Colin C. Ngohai

CHYHSA HROPA CHÂTA LOHPAPUA:
[MIZO SPECIAL]
MARALAND LAIPHÔ-AIZAWL(30/10/2020): Covid-19 ta Mawrâh su nano nano pa liata pôh viana lâ apangaipa vâta October noh 27, 2020 noh tawhta November noh 4, 2020 myrâh taihta Aizawl Municipal Council(AMC) Area ôna chhoh liata Total Lockdown(5.0) a phuahpa vâta Aizawl khihpi vaih nano nanopa lia chyhsa thokha niebaw rairupa zy châta Pi Sapkhumi nata chhokha zy ta he ary liata nohthlapa palasapa Sapha Bag he chyhsa peimawh pa zy châta ama Tlyhmia(Gate/Varanda) liata ama soh.
Aizawl khihpi Total Lockdown nata ama hmo taopa he ahmie ta. Chyhsa châta Byhna ama châ hmeiseih. Khazohpa ta alie hlupi ta Byhna apie cheingei awpa he zawpi zy angiapana a châ. Pi Sapkhumi chhokha zy he Champhai Kanan Vaih puapa ama châ.
Khazohpa ta ama hmopha taopa he Byhna hlupi pie palie mawh sy!

Source: Vanapa Section, Ramhlun North WhatsApp Group.

Source: News Lawrkhaw FB Group.

MIZORAM TA COVID-19 VÂTA ATHIPA 1 EIMA HNEI:
[MAWRÂH THATIH]
MARALAND LAIPHÔ/AIZAWL(28/10/2020): SRH-ZMC liata Covid-19 pasana ahneipa ahneipa Pu. Lalsangkhuma(Kô 62), Dawrpui, Aizawl cha atanoh(Pakhynoh) nohchho kha Mawrâh liata Covid-19 pasana vâta athi tuachaipa a châ. Ano he pasana khiakhipa ahnei chiehpa châ ta. October noh 18,2020 tawhta ICU liata vaw mohôh chiehpa a châ.
Dawrpui Branch YMA chhithauhpa zy reina liata cha Pu Lalsankhuma athi cheingei tahpa (confirmation) he nohchho 12:20pm rahchhô kha ZMC tawhta YMA Chhithatuhpa zy lâ lia pahnosapa châ ta. Covid-19 pasana hleikhô ta ano he hearth disease(Mizo: lung lam natna.) avaw hnei chiehpa a châ tahpa Dawrpui LTF Secretary ta Vanglaini new agent hnota a reih. A chhokha nah lâ tawhta ano he Stroke vâta athipa hawhta a reipa chhao ama y.
Pu Lalsangkhuma he Zofa Dawrh ( Thanzauva & Sons) ahneituhpa Pu. Lalhmingliana nawhta pa kha a châ. Ama yna vaih Dawrpui YMA ta ri he sawhkhâ ta dâh ataopa hawhta Hall liata pathliena hnei awpa ama khoh kaw no ta. Pu Sangkhuma(L) lapinô Pi Muani he Covid-19 Positive a châ hrapa vâta Bawngkawn CCC lia mohôh haipa châ ta. Ama saw hneichhohpa chhao he Swab sample la awpa a châpa vâta Home Quarantine haipa châ hra ta. A uhta Pu Hmingliana nah chhokha chhao he ama chhokha dua ta Home Quarantine haipa châ ei ta. He hawpa duasu liata aduahpa ama châpa vâta Zoram Medical College, Falkawn tawhta ari he Thla lâ pangaikhei awpa a châ tahpa ama vaih YMA zy ta ama reih. Ari pathliena he LPS Local Cable TV tawhta Live ta piepa a châ.
Rest in Peace Pu Sangkhuma!

Nohthlahpa : Pu Lalsangkhuma atla no nata ari phaona motor.

Source: DIPR Mizoram Twitter

SUSHANT SINGH-DISHA CASE UPDATE:
[SPECIAL REPORT]
CBI Team hry tawhta bie sakha daona liata cha Sushant Singh Rajpu thinoh(June 14, 2020) hla liana liata Sushant phone hmana dah tawhta khapa hmo ma cha adoleipa a y tahpa pahno thei awpa a châ.

BJP MLA Nitesh Rane ta atanoh kha Media nah hmia liata Disha ta athi hlata Mumbai Police Contact No.:100(Dial)-pa ta bie âchho ei tahpa a reih.

MARALAND LAIPHÔ(18/09/2020): Eima pahno chyupa hawhta Sushant Singh Rajput thina (June noh 14, 2020-pa ta a pahrana O liata apa-aosaopa ta hmôpa) chôcha Case alaichadaina CBI-zy ta ama siekhei lymâ na liata Sushant Singh Ex-Manager Disha Salian thina(June noh 8, 2020-pa za ta Ochhah 14-pa tawhta tlasao/azawsao) Case lâ taih kiapa vaw châ hâ ta. Pangiasapa hlata he Sushant thina case vâ he ta, Mumbai khihpi liata Drugs(paritheipa) azuahpa hlupi zy patupa vaw châ hâ ei ta. Bollywood Industry ochhoh taih chhao angia pathao laih bâ awpa a lyu.
CBI-zy ta Sushant Singh thi hlata hmo atlôpa asia leipa a y tahpa ama reih.:
Sushant Singh Rajput thina chôchah alaichadaituhpa(investigating agencies) zy ta Sushant Singh he anokho ta athiepa(Suicide) hlata chyhsa hropa ta ama thie(homicide) awpa he ama pangiasa via. Sushant Singh thina liata maophao chai awpa ta pangiasapa akhopanô(ex-girlfriend) Rhea Chakraborty cha Sushant châta Drugs chaleina chôchah liata NCB-zy ta eima hnôlâ hâta Hriaheinoh liana kha patu ei ta, ei-2 lâta Bail ahiapa chhao ta Special Court ta bail ahiana cha hny ta. Biculla Jail(Women Jail) lâta patah pazipa a châ. September noh 22, 2020 taih he Jail liata atah tua awpa a chôchah he Court ta a pachâ heih aw.
CBI-zy ta Sushant Singh viasapa nata a liata apahralâhpa zy bie ama hiahrina ama hneina liata a beihchhotuhpa Neeraj Singh ta a reih dah liata cha Sushant Singh athi noh June 14, my liana kha Juice do awpa ei pie tah ta. Anodeikua, Posmortem Report liata Sushan pavyh lia khapa hmah hmô awpa y vei tahpa châ hei ta. He he ta, athina liata biesiapa nyupa a châ zie apalasa. He hleikhô ta Shushant Singh Sana(watch) Rs. 14Lakhs mâpa cha a Cupboard tawhta a lei hleikhô ta, atanoh taihta Sushant Singh Room Cahbi Spare khatailia ma a y tahpa pahno awpa châ hra vei. He hleikhô he ta Top CBI tawhta bie daopa cha Sushant Singh he June noh 13-pa zalâ dawh 2:30-pa tawhta ari hmôna taih kha achhokha nah ta bie achhopahlie(contact) thei vei ei tahpa châ ta. Achhokha nah pachapha leipa ta Mumbai lâ azaw ei ta. Sushant Singh O ama tlôpa he Sushant Singh pahralahpa(Flatmate)-zy cha nohchho nie awpa beih âmâ za chho nga kaw tahpa a châ. Sushant Singh ri y thlah hâ ta, nohchho nie awpa zy beih âmâ chhopa cha, khapa chhâ ma a y cheingei awpa ta pangiasapa a châ hra. Sushant viasapa a Flat liata apahra lahpa Pithani chhao ta CBI-zy hmia liata Sushant cha a Ex-Manager Disha Salian athipa apahno pataw nah ta, nohkhih pahnoleipa ta pao ta, akaw thei heipa cha, “ Kei chhao na pahlô aw vei ei.” tahpa a rei zie a reih. Siddarth Pithani ta CBI-zy hnota âphuahna sakha ama reina liata cha Disha athi khai tawhna kha ta Rhea ta Sushant Singh Laptop, Hard drive nata Camera-zy a la/cheih papua tah ta. He leipa chhao ta Rhea he ta Sushant he a pachhiparyh tyhpa chhao a reih hra.
Atanoh(17/09/2020) kha AIIMS Dawhty Forensic Expert Team-zy ahmôpakhyna noh châ ta. He liana he Sushant Singh Case âmâ laichadaina liata ama hmo hmôpa zy cha ama pahmaoh aw. He he Maharashtra chyhsa zy nata India râh chyhsa zydua hâhaipa a châ.

Disha Salian kha athi hla ta Mumbai Police-zy Num. 100 Dial-pa ta bie â chho ei.~Rane:
Chyhsa hlupi pangiasapa Sushant Singh nata a Ex-Manager Disha Salian thiana apazao cheingei awpa ta ama pangiasapa avaw pa-ituhpa BJP MLA Nitesh Ran eta atanoh lâ liana kha Media nah hmia liata Disha kha Juhu Co***ne Party su apuasai tawhta achô liata hmô atlôpa cha Mumbai Police-zy hnota pahnosapa ta, Police Num.: 100 dial-pa ta a Called tahpa a reih papua. Rane he ta Disha Salian thina chôchah zydua apahnotuhpa cha Disha vahpaawpa(fiancé) Rohan Rai châ ta. Rahul Rai he ta hmo zydua achho khai hâ tahpa chhao a reih. Rohan Rai he Disha a zawsao/thiesao daihti liata asu liata a ypa a châ. Azawsaona Flat chhao he Rohan Rai Flat châ ta. Anodeikua, Disha azawsao tawhta minute 20-25 khai tawh ngalah Disha ri mo awpa ta Ory lâ azupa he achhâpa a y cheingei aw tahpa chhao a reih hra. Disha thina chôcha lia he Bollywood mafia/Politician hmotaothei kawpa ahy zy ma âmâ chahraohpa vâta Rohan he khapa hmah phuah ngah leipa ta ama khih, Mangaluru lâ a râ ta. A lei(underground) syulyu hâ tahpa chhao Rane he ta reih ta. He vâna he ta Nitesh Rane ta CBI-zy he ta Rohan Rai he aw ei sa la, Dishan nata Sushant thina liana ahniahnipa nata athietuhpa zy patu awpa cha arairu aw vei tahpa reih ta. Rohan he chyhsa hmotaotheipa zy tawhta âboh thei n’awpa ta zahnia(16/09/2020) liana kha Union Home Minsiter Amit Shah hnota CBI-zy Case âmâ laichadai haipa liata biehriahri cheingei awpa ta apachapa Rohan Rai cha Special Protection pie awpa ta hiana châhna apaphao. Nitest ta Rohan Rai he CBI-zy ta ama tlua papua thei leipa ta châ sala, biesiapa ama pahno khoh khia keima chhao ta hmo yzie zydua CBI hnota ei pie thei tahpa a reih hra.

Atlapakyna: Sushant Singh thina chôchah alaichadaina liata Media lâ tawhta aphahnai chaipa Republic TV ahneituhpa Arnab Goswami cha Maharashtra sawhkhâ ta biebuapa(Breach of previlage case-60 pages) case taopa ta. Maharashtra sawhkhâ ta Arnab cha khopa sano(2) atly awpa pie ta chacha; Ngiathaina ahaw awpa nata Lô-O lia patah awpa atly awpa châ. Zahnia za kha Arnab ta ngiathaina âhaw n’awpa a y lei zie reih ta. Ano patah awpa ta MH sawhkhâ cha apahao hra. Rei chiehpa hawhta zahnia(17/09/2020) liana kha AIIMS Dawhty Forensic Expert Team-zy ahmôpakhyna hnei ei ta. He liana he Sushant Singh Case âmâ laichadaina liata ama hmo hmôpa zy cha ama pahmaoh. He khai tawhta amah mo hmôpa zydua cha CBI kua liata thlai amah la ba awpa zie ama reih. Sushant Singh thina chôchah alaichadaina he Investigation Team-zy khona liata cha Sept noh 20, 2020 liana he patlô awpa châ ta. Anodeikua, amah mo hmôpa zydua he final decision taona awpa ta daihti khacha tlai ma a ryu aw tahpa reithai hmeisei awpa châ mah vei.
Thatih thiehpa zy chhao ta vaw update eimâ chhuah hei aw.

Complied by~ Colin C. Ngôhai
Ramhlun North, Aizawl.

REPUBLIC TV TA DISHA SALIAN CASE LIATA HMO YZIE APHUAH:
[SPECIAL REPORT]
BJP MLA Nitesh Rane ta Republic TV debate hneina liata Disha Salian thina liata maophaotuhpa cha akhopapaw Rohan Rai châ ta,CBI zyta ano he bie hiahri awpa ta aw ei sala, Sushant Singh thina chhao he thlai pahnopa a châ aw tahpa a reih.
MARALAND LAIPHÔ (15/09/2020): Republic TV ta zahnia(14/09/2020) za liana kha Disha Salian Case reipahmaohna daihti hmah ta. He daihti liana he Mumbai BJP MLA Nitesh Rane chhao hruapa châ ta. Republic TV Anchor Arnab Goswami ta Disha Salian thi hlata hmo yzie thatih chyupa reina ahnei tua.
Arnab reina liata cha June noh 8, 2020-pa za liana kha Juhu, Mumbai liata Co***ne Party hneipa châ ta. He liana he Builder(body builder), Politician nata Actor 2 nata actor chhokha ahnia hnipa pakha zy y ei ta. Disha Silian he phone ta awpa a châpa vâta asu lâ va vawh ta. Acho liata hmo khochhih leipa atlôpa vâta daihti rei leipa liata he su he apuasai pathi lilaw ha tahpa a reih. He khai tawhna he Disha ta Sushant Singh he phone ta hmo yzie cha chho ta. A pahrana Malad, Mumbai lâ adi ha. He khai tawhta myrâh dawh 1:30AM liata Disha Salian he apahrana Apartment Ochah 12-pa(thokha ta chhah 14 ama tah) tawhta azawsao/athiepa(suicide) hawhta reipa a châ. Disha thina chôchah apahnopasia chaipa cha BJP MLA Nitesh Rane a châpa vâta Arnab ta Nitesh cha biereina hneituachai awpa ta a hrua.
BJP MLA Nitesh Ran eta Disha thina aphuah:
Ditesh Rane reina liata cha Disha Salian he Co***ne Party su tawh apua khai tawhta Sushant Singh Rajput he acho liata hmo atlôpa phone hmapa ta chho tua chai ta. He tawhta Malad lâ a dipa a châ. Sushant Singh he ta Disha tah hmo achhopa cha chyhsa pano; Rhea Chakraborty nata Sandeep Singh zy hnota a chho pachhuah. Rhea he ta Party-na su liata a ypa zy lâ( a rilahpa ahlao ama tah) thlai phone ta Disha party-na su tawhta ama padisapa apei thei awpa zie nata khapa chhâ ma a chô liata ama tao lei khia hmo peipa atlô aw tahpa va chho ta. He khai tawhta Party-na su liata a ypa zy he, Malad, Disha pahrana Apartment(Akhopapaw Flat a châ hri) lâ ama vawhnao tahpa bie ei dao tah ta. Disha pahrana lia he akhopapaw(fiance-avahpa awpa) Rohan Rai chhao a y thlahpa ta reipa châ ta. Dishan Salian he apahrana ôchhah 12-pa(chhah 14 atahpa chhao ama y.) tawhta tla sao ta. Minute 20-25 khai tawhta avahpa awpa(fiancé) Rohan Rai he Apartment ry lâ ari mo awpa ta azu a tah. He vana he ta Nitesh Rane ta cha Disha Salian he ano khota athiepa(suicide) châ leipa ta, chyhsa ta ama thiepa(murder) a châ tahpa â duakhei.
BJP MLA Nitesh reipazaona liata cha Disha Silian vahpa awpa Rohan Rai he ato apahnopa châ ta, Disha thina liata hmo ado leipa a ypa vâta a rai bah ta, a mobile number thla ta, a lei syulyu hâ a tah. Nitesh ta Disha thina he thiepa a châ awpa apangiasapa vâta athatih thata âchupa reih ta. Rohan Rai chhao he bie hiahri ta, hmiatua ta cha Rohan he ta hmoto chho ngah leipa ta, hnolâ deikua cha Nitesh Rane hnota ato zydua a chho khai hawpa tahpa Nitesh ta a reih. Nitesh ta Rohan hno ta biesiapa Police hnota chho awpa pasyu ta Rohan ta chi hâ ta, Nitesh ta Rohan hno ta Security chhao keima ta ei cha pie aw atahpa chhao ta a ngah vei. He khai tawhta a Mobile number thlapa ta Rohan Rai he a lei(underground) hâ a tah. Atahma Raohan he khatai su lia ma a y tahpa pahnopa châ vei.
Nitesh reina liata hmo no-ah achhih kawpa cha Dishan he June no 8-pa za ta thi ta, Postmortem he June noh 11-pa ta taopa hawta Record-pa a châ. Rohan ta aviasa thokha a phone-na lia ei cha, Disha ri he June noh 9-pa za ta pasiepa(funeral) a châ aw tahpa a chho ei tahpa a reih. June noh 9-pa ta ri pasiepa cha June noh 11-pa lia Postmortem tao thaina dah y vei tah ta. Postmortem ataotuhpa dawhty zy chhao kha chipa ta âmâ thla nga kaw tahpa ei pahno a tah hra.
BJP MLA Nitesh reipazaona liata cha Disha Salian thina liata maophaotuhpa nata ato apahnopa cha akhopapaw/vahpa awpa Rohan Rai châ ta,CBI zyta ano he bie hiahri awpa ta aw ei sala, Sushant Singh thina chhao he thlai pahnopa a châ aw tah ta. CBI zy ta ano ama aw leipa chhao ta keima he na aw ei sala, ato ei chho khai aw ei. Ahy hmah tah ei chi awpa y veih ei tahpa chhao a reih hra. Debate liana he chyhsa thokha ta Nitesh maochhiepa ta, Disha thina biesiapa apahno thlahpa ta atahma taih achalihkhei pa he khapa vâta ma a châ tahpa hiahri ei ta. Nitesh ta Case alaichadai awpa he ei rai châ leipa ta India râh liata Investigation py laichaipa CBI âvaw chahraoh cheingei awpa he ei hâpa nata ama tao awpa a châ. Bao âmâ ngiahna lia deikua biedopa ei reih aw tahpa ta â chhy ei.
Republic TV ta Rohan Rai Apartment Watchman bie ama hiahrina:
Republic TV-zy ta Rohan Rai pahrana Apartment(O) liata Watchman(a moh nyupa) cha apakyhna hnei ei ta. Watchman reina liata cha Disha Salian he Rohan Rai Flat liata noh 15 chhoh chah awpa ta avy tyh tahpa reih ta. Republic TV-zy bie ama hriahrina a chhyna liata hmo no-ah achhih kawpa zy cha; Disha a za tlana(azaw sao/ama thiena) daihti he myrâh 1:30-pa lia a châ. Ari he aviasa zy ta ahuah ei ta, Car lia ama kho, Apartment society tawh ama puakhei hâ. Disha pôhpa liana kha thisaih(blood) hmô tlâ va na. Disha thipa he keima ta Police nah ei phone. Police nah he Disha viasa zy ta Disha ri ama puakhei khai tawhta ama vaw tlô. Police-zy ta Rohan bie hiahri tlâ vei ei. Disha thina case alaichadaipa Investigator Police he noh 2-3 padaipa ta âmâ thla ngathlah ha. tahpa zy a reih.
Watchman biereina tawh pachapa ta Disha thina he sahsy athiena(suicide) lyu leipa ta Plan sianopa tlyma/tararuahpa ta thiepa(murder) a châ cheingei awpa a lyu. Ochhah 12-pa tawhta chyhsapa tla sa la, khei ta a thisaih pua leipa nata arupa zy tlie leipa ta a y thei aw? Pachana apahsisa kaw.
Patu ama rairu aw vei~ BJP MLA Nitesh.
Nitesh Rane ta June noh 8-pa nata June noh 14-pa za liata hmo atlopa eima pahno kho khia, CBI-zy he ta Juhu Co***ne Party liata ahlaopa zy Mobile cha signal Tower hmapa ta tlua ei sa la. June noh 14-pa za ta Sushant Singh O tawhta Mobile signal Tower-zy achu ei sa la, Disha nata Sushant athietuhpa zy patu awpa he arai ru tiarah aw vei tahpa ta a rei.

Disha khopapaw Rohan he CBI-zy ta bie hiahri awpa ta thlai ama aw nata pangiasa:
Disha thina he Sushant Singh thina nata azaona hnei cheingei awpa hawta pachapa châ ba ta. He vâna he ta Disha Salian khopapaw/vahpa awpa Rohan Rai he CBI-zy ta biehiahrina hnei awpa ta thlai ama aw na ta pangiasapa a châ. Anodeikua cha Republic TV ta BJP ML Nitesh biehiahrina ama taona lia kha Nitesh ta Rohan Rai cha lei hâ ta, ama khih Mangaluru lâ ânyu awpa a pangiasana zie a vaw rei.
Disha Salian nata Sushant Singh thina azao awpa ta pangiasa pachaina sakha cha Disha athi pataw nah khata Sushant ta a sietanô Meetu Singh cha phone liata “Keima chhao na pahlôh khao aw vei ei chu.” tahpa ta a chho tahpa Sushant Singh chhohkha viasapa Smita Parikh ta Republic TV-zy hmia liata a reih.
Disha nata Sushant thina Case liana he CBI-zy ta Disha ta celebrity manager rai avaw hriana Company liata CEO Bunty Sajdeh cha ei-2 awpa ta bie hiahripa vaw châ ha ba ta. Disha viasapa nata Talent manager Uday Singh Gauri, Sushant thi hla ta Sushant a phone-tuhpa chhao bie hiahri hâ hrapa a châ.
Tlapakyna : Biethieh-hlathiehpa a vaw y heih ti ta, vaw update via lymâ eima vaw chhuah aw.

Compiled by~ Colin C. Ngôhai
Ramhlun North, Aizawl

BOLLYWOOD INDUSTRY DRUGS CASE -UPADATE:
[SPECIAL REPORT]
Chakraborty (Ex-girlfriend of Sushant) ta NCB zy hnota Drugs liata ahniahnipa aphuahpa zy cha zahnia lâ liana kha biesiapa y leipa, bieruapa hawhta media zy ta ama phuah.

MARALAND LAIPHÔ (14/09/2020): Sushant Singh Rajput thina case asie lymapa liata bietha nano nanopa noh chareih ta thei awpa y ngathlah ta. Zahnia lâ liata kha Media thokha palasana liata cha Rhea Chakraborty ta Sushant Singh zy nata Party-na liata Drugs atao hrapa ta aphuahpa Sara Ali Khan, Rakul Preet Singh nata Designer Simone Khambatta zy cha NCB lâ tawhta haipa ta baipa a châ tahpa ama reih lao heih.
He chochah nata azaopa Rhea ta Bollywood Industry chyhsa 25 A-list moh aphauhpa tah reipa zy chhao kha NCB Deputy Director KPS Malhotra ta Bollywood Industry liata chyhsa 25zy moh List he NCB lâ tawhta alaichadaina khapa hmah y mah vei tah ta. Anodeikua, Drugs azuahpa nata apiepachhuahtuhpa zy deikua alaichadai haipa nata thokha patu hâpa ama châ chazie reih ei ta. Drugs asievawna he thata alaichadai tua awpa âmâ chhuah zie media zy hmiakô liata ama reih. He hawhta ama phauhna chhâpa he zakhahnia pachynoh liana kha Bollywood chyhsa thokha Mumbai puasai awpa ta Mumbai International Airport liata hmôpa ama châ zie Media lâ tawhta ama phuah hâpa vâta NCB zy he ta Bollywood chyhsa thokha zy ama ra/sie khao lei nawpa ta Media zy hmia liata he hawhta aphuahpa ama châ thei aw ma tahpa cha chyhsa hlupi zy hiahrina a châ.
He Drugs chôchah he asie pasih thlah awpa a châpa ta â lâ. Sushant Singh Drugs a supply tyhpa nata azuahtuhpa chyhsa zy patu hâpa hlu kaw ba ei ta. He chôchah nata azapa ta Kanganat Raunat ta Boolywod Industry liata 80% daihma he Drugs liata ahniahniapa ama châ zie vaw reipapua hâ hra ta. He bie areipa azaopa ta ano châta hrona chi achhih zie a reipa vâta Central Ministry hnota ahawna hawhta Y+ Security taih Central Home Ministry ta ama piepa pakha a châ.

Pahno chyupa hawhta Rhea Chakraborty cha zahnia ta hâta hriaheinoh liana kha NCB zy ta Sushant Singh Rajput thohna chaleipa ta apietuhpa a châna zy, ano tlai chhao âthaona la Drugs atao beih leipa hawhta â reina, eikha a Test hâ tahpa â phuahna zy vâta patupa châ ta, zahnia ta chutyhnoh liana kha Special Court liata bail ahiana châ hnypa a châpa vâta Chanô patahna su Byculla Jail, Mumbai lia anodeita ta Private cell lia patahpa a châ. Rhea he September noh 22, 2020 patagpa châ aw ta, chataw ta Court liata â la heih aw. Rhea personal lawyer ta a ziza rei ta Mumbai High Court chhao eima tlô ngyu thei tahpa avaw reih chhili hâ hra.

Thatih thiehpa zy chhao ta vaw update eima chhuah heih aw.

Compiled by~ Colin C.Ngôhai
Ramhlun North, Aizawl

DRUGS CASE NATA AZAOPA TA 25 A-LIST BOLLYWOOD CHYHSA ZY:
[SPECIAL REPORT]

Rhea Chakraborty (Ex-girlfriend of Sushant) nata Showik Chakraborty zy ta Drugs case nata azaopa liata ama moh ama phuahpa Bollywood chyhsa 25 zy cha NCB zy ta bie hiahri awpa ta ama aw awh.

MARALAND LAIPHÔ (12/09/2020): Sushant Singh Rajput thina case a sie lymâ pa liata Rhea Chakraborty cha atahmata hriaheinoh liana kha Narcotics Control Bureau(NCB) zy ta patu ei ta, arilahpa Showik Chakraborty nata NCB zy hmia liata Bollywood Film Industry liata Drugs ataopa nata azuahpa moh ama phuahpa chyhsa 25(A-list) zy cha NCB zy ta âmâ laichadai pazao aw. He chyhsa 25 hry liana he Actors, Producers nata Directors zy chhao âmâ hlao tahpa palasapa a châ. He nah zy he chyhsa vatlahpa chôlâ sai ama châpa vâta NCB SIT zy ta asohsi kawna chô ta noh 10 khai tawh ama aw awpa pangiasapa ama châ.

Rhea Chakraborty he ta NCB zy hnota
Actresses Sara Ali Khan, Rakulpreet Singh, designer Simone Khambatta, Sushant viasapa nata a former manager Rohini Iyer hleikhô ta filmmaker Mukesh Chhabra zy cha Aparitheipal narcotics substance a taopa ama châ tahpa a phuah ei. He vana he ta amo he Narcotics Control Bureau (NCB) he ta bie ama hiahri tua awpa zy ama châ aw.

Thatih thiehpa vaw khôchhi via lymâ eima vaw chhuah aw.

Compiled by~ Colin C.Ngôhai
Ramhlun North, Aizawl

RHEA BAIL HIANA COURT TA HNY:
[SPECIAL REPORT]

Special Court Mumbai ta zahnia kha Rhea Chakraborty (Ex-girlfriend of Sushant) nata Showik Chakraborty zy bail hiana cha ahny.

MARALAND LAIPHÔ (12/09/2020): Zahnia (11/09/2020) kha Special Court, Mumbai ta Rhea Chakraborty, arilahpa Showik Chakraborty zy hleikhô ta chyhsa hropa 4-patupa zy Bail awpa ta ama hiana cha Court ta a reject(hny).

Rhea he Sushant Singh Rajput case asie lymâpa liata Drugs chôchah vâta Hriaheinoh kha NCB zy ta patu ei ta. Byculla Jail, Mumbai (women jail) liata Private cell lia zahnia tawh kha anodei ta sopa a châ. Private cell liana he rakho nata fan pie leipa ei ta. Mat aphaw awpa ama pie. Court ta apasai khia Table fan piepa a châ aw. Rhea Private cell he Indrani Mukherjea, asawchanô Sona Bora thina vâta patupa kha a châ.
Spacial Court Mumbai ta bail hiana ahnypa vâta next week lâ liata abyuna hawhta Mumbai High Court lâ chhao he bie buana he tlôkheipa a châ aw tahpa Rhea chhokha Judge ta a reih.

Sushant Singh Rajput case asie lymâ pa liata Drugs case liata Bollwood Film Industry liata moh ama phuahpa 25 A-List zy thatih Next Report lia vaw palasa hei eima chhuah aw.

~ Shalom paw, Azl

RHEA CHAKRABORTY PATUPA A CHÂ:
[SPECIAL REPORT]
Rhea Chakraborty cha Drugs case vâta zahnia kha patupa a châ. Atanoh my liana kha Jail lâ ta paphaopa a châ.

MARALAND LAIPHÔ (08/09/2020): Zahnia kha Sushant Singh Rajput thina chôchah alaichadaipa thatih asie lymâpa nata Drug case chôchah azaopa liata Sushant Singh khopanô parohpa(ex-girlfriend) cha Drugs case vâta patupa châ ta. Atanoh myrâh lâ ta Byculla Jail, Mumbai lâ patah awpa ta achhipa a châ aw. Magistrate lâ tawhta noh 14 chhoh bail hiana ama pasai leipa vâta noh 14 chhoh cha Jail lia â tah aw tahna a châ.

Rhea Chakraborty ama patuna case he kô 10 chhoh atah theina a châ. Rhea nata a rilahpa Showik Chakraborty ama patuna chhâpa he Sushant Singh rai ahriatuhpa Samuel Miranda nata Dipesh Singh zy Sushant châta paritheipa Drugs ama tluakhei tyhpa vâta a châ.

Rhea patupa a châ hla ta, NCB Office apangai nota a T-shirt akypa liata châ aropa he Bollywood celebrities; Vidya Balan, Sonam Kapoor, Zoya Akhtar, Shweta Bachchan Nanda, Shibani Dandekar, Dia Mirza nata chyhsahropa zy ta ama social media account lia ama share hôlô.

NOTE: Rhea he Republic TV Channel ahneituhpa Arnab Goswami nata Media hlupi ta thaileipachasa awpa he ama kho chaipa a châ. Anodeikua, Sushant Singh paw ta asaw chapawpa Sushant phusâ Rhea ta ahmapa hawta abaina zy kha Enforcement Directorate lâ tawhta Bank detail la khai ei ta, Rhea thai leina hmô vei ei. Rhea chhao ta Drugs cha Sushant Singh ta Drugs pie awpa ta chyhsa a saohiahpa zy cha ano WhatsApp tawhta a paphao tyh tahpa chhao aphuah.
Rhea patu hâ ei ta, Sushant Singh ta Black Money liata â chahraohna ama phuah chiehpa zy kheita case a sie lymâ aw tahpa he, India râh zawpi nahpachôhpa a châ.

Compiled by~ Colin C. Ngôhai
Rmahlun North, Aizawl

MIZORAM COVID-19 UPDATE: 9 NEW CASE:
[MAWRÂH THATIH]

MARALAND LAIPHÔ (08/09/2020): Zahnia (07/09/2020) liana kha Mawrâh liata Covid-19 Positive 9 hmôchhi heipa a châ. Cha zy cha;

ZMC RT-PCR positive: 6
Rapid Antigen Test positive: 3
Lunglei TrueNAT positive: NIL

RT-PCR positive :
Aizawl Dist: Beraw CCC avaihtuhpa MAP 3; Armed Veng nata Armed Veng South (asymptomatic), Hualngohmun (symptoms hneipa); kô 21-27.

Kolasib Dist: N.Chaltlang khihpa chanô hati kô 2, Tripura tawhta akaw tlôpa, qf a ypa nata Assam chyhsa 2, Thingdawl qf liata a ypa, asymptomatic ama châ.

RAT positive:
Kolasib Dist: Chapaw 2, Truck driver/ Handyman, Vairengte checkgate liata test pa zy ama châ.

Serchhip Dist: Pheisaih akaw chhuti pa kô 24, Chhingchhip Mualpui khihpa a châ.

ZMC liata sample test dah:
Aizawl -314
Hnahthial -2
Kolasib -38
Lawngtlai- 12

RAT Test dah;
Aizawl - 354
Lunglei - 2
Serchhip -22
Mamit - 8
Kolasib -2 (Kolasib Dist tawh he RAT positive result ngalah daopa a châ.)
Lunglei TrueNAT sample test zie: 17

Source: DIPR Mizoram Twitter.

SUSHANT SINGH CASE NATA AZAOPA UPADATE:
[SPECIAL REPORT]
Sushant Singh Rajput thina chôchah case asie lymâ pa liata Drug Case nata azaopa ta Narcotics Control Bureau (NCB) zy ta Rhea Chakraborty (Ex-girlfriend of Sushant) cha Pahanoh ta dawh 6 hlei hiahrina ama tao khai tawhta zahnia kha aw heipa a châ.

MARALAND LAIPHÔ (08/09/2020): Zahnia kha Rhea Chakraborty cha NCB zy hiahrina achhy hei awpa ta ama awna su cha my dawh 9:30am lia a tlô. News Channel thokha palasana liata cha Rhea ta NCB zy hno ta, Sushant Singh cha kô 2016-pa Abhishek Kapoor film, ' Kedarnarth', Sara Ali Khana zy nata ama Shooting daihti liata Drug he atao hâ ta. Âchalahpa thokha chhao Drugs he ama tao hra tahpa a reih. WhatsApp message he Sushant Singh Rajput ta Drugs avaw pietuh awpa zy apa Type sa tyh tahpa chhao a phuah.

Rhea ta Sushant Singh he Drugs cha hma khao lei awpa nata pathleisa awpa achhuah tyh tahpa reih ta. NCB zy hmia liata hmo ei taopa zydua he Sushant Singh kyh ei pachapa vâta ano châta ataopa sai ei châ a tah.

Zahnia kha Rhea ta Sushant Singh sietanô Priyanka Singh nata Dr Tarun Kumar, Ram Manohar Lohia Hospital liata ahriapa zy chô liata Forgery case cha Mumbai Police nah liata apangia. He he Rhea ta Sushant Singh O apuasai tawhta asietanô nata Dawhty ta Delhi tawhta Mumbai liata a y haipa Sushant Singh thohna ama pie/pachaona nata azaopa Case a châ. Rhea ta Sushant Singh thina he thohna piepa nata azaona a y tahpa ta abai ei.

Sushant Singh Rajput case asie lymápa liana he CBI, ED nata NCB zy ta khapa hmata pathlao leipa ta alaichadai ta phuah/patu lymâ achhuah ei ta. Sushant he Drugs dei châ leipa ta Black Money zy taih avaw hria tahpa phuahpa châ lao heih ta. Black Money chôchah Enforcement Directorate lâ tawta âmâ laichadai heih daihti lia chhochhi buana he chyhsa pangiasa leipa zy taih akia thei awpa hawhta pachâpa a châ.

Thatih thiehpa vaw sochhi eima vaw chhuah via lymâ aw.

Compiled by~ Colin C.Ngôhai
Camp: Ramhlun North,Azl

CENTRAL SAWHKHÂ TA DISTRICT ZY A ZONE TA PACHHAIH AWPA A CHHUAH:

AIZAWL(12/04/2020) : Zahnia my dawh 11:00AM liana kha India râh P.M Modi ta India râh State to liata Chief Minister-zy Video Conference (NIC VC) hnei khei ta. Modi ta March 14 liata Total Lockdown noh 21 aphuah chiehpa cha mylâ hahnoh April 14, lia a chha ha awpa a châpa vâta Total Lockdown Extension hnei awpa thatih reipa a châ. State to tawhta ama duasu zy Report nahthliepa châ ta, dawh 3 chhoh Video Conference hneipa a châ khai tawhta PM ta Total Lockdown he April noh 30,2020 taih Extend-pa a châ tahpa a phuah.

Total Lockdown Extend-pa a châpa vâta Central sawhkhâ ta India râh chhoh liata Economic duasu awpa nata hmo hrohriapa zy vâta, India râh chhoh liata District to zy cha Traffic Signal Light Color hawhta ; RED, ORANGE & GREEN-zy ta pachhai awpa a chhuah. District sakha chhoh liata Covid-19 pasana a y leina su zy cha " GREEN Color " ta Mark-pa châ aw ta. District liata chyhsa 15 hlata achyhvia Covid-19 hri ama vei khia 'ORANGE Color'" ta Mark-pa châ aw ta. Covid-19 aveipa chyhsa 15 hlata ama hlu viana District cha Red Color ta Mark-pa a châ aw. RED Color ta Mark-pa District liata chyhsa zy cha khôpua pasaipa châ aw veih ei.

MAWRÂH DUASU :
Acho liata palasapa hawhta Color Code ta District to he Mark-pa a châ khia. Mawrâh liata District sa 11 hnei hai pi ta. Aizawl District he : Orange Color châ aw ta. Chaleipa District to zy cha Green Color a châ khai aw tahna a châ.
Anodeikua, he Green nata Orange Color ôna District lia zy he kheihaw ta Lockdown he siekhei awpa ma a châ aw tahpa deikua biepathluna y mah vei. Anodeikua, Lockdown he Mawrâh lia cha azie aza y via awpa hnabeiseih âchhih kaw.

Source: NDTV
Nohthlahpa : Covid-19 Status India Data by NDTV.

DELHI CHIEF MINISTER PAROHPA SHEILA DIKSH*T A THI:

New Delhi: Delhi Chief Minister kô 15 tlai avaw châ chiehpa Sheila Diksh*t, Congress chyhsa cha atanoh zalâ dawh 3:55pm rahchhohpa liana kha Fortis Escorts Heart Institute liata a thi.

Sheila Diksh*t he châh-ao(cardiac) lâ tlaleina a vaw hneipa châ ta, zakô lâ liana kha France râh liata operation hneipa a châ. Atanoh my râh lâ liana kha atlaleina aparupa vâta Fortis Escorts Heart Institute lâ thlai ngaikheipa châ ta. Dr Ashok Seth, chairman, Fortis Escorts Heart Institute nata ahrialahpa zy ta ama theina zydua papuapa ta ama mohôh taraw pata, a châh-ao(cardiac) achalih daihma pata ama ngai kheipa vâta pachhapapua thei khao leipa ta â thi ha tahpa ama reih.

Kô 81 tah a uhtheipa Diksh*t he 31 March, 1938 lia Kapurthala, Punjab liata apihpa châ ta. Delhi University tawhta M.A History patlo ta. Politic liana he kô 1984-pa liana khata angia ta , a eikhana châta Kannauj Constituency, Uttar Preadesh tawhta Member of Parliament (MP) châta atlypatlohpa a châ.

Sheila Dekshi he politics liata chyhsa hlaotloh kawpa châ ta. Delhi liata Term 3 tlai BJP Party pahniepa ta Chief Minister a châ khai tawhta kô 2013 -pa liana kha Arvind Kejriwal Aam Aadmi Party pahnie khao leipa ta ama tla. He khai tawhna he ta Sheila Diksh*t he Kerala Governor châta March 2014 liana kha raopa a châ. Kô 2017-pa liana kha UP Assembly Election liata Congress ta Chief Ministerial Candidate ta taopa a châ taraw pata Congreaa nata Samajwadi Party (SP) hriaparaoh a ama taopa vâta a withdraw lilaw hapa a châ.

Sheila Diksh*t ri he apahrana vaih Nizamuddin, Delhi lâ adikhei hapa châ ta. Ari pabuna/pathliena(last rites) he myla hneipa a châ aw.

Source: NDTV

PADUAPATHINA - 2019 KTP WEEK GUIDE BOOK PAHYNA @ Aizawl Mara Church:

Colin C. Ngôhai(03/06/2019)

Ahmiatuachai ta, Aizawl Mara Church KTP manôh zy ta eimâ ngiahtiah lei ngaitapa KTP Week 2019 cha ataza tawhta pathao thei awpa ta daihti phapa maniah apietuhpa eima Khazohpa moh cha reithaipa ta y mawh sy.
Khazohpa ta eima KTP Chhithatuhpa zy hmapa ta keima dyutlailei chaipa KTP Week, 2019 Guide Bu pahytuh awpa ta eina vaw raopa cha kaokha lâ liata thata angiarohna hnei na tah, anodeikua he hawhpa tovyuh sôh ngaitapa eina piepa vâ ei chi ta ‘KTP Chhithatuhpa zy’ chô lia chhao alyna bie ei reih hra.
Atakô ta ECM KTP ta Guide Bu apachhuahpanohpa liata abiepipa ‘ PADUAPATHINA’ bie he rôhnah ta, apachhuahpanôhtuhpa Rev. VBH. Sathei Thlyutha ta Guide Bu a ropa chhao nôvah achhih kawpa ta ei pahno. Anodeikua cha khapa vâta ‘PADUAPATHINA’ biepita atlyhpa ma eima châ aw vâ ma i? tahpa keima sahsy lia hiahrina thata a y. Eima pahno chyupa hawhta eima Awnanopa nôpawpa zy hleikhô ta, eima râh chhithatuhpa/râhluhpa zy ta ‘Eima râh tla khao vei. Sasapa lia nata thlahpa liata tla leipa pi ta. Eima râh arao nga haipa he paduapathi angiah tahpa ta maniah ama pachu/chho tyh. Cha zy hry tawhta eimâ paduapathi n’awpa kao zy eima za patuapalua khiata cha, he zy he za châ thlah hâ aw vei tlyma tahpa keimo chyu ahiahri heih ei sih la. Tiamana nata hriapasana tawhta zy, ngachhina tawhta zy, pathaina tawhta zy, hrozie-nôcha tawhta zy, paritheipa tawhta zy, pa-opazypa tawhta zy nata chanô-chapaw châna tawhta zy he a châpa ta â la.
Ataza he Guide Bu tawhta Bo-1na : “Dâh nata phôh zyhna lia tawhta paduapathina” nata Bo-2na; ‘Eima chakaona pahnopasiana lia paduapathina.” zy he eima chu awpa za châ aw ta. Guide Bu hawh cheingei ta ei vaw reipakawh leipa chhao ta, achyusia kawpa ta reipakawhna hnei eimâ chhuah aw.

1. BO-1NA : “DÂH NATA PHÔH ZYHNA LIA TAWHTA PADUAPATHINA”

“ Na chô liata hmopha lei ngaitapa tao pi ta, na chakaotuhpa Mawsi hnota na piepa biepiepazy, ryhpa zy, ryureina zy cha zyh khao leipa pi ta.(Neh 1:7)

Khizaw liata hmo zydua he pasaipa nata pasaileipa, tao awpa nata tao lei awpa râhri hriepa a châ vei khiata cha chyhsapa hro liata chhiena nata pacharôhna thata atlôkhei theipa a châpa vâta Khazohpa chhao ta eima hro châta râhri maniah ahriepa lymâ hra tahpa Bible tawhta eima hmô. Cha cha Biehrai reikah ta ‘Dâh’ eima tah pa he a châ. Chahawta Khazohpa Bie ‘Dâh’ azyhtuhpa zy cha sasapa nata thlahpa liata ama hu âhieh tyh hra. Eima Biehrai liata ‘Dâh’ atahpa zy hry liata sano(2) thaoh papua ei sih la, chazy cha;

i) ‘Tao kha y/ Na tao awpa châ vei’ tahpa dâh: He he Khazohpa ta hmo taohria awpa a pasai leipa/a pakhâpa zy a pahly. Pms. Biehrai tawhta khizaw liata dâh eima za hmô tuachaipa cha, Khazohpa ta Âdâh nata Ivy zy châta dâh tao ta. ‘He thotheipa he nama nie awpa châ vei.(Ath.2;17) tahpa zy, ‘Na paru awpa châ vei.(Puasaina 20:15) zy nata ‘ Na tha athi awpa châ vei.(Rom. 12;11) tahpa zy he a châ. He hawpa hmo he eima tao rahruah khia eima châta chhiena, ‘Thina’ nata raona lâta maniah achhi awpa a châ tahpa eima pahno.

ii) ‘Tao mah y/tao awpa a châ’ tahpa dâh: He he Khazohpa ta tao awpa maniah atahpa nata rei awpa ta maniah âhnawpa ‘Dâh’ a châ. Pms. A nô nata na paw rei angiah la, palyupalih teh.(Eph.6;1) tahpa nata ‘Thatihpha he chho teh u.(Mt.28:19). He tao awpa nata hria awpa zy he reingia ngaitapa nata ngachhi ngaitapa ta ataopa zy cha Byhna ta a chadai pazi aw ei.

NAHEMIA NATA KEIMO:
“ Na chô liata hmopha lei ngaitapa tao pi ta, na chakaotuhpa Mawsi hnota na piepa biepiepazy, ryhpa zy, ryureina zy cha zyh khao leipa pi ta.(Neh 1:7)
Nehemia he Zu chyhsa châ ta, Theithaipa nata Ryhpapachutuhpa châ leipa ta. Persia Beipa Artexerxia nyu apietuhpa chyhsa a châ tahpa eima pahno. Persia Beipa he ta nga ngaita ta, nyu pietuhpa duasu he officer rai hawpa châ ta. Beipa ta angapa chyhsa zy dei hriatheina a châ. Ano he Khazohpa chyhsa sia ngaitapa châ ta, amoh chhao he Hebrai moh ta bipa châ ta, a yzie cha ‘ Abeipa ta thlah a palôh’ tahpa za châ ta. Mara reih moh lâta eima so awpa khia cha; ‘BEITHLALO’ tahpa chhao a châ thei aw tahna a châ chu. Amoh aphao pahnie ngaita pa, a chi nata pho châta hnabeiseihna hnabeidyna khaoh tawhta achyhsa zy achhi papuatuhpa a châ tahpa eima hmô.
Bible tawhta eima hmôpa hawhta Bei Sawlamaw zy daihti liata Israel sawzy hmo paraona vâta Babulon seichâna liata kô 70 tlai atah ei ta. He Nehemia daihti liana he Israel sawzy cha chipho nata zyhna ky liata ama duasu achhie chaina daihti a châ. Babulon seichana tawhta Jerusalem lâta ama kaw kua khai tawh chhao ta Khazohpa khihpi Jerusalem cha uasa leipa ta abohna nata pahrana tlah awpa chhao cha khao leipa ta. A râh ryureina ado leipa ta, ahneirôhpa zy duasu pha ta, riethei sipasapa zy cha tlybaipa ta ama yna daihti a châ. Khazohpa dâh cha papeisa leipa ei ta, pahanoh chhao cha-y leipa ei ta. Su10-su1 chhao pie leipa ta, chihro phohropa zy nata âmâ hnei pahlao hôlôna daihti châ ta. Nôvah achhaihna chhao ahlu lihchi a châ. He vana he ta Samaria nata Amon chyhsa zy chhochhi ta cha ama pahnei-parasao tyh tahpa eima hmô. Anodeikua cha Jerusalem rai ta amy thei leipa Zu satlia Nehemia cha Khazohpa ta apathyu haw tahpa eima hmo.

Nehemia 1:7-na tawhta eima hmôpa cha;
1. Biepiepa : Chyhsa to ta eima zy awpa chi cha Zu chyhsa zy heta zy leipa ta âmâ hei sai tahpa âsia kaw.
2. Ryhpazy: He dâh he cha asu nata adaihti hneipa ta taopa. Pms. Theithaipa zy zyh awpa chi tlymâ Chanô dei zyh awpa chi tlymâ tahna a châ.
3. Ryureina : He he cha, dâh a y chiehpa hlao patloh n’awpa ta dâh pachhuahpanohpa/taopa zy ama châ. He dâh 3 eima vaw reipa zy ama zy leina vâta Khazohpa hiehahna ama chô ta atlô.

ATAHMA KHAPA EIMA DUAHMO?
Eima râh duahmo eima saipa a châ khiata cha Abeipa ta dâh maniah apiepa hlupi a y. Biehrai siepahliepa tawhta Dâh eima hneipa hlupi y ta, thokha cha sawhkhâ ta dâh ataopa châ hei ta. Chahleikhô ta Awnanopa ta dâh eima taopa chhao a y hra. He dâh eima hneipa zy he keimo mopakha, chhokha, phupy, khitlâh nata arâh zawpi ta khatlu tlaima papeimawhsa pi ta eima zyh tahpa he a châ. Papeimawhsa via lymâ awpa hlata cha padâhsa/papeimawhsa lei viana lâthlôh achhihpa eima za lyu kaw. He zy vâna he ta, ‘Dâh nata Phôh zyhna kyh liata eima mopakha, awnanopa nata chhokha zydua ta apaduapathi awpa eima ngiah ngaitapa ta â la.’

*********************************************************************
BO-2NA; ‘EIMA CHAKAONA PAHNOPASIANA LIA PADUAPATHINA.”
Nehemin 2:12-13
“Chatawhcha zata thyu na ta, keima nata mo hropa a chyhtazy chhao ta. Zerusale châta ei tao awpa ei Khazohpa ta ei palôrupa liata a sopa cha ahyhma chho leipa na ta. Ei kiana sah dei leipa ta cha sah hropa ei hnota a ypa y leipa ta. Za ta saikao ochhi lâta pua na ta,Drakao tikhaohrei la nata Hnaihny Chhikao lâta si na ta, Zerusale kuh a chopa nata a ochhi mei ta a kâpazy cha mo na ta.

Eima râh liata eima Krizyhna hro he moh sualuah ei sih la palôhtlah achhi kawpa ta a la vei tah thei awpa a châ. Eimâ ngiapâna he Chhyna-O lia ngahlah hmôthei awpa hlupi eima ypa ta â la. Awnanopa liata eimâ ngachha kawpa thokha zy chhao he apakhyna, tlâhrai hriana nata Kawmitina liazy deita ta a chakaona apalôh atlah khei thlahpa eima y hôlô khia maw tah awpa eima châ. Abeipa ta ‘Lyuhchâna’ raihria awpa ta maniah a awna he ahy zy hnota hria awpa ma eima châ tahpa he eima my tyhpa vâta khia mawh he Biepipa ‘ Eima chakaona liata pahnopasia awpa eima châna’ he eima zydua châta maniah a pie tahpa palôh lia khô chyu ei suh vy.
Khazohpa china nata a chyhsapa zy hnota Krista zi n’awpa lâthlôh chhopahmona he khâchâ asiekhoh awpa a châ. Lyuchana rai hria awpa ta cha miah atuahtuhpa Krista nata miah atuanapa, chyhsazy, palôhrupa nata ama duasu eima pahno awpa angiah ngaita kaw. Atahmachha thyutliapa(KTP Member) zy pi cha, eima Member heipa zy duasu hlata Khizaw phasana nata thatih nô-ahchhihpa zy buakhei via khiah pi ma tah awpa châ pi ta. Eima chakaona awpa eima chhei tlamaw khiama tah awpa chhao a za châ hra.

He Gude Bu apachhuahpanohtuhpa ta apalasana liata cha; Siaha khipi liana khi KTP Branch 16 y ta, chaliata KTP manôh he 3462 châ ei ta, khichho liata a ypa he 2292 ama châ. Chahry tawhta apakhy tyhpa he chyhsa 537 châ ei ta, 23% apakhy tyhpa dei eima châ. He chhao he ECM KTP 2019 Pakhypi khai tawh statistic lâpa châ ta, apakhy tyhpa chhao he hla ta ahnai via thei awpa hawhta pachapa eima châ hra.
He liata alapasia kawpa cha Khizaw moleina chi nano nanopa ta KTP manôhzy maniah tlahnao hai ta, chhaichhi chi nano nanopa hmapa ta maniah a parao hai tahna a châ. Eima chiehleina nata tlaleina zy he apahno khei chyu awpa he apeimawh kaw.

SAHMA ATAOPA SIAHA LIA:
Avaih moh rei hlei leipa aw na ta. Siaha khihpi liata Vaih sakha liata cha chhokha rietheipa kawpa, asiphih kawpa chhokha y ei ta. MTP zy ta sahma tao/zuah khao lei awpa ta pakhâ pi ta. Ano ta, ‘ Namo cha pabua leipa ei na ta, eina patu thei khia ei chi na patu thlah u la” maniah a tahpa vâta eima Branch President ta, zakha cha abyh awpa ta maniah pahrua ta. Eimâ nyu nawpa apha kawpa ta aparyh khai pi ta. Mydi 2-pa lia sahma 40lit. chhao ta kaw tlô ta. A tlyhmia lia eima patu hâ tlai. Anodeikua cha, President ta “G.S buakha bie cha chho tua sa” na tah ta. “ A sahma eima patupa he leipa khai mawh sih la, khapa ama niedo khao aw. 20lit-pa he la patupa ei sih la, ahropa he la, niedo ama chalei n’awpa ta vaih hrola tla pazuasa si cha.” na tah ta. Eima palôh avaw lyu kaw. Cha hawna chata tao pi ta. MTP ta sapha 1qtl. chaleipa pi ta. Hnolâ cha sahma zuah nga khao vei.

Ei reikhohpa cha, chyhsapa to eima duasu alyu tlâ leipa ta. Eima chakaona alyu tlâ hra vei. Chavâta, khei hawpa tawhta hmopha tao ta, Krista lyuchâpa eima châna he eima palasa chyu aw tahpa he eima zydua ta eima nohto hro lia hnei chyu ei sih la kho achhih kaw.

NEHEMIA TA KU ACHOPA ACHU PASIA:
Nehemia 2:11-16 lia eima hmôpa cha Nehemia ta Zerusale atlô tawhta y chakhy vei tahpa eima hmô. Zerusale Kuh acho hâpa tha athei na ta, Nehemia cha thlai atyuh ta, cha ta, apakhu paneipa ta ava Khazohpa a awsao ta tahpa eima pahno. Khazohpa ta arao hapa taopathi ta paduapathi awpa ano liata a chhopa cha ano cheingei ta, azo ta puapa ta asu zydua tly ta, kuh acho hâpa nata ochhi mei ta akâ khaipa zy cha ano mokhaoh cheingei ta ahmô khai. Khazohpa bie nathlie ta, abie adaopa liata Nehemia he asia ngâsâ tahna a châ.
Atahmahla tlalei-zialeina nata pakhopangah tua ei sih la.
Ahy nô, ahy paw tlyma a hnatlâna a seitiapa ta Siaha tawhta Aizawl lâ aza pamosa ta. Dawhty âhmô ti ta. Pangiasapa ta ahy Dawhty hmâ ta Thohna pie khao vei ei tahpa eima pahno. Chholâ ta atla leipa zy cha, ama tlaleina achu pasia awpa ta Endoscopy zy, Ultrasound zy hleikhô ta City Scan zy taopa ta âmâ chu tyh. Ama tlaleina liahsa amah mo tawhta thohna piepa zy cha thlai ta ama tlakhei hâ tyh.

ATAHMA KHAPA DUAHMO LIA EIMA DUAH?
Awnanopa nôpaw nata ngiapâtuhpa hlupi zy pi ta, Biehrai reina nata Thlachhâna liata tiama thlah hâpa hlu ngaita pi ta. Vaih-tlâh kyhpachâna nata riethei-sipasapa zy deichhyna liata eima mo chao khai hâ ta. Ahneirôhpa hmiamona nata Awnanopa liata athyu thei viapa zy hmiamona hri ta maniah khu hai ta. Biehneina khopa vâta khizaw sôh lia eima mo tawh pi ta. Râh, khitlâ, vaih nata Ochhoh eimâ mohôhna ado khao leipa ta, thyutliapa achuhaipa zy pi ta khizaw hmasiena chi nano nanopa vâta adaihti lia châ achu leipa ta, amo daihti nata thyu daihti chhao pahno thai khao leipa pi ta. Eima aoh ta akhopa niepa ta doh pi ta, eima pavyh ta pahnie leipa ta, thina lâ maniah a chhi hai.

ACHHA CHAINA LIATA CHA: He eima raona zydua tawhta eimâ boh thei n’awpa ta, nama nata keima eima duasu cha athiehpa ta athlie heih ei sih la. Sahsyh tawhta pathaopa ta eima nohto hro liata taopathi/paduapathi angiapa zy tao chyu tua ei sih la. Mopakha eima vaw tla hâ khiata cha chhokha vaw tla aw ta. Chhokha avaw tla khia vaih-tlâh chhao vaw tla hâ aw ta. Vaih-tlâh avaw tla tita râh vaw tla aw ta, cha tita cha Marapa sawzy vaw tla hâ aw pi ta. Eimâ bohna KUH cha eima Khazohpa a vaw châ ha ba aw. Khazohpa ta abie byhna pie mawh sy. Amen.