك بدأ يكون تفكير "بيزنس"، ودي أهم حاجة في أي كتاب تقرأه؛ إنك تكتسب طريقة تفكير جديدة، وعلى فكرة، مش لازم تكون ناوي تعمل بيزنس أو ستارت آب عشان تهتم بقراءة الكتاب، لو إنت شغال في أي شركة في قطاع الأعمال أو في مجال الإقتصاد أو بتشتغل شغل حر أو "فريلانسر" فبالتأكيد الكتاب هيكون مفيد جدا جدا ليك.

5-قواعد السطوة (روبرت جرين):
لو الكتاب اللي فات بيعلمك البيزنس، فالكتاب ده هيعلمك 48 قاعدة من قواعد السياسة والسُلطة والتحكم في الناس والوصول لرغباتك، الكاتب نفسه في بداية الكتاب حذّر من استخدام القواعد دي بطريقة غير شريفة، أو للوصول لأهداف غير نبيلة. الكتاب مليء بالقصص التاريخية والواقعية جدا لإثبات صحة هذه القواعد، وقصص أخرى لتجارب حقيقية كانت منافية للقواعد دي، ومصير البطل في كل قصة من القصص.
أنصحك جدا تقرأه، هيساعدك تفهم الحياة والناس بصورة أفضل، حتى لو مش هتستخدم القواعد دي، فلازم ع الأقل تكون عارفها عشان محدش يستغلها أو يستخدمها ضدك.
*أنا مش مسؤول عن أي حد يقرأ الكتاب ده ويستخدمه بطريقة خاطئة.

6-متعة الحياة البسيطة (جيف ديفيدسون):
المينيماليزم -تبسيط الحياة، أول مرة أسمع المصطلحات دي كان في الكتاب ده، الكتاب فيه حوالي 1,500 طريقة ومبدأ تقدر إنها تسهل حياتك وتخلصك من الفوضى، في البيت والشغل وأدواتك الشخصية والتخزين وكل حاجة حوالين منك -تقريبا. الكتاب ده غير من تفكيري تماماً في التعامل مع الأشياء، وخلى حياتي أسهل بكثير. أنصحك جدا تقرأه، أو ع الأقل تقرأ الأجزاء اللي إنت مهتم بيها، سواء الخاصة بالبيت أو الخاصة بالعمل.

7-قوة العادات (تشارلز دويج):
ليه كل ما تتحمس إنك تغير من حياتك وتحسنها وتبدأ تاخد خطوات فعلية مش بتقدر تستمر وبتحصلك "إنتكاسة"، وليه في الغالب لما تحاول تكتسب عادة إيجابية بتفشل؟ وليه بتفشل لما بتحاول تتخلص من عادة سيئة؟ السر في "الــعــــادات"، الكتاب تقدر تعتبره مرجع لكل ما يتعلق بالعادات، إيه هي العادات وإزاي بتتكون، إزاي تكتسب عادة جديدة إيجابية وإزاي تتخلص من عاداتك السيئة.

8-الشئ الوحيد (جاري كيلر):
قوة التركيز! إزاي تركز على شيء واحد فقط عشان تصل لأهدافك وتحقق النجاح، هي دي الفكرة الأساسية و"الوحيدة" في الكتاب، الكتاب هيعرفك أساليب قوية وفعالة جدا لمعرفة إيه الـ"شئ" الوحيد اللي لو ركزت عليه هتحقق النجاح، وهيوضحلك أساليب للعمل على الشيء الوحيد لغاية ما توصل لأهدافك.

9-كيف تكسب الأصدقاء وتؤثر في الناس (ديل كارنيجي):
زي ما هو واضح من الاسم، الكتاب هيعرفك إزاي تكوّن صداقات في أماكن وجودك، الدراسة أو العمل، وإزاي تقّوي علاقاتك الإجتماعية، وإيه أفضل الطرق إنك تساعد الناس وتؤثر فيهم بأساليب لطيفة من غير ما تضايق الناس أو تخسرهم.

10-فلتأكل ذاك الضفدع (براين تريسي):
اسم غريب، لكن لما تقرأ الكتاب هتفهم الفكرة الأساسية اللي هي: اشتغل وانجز مهامك الصعبة والكبيرة في بداية اليوم، (براين تريسي) من المدربين اللي كلامهم عملي جدا وأساليبه قابلة للتطبيق العملي، بعيدا عن التنظير أو التحفيز، الكتاب بيقدملك نصائح عملية ومفيدة عن زيادة الإنتاجية والإنجاز.

في نهاية المقالة وجب التنويه إنك مش لازم تطبق كل الأفكار اللي في الكتب دي أو غيرها، ومش لازم تقتنع بيها كلها، المهم إنك تختار وتنتقي الأفكار والأساليب والمفاهيم اللي هتناسبك، والأهم إنك تبدأ في تطبيق ولو 1% من اللي اتعلمته. تطبيق 1% أفضل بكثير من استيعاب بنسبة 100% لكن بدون تنفيذ.

مين قال إنك محتاج وقت طويل عشان تعمل حاجة مفيدة؟ - 15 حاجة ممكن تعملها في 15 دقيقة ...
___________________
1- امشي 1500 متر بخطوة سريعة وثابتة، المشي مفيد للقلب والدورة الدموية وبيحسن الحالة المزاجية.
2- اقرأ فصل من كتاب، القراءة هتنشط ذهنك وتخليك تتعلم أكثر.
3- اكوي ملابس الخروج، سواء ولد أو بنت، الأفضل لك إنك تجهز ملابس اليوم التالي من الليلة اللي قبلها.
4- تمرينات منزلية، تقدر تعمل تمارين لأغلب عضلات الجسم في البيت من غير ما تنزل الجيم.
5- اسمع قرآن، اختار مُقرئ إنت بتحبه وصوته بيهدي أعصابك واسمع كلام ربنا وركّز فيه.
6- اقرأ حزب (نصف جزء) من القرآن، قراءة القرآن بتركيز وفهم من أهم وأحلى الحاجات اللي ممكن تعملها في يومك.
7- دوّن أفكارك، التدوين والكتابة هتساعدك تفهم نفسك أكثر وبتخلي ذهنك صافي، وممكن تكتب مقالات تعلم الناس الحاجات اللي إنت شاطر فيها.
8- رتب مكتبك / غرفتك / الكمبيوتر / الموبايل، المينيماليزم (Minimalism) والترتيب هيقلل العشوائية وده هيساعدك أكثر على التركيز.
9- اتصل بأهلك / أصدقائك واتطمن عليهم.
10- ارسم، الرسم من الحاجات اللي بتروق الأعصاب والمخ، لو مش بتعرف ترسم فعادي شخبط براحتك.
11- اتعلم على Udemy أو Coursera أو Skillshare، الكورسات في المنصات دي حلوة جدا ومفيدة، وفي نفس الوقت الفيديوهات قصيرة ومش محتاجة منك وقت تفرغ كبير.
12- اعمل قناة جديدة على يوتيوب وتابع كل يوم فيديو جديد في المجال اللي إنت بتحبه، الفيديو ده هيشرحلك إزاي تتعلم من اليوتيوب: https://bit.ly/3pOk6yp
13- اتعلم فوتوشوب، 15 دقيقة يوميا لمدة شهر كفيلة إنها تخليك تتعلم فوتوشوب ويبقى مستواك كويس إلى حد ما، والكورس ده هيساعدك: http://bit.ly/PhotoshopEssentials_keo
14- ممكن تبدأ تتعلم إنجليش عن طريق القناة دي: https://bit.ly/zamericanenglishchannel
15- رتب أهداف الشهر والأسبوع وحدد قائمة المهام اليومية، دي من أهم الحاجات اللي ممكن تعملها هتساعدك على التخطيط الشخصي وكمان ده هيساعدك تنجز أكثر.
وفي الآخر ماتنساش تشارك المقال مع اصدقائك للإفادة، وتشترك في قناتنا على يوتيوب: http://bit.ly/KareemEldinYT

أحيان كثير الناس بترفض تبدأ في طريق جديد عشان منتظرين يكونوا عارفين كل حاجة عن الطريق ده، وده مستحيل يحصل ...
في حاجات مش هتعرفها غير لما تبدأ الطريق.
وحاجات مش هتعرفها غير لما تقطع شوط طويل.
وحاجات مش هتعرفها غير لما تجرب أكثر من مرة.
وحاجات مش هتعرفها غير لما تكوّن علاقات كثير في الطريق.
وحاجات مش هتعرفها إلا لما تقرأ وتتعلم من الناس "الخبيرة" في الطريق.

عشان تعرف لازم تبدأ، وعشان توصل لازم تبدأ.
صباحكم سعيد مليء بالسعي والإجتهاد.

ڤيديو جديد على قناة زدمي

180 Degrees | لماذا تفشل دائما - 3 أسباب خفية قد تكون السبب في إخفاقك باستمرار لماذا تفشل دائما - 3 أسباب خفية قد تكون السبب في إخفاقك باستمرار -------------------------------------------------------------------------------- تقدي

من الحاجات المحبطة جدا في الحياة إن كل حاجة تبقى ماشية غلط، ومفيش حاجة بتحصل زي ما أنت بتتمنى.
في الفيديو القادم هنتكلم عن بعض الأسباب اللي ممكن تؤدي للفشل، أسباب إنت ممكن تكون مش واخد بالك منها.
خليك متابع عشان تشوف الفيديو أول ما ينزل 😎

السر دائما في التخطيط الجيد ✌

بفضل الله النهاردة كملنا كورس Photoshop: Advanced Level. 💙

أكثر حاجة بحب أركز عليها في الكورسات هي إنك تشتغل بإيدك، وده اللي هيخليك تتعلم، لأنه المعلومات موجودة في كل مكان، لكن اللي بيفرق بين شخص والثاني، هو التنفيذ.

بدأنا كورس الـ Beginners بتثبيت برنامج الفوتوشوب، ووصلنا لمرحلة إنه نعمل شغل قوي لينا ولأي عميل.

الكورس انتهى لكن لسه متجمعين في الجروب ولسه مكملين مع بعض، لأنه زي ما بقول دايماً: اكتساب المهارة هو بداية الرحلة.

ولو حابب إنك تكون واحد من الجروب وتتعلم الفوتوشوب وتتقنه، تقدر تتواصل معانا على رسائل الصفحة.

إذا لم يكن الآن، فمتى؟

يمكنك أن تؤجل كما تشاء، لكن الوقت لا ينتظر

لا تخلط بين "العاجل" و "المهم"

"الحظ" هو أن تأتيك الفرصة حين تكون مستعداً لها من قبل

إزاي تنجز المطلوب منك النهاردة؟

بقالك أد إيه بتأجل الحاجات اللي المفروض تعملها؟ يوم؟ أسبوع؟ شهر؟ أكثر؟! ...
في المقالة دي هنوضح عن 5 أساليب تعملها على مدار اليوم تساعدك إنك تنجز أكثر النهاردة، وأي يوم تاني ...

✔ 1: اعمل اللي عليك النهاردة وبكرة بتاع ربنا.
مبدأ سهل وبسيط لكن فعّال جدا، لو إنت ضيعت من وقتك ومن عمرك كثير، مش مشكلة، اعمل اللي عليك النهاردة، لو إنت كنت شخص كسول ومستهتر ومش عايز تعمل أي حاجة، عادي مش مشكلة، اعمل اللي عليك النهاردة، مش مطلوب منك تبقى سوبر مان ولا إنك تبقى ملياردير في يوم وليلة، كل اللي عليك تعمله إنك تستغل وتستفيد من "النهاردة" بأفضل شكل ممكن.
إيه النتيجة بكرة؟ الله أعلم! هتبقى مليونير؟ بطل العالم في الشطرنج؟ أشهر كاتب ومؤلف؟ برده الله أعلم! ربنا هيسألك عن السعي والعمل، مش هيسألك عن النتيجة، لأنه الشغل والسعي ده دورك، أما النتيجة فبتبقى فضل وحكمة من ربنا، فاعمل اللي عليك، وسيب الباقي على ربنا.

✔ 2: اصحى بدري قدر الإمكان.
هتعمل إيه لو إنت بكرة رايح مكان عارف إنه زحمة؟ هتروح بدري! اعمل نفس الكلام في اليوم بتاعك، لو إنت على مدار اليوم عندك مهام/أنشطة/شغل كثير فالأفضل إنك تبدأ بدري، لو الناس بتصحى ما بين 6:00 لـ 7:00 حاول إنك تصحى بدري ساعتين، الساعتين دول "سحر"، ولو إنت جربت تصحى بدري الساعة أو الساعتين دول وجربت تستفيد منهم فأنت أكيد عارف كمية الشغل أو المذاكرة أو الحاجات اللي ممكن تنجزها في الفترة دي.

✔ 3: اعمل الحاجة الصعبة في بداية اليوم.
تخيل نفسك في نص اليوم على الساعة 1:00 الظهر مثلا، إيه أحسن؟
تكون أنجزت الحاجات الصعبة في بداية اليوم وترجع بيتك تتفرج على الماتش أو الفيلم؟
ولا تسيب الحاجات الصعبة لنهاية اليوم بعد ما ترجع وتكون تعبان ومش قادر تخلصها وتضيع الماتش أو الفيلم؟ حتى لو اتفرجت على الماتش هتحس بتأنيب ضمير إنك وراك حاجة لسه مخلصتهاش.
أكيد إنت عارف إيه الأحسن طبعا، ده غير إنك لما تشتغل في بداية اليوم هتكون نشيط ومركز والضوضاء أقل بكثير وده هيساعدك تنجز أسرع.

✔ 4: استغل الوقت اللي بتكون نشيط فيه.
في ناس مهما تحول تصحى بدري الصبح مش بتعرف، طب إيه العمل؟ حضرتك هتفضل مراقب نفسك -فعليا- على مدار اليوم من أول ما صحى لحد ما تنام، وتشوف إيه أكثر وقت بتحس إن ذهنك نشيط وفايق وعندك نشاط تشتغل.
هل الفجر؟ الصبح؟ الظهر؟ قبل المغرب؟ بالليل؟ بعد منتصف الليل؟
هتراقب نفسك كذا يوم -بشرط يكون نومك واستيقاظك تقريبا في الوقت، بعد كده تحدد الوقت اللي إنت نشيط فيه، وتبدأ تعمل فيه الأنشطة اللي بتحتاج مجهود ذهني وتركيز منك.
يعني لو إنت بتكون نشيط بعد منتصف الليل، ذاكر أو اتعلم أو اعمل الحاجة اللي محتاجة تركيز منك، عشان تقدر تنجزها بشكل مظبوط.

✔ 5: ساعد غيرك قدر المستطاع.
أساعد غيري؟ هو أنا عندي وقت أساعد نفسي أصلا؟
حضرتك كإنسان واعي وعاقل واجب عليك تساعد أي حد تقدر تساعده، ده من مهامك كبني آدم على كوكب الأرض، ده أحسن لك، وأحسن للي هتساعده، وهيخلي ربنا راضي عنك، وأنا بوعدك إنك لو ساعدت الناس ونيتك لله، ربنا هيبعتلك الناس اللي تساعدك وقت الزنقة.
أنا عارف إن الوقت اللي هتساعد فيه الناس، ممكن تستغله إنك تشتغل أكثر أو تتعلم أكثر أو حتى ترفّه عن نفسك شوية، بس وعد -تاني-، ساعد الناس وربنا هيباركلك في وقتك أكثر.

دي 5 أساليب ونصائح هتفيدك إنك تنجز أكثر في اليوم بتاعك، ممكن كلها تفيدك، وممكن حاجات تفيدك وحاجات لأ، المهم إنك تحاوًل "تنفذّ" و"تطبق" و"تشتغل"، ولو شايف إن الكلام ممكن يفيد حد تقدر تعمل "شير" لعل وعسى يقرأه حد كان محتاجه، أتمنى لك يوم سعيد ومليء بالإنجاز والنشاط.

الإنتاجية والكفاءة أفضل من "الانشغال" بدون فايدة

مش مهم إنك تكون "مشغول"، المهم فعلا هو إنت "مشغول بإيه"

النجاح مش إنك تعرف (هتعمل إيه)، ولكن إنك (تعمل اللي إنت عارفه)

لو قعدت فترة طويلة تفكر في حاجة معينة، مش هتنفذها