Adv. Johny Methippara

🌲 കോട്ടയിലെ വിദ്യാർത്ഥി ആത്മഹത്യകൾ നൽകുന്ന ചിന്തകൾ🌲

രാജസ്ഥാനിലെ കോട്ടയിലെ പരീക്ഷ പരിശീലന കേന്ദ്രങ്ങളിൽ മെഡിക്കൽ - എൻജിനിയറിങ് പരീക്ഷയ്ക്ക് തയ്യാറെടുത്തിരുന്ന രണ്ട് വിദ്യാർത്ഥികൾ ഒരു ദിവസം ആത്മഹത്യ ചെയ്ത സംഭവം നമ്മുടെ വിദ്യാഭ്യാസ സമ്പ്രദായത്തിന്റെ വലിയ പോരായ്മയാണ് ചൂണ്ടിക്കാണിക്കുന്നത്. ഈ വർഷം 22 വിദ്യാർത്ഥികളാണ് കോട്ടയിൽ മാത്രം ആത്മഹത്യ ചെയ്തത്. കഴിഞ്ഞ വർഷം 15 വിദ്യാർത്ഥികൾ കോട്ടയിൽ ആത്മഹത്യ ചെയ്തിരുന്നു. പരീക്ഷകൾ നൽകുന്ന സമ്മർദ്ദം മൂലം മിടുക്കരായ ആയിരക്കണക്കിന് വിദ്യാർത്ഥികളാണ് ഒരോ വർഷവും ഇന്ത്യയിൽ ആത്മഹത്യ ചെയ്യുന്നത്. കേരളത്തിലും ഏറെ വിദ്യാർത്ഥികൾ ഒരോ വർഷവും പരീക്ഷ പ്പേടിമൂലം ആത്മഹത്യ ചെയ്യുന്നുണ്ട്. ഒന്നാം സ്ഥാനത്തെത്താൻ മാതാപിതാക്കളും അധ്യാപകരും മറ്റും നൽകുന്ന സമർദ്ദങ്ങളാണ് വിദ്യാർത്ഥികളെ ആത്മഹത്യയിലേയ്ക്ക് തള്ളിവിടുന്നത്. ഇന്നത്തെ വിദ്യാഭ്യാസ സമ്പ്രദായത്തിന്റെ ഭാഗമായി കൂടക്കുടെയുള്ള പരീക്ഷകളും പരിശോധനകളും വലിയ മാനസിക സമ്മർദ്ദങ്ങളാണ് കുട്ടികൾക്ക് നൽകുന്നത്. പഠനത്തോടുള്ള താല്പര്യത്തേക്കാൾ പരീക്ഷയെക്കുറിച്ചുള്ള ഭയ മാണ് വിദ്യാർത്ഥികളെ മുന്നോട്ട് നയിക്കുന്നത്. പഠന മികവിന്റെ അളവുകോൽ പരീക്ഷയാ കുമ്പോൾ കുട്ടികൾ പരീക്ഷയ്ക്ക് വേണ്ടിയാണ് പഠിക്കുക. ഇത് പരീക്ഷയിൽ മികച്ച വിജയം നേടാൻ അവരെ സഹായിച്ചേക്കും. എന്നാൽ വിജയകരമായ ജീവിതത്തിന് വേണ്ട അറിവും അനുഭവവും ആർജിക്കുവാൻ അവരെ സഹായിക്കില്ല. പരീക്ഷയിൽ ഒന്നാം സ്ഥാനത്ത് എത്തുന്നവരാണ് ജീവിതത്തിൽ വിജയിക്കുന്നത് എന്ന തോന്നലും വിദ്യാർത്ഥികളെ കൂടുതൽ സമ്മർദ്ധത്തിൽ ആക്കുന്നു. പ്രധാനമായും മാതാപിതാക്കളാണ് ഇവരെ ആത്മഹത്യയിലേയ്ക്ക് നയിക്കുന്നത്. അധ്യാപകർക്കും വിദ്യാഭ്യാസ സ്ഥാപനങ്ങൾക്കും സമുഹത്തിനും ഇക്കാര്യത്തിൽ പങ്കുണ്ട്. വലിയ മത്സര ബുദ്ധിയും ചിന്തയുമാണ് മാതാപിതാക്കളും വിദ്യാ ഭ്യാസ സ്ഥാപനങ്ങളും മറ്റും കുട്ടികൾക്ക് നൽകുന്നത്. പരീക്ഷയിൽ കുട്ടികൾക്ക് മാർക്ക് കുറയുമ്പോൾ മാതാപിതാക്കളുടെ നിരാശ നിറഞ്ഞ പ്രതികരണമാണ് കുട്ടികളിൽ തകർച്ച സൃഷ്ടിക്കുന്നത്. ഇത് വലിയ ഉത്ക്കണ്ഠയിലേയ്ക്ക് കുട്ടികളെ നയിക്കുന്നു. ജോലിയുള്ള ചില മാതാപിതാക്കൾ അവധിയെടുത്ത് കുട്ടികൾ പഠിയ്ക്കുന്നുണ്ടോ എന്ന് നോക്കിയിരിക്കും. ഇത് പലപ്പോഴും വിപരീത ഫലങ്ങൾ ഉണ്ടാക്കും. വലിയ പ്രതീക്ഷ കുട്ടികളിൽ അർപ്പിക്കും. പരീക്ഷയിൽ മാർക്ക് കുറഞ്ഞാൽ , അല്ലെങ്കിൽ തോറ്റാൽ കുടുംബത്തിന് നാണക്കേടാകും എന്ന് പറയും. പരീക്ഷയിൽ മാർക്ക് കുറഞ്ഞാൽ ശിക്ഷിക്കും, ഫുൾ മാർക്ക് നേടിയാൽ വില കൂടിയ സമമാനങ്ങൾ വാഗ്ദാനം ചെയ്യും. മാതാപിതാക്കളുടെ ആധി കാണുന്നതോടെ കുട്ടികൾ കൂടുതൽ സമ്മർദ്ദത്തിൽ ആകും. പിന്നെ പേടിയോടെയാകും പഠനം. ഫുൾ മാർക്ക് കിട്ടിയില്ലെങ്കിൽ എന്ത് ചെയ്യും എന്ന ടെൻഷനാകും. അവസാനം സമ്മർദ്ധം താങ്ങാൻ കഴിയാതെ കുട്ടികൾ ജീവിതം സ്വയം അവസാനിപ്പിക്കുന്നു.

പരീക്ഷയ്ക്ക് യഥാർത്ഥത്തിൽ ഉള്ളതിനെക്കാൾ വലിയ സ്ഥാനമാണ് കുട്ടികളുടെ മനസ്സിൽ സൃഷ്ടിക്കുന്നത്. പരാജയം ഒന്നിന്റെയും അവസാനമല്ലെന്നും പരാജയത്തെ അംഗീകരിക്കുവാനും പക്വതയോടെ സ്വീകരിക്കാനും മുന്നോട്ട് പോകുവാനുമാണ് പഠിപ്പിക്കേണ്ടത്. ലോക ചരിത്രത്തിൽ പരാജയത്തെ അതിജീവിച്ചവരാണ് വലിയ ചരിത്ര വിജയങ്ങൾ കരസ്ഥമാക്കിയിട്ടുള്ളത്. കുട്ടികൾക്ക് ചെറുപ്പത്തിലെ ഉത്തരവാദിത്വങ്ങൾ നൽകി അത് നിർവഹിക്കാൻ പഠിപ്പിക്കണം. എന്നാൽ മാത്രമേ പ്രതിസന്ധികളെ തരണം ചെയ്യാനും വെല്ലുവിളികളെ അതിജീവിക്കുവാനും ഉള്ള ആത്മവിശ്വാസവും കരുത്തും കുട്ടികളിൽ ഉണ്ടാകൂ . നല്ല മാനസിക ആരോഗ്യം കുട്ടികളിൽ വളർത്തിയെടുക്കണം.

🌲 ഗുജറാത്തിലെ സുററ്റിൽ 6000 കോടി ആസ്തിയുള്ളതും 71 വിദേശ രാജ്യങ്ങളിലേക്ക് കയറ്റുമതി ചെയ്യുന്നതുമായ സാവ്ജി ദൊലോക്കിയ എന്ന പ്രശ്സ്തനായ രത്‌ന വ്യാപാരി അമേരിക്കയിൽ എം ബി എ യ്ക്ക് പഠിച്ച് കൊണ്ടിരുന്ന തന്റെ മകൻ ദ്രാവിയ ദൊലോക്കിയെയെ അവധിയ്ക്ക് നാട്ടിൽ വന്നപ്പോൾ മുന്ന് ജോടി പഴയ വസ്ത്രങ്ങൾ നൽകി കൊച്ചിയിലെ സാധാരണ സ്ഥാപനങ്ങളിൽ ജോലി ചെയ്തു പണം കണ്ടെത്തി ജീവിക്കുന്നതിനായി അയച്ച സംഭവം ഓർക്കുക. ഒരു യുണിവേഴ്സിറ്റിയിൽ നിന്നും വിദ്യാഭ്യാസ സ്ഥാപനത്തിൽ നിന്നും ഇത് പോലുള്ള പഠനങ്ങളും ജീവിതാനുഭവങ്ങളും ലഭിക്കില്ല. ഇത് മാതാപിതാക്കൾക്ക് പാഠം ആകണം. ഇല്ലെങ്കിൽ ഇനിയും ഏറെ മാതാപിതാക്കൾക്ക് പരീക്ഷ പ്പേടിമൂലം മക്കൾ നഷ്ടപ്പെടും. രാജ്യത്തിന് മിടുക്കരായ കുട്ടികളെ നഷ്ടപ്പെടും. 🌲

🌲ഓർക്കുക , പരീക്ഷയിൽ A+ വാങ്ങുന്നവരല്ല വിജയിക്കുന്നത് . പകരം,പഠന ശേഷം ജീവിതത്തിൽ A+ വാങ്ങുന്നവരാണ് വിജയിക്കുന്നത്.🌲

🌲 വാഴ വെട്ടിയവർ പിശാചുക്കളോ🌲

അഡ്വ. ജോണി മെതിപ്പാറ, മുവാറ്റുപുഴ .

മനുഷ്യമനസ്സുള്ള ഒരാൾക്കും ചെയ്യാൻ സാധിക്കില്ലാത്ത ഒന്നാണ് മുവാറ്റുപുഴ വാരപ്പെട്ടിയിലെ ഇലക്ട്രിസിറ്റി ബോർഡ് ജീവനക്കാരുടെ വാഴവെട്ടൽ. ആർക്കും കണ്ടാൽ കൊതി വരുന്ന എണ്ണൂറോളം വാഴകൾ. മക്കളെപ്പോലെ വളരെ കരുതലും ശ്രദ്ധയോടും കൂടി പരിപാലിച്ച് വളർത്തിക്കൊണ്ട് വന്നതാണ് കുലച്ച് നിന്നിരുന്ന ഈ വാഴകൾ. രണ്ടോ മൂന്നോ ആഴ്ച കഴിഞ്ഞിരുന്നെങ്കിൽ കുലകൾ മൂത്ത് പാകമായി വെട്ടി എടുക്കാമായിരുന്നു. ഒരു വർഷം നീണ്ട കഠിനാധ്വാനത്തിന്റെ ഫലം.

മറ്റുള്ളവരുടെ വേദനയിലും ബുദ്ധിമുട്ടിലും സന്തോഷം കണ്ടെത്തുന്ന ആളുകൾക്ക് (സാഡിസ്റ്റ് ) മാത്രമെ ഇതുപോലെ കാട്ടാളത്തം ചെയ്യാൻ കഴിയൂ. മരണ വീടിന് തുല്യമാണ് കർഷകൻ കാവുംപുറത്ത് തോമസിന്റെ വീട്. ദു:ഖം തളം കെട്ടി നിൽക്കുന്ന അന്തരീക്ഷം. ഒരു അറിയിപ്പോ നോട്ടീസോ നൽകാതെ നടത്തിയ ക്രൂര വിനോധം. രണ്ട് ടവറിനുള്ളിൽ അപകടകരമായി താഴ്ന്ന് കിടക്കുന്ന കമ്പികൾ. കമ്പികൾ വലിച്ച് കെട്ടുവാനുള്ള ഉത്തരവാദിത്വം ഇലക്ട്രിസിറ്റി ബോർഡ് ജീവനക്കാരുടേതാണ്. ഇലക്ട്രിസിറ്റി ബോർഡ് ജീവനക്കാരുടെ വീഴ്ചയിൽ നിന്ന് രക്ഷപെടാനാണ് ധൃതഗതിയിൽ വാഴ വെട്ടിനശിപ്പിച്ചത് . രണ്ട് വെട്ടിയാൽ വാഴമറിഞ്ഞ് വീഴും. കുലച്ച വാഴകൾ മറിഞ്ഞ് വീഴുന്നത് കാണുന്നത് നല്ല രസമായിരുന്നിരിക്കാം വെട്ടിയ കാട്ടാളൻമാർക്ക്. അത് കൊണ്ടായിരിക്കാം ഒറ്റയിടിക്ക് ഇത്രയും വാഴകൾ വെട്ടിനശിപ്പിച്ചത്. ഏത് ശിലാഹൃദയന്റെയും മനസ്സ് വേദനിപ്പിക്കുന്നതാണ് വെട്ടിവീണ് കിടക്കുന്ന വാഴക്കാഴ്ച.

സ്ഥലം ഉടമ തോമസിന് ന്യായമായ നഷ്ടപരിഹാരം നൽകണം. പക്ഷെ ഈ തുക വാഴ വെട്ടിയ ഉദ്യോഗസ്ഥരിൽ വാങ്ങിക്കണം. ഉദ്യോഗസ്ഥരുടെ ക്രൂരതയ്ക്ക് പൊതുജനം സഹിക്കേണ്ട കാര്യമില്ലല്ലോ. ഇവർക്കെതിരെ ശക്തമായ ശിക്ഷാ നടപടികൾ സ്വീകരിക്കണം. ജോലിയിൽ നിന്ന് പിരിച്ച് വിടണം. കാട്പിടിച്ച് കിടക്കുന്ന എത്രയോ ട്രാൻസ്ഫോമറുകളും ഇലക്ട്രിക് ലൈനുകളും വഴി നീളെ കാണാം. വാഴവെട്ടാൻ കാണിച്ച ശുഷ്കാന്തിയും വ്യഗ്രതയും സ്വന്തം ജോലിയോട് കെ. എസ്. ഇ. ബി. ജോലിക്കാർ കാണിച്ചിരുന്നെങ്കിൽ വെള്ളാനയായ ഇലക്ട്രിസിറ്റി ബോർഡ് എന്നെ രക്ഷപെട്ടേനെ.

കേരളത്തിലെ ഉദ്യോഗസ്ഥ വൃന്ദത്തിന്റെ പൊതു മുഖമാണ് ഇത് കാണിക്കുന്നത്. എന്തെങ്കിലും സംരംഭങ്ങൾ നടത്തുന്നവരെ പ്രോത്സാഹിപ്പിക്കുന്നതിന് പകരം എന്തെങ്കിലും കാരണങ്ങൾ പറഞ്ഞ് വെട്ടി നിരത്തുക. കൃഷി അവസാനിപ്പിക്കുകയാന്നെന്നാണ് തോമസ് ചേട്ടൻ പറഞ്ഞത്. എണ്ണൂറ് വാഴ നട്ടപ്പോൾ ഏറെ പേർക്ക് അദ്ദേഹം തൊഴിൽ നൽകിയിട്ടുണ്ട്. ഒരു സംരംഭകനെ കൂടി ഉദ്യോഗസ്ഥ വൃന്ദം വീട്ടിലിരുത്തിയിരിക്കുന്നു. യുവതലമുറ ഇതൊക്കെ കാണുന്നുണ്ട്.

ഇതൊക്കെ കാണുന്ന യുവതലമുറ എങ്ങനെ മറ്റ് രാജ്യങ്ങളിലേയ്ക്ക് കുടിയേറാതിരിക്കും. എന്ത് കൊണ്ട് യുവജനങ്ങൾ വ്യാപകമായി മറ്റു രാജ്യങ്ങളിലേക്ക് കുടിയേറുന്ന് എന്നതിനു ഉത്തരമാണ് വാരപ്പെട്ടിയിലെ വാഴവെട്ട്🌲