Hossam Zayed - Real estate consultant

مساء العلم 😍😍
** الفيديو **
هو طبعا احنا مش هنعمل escape لكل التجهيزات اللى محتاجها السيلز ال فريش بس بردو محتاجين نهتم بالسيلز الخبرة و المدير علشان كدا لازم نعملهم بوستات اتمنى يستفيدوا منها 👌👌
بجد انا شخصيا عمرى ما تضايقت من كم الفيديوهات اللى بتتعمل من الناس و لكن فيه بعض الملاحظات لو تسمحولى 😊
اولا : القبول👍
صدقنى دى حاجة مش محتاجة تعليم و لا تدريب دى نعمة من ربنا و يا موجودة فيك يا اما لا فمتحاولش تتصنع القبول ،، تعرفه منين ؟ خد رأى الناس قبل ما تبدأ فى التصوير و الظهور و لو معندكش قبول لاغلب الناس اللى حواليك انسى التصوير خاااالص 👌
ثانيا : التجهيز👍
ابوووووس ايدك متطلعش فى فيديو تعليمى او تنويرى او بيعى او تسويقى و انت مش مجهز هتقول اية و مش مرتب افكارك و لو كدا يبقى استنى و اجهز الاول و اعمل test و بعدين ابدأ 👌
ثالثا : المحتوى👍
احنا من مدرسة ان التسويق الجيد لازم يبيع بس بطريقة غير مباشرة و بمعنى اوضح لازم يكون الفيديو فيه شق تسويقى و بيوضح نقاط قوة مشروع معين مثلا يبقى لازم تدخل نقاط بيعية توصل العميل للهدف من الفيديو ،، و لو الفيديو تنويرى او توضيحى للناس يبقى و انت بتسرد تفاصيل لازم تدخل حلول للمشاكل 👌
رابعا : الحركة 👍
النقطة دى لا تقل عن اهمية نقطة القبول بمعنى ارجوك بطل تتنطط فى الفيديو و تتحرك كتير و تشوح بايدك و يبان كدا انك فاهم لغة جسد 😡 ارجوك خليك هادى و حركة ايدك عادية و بعدين الابتسامة السمجة او التكشيرة الرخمة او اى حاجة لها علاقة بمودك السئ احنا ملناش ذنب فى الكلام دا 👌
خامسا : الادوات 👍
مينفعش تعمل كل اللى فات دا و فى الاخر تيجى تقدم فيديو تسويقى بيعى عايز تكسب من وراه فلوس و بعدين تصوره بشكل عشوائى او بكاميرا موبايل و المايك مدلدل منك و اصوات حواليك و دوشة و سهل قوى تروح لناس فاهمة و دارسة تسويق و تصوير تساعدك فى التجهيز و الاعداد و التصوير و المونتاج 👌
سادسا : المدة 👍
لا يفضل ابدا الفيديوهات القصيرة جدا لانها بتبان انها اعلان و لا يفضل الفيديوهات الطويلة و المدة الافضل دايما من دقيقة الى دقيقة و نص ،، و بنصحك تحاول تعمل سيناريو كويس لموضوع فيديو لا يقل عن ١٠ او ١٥ دقيقة توضح فيها الفكرة بشكل كويس و بعدين يتقطع الفيديو دا لاجزاء صغيرة 👌........ ربنا معاكم 💪💪
استنوا الباقى 🤌🤌

مساء العلم 😍😍
** المكالمة **
بص يا سيدى او بصى يا سيدتى بالتحديد بما ان اغلب المكالمات بتكون من عند البنات اكتر و خاصة ان فيه شركات بتعين call center احب اقولكم الاتى ،،،
قاعدة رقم ١
العقارات لا تباع بالتليفون ابدااااااا 👍👍
اى حد علمك غير كدا غلطان لان قيمة البيعة و صعوبتها و كمان ضرورة و اهمية معاينة الوحدة او الموقع حاجة فى منتهى الاهمية و دى قاعدة مهمة و بالاضافة لان مقابلتك بالعميل بتوضحلك انت مدى جديته و اهتمامه و بتوضحله هو مدى مصداقيتك و مصداقية الشركة اللى بتبيع من خلالها اما الاستمرار فى المكالمة لفترة طويلة بيزود من قلة الثقة الموجودة بين الطرفين ✋️✋️
امال بنعمل اية بالمكالمة 🤌🤌
قاعدة رقم ٢
الهدف الرئيسى من المكالمة هو تحديد ميعاد 👍👍
و دى نقطة لو ركزت عليها فى مكالمتك هتعرف توصل لاكتر من ٥٠% من deal close و كمان مش هتدخل فى تفاصيل كتيرة فى التليفون و لا تفضل تبعت فى رسايل على الواتس اب و العميل ما يردش عليك علشان كدا عايزك تركز فى انك تحدد ميعاد بأكبر و اسرع قدر ممكن ،، و مش معنى كدا ان العميل لو محتاج يعرف بعض المعلومات انك تمنعها عنه بالعكس قول بس حاول متقولش كل حاجة ✋️✋️
علشان اكون منظم اعمل اية 🤌🤌
قاعدة رقم ٣
اوعى تمشى على script معين 👍👍
و دى نقطة هيختلف معايا ٩٠% من الناس اللى فى المجال بس فى النهاية دى مدارس ،، بس احب اقولك ان يكون عندك حاجات معينة محتاج تتكلم فيها و فى نقاط واضحة انت عارف انت هتتكلم عن اية و مذاكر كويس و جاهز بالرد المناسب و بعد كدا تسيب المكالمة تمشى بالشكل اللى تمشى عليه دا هيخليك تحس بأريحية اكتر و هتخلى العميل كمان يفهم انك مش بتسمع الكلام اللى عندك و بالتالى هتكون فيه مرونة فى التعامل و دا بيساعد على انك تنجز جزء كبير من ال warm up و دا مهم جدا فى اول اجتماع هيتم بينكم ✋️✋️
طيب مطلوب منك اية 🤌🤌
قاعدة رقم ٤
توقيت المكالمة و مدتها اهم من المكالمة نفسها 👍👍
مفيش حاجة اسمها العميل سجل دلوقتي تكلمه دلوقتى فيه مواعيد مفضلة للمكالمات و مواعيد تانية لا و مش معنى ان عميل شاف اعلان و سجل عليه انك تكلمه ساعتها لان دا لوحده كفيل يقفله منك ،، مدة المكالمة مينفعش يبقى طويل زيادة عن اللزوم و لا قصير زيادة عن اللزوم و سؤالك المباشر للعميل بيقصر المسافات زى مثلا حضرتك مهتم بمنطقة اية او عايز تستثمر و لا تستخدم و محتاج تستلم دلوقتى و لا بعدين بكدا هتوصل لاكبر قدر من المعلومات انت و هو محتاجينه و فى اقل مدة مكالمة ممكنة ✋️✋️
اخيرااااا
متنساش يكون صوتك بحالته و ياريت تعمل مكالمتك و انت على مكتبك و بعد اذنك يا انسة غيرى صورتك على ال truecaller و على الواتس اب لصورة فورمال لانه بيظهر عند اغلب العملاء و طبعا بردو للاستاذ السيلز بلاش تبقى روش و صورتك روشة و على البحر و بالمايوة علشان غالبا بتتشتم بس 😊😊........ ربنا معاكم 💪💪
استنوا الباقى 🤌🤌

مساء العلم 😍😍
هنقدم على مدار الفترة الجاية علم ينتفع به 🙏
** اهلا بيك ك سيلز عقارات **
بص يا سيدى ياللى لسة عايز تدخل مجال العقارات اهلا بيك فى واحد من اهم المجالات الاقتصادية فى مصر و فى العالم كله ،، قبل ما تدخل بصدر رحب كدا و تقول عايز اعمل فلوس حلوة فى المجال دا (لان فعلا فيه فلوس كتير 😊) احب اقولك اتقل كدا و اصبر و اعرف انى محتاج منك اية 🤌🤌
المجال عايز منك ٦ حاجات فشوف انت داخل على اية :
(مخ - مجهود - ضمير - علم - اقناع - مظهر)
- شغلانة عايزة مخ مفتح و حد عنده موهبة تشغيل الدماغ 👌
- شغلانة عايزة حد hard worker جدا يعنى ممكن تشتغل ٢٤ ساعة فى اليوم و ٧ ايام فى الاسبوع بدون راحة 👌
- شغلانة عايزة ضمير حي علشان بيعة واحدة شمال كفيلة توقف رزقك لمدة سنة بدون بيع 👌
- شغلانة عايزة تكون دارس و فاهم انت بتقول اية فلازم تكون لابق فى كلامك و موزون فى كل حرف بيتقال 👌
- شغلانة عايزة مهارة الاقناع و دى مهارة اولا و تمرين ثانيا و خبرة ثالثا يعنى دى حاجات بتكمل بعض مش عافية 👌
- شغلانة عايزة مظهر محترم و انيق و مش لازم تلبس اغلى حاجة و لازم تكونى حلوة المهم تكونوا مقبولين 👌........ ربنا معاكم 💪💪
استنوا الباقى 🤌🤌

اسمحولى اقدم رأيى فى التقرير دا لان فيه ابعاد اهم من فكرة نعرف مين اللى باع و مين طلع الاول ...
- طلعت مصطفى مطور ليس له منافس و المسافة بينه و بين اقرب منافسيه اكتر من الضعف و هو بيبيع direct فقط بمعنى انه يتفوق باكثر من ذلك بكثير.
- الدولة بتظهر بقوة فى العشر الاوائل و المرعب ان founders تكون مركز رابع متفوقة على شركات عقارية رائدة و دا شئ مقلق.
- فين اعمار ؟!! اى نعم هتعوض فى النص التانى لما تبيع فى الساحل و لكن يعنى اية اعمار مش موجودة فى اكبر ١٠ شركات و دا بردو مؤشر مرعب فى اختفاء مطور بالحجم دا !!
- لو جمعت بيع الدولة (الجيش) يكون ٢٦،٧ مليار يعنى مركز تانى فياريت نترقب ظهور شركات تانية فى الفترة اللى جاية هتستحوذ و تبعد شركات كتير النفروض تكون فى الصورة.
- تخيل ان لاند مارك بقت فى المركز دا بسبب ارض شمال الرحاب و اللى هى بردو شراكة مع الجيش اللى بيستحوذ على ٥٥% من صافى ربح المشروع يعنى خلاص الدولة قربت من المركز الاول و دا خطر كبير على شركات القطاع الخاص !!
- برافوووو تطوير مصر اللى من وجهة نظرى هى افضل شركة تطوير عقارى متطورة فى اخر ١٠ سنوات و بتفرض وجودها كل سنة على ساحة العقارات مع الكبار.
- تراجع ماونتن فيو كان متوقع فى ظل الارتفاع المفاجئ فى العام الماضى و دا موقعها الطبيعى و هو موقع متميز اكيد.
- التراجع المتزايد فى مبيعات سوديك للعام الثالث على التوالى يرجع لبيع الشركة و بالتالى الهدف كان المكسب المادى و ليس تطوير الشركة و اعتقد انها هتخرج من التصنيف اخر السنة.
- حقيقى شابووووو نيو جيزة شركة بتصرف ٠% تسويق و موجودة بقوة و بتبيع بطريقتها.
- اورا نجيب ساويرس ،،، بس كدا بس حقيقى برافو

الكاريزما يا شباب 👌👌
صدقونى الشخصية حاجة مهمة جدا فى تحديد مصير حياتك و لو بنتكلم عن شغلانة السيلز فصدقونى ان يكون عندك شخصية و صاحب قرار و عندك كاريزما واضحة جدا كل دا بيكون اهم من امكانياتك الفنية لانها حاجات سهل تتعلمها لكن الكاريزما لا ✋️
لاعب الكورة الناجح هو اللى عنده كاريزما ،، الحكم العادل هو اللى عنده كاريزما ،، الدكتور الشاطر هو اللى عنده كاريزما 👌
طبعا الامكانيات الفنية مهمة و طبعا القدرة على التعلم مهمة و طبعا تحقيق النتائج مهمة ،، لكن الشخصية تأتى اولا و يأتى بعدها اى شئ 💪💪

لو سمحتم يا شباب متستعجلوش الترقية ابووووس أيديكم خدوا السلم خطوة خطوة صدقنى انت بتضر نفسك قبل ما بتضر غيرك،،، مش معقول يكون عندك 22 سنة و بقالك فى المجال سنة و بقيت سنيور و دا طبعا من أخطاء الشركات اولا لأنها بتكون عايزة تجذب ناس تشتغل معاها بأى طريقة سواء المرتب او العمولة او ال title بس هنا الضرر بيقع عليك انت نفسك لان الشركات المحترمة و اللى هى بتدور على ناس كويسة هترفضك لأنك فى المكان الغلط و بعدين انت نفسك بتعتبر ان لو جالك اوفر على junior انك كدا بتعمل downgrade و دا غلط ،،
خدوها نصيحة من أخ ليكم :
خليك junior sales لحد على الاقل 3 سنين خبرة
خليك senior sales بعد 3 سنين خبرة على الاقل
ابدا خطوة ال team leader بعد 5 سنين خبرة
ابدا خطوة ال sales manager بعد 8 سنين خبرة
اوصل ل sales director بعد 10 سنين خبرة فى المجال منهم 5 سنين خبرة كمدير مبيعات على الاقل
** و طبعا الخبرة لوحدها مش كفاية لازم كمان الامكانيات و القدرات الإدارية غير موهبة البيع 👌
ملحوظة :
كل اللى هيقول انه بيكون فيه ناس عندها موهبة و قدرات اكبر من غيره فينفع يترقى اسرع،، هقوله ان اللى فوق دا ☝️مش قرآن انت حر تغير فيه بس انا بقول رأيى بناء على خبرة
و ربنا يوفق الجميع

ال team building
يا سلام لو الناس تعرف اية اللى بنعمله علشان نقدر نبنى تيم مبيعات كبير و قوى يقدر يحقق المطلوب منه و اكتر و ان ميكونش التارجت المطلوب منه بيع فقط و أرقام فقط و لكن يكون تيم قوى و القوة هى انه يدى لكل واحد حقه و ياخد كمان حقه و القوة بتكون فى الاستمرارية مش انه يبيع لفترة بسيطة و بعد كدا يتوقف و ان القوة انه يكون ال technique بتاعه بنفس إمكانياته البيعية و تحقيق الأرقام و انه يقدر يبيع الفكرة و المضمون و التفاصيل و المميز و الغير مميز،، كل دى حاجات بتاخد مجهود ذهنى و بدنى غير طبيعى و لفترات طويلة،،،،
كل دا كوم و انك تجيلك اللحظة اللى هتسيب كل دا لأنك لازم تمشى و تنهى المشوار دا و تبدأ مشوار جديد دا كوم تانى 😔😔
و لما بتبدأ من اول و جديد على قد ما بتكون فيه تحديات على قد ما فيه تعب جديد اكبر من اللى فات 👌👌

كيفية التسعير
فى البداية احنا مش ضد ان اى حد يسعر وحدته أو مشروعه بالشكل اللى يناسبه لأن الموضوع هنا بيرجع لرغبة كل شركة أو كل بائع عن اية هى الطريقة الأفضل اللى هيعتمد عليها فى التسعير ،،،
يعنى نقدر نقول ان سياسة التسعير بتستخدمها الشركة بناء على سياستها العامة زى مثلا أنها تكون عايزة تكسب أكبر مكسب ممكن و بالتالى هتحط اعلى هامش ربح ،، فى المقابل فيه شركة اختارت سياسة البيع السريع لتدوير رأس المال بشكل اكبر و بالتالى التقليل من المكسب فى المشروع الواحد لسرعة بيعه ،، و فيه الشركة اللى بتختار الانتشار الواسع فبتنزل ب أكثر من مشروع بهدف الاستحواذ على أكبر نسبة من السوق ،، و بردو فى الشركة اللى بتنزل مشروع تعويضا لخسارتها أو عدم قدرتها على بيع المشروع الأول أو علشان بيع المشروع الثانى يحرك المشروعين ....
المهم اختصارا سياسة التسعير دى حاجة تخص الشركة طالما ان لها سياسة التواجد الدائم بمعنى آخر احنا نحترم الشركات الكبيرة المتواجدة بشكل دائم لأن دى بترسم لنفسها خطة طويلة المدى و بالتالى هتراعى السوق بشكل عام و ان فى الوقت اللى بتختار الاسعار اللى هتبيع بيها مش هتفقد سياستها فى المحافظة على نوعية العميل اللى هى هتفضل تتعامل معاه ،، و دا على العكس تماما مع شركات تحت بير السلم اللى مش مهم عندها لا نوعية العميل اللى هيشترى معاها و لا يهمها المحافظة على السوق لكن يهمها تبيع بسرعة مهما كلفها الأمر ✋✋

على فكرة السيلز اللى معاه فلوس كتير و هو سنه صغير و ناجح و بيترقى و بيوصل دا شخص خسر قصاد دا كتير قوى يمكن كسب فلوس و علاقات لكنه بطبيعة الحال جه على حاجة من بيته او أسرته او أصحابه او صحته،، فحاول و انت عايز تقلده تعرف انك هتقلده بس هتخسر ،، و حاول لما تحسده تاخد بالك انك مشوفتش الصورة كاملة 👌👌👌

المدير النموذج 👌
حاول تكون نموذج إيجابي لغيرك
حاول تكون فتى احلام فى الشغل لكل الناس
عمرك ما هتكون نموذج ناجح بأرقام البيع اللى انت بتحققها و لا بالأفكار الغريبة اللى بتطلع بيها كل شوية و لا بالعروض الوهمية لان التيم منتظر منك اللى اهم من الشو و أهم من البيع و هو ازاى يشتغل صح و ازاى ينجح و ازاى يحقق التارجت بشكل صح و غيره كتير،،،،، و كل دا مش هيتحقق الا من خلال توجيهاتك الصح المعقولة اللى المفروض يتعلم منها و يعلمها للى بعده 👍👍

العاصمة الإدارية الجزء الأول 👌
هقدم شرح مبسط جدا للعاصمة على مدار جزئين او تلاتة و اتمنى ينول اعجابكم 🙄🙄
👈 فكرة إقامة عاصمة إدارية لمصر دا مش افتكاسة لان الفكرة موجودة فى دول كتير جدا فى العالم سواء للدول الحديثة تو الدول القديمة فبتعمل عاصمة جديدة اكثر تنظيما 👌
👈 مصر مش بس بتعمل عاصمة إدارية جديدة لا كمات فيه عاصمة اقتصادية بتتجهز فى سيناء و هيتم الإعلان عنها قريبا علشان يكون عندنا عاصمة إدارية و عاصمة اقتصادية على غرار دبى و ابو ظبي بالإمارات 👌
👈 على مساحة 184 الف فدان اتعمل المخطط( الكامل) للعاصمة و اللى مكون من ٣ مراحل ضخمة و عند الانتهاء منهم جميعا ستصبح تكبر عاصمة فى العالم 👌
👈 اختيار الموقع دا بالنسبة للعاصمة هو اختيار دقيق جدا و موفق جدا جدا حيث انها تقع فى منطقة قريبة من كل شئ ( القاهرة القديمة - القاهرة الجديدة - مدن القناة - قناة السويس ) و هى على اهم المحاور و الطرق السريعة فى مصر 👌
⭐⭐ ندخل فى الشرح المهم
⭐ طبعا علشان نقدر ندرس اى مدينة و نعرف نشرحها لازم نعرف نروحها ازاى و العاصمة زى اى مدينة لها اربع مداخل رئيسية على أربع اتجاهات من الشرق هيكون فيه العين السخنة و المدخل من الطريق الاضخم و الأكبر فى مصر (لسة مالوش اسم) و دا طريق استراتيجي بيربط مدن القناة بصعيد مصر عن طريق وصوله من الإسماعيلية شمالا حتى حلايب جنوبت مرورا بمدن القناة و العاصمة و السخنة و الغردقة،، غربا المدخل من الطريق الدائري الاوسطى و الجار هى القاهرة الجديدة و الدخول من عند مسجد الفتاح العليم على محورى بن زايد الشمالى و الجنوبى،، شمالا بقى طريق القاهرة السويس الصحراوى و الجيران هى مدينة بدر و مدينتى و المستقبل سيتى و فيه مدخل كبير و مهم من على الطريق الدائري الإقليمي اللى بيدخلك جوه العاصمة جنب البرج الأيقونى و فندق الماسة،، جنوبا طريق القاهرة العين السخنة و الجيران الكيان العسكرى و امتداد المعادى و المدخل من عند المدينة الرياضية الجديده 👌
⭐ تم طرح فكرة العاصمة الإدارية الحالية فى شهر ديسمبر ٢٠١٦ و تقدمت اعمار بملف كامل لتنفيذ العاصمة كلها و لكن حدث اختلاف و من هنا بدأت الدولة المصرية فى تخطيط و تنفيذ و إدارة مراحل بناء العاصمة الإدارية المصرية،، كل اللى انت بتشوفه من إنشاءات ضخمة و توسعات من عام ٢٠١٧ حتى الآن و كمان حتى ١٥ سنة قادمة كلها المرحلة الأولى فقط من العاصمة و اللى اتوفر فى المرحلة دى كل المناطق الحيوية و الإدارية لاقامة عاصمة ناجحة و فيها كل الخدمات 👌
⭐ اولا المناطق الخدمية العامة و نسب انشائاتها :
المطار الدولى على طريق السويس و قريب من منطقة القصور الرئاسية و دا تم الانتهاء منه تماما،، المدينة الرياضية قريبة من مستقبل سيتى و الحى السكنى R3 و تم الانتهاء منها بالكامل ما عدا الاستاد،، جامعة العاصمة الإدارية و دى جنب المدينة الرياضية بالظبط و تم الانتهاء من عدد كبير من كلياتها و بتشتغل بالفعل،، المدينة الطبية و المدينة الاعلامية و دول بجوار بعض و جنب الحى السكنى R6 و دول لسة تحت الإنشاء،،مدينة المعارض و الميجا مول بجوار الحى السكنى R7 و دول لسة تحت الإنشاء،، منطقة الأعمال المركزية CBD و دى اللى فيها البرج الأيقونى اعلى برج فى أفريقيا و بجواره مجموعة من الابراج مختلفة الأشكال و تم الانتهاء من كل الأعمال الخرسانية و الوجهات و حاليا مرحلة التشطيب الداخلى،، المدينة الثقافية و دار الأوبرا و دول جنب فندق الماسة و الطريق الدائري الإقليمي و تم الانتهاء منهم بالكامل،، الحى الحكومة و يضم كل الوزارات فى مصر عدا وزارتى الدفاع و الداخلية و تم الانتهاء من كامل الأعمال،، الحى المالى بجوار الحى الحكومى و دا فيه كل المقرات الرئيسية لكل بنوك مصر بما فيهم البنك المركزي،، مسجد مصر اكبر و أهم المساجد فى أفريقيا و تم الانتهاء من كافة الأعمال و ملحق به متحف اسلامى ✋
⭐ ثانيا الأحياء السكنية
الأحياء R1 R2 R3 أحياء سكنية مفتوحة و تابعة جميعها للدولة و تقع بين مستقبل سيتى و محور بن زايد الشمالى و تم الانتهاء من انشائتهم جميعا و هم قريبين من المدينة الرياضية و المدينة الثقافية و حاليا الحى السكنى R3 هو أول حى سكنى يعمل بالكامل و يوجد به سكان و خدمات كاملة 👌
الأحياء R4 R5 R6 أيضا أحياء سكنية مفتوحة و تابعة جميعها للدولة و تقع بين محور بن زايد الجنوبى و الكيان العسكرى و تم الانتهاء من حوالى ٧٠٪ منهم تقريبا و هم قريبين من المدينة الطبية و المدينة الاعلامية 👌
👈👈 اسف جدا على الإطالة و لكن المعلومات كتير جدا
👈👈 اكتفى بهذا القدر حتى الآن و لنا تكملة ان شاء الله

عودة لتصحيح ما تم اتلافه 🤌🤌
عام 2023 فى السوق العقارى هيكون عام مهم جدا فى عودة المفاهيم الأساسية للعقارات و اهمها ان تباع العقارات بهدف العقارات و ليست كأنها شركات توظيف الأموال و البورصة و الوعود الكاذبة،، تراجع ضخم فى مبيعات العاصمة الإدارية بما يعنى بداية النهاية لانصاف الشركات التى ساهمت فى خراب السوق العقارى و انتهاء فترة العمولات الضخمة و الحفلات الغير هادفة و الوعود الكاذبة بالايجار الالزامى و العوائد و غيرها من الأفكار الغريبة على المجال،، تقدم ضخم فى مبيعات التجمع الخامس و زايد فى السكنى و التجارى مع توقعات بتفوق سوق الساحل الشمالي بالبيع بأرقام ضخمة ليتربع على مبيعات السوق العقارى المصرى و تأخر ملحوظ لمبيعات العاصمة لتأتى رابعا او خامسا بعد السخنة،،
الربع الأول من عام 2023 مبيعات ضخمة للتجارى فى التجمع و السكنى فى زايد و مع طرح اراضى و مشروعات جديدة فى السكنى فى التجمع بداية من الربع الثانى ليتفوق التجمع بيعيا بشكل كبير على المستوى التجارى و السكنى ،، و على نهاية الربع الثانى و بداية الربع الثالث تظهر مبيعات الساحل الشمالي بطرح مراحل جديدة من بعض المشروعات و ظهور مشروعات أخرى مع مطورين اجانب و مصريين و مع نهاية الربع الثالث تكون مبيعات الساحل اولا و من بعدها التجمع ثانيا و ثالثا زايد و من بعدهم العاصمة او السخنة،، مع توقعات بنشاط كبير و ضخم مرة أخرى للعاصمة بنهاية عام 2023 و بداية عام 2024 و ظهور مطورين كبار من الفئة الأولى مما يعنى ازدهار فى مبيعات العاصمة مرة أخرى و لكن هذة المرة بأفكار تسويقية محترمة و لن يكون هناك مكان لما رأيناه من بعض (المقاولين) على مدار السنوات الماضية بل سنشاهد مشروعات كبيرة سكنيا و تجاريا مع بدء التشغيل الفعلى لبعض المناطق مثل ال MU23 و منطقة الحى المالى و حى التنزة و التسوق فى الداون تاون و بداية الحياة فى منطقة المستثمرين و ال R7 ✋✋
ما فات هى رؤية شخصية بناء على خبرة سابقة و ليست توقعات مع تمنياتي بالتوفيق للجميع 😍😍

مونوريل العاصمة الادارية الجديدة فى اخر تطور للاعمال فيه و الذى يقترب من افتتاحه الرسمى تزامنا مع نقل الوزارات و بداية الحياة بشكل جزئى بالعامصة الادارية 💪💪💪

مسجد مصر، العاصمة الادارية الجديدة، مصر 😍😍
تم افتتاح هذا المسجد العملاق فى منطقة وسط العاصمة الادارية بتصميم هندسى عبقرى و تنفيذ مصرى ١٠٠% ليكون وجهة حضارية اسلامية مشرفة ،، و ملحق بالمسجد المتحف الثقافى الاسلامى و الذى يضم العديد من ملامح الحضارة الاسلامية ...
دائما اقول " انتم فى حضرة مصر " 💪💪

إليكم اليوم الأول للعمل الرسمى للوزارات المصرية بالعاصمة الإدارية الجديدة ،، لحظة تاريخية 😍👌👌

حجم مبيعات عام 2022 و أكثر الشركات نجاحا 👌👌

متابعة لأعمال تنفيذ المرحلة الأولى من حدائق "النهر الأخضر" المركزية

-تُنفذ على مساحة ألف فدان بطول ٣٥ كم محتضنة مليون شجرة

-تقسم العاصمة الجديدة الى جزئين في محاكاة لنهر النيل بالعاصمة القاهرة

-تحتضن سلسلة من الفنادق العالمية و البحيرات الصناعية و المطاعم و الساحات المفتوحة للقراءة و المسارح المكشوفة و النوادي الرياضية
Copied

الحى المالى ( منطقة البنوك) العاصمة الإدارية ،، مصر 😍😍

ما أجملها عاصمة 😍😍

الحديقة المركزية داخل النهر الأخضر بالعاصمة الإدارية 😍😍

الساحل الجزء الثاني 😊
المعلومات المرة دى هتكون أكثر تعمقا فى بعض النقاط و هندخل فى مواضيع لها علاقة بالدولة و تأثيرها على شكل الساحل مستقبلا فلو سمحتم نركن حبنا أو كرهنا للحكومة لأننا هنتكلم عن العقار فقط و جزء من الأزمة العقارية فى مصر 😁 :
✋ اولا كدا الدولة عمرها ما كانت بتفكر تنافس القطاع الخاص فى مجال العقار المتميز بمعنى ان من قديم الأزل و الدولة ربما تبحث عن المساعدة فى الاسكان لمحدودي الدخل بالشقق و الأراضى بالطريقة التقليدية ،، و لكن الأمر تغير تماما بداية من طرح أراضى متميزة و اكثر تميزا فى المدن الجديدة بشكل كثيف ،، ثم تطور الى شقق اكثر تميزا و اول كمبوند حكومى للاسكان الفاخر دار مصر ثم تطور الأمر للعاصمة الإدارية ( و دى قصة تانية ) بطرح أراضى مشروعات بشكل كبير ،، كل دا كويس لكن الأمر تطور بشكل احدث أزمة حيث تحتفظ الدولة بنفسها ببعض الأراضى و المناطق لاقامة المشروعات السكنية المتميزة لبيعها بنفسها عن طريق الذراع التسويقى ( سيتى ايدج )🙈
كل المقدمة دى لها علاقة بالقادم ,,,,,,,
👈 العلمين الجديدة مدينة متكاملة الخدمات و أول مدينة من نوعها فى الساحل الشمالى بالكامل ،، فيها قصر رئاسي و مبنى لرئاسة الوزراء و اوبرا و سينمات و مطاعم و جامعات و معاهد و مساجد و كنائس و الاماكن السكنية ما بين الإسكان الاجتماعى و السياحى ،، الكلام دا كله تقليدى لكن اللى مش تقليدى ان المدينة دى جزء من مخطط عام للدولة بتستهدف به استقطاب ٤٠ مليون نسمة ( رقم اضخم مما يتوقع اى شخص ) للسكن فيما يسمى بالساحل الشمالي الغربى الجديد فى خلال ال ٤٠ عام القادمين👌
👈 نتيجة للتوجه و الرغبة الشديدة من الدولة للانتهاء من العلمين الجديدة بأى شكل و بأسرع وقت ممكن حصل للاسف بعض العرقلة للمشاريع الأخرى اللى شغالة فى الساحل ( ربما بشكل مقصود أو غير مقصود ) و دا أثر بشكل مباشر على بناء بعض المشروعات و تراجع بعض الأسماء عن طرح مشروعاتها اصلا طبقا للسياسة العامة الجديدة و الموضوع مش سهل و بسيط لان فيه أسماء كبيرة تضررت و جزء آخر سيشعر بالتضرر مستقبلا🙏
👈 فى ٢٠١٨ صدر قرار من الدولة بوقف تراخيص البناء فى الساحل لكافة المشاريع و عدم إصدار تراخيص جديدة أو تجديد الرخصة المنتهية و ذلك لعدة أسباب كان أهمها دراسة ما يسمى بالساحل الشمالى الغربى الجديد و اللى بيمتد من الكيلو ١٠٥ تقريبا ( بداية العلمين الجديدة ) وصولا للكيلو ٧٠ غرب مطروح لأهم و أخطر مشروع مصرى فى السنوات القادمة و هو ميناء جرجوب اللى هيكون ميناء بحري و مدينة لوجيستية مهمة فى اقرب مكان من مصر الى أوروبا بالإضافة لقاعدة عسكرية ضخمة💪
👈 نتكلم اكتر عن الساحل الشمالي الغربى الجديد دا بطول ٢٥٠ كم ،، قولنا الدولة وقفت التراخيص و البناء من أجل دراسة الموضوع و بالفعل انتهت الدراسة بقرار صدر فى مارس ٢٠١٩ بمخطط الساحل الشمالى الغربى و به قرارات كتيرة نطلع منه بعض النقاط المفيدة و المضرة✋
👈 عندنا مجموعة من المدن اللى هتنعش السوق العقارى المصرى احيانا و هتعمل تخمة أحيان أخرى بطول شاطئ٢٥٠ ك ،، هيتخلل المسافة الكبيرة دى بعض المدن الضخمة منها العلمين الجديدة راس الحكمة الجديدة و ( احتمال ) مدينة بعد سيدى حنيش فى خليج اسمه الجراولة و دا اجمل من سيدى حنيش كمان و اخر مدينة ضخمة جرجوب و دى تبع منطقة اسمها النجيلة ،، و المدن دى هتكتفى بتصميمها و تنفيذها و بيعها الدولة ،، و غير ذلك هى أراضى مطروحة للقطاع الخاص👌
👈 اسوء قرارين فى قرار ٢٠١٩ ان يكون الشاطئ بامتداد ال ٢٥٠ ك هو شاطئ عام ( ايوة عام متفتحش بؤك كدا ) بما فيهم المشروعات المنفذة بالفعل ( يا سيدى ايوة منهم مراسى و هاسيندا و ايوة👙 ) بس فى ثغرة فى القرار دا أو نقدر نقول حتة صايعة يعنى أن ممكن فيه فلوس تندفع على حسب مساحة الشاطئ علشان يبقى خاص بالقرية بس علشان كدا حصل مناوشات من بعض القرى لبعض ملاكها بتحصيل مبالغ مالية من أجل تخصيص الشاطئ العام اللى اصلا كان خاص 🙈 ،،، و القرار التانى هو اعادة تسعير بعض الأراضي و دفع فرق السعر بسعر اليوم و فيه ناس وصلت تقديراتها لأكثر من ٣ مليار للمشروع الواحد🤦
👈 فى ناس دفعت زى مكسيم ( بو ايلاند ) و دى بعد ما باعت جزء من أرضها لمعمار المرشدى الحاج ابو زهرة ،، ناس قالت لا زى اركو ( سيتى ستارز ) و دى وقفت محلك سر و القضية بقت تحكيم دولى ،، ناس انسحبت قبل ما تبدأ بيع زى حسن علام ،، ناس انسحبت بعد ما باعت زى مصر ايطاليا ( كاي ) والله اعلم بفلوس العملاء بس غالبا رجعت ،، ناس بتفكر زى سوديك ( ملاذ )✋..........
*** انتظروا الجزء الثالث 😊😊

الساحل الجزء الاول 😊
نتكلم شوية عن الساحل الشمالي و شوية معلومات اكيد ناس تعرفها هنا و اللى ميعرفش اهى إضافة :
👈 احنا بنسمى بيعة الساحل دى بيعة ال second home فلما تبيع الساحل اتعلم ان فيه فرق بين بيعة ال first home و بيعة ال second home فبلاش تبيع لعميلك بنفس طريقة بيع التجمع أو العاصمة و لو مش عارف الفرق بين الاتنين ممكن تتعلمهم الموضوع مش صعب قوى و كلنا اتعلمنا 👌
👈 اللى بيبيع الساحل مهم قوى يسافر بنفسه هناك و ياريت الشركة تساعد السيلز انهم يروحوا و احجزلهم شالية يومين هناك يلفوا و يتفرجوا صدقونى هتفرق معاهم جدا 💪
👈 من اسكندرية إلى مطروح ٢٨٠ كم ( المسافة الرسمية ) و هو دا طريق الساحل اللى بنحسب عليه موقع كل مشروع من اللى هنبيعه و بنحسب المسافة على بعد المشروع عن اسكندرية مش مطروح ( يعنى مراسى فى ك ١٢٥ ) يعنى تبعد ١٢٥ كم عن اسكندرية 👍
👈 كلمة الساحل القديم دى بتقولها على المشاريع من العجمى لحد قبل مارينا و دى من الكيلو ٣٠ إلى تقريبا الكيلو ٩٥ و دا ملناش دعوة به 😋
👈 مارينا دى تقريبا من الكيلو ٩٥ إلى الكيلو ١٠٧ و تعتبر زى كمبوند ضخم لان لها سور و بوابات من الخارج و متقسمة من الداخل ل ٧ مناطق متصلين فى مناطق و منفصلين فى مناطق أخرى علشان كدا هتلاقى من برة ٧ بوابات و المدينة دى اسمها العلمين ،، و دى كان فيها السيزون و الزحمة من ٢٠٠٧ لحد ٢٠١٥ تقريبا 👌
👈 من الكيلو ١٠٧ إلى تقريبا الكيلو ١٢٠ دى مدينة العلمين الجديدة و دى شرحها يطول مش وقته دلوقتى 🤦
👈 من الكيلو ١٢٠ لحد الكيلو ١٥٠ تقريبا دى مدينة سيدى عبد الرحمن و دى اللى فيها السيزون و زحمة السيزون بقالها تقريبا ٥ سنين و لسة معانا ٥ سنين كمان ،، فيها طبعا مراسى و هاسيندا و امواج و تلال و الباقى انتم عارفينه 👙👙
👈 تنتهى سيدى عبد الرحمن تبدأ مدينة الضبعة و دى كان هيبقى فيها قرى سياحيه كتيرة بس اتلغى الكلام دا علشان المفاعل النووي و فى أولها بس فيه لافيستا ✋
👈 تنتهى الضبعة تبدأ الفوكا و رأس الحكمة و يبدأ معاها كل مشاريع الساحل الجديد اللى بنتوقع السيزون و زحمته تتنقل من بعد ٥ سنين تقريبا و بردو يبقى الشو اكتر هناك لفترة مش اقل من ١٠ سنين و دا تقريبا بيبدأ من الكيلو ١٨٠ لحد تقريبا الكيلو ٢٢٠ و دى بقى فيها قرى كتير جدا منها سيزار باى و هاسيندا ويست و الفوكا و ماونتن فيو و غيرهم كتير قوى 💪
👈 من المتوقع بنسبة ٩٩٪ هتتعمل مدينة رأس الحكمة الجديدة زى مدينة العلمين الجديدة فى اللسان الكبير اللى بيقرب من البحر دا و اعتقد الاعلان عنها فى خلال سنتين او تلاتة لما ينتهوا من المرحلة الأولى من العلمين الجديدة 🤔
👈 سيدى حنيش من احلى و افضل مناطق البحر فى مصر و العالم هتلاقوا الماية شبه راس الحكمة بس المميز مفيش صخور و اللون الفاتح للمياة بيزيد ،، بس انا شخصيا اتوقعلها الهدوء الكبير مش زى راس الحكمة 😁
👈 شوية صحراء و قرى عشوائية و وصلنا لاول مطروح حمد لله على السلامه😘
👈 تروح الساحل من القاهرة عن طريق العلمين و دا ينزلك عند الكيلو ١٠٠ على طريق مطروح أمام مارينا ٤ على طول و له تفريعة تنزلك فى سيدى عبد الرحمن أمام ستيلا على طول ،، و حاليا فى طريق مطروح الجديد و دا له نزلة فى الفوكا و هيكمل لحد مطروح بيوازى طريق اسكندريه مطروح👌...............
** انتظروا الجزء الثاني 😊😊

الساحل الشمالي الجزء الثالث 😊
علشان مطولش عليكم ان شاء الله دا الجزء الاخير و اتمنى يكون على نفس قوة ما سبق ،، هنكمل شرح للساحل و هنعرض بعض الارقام اللى تقدر تساعدكم على بيع مشاريعكم بشكل أفضل :
👈 مبدئيا كدا انا مش عايز اهاجم مشروعات بعينها و لا عايز اشكر فى مشروعات بعينها لأن فى النهاية دا بوست توضيحى و ليس نقد أو عرض مميزات المشاريع ،، و بالتالى هيكون كلامنا عن ميزة و عيب كل موقع او مدينة ( فياريت اللى الكلام ميعجبوش ميتضايقش ) و كمان هنقول بعض المقترحات كطريقة مساعدة لكل من سيلز المطور و سيلز البروكر فى البيع هناك.
👈 مدينة العلمين الجديدة كموقع و بحر و خدمات حاجة ممتازة بس نصيحة لو انت عايز البيعة تبقى محترمة و العميل يشكرك مش يشتمك أو يدعى عليك دلوقتى أو بعدين حاول متنبهرش خليك واقعى ،، يعنى مثلا البيعة فى ابراج زى نورث ايدج أو غيرها من الابراج فى العلمين استثمارها ضعيف ( ايوة متستغربش و الكلام دا فى العائد المادى كايجار أو إعادة بيع ) و السكن فيها كمصيف بردو مش هو الشالية المعروف و بحر و رمل و اصحاب و نشوى و الجو دا لانه فى النهاية منطقة الابراج دى هتكون حاجة بالظبط زى ابراج دبى أو المنامة فيو رائع لكن مش الكل بيأجر هناك و المعروض هيبقى اكتر بكتيييير من المطلوب.
👈 سيدى عبد الرحمن كإشغالات هى الحاضر بنسبة ٨٠٪ من الساحل كضغط و اشغالات و حفلات و سهرات و الذى منه 👙 لكن كمستقبل قريب هتبقى اقل من ٥٠٪ و المستقبل الابعد هتنزل ل ٢٥٪ طيب النسبة التانية هتتوزع فين هتروح على العلمين الجديدة و رأس الحكمة كقرى و رأس الحكمة الجديدة كمدينة ،، فلو معاك عميل عايز يشترى كاش و يسكن دلوقتى و يستثمر دلوقتى بيعله فى سيدى عبد الرحمن و فهمه مدة استثماره و القيمة المتوقعة حاليا و مستقبلا علشان يفضل دايما معاك يشترى و يبيع و تفضل انت بالنسباله اللى عايز مصلحته مش مصلحة نفسك ،، و لو انت صايع قوى و عميلك معاه فلوس خليه يحطله ٢,٥ مليون مثلا فى شالية فى سيدى عبد الرحمن و طلع منه ٢٠٠ الف مقدم فى رأس الحكمة و الاقساط تندفع من الايجار.
👈 رأس الحكمة و الفوكا ( و هفضل اقول فوكا مش فوكه ) هى مش الحاضر كسكن أو استثمار لان نسبة الأشغال ضعيفة لا تتعدى ال ٥٪ و لكن هى المستقبل القريب و البعيد ان شاء الله ،، يعنى نقدر نقول من بعد ٥ سنوات هتتحول الدفة هناك و هتستحوذ لوحدها على ٣٠٪ من جذب التسكين و تزيد تدريجيا ،، فلو معاك عميل مش مستعجل على الاستلام و محتاج القيمة التسويقية الاعلى كزيادة فى سعر الشالية و فى المستقبل القيمة الاعلى كإيجار يبقى ركز على رأس الحكمة و ادعيلى علشان هو هيدعيلك.
👈 سيدى حنيش منطقة جميلة و شاطئ تحفة بتقل فيه الصخور و فيه مشروعات محترمة و لسة فيه مطورين تانيين هيدخلوا لما الاراضى تخلص فى رأس الحكمة ،، لكن لا اتوقع نفس جذب راس الحكمة و كمان الطابع اللى فرضته المنطقة و بعض المشاريع هناك و أهمها ألماظة باى أنها منطقة تستمع بيها بالبحر و الهدوء مش بالخروجات و الفسح ،، فلو معاك عميل سألك على اى مشروع هناك حاول تشوف دماغه اية بيحب الخروجات و لا عايز الهدوء و لو بيفضل الإيجارات و إعادة البيع تبقى سهلة يبقى خليك فى رأس الحكمة العائد هيكون اكبر.
👈 مشاريع شمال الطريق اللى بتكون مش فى اتجاة البحر مشاريع صعبة البيع يمكن علشان الناس مبتقدرش تقتنع بشالية فى الساحل بدون بحر ،، و لكن فيه طريقة لبيعها عن طريق اولا زيادة خدمات المشروعات من حمامات سباحة و اكوا بارك و محلات تجارية ثانيا ضرورة التعاقد مع شاطئ خاص بالمشروع و توفير طريقة لنقل الملاك من و الى الشاطئ و لنا فى بورتو جولف مارينا خير مثال ناجح على مشروعات قبلى الطريق ،، و ياريت اللى يقدر يبيع شالية قبلى الطريق ميتكلمش عن زيادة سعر الشالية و لا العائد الاستثمارى لانه قليل جدا و لعدة البيع هتبقى صعبة جدا و مش مضمون يعنى حاول تبيع الشالية للاستخدام فقط ( هتكون واقعى اكتر و هتقدر تقنع اكتر ).
👈 مشاريع يمين الطريق مش محتاجة شرح كبير منى و لكن محتاج اقول للسيلز اللى بيشتغل على المشاريع دى و بيقابل صعوبة كبيرة فى بيع الشاليهات البعيدة عن البحر ان الموضوع سهل طالما انت دارس اغلب المشاريع و خاصة الكبيرة فتقدر بكل بساطة تضرب مثال بمراسى أو هاسيندا أو اى مشروع كبير انه دائما بيخصص للفيلات الموقع الأقرب للبحر و الشاليهات هى البعيدة و دا طبيعى و منطقى و ان بعد الشالية عن البحر مش عيب ،، لان فى النهاية العميل تقدر تجيبه عن طريق فيو حمام السباحة مع سهولة ايجار الشالية بعد كدا.
👈 الساحل الشمالي واحد من أهم مصادر الاستثمار العقاري فى مصر قديما و حاليا و مستقبلا سواء لاصحاب المشاريع ( المطورين ) أو الملاك ،، و على كل السيلز ان يهتموا و هما بيبيعوا العقار هناك على الاستثمار بشكل أكبر بس ياريت منزودهاش قوى الله يباركلكم يعنى نقدر نتكلم عن أرقام حقيقية و واقعية زى ان الشالية حاليا فى سيدى عبد الرحمن متوسط سعر الشالية الغرفتين ٢,٥ مليون فى المشاريع الكبيرة ( دا حاليا و كاش ) و دا يقدر يجيب عائد لصاحبه فى حدود ١٥٠ الف جنية صافى فى السيزون ( و دى حوالى ١٥٪ من السعر اللى اشترى به زمان ) و دى اسعار ٢٠٢٠ و بتزيد أو بتقل كل سنة بناء على ظروف السيزون.
👈 معدل زيادة سعر الشالية اللى تحت الانشاء بيكون فى حدود ١٠٪ سنوى و عند الاستلام بعد ٤ سنين نقدر نقول يكون الشالية زاد ٥٠٪ من سعره يعنى الشالية اللى بيتباع ب ٢ مليون دلوقتى عند استلامه توصل قيمته ٣ مليون ( و ارجوكم متتكلموش فى ارقام اكتر من كدا ) و من وقت استلامه يقدر يحصل عائد من الايجار فى حدود ٨٪ من سعر الشالية و دا طبعا بالإضافة لزيادة قيمة الشالية نفسه ( و دا علشان العميل الفتك اللى يقولك عائد ٨٪ دا رقم قليل ) طبعا الارقام دى مش بتتقال كدا أو علشان نخلى العميل يشترى و لكن دى حاجة مساعدة لبيع ال second home و هيبقى لنا بوست مخصص ازاى نعرف نبيع البيعة دى.
👈 لو انت بروكر و بتدور على بيعة قوية و يهمك عميلك يبقى بلاش تمضى مع كل المطورين و دائما تسأل و تستفسر يا ترى حصل تطور فى المشروع و لا لا و طبعا الساحل زيه زى اى مكان فيه مستويات من المطورين اللى تناسب class العميل بتاعك بس انت ياريت تحدد فى كل فئة عدد محدد من المشاريع و تعمل عليه spot لانك هتلاقى اغلب المشروعات شبه بعض فى السعر و طرق السداد و حتى ال master plan شبه بعض ،، فبلاش تمضى مع ٣٠ مشروع و تفرح ان عندك كل المشاريع و فى الاخر مش هتعرف تبيع او تركز على حاجة معينة.
*** كدا اعتقد خلصت و فعلا طولت المرة دى لكن كدا خلاص خلصت تقريبا الساحل كله 💪
** لنا لقاءات تانية مع السخنة و التجمع و العاصمة 🤲
* اتمنى الكل يستفاد و اسف لو فيه حاجة معجبتش حد بعينه 😁