Pashto Political School of thought

رویټرز راپور ورکړی، چې د سې شنبې پر ورځ ناوخته تایوان ته د امریکا د مشرانو جرګې مشرې نانسي پلوسي له ناڅاپي رسیدلو سره سم، څو چینایي جنګي الوتکو د تایوان تنګي پر نارسمي سرحدي کرښه الوتنه وکړه.
چین پرلپسې تایوان ته د میرمن پلوسي د سفر په اړه خبرداری ورکړی او پخپله ادعا یې ټینګار کړی، چې تایوان د چین ملکیت دی؛ خو امریکا هم تل ویلي، چې د بیجینګ له خبرداریو به نه ډاریږي.
رویترز راپور ورکړی، چې د چینایي جنګي الوتکو پر الوتنې سربېره، څو چینایي جنګي بیړۍ هم د دوشنبې راپدیخوا د تایون د تنګي نارسمي وېشل شوي کرښې ته نږدې ځای پرځای شوي دي.
له بلې خوا د تایوان جنګې الوتکې هم د خبرتیا په حال کې دي او د هېواد دفاع وزارت د سې شنبې پر ورځ اعلان وکړ، چې دوی د "دښمن ګواښونو" ته پخپل وخت ځواب ویلو ته چمتووالی لري.