𝐂𝐏𝐍𝐒 𝐍𝐄𝐖𝐒 𝐓𝐕

រដ្ឋសភា ចេញសេចក្ដីប្រកាសព័ត៌មានស្ដីពីលទ្ធផលសម័យប្រជុំរដ្ឋសភាជាវិសាមញ្ញ នីតិកាលទី៧ ដោយពិភាក្សា និងអនុម័តលើរបៀបវារៈចំនួន៣
(ភ្នំពេញ)៖ រដ្ឋសភាកម្ពុជា នៅរសៀលថ្ងៃទី១ ខែមីនា ឆ្នាំ២០២៤នេះ បានចេញសេចក្តីប្រកាសអំពីលទ្ធផល នៃសម័យប្រជុំរដ្ឋសភាជាវិសាមញ្ញ នីតិកាលទី៧ ក្រោមអធិបតីភាពដ៏ខ្ពង់ខ្ពស់ សម្ដេចមហារដ្ឋសភាធិការធិបតី ឃួន សុដារី ប្រធានរដ្ឋសភា ដោយពិភាក្សា និងអនុម័តលើរបៀបវារៈចំនួន៣។
ខាងក្រោមនេះជាសេចក្តីប្រកាសរបស់រដ្ឋសភា៖

និយ័តករបរធនបាលកិច្ច ផ្ដល់ការទទួលស្គាល់ក្រុមហ៊ុន ខ្វនថឹម & ស្ពេកត្រឹម ជាក្រុមហ៊ុនផ្តល់សេវាសវនកម្មក្នុងវិស័យបរធនបាលកិច្ច
(ភ្នំពេញ)៖ និយ័តករបរធនបាលកិច្ច (ន.ប.ធ.) បានដំណឹងដល់បរធនបាល បរធនបាលទាយក ឬអ្នកផ្ដល់វិភាគទានបរធនបាលកិច្ច បុគ្គលផ្ដល់សេវាពាក់ព័ន្ធក្នុងវិស័យបរធនបាលកិច្ច និងសាធារណជនទាំងអស់មេត្តាជ្រាបថា៖ ក្រុមហ៊ុន ខ្វនថឹម & ស្ពេកត្រឹម ឯ.ក (Quantum & Spectrum Co., LTD) និងក្រុមហ៊ុន ប្រាយវ័តធ័រហាវខូភើស៍ (ខេមបូឌា) (PricewaterhouseCooper (Cambodia) Ltd.) ទទួលបានការទទួលស្គាល់ពី ន.ប.ធ. ជាក្រុមហ៊ុនផ្តល់សេវាសវនកម្មក្នុងវិស័យបរធនបាលកិច្ច ដោយបានបំពេញតាមលក្ខខណ្ឌតម្រូវគ្រប់គ្រាន់តាមបទប្បញ្ញត្តិពាក់ព័ន្ធជាធរមានក្នុងវិស័យបរធនបាលកិច្ច។
បរធនបាល បរធនបាលទាយក ឬអ្នកផ្ដល់វិភាគទានបរធនបាលកិច្ច បុគ្គលផ្ដល់សេវាពាក់ព័ន្ធក្នុងវិស័យបរធនបាលកិច្ច និងសាធារណជនទាំងអស់ដែលមានបំណងប្រើប្រាស់សេវាសវនកម្មក្នុងវិស័យបរធនបាលកិច្ចអាចទំនាក់ទំនងទៅកាន់ក្រុមហ៊ុនដែលមានឈ្មោះខាងលើ៕

ក្រសួងទេសចរណ៍ប្រារព្ធខួបលើកទី១១៣ ទិវាអន្តរជាតិនារី ៨មីនា ឆ្នាំ២០២៤ ក្រោមប្រធានបទ «ស្រ្តី និងក្មេងស្រីក្នុងបរិវត្តកម្មឌីជីថល»
(ភ្នំពេញ)៖ លោក សុខ សូកេន រដ្ឋមន្រ្តីក្រសួងទេសចរណ៍ និងលោកស្រី នាថ្ងៃទី១ ខែមីនា ឆ្នាំ២០២៤ បានជួបជុំសមាជិក សមាជិកា ក្រុមការងារយេនឌ័រ ព្រមទាំងមន្រ្តីរាជការជានារីនៃក្រសួងទេសចរណ៍ ដើម្បីអបអរសាទរខួបលើកទី១១៣ ទិវាអន្តរជាតិនារី ៨មីនា ឆ្នាំ២០២៤ ក្រោមប្រធានបទ «ស្រ្តី និងក្មេងស្រីក្នុងបរិវត្តកម្មឌីជីថល»។
គោលបំណងនៃទិវាអន្តរជាតិនារីលើកទី១១៣ គឺដើម្បីរំលេចសក្តានុពល និងភាពចាំបាច់នៃការលើកកម្ពស់ការចូលរួម និងភាពជាតំណាងរបស់ស្រ្តី និងក្មេងស្រីក្នុងយុគសម័យឌីជីថល ប្រកបដោយប្រសិទ្ធភាព សុវត្ថិភាព និងធានាបាននូវសិទ្ធិ ព្រមទាំងឱកាសពេញលេញក្នុងការទទួលបានជម្រើស និងភាពជាតំណាងប្រកបដោយសក្តានុពល ក្នុងការចូលរួមចំណែកអភិវឌ្ឍន៍សេដ្ឋកិច្ច និងសង្គមជាតិប្រកបដោយចីរភាព និងបរិយាបន្ន។
លោករដ្ឋមន្ត្រីបានបញ្ជាក់ថា ក្រសួងទេសចរណ៍មានភាពចាំបាច់ក្នុងការចូលរួមគាំទ្រ និងអនុវត្តការងារលើកកម្ពស់សមភាពយេនឌ័រ និងបង្កើនភាពអង់អាចដល់ស្ត្រី ដើម្បីបង្កើតបរិស្ថានអំណោយផល និងផ្តល់ឱកាសឱ្យស្ត្រីបានបន្តចូលរួមយ៉ាងពេញលេញក្នុងការអនុវត្តសិទ្ធិ និងករណីយកិច្ច ព្រមទាំងទទួលបានផលប្រយោជន៍ពីកិច្ចអភិវឌ្ឍវិស័យទេសចរណ៍ប្រកបដោយសមធម៌ និងសមភាព តាមរយៈការបន្តគិតគូរដល់ស្ត្រីដែលបម្រើការក្នុងវិស័យមាសបៃតងមួយនេះ ដោយដាក់ចេញនូវផែនការយុទ្ធសាស្ត្រលើកកម្ពស់យេនឌ័រក្នុងវិស័យទេសចរណ៍ និងកម្មវិធីអភិវឌ្ឍនានារបស់ក្រសួង៕

ប្រកាសចូលកាន់តំណែង មេបញ្ជាការមូលដ្ឋានកងរាជអាវុធហត្ថស្រុកព្រៃឈរ, មេបញ្ជាការអាវុធហត្ថខេត្ត ណែនាំឲ្យបន្ដប្រឹងប្រែងអនុវត្តតួនាទីភារកិច្ច សំដៅរក្សាសន្ដិសុខ សុវត្ថិភាពជូនពលរដ្ឋ
(កំពង់ចាម)៖ នៅរសៀលថ្ងៃទី០១ ខែមីនា ឆ្នាំ២០២៤នេះ លោកឧត្តមសេនីយ៍ត្រី សោ សាវឿន មេបញ្ជាការកងរាជអាវុធហត្ថខេត្តកំពង់ចាម, លោកប្រធានក្រុមប្រឹក្សាព្រៃឈរ និងលោកអភិបាលស្រុកព្រៃឈរ បានអញ្ជើញជាអធិបតីក្នុងពិធីប្រកាសតែងតាំង ផ្លាស់ប្តូរមុខតំណែង មេបញ្ជាការ មូលដ្ឋានកងរាជអាវុធហត្ថស្រុកព្រៃឈរ។
ពិធីនេះ ក៏មានការចូលរួមពី មេបញ្ជាការរង នាយសេនាធិការ នាយសេនាធិការរង ប្រធានមន្ទីរ មេបញ្ជាការ មូលដ្ឋានស្រុក ស្នាក់ការសន្តិសុខ អភិបាលរងស្រុក នាយករដ្ឋបាលស្រុក អធិការនគរបាលក្រុង មេបញ្ជាការផ្នែកសឹករងស្រុក មេឃុំ មេបុស្តិ៍ ព្រមទាំងមន្រ្តីរាជការជុំវិញស្រុកពាក់ព័ន្ធមួយចំនួនទៀត។
ក្នុងឱកាសនោះ លោកឧត្តមសេនីយ៍ត្រី សោ សាវឿន បានក្រើនរំលឹក និងដាក់បទបញ្ជាដល់កម្លាំងអាវុធហត្ថទាំងអស់ ត្រូវខិតខំប្រឹងប្រែងបង្ក្រាប និងទប់ស្កាត់នូវរាល់បទល្មើសគ្រប់ប្រភេទ ពិសេសបទល្មើសល្បែងស៉ីសងខុសច្បាប់គ្រប់ប្រភេទឲ្យអស់ពីមូលដ្ឋាន តាមអនុសាសន៍ដ៏ម៉ឺងម៉ាត់របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា។
បន្ថែមពីនេះ លោកឧត្តមសេនីយ៍ត្រីមេបញ្ជាការ បានណែនាំឲ្យរក្សាសាមគ្គីភាពផ្ទៃក្នុងអង្គភាព និងពង្រឹងកិច្ចសហការជាមួយបណ្ដាញស្ថាប័នពាក់ព័ន្ធ សំដៅរក្សាសន្ដិសុខ សណ្ដាប់ធ្នាប់ និងសុវត្ថិភាពជូនប្រជាពលរដ្ឋ៕

កម្ពុជា-ជប៉ុន រៀបចំកិច្ចសន្ទនាថ្នាក់ឧត្តមមន្រ្តីការពារជាតិ លើកទី១ ឆ្នាំ២០២៤ ដើម្បីបង្កើនទំនាក់ទំនងមិត្តភាពរវាងប្រទេសទាំងពីរ នៅខេត្តសៀមរាប
(សៀមរាប)៖ នៅថ្ងៃទី០១ ខែមិនា ឆ្នាំ២០២៤នេះ កម្ពុជា-ជប៉ុន រៀបចំកិច្ចសន្ទនាថ្នាក់ឧត្តមមន្រ្តីការពារជាតិលើកទី១ ឆ្នាំ២០២៤ ដើម្បីបង្កើនទំនាក់ទំនងមិត្តភាពរវាងប្រទេសទាំងពីរ នៅខេត្តសៀមរាប ក្រោមវត្តមានរបស់នាយឧត្តមសេនីយ៍ យន្ត មីន រដ្ឋលេខាធិការក្រសួងការពារជាតិ តំណាងឧបនាយករដ្ឋមន្ត្រី ទៀ សីហា រដ្ឋមន្ត្រីក្រសួងការពារជាតិ និងប្រតិភូជប៉ុន ដឹកនាំឯកឧត្តម SERIZAWA Kiyoshi អនុរដ្ឋមន្ត្រី ក្រសួងការពារជាតិជប៉ុន ទទួលបន្ទុកកិច្ចការអន្តរជាតិ។
នាយឧត្តមសេនីយ៍ យន្ត មីន បានលើកឡើងថា កិច្ចប្រជុំថ្ងៃនេះ ដែលកើតឡើងក្រោមចក្ខុវិស័យដ៏ឈ្លាសវៃរបស់ប្រមុខរាជរដ្ឋាភិបាលនៃប្រទេសយើងទាំងពីរ គឺសម្តេចធិបតី ហ៊ុន ម៉ាណែត និងឯកឧត្តមនាយករដ្ឋមន្ត្រី ហ៊ូមីអូ គឺស៊ីដា កាលពីខែធ្នូ កន្លងទៅថ្មីៗនេះ។ ការរៀបចំឲ្យមានកិច្ចសន្ទនាថ្នាក់អនុរដ្ឋមន្ត្រី ក្រសួងការពារជាតិកម្ពុជា-ជប៉ុន ក៏ជាជំហានដ៏សំខាន់មួយ នៅក្នុងការលើកកម្រិតនៃកិច្ចសហប្រតិបត្តិការលើវិស័យ ការពារជាតិរវាងប្រទេសទាំងពីរ តាមរយៈវេទិកាសន្ទនាថ្នាក់យុទ្ធសាស្ត្រ បន្ថែមពីលើយន្តការដែលមានស្រាប់ មានដូចជាយន្តការ PM និងយន្តការ MMជាដើម។
នាយឧត្តមសេនីយ៍ យន្ត មីន បានបន្តថា កិច្ចសន្ទនាថ្នាក់ឧត្តមមន្ត្រីនៃក្រសួងការពារជាតិកម្ពុជា-ជប៉ុន នឹងផ្តល់ឱកាសសម្រាប់កិច្ចពិភាក្សា ផ្លាស់ប្តូរបទពិសោធន៍ និងជាយន្តការកសាងគោលនយោបាយ ដើម្បីជម្រុញកិច្ចសហប្រតិបត្តិការយោធារវាង ប្រទេសទាំងពីរ ឲ្យកាន់តែរីកចម្រើនទូលំទូលាយទ្វេរឡើង ដោយអនុលោមទៅតាមកិច្ចព្រមព្រៀងរវាងក្រសួងការពារជាតិនៃប្រទេសទាំងពីរ និងកិច្ចសហប្រតិបត្តិការលើវិស័យសំខាន់ៗមួយចំនួន ដូចជាការបណ្តុះបណ្តាលធនធានមនុស្ស, ប្រតិបត្តិការរក្សាសន្តិភាព សន្តិសុខសមុទ្រ ការសង្គ្រោះគ្រោះមហន្តរាយ ការដោះមីន សន្តិសុខក្នុងតំបន់។
នាយឧត្តមសេនីយ៍ បានបន្តទៀតថា យើងក៏មានឱកាសបានផ្លាស់ប្តូរយោបល់គ្នា អំពីការវិវត្តន៍នៃសភាពការណ៍ សន្តិសុខ និងសភាពការណ៍យោធា នៅក្នុងតំបន់ផងដែរ។ ថ្វីត្បិតតែពេលនេះ គឺជាលើកដំបូងនៃកិច្ចសន្ទនាក៏ដោយ ក្នុងនាមក្រសួងការពារជាតិកម្ពុជា មានជំនឿថា កិច្ចពិភាក្សារវាងប្រទេសទាំងពីរនៅថ្ងៃនេះ នឹងទទួលបានលទ្ធផលជាវិជ្ជមាន និងប្រកបដោយផ្លែផ្កា ជាពុំខាន។
នាយឧត្តមសេនីយ៍ បានបញ្ជាក់ថា កិច្ចសន្ទនាថ្នាក់ឧត្តមមន្ត្រីការពារជាតិ កម្ពុជា-ជប៉ុន លើកទី១ ក្នុង៥០ឆ្នាំកន្លងមក នឹងបានឯកភាពគ្នាប្រជុំបែបនេះ១ឆ្នាំម្តង ដោយប្តូរវេនគ្នាធ្វើម្ចាស់ផ្ទះក្នុងកិច្ចប្រជុំនេះផងដែរ។
លោក SERIZAWA Kiyoshi បានលើកឡើងថា កិច្ចសន្ទនាថ្នាក់ឧត្តមមន្ត្រីនៃក្រសួងការពារជាតិកម្ពុជា-ជប៉ុន លើកទី១ក្នុងពេលនេះនឹងផ្លាស់ប្តូរមតិយោបល់ទៅវិញទៅមក ដោយស្មោះត្រង់ ជាកម្លាំងជំរុញដ៏សំខាន់ នៅក្នុងការពង្រីក និងពង្រឹងកិច្ចសហប្រតិបត្តិការយោធារវាងប្រទេសទាំងពីរ។ ជាមួយនឹងលទ្ធផលប្រកបដោយផលិតភាព នៃកិច្ចសន្ទនាថ្ងៃនេះ នឹងត្រួសត្រាយផ្លូវឆ្ពោះទៅរកការអនុវត្តន៍កាន់តែមានប្រសិទ្ធភាព នូវផែនការសកម្មភាពដែលបានព្រមព្រៀងគ្នា ក្នុងគោលបំណងធ្វើឲ្យមិត្តភាព និងកិច្ចសហប្រតិបត្តិការលើវិស័យការពារជាតិរវាងកម្ពុជា និងជប៉ុនកាន់តែចម្រើនរុងរឿង ដើម្បីបម្រើផលប្រយោជន៍ទៅវិញទៅមក និងរួមចំណែកនៅក្នុងការលើកស្ទួយសន្តិភាព ស្ថិរភាព និងវិបុលភាពនៅក្នុងតំបន់។
លោកសង្ឃឹមថា កិច្ចសន្ទនា SOD លើកទី២ ដែលអាចធ្វើនៅប្រទេសជប៉ុន និងកិច្ចសន្ទនា SODជាបន្តបន្ទាប់ នៅថ្ងៃអនាគត នឹងនាំមកនូវសមិទ្ធផល ក្នុងការពង្រឹង និងពង្រីកចំណងមិត្តភាព និងកិច្ចសហប្រតិបត្តិការយោធារវាងកម្ពុជា និងជប៉ុនផងដែរ៕

សម្តេចធិបតី ហ៊ុន ម៉ាណែត នឹងមានជំនួបជាមួយថ្នាក់នាំកំពូលប្រទេសជាមិត្តចំនួន៥ និងទទួលជួបតំណាងក្រុមហ៊ុនអូស្រ្តាលីចំនួន១១ អំឡុងចូលរួមកិច្ចប្រជុំកំពូលពិសេសអាស៊ាន-អូស្ត្រាលី
(ភ្នំពេញ)៖ អំឡុងពេលចូលរួមកិច្ចប្រជុំកំពូលពិសេសអាស៊ាន-អូស្ត្រាលី ចាប់ពីថ្ងៃទី០១ ដល់០៧ ខែមីនា ឆ្នាំ២០២៤នេះ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា នឹងមានជំនួបជាមួយថ្នាក់នាំកំពូលប្រទេសជាមិត្តចំនួន៥ និងទទួលជួបតំណាងក្រុមហ៊ុនអូស្រ្តាលីចំនួន១១ផងដែរ។ នេះបើតាម លោក មាស សុភ័ណ្ឌ ប្រធានក្រុមអ្នកនាំពាក្យរបស់នាយករដ្ឋមន្ត្រី។
ជំនួបទាំង៥នោះរួមមាន៖
* ជំនួបទ្វេភាគីជាមួយ លោក អេនថូនី អាល់បានីស៊ី (Anthony Albanese) នាយករដ្ឋមន្ត្រីអូស្ត្រាលី
* ជំនួបទ្វេភាគីជាមួយ លោក ហ្វីឌីណាន់ រ៉ូ-ម៉ល-ដេស ម៉ាកូស ជូនៀ (Ferdinant Romualdez Marco Jr.) ប្រធានាធិបតីហ្វីលីពីន
* ជំនួបទ្វេភាគីជាមួយ លោក ចូកូ វីដូដូ (Joko Widodo) ប្រធានាធិបតីឥណ្ឌូណេស៊ី
* ជំនួបទ្វេភាគីជាមួយ លោក លី សៀន ឡុង (Lee Hsein Loong) នាយករដ្ឋមន្រ្តីសិង្ហបុរី
* ជំនួបក្រៅផ្លូវការ (Pull-Aside) ជាមួយ លោក គ្រីស្តូហ្វី ឡាក់សុន (Christopher Luxon) នាយករដ្ឋមន្ត្រីនូវែលសេឡង់។
លោក មាស សុភ័ណ្ឌ បានបញ្ជាក់បន្ថែមថា ក្រៅពីកម្មវិធីខាងលើ សម្តេចធិបតី នឹងអញ្ជើញជាអធិបតីក្នុងវេទិកាធុរកិច្ច កម្ពុជា-អូស្ត្រាលី ២០២៤ ដែលសម្តេចធិបតីនឹងថ្លែងសន្ទរកថាគន្លឹះ ស្តីពី «គោលនយោបាយសេដ្ឋកិច្ចរបស់រាជរដ្ឋាភិបាលកម្ពុជា និងទំនាក់ទំនងសេដ្ឋកិច្ចរវាងកម្ពុជា-អូស្ត្រាលី»។ បន្ថែមពីនេះ សម្តេចធិបតី ក៏នឹងទទួលជំនួបសម្តែងការគួរសមជាបន្តបន្ទាប់ ដោយបណ្តាក្រុមហ៊ុនវិនិយោគអូស្ត្រាលីធំៗប្រមាណជាង ១១ ដែលវិនិយោគលើវិស័យ សំខាន់ៗដូចជា៖ ធនាគាហិរញ្ញវត្ថុ ឧស្សាហកម្ម ឡូជីស្លឹក ថាមពលនិងឧស្ម័ន កសិកម្មនិងការកែច្នៃម្ហូប អាហារ ហេដ្ឋារចនាសម្ព័ន្ធ សុខាភិបាល និងអបរំ ជាដើម។ល។
ក្នុងឱកាសស្នាក់នៅទីក្រុងម៉ែលប៊ននេះដែរ សម្តេចធិបតី ក៏នឹងអញ្ជើញជួបសំណេះសំណាលជាមួយបងប្អូន ប្រជាពលរដ្ឋសហគមន៍ខ្មែរ និងនិស្សិតខ្មែរ ដែលកំពុងរស់នៅ និងសិក្សា នៅប្រទេសអូស្ត្រាលី និងណូវែលហ្សេឡង់ ផងដែរ៕

សមត្ថកិច្ចស្រាវជ្រាវតាមបណ្តឹង Hotline រកឃើញជនជាតិបរទេសចំនួន ៦នាក់
(ព្រះសីហនុ)៖ ការស្រាវជ្រាវតាមបណ្តឹង Hotline សមត្ថកិច្ចបានរកឃើញជនជាតិចិនម្នាក់ និងជនជាតិវៀតណាមចំនួន ៥នាក់។ នេះបើតាមការបញ្ជាក់របស់ នាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃ។
យោងតាមរបាយការណ៍ដែលបណ្តាញព័ត៌មាន ទទួលបានឱ្យដឹងថា កាលពីថ្ងៃទី២៨ ខែកុម្ភៈ ឆ្នាំ២០២៤ ថ្មីៗនេះ សមត្ថកិច្ចទទួលបានបណ្តឹងចំនួន ០៤លើក មានមនុស្ស ១៦នាក់។
ជនជាតិចិន និងវៀតណាម ដែលសមត្ថកិច្ចកម្ពុជាស្វែងរកឃើញតាមរយៈពាក្យបណ្តឹងចំនួន ០៥ករណី ពុំមែនជាករណីចាប់បង្ខាំង ធ្វើទារុណកម្មនោះទេ ប៉ុន្តែ និងជនជាតិចិន និងវៀតណាមទាំង ០៦នាក់ ចង់ត្រឡប់ទៅប្រទេសកំណើតវិញ និងពុំមែនជាករណីបង្ខាំង ឬធ្វើទារុណកម្មនោះទេ។
បើតាមអ្នកនាំពាក្យ បច្ចុប្បន្នភាពស្រាវជ្រាវ តាមបញ្ជីតាមដាន គិតត្រឹមថ្ងៃទី២៨ ខែកុម្ភៈ ឆ្នាំ២០២៤ រួមមាន៖
១៖ សំណើក្នុងបញ្ជីតាមដានសរុប ១,២៨៩ករណី មានមនុស្ស ៣,០៤៧នាក់
២៖ បានស្រាវជ្រាវស៊ើបអង្កេតបឋម ១,២០៥សំណើ និងបិទសំណុំរឿង ៤០៧សំណើ (រកឃើញមនុស្ស ១,៨៥៥នាក់, ឃាត់ខ្លួនជនសង្ស័យ ១៤៤នាក់, បិទក្រុមហ៊ុន ៥ទីតាំង, និងផ្អាកអាជីវកម្ម ក៏ដូចជាស្រាវជ្រាវក្រុមហ៊ុន ៤ទីតាំង)
៣៖ កំពុងបន្តបើកប្រតិបត្តិការស្រាវជ្រាវ និងស៊ើបអង្កេត ៤៥ករណី៕

អាមេរិកចង់ឱ្យក្រុមប្រទេស G-7 ពន្លឿនផែនការប្រើប្រាស់ទ្រព្យសម្បត្តិរុស្ស៊ីសម្រាប់អ៊ុយក្រែន
(វ៉ាស៊ីនតោន)៖ ប្រធានាធិបតីអាមេរិកលោក ចូ បៃឌីន ចង់ឱ្យក្រុមប្រទេសមានសេដ្ឋកិច្ចលូតលាស់ទាំង៧ (G-7) បង្កើតវឌ្ឍនភាពលើផែនការប្រើប្រាស់ទ្រព្យសម្បត្តិរដ្ឋរបស់រុស្ស៊ីដែលត្រូវបានបង្កក ដើម្បីជួយគាំទ្រអ៊ុយក្រែននៅពេលមេដឹកនាំក្រុមប្រទេសនេះជួបប្រជុំក្នុងខែមិថុនា នេះបើយោងតាមមនុស្សដែលដឹងពីបញ្ហានេះ។
ទីភ្នាក់ងារព័ត៌មាន Bloomberg បានរាយការណ៍ដោយដកស្រង់ប្រភពព័ត៌មានដែលនិយាយក្នុងលក្ខខណ្ឌមិនបញ្ចេញឈ្មោះនេះថា មន្ត្រីរបស់ក្រុមប្រទេស G-7 បានពិភាក្សាអំពីជម្រើសក្នុងការប្រើប្រាស់ទ្រព្យសម្បត្តិរបស់ធនាគារកណ្តាលរុស្ស៊ីដែលមានតម្លៃ ២៨០ពាន់លានដុល្លារ រួមទាំងការប្រើប្រាស់ប្រាក់នេះធ្វើជាវត្ថុបញ្ចាំដើម្បីបោះផ្សាយមូលបត្របំណុល ឬការចេញលិខិតធានាប្រើប្រាស់មូលនិធិដែលបានបង្កកទាំងនោះ។
ការជជែកដេញដោលនេះបានធ្វើឡើងនៅពេលដែលអ៊ុយក្រែនប្រឈមមុខនឹងកង្វះខាតកាំភ្លើងធំ និងគ្រាប់រំសេវដ៏ទៃទៀត ខណៈដែលក្រុមប្រទេសសម្ព័ន្ធមិត្តកំពុងតស៊ូក្នុងការផ្គត់ផ្គង់ឱ្យបានឆាប់រហ័ស ហើយជំនួយសេដ្ឋកិច្ចចំនួន ៦០ពាន់លានដុល្លារនៅតែជាប់គាំងនៅក្នុងសភាអាមេរិកនៅឡើយ។
យោងតាមប្រភពដែលបានដឹងពីកិច្ចពិភាក្សានាពេលថ្មីៗនេះ លោក បៃឌិន ក៏បានប្រាប់ជាលក្ខណៈឯកជនដល់ក្រុមប្រទេសសម្ព័ន្ធមិត្តផងដែរ ប្រសិនបើអ៊ុយក្រែនចាញ់សង្គ្រាម គាត់ជឿថា សណ្តាប់ធ្នាប់អន្តរជាតិនឹងចលាចលយ៉ាងហោចណាស់ក្នុងរយៈពេលប្រាំទសវត្សរ៍ខាងមុខ។
ក្រុមប្រទេសសម្ព័ន្ធមិត្តទាំងអស់យល់ស្របថា មូលនិធិទាំងនេះមិនគួរស្ថិតក្រោមការគ្រប់គ្រងរបស់ប្រទេសរុស្ស៊ីឡើយ លុះត្រាតែប្រទេសនេះសន្យាថានឹងជួយដល់ការកសាងអ៊ុយក្រែនឡើងវិញ ប៉ុន្តែក្រុមសម្ព័ន្ធមិត្តនៅមានការខ្វែងគំនិតគ្នាលើបញ្ហាថាតើនឹងមានច្បាប់រឹបអូសយកទ្រព្យស្បត្តិទាំងនោះទាំងស្រុងដែរឬយ៉ាណា។ មេដឹកនាំរបស់ក្រុមប្រទេស G-7 គ្រោងនឹងជួបនៅប្រទេសអ៊ីតាលីក្នុងខែមិថុនាឆ្នាំនេះ។
ប្រភពដដែលបានប្រាប់ Bloomberg ថា លោក បៃឌិន ចង់ឃើញទ្រព្យសម្បត្តិដែលរកការបង្កកទាំងនោះត្រូវបានយកទៅប្រើប្រាស់ ដើម្បីជួយផ្តល់មូលនិធិដល់តម្រូវការថវិការបស់អ៊ុយក្រែន ហើយក្រោយមកឆ្ពោះទៅរកការកសាងប្រទេសអ៊ុយក្រែនឡើងវិញ៕

សម្តេចធិបតី និងលោកជំទាវបណ្ឌិត ដឹកនាំគណៈប្រតិភូហោះដល់អូស្ត្រាលីដោយសុវត្ថិភាព
(ម៉ែលប៊ន, អូស្ត្រាលី)៖ វេលាម៉ោងប្រមាណ៥ទៀបភ្លឺថ្ងៃសៅរ៍ ទី២ ខែមីនា ឆ្នាំ២០២៤ ម៉ោងនៅកម្ពុជា ត្រូវនឹងម៉ោងប្រមាណ៩ព្រឹក ម៉ោងនៅទីក្រុងម៉ែលប៊ន ប្រទេសអូស្ត្រាលី សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានដឹកនាំគណៈប្រតិភូជាន់ខ្ពស់របស់កម្ពុជា អញ្ជើញដល់អាកាសយានដ្ឋានអន្តរជាតិម៉ែលប៊ន ប្រទេសអូស្ត្រាលី ប្រកបដោយសុខសុវត្ថិភាពហើយ។
ដំណើរអញ្ជើញដល់អាកាសយានដ្ឋានអន្តរជាតិម៉ែលប៊ន សម្តេចធិបតី និងលោកជំទាវបណ្ឌិត ទទួលបានការស្វាគមន៍ប្រកបដោយភាពកក់ក្តៅពីសំណាក់លោក Tim Watts ឧបការីរដ្ឋមន្ត្រីការបរទេសអូស្ត្រាលី និងឯកអគ្គរាជទូតខ្មែរប្រចាំនៅអូស្ត្រាលី។
សូមបញ្ជាក់ថា នៅវេលាម៉ោងប្រមាណ៦ក្បាលព្រលប់ថ្ងៃសុក្រ ទី១ ខែមីនា ឆ្នាំ២០២៤នេះ សម្តេចធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ជាឧត្តមភរិយា អញ្ជើញដឹកនាំគណៈប្រតិភូជាន់ខ្ពស់ អញ្ជើញទៅចូលរួមកិច្ចប្រជុំកំពូលពិសេសអាស៊ាន-អូស្ត្រាលី នៅទីក្រុងម៉ែលប៊ន ប្រទេសអូស្ត្រាលី ចាប់ពីថ្ងៃទី៤ ដល់ថ្ងៃទី៦ ខែមីនា ឆ្នាំ២០២៤។
ទស្សនកិច្ចនេះ ធ្វើឡើងតបតាមការអញ្ជើញរបស់លោក អេនថូនី អាល់បានីស៊ី នាយករដ្ឋមន្ត្រីអូស្ត្រាលី។ អញ្ជើញអមដំណើរសម្តេចធិបតី និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត រួមមាន លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា, លោកបណ្ឌិត សភាចារ្យ ហង់ជួន ណារ៉ុន ឧបនាយករដ្ឋមន្ត្រី និងជារដ្ឋមន្ត្រីក្រសួងអប់រំ យុវជន និងកីឡា លោក សុខ ចិន្តសោភា ឧបនាយករដ្ឋមន្ត្រី និងជារដ្ឋមន្ត្រីការបរទេស និងសហប្រតិបត្តិការអន្តរជាតិ និងមន្ត្រី សំខាន់ៗនៃរាជរដ្ឋាភិបាលកម្ពុជា។
កិច្ចប្រជុំកំពូលពិសេសអាស៊ាន-អូស្ត្រាលី ធ្វើឡើងដើម្បីអបអរសាទរខួបអនុស្សាវរីយ៍លើកទី៥០ នៃទំនាក់ទំនងដៃគូសន្ទនាអាស៊ាន-អូស្ត្រាលី ដែលនឹងផ្តល់ឱកាសដល់ថ្នាក់ដឹកនាំ កំណត់ទិសដៅអនាគតរួម និងធ្វើឱ្យទំនាក់ ទំនងកាន់តែស៊ីជម្រៅ តាមរយៈការអនុវត្តឱ្យបានពេញលេញ និងប្រកបដោយប្រសិទ្ធភាពនូវអាទិភាពសំខាន់ៗ នៃភាពជាដៃគូយុទ្ធសាស្ត្រគ្រប់ជ្រុងជ្រោយអាស៊ាន-អូស្ត្រាលី។ ថ្នាក់ដឹកនាំ គ្រោងនឹងអនុម័តសេចក្តីថ្លែងការណ៍ទីក្រុងម៉ែលប៊ន និងសេចក្តីប្រកាសចក្ខុវិស័យរបស់ថ្នាក់ដឹកនាំអាស៊ាន-អូស្ត្រាលី។
អំឡុងពេលចូលរួមកិច្ចប្រជុំកំពូលពិសេសអាស៊ាន-អូស្ត្រាលី ចាប់ពីថ្ងៃទី០១ ដល់០៧ ខែមីនា ឆ្នាំ២០២៤នេះ សម្តេចធិបតី ហ៊ុន ម៉ាណែត នឹងមានជំនួបជាមួយថ្នាក់នាំកំពូលប្រទេសជាមិត្តចំនួន៥ និងទទួលជួបតំណាងក្រុមហ៊ុនអូស្រ្តាលីចំនួន១១ផងដែរ។ នេះបើតាម លោក មាស សុភ័ណ្ឌ ប្រធានក្រុមអ្នកនាំពាក្យរបស់នាយករដ្ឋមន្ត្រី។
ជំនួបមេដឹកនាំប្រទេសជាមិត្តទាំង៥នោះរួមមាន៖
* ជំនួបទ្វេភាគីជាមួយ លោក អេនថូនី អាល់បានីស៊ី (Anthony Albanese) នាយករដ្ឋមន្ត្រីអូស្ត្រាលី
* ជំនួបទ្វេភាគីជាមួយ លោក ហ្វីឌីណាន់ រ៉ូ-ម៉ល-ដេស ម៉ាកូស ជូនៀ (Ferdinant Romualdez Marco Jr.) ប្រធានាធិបតីហ្វីលីពីន
* ជំនួបទ្វេភាគីជាមួយ លោក ចូកូ វីដូដូ (Joko Widodo) ប្រធានាធិបតីឥណ្ឌូណេស៊ី
* ជំនួបទ្វេភាគីជាមួយ លោក លី សៀន ឡុង (Lee Hsein Loong) នាយករដ្ឋមន្រ្តីសិង្ហបុរី
* ជំនួបក្រៅផ្លូវការ (Pull-Aside) ជាមួយ លោក គ្រីស្តូហ្វី ឡាក់សុន (Christopher Luxon) នាយករដ្ឋមន្ត្រីនូវែលសេឡង់។
លោក មាស សុភ័ណ្ឌ បានបញ្ជាក់បន្ថែមថា ក្រៅពីកម្មវិធីខាងលើ សម្តេចធិបតី នឹងអញ្ជើញជាអធិបតីក្នុងវេទិកាធុរកិច្ច កម្ពុជា-អូស្ត្រាលី ២០២៤ ដែលសម្តេចធិបតីនឹងថ្លែងសន្ទរកថាគន្លឹះ ស្តីពី «គោលនយោបាយសេដ្ឋកិច្ចរបស់រាជរដ្ឋាភិបាលកម្ពុជា និងទំនាក់ទំនងសេដ្ឋកិច្ចរវាងកម្ពុជា-អូស្ត្រាលី»។
បន្ថែមពីនេះ សម្តេចធិបតី ក៏នឹងទទួលជំនួបសម្តែងការគួរសមជាបន្តបន្ទាប់ ដោយបណ្តាក្រុមហ៊ុនវិនិយោគអូស្ត្រាលីធំៗប្រមាណជាង ១១ ដែលវិនិយោគលើវិស័យ សំខាន់ៗដូចជា៖ ធនាគាហិរញ្ញវត្ថុ ឧស្សាហកម្ម ឡូជីស្លឹក ថាមពលនិងឧស្ម័ន កសិកម្មនិងការកែច្នៃម្ហូប អាហារ ហេដ្ឋារចនាសម្ព័ន្ធ សុខាភិបាល និងអបរំ ជាដើម។ល។
ក្នុងឱកាសស្នាក់នៅទីក្រុងម៉ែលប៊ននេះដែរ សម្តេចធិបតី ក៏នឹងអញ្ជើញជួបសំណេះសំណាលជាមួយបងប្អូនប្រជាពលរដ្ឋសហគមន៍ខ្មែរ និងនិស្សិតខ្មែរ ដែលកំពុងរស់នៅ និងសិក្សា នៅប្រទេសអូស្ត្រាលី និងណូវែលហ្សេឡង់ផងដែរ៕

ពលរដ្ឋខ្មែរនៅអូស្ត្រាលីច្រើនកុះករ ស្វាគមន៍សម្តេចធិបតី និងលោកជំទាវបណ្ឌិត ពេលអញ្ជើញដល់អូស្ត្រាលី ប្រកបដោយភាពស្និទ្ធស្នាល
(ម៉ែលប៊ន, អូស្ត្រាលី)៖ បន្ទាប់ពីហោះរយៈពេលប្រមាណជា១០ម៉ោង នៅវេលាម៉ោងប្រមាណ៥ទៀបភ្លឺថ្ងៃសៅរ៍ ទី២ ខែមីនា ឆ្នាំ២០២៤ ម៉ោងនៅកម្ពុជា ត្រូវនឹងម៉ោងប្រមាណ៩ព្រឹក ម៉ោងនៅទីក្រុងម៉ែលប៊ន ប្រទេសអូស្ត្រាលី សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានដឹកនាំគណៈប្រតិភូជាន់ខ្ពស់របស់កម្ពុជា អញ្ជើញដល់ប្រទេសអូស្ត្រាលី ប្រកបដោយសុខសុវត្ថិភាព។
ដំណើរអញ្ជើញដល់អាកាសយានដ្ឋានអន្តរជាតិម៉ែលប៊ន សម្តេចធិបតី និងលោកជំទាវបណ្ឌិត ទទួលបានការស្វាគមន៍ប្រកបដោយភាពកក់ក្តៅពីសំណាក់លោក Tim Watts ឧបការីរដ្ឋមន្ត្រីការបរទេសអូស្ត្រាលី និងឯកអគ្គរាជទូតខ្មែរប្រចាំនៅអូស្ត្រាលី។
ដោយឡែកនៅឯកសណ្ឋាគារកន្លែងសម្តេចធិបតី និងលោកជំទាវបណ្ឌិតស្នាក់នៅឯណោះវិញ ប្រជាពលរដ្ឋ និងនិស្សិតខ្មែរ ដែលកំពុងរស់នៅ ធ្វើការ និងសិក្សារៀនសូត្រក្នុងប្រទេសអូស្ត្រាលី និងណូវែលហ្សេឡង់ជាច្រើននាក់ បានចេញមកទទួល និងស្វាគមន៍សម្តេចធិបតី និងលោកជំទាវបណ្ឌិតដោយផ្ទាល់។
ប្រជាពលរដ្ឋ និងនិសិត្សខ្មែរ បានសម្តែងក្តីសោមនស្សរីករាយ ប្រកបដោយក្តីនឹករលឹក និងគោរពស្រឡាញ់យ៉ាងជ្រាលជ្រៅចំពោះសម្តេចធិបតី និងលោកជំទាវ។ ក្នុងឱកាសនោះ ក្រៅពីការបង្ហាញក្តីនឹករលឹក សម្តេចធិបតី និងលោកជំទាវបណ្ឌិត បានអនុញ្ញាតឱ្យប្រជាពលរដ្ឋបានថតរូបជាអនុស្សាវរីយ៍ ប្រកបដោយក្តីស្និទ្ធស្នាលជាទីបំផុត៕

ខុទ្ទកាល័យនាយករដ្ឋមន្រ្តី បង្ហាញលទ្ធផលជំនួបរវាង សម្តេចធិបតី ហ៊ុន ម៉ាណែត និងនាយកគ្រប់គ្រងក្រុមប្រឹក្សាធុរកិច្ចអាមេរិក-អាស៊ាន
(ភ្នំពេញ)៖ ខុទ្ទកាល័យនាយករដ្ឋមន្រ្តី នៅយប់ថ្ងៃទី២៨ ខែកុម្ភៈ ឆ្នាំ២០២៤នេះ បានបង្ហាញលទ្ធផល នៃជំនួបរវាង សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ជាមួយលោក Brian D. McFeeters អនុប្រធានជាន់ខ្ពស់ និងជានាយកគ្រប់គ្រងក្រុមប្រឹក្សាធុរកិច្ចអាមេរិក-អាស៊ាន ដែលជំនួបនេះ បានធ្វើឡើងនៅវិមានសន្តិភាព កាលពីព្រឹកមិញ៕

ខុទ្ទកាល័យនាយករដ្ឋមន្រ្តី បង្ហាញលទ្ធផលជំនួបរវាង សម្តេចធិបតី ហ៊ុន ម៉ាណែត និងប្រធានគណៈកម្មធិការសម្របសម្រួលញត្ដិនៃសហព័ន្ធអាល្លឺម៉ង់
(ភ្នំពេញ)៖ ខុទ្ទកាល័យនាយករដ្ឋមន្រ្តី នៅយប់ថ្ងៃទី២៨ ខែកុម្ភៈ ឆ្នាំ២០២៤នេះ បានបង្ហាញលទ្ធផល នៃជំនួបរវាង សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ជាមួយលោកស្រី Martina Stamm-Fibich ប្រធានគណៈកម្មធិការសម្របសម្រួលញត្ដិនៃសហព័ន្ធអាល្លឺម៉ង់ ដែលជំនួបនេះ បានធ្វើឡើងនៅវិមានសន្តិភាព កាលពីព្រឹកមិញ៕

ក្រសួងការងារបង្ហាញក្រុមហ៊ុនជ្រើសរើស និងបញ្ជូនពលករខ្មែរស្របច្បាប់ ទៅក្រៅប្រទេស ដើម្បីទប់ស្កាត់ការធ្វើចំណាកស្រុកខុសច្បាប់
(ភ្នំពេញ)៖ ដើម្បីឱ្យប្រជាពលរដ្ឋបានយល់ដឹងកាន់តែច្បាស់ ពីការជ្រើសរើសនិងបញ្ជូនពលករខ្មែរដោយស្របច្បាប់ និងចៀសវាងការចាញ់បោកក្រុមមេខ្យល់ តាមរយៈទីភ្នាក់ងារ ឬក្រុមហ៊ុនខុសច្បាប់នានា ក្រសួងការងារ និងបណ្តុះបណ្តាលវិជ្ជាជីវៈ បានចេញការផ្សព្វផ្សាយជាផ្លូវការពីទីភ្នាក់ងារជ្រើសរើសឯកជន ដែលទទួលបានការអនុញ្ញាតឱ្យជ្រើសរើសបណ្តុះបណ្តាល បញ្ជូន និងគ្រប់គ្រងពលករខ្មែរទៅធ្វើការនៅតាមបណ្តាប្រទេសនានា មានដូចជាប្រទេសថៃ ម៉ាឡេស៊ី ជប៉ុន សិង្ហបុរី ហុងកុង អារ៉ាប់ប៊ីសាអូឌីត គុយវ៉ែត និងរដ្ឋកាតាជាដើម។
ការប្រកាសផ្សព្វផ្សាយនេះ ជាព័ត៌មានដ៏សំខាន់សម្រាប់ប្រជាពលរដ្ឋ ជាពិសេសអ្នករស់នៅតាមតំបន់ព្រំដែន ដែលចង់ទៅបម្រើការងារនៅប្រទេសនានា ដូចជា៖
១- ប្រទេសថៃ គឺមានទីភ្នាក់ងារស្របច្បាប់ចំនួន៩៧។ ពលរដ្ឋអាចចូលទៅឆែកមើលឈ្មោះក្រុមហ៊ុនទាំងនេះ តាមរយៈតំណភ្ជាប់ខាងក្រោមនេះ៖
ទីភ្នាក់ងារជ្រើសរើសឯកជនទៅធ្វើការនៅប្រទេសថៃឡង់ដ៍
២៖ ប្រទេសម៉ាឡេស៊ី មានទីភ្នាក់ងារជ្រើសរើសឯកជន និងបញ្ជូនពលករខ្មែរស្របច្បាប់ ចំនួន៩៥។ ពលរដ្ឋអាចចូលទៅឆែកមើលឈ្មោះក្រុមហ៊ុនទាំងនេះ តាមរយៈតំណភ្ជាប់ ខាងក្រោមនេះ៖
ទីភ្នាក់ងារជ្រើសរើសឯកជនទៅធ្វើការនៅប្រទេសម៉ាឡេស៊ី
៣៖ សម្រាប់ប្រជាពលរដ្ឋដែលមានបំណងចង់ទៅបម្រើការងារនៅតាមបណ្តាប្រទេសផ្សេងៗទៀតដូចជា ប្រទេសជប៉ុន សិង្ហបុរី ហុងកុង អារ៉ាប់ប៊ីសាអូឌីត គុយវ៉ែត និងរដ្ឋកាតា ដោយស្របច្បាប់សូមចូលមើលទីភ្នាក់ងារជ្រើសរើស និងបញ្ជូនពលករខ្មែរ តាមរយៈតំណភ្ជាប់ខាងក្រោម៖
ជប៉ុន សឹង្ហបុរី ហុងកុង អារ៉ាប់ប៊ីសាអូឌីត គុយវ៉ែត រដ្ឋកាតា
សូមបញ្ជាក់ថា រាល់ទីភ្នាក់ងារជ្រើសរើសឯកជនទាំងឡាយណា ដែលពុំមានឈ្មោះក្នុងបញ្ជីខាងលើនេះ គឺចាត់ទុកថាជាទីភ្នាក់ងារជ្រើសរើសឯកជនខុសច្បាប់ ដូច្នេះសូមសាធារណជនរាយការណ៍ជាបន្ទាន់ មកកាន់លេខទូរស័ព្ទ ០១៥ ៧៨៦ ៩៨៨ និងទំនាក់ទំនងមន្ទីរការងារ និងបណ្តុះបណ្តាលវិជ្ជាជីវៈទាំង២៥ រាជធានី-ខេត្ត នៅរៀងរាល់ម៉ោងធ្វើការងារ ឬពិនិត្យមើលបញ្ជីឈ្មោះក្រុមហ៊ុនដែលមាននៅក្នុងគេហទំព័ររបស់ក្រសួងការងារ និងបណ្តុះបណ្តាលវិជ្ជាជីវៈ https://www.mlvt.gov.kh។ (https://www.mlvt.gov.kh/)
ជាការកត់សំគាល់ ក្រៅតែពីការជូនដំណឹងពីការជ្រើសរើសទីភ្នាក់ងារ ដើម្បីទទួលបានការធ្វើការនៅក្រៅប្រទេស ដោយស្របច្បាប់ហើយនោះ រាជរដ្ឋាភិបាលកម្ពុជាក៏តែងតែយកចិត្តទុកដាក់ និងគិតគូរពីសុខទុក្ខរបស់ពលករខ្មែរដែលបម្រើការងារនៅក្រៅប្រទេសផងដែរ។ ជាក់ស្តែងកន្លងមក ប្រមុខរាជរដ្ឋាភិបាល តែងតែអញ្ជើញជួបសំណេះសំណាលជាមួយបងប្អូនពលករខ្មែរ នៅតាមបណ្តាប្រទេសនានាដោយផ្ទាល់ និងបានរៀបចំកម្មវិធីនានាដូចជា អាហារសាមគ្គី និងការជួបជុំសប្បាយរីករាយក្នុងពិធីបុណ្យប្រពៃណីជាតិខ្មែរជាដើម ដើម្បីបង្ហាញពីភាពស្និទ្ធស្នាលប្រៀបបីដូចជាឪពុកម្តាយ នឹករលឹកដល់កូនៗដែលបានចេញមកធ្វើការនៅក្រៅប្រទេស យ៉ាងដូច្នេះដែរ៕

វិភាគអន្តរជាតិ៖ តើលោក Macron មានផែនការបញ្ជូនកងទ័ពបារាំង ទៅជួយអ៊ុយក្រែន ឬ?
(ប៉ារីស)៖ ចាប់តាំងពីសង្រ្គាមនៅអ៊ុយក្រែនផ្ទុះឡើងកាលពីខែកុម្ភៈ ឆ្នាំ២០២២មក បារាំងតែងតែបានប្រកាន់ខ្ជាប់ជានិច្ចនូវគោលការណ៍មួយ នោះគឺ៖ «យើងគាំទ្រអ៊ុយក្រែន តែមិន ធ្វើសង្រ្គាមជាមួយរុស្ស៉ី» ហើយគោលការណ៍នេះ បារាំងបានប្រកាន់ខ្ជាប់រហូតមកដល់ថ្ងៃអាទិត្យសប្ដាហ៍មុន។ ប៉ុន្តែ កាលពីថ្ងៃទី២៦ ខែកុម្ភៈ ប្រធានាធិបតីបារាំង លោក Emmanuel Macron ហាក់ដូចជាបានគ្រវែងគោលការណ៍នេះចោល នៅពេលដែលលោកបានធ្វើការប្រកាសដ៏ភ្ញាក់ផ្អើល នៅចំពោះមុខមេដឹកនាំ២៥រូប ដែលបានចូលរួមក្នុងកិច្ចប្រជុំមួយ ដើម្បី ស្វែងរកការគាំទ្រសម្រាប់អ៊ុយក្រែន ក្នុងទីក្រុងប៉ារីសថា «ការបញ្ជូនកងទ័ពថ្មើរជើងរបស់លោកខាងលិចទៅកាន់អ៊ុយក្រែន មិនគួរត្រូវបានដកចេញពីជម្រើសនៅលើតុឡើយ ដើម្បី រារាំងកុំឱ្យរុស្ស៉ីឈ្នះក្នុងសង្រ្គាមអ៊ុយក្រែន»។ លោក Macron មិនបានបញ្ជាក់អ្វីលម្អិតទេ ឬក៏ថាតើបារាំងខ្លួនឯងនឹងពិចារណាបញ្ជូនទ័ពទៅអ៊ុយក្រែនឬយ៉ាងណានោះទេ? ដោយ គ្រាន់តែសង្កត់ធ្ងន់ពី «យុទ្ធសាស្ត្រមិនច្បាស់លាស់»។
ការអត្ថាធិប្បាយបែបនេះរបស់លោក Macron គឺជាការផ្លាស់ប្ដូរមួយគួរឱ្យកត់សម្គាល់ ដ្បិតកន្លងមក ប្រធានាធិបតីបារាំងរូបនេះត្រូវបានគេមើលឃើញថាមានជំហរទន់ភ្លន់ជាងគេ ក្នុងចំណោមមេដឹកនាំលោកខាងលិចផ្សេងទៀតចំពោះរុស្ស៉ី។ ជាឧទាហរណ៍៖ លោក Macron កាលពីខែមិថុនា ឆ្នាំ២០២២ បានព្រមានលោកខាងលិចប្រឆាំងនឹងការធ្វើឱ្យរុស្ស៉ី អាម៉ាសនៅអ៊ុយក្រែន ហើយថាគេមិនអាចបដិសេធកិច្ចសន្ទនាជាមួយលោក ពូទីន បាននោះឡើយ។ ក៏ប៉ុន្តែ ការព្យាយាមរបស់លោក Macron ក្នុងការដឹកនាំកិច្ចចរចាជាមួយលោក ពូទីន បានទទួលបរាជ័យ រីឯបណ្ដាប្រទេសជាសម្ព័ន្ធមិត្តនៅក្នុងបក្សសម្ព័ន្ធ NATO តួយ៉ាងដូចជាប្រទេសក្នុងតំបន់អឺរ៉ុបខាងកើត បានបង្ហាញការខកចិត្ត និងខឹងសម្បារនឹងលោក Macron។
ទន្ទឹមគ្នានឹងការប្រកាន់គោលជំហរទន់ភ្លន់ជាមួយរុស្ស៉ីមិនទទួលបានជោគជ័យ បារាំងក៏កំពុងប្រឈមមុខនឹងការថយចុះឥទ្ធិពលនៅក្នុងតំបន់អាហ្វ្រិកដែរ ខណៈកិច្ចប្រឹងប្រែងការទូត មួយចំនួនរបស់លោក Macron ក្នុងនោះរួមមានទាំងការស្នើឱ្យមានការបង្កើតក្រុមចម្រុះអន្តរជាតិមួយប្រឆាំងនឹងក្រុមហាម៉ាស ក៏មិនទទួលបានជោគជ័យទៅទៀត ដោយសំណើនេះ ត្រូវរលាយបាត់ទៅដោយគ្មានបន្សល់ទុកដានអ្វីទាំងអស់។ ម្លោះហើយ លោក Macron ប្រហែលជាមើលឃើញថាកិច្ចប្រជុំក្នុងទីក្រុងប៉ារីស ដើម្បីស្វែងរកការគាំទ្រសម្រាប់អ៊ុយក្រែន គឺជាឱកាសមួយឱ្យលោកស្ដារមុខមាត់របស់បារាំងឡើងវិញ។ ពោលខណៈអ៊ុយក្រែនកំពុងបាត់បង់សន្ទុះប្រយុទ្ធនៅសមរភូមិ ហើយរុស្ស៉ីកំពុងរីកចម្រើនទៅមុខ រីឯកញ្ចប់ជំនួយយោធាថ្មី របស់សហរដ្ឋអាមេរិកទំហំ ៦០ពាន់លានដុល្លារកំពុងជាប់គាំងក្នុងរដ្ឋសភា លោក ម៉ាក្រុង កំពុងសាកល្បងបំពេញចន្លោះទំនេរមួយដោយបង្ហាញឱ្យគេឃើញថាលោកផ្ទាល់ជា «រដ្ឋបុរសដ៏ក្លាហានម្នាក់របស់លោកខាងលិច» ហើយបារាំងមានការប្ដេជ្ញាចិត្តខ្ពស់ជាងគេក្នុងការដឹកនាំអឺរ៉ុបគំាទ្រដល់អ៊ុយក្រែន។
«យើងកំពុងទទួលខុសត្រូវជំនួសហរដ្ឋអាមេរិក ហើយយើងកំពុងចាប់ផ្ដើមធ្វើវាបានយ៉ាងល្អប្រសើរ»។ នេះជាការបញ្ជាក់របស់នាយឧត្តមសេនីយ៍បារាំង លោក ហ្សេរ៉ូម ពែលលីសស្រ្តង់ឌី (Jérôme Pellistrandi)»។ លោក Macron វិញក៏បានលើកឡើងក្នុងកិច្ចប្រជុំកាលពីថ្ងៃចន្ទដែរថា «សង្រ្គាមនៅអ៊ុយក្រែនគឺជាសង្រ្គាមអឺរ៉ុប» ដោយចង់សំដៅពីលទ្ធភាពនៃ ការវិលត្រឡប់មកវិញរបស់លោក ដូណាល់ ត្រាំ អាចនឹងបិទបញ្ចប់ការគាំទ្ររបស់ទីក្រុងវ៉ាស៊ីនតោនសម្រាប់ទីក្រុងកៀវ។ លោក Macron បានបន្ថែមដូច្នេះថា «តើយើងគួរតែប្រគល់ អនាគតរបស់យើងទៅក្នុងដៃអ្នកបោះឆ្នោត (ប្រជាជន) អាមេរិក ឬ? ពិតណាស់ ចម្លើយគឺមិនអាចនោះទេ មិនថាពួកគេបោះឆ្នោតឱ្យនរណាក៏ដោយ ហើយយើងមិនគួររង់ចាំអ៊ុតលទ្ធផល (បោះឆ្នោតប្រធានាធិបតីអាមេរិក) នោះដែរ។ យើងត្រូវតែសម្រេចចិត្តឥលូវនេះ»។
ចាប់តាំងពីអតីតនាយករដ្ឋមន្ត្រីអង់គ្លេស លោក Boris Johnson លាលែងចេញពីតំណែង គេសង្កេតឃើញថាមិនមានមេដឹកនាំនៅអឺរ៉ុបណាផ្សេងដែលមានវោហារសាស្រ្តប្រឆាំងដាច់ខាត នឹងរុស្ស៉ីដូចលោក Johnson នោះទេ ទោះជានាយករដ្ឋមន្ត្រីអង់គ្លេសសព្វថ្ងៃ លោក Rishi Sunak កំពុងជំរុញដល់ការបញ្ជូនយន្ដហោះចម្បាំងលោកខាងលិចឱ្យអ៊ុយក្រែនក៏ដោយ។
* ដំឡើងសាច់ដុំវោហារសាស្ត្រ
បន្តិចម្ដងៗ លោក Macron បានដំឡើងសាច់ដុំវោហាសាស្ត្ររបស់លោក។ តែក្រុមអ្នករិះគន់បែរជាយល់ថាលោក Macron និយាយផ្សេង ធ្វើផ្សិង។ តាមវិទ្យាស្ថាន Kiel មានមូលដ្ឋានក្នុង ប្រទេសអាល្លឺម៉ង់ នៅក្នុងខែកុម្ភៈនេះ បារាំងបានសន្យាផ្ដល់ជំនួយយោធាក្រោមយុទ្ធសាស្ត្រសន្តិសុខរយៈពេលវែងត្រឹមតែ ៣ពាន់លានអឺរ៉ូប៉ុណ្ណោះសម្រាប់អ៊ុយក្រែន ធៀបទៅនឹងអាល្លឺម៉ង់ ដែលបានសន្យា និងបានផ្ដល់ជំនួយយោធាសរុប ១៧.៧ពាន់លានអឺរ៉ូ ខណៈចក្រភពអង់គ្លេសបានផ្ដល់ជំនួយយោធា ៦.៥ពាន់លានអឺរ៉ុបមកទល់បច្ចុប្បន្នដល់ទីក្រុងកៀវ។
តែទោះជាបែបនេះក្ដី លោក Macron បានបង្ហាញម្ដងហើយម្ដងទៀតថាលោកមិនមានការភ័យខ្លាចនោះឡើយ ក្នុងការដើរឆ្លងបន្ទាត់ក្រហម បើទោះជារុស្ស៉ីព្រមានពីផលវិបាកធ្ងន់ធ្ងរ ក៏ដោយ។ កាលពីឆ្នាំ២០២៣ លោក Macron បានក្លាយជាមេដឹកនាំដំបូងគេដែលបានបញ្ជូនរថពាសដែកប្រយុទ្ធផលិតដោយលោកខាងលិចទៅឱ្យអ៊ុយក្រែន នោះគឺរថពាសដែកម៉ាក AMX-10 RCs ដែលមានបំពាក់កាណុង ១០៥មីលីម៉ែត្រ ជាហេតុជំរុញឱ្យបណ្ដាប្រទេសជាសម្ព័ន្ធមិត្តផ្សេងទៀតប្រញាប់ប្រញាលធ្វើតាមរូបលោកដែរ។ កាលពីថ្ងៃចន្ទ ទី២៥ ខែកុម្ភៈ ប្រធានាធិបតីបារាំងរូបនេះបានធ្វើរឿងភ្ញាក់ផ្អើលមួយទៀត ពាក់ព័ន្ធនឹងគំនិតបញ្ជូនកងទ័ពថ្មើរជើងទៅអ៊ុយក្រែន និងអំពាវនាវឱ្យបង្កើតក្រុមចម្រុះសម្ព័ន្ធមិត្តលោកខាងលិចមួយ ដើម្បី ផ្គត់ផ្គង់រថក្រោះ យន្ដហោះចម្បាំង និងមីស៊ីលចម្ងាយឆ្ងាយដល់ទីក្រុងកៀវ។ សម្រាប់លោកឧត្តមសេនីយ៍ Pellistrandi លោក Macron បានជឿជាក់យ៉ាងមុតមាំថាសន្តិសុខរបស់អឺរ៉ុប បានផ្សារភ្ជាប់យ៉ាងជ្រៅទៅនឹងសមរភូមិនៅអ៊ុយក្រែន ដោយប្រសិនបើបណ្ដោយឱ្យរុស្ស៉ីឈ្នះនៅអ៊ុយក្រែន នោះសន្តិសុខរបស់ NATO និងអឺរ៉ុបអាចនឹងស្ថិតនៅក្រោមការគំរាមកំហែងពី រុស្ស៉ី។ ម្យ៉ាងទៀត លោក Macron ក៏ចង់បញ្ជូនសារយុទ្ធសាស្ត្រដ៏រឹងមាំមួយទៅកាន់រុស្ស៉ីដែរថា៖ «កុំធ្វើអ្វីជ្រុលហួសហេតុពេក»។
យល់ឃើញស្រដៀងគ្នានេះដែរ លោក ហ្សង់ ព្យែរ ម៉ូលនី (Jean-Pierre Maulny) ជានាយករងម្នាក់មកពីវិទ្យាស្ថានបារាំងសម្រាប់កិច្ចការអន្តរជាតិ និងយុទ្ធសាស្ត្រ (IRIS) មើលឃើញថា «យុទ្ធសាស្ត្រមិនច្បាស់លាស់ ឬ strategic ambiguity» របស់លោក Macron គឺលើសពីការកំញើញទៅទៀត។ ការលើកឡើងពីការបញ្ជូនកងទ័ពថ្មើរជើងជាការប៉ុនប៉ងមួយ ក្នុងការបង្ហាញថា «យើងកំពុងរួបរួមគ្នាយ៉ាងរឹងមាំ និងជាការបញ្ជូនសារមួយទៅកាន់មូស្គូថាលើសពីការផ្គត់ផ្គង់អាវុធ ជំហានបន្ទាប់គឺការបញ្ជូនកងទ័ពថ្មើរជើង ហើយអ្នក (រុស្ស៉ី) គ្មានឱកាសឈ្នះនោះទេ»។
ក៏ប៉ុន្តែ ការលើកឡើងរបស់លោក Macron នូវគំនិតបញ្ជូនកងទ័ពលោកខាងលិចទៅកាន់អ៊ុយក្រែន បានបង្កឱ្យមានការច្របូលច្របល់ និងការខឹងសម្បារនៅក្នុងចំណោមបណ្ដាប្រទេសជា សម្ព័ន្ធមិត្តលោកខាងលិច ដោយក្នុងនោះសហរដ្ឋអាមេរិក អាល្លឺម៉ង់ ចក្រភពអង់គ្លេស អ៉ីតាលី អេស្ប៉ាញ ប៉ូឡូញ និងសាធារណរដ្ឋឆែក រួមទាំងប្រមុខអង្គការ NATO សុទ្ធតែបានដកខ្លួននៅ ឆ្ងាយពីគំនិតរបស់លោក Macron និងអះអាងថាពួកគេគ្មានផែនការ ហើយនឹងមិនបញ្ជូនកងទ័ពថ្មើរជើងទៅកាន់អ៊ុយក្រែននោះទេ។
គួរបញ្ជាក់ថា កន្លងមក លោក Macron ក៏ធ្លាប់បានបង្កភាពភ្ញាក់ផ្អើលផងដែរ ដោយលោកបាននិយាយថាអង្គការ NATO ប្រៀបដូចជាមនុស្សពិការខួរក្បាល ហើយថាអឺរ៉ុបត្រូវតែមានកងទ័ព ខ្លួនឯង នៅក្រោម «យុទ្ធសាស្ត្រស្វ័យភាព» ដោយមិនអាចបន្តពឹងផ្អែកលើសហរដ្ឋអាមេរិក ដើម្បីការពារសន្តិសុខអឺរ៉ុបបានទៀតនោះទេ។ ប៉ុន្តែដោយសារតែការជំទាស់ពីសម្ព័ន្ធមិត្តចំពោះ គំនិតចុងក្រោយបំផុតរបស់លោក លោក Macron អាចនឹងមើលឃើញខ្លួនឯងក្នុងសភាពឯកោបំផុត៕

ក្រសួងសាធារណការ ប្រជុំពិនិត្យលទ្ធភាពសិក្សាគម្រោងសាងសង់ផ្លូវល្បឿនលឿនទី៣ ភ្នំពេញ-សៀមរាប-ប៉ោយប៉ែត ក្រោមយន្តការភាពជាដៃគូរវាងរដ្ឋ និងឯកជន
(ភ្នំពេញ)៖ លោក ឡេង ធនយុទ្ធា រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានគម្រោង បានអញ្ជើញដឹកនាំកិច្ចប្រជុំពិនិត្យលទ្ធភាពសិក្សាគម្រោងសាងសង់ផ្លូវល្បឿនលឿនតភ្ជាប់ពីរាជធានីភ្នំពេញ- ខេត្តសៀមរាប-ក្រុងប៉ោយប៉ែត ក្រោមក្របខ័ណ្ឌភាពជាដៃគូ រវាងរដ្ឋ និងឯកជន ដោយមានការចូលរួមពីថ្នាក់ដឹកនាំក្រសួង លោកអនុរដ្ឋលេខាធិការ លោកអគ្គនាយក ប្រធាននាយកដ្ឋាន មន្ទីរពាក់ព័ន្ធ និងតំណាងក្រុមហ៊ុនស្ពាន និងថ្នល់ចិន (CRBC)។
កិច្ចប្រជុំនេះធ្វើឡើង នារសៀលថ្ងៃទី២៧ ខែកុម្ភៈ ឆ្នាំ២០២៤ ក្នុងគោលបំណងដើម្បីប្រមូលមតិយោបល់ ក៏ដូចជាធាតុចូល និងអនុសាសន៍បន្ថែមដល់ក្រុមហ៊ុន ដើម្បីពិនិត្យ និងកែសម្រួលឡើងវិញ ជាពិសេសក្នុងដំណាក់កាលទី១ នៃគម្រោងសិក្សាផ្លូវល្បឿនលឿនភ្នំពេញ-សៀមរាប បន្ទាប់ពីក្រសួងបានទទួលរបាយការណ៍ស្តីពីការសិក្សាលទ្ធភាពបច្ចេកទេស ដើម្បីធានាឱ្យការអនុវត្តគម្រោងទទួលបានភាពល្អប្រសើរ។
ឆ្លៀតក្នុងឱកាសនោះ លោករដ្ឋលេខាធិការ បានលើកឡើងថា ក្រសួងនឹងរៀបចំកិច្ចប្រជុំជាមួយស្ថាប័ន អាជ្ញាធរពាក់ព័ន្ធ ជាពិសេសអាជ្ញាធរអប្សរា ដើម្បីសិក្សាពីផលប៉ះពាល់ និងផ្តល់មតិយោបល់លើការសិក្សាកំណាត់ផ្លូវវាងក្រុង។
សូមជម្រាបជូនថា ក្រុមហ៊ុន CRBC គ្រោងបញ្ចប់សេចក្តីព្រាងគម្រោងសិក្សាសមិទ្ធលទ្ធភាពប្លង់វិស្វកម្មសំណង់នៅខែកុម្ភៈ ឆ្នាំ២០២៤ និងបន្ទាប់មកត្រៀមបញ្ចប់ការសិក្សាសមិទ្ធិលទ្ធភាពគម្រោង (FS) ហើយនឹងដាក់ជូន រាជរដ្ឋាភិបាល ពិនិត្យសម្រេចនាដើមខែមិថុនា ឆ្នាំ២០២៤ខាងមុខនេះ។
សម្រាប់ដំណាក់ទី២៖ សៀមរាប-ប៉ោយប៉ែត នឹងបញ្ចប់ការងារសិក្សានៅខែមីនា ឆ្នាំ២០២៤ បន្ទាប់ពីបញ្ចប់សេចក្តីព្រាងគម្រោងសិក្សាសមិទ្ធិលទ្ធភាពបច្ចេកទេសប្លង់វិស្វកម្ម និងដាក់ជូនមកក្រសួងពិនិត្យ កែសម្រួលឈានទៅបញ្ចប់នៅខែឧសភា ឆ្នាំ២០២៤ខាងមុខ៕

គណៈកម្មាធិការសម្របសម្រួលញត្តិ នៃសហព័ន្ធអាល្លឺម៉ង់ មានបំណងជំរុញកិច្ចសហប្រតិបត្តិការ លើវិស័យអប់រំ និងបណ្តុះបណ្តាលធនធានមនុស្ស និងវិស័យសុខាភិបាលជាមួយកម្ពុជា
(ភ្នំពេញ)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា នារសៀលថ្ងៃទី២៨ ខែកុម្ភៈ ឆ្នាំ២០២៤ បានអនុញ្ញាតឲ្យលោកស្រី Martina Stamm-Fibich ប្រធានគណៈកម្មាធិការសម្របសម្រួលញត្តិ នៃសហព័ន្ធអាល្លឺម៉ង់ និងគណៈប្រតិភូ ចូលជួបសម្តែងការគួរសម និងពិភាក្សាការងារ។
ក្នុងឱកាសនៃជំនួបនេះ លោកស្រី Martina Stamm-Fibich បានសម្ដែងនូវការថ្លែងអំណរគុណយ៉ាងជ្រាលជ្រៅចំពោះ សម្តេចធិបតី ដែលបានចំណាយពេលដ៏មមាញឹក អនុញ្ញាតឲ្យរូបលោកស្រី និងគណៈប្រតិភូ បានចូលជួបសម្ដែងការគួរសម និងពិភាក្សាការងារ។
លោកស្រីប្រធានគណៈកម្មាធិការ បានគោរពជម្រាបជូន សម្តេចធិបតី ថាគោលបំណងនៃដំណើរទស្សនកិច្ចរបស់លោកស្រី និងគណៈប្រតិភូ នាឱកាសនេះ គឺដើម្បីពង្រឹង និងពង្រីកទំនាក់ទំនង និងកិច្ចសហប្រតិបត្តិការ រវាងប្រទេសទាំងពីរ ឲ្យកាន់តែរឹងមាំបន្ថែមទៀត ជាពិសេសកិច្ចសហប្រតិបត្តិការលើវិស័យអប់រំ និងការបណ្ដុះបណ្ដាលធនធានមនុស្ស និងវិស័យសុខាភិបាល ដោយសារតែវិស័យ ទាំងពីរនេះ មានសារៈសំខាន់ ក្នុងការបម្រើដល់សេចក្តីត្រូវការចំបាច់របស់ប្រជាពលរដ្ឋ និងផ្តល់នូវផលប្រយោជន៍ទៅវិញទៅមក ដល់ប្រទេសទាំងពីរ។ ជាក់ស្តែង បច្ចុប្បន្ននេះ សហព័ន្ធអាល្លឺម៉ង់ ក៏កំពុងជួបប្រទះនូវកង្វះខាតធនធានមនុស្សបម្រើការក្នុងវិស័យសុខាភិបាល និងកម្មករជំនាញផងដែរ។
ជាការឆ្លើយតប សម្តេចធិបតី ហ៊ុន ម៉ាណែត បានសម្តែងនូវការស្វាគមន៍ ចំពោះលោកស្រីប្រធានគណៈកម្មាធិការ និងនិងគណៈប្រតិភូ ដែលបានអញ្ជើញមកបំពេញទស្សនកិច្ចនៅកម្ពុជា នាឱកាសនេះ និងបានបញ្ជាក់អំពីចំណងនៃទំនាក់ទំនងការទូតរវាងកម្ពុជា និងអាល្លឺម៉ង់ ដែលមានរយៈពេលជាង៥ទសវត្សរ៍ ហើយឆ្នាំនេះគឺជាឆ្នាំទី៥៧ នៃទំនាក់ទំនងការទូតរវាងប្រទេសទាំងពីរ។
បន្ថែមលើនេះ សម្តេចធិបតី ក៏បានសម្ដែងនូវកាអរគុណចំពោះរដ្ឋាភិបាល និង ប្រជាជនអាល្លឺម៉ង់ ដែលបានចូលរួមចំណែកនៅក្នុងការកសាងប្រទេសកម្ពុជា ជាពិសេសក្រោយពីសង្គ្រាម ដែលផ្ដោតទៅលើវិស័យអប់រំ ការកសាងធនធានមនុស្ស ក៏ដូចជាលទ្ធិប្រជាធិបតេយ្យផងដែរ។
សម្តេចធិបតី បានបញ្ជាក់ថា ដំណើរទស្សនកិច្ចរបស់លោកស្រី និងគណៈប្រតិភូនាឱកាសនេះ ក៏បានបង្ហាញអំពីទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ ទាំងនៅក្នុងក្របខ័ណ្ឌនីតិប្រតិបត្តិ និងនីតិប្បញ្ញត្តិ ហើយសម្តេចធិបតីសង្ឃឹមថាទំនាក់ទំនង និងកិច្ចសហប្រតិបត្តិការនេះ នឹងបន្តការពង្រឹង និងពង្រីកបន្ថែមទៀត។
ឆ្លើយតនឹងបំណងរបស់លោកស្រី ក្នុងការជំរុញការពង្រីកកិច្ចសហប្រតិបត្តិការរវាងកម្ពុជា និងអាល្លឺម៉ង់ លើវិស័យអប់រំ និងការណ្តុះបណ្តាលធនធានមនុស្ស ក៏ដូចជាវិស័យសុខាភិបាល សម្តេចធិបតីបានស្វាគមន៍ និងបានគូសបញ្ជាក់ថា គោលនយោបាយរបស់រាជរដ្ឋាភិបាលកម្ពុជានីតិកាលទី៧ នៃរដ្ឋសភា គឺផ្តោតលើការជំរុញកំណើនសេដ្ឋកិច្ច ដោយផ្អែកលើធនធានមនុស្ស ព្រមជាមួយគ្នានេះ រាជរដ្ឋាភិបាល ក៏បានយកចិត្តខ្លាំងក្នុងការពង្រឹងវិស័យសុខាភិបាល និងការបណ្ដុះបណ្ដាលធនធានមនុស្ស និងជំនាញវិជ្ជាជីវៈទៅដល់ប្រជាពលរដ្ឋកម្ពុជា ព្រោះវាកត្តាដ៏សំខាន់ក្នុងការអភិវឌ្ឍសង្គម-សេដ្ឋកិច្ច។
សម្តេចធិបតី ហ៊ុន ម៉ាណែត ក៏បានលើកទឹកចិត្តឲ្យស្ថាប័នជំនាញពាក់ព័ន្ធ នៃប្រទេសទាំងពីរបន្តពិភាក្សា និងសហការគ្នា ក្នុងការរៀបចំជាយន្តការ និងផែនការ ដើម្បីជំរុញកិច្ចសហប្រតិបត្តិការលើវិស័យទាំងពីរ។
ជាទីបញ្ចប់ សម្តេចធិបតី ហ៊ុន ម៉ាណែត បានជូនពរ លោកស្រី Martina Stamm-Fibich ប្រធានគណៈកម្មាធិការសម្របសម្រួលញត្តិនៃសហព័ន្ធអាល្លឺម៉ង់ និងគណៈប្រតិភូ ឲ្យទទួលបានជោគជ័យ នៅក្នុងដំណើរទស្សនកិច្ចនៅកម្ពុជា និងធ្វើមាតុភូមិនិវត្តន៍ប្រកបដោយសុខសុវត្ថិភាព៕

មន្ដ្រីជាន់ខ្ពស់ក្រសួងកសិកម្ម៖ ប្រជាពលរដ្ឋ៩០% នៅតំបន់ឃុំផាត់សណ្ដាយ ខេត្ដកំពង់ធំ ជាអ្នករករបរនេសាទ, មួយគ្រួសារ ពឹងផ្អែកលើមួយឧបករណ៍
(ភ្នំពេញ)៖ លោក ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យ នៃក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ឲ្យដឹងថា ប្រជាពលរដ្ឋចំនួនប្រមាណ៩០% នៅក្នុងតំបន់ ឃុំផាត់សណ្ដាយ ខេត្ដកំពង់ធំ ជាអ្នករករបរនេសាទ ដោយមួយគ្រួសារ ពឹងផ្អែកលើមួយឧបករណ៍។
ការបញ្ជាក់ឲ្យដឹងបែបនេះ ធ្វើឡើងក្នុងសន្និសីទសារព័ត៌មាន ស្ដីពី ស្ថានភាពនេសាទ នៅតំបន់ឃុំផាត់សណ្ដាយ ស្រុកកំពង់ស្វាយ ខេត្ដកំពង់ធំ ដែលរៀបចំដោយ ក្រសួងកសិកម្ម រុក្ខាប្រមាញ់ និងនេសាទ នៅរសៀលថ្ងៃទី២៨ ខែកុម្ភៈ ឆ្នាំ២០២៤។
ការរៀបចំសន្និសីទសារព័ត៌មាននេះ ក្នុងគោលបំណងដើម្បីពន្យល់បន្ថែម ជុំវិញការដាក់របាំងសាច់អួន និងលបនៅក្នុងបឹងទន្លេសាប នៅតំបន់ឃុំផាត់សណ្ដាយ ស្រុកកំពង់ស្វាយ ខេត្ដកំពង់ធំ បន្ទាប់ពីមានការបង្ហោះរូបភាព នៃការដាក់របាំងសាច់អួន និងលបដ៏ញឹក ហើយរងនូវការរិះគន់ពីសំណាក់អ្នកប្រើប្រាស់បណ្តាញសង្គម Facebook។
លោក ឃឹម ហ្វីណង់ បានបញ្ជាក់ថា «សំនួរយើងសួរថា តើអ្នកណាជាអ្នកដាក់ឧបករណ៍ នៅក្នុងតំបន់នេះ? តំបន់នេះ ស្ថិតនៅក្នុងឃុំផាត់សណ្ដាយ ហើយឃុំនេះ គឺឃុំនេសាទតែម្តង ដែលមានប្រជាពលរដ្ឋ ចំនួនប្រហែល៦ពាន់នាក់ ដែល៩០ភាគរយ នៃប្រជាពលរដ្ឋនៅទីនេះ គឺជាអ្នករករបរនេសាទ»។
បន្ថែមពីនោះទៀត លោកបានបញ្ជាក់ថា ក្រសួងបានព្យាយាមគ្រប់គ្រងទិន្នន័យ នៃឧបករណ៍ដែលប្រើប្រាស់នៅក្នុងតំបន់នេះ ដោយឃើញថា ចំនួនរបាំងមានការប្រែប្រួល រវាងខែវស្សា និងខែប្រាំង តែជារួមមួយគ្រួសារ ឬក៏ម្នាក់ មានប្រហែលជាមួយឧបករណ៍តែប៉ុណ្ណោះ។
លោក ឃឹម ហ្វីណង់ បានលើកឡើងថា «បើសិនជាបងប្អូនឃើញឧបករណ៍ច្រើន គឺគ្រួសារមួយគ្រួសារ គឺពឹងផ្អែកឧបករណ៍មួយនោះឯង»។ បើតាមទិន្នន័យដែលក្រុមការងារ បានព្យាយាមប្រមូលមក គឺក្នុងមួយថ្ងៃ គ្រួសារដែលមានឧបករណ៍នេះ អាចរកបានចំណូលត្រឹមតែ៧ទៅ៨ម៉ឺនរៀល ក្នុងមួយថ្ងៃតែប៉ុណ្ណោះ។
លោកបានអះអាងថា នៅក្នុងតំបន់នេះ គឺមិនមានការដាក់ឧបករណ៍ខុសច្បាប់ ក្នុងទ្រង់ទ្រាយពាណិជ្ជកម្មទេ តែអ្វីដែលមាន គឺជាការប្រើប្រាស់ឧបករណ៍ស្របច្បាប់ក្នុងទំហំតូច ត្រឹមមួយគ្រួសារមួយឧបករណ៍ ដើម្បីគ្រាន់តែបានត្រីបរិភោគ ដើម្បីបានត្រីយកទៅលក់ ដើម្បីបានជាប្រាក់ចំណូលមកទ្រទ្រង់ជីវភាពប្រចាំថ្ងៃ ដើម្បីបានប្រាក់ចំណូល និងដើម្បីបញ្ជូនកូនទៅសាលារៀន តែប៉ុណ្ណោះ។
ទន្ទឹមគ្នានេះ លោក ឃឹម ហ្វីណង់ ក៏បានបញ្ជាក់ផងដែរថា បងប្អូនប្រជាពលរដ្ឋ នៅក្នុងតំបន់ផាត់សណ្ដាយនេះ មិនមានដីធ្វើស្រែចម្ការ ធ្វើកសិកម្មទេ ដូច្នេះបើសិនជាមិនឲ្យគាត់ពឹងផ្អែក លើតំបន់នេះទេ គឺគាត់មិនមានប្រាក់ចំណូលទាល់តែសោះ៕