Hong Kong Toxicology Watch 香港毒理資訊監察

鑄鐵鍋測試表現問題——寫文果個，識條鐵咩？

話說消費者委員會最近出咗個報告，話而家好多鑄鐵鍋都有重金屬釋出嘅問題。最矚目嘅，當然係發現Lodge 嘅鑄鐵鍋出咗過量嘅鐵，足足54倍。我覺得消委會今次真係捉咗鹿唔識脫角，好講唔講，講人哋出鐵過量，計我話，香港咁多人缺鐵，食多啲鐵咪好，鑄鐵鍋多多少少有啲腐蝕，冇所謂喎。

但係老老實實，我擔心嘅唔係啲鑄鐵鍋釋出鐵，而係有鑄鐵鍋釋出咗過量嘅鋰 (根據消費者委員會報告，Bruno 鑄鐵鍋嘅鋰釋出超出標準 11 倍) 同埋砷(根據同一報告，Bruno 鑄鐵鍋嘅鋰釋出超出標準 16 倍)。

鋰電池大家聽得多，但係唔知大家知唔知鋰元素對毒理學家來講係一樣非常之令人又愛又恨嘅元素。

精神科醫生會用碳酸鋰(鋰元素嘅一種藥用形式)去幫忙治療燥鬱症，而內分泌科醫生就會用鋰去治療一啲甲狀腺嘅疾病；但係鋰並唔係完全冇毒，首先，孕婦如果攝取過多嘅鋰元素，會導致胎兒變得細小，甚至會出現畸胎嘅情況；而長期使用碳酸鋰嘅病人，有機會出現甲狀腺功能不足，鈣平衡失調、腎原性尿崩症，甚至腎衰竭。

當然，吸入少量嘅鋰未必會導致內分泌或者腎臟嘅問題，但係對於孕婦嚟講，問題就比較大：喺毗鄰安弟斯山脈嘅北阿根廷，由於水中有較高嘅鋰元素，有研究發現孕婦攝取鋰元素越多，咁嬰兒會變得越細。至於會唔會發生畸胎嘅情況，如果發生咗，我諗啲公司請嘅專家小組或者會同你講畸胎「冇足夠證據與_____有關」囉，你諗你啦。

至於砷，砷嘅氧化物咪大家熟悉嘅砒霜囉。份量大唔大？唔大。致唔致癌方面，祝君好運。

Bruno 嘅 facebook 專頁似乎有回應，話委託實驗室根據ISO 4531 進行測試之後佢哋冇發現問題。佢哋講嘅呢個國際標準其實同消費者委員會用嘅一樣，係要求實驗室喺器皿裡面裝上定量嘅3% 醋酸溶液，喺指定嘅温度維持一定嘅時間 (對於一般煮食器皿嚟講，係攝氏 95 度 兩小時，而如果係燒烤用嘅表面，因應食物煮食時間較短，就會係95 度 30 分鐘)。而所謂超標，就係定咗啲煲喺呢種酸液呢個時間呢個温度之後，出嚟嘅金屬唔可以超過一個水平，過咗，就唔夠安全。

所以，冇所謂「測試環境唔現實」嘅問題。小學生做數學考試，冇得用計數機，夠唔現實啦，但係你都要睇吓，人哋個標準係咁㗎嘛。真係要用普通嘅食物，分析一年間嘅吸收，咁就真係唔實際啦，唔通搵人煮一年嘢然後每次啲嘢畀部 ICP-MS 食？係嘅話我唔介意負責煮，唔好叫我食就 OK。

至於佢哋話佢哋驗冇問題，我就真係唔明，點解街買嘅同佢自己攞去驗嘅會有咁嘅不同，話説，有冇得買佢拎去驗果批（雖則送我都唔要）......

Image Source: 消費者委員會 video & hk01（又話説，今次佢嘅製圖做得唔錯）

Reference:
[1] https://www.consumer.org.hk/tc/press-release/p-541-cast-iron-cooking-pots
[2] https://www.youtube.com/watch?v=CIm1gO1ZvfE
[3] ISO 4531:2018

月夜茸 （日本類臍菇）

月夜茸含有 illudin 類毒素，呢種毒素會同我哋嘅基因物質結合導致基因轉錄嘅時候出現問題，亦會影響我哋身體裏面基因修補機制嘅發生。誤食的話會出現屙嘔肚痛等症狀，嚴重嘅情況甚至會發生幻覺同發羊吊添。由毒理機制上睇，癌症都係一個要考慮嘅風險，不過呢方面嘅危險有幾大就真係難啲清楚。

香港無月夜茸，但係就有佢嘅近親夜光菇，一樣都係唔食得。

圖：MAFF

有趣，有趣！

I just learned that apparently, even though we might be producing ~10% less carbon emissions due to the pandemic lockdowns, atmospheric CO2 is rising like "normal".

While this is expected "mathematically" (if we naively assume that the increases in CO2 are linear and entirely due to human activity, then reducing 10% will make the yearly increment "only" 90% of the normal, which isn't noticeable), it does tell us that even such drastic measures at cutting emissions (though this time merely incidental) are far from enough to meet ideal emission "goals".

To me, this basically means that unless there's some magical technological innovation out there that replaces fossil fuel with something else equally as good, the marvellous plan to cut carbon emissions by shaming people into driving less, flying less and living less of a life won't really work. After all, if a hyped up, scary, life threatening virus does not convince people to burn sufficiently less fuel, nothing else will.

There's still a silver lining though. World War 3 might be just over the horizon and we may need to be prepared for nuclear winter instead :0)

See also - https://public.wmo.int/en/media/press-release/carbon-dioxide-levels-continue-record-levels-despite-covid-19-lockdown

各位讀者，雖然我哋唔係做臨床感染學，但係都希望同大家講幾句：

口罩故然有好多標準，其實我哋做醫生都唔係真係識好多（雖然都會讀吓嘅）。但係我哋想同大家講嘅係，可以的話，戴外科口罩。

N95唔係唔好，但係帶得啱係需要學，而且需要做緊合測試。測試嘅方法係要用一部機器放出啲微粒，使用者則戴上特製嘅測試用口罩，然後比對口罩内外嘅微粒比例。做過呢啲，再學識戴完N95之後要做正壓、負壓測試，咁先可以話戴N95會比外科口罩好。此外，戴完要除嘅時候要用酒精搓手液搓手。

其次，戴眼鏡。冇眼鏡嘅，帶太陽眼鏡。飛沫走入眼係已知嘅感染方法，你睇吓中國某王醫生就知。唔好諗住一定要實驗室護眼鏡先得，其實呢啲嘢都係擋得幾多得幾多。戴完要除嘅時候亦要每一步都要用酒精搓手液搓手。

最近幾個禮拜，真係冇咩事唔好出街、聚餐。返工放工就記住要做足戴口罩、戴眼鏡，最緊要係，戴嘢除嘢都要用酒精搓手液搓手。

祝大家身體健康、百毒不侵。

據報，元朗區有黑社會喺西鐵站打人。建議大家小心。

#黑社會死全家

【醫護壓力】陳肇始質疑海外醫生臨牀18月方案欠吸引　促對所有醫生一視同仁 (23:29) - 20190426 - 港聞

鬼拍後尾枕。乜局長你都覺得喺醫院管理局做嘢辛苦？

有冇諗過點解？

一．醫院管理局醫生待遇差
二．醫院管理局管理架構臃腫、官僚
三．醫院管理局醫生有太多不必要嘅行政工作
四．以上皆正確

香港唔夠公立醫院嘅醫生，唔該局長你就一次過好似新加坡咁入返兩三千個世界百大醫學院嘅醫科畢業生，嚟公立醫院工作返五年七年，改善公立醫院嘅工作環境，將新一代同老一代嘅醫生待遇睇齊，重新建立昇職機制，革新公立醫院嘅管理，減少行政醫生嘅比例。

呢啲全部做到，你就真係爲香港好啦。

news.mingpao.com 食物及衛生局長陳肇始晚上與前線醫生團體會面，討論豁免非本地醫生來港實習要求的新方案。陳肇始會後指出，理解醫學會提出海外醫生考試後要有18個月全職公立醫院「臨牀工作」，才能豁免實習期的方案，是經過很多考量....

《臨床毒理學嘅嘢，醫生識條鐵咩》

話說呢位馬鞍山仁濟醫院董之英紀念中學嘅校董呢，就覺得一個人服食整包精神科藥物企圖自殺之後，送院後毋須洗胃有少少奇怪。聽完真係成個人醒曬。究竟呢位老闆係覺得威爾斯親王醫院嘅急症室做得唔好吖，定係覺得實際上唔需要洗胃就係冇服食過量藥物呢吓。

計我話，伍生不如去仁濟醫院搵吓啲臨床毒理科醫生，問下而家服食過量藥物係點醫啦。面誠然係人哋畀，架呢，就冇所謂啦。

丈夫釣獲河豚「加餸」 69歲長期病婦進食後中毒情況嚴重

雞泡魚，夠唔夠毒先？

喺日本要做一個雞泡魚師傅起碼需要學五年再考個牌先可以開始爲食客處理雞泡魚。原因係咩呢？係因爲雞泡魚身體裡面嘅河豚毒素係一種劇毒。

河豚毒素 (Tetradotoxin) 會影響鈉離子通道，導致肌肉唔能夠正常活動。中毒者基本上係會因爲肌肉完全郁唔到而導致身體得唔到所需嘅氧氣而死亡。一條雞泡魚處理得唔好嘅話，啲毒素随時可以殺到一百幾十個人，甚至更多。所以要食雞泡魚最好都係去日本等專業嘅師傅處理完之後食。

雖然好多人都話雞泡魚係人間美味，不過我就真係唔係十分認同啦。我覺得最多都係比其它魚甜少少。為咗果少少嘅邊際收益去搵條命博，我就真係唔會制啦。

又話說吖，其實個老公係咪真係唔知咁毒㗎......

豆知識：香港喺八年前已經有科學家喺公立醫院設計出檢測河豚毒素嘅方法，去確診河豚毒素中毒。

[1] Marine Drugs 2011;9(11):2291-303

hk.news.appledaily.com 一名69歲女子進食河豚中毒，現時情況嚴重。衞生防護中心表示，該名長期患病的女病人，昨晚在家中進食丈夫在本港捕獲及經烹煮的河豚作晚餐，約半小時後口唇麻痺、全身無力、嘔吐和呼吸衰竭，前往天水圍醫院急症室求醫....

亂食安宮牛黃丸，真係死咗都唔知咩事。

話說今日上去睇到某牌子（非圖中的北京同仁堂）嘅安宮牛黃丸賣廣告賣到去隧道口，同我一齊搭車嘅人有人講話要買啲做保健，防止中風，我就知道呢鑊大劑。

安宮牛黃丸嘅成份包括朱砂（水銀化合物）同雄黃（砷化合物），係兩種最毒嘅重金屬。傳統上，安宮牛黃丸係救急藥，係絕對絕對唔可以長期服用。此外，就算係救急，安宮牛黃丸都只可以用於「熱閉症」；而部分中風病人其實喺中醫嘅角度可能係屬於「寒閉症」，喺呢啲情況，用安宮牛黃丸會「涼上加涼」，衰過唔食。

服用得多會點呢？水銀化合物服用得多可以導致腎臟出現問題，而砷化合物服用得多就會導致慢性砷中毒，症狀包括神經同皮膚嘅問題，甚至可以出現癌症。

咁爲咩貼幅圖呢？話説，呢幅圖上面係裕華國貨嘅網站，而下面係香港中醫藥委員會，對於同一隻藥嘅標示。喺裕華國貨嘅網站上，我諗好多人都估唔到，所謂嘅其它輔助劑，竟然係烈性中藥「朱砂」同「雄黃」。點解唔喺網站列晒出嚟？咁呢啲就要自己估啦。至於兩個網站係唔係講同一樣嘢，大家可以睇吓「證書編號」，係一樣嘅，我諗裕華國貨同香港中醫藥委員會都唔會呃人嘅。

#信佢一成

圖文不符到呢個地步，我真係幫你唔到....

圖中嘅菌類，有明顯嘅蕈托同蕈環。蕈托係鵝膏菌嘅其中一個明顯特徵，而大部分嘅鵝膏菌都含有劇毒。（不過我就唔係菌裏嘅專家，所以究竟係咩就真係唔識啦 :o) ）食咗鵝膏菌之後，會係食完四小時後（甚至更後）出現腸胃病徵，之後有一段好似冇事嘅時間，然後就會出現肝衰竭嘅情況。

文中講，病人「進食菇類約兩小時後，出現腹痛、噁心、嘔吐、腹瀉和暈眩等病徵。」，呢啲喺進食後四個小時裡面出現嘅腸胃症狀，通常出現嘅原因係食咗一啲有腸胃道毒性嘅菌類，而喺香港綠褶菇係比較常見出事嘅品種。

近年喺日本慶應義塾大學理工學部分離到綠褶菇嘅毒素[1,2]：呢種毒素係一種「金屬內肽酶」，有興趣嘅，可以去以下連結睇吓。

[1] https://www.ncbi.nlm.nih.gov/pubmed/23063519
[2] http://www.applc.keio.ac.jp/~msynktxa/Isolation/isolation0.html

內褲被醋夫塗劇毒農藥　人妻陰部潰爛亡

百草枯呢啲咁毒嘅嘢.....

百草枯中毒喺香港都算少見。以前試過有人諗住扮自殺嚇人，點知飲完先知無藥可救，結果喺醫院搞完一輪又係死。不過而家新嘅治療方法明顯有改善，預後應該冇咁差。

之但係呢個真係有創意喎⋯⋯黏膜都吸收到真係估佢唔到。

www.appledaily.com.tw 中國江蘇省揚州一位丈夫懷疑戴綠帽，在妻子的內褲上塗了農藥百草枯，導致妻子不幸身亡。昨天法院開庭審理，檢方認為男子故意傷害他人致死...

大家記住要投票！

喺毒理學嘅角度，其實唔使我哋講，大家都可以見到，邊啲人係真係爲市民做嘢、出聲，邊啲不斷幫政府掩飾。議會嘅作用，係幫市民發聲嘅地方；如果連議會都只係行政機構嘅附屬品，咁三權不能得以分立，而結果就只有獨裁。

獨裁嘅嘢，其實又冇話一定唔好，有啲情況之下，其實做得唔錯，不過錯起嚟，就真係唔係好掂咁解。

不過，民主嘅體制係要求一人一票一份力量嘅——所以無論你支持建制、泛民定本土，唔好浪費咗自己呢一票。

廢油做番梘——好似有啲危險喎。

最近見到有唔少人講起呢間用廢油做番梘嘅合作社，我聽完之後，其實係打咗個突——廢油用嚟做番梘，咁裡面因爲煮食而產生嘅致癌物質點算？去咗啲番梘同鹼液裡面，定係有方法抽咗出嚟？呢個其實我就真係唔知，不過，如果要我用呢啲嘢，我諗都係驗吓有冇啲咩嘢多環芳香烴等等嘅物質喺裡面比較好啲...

其實廢油嘅嘢，問題有幾個，其一就係因爲油用耐咗，三酸甘油酯會降解做脂肪酸同甘油，而呢啲脂肪酸會再降解做短啲嘅脂肪酸，形成油脂腐敗嘅味道，而其二就係煮食嘅時候喺食物或香料出嚟嘅化學物質，一般嚟講，呢啲通常唔係問題嘅，不過麻辣火鍋嘅廢油做嘅番梘，我就真係唔知會唔會有啲「乸」啦；其三就係煮食嘅時候由於高熱產生嘅致癌物質。

至於呢啲係真定抑或係多慮，我就真係唔知，不過比我就會諗過揀過睇過度過先用呢啲嘢囉。

L*D 殺到，香港九龍新界冇得避？

Lysergic acid diethylamide、簡稱 L*D （同社民連嘅簡寫一樣，千祈唔好撈亂） 又或者叫做 acid ，係一種上世紀曾經流行嘅毒品。通常啲毒販會將 L*D 噴喺一張印滿郵票圖案嘅濾紙上面，之後賣畀人，而啲人就會將張郵票擺喺條脷上面服用。

L*D 最主要嘅效果係會導致人產生幻覺，而一個人究竟en唔enjoy呢啲幻覺，就好睇佢自己究竟有幾 prepared 去接受呢啲幻覺喇。長期接觸 L*D 之後，唔少人會有人格上嘅改變。例如有啲用家會迷失自我，會開始分唔到現實同自己想像出嚟嘅嘢。L*D 有時會令人非常焦慮不安（所謂 "bad trip"），甚至出現精神分裂嘅病徵，例如以爲畀人襲擊，繼而郁手郁腳，對周圍嘅人造成危險。而 CIA 亦曾經研究過利用 L*D 去減低一個人嘅自我保護意識，使人更加容易受人擺佈。

不過好在其實 L*D 雖然有唔少嘅毒害，佢令人上癮嘅能力並唔高，所以要搣甩都唔算難。所以大家記住遠離毒品，免受禍害。如果有人接觸過 L*D，而又有上述徵狀，記住盡快求醫。

本專頁一向以爲 L*D 喺香港已經唔係一隻受歡迎嘅毒品，但係最近突然有好多人問我關於 L*D 嘅嘢，好似話接觸 L*D 之後就性情大變，所以就簡單寫幾句，大家有咩問題歡迎喺下面問！

（郵票嘅圖案同內文完全無關，大家唔好諗多咗。）

燒咩出咩——短評經濟日報嘅報導

其一 「做梳化過程會加入山埃（氰化物），在高溫燃燒後即變成氣體釋放出來。」

做梳化會用到嘅原料其實一啲都唔少，但係我都幾肯定唔會加山埃。其實好多嘢燃燒嘅時候，喺高熱嘅環境會出現「熱力降解」(Pyrolysis) 嘅現象。諸如聚氨酯 (Polyurathane) 等等嘅膠料，喺熱力降解嘅過程裡面都會釋出氰化物。但係喺做梳化嘅時候使用聚氨酯同喺做梳化嘅時候加入山埃，係完全兩回事。

其二 「山埃毒性很強，無色無味」

雖然唔係個個都可以聞到，但係對於唔少嘅人嚟講，山埃其實有相當強烈嘅杏仁味。山埃毒性很強倒係冇錯，不過，邊個會唔知？

其三 「消防工會所指五顏六色的火舌，估計是因焚燒不同金屬，而出現不同顏色的火焰」

火嘅顔色其實係決定於幾個唔同嘅因素嘅。最重要嘅部分其實係黑體輻射（因爲燃燒導致温度升高而令物質放出嘅電磁輻射），同埋燃料喺燃燒過程之下降解爲自由基嘅輻射頻譜 (Free radical band emissions)。至於金屬導致嘅五顔六色，倒亦都係事實，不過其實只係解釋到火焰顔色嘅好少一部分。要唔同顔色，其實唔同嘅 fuel/oxygen mix 已經可以（見圖下方）

係要做科普報導嘅，就做好佢，唔好搞到教到人但係裡面啲嘢錯晒。

肉毒桿菌毒素——搞邊科？

最近有幾單肉毒桿菌毒素嘅中毒個案，除咗一單係台灣嚟嘅之外，其它都係中國境內打嘅。我哋獲得嘅資料唔多，但係有可靠綫報話畀我哋聽，其中一啲病人所使用嘅係外國入口嘅過期 Botox，而中毒嘅原因唔係因爲啲藥過期有問題，而係因爲上面啲人唔識打，打得太表面，搞到入咗身體裡面。

其實呢個係可以理解㗎——識打嘅，有牌嘅醫生，又點會打啲過期嘢吖？

Photo: Westboro by Emily (by-nc-nd)

食水含鉛事件- 主頁

鉛水報告出咗。大家可以去以下 website 睇下：

大家如果有咩嘢問題可以下面問！

中文: http://www.isd.gov.hk/drinkingwater/chi/index.html
英文: http://www.isd.gov.hk/drinkingwater/eng/index.html

isd.gov.hk

牛肝菌呢家嘢

最近收到啲路邊社新聞報導話有家人喺啲唔知咩嘢鋪頭買咗牛肝菌返屋企食，隔咗幾個鐘之後就出現嘔吐嘅症狀。臨床診斷就話係腸胃刺激類嘅菌類中毒（之但係果日點解唔使驗係唔係鵝膏菌就真係唔知）。

其實呢啲嘢都已經唔係第一次，今年二月就有人食「加康栢—野生黃牛肝菌」出事，而上年六月則係因爲食「麗江野生菌批發商行」中招。今次係邊間，我哋就真係唔知，不過似乎，無論邊間都好，出事嘅都係中國出產嘅牛肝菌....

結論：牛肝菌呢家嘢，最好都係唔好試，要試嘅話，幫襯外國勢力可能會穩陣啲。

Photo: Boletus Edulis by Boca Dorada
Licence: cc-by-sa (https://creativecommons.org/licenses/by-sa/2.0/)

一日本茨城縣茶包含微量輻射

每公斤 18 貝可嘅放射綫其實係幾多呢？

有時新聞呢啲嘢真係都幾難明：而家發現日本嘅茶包裡面有Cs－137（放射性銫），咁有幾大問題先？若果我係普通嘅市民我就會想有個比較，例如係，係背景輻射嘅幾多倍等等。

貝可（Bq）係用嚟量度放射性活度嘅國際單位。每秒有一個核子衰變活動，佢嘅放射性活度就係 1 貝可。即係，每一公斤嘅茶包裡面，每秒會有18粒核子衰變。而我哋關心嘅，其實唔係貝可，而係西弗（Sv），係輻射劑量嘅國際單位。喺考慮β射綫同伽瑪射線嘅情況下，1個西弗即係每千克物質吸收咗一焦耳嘅輻射能量。咁每日食一個茶包，當全個食晒一年會有幾多幅射接觸呢？

答案係每年 1.28 微西弗[1]，大概係每日背景幅射嘅八分之一（即係少到唔恨...），如果全香港人都每日食呢隻茶包食足一年[3]，五十年裡面，每七百八十萬人會多一個人有幅射相關嘅癌症[2]。

所以呢，其實食呢啲嘢就真係冇咩問題；當然——幅射呢啲嘢，就梗係越少越好啦，但係呢啲咁嘅劑量嘅嘢，就真係可以話係怕都冇無謂。而家要做嘅嘢，唔係有任何恐慌，而係加緊對來自日本嘅食物嘅監察。

[1] 50-year committed dose conversion factor, 6.5e-8 Sv/Bq per ECRR dose coefficient
[2] Cancer risk coefficient for ECRR, 0.1/Sv
[3] Corrected

hk.apple.nextmedia.com 食安中心發現一款日本進口茶包樣本含微量輻射，中心在進口層面抽查該款來自日本茨城縣的黑烏龍茶茶包，輻射...

聖誕快樂

香港好多地方，包括大家呢啲日子會經常去嘅餐廳，甚至公司嘅pantry，都裝咗好多四四方方嘅「自動熱水機」。圖中呢隻「飛機牌」熱水機，喺九月嘅時候有人懷疑過佢裡面嘅焊位會唔會有過量嘅鉛喺裡面。而家上網搵下，竟然有唔少嘅地方都話停售，關唔關事呢下嘢就真係自己諗下好啦。

之但係咁多食肆用緊呢類型嘅熱水罉，咁政府點解唔做嘢呢？個原因好似都幾抵死——冇一個部門肯認頭。聽講水務署嘅講法係，佢哋負責嘅範圍唔包括用戶自己裝嘅裝置；而食環方面呢，據稱就話佢哋只可以驗食物，唔可以驗水咁話。食物或者飲品嘅含鉛量標準就會比食水要高100-1000倍不等。咁搞法，即係唔使驗啦......其實我哋大家都明嘅，而家政府最怕嘅唔係真普選，唔係全民退保，而係「内交問題」，夠膽搞大陸啲熱水罉，真係未死過乎？

圖片：http://www.everpure.com.hk/topchamp/chn/product/product_boiler.html 的螢幕擷取

三文治有菌 FAQ

鑒於有大量嘅讀者朋友問咗好多嘅問題，而呢啲問題都有重複嘅地方，所以喺呢度我幫大家整理一下。

問：好似唔係好多人種到有菌咋喎。
答：其實喺臨床醫學上，腸胃炎係好常見嘅，而除非真係問題大到要住院，否則好少會幫病人種菌檢查。喺而家呢件事上，我哋睇到嘅係截至今日，有最少9個病人嘅糞便樣本對D組沙門氏菌 (Group D Salmonella) 呈陽性反應。從一個公共醫學嘅層面去睇，有咁多病人有同一隻菌，要睇嘅就係佢哋有咩相似嘅地方。首先，佢哋食嘅嘢原來都係一間廠做嘅。然後，分銷商唔同。咁得出嘅結論係咩，相信大家心知肚明。

問：點解唔可以係進口商既責任？
答：我覺得咁講啦：喺醫學或者毒理學嘅角度，其實進口商有定冇同生產商有協定，對佢哋有冇責任係冇咩影響嘅。個問題就只係，如果生產出嚟嘅嘢冇問題，咁佢哋呢啲處理方法會唔會出事？又、大家今次好似都好鍾意講話三文治呢啲嘢唔expect會運出國賣，呢點我係同意嘅，不過，如果用大型超市「citysuper」嚟做例子，佢哋嘅處理方法真係咁差的話，咁點解唔係其它嘢出事，而係呢啲三文治？點解唔係其它時候出事，而係同其它分銷商一齊出事？

問：好似話啲包裝有啲唔同喎。係唔係重新包裝嘅過程出咗問題？
答：當然可以啦！總之，裡面有沙門氏菌，講緊嘅就係包裝前出問題；運送、分銷可以做得唔好，可以導致細菌增生，但係唔會整到啲沙門氏菌出嚟。

問：你係唔係幫政府講嘢？
答：其實，我哋呢個專頁嘅目的，係希望我哋嘅醫生同科學家成員，可以用佢哋嘅醫學同科學知識去幫大家探討下而家社會上嘅中毒問題。我哋歡迎大家用科學嘅角度去討論毒理學/中毒嘅問題。所以，呢個專頁冇話幫唔幫政府。政府做得啱就幫，做得唔啱就炳。

後記：有好多朋友提醒我要小心啲處理呢啲台灣問題，我多謝佢哋嘅意見，不過，科學嘅嘢係科學嘅嘢，呢個專頁係講科學而唔係講政治。

三文治裡面有菌：真係唔關生產商事？
(...係呀，食物中毒都係毒理學嘅範疇嚟㗎。)

最近洪瑞珍三文治畀香港政府禁咗唔畀人入口，好多網友都話「鉛水唔見你禁得咁快」，但係我認爲政府其實做得冇錯。從唔同嘅媒體我哋可以得知，有兩名3歲同4歲嘅姊妹喺港安醫院留醫，而佢哋嘅糞便樣本對沙門氏菌呈陽性反應。好啦，個問題喺邊度呢？係唔係真係擺得差就會有沙門氏菌呢？

沙門氏菌係一種腸杆菌科嘅細菌，有唔同嘅菌種，係常見導致食物中毒嘅病原體。沙門氏菌常見於未熟透嘅肉類、家禽、同埋蛋同蛋嘅製品。一般嚟講，煮熟而又即食嘅食品，並唔應該有沙門氏菌，因爲沙門氏菌基本上一煮就死，但係如果製作過程係唔夠小心嘅話，就會有交叉污染(cross-contamination)嘅情況，例如生同熟嘅食物如果用同一堆處理嘅設施，就會有咁嘅情況出現。而另外一個可能性，就係三文治裡面用嘅醬料受到污染。

好嘞，咁點解人哋台灣冇事，香港有事先？話説，有菌，就唔一定會病嘅。醫學上，我哋有一個講法，叫做最低致病量(minimum infective dose)，講嘅係，最少食咗幾多細菌，先會致病；例如，沙門氏菌致病嘅劑量大概係十萬至到一百萬粒細菌左右，會視乎細菌本身嘅特性同埋病人嘅身體狀況而定。即使食物受到污染，如果喺儲存過程裡面唔夠時間畀細菌生長，咁食物中毒並唔會出現，但係，如果食物受到污染，而儲存過程又唔係最理想嘅話，咁食物中毒可能就會變成一個必然。

我想講嘅係，如果三文治製作過程係冇出問題嘅話，係唔應該有沙門氏菌嘅，而我亦都傾向相信，如果係一啲大型嘅超市，佢哋對於食物嘅儲存同運送應該亦有一套方法。而就住台灣並冇食物中毒個案，我哋可以睇到，喺出廠嘅時間，呢啲三文治嘅含菌量亦唔會係好高。所以，單單係送過香港，唔會出現問題，單單係食物出廠有受污染亦唔會出現問題，但係加埋呢，就出事嘞。

喺咁嘅情況之下，你問我係邊個嘅責任？咁梗係生產者啦。嗱，如果洪瑞珍三文治真係有承擔嘅，就應該做下檢查，睇下有冇細菌喺工場或者產品裡面出現，而唔係話「對於消費者買回後是自己食用或轉售，公司無權過問」。

Photo: Cheese and Pickle Sandwich - by LearningLark
License: cc-by-2.0 (https://creativecommons.org/licenses/by/2.0/)

講真話？涼薄呀你。《真話慎入》

噚日醫管局中毒諮詢中心總監劉飛龍整左句嘢：「做老師實知，一班人實有幾個慢啲，有人考第一，有人考第尾……𠵱家有三個（遲緩），唔代表因為鉛水令佢哋有問題」聽完之後，網上出現大量迴響，有人呢，就話佢「涼薄」，另外啲人就話佢「卸責」。計我話呢，事實嚟嘅。

而一位知名網友就話「因此，我建議高官仔女孫仔女齊齊飲鉛水，去證明食水安全」。呢個講法呢，其實就唔係好合邏輯嘅。劉醫生講緊嘅係你檢查一堆小朋友，就總有一啲遲緩，呢個係冇錯嘅，而小朋友遲緩，係唔係因爲鉛水事件呢，你問我，我會覺得有機會、覺得似，但係我亦唔覺得有充分嘅證據去支持或者反對呢啲小朋友遲緩係因爲鉛中毒。講真，我覺得呢位劉醫生講嘅嘢根本就係......同冇講過冇分別。所以，佢只係講咗一個唔係咁應該講出嚟嘅「國家機密」啫，就係「有啲人係蠢啲㗎啦」囉。咁既然呢位劉醫生所講嘅係「真話」，咁呢位網友又何苦要叫人哋啲小朋友去飲鉛水呢？

衞生處個高級醫生同你講間唔中飲下冇事嘅、個老闆講話一世平均咗唔係好大問題啫，你哋就話佢哋講官話；到而家有人出嚟講真話嘞，你哋又話人涼薄，點先？

不過，話説回來，我問翻啲兒科醫生同事，佢哋話，遲緩與否，其實係講緊小朋友係唔係喺「正常」範圍以內，亦即係話，如果有一千個小朋友，檢查晒，排好咗佢哋發展嘅速度，中間嗰950個就係「正常」，最好果25個係「資優」，而最差嗰25個咪係「遲緩」囉，咁講法，其實一定有人遲緩㗎喎。

好老實咁講句，如果爸爸媽媽叻啲，生出嚟嘅仔亦會叻啲，所以，如果大家去做檢查，亦會發現，屋企環境好啲嘅小朋友，普遍會比屋企環境冇咁好嘅小朋友要發展得快啲、好啲。喺統計學嘅層面上，我哋唔難可以理解，其實就咁搵啲公屋嘅小朋友去驗，佢哋嘅體智成長會比較大機會會發展遲緩。係唔係將多過 2.5% 嘅遲緩小朋友都當係因爲「鉛水」嘅影響呢，我會話，有啲可以商榷嘅地方，但係你話唔關事，咁就難啲囉。

最後，我想講，而家啲小朋友飲鉛水，唔飲都飲咗，唔蠢都蠢咗，而因爲鉛中毒嘅發展遲緩亦都基本上係冇得翻轉頭，其實用咁多社會資源去「檢查」呢啲小朋友有幾遲緩，爲咩呢？唔通衞生署同醫管局想幫呢啲屋企人告政府、告中國建築？

驗條鐵咩？

人哋叫你驗，你就真係驗條鐵...吖唔好意思，係驗條銅先啱。

前幾年綠色和平用X-射線螢光光譜儀檢查啲碗碗碟碟，話人哋重金屬超標，畀我哋啲toxi佬喺道恥笑問佢哋係唔係諗住食隻碟，飲隻杯；今日就有蘋果日報走嚟驗條鐵（吖，唔係，係條銅）。條管唔應該有太多嘅重金屬呢個我哋每個人都明白，但係而家講緊嘅係水喉，要驗嘅唔係條喉，係啲水！我理得你裡面有啲乜，唔溶落水就冇所謂，落咗水就唔得。

金屬呢樣嘢係好難「純」得好緊要嘅。大家講嘅千足金，講嘅就係99.9%係金，意思即係可以有0.1% (1000 ppm) 唔係金。而家蘋果報導話啲銅裡面有鉛、有鎳、有鎘，有鉻、有銀，不過講到尾呢，加埋加埋總共都係31.7 ppm，換成百分比即係0.00317%。其實所謂1 ppm 即係每百萬分一，亦即係每克裡面有幾多微克。就以鎘嚟做例子，2.5 ppm 即係每克水喉裡面有 2.5 微克嘅鎘。點先會有 2.5 微克嘅鎘呀？其實一個人喺食一包煙，身體就會吸收大概 2.5 微克嘅鎘。喺水喉裡面有 2.5 ppm，咁啲水有幾多？其實，大多數情況之下都好少；講真，驗到水裡面有，仲唔大肆報導咩，幾時輪得到條喉吖。

當然，雖然要威，不過都要帶下頭盔，你問我，一條水喉裡面可以有幾多重金屬我都會放心，我會同你講，我都唔知，我會話，睇條水喉幾多並唔實際，要驗就驗啲水，水我哋知道一日大概飲幾多，重金屬我哋亦都知道食幾多會出問題，至於水喉嘅組成同釋出嘅重金屬份量，要睇水嘅特性（例如酸鹼度、鈣含量等）、接觸嘅時間、同水喉用咗幾耐。所以，最實際都係驗啲水。

講番轉頭，如果真係可以驗，我倒想建議下而家嘅媒體朋友驗下啲黑心水龍頭，睇下有幾多鉛呀、鎘呀，咁吖。嗱嗱嗱，賣咗條橋畀你啦，唔好話我哋香港毒理資訊監察唔點條明路你行啦。

炮轟偽科學

事實上，全部都係真嘅嘢，或者全部都係假嘅嘢，都係冇咩問題嘅，因爲真嘅嘢可以幫倒人，全部都係假嘅，咩人都呃唔到。咁最危險係咩嘢呢，就係七分真、三分假嘅嘢。圖中呢位仁兄「Kongsultant John」講嘅嘢，就完全能夠演繹「七分真、三分假」呢樣嘢啦。

首先，佢話「—般都選用較亷價及簡單嘅低溶點 "錫銲"」。呢啲咪叫做「一向都係咁做囉」，點解讀呢——咪就係「一向都係咁錯」囉。有咩證據呀？早喺上個世紀20年代，科學界已經從電油裡面嘅添加物「四乙基鉛」知道鉛嘅毒性。之後科學界喺水裡面、食物裡面都發現鉛嘅蹤影，最後令到鉛唔可以喺農藥、食水管、甚至食水管用嘅焊料裡面使用。

規例上，英國早喺七十年代禁止使用鉛水管、八十年代末已經禁止使用鉛焊料。香港當時作爲殖民地，亦受呢啲條例限制。回歸以後，我哋亦緣用英國嘅標準。香港嘅水裡面不但含有氯氣用以消毒、亦係屬於軟水，即係本身含礦物質低。簡單而言，呢啲水係絕對有能力將水管裡面嘅鉛釋出。

有一樣嘢佢講得幾啱㗎——就係鉛金屬係冇毒、而鉛化合物先有毒。不過，佢冇講比你聽嘅係，香港嘅含氯軟水，就正正係最「適合」將鉛金屬變成鉛化合物嘅水。而即使係蒸餾水，放喺鉛嘅容器裡面，亦可以釋出鉛離子，破壞人嘅健康。如果真係因爲「鉛金屬係冇毒、而鉛化合物先有毒」，而水又真係唔會釋出鉛嘅話，咁點解我哋會唔可以用鉛水喉？佢諗住話鉛嘅水龍頭又點會釋出鉛？大家都係金屬啫。

雖然係咁，但係有一點我哋要好清晰咁同大家講，到咗今日，其實都未有好清晰嘅公開數據可以指出水裡面鉛嘅來源，不過我可以同大家講，水務署出嚟嘅水以及東江水呢，含鉛量倒唔係一個問題，因爲如果係佢哋嘅問題，個個屋企嘅水都會出問題啦，點解會得幾個屋苑出現問題呢。所以，到而家爲止，含鉛嘅水龍頭、含鉛嘅水管同埋含鉛嘅焊料，都係要懷疑嘅對象，而我哋科學界所知道嘅，就係呢啲含鉛嘅嘢都有一個共通點，就係佢哋都係含有呢位仁兄所講爲「無毒」嘅「金屬鉛」。

最後，回應呢位仁兄「但如果高分卻低能, 咁又多一位庸官囉!」，我哋專頁嘅人都唔係官，只係做科學嘅「主任」，不過呢位好朋友似乎學啲唔學啲，連高分都冇。事實上，低分都唔一定低能，不過如果你真係對你所講啲咁嘅偽科學都信，咁我都要贈你一句「低能」囉。當然，唔可以排除嘅係，呢位仁兄其實明知呢啲嘢有問題，但係仍然咁講。咁咪係蛇蠍心腸囉。

原文：https://www.facebook.com/photo.php?fbid=907962702580626&set=a.537759089600991.1073741827.100001007152037

Hong Kong Toxicology Watch 香港毒理資訊監察

有咩嘢係呢班高官想講，但係唔夠膽講嘅呢？

我見到最近好幾份報紙又有啲不明所以嘅「科學」新聞報導。喺呀局長開完記者招待會之後，又出嚟抽水，真係唔知係果兩位「專家」辦事不力定係又有啲咩嘢「政治考慮」頂啦。

雖然係咁，不過而家個問題又真係如果幾位專家所講，係一個市民恐慌嘅問題多過一個全港中毒嘅問題。其中，我聽到有位專家話用咗美國環境保護局(EPA)嘅電腦估算模型嚟估計香港人血裡面嘅含量。我心諗，終於有啲似啲樣嘅嘢出現啦。佢講得冇錯，美國環境保護局嗰個電腦估算模型的而且確係喺而家呢個情況之下最應該用嚟估算全血鉛濃度嘅處理方法。筆者我自己亦啱啱用咗個電腦估算模型嚟計下而家話出事果幾個水樣版嘅濃度會導致全血鉛濃度會變高幾多，亦的確係唔會搞到小朋友嘅血鉛濃度高過佢哋呢個水平。

好嘞，我話有啲嘢佢哋唔敢講，但係又欲蓋彌彰係講咩嘢呢，就係，其實而家兩條邨啲小朋友去度全血鉛，高果啲會係咩嘢人呢？答案就係....

登登登凳——大陸人。

話説，喺2000年左近，瑪嘉烈醫院同屯門醫院搞咗個研究，個研究指出啲咩呢，就係，當時嘅新移民，即使用而家大人先用嘅每分升10微克嚟做分界線，都有18.1%嘅新移民小朋友有而家呀局長所講嘅「偏高」嘅情況出現。如果用而家個每分升5微克嚟做分界線，我諗真係成半出事都似。好嘞，我哋睇新聞，大家同我評下理嘞，你話果啲受訪者啲廣東話正唔正先？你話佢哋係唔係新移民先？

所以呢，就算如呢個專頁之前所講，可以有方法去分辨鉛嘅來源，呢個政府都唔會去做，因爲唔做，最多都係用納稅人嘅錢賠下畀啲新移民，但係做呢，就可能搞到「亞爺」唔開心啦。

講番轉頭，有好多朋友都問我，點解要全血鉛超標好多好多倍嘅小朋友先會做「排毒」治療—其實，喺確診鉛中毒果一刻，小朋友個腦要衰嘅嘢已經衰咗，基本上可以話係一種不可逆嘅毒性，而螯合療法（即係局長所講嘅「排毒」療法）並唔會導致「好翻」呢個結果。螯合療法嘅目的，係等小朋友身體裡面嘅鉛可以更加快咁排出體外，但係螯合療法亦有佢嘅風險，所以，一般嚟講，全血鉛指數唔係咁高嘅話，最簡單嘅做法係等小朋友自己將啲鉛排出體外；只有喺全血鉛指數好高嘅時候，先會用螯合療法。

美國有研究指出，每分升5-44微克嘅小朋友，接受螯合療法之後，智商唔單止冇高到，仲百厭咗添。

蔣麗芸議員！

// 蔣麗芸：若巿民血液含鉛，應安排金屬排毒療程 //

呢種諗法，其實咪係香港流行嘅「識少少扮代表」嘅真實寫照囉。首先，要開宗明義講嘅，就係，鉛嘅毒性，一般而言喺確診嘅時候就已經發咗出嚟，講緊嘅係，小朋友嘅腦裡面要出問題嘅嘢其實已經出咗，而且鉛喺入咗身體之後會轉移到骨骼裡面，而呢啲骨骼裡面嘅鉛係所謂嘅「金屬排毒療程」，亦即係螯合療法，所解決唔到嘅。事實上，鉛中毒嘅病人，佢嘅骨骼會成爲毒素嘅溫床，長期排出毒素去毒害其它嘅器官。

再者，螯合療法其實並唔係完全冇副作用。螯合療法可以導致身體裡面嘅微量元素流失，甚至導致電解質紊亂。據知，外國有啲好出名嘅醫生，佢哋會話有好多嘅病，例如自閉症等等都係因爲重金屬中毒而導致，最後搞到病人電解質紊亂噉樣。

所以，鉛中毒嘅病人，只有係全血含鉛量高到一定程度嘅時候先會做螯合療法，而喺全血含鉛量降低之後就會停下然後繼續複查，直到全血含鉛量變翻高先再考慮螯合療法。而一般而言，如果小朋友身體裡面嘅全血含鉛量低於每分升 45 微克（正常小朋友上限嘅九倍以下）係唔應該，亦唔值得做螯合療法嘅，因爲喺研究裡面，呢班小朋友做完螯合療法之後，結果仲曳，仲蠢過唔做。

所以呢，鉛中毒嘅處理方法係，預防勝於治療，而如果要治療，應該搵嘅係毒理學嘅專家，而唔係蔣麗芸議員。

（謎之音：點解句「蔣麗芸議員」有聲嘅？）

圖: 蔣麗芸嘅facebook

間中飲用？
公共衞生呀馮醫生！

今日喺 facebook 見到有朋友上載咗一幅衞生處馮安兒醫生喺唔知咩嘢地方講話「間中飲用而唔係長期飲用，對健康唔會造成明顯風險」。我見到真係差啲粗口都出埋嚟。你飲水間中飲下㗎咋？不如你間中先呼吸下，間中先出下糧吖？

人細細就升咗做高級醫生，應該係最近幾年先考完試畢業，做嘢有搏命先上到位啦。但係，唔識就唔好亂講啦——食物同食水係呢個社會最唔可以出問題嘅嘢，我諗呢啲應該係 public health 101 都有教，如果你唔識，我就覺得你真係應該檢討下（雖然你話你唔識我都唔會信）；如果你係識都係市民面前講啲咁嘅嘢，我只可以話，你好適合做官囉。

Photo: Tim Geers
License: cc-by-sa https://creativecommons.org/licenses/by-sa/2.0/

鉛丹之毒？

最近蘋果日報網站有一個訪問王醫生嘅新聞，就引述呢位王醫生講，水裡面含鉛，引致急性中毒嘅風險極低。老老實實，讀過書嘅人都知道，要引致急性鉛中毒，個份量簡直係大到冇人有——例如要一劑食死人，講緊要食差唔多 30 克嘅乙酸鉛 (Lead acetate) 。大佬，焊接果道用作鉛啫，成個工程都用唔到30 克啦。不過有一點亞王醫生就冇講錯嘅，就係即使超標幾倍，居民飲用呢啲水，造成臨床嘅症狀嘅機會都係好微嘅。

點解咁啱都要專登開post 講？因爲，出咗問題的話，的而且確係唔會造成臨床症狀——因爲，今次鉛嘅份量真係唔係超高，而小朋友就算因爲咁搞到中毒，影響嘅都只會係佢哋嘅智力發展同埋專注力嘅問題，而唔會係嚴重、去醫院睇嘅急性或者慢性鉛中毒。

我粗略咁用報紙提供嘅資料計過吓，事實上，如果血液裡面嘅鉛嘅含量因爲攝取過多而增加一倍（正常嘅話嘅話每分升 5 微克，多咗一倍就會變成每分升 10 微克）咁個小朋友都係 IQ 跌翻 3-4 點咁啫..... 不過話時又話吖，果度咁多新香港人，其實會唔會係喺中國大陸果度，因爲接觸啲工業廢水、黑心油漆咁高咗，今次賴咗落呢單嘢度呢？咁，我就真係唔知啦。

至於中國嘅鉛中毒情況，有興趣嘅朋友可以考慮睇下 human rights watch 2011 年嘅報導。

勘誤：之前計算出現問題，根據 Canfield 等在 2003 年於新英倫醫學雜誌，全血含鉛爲每分升 1—10 微克的病童，每 10 微克/分升的增加會導致 IQ 下降 7.4 點。

延伸閱讀：
http://www.ftchinese.com/story/001039131?full=y
https://www.hrw.org/news/2011/06/15/china-children-poisoned-lead-and-denied-treatment

photo: Dawn Houghtaling-Montague
license: cc-by-nd (https://creativecommons.org/licenses/by-nd/2.0/)

住公屋會變蠢？

最近話説有新聞講話啟晴邨啲水喉竟然含鉛，而有啲水喉出嚟嘅水就含有唔少嘅鉛咁話。計我話呢，如果要講所謂嘅「世襲貧窮」(inherited poverty)我諗喺公屋嘅水管裡面整啲鉛喺度，都可以話係毒招之中嘅毒招，傳承之中嘅傳承囉。

鉛其實有幾毒？鉛係一種重金屬，佢嘅特點係會進入人嘅身體裡面，然後同細胞内嘅蛋白質結合，或者同其它二價離子（例如鈣、鎂、鋅等）競爭，令到細胞裡面嘅信息傳遞唔到，最後會搞到人嘅腦部出現情緒波動、注意力缺乏同埋恐懼感等等嘅症狀，而其中小朋友係特別容易受到鉛嘅毒性影響，所以，你話嘞，係唔係毒招先。

作爲一個香港人，我其中一樣最驕傲嘅嘢，就係我哋嘅食水處理系統。你諗下，東江水都可以變成開水喉就飲得嘅食水，仲要係世界排得上位置嘅，你話有幾多地方可以做到？既然係世界級嘅，當然鉛呢啲有毒重金屬就梗係唔會有啦。事實上，以食水嚟講，世衛標準一回事，鉛呢樣嘢，根本就係應該係驗都唔應該驗得出。話説，雖然話小朋友血裡面一般可能有少過每厘升 5 微克 (5 mcg/dL) 嘅鉛，但係所有毒理學家都知道，鉛係越少越好——同其它含有毒性嘅物質唔同，鉛係冇所謂嘅「最高可接受攝取量嘅——即係，越少越好。

好嘞，咁有咩辦法可意檢查到身體裡面有幾多鉛呢？最簡單就係抽一支血，驗下「全血含鉛量」囉，其實，而家嘅科技非常先進，用感應耦合電漿質譜分析儀，五、六分鐘就可以完成一個全血含鉛量嘅檢查㗎啦，而且，用感應耦合電漿質譜分析儀出嚟嘅數據，仲可以幫我哋知道一個人身體裡面嘅鉛，係唔係從一個特定嘅源頭攝取而嚟嘅添。

image: Michael Pereckas (cc-by-sa)
license: https://creativecommons.org/licenses/by-sa/2.0/

飲茶都會飲死人？

好多人都鍾意將啲嘢分爲「有毒」同「冇毒」，但係就好少去諗，食幾多先有毒。結果呢，「有毒」嘅嘢，就少少都唔夠膽食，但係「冇毒」嘅嘢，就食到個人壞曬都唔識停。今次講嘅係草酸 (oxalic acid) 中毒，文中呢位仁兄每日飲成幾公升嘅茶，結果因爲慢性草酸中毒搞到個腎壞晒。

草酸嘅系統化學名稱係「乙二酸」，化學式爲 HOOC-COOH。草酸嘅酸性比其它嘅羧酸 (carboxylic acid) 要強得多，佢嘅酸度係數 (pKa) 只係 1.27 (參考：醋酸的 pKa 爲 4.74; 磷酸的 pKa 爲 2.12)。故此，食用含大量草酸嘅食物，可以導致消化道化學灼傷。但係，草酸嘅毒性遠遠唔止於消化道化學灼傷。

草酸嘅毒性，其實係因爲阻塞咗腎臟裡面嘅腎小管。人類嘅腎小管會濃縮血液裡面嘅草酸，結果導致喺腎小管裡面嘅草酸超出腎小管裡面嘅液體可以溶解嘅份量。喺呢個情況，腎小管裡面嘅草酸會同鈣離子結合，形成草酸鈣結晶，導致腎小管阻塞、腎衰竭。其實，除咗草酸本身，其它嘢都可以導致草酸中毒。例如乙二醇 (ethylene glycol)，常見於除雪劑。乙二醇會喺身體裡面被轉化爲草酸。乙二醇最得人驚嘅地方係佢甜甜哋，所以無論係小朋友或者係動物都有報導過因爲誤服而中毒嘅事件。此外，曾經試過，有啲唔中意小動物成日侵入自己屋企嘅人，就會喺自己屋企嘅花園裡面擺一盤盤嘅乙二醇喺到，令到屬於隔籬隣舎，但係行咗入佢哋屋企嘅貓狗因爲草酸中毒、腎臟衰竭而死亡。

原文：日喝4000cc冰紅茶 男子恐將洗腎度餘生
http://news.ltn.com.tw/news/world/breakingnews/1276017

Image: Cinnamon iced lemon tea by Cinnamon Vogue
Creative common license: cc-by-2.0 (https://creativecommons.org/licenses/by/2.0/)

又有鵝膏菌中毒
——亞寶表示「你哋班『採菇者』畀我唞下得唔得？」

有時中毒呢家啲嘢，真係好難講。啱啱先叫完大家唔好去摘蘑菇食，前日就已經又有人中招啦。都係果句：「人類總要重複同樣的錯誤」。其實上次出問題嘅時間同今次都係差唔多，都係三月尾四月頭，梅雨潮濕嘅季節。

今次呢位廿九歳嘅仁兄，據悉係喺今個月十六號摘咗啲「野生菇類」。呢位仁兄呢，就喺進食十二小時後出現咗嘔吐同埋腹瀉嘅症狀。兩日後出現咗黃疸先識去睇醫生，結果急性肝衰竭而搞到去咗瑪麗醫院等肝移植。講真，如果有朋友係排緊隊等肝移植就真係多得佢唔少。

今次同大家講下菌類中毒嘅處理同點解鵝膏菌會咁毒。

首先，有好多人都唔知，而我哋呢啲毒理學家就好想你知嘅係，由食咗啲有毒嘅菌類之後，到出現嘔吐症狀嘅時間，對於分辨毒性嘅種類係好有用嘅。如果食咗嘅係綠褶菌果類腸胃毒素菌類（急症科嘅同事通常叫佢哋做「GI菇」），通常病徵會係四小時裡面出現。一般少毒性嘅菌類，通常都會喺兩個小時裡面出現症狀。而如果病徵喺四至二十四個小時裡面出現，其實就係最令人驚嘅「鵝膏菌毒性症候群」[1]。簡單嚟講，憑著病人由食咗啲菇到出現腸胃唔妥嘅時間，一個臨床毒理學家，就已經可以決定點治療呢個病人。一般而言，如果病人有確切食咗野生菌類嘅病史，而且喺四小時以後出現腸胃病徵，基本上畀咗解藥先都冇錯㗎啦（雖然貴咗啲）。

如果呢位病人唔係等咗兩日，而係喺出現症狀嘅時間即刻睇醫生，咁佢應該唔會有咩嘢大問題，但係好可惜，佢三日之後先去睇醫生。

好嘞，咁鵝膏菌點解咁毒呢？大部分嘅鵝膏菌，包括香港曾經有認出過嘅「小托柄鵝膏菌 Amanita farinosa」同埋「致命鵝膏菌 Amanita exitialis」，都有鵝膏毒素甲 (alpha-amanitin)。鵝膏毒素甲係一種環狀肽 (Cyclic peptide)，進入咗細胞之後會同内質網 (endoplasmic reticulum) 嘅二型 RNA聚合酶 (RNA polymerase II)結合，令細胞整唔到任何嘅蛋白質，繼而死亡。

而家香港嘅醫院，係有鵝膏毒素甲嘅解藥 (specific antidote)嘅——就係水飛薊素嘞。呢種解藥嘅工作原理係靠霸住啲細胞表面嘅入口，唔畀毒素走入肝細胞裡面。個情況，有啲似，人牆戰術？（笑）

都係果句啦，無論你明上面講嘅嘢又好，唔明上面講嘅嘢都好，本專頁睇醒你，香港嘅野菌好多都有毒，而冇有系統咁學習過辨認菌類嘅人，係香港中毒嘅機會係一啲都唔細嘅。

[1] 其實仲可以係一種有驚厥（發羊吊）、腸胃炎症狀同肝臟損害嘅菌類毒性症後群，但係香港應該好少見。

Image: Amanita sp. Hatchling by mountainamoeba
Creative common license: cc-by-2.0 (https://creativecommons.org/licenses/by/2.0/)

未睇之前個post可以用呢條link去:
https://www.facebook.com/toxicologyHK/photos/a.1552526165027296.1073741828.1386267634986484/1560395057573740/?type=1

隨便摘蘑菇？毒死人㗎。
「深圳父子三人疑食野生蘑菇中毒」

阿寶話「人類總要重複同樣的錯誤」就真係冇錯嘅。我哋知道，香港兩年前有三個人因爲食咗佢哋自己摘嘅「鵝膏菌」，其中仲有一個人要換肝。其實，點解會發生呢啲事嘅呢？

原因呢，就好簡單嘅。佢哋大都唔係本身住喺廣東省嘅。當年果對夫婦裡面男性果位胡東兵，就係大陸落嚟嘅。佢細個喺湖北住，而湖北其中一樣出名嘅嘢就係佢哋嘅香菇、木耳，而喺果度土生土長嘅胡東兵果日，就正正係喺落咗幾日雨之後去行山，仲話喺果日採到好多野生木耳添。結果囉喎，就當然係一家兩口齊中毒，仲搞到個老婆要換肝，食一世免疫抑制藥啦。

個問題唔係佢採菇，而係佢喺一撻佢唔識嘅地方採菇。個故事係，唔同地方嘅植物、菌類嘅品種係唔同嘅。你識一個地方嘅菌類，唔代表可以識曬其它地方嘅菌類。一樣係白色嘅菇，喺一個地方可以係好味嘅野菇，但係另一撻地方就可以係致命嘅毒菇（有説鵝膏菌其實幾好食）。

其實類似嘅中毒個案（所謂「白毒傘」中毒），喺廣東省過去幾年係好流行嘅，亦都死咗好多人，但係由於各種嘅關係，我哋並見唔到有好積極嘅宣傳。嗱嗱嗱，咪話冇教精你哋呀。

香港基本上已經可以話係鵝膏菌嘅「生地」。而鵝膏菌基本上大部分都有毒。鵝膏菌其中一個辨認特徵就係隻菇果條「菌桿」度有個好似女仔條裙咁嘅「體環」。香港亦有其它嘅毒菇，例如「綠褶菇」就會搞到個人屙嘔肚痛。

講咗咁耐，有冇咩嘢方法可以避免菌類中毒呀？當然有啦，咪係唔好摘嚟食囉。（迷之音：鬼唔知咩！）

References:
http://www.iszed.com/content/2013-04/09/content_7914161_3.htm
http://hk.apple.nextmedia.com/news/art/20130408/18220809

Source: http://news.wenweipo.com/2015/03/13/IN1503130077.htm
Photo: Amanita citrina by tomasz przechlewskl
License: cc-by-2.0 (https://creativecommons.org/licenses/by/2.0/)

中藥冇副作用？唔會死人？「男子因減肥服用過量含有麻黃的藥物後猝死 中醫師遭訴」

嗱嗱嗱，唔好話中醫中藥冇副作用啦。其實，食咩藥都會死嘅，睇下佢點開、同埋睇下你身體點、食幾多嘅啫。有好多人會講，天然嘅嘢，點解會有毒，有副作用？其實，我想講嘅係，天然嘅嘢，先至會有副作用。一株植物，一隻動物，喺弱肉強食、適者生存嘅大自然裡面，如果一啲保護自己嘅能力都冇，你話會點？當然係滅絕啦。所以，各種嘅動物植物都會有佢哋自己保護自己嘅方式，呢啲方式，可以係有強而有力嘅爪牙，亦可以係劇毒嘅物質。

所謂「毒」，其實就係影響我哋身體嘅物質。如果你正正常常，咁當然就唔會想畀呢啲物質影響啦，但係如果你有病嘅話，可能真係要影響下先會治療到疾病。例如，一種叫做「白子菜」嘅蔬菜，就有降血糖嘅能力。喺一個正常嘅人，降低血糖可能會導致血糖過低，會導致驚厥（發羊吊）嘅出現，但係喺一個糖尿病人，降低血糖可能就係治病嘅良方啦（但白子菜含有吡咯啶類生物鹼，有肝毒性，所以並唔建議服用）。所以，要影響身體、治療疾病嘅話，一隻藥要有效，基本上就一定要有毒。咁當然要明白，有啲嘢對身體嘅改變係利用唔到嘅，咁呢啲嘢，我哋就叫佢哋做「毒藥」而唔係「藥」囉。

有人會話，咁抗生素，淨係殺細菌，唔影響身體掛。咁講，其實錯唔晒，不過都唔啱。而家喺醫學研究逐漸發現，其實人嘅健康，唔單只係個人本身，亦會受佢身體裡面嘅微生物群所影響，例如喺2006年，國際知名期刊「自然」就有一篇文章講述身體裡面嘅一啲微生物可以令人更有效咁從食物吸收能量，因而引致肥胖。咁講，影響身體嘅細菌亦可以影響人嘅健康。

講番件事，麻黃裡面含有麻黃素、偽麻黃素等生物鹼，而麻黃素會刺激腎上腺素分泌，令到心跳加快、提升血壓嘅功用。個病人就診時就已經提出有胸悶、心跳加速咁嘅症狀......一個四十七歳，成百公斤嘅肥佬，你估個心有幾勁、可以捱得幾耐吖？個心頂唔順，再加藥，死咗人，預咗㗎喇！

有啲人話，哩啲人係害群之馬，大部分都唔係咁，但係，而家我哋成日見到啲中醫、中藥業者喺度話中藥「冇毒性」、「冇副作用」，其實呢啲會咁講嘅人，係唔係講緊真話，係唔係埋沒良心，係唔係害群之馬？我識嘅中醫，都會用我講，副作用、毒性就咩藥都有，病人點，就睇醫師嘅功力，我覺得佢哋咁講，先係真話囉。

References:
Turnbaugh PJ et al. Nature 2006;444:1027-1031

Sources:
http://www.chinatimes.com/realtimenews/20150309004128-260402
http://www.appledaily.com.tw/realtimenews/article/new/20150309/571014/

Photo: shops/traditional chinese medicine by bomb_bao
License: by-cc-nd-2.0 (https://creativecommons.org/licenses/by-nc-nd/2.0/)