Arts at home تعليم رسم وفنون يدوية وفوتوشوب

ليه البهدلة دي يا جماعة

في مسلسل عمر افندي، احمد حاتم بيبقى مطلوب منه يسرق لوحة زهرة الخشخاش فان جوخ من متحف محمد محمود خليل... والحقيقي احنا بهدلنا اللوحة دي بشكل محصلش قبل كدا.. فتعالى احكيلك حكاية غريبة قوي..

فان جوخ.. اكيد انت سمعت الاسم دا.. اكيد انت وقعت في لوحة من لوحاته.. الراجل دا قصة حياته عظيمة وماسأوية وكئيبة وفيها عبر الدنيا والأخرة.. ولما حاجة من ريحته جات مصر.. بهدلناها..

جوخ اتولد في هولندا سنة 1853.. وانتح*ر وهو عمره 37 سنة بس.. رسم اكثر من 860 لوحة.. مباعش في حياته الا لوحة واحدة بس .. بفلوسها دخلوه مصحة نفسية.
جوخ مرسمش من وهو صغير.. لا ابسلوتلي... بدأ الرسم من سن 27 سنة.. يعني كل اللي رسمه في عشر سنين.. يعني تقريبا بيرسم لوحتين في الأسبوع.. ومع الشغل اللي بالعظمة دي.. تعرف قد ايه الراجل دا عبقري.

حبيبة فان جوخ اسمها اورسولا.. دي بنت الست اللي اشتغل عند أمها فترة .. اول ما صارحها بحبه رفضته وصدته .. ساب لندن وفضل يرسم ويطور نفسه.. وبعدين راحلها برسوماته .. اهو معندكيش حجة .. يا أورسولا ..صدته اكتر وهزقته وقالتله ان شكله مخيف وانها لا يمكن تحبه.. اه يا بنت الغدارة يا اورسولا ..

ساعتها بقي اشتغل يرسم شحاتين متسولين فقراء.. الفترة دي رسم المعاناة.. وكتب لاخوه رسالة قاله فيها "وظيفة الفن هي تقديم المواساة لمن حطمتهم الحياة".. اه زيك انت كدا.

جوخ كان مصاب بالصرع.. لدرجة انه في مرة كان هياكل لوحة من لوحاته في نوبة من نوبات الصرع.. بعدين قابل فتاة ليل شبه اورسولا.. وفضلت تسمعه وتسمع قصصه.. فقالها تتجوزيني فقالتله لما تديني ودنك الحمرا دي.. اللي هو لما تشوف ح**ة ودنك.. فجوخ قطع ودنه الشمال... عشان يقدمها لشبيهة أوروسولا.

انت تعرف هو دخل المستشفى ازاي؟

سكان المنطقة اللي ساكن فيها.. وقعوا عريضة ومضوا عليها عشان يدخل المستشفى بالقوة عشان الارتباك وعدم الاتزان اللي كان عايش ومعيش جيرانه فيهم.

وسط كل الاحباطات دي.. مكانش حد واثق في جوخ وبيسأل عليه وبيوده غير اخوه ثيو.. لذلك هتلاقي جوخ بيحكي لثيو في رسايله كل حاجة.. رسايل جوخ لثيو اتوثقت في كتاب مهم جدا...

المهم، فان جوخ مسك المسدس وضرب نفسه بالنار.. وقال ساعتها الجملة الشهيرة "لن ينتهي البؤس ابدا"، وفي ناس تانية بتقول انه قال "سيستمر الحزن للأبد"... وات ايفر اهو كله نكد.

المحزن أكتر ان ثيو اخوه مات بعده بست شهور... وبعدين نقلوا رفاته جنب اخوه.

اللي جمع لوحات فان جوخ هي جوانا ودي تبقي مرات اخوه ثيو .. راحت بيها على معرض في باريس.. اللوحات اتشهرت جدا .. ويصنف جوخ واحد من اصحاب اغلى اللوحات في التاريخ.. لوحة من لوحاته اتباعت ب 82 مليون دولار .. وواحدة تانية ب 53 مليون دولار.. بس للاسف هو مشافش اي حاجة من دا.

ومعظم اعماله معروضة في متحف فان جوخ في امستردام .. ودا بيزوره ملايين سنويا من كل انحاء العالم.

اللوحة بتاعت الورود الصفراء دي اسمها لوحة زهرة الخشخاش... وتمنها ٥٥ مليون دولار.. الله دي فين دي .. قالك في مصر في متحف محمد محمود خليل .. أو كانت في مصر .. اللوحة دي اتسرقت اكتر ما اتبني كباري في مدينة نصر.. وأهمية اللوحة دي انها اترسمت قبل انت*حار فان جوخ بـ ٣ سنين.. وأنها نقطة تحول في رسوماته.
اتعرضت اللوحة لسرقة غامضة في 4 يونيو 1977 .. ورجعت للمتحف تاني بعد شهر او اتنين أو ١٠.. لا بعد ١٠ سنين .. كانت فين .. كانت في الكويت ... وقالك يقال أن اللي لقوها في الكويت نسخة مضروبة.. وان النسخة الأصلية محدش يعرفها فين.. ويقال انها اتباعت في بريطانيا عن طريق مزاد... واتعمل عن السرقة دي فيلم ليحيى الفخراني.. اسمه وتمت أقواله سنة 1992. فيلم حلو ومش مشهور للفخراني..

سنة 2003 اتعرض فيلم حرامية في تايلاند، وبيحكي عن سرقة زهرة الخشخاش. .. باعتبار أنها حصلت قبل كدا يعني وكدا.. لكن سنة 2010 اللوحة تتسرق تاني ..

واللي حصل أن في 23 أغسطس 2010 .. تم اعلان حالة طوارئ في جميع مخارج مصر وجميع المطارات وساعتها وزير الثقافة فاروق حسني قال للصحفيين في مؤتمر اقامه بعد الإعلان عن حادثة السرقة ان تم حبس مسؤولين كبار على خلفية اختفاء زهرة الخشخاش... منهم وكيل أول وزارة الثقافة ورئيس قطاع الفنون التشكيلية محمد محسن عبد القادر شعلان وأربع مسؤلين لمدة أربعة ايام على ذمة التحقيق وبعدين اتحكم عليهم بالحبس مع الشغل 3 سنوات وكفالة 10 آلاف جنيه لإيقاف التنفيذ.. يا بلاش والله..

الغريب إن اللوحة اتسرقت في أوقات العمل الرسمية .. كان في المتحف ٩ اجانب.. السارق طلع كاتر.. قص اللوحة وساب البرواز فاضي.. يعني لو كتبتها في فيلم .. الناس هتضحك من هبل الطريقة..

مش بس كدا .. دول شكوا في اتنين إنهم سارقين اللوحة وطالعين على ايطاليا .. بهدلوهم وطلعوا عين اللي خلفوهم.. وطلعوا ملهمش اي علاقة باللوحة..

طيب تسألني اللوحة فين .. اقولك والله ما اعرف ولا حد يعرف .. محدش يعرف مكان اللوحة لغاية دلوقتي .. لوحة بالأهمية دي جات مصر .. واتسرقت .. مش مرة .. لا مرتين .. اه والله.

مهرب الآثار البريطانى الشهير كوكلى بارى، فى تصريحات صحفية بإحدى الصحف البريطانية .. ودا نقلته اليوم السابع .. قال "لوحة زهرة الخشخاش موجودة حاليًا فى لندن وأنها خرجت من مصر بعلم كبار رجال الدولة فى عهد مبارك " بس رفض الإفصاح عن أسمائهم.

وقال ان اللوحة اتهربت باستخدام الأسيتون، ازاي ؟ عارف الاسيتون اللي بيشيلوا بيه المناكير.. بيجي فنان يحط اسيتون ع اللوحة وبعدين يرسم عليها.. ويطلع من المطار يشيل طبقة الاستيون.. فترجع اللوحة الأصلية .. خطة في منتهى الآيتونز.

شاكر عبد الحميد وزير الثقافة سنة 2012 الله يرحمه، قال إنه اتصل بيه واحد من بريطانيا وقاله اللوحة هنا في بريطانيا لو عايزها ادفع فلوسها وخدها، بس الوزير قاله سوري اي كانت بيكوز ايام نوت.

في سنة 2014، اشتري رجل الأعمال الصيني وانج زنغجون اللوحة من مزاد سوزبي .. بـ 88 مليون دولار.. لكن وزارة الثقافة قالت إن اللي اتباعت دي مش لوحتنا وان دي لوحة تانية لـ فان جوخ.. ولوحتنا احلى بس تايهة

طيب هي اللوحة جات مصر ازاي اصلا؟ اللوحة اشتراها محمد محمود خليل وضمها لمجموعته الفنية فى بيته بـ الزمالك، واللي اتحول بعد وفاته لمتحف فيه أكثر من ٣٠٠ لوحة لفنانين عالميين تقدر قيمتها بأكثر من ٢ مليار دولار..

طيب بما انك قريت كل دا .. خد القصة المضحكة دي.. فى عام 1977، لما اتسرقت اللوحة اول مرة .. اتسلل اللص المحترف حسن العسال.. (بكتب عنه في كتاب ممكن يصدر قريب) ... للمتحف في الليل.. طلع اللوحة من البرواز.. وسلمها لمرشد سياحي.. والمرشد حطها في جيب سري في شنطة أخوه المسافر للكويت، والشنطة عدت من مطار مصر ومطار الكويت .. من غير ما اخوه يعرف ولا شرطة البلدين يعرفوا... وبقت اللوحة مع الراجل في الكويت سنة كاملة من غير ما يعرف..

طيب حسن العسال عمل كل دا بكام .. بـ الف جنيه بس.. ساعتها كان مبلغ حلو يعني .. احنا سنة ٧٧.. المهم يعني بعد ١٠ سنين قرر العسال يتوب عن السرقة.. وفضل على علاقة كويسة بظابط شرطة.. فبيفضفض مع الظابط.. قاله دا انا مرة سرقت لوحة هبلة من متحف محمود خليل.. وبعتها لمرشد اهبل بالف جنيه.. الظابط جاب المرشد السياحي .. علقه في الفلكة.. لحد ما اعترف .. وبعدين سافر ظابط مصري استلم الحقيبة باللوحة. .. ورجعوا اللوحة من الكويت.. وبرضه من غير ما شرطة الكويت ما تعرف في المرتين.. عافية عليهم شرطة الكويت والله.

الله يرحمه فان جوخ .. لو شاف اللي حصل في لوحاته عندنا.. والله كان انت*حر تاني.

Available for sale.......................................
Medium: Pastel colour
Size: (50×35)cm

in

مشروع التخرج مسرح عرائس قصة علاء الدين والمصباح السحري
٣مشاهد و٦شخصيات وبوستر للمسرحية

لقطة من ممر بهلر في قلب وسط البلد بالقاهرة
و"بهلر" هو ممر تجاري شهير يصل بين شارعي طلعت حرب و قصر النيل يحمل آثار القاهرة الخديوية القديمة، سمي الممر بهذا الإسم نسبة إلى رجل الأعمال السويسري تشارلز بهلر اللي جاء الى مصر سنة 1885 والذى أسس سلسة فنادق وعقارات بمدينة القاهرة وهو صاحب أشهر ممر وعمارة وفندق، في وسط البلد

الناس اللي مدمنين شاي العروسة نخلي بالنا لان الفترة دي فيه كمية شاي مضروبة قي السوق بشكل مش طبيعي
… النهاردة جهاز حماية المستهلك ضبط مصنع يعيد تصنيع وتعبئة الشاي من مواد ضارة وغالبا بيكون فيها مواد معدنية زي برادة الحديد ونشارة خشب عليها ورنيش اسود والمواد دي مسرطنه
طب نتأكد ازاي ان مفيش برادة حديد في الشاي .. ببساطة خالص هنمشي ملقاط مغناطيسي علي الشاي لو فيه برادة هتطلع مع الملقاط ووقتها اتخلصوا من الشاي لانه مضر جدا بصحتك شيييير واب وعرف غيرك @أبرز المعجبين

صورة من ١٩٨٤ للفنان الراحل "هاني المصري" مع شخصية "كيمو كونو"
شخصية كيمو ابتكرها الفنان هاني المصري ونفذها النحات عبد العزيز صعب عشان تكون وجه إعلاني لعلامة الآيس كريم اللي أطلقتها جروبي واشترتها بعد كدة نستله.