Mr.Nutrition

مسا الخير جميعا
ضمن سلسلة و بعد ما حكينا هيك عالسريع عن البروتين ح نحكي اليوم عن واحد من اكتر المكملات الي بصير عليها اسئلة سواء من الشباب او البنات .
🔥 هل هي فعالة ؟ و لاي مدى ؟ و مضرة ؟ و كيف نستخدمها؟؟
بداية شو هية حوارق الدهون و شو تركبيتها؟؟
حوارق الدهون بشكل عام بتحتوي عكمية كبيرة من الكافيين و بعض المواد المستخلصة من بعض انواع النبات متل الشاي الاخضر و الماكا و هالشلة و احيانا بعض الفيتامينات و المواد الداعمة لعمل الغدة الدرقية و المحسنة للمزاج ؛ يعني فعليا تركيبتهن مانها سيئة .

كيف مبدأ عملو؟
بشكل عام المواد متل الكافيين الي فيه بترفع ضربات القلب و معدلات الاستقلاب و بالتالي بترفع من معدل الحرق .

لاي درجة هو مفيد؟
اولا دون نظام غذائي مدروس الحوارق حقا فرنك ما بتشتغل و لما بتعمل نظام و بفرض انك عم تنزل ٥٠٠ غ دهون اسبوعيا مع الحوارق ممكن يصيروا حوالي ٦٠٠ غ بالاسبوع وسطيا ... إضافة مو سيئة بس مانها كبيرة.

الو اضرار ؟
بشكل عام هو آمن بس يستحسن في حال وجود امراض قلبية او اي شي بالدورة الدموية ما تستخدموهن بنوب ... و ضررو التاني انو مع الوقت الجسم بيتعود عجرعات الكافيين هي و بصير بدكن ترفعوا الجرعة لتاخدوا الفايدة و حاولوا ما تتخطوا الجرعة المذكورة عالعلبة نهاااائيا .... و من آثارو الجانبية انو ممكن يعمل اضطرابات بالنوم 👌

رأيي الشخصي فيه :
ماني ضدو بس ما بحب استخدامو الا عند الحاجة الملحة و توافر القدرة المادية لشراؤو مع نظااام اكل صح ليعطيكن نتيجة تفيدكن .

هي كانت نهاية مقالنا لليوم تاغ لرفقاتكن يستفيدوا و ما تنسوا اللايك للصفحة و البوست لتصلكن بقية السلسلة🔥💪
موفقين
*ملاحظة: السلسلة لا يقصد بها الترويج لأي منتج*
💙

مسا الخير
و آسف عالانقطاع بالفترة الاخيرة بسبب ضغط الشغل و الدراسة 🙏
بالمقال التاني من سلسلة متل ما اتفقنا نحكي عن توقيت استخدام البروتين و استخدامو بالنسبة للشباب و البنات .
السؤال الاهم بهل النقطة بيتعلق بالبنات ... كوتش صحي اذا شربنا بروتين بيطلعلنا عضلات و بنضخم و بصير شكلنا بشع ؟؟ 🙄

الجواب لا اطمنوا ... البروتين بالنهاية مكمل غذائي ما ح يقدم و لا ح ياخر بشكل كبير بالذات للبنات ... عم يحترق نفسنا كشباب الي جسمنا مهيئ بيولوجيا و هرمونيا اكتر منكن الف ضعف لنطلع عضلتين فاطمنوا🤣
طيب ضروري ناخدو كشباب او بنات؟؟
الجواب لا مو ضروري و لا تتوقعوا نتايج سحرية منو ... بالنهاية كفوايد علبة التونة افضل من مكيال البروتين .
بنجي للعالم الي عندها القدرة المادية تشتريه و مزبطة اكلها و ناقصها شوية ماكروز بسعراتها بدها تجيبن من المكمل :
المكمل بيستخدموه شباب و بنات .
و غالبية الانواع افضل اوقات استخدامها بين الوجبات و بعد التمرين
ما عدا بروتين الكازين الي حكينا عنو سابقا يفضل استخدامو قبل النوم او احيانا في عالم بتشربو عالسحور قبل الصيام لانو امتصاصو بطييئ جدا على عكس الانواع السريعة التانية .
من اهم الملاحظات انو لما بتاخد البروتين لا تشيل وجبة لتنزلو محلها لانو انت هيك ضريت حالك ما استفدت .
يعني لا تشيل علبة التونة او الجاج و المعكرونة او الرز بعد تمرينك مثلا لتنزل محلن موزة و سكوب بروتين و تقول يلا ها خالصين . بدك تشربو و تاكل وجبتك لتضمن الفايدة القصوى منو ..يعني المفروض انك #تزيدو ع اكلك مو #تبدلو باكلك

اديش ناخد كل يوم؟
مكيال او مكيالين ماكسيمم ما بتعتاز اكتر اما اذا النقص ببرنامجك بدو اكتر من هيك فصار اسمك عايش عالبروتين و اكلك كلو مفشكل ارجاع زبط اكلك .
المختصر ممكن ناخد سكوب مع السناك بين الفطور و الغدا و سكوب بعد التمرين
او ممكن ناخد بس سكوب بعد التمرين و خالصين 🔥💪
هي كانت نهاية مقالنا لليوم تاغ لرفقاتكن يستفيدوا و ما تنسوا اللايك و الكومنت عالبوست و الصفحة لتصلكن بقية السلسلة🔥💪
موفقين 💪
💙

مسا الخير
موضوع اليوم ح يكون عن سلسلة جديدة حتبلش تنزل عالصفحة 👏👏
فيكن تتابعوها من هاد الهاشتاغ

حنحكي فيا عن المكملات بشكل عام و بالتفصيل قدر المستطاع .
تاغوا لرفقاتكن و ارفعوا البوست و خلونا نبلش الاكشن.

كبداية حنبلش باكتر مكمل معروف نسبيا و الي هو

شو هو مكمل البروتين او مصل الحليب ؟؟ 🙄

الحليب بشكل عام فيو نوعين من البروتين ...الواي ٢٠٪ و الكاسين٨٠٪ تقريبا (و حنحكي بالتفصيل انشالله)
الواي بينتج لما بيتخثر الحليب بعملية انتاج الجبنة و بتوقع اذا حدا فيكن بزمانا والدتو او ستو عاملة جبنة ع ايدها بيطلع سائل اصفر شفاف و طعمو حامض ...هاد هو الواي بروتين ( جربتو مرة من بشكل منزلي حشا النعمة ما بينحط بالتم مو نصيحة بنوب الوضع كارثي🤣)
المهم هالشركات بتجيب هالحليب بتطالع منو هالبروتين و بتعالجو و بتعملو بودرة و بتضفلو منكهات و بتعبيه و بيصللنا هي بشكل مختصر .
هالبروتين الو انواع كتير 👌و اكيد سمعانين بالايزو و الكونسنتريت و الهايدرو و الكاسين و هالشلة ... بس شو الفروقات فين ؟
هات لنبلش ...ركزوا معي 👌

١_الايزوليت او المعزول :
يعتبر انقى الانواع نسبيا و كل ١٠٠ غ بودرة بتحتوي عحوالي ٩٠ لل٩٥غ بروتين تقريبا !! (حسب الشركة)
و طبعا بتم محاولة انقاص نسبة الفات و الكاربوهيدرات فيه و محاولة تحقيق اعلى تسبة جودة و نقاوة 🔥💪

٢_الكونسنتريت :
اكتر الانواع انتشارا و و انسبها سعرا و فعليا هو النوع المألوف و المستخدم بغالبية انواع البروتين الي بالسوق
نسبة البروتين بتتراوح بين ٢٩ ٪ لل٨٥٪ تقريبا (و غالبا لما بنشتري واي بروتين فالنسبة بتكون داير ٨٠٪ اكيد ما نم يبيعوك تبع ال٣٠٪ 😆) و بيحتوي عكمية بسيطة كربوهيدرات و فات .

٣_ الهايدرولايزد (القنبلة) :
يعتبر غالي نسبيا و فينا نعتبرو بيتماشى مع مبدأ النوعين الماضين بس هالمرة بكون في هضم و تفكيك جزئي للبروتين هاد ضمن تركيبتو و هالشي بخلي امتصاصو اسرع بكتير من النوعين التانيات و هاد السبب الي بخليه غالي .
و برايي هالميزة ما كتير بتستاهل تدفع فرق السعر الا اذا كنت مرتاح زيادة بامورك المادية.

٤_ الكازين :
كمان نوع دارج و بتوقع بفترة رمضان كتير بتحضروا اعلانات عنو .
هاد عبارة عن بروتين بطيئ الامتصاص الجسم بيحتاج بين ٦ ل ٨ ساعات ليهضمو و يمتصو و بالتالي تعتبر فترات الانقطاع عن الاكل افضل الاوقات لاستخدامو .

لهون بنكون خلصنا اول جزء من المقال و انشالله قريبا حنكمل بالسلسلة ...خلولي اسئلتكن بالتعليقات و لا تنسوا اللايك للصفحة و البوست و تخلوا كومنت عالبوست و تاغ لرفقاتكن لتصلكن بقية السلسلة
حنحكي بالمقال الجاية عن استخدام هالانواع للشباب و البنات و افضل توقيت للاستخدام انشالله 🔥💪

بالتعليقات صور للمعلومات الغذائية عبعض العلب حسب النوع 👇

💙

مسا الخير جميعا
مقالنا اليوم حنحكي فيه عن حميات النوع الواحد او نوعين من الاكل
بين قوسين حمية المي و حمية تمر و حليب و حمية الكرز و حمية التفاح و حمية القطن و حمية كنزات الصوف و هالشلة العاطلة🙂🤦‍♂️
قاعدة عامة :
أي حمية غذائية بتعتمد ع صنف او تنين من الاغذية او عإلغاء صنف كامل من المغذيات بشكل تام تعتبر فاشلة نقطة آخر السطر ...
# هي الكيتو فيو الغاء للكربوهيدرات يعني ضدو انت؟؟
اولا الكيتو بكون ٥% كارب مو الغاء تام... و اصلا شبه مستحيل تمشي زيرو كارب ... و تانيا حركة غبية جدا تمشي زيرو كارب بالوضع الطبيعي (امور البطولات ببعض مراحلها الحساسة موضوع تاني)
انا مع الكيتو و بحبو بس بحالات خاصة و ظروف معينة و سبق و حكيت عنو بمقال سابق... السياراة ما بينحطلها مي ... بينحطلها بنزين فما فيك تقول عن واحد من التنين عاطل ... كل شي الو وقتو و استخدامو و نفس الحكي بالنسبة للكيتو .
بنرجع لموضوعنا ....
الدايتات الي انذكرت فوق غبية لدرجة مستفزة و المشكلة انو كتار بنات بينجروا ورا هالخزعبلات .
هي الحميات فقيييييرة جدا بالمغذيات عكافة الصعد و الجسم لما بينزل وزن فبكون عم ينزل وزن لعدة اسباب غير صحية نهااااائيا ، و حرفيا بكون عم ياكل حالو من جوا و الاحلى انو الصبية بتطلع عالميزان بعد اسبوع زمن دايت كرز او دايت المدري شو و بتطلع نازلتلها شي ستة سبعة كيلو ضربة وحدة و هون خلص بصير عندها هاد الدايت هو الدايت الحارق الخارق المتفجر لانو نزلها وزن ... و بس ترجع تشم الاكل بتسمن (بس بتشم الاكل ما بتاكل) 😆
في فرق كبير بين خسارة رقم عالميزان و خسارة الدهون و خسارة الدهون الفعلية و الصحيحة ما لازم تزيد عن كيلو اسبوعيا و ببعض الحالات نص كيلو ...غير هيك فعم تنزلي سوائل و عضل 🙃🤦🏽‍♂
دايت متل دايتات الفواكه بشكل عام نسبة البروتين فيا شبه معدومة و و البروتين هو المكون الاساسي للانسجة و العضلات و الجسم بيحتاج للبروتين بشكل كبير و كلياتها الها مضاعفات كارثية .
الملخص لا تحاولوا تتحايلوا عالدايت ...الدايت هو حمية محطوكة صح و مدروسة بتنحط تبعا لاحتياجاتكن و هدفكن و من قبل شخص مختص و ثقة لتضمنلكن سواء ارتفاع او نزول وزن بشكل صحي و صحيح او حتى المحتفظة عوزنكن و ضمان أفضل حالة صحية ممكنة ، مو يشوفوكي رفقاتك بتلت اربع تيام جارة وشك عالارض متل الزومبي و يسالوكي ليش جاية مرضانة تقليلن ما فيي شي بس عاملة دايت🙃هاد تدمير ذاتي 🙃

هي كانت نهاية مقالنا لليوم تاااااغ لرفقاتكن و شاركوا المقال ليضل للكل 😁
و ما تنسوا تخلوا لايك و كومنت للبوست و الصفحة لتصلكن بقية المقالات 🙏🏼
💙

مسا الخير
موضوعنا عن اليوم عن واحد من اكتر المواضيع الي انسألت عنها بالفترة الماضية و كتير دارجة موضتو هلا بالذات بين الصبايا
و المقال طويل شوي
يا هل ترى فعلا هو منيح؟
كابوس الوزن الزايد و وسواس الاجسام المنحوتة ملاحق تلت رباع البنات بوقتنا و كتار جربوا و خبصوا كتير بسبيل يصلوا لنتيجة ترضيهن و يخسروا الوزن الزايد عندهن و احد هالاساليب كان الصيام المتقطع ...
شو يعني صيام متقطع؟؟
الو انواع عديدة بس اكترها شهرة انك تقسم نهارك (٢٤ ساعة ) لقسمين ... قسم تمتنع/تمتنعي عن الاكل لمدة ١٦ ساعة مثلا و تاكل خلال ٨ ساعات بقيانة .
مشكلتنا انو كتار عم ننجر ورا اي موضة او اي كلمة عم تطلع متل دايت المي ، للكيتو ، للصيام المتقطع دون الاستناد لابحاث علمية ..
* يا زلمة حرقت اعصابنا شو يعني طلع مضر ؟؟
الصيام المتقطع مانو مضر بس...تعوا لاخدكن برحلة لاشرحلكن شو هية هال #بس :
في دراسات اثبتت انو تاثير الصيام المتقطع عالنساء غير تاثيرو عالرجال !
يعني فعليا هو مفيد بالحالتين بس هو مانو مفيد للبنات بقدر ما هو مفيد للشباب .
_ دراسة اثبتت انو التحكم بمستويات السكر عند البنات صارت #أسوأ بعد تلت أسابيع من الصيام المتقطع و هالشي ما صار عند الشباب !
_في قصص (قيلا عن قال) انو كتار بنات واجهوا خربطات ضمن البيرياد(الدورة الشهرية) بسبب الصيام المتقطع.

جسم البنت حساس جدا للانكسارات او الانخفاضات الحادة بالسعرات الحرارية الي بتكون متكررة كتير او مستمرة لفترات طويلة و هيك انخفاض باثر عالغدة النخامية الي بدورها بتعطل او بتعمل خلل بافراز هرمون اسمو ال(GnRH) الهرمون المطلق لموجهات الغدد التناسلية و الي بساعد لفراز هرمونين هنن LH(لوتين) / FSH .
لما هالهرمونات ما بتقدر توصل صح للمبايض بتبلش كركبات البيريادز و كركبات صحية تانية .
فوائد الصيام المتقطع :
** يا زلمة شو عم تشتغل فينا ليكك نسفتو نسف فوق !!
وحدولي ربكن جاييكن بالحكي
يعتبر اسلوب فعال نسبيا لخسارة الوزن و محاولة ضبط السعرات و بعض الدراسات بتشير لفعاليتو ع تقليل مقاومة الانسولين هالشي منيح ل الي عم يعانوا او عندهن قابلية لتطوير مرض سكري نمط٢ و كمان دراسات بتشير لتقليلو لنسبة الكولسترول LDL و تخفيضو لضغط الدم بالعالم الي بتعاني من السمنة .
طيب كيف نستخدمو ؟؟ بالذات للبنات ...
في عدة اساليب منها
١_ الصيام ١٤ ساعة و الافطار ١٠ للبنات و ١٦ صيام و ٨ فطور للشباب و برايي هاد نسبيا ظريف و ما يكون اكتر من يومين بالاسبوع .
٢_مبدأ 5:2 هاد بكون فيو يومين بالاسبوع بتاكل فقط ٢٥٪ من سعراتك و باقي الايام بتاكل بشكل طبيعي و كمان هالاسلوب فقط يومين بالاسبوع و ما يكونوا ورا بعضهن .
يعني اذا سعراتك بشكل طبيعي 2500 فيومين بالاسبوع بتاكل بس 625 سعرة حرارية
الخلاصة:
الصيام المتقطع شي جيد و منيح و فرض علينا ربنا صيام رمضان لفائدة الصيام انما اكيد كل شي زاد عن حدو قلب ضدو فبرأيي اتباعكن لأي اسلوب دون استشارة اختصاصي و دون ضرورة هو تصرف ما لو لزوم و أرعن
و في حديث للرسول عليه الصلاة و السلام لما اجاه تلت رجال لما عرفوا اديش الرسول كثير العبادة فتصرفوا من باب المفاخرة بالطاعة و العبادة تصرفات كانت من عقلن و واحد منهن قال : أنا أصوم الدهر و لا أفطر .......
فقال الرسول عليه الصلاة و السلام :
" أنتم الذين قلتم كذا وكذا؟ أما والله إني لأخشاكم لله وأتقاكم له، (((لكني أصوم وأفطر))) " .... و للحديث كمالة ....
هي كانت نهاية مقالنا تاغ لرفقاتكن يستفيدوا و ما تنسوا تخلوا لايك و كومنت عالبوست و الصفحة لتصلكن بقية المقالات .
موفقين😁
"يمنع نسخ او نقل المقال دون ذكر المصدر"
💙

مسا الخير 😁
مقالنا اليوم طويل شوي و حنحكي فيه عن وحدة من اكتر العبارات اليوغالبنا سمع فيها
البعبع تبع الدايت 😆
هل فعلا الاكل بالليل بسمن؟؟ 🤔🙄
كتير سمعنا عبارة ما تاكل بعد ال٦ المسا لتنحف
او قبل النوم بخمس ساعات ممنوع تاكل شي
و كتير كتير من هالعبارات بس يا هل ترى فعلا هية صح ؟؟
سبق و حكينا بمقالات سابقة انو لترفع او تنزل وزنك فالاعتماد دايما بكون على عدد السعرات الحرارية الداخلة لجسمك
و ااذا بدك تنزل وزنك بتاخد/ي اقل من احتياجاتك بحوالي ٣٠٠ ل ٥٠٠ سعرة حرارية بكل بساطة (حكيت بفيديو من قبل على صفحتي التانية عن اهمية انتقاء مصادر السعرات تبعاتك و ما تكون من اي مصدر شو ما كان) .
طيب... اذا سلايس البيتزا فيو الصبح ١٥٠ سعرة معقول بالليل يصيروا ٣٥٠ سعرة مثلا؟ 🙄الصبح في دسكاونت؟ 😆
او التفاحة الصبح مثلا ١٥٠ سعرة و بالليل بتصير ٤٠٠ 😆
اكيد لا .... و بالتالي السعرات بالاكلات ثابتة و طالما لساتك ضمن النطاق تبعك فامورك بالسليم .
النقطة التانية و الي هية جملة :
الاكل قبل النوم بسمن لانك ما بتحرق الاكلات و بتروح بتنام 🙃🤦
سعراتك بس تنحسب بتنحسب عن ٢٤ ساعة و بالتالي اكيد مو ٢٤ ساعة انت فايق عم تركود و تشتغل😆
الاستقلاب بشكل عام بينزل شي بسييييط و بس باول تلت من النوم (تقريبا اول ساعتين تلاتة من النوم ) و بعدها بيرجع لمستواه الطبيعي ...حتى انت و نايم جسمك عندو عمليات و وظائف كتير عم يقوم فيها من المحافظة عحرارتك الداخلية لترميم الانسجة التالفة لطرد السموم لانتاج خلايا جديدة و الخ.....
فالاستقلاب اطمنوا من ناحيتو 😆
* بيجي شب او صبية بقلولي اي نحنا زاد وزننا عالاكل بالليل ...ليش؟!
الليش هون متعلقة بشو عم تاكلوا و الجو الي انتوا عم تاكلوا فيه ...كيف يعني؟
يعني اخر الليل قعدة عالجوال او مع الرفقة او ع شي فلم قدامنا صحن فواكه و شوية مكسرات و شيبس و بوشار ... ما بتخلص السهرة الا و كل واحد اكلو كمشة بكمشة مع حبتين فواكه و طلعلو ب ٥٠٠/٦٠٠ سعرة. حرارية بلا ما يحس!
تلت او ربع الاحتياجات لبني ادم طبيعي بشكل وسطي هاد غير الله العليم شو اكلين بقلب النهار😆فمو المشكلة ايمت اكلتوا ...المشكلو شو اكلتوا و اديش و انو بلا ما تحسوا🤣
حتى انو في دراسات(مو كتار) اثبتوا انو الاكل قبل النوم بساعد عخسارة الوزن و تحسين جودة النوم!!!
كيف يعني؟ 🤔
كتار من الي بوقفوا اكل بساعات كتير قبل النوم او بكير نسبيا بفيقوا بنص الليل مخورين من الجوع و شو بيطلع بوشن بياكلوا و ما بدكن مين يقلكن عن الوضع بس الواحد يفيق من النوم جوعان 🤦🤣و اكيد ما ح يقعد يزبط اكل دايت عاساس بنص الليل و الكارثة التانية انو احتمال ما عاد يقدر ينام و يقلق بالذات اذا فاق داير ال٣ او ٤ الصبح.🤦
فوجبة ظريفة قبل النوم شوية لبن مع معكرونة مثلا او حبة فواكه و ١٠ حبات مكسرات بتكون جيدة

الملخص :
الاكل قبل النوم ما لو علاقة مباشرة بزيادة الوزن و الافضل انك تضل حاسب و مراقب سعراتك و عرفان جسمك شو عم يصرف و شو عم ياخد و تقسم وجباتك عنهارك كلو لتتجنب حالات الجوع المفرطة و نتايجها الكارثية 😁
هي كانت نهاية مقالنا لليوم لايك للصفحة و البوست لتصلكن بقية المقالات و منشن لرفقاتكن و خلولي اسئلتكن بالتعليقات 👌
موفقين
💙

مسا الخير جميعا 🙏
موضوع اليوم شغل بال كتير ناس بالذات جماعة الدايت و بالاخص البنات 👌
خبز او توست النخالة او المعكرونة و الرز الاسمر و هالشلة هل هنن فعلا صح للدايت و ما بسمنوا؟ 🙄
بشكل عام الفروقات بين الخبز الاسمر و الابيض و التوست الاسمر و الابيض و الرز الاسمر و الابيض و هالشلة هي هية التالي :
الاسمر مكون من الحبوب غير المقشورة او المكررة صناعيا و بالتالي بحافظ علون القشرة الغامق فيها و كمان يعتبر افضل من الخبز الابيض للاسباب التالية :
من ناحية السعرات السعرات نفسها تقريبا ( و هاد بيعني انو ما معنا ضو اخضر ناكل منهن بكيفنا )

تاثير الخبز الاسمر عسكر الدم اقل و بالتالي تاثيرو عالانسولين الطف( الGI للاسمر اخف) ...يعني ما بيعمل ارتفاعات و انخفاضات سريعة بسكر الدم متل الابيض نتيجة الارتفاعات الكبيرة و المفاجئة بمستويات الانسولين و هالشي كمان بساهم بتحكم اعلى و اكبر بمستوى الجوع و ثبات اعلى بمستويات الطاقة خلال النهار .

تالتا : بيحتوي عكمية اكبر بكتير من الالياف و الي ح تبطئ الامتصاص و الهضم و كمان حتعطيك احساس بالشبع لمدة اطول ... ناهيك عن انو الالياف تعتبر ضرورية جدا لصحة الأمعاء و الجهاز الهضمي بشكل عام احتياجاتنا بتتراوح بين ٢٥ ل ٤٠ غ من الالياف و اشارت بعض الدراسات انو للاسف ما عم نحصل اكتر من ١٢ غ فقط !! بسبب انماط تغذيتنا السيئة نسبيا .

رابعا: بما انو الاسمر يعتبر حبة كاملة و ما خضع لعمليات القشط و ازالة القشرة و هالقصص فبيحتوي كمان ع نسبة اكبر من بعض الفيتامينات الي بطير قسم كبير منها و احيانا كلها لما بتم ازالة القشرة.

طيب ليش لكن عم يشيلوا القشرة بعد كل هاد؟؟ للاسف الشكل و اللون الابيض محبب و مرغوب و بشد اكتر و طعمو افضل نسبيا ...يعني فعليا امور تجارية بحتة 👌

الملخص: الاسمر افضل صحيا و كمان لخفض الوزن افضل لانو تاثيرو عالانسولين اقل انما كسعرات فحتى الاسمر وقت بيطلع عن حاجتك فيزدلك وزنك
تاغ لرفقاتكن يستفيدوا و ما تنسوا تعملوا لايك للصفحة و لايك و كومنت عالبوست لتصلكن بقية المقالات🔥👊
موفقين
💙

مسا الخير 😁
طولنا الغيبة عهل الصفحة حقكن علينا👌
موضوعنا اليوم حيكون عن شغلة او بالاحرى حمية كتييير انسألت عنها آخر فترة ألا و هي
هل الكيتو دايت تعتبر صحية؟و ليش في عالم كتير بتستفيد عليها ؟

بداية شو هية الكيتو دايت؟
هي حمية بتعتمد عالبروتين بنسبة حوالي ٢٠٪ و الدهون الصحية حوالي ٧٥٪ و حوالي ٥ ٪ كاربوهيدرات و احيانا دون كارب بنوب .
يعني الاكل بكون مكسرات و لحومات و بيض و افوكادو و زيت زيتون و خضرة و هالقصص هي .
يعني بطاطا رز فواكه و احيانا الحليب و الاجبان و الالبان و هالقصص كلياتها ممنوعة .

هلا بنجي لنحكي شوي عن سر النتائج الخرافية تبعها ؛ ليش صبية باسمع او بتشوف رفيقتها نزلت باسبوع ٣ و ٤ كيلو بالكيتو شو السر؟!
بشكل عام الكربوهيدرات بتشكل غالبا اكتر من نصف احتياجاتنا اليومية و كل ١ غ كاربوهيدرات بيحبس معو او بخزن معو ٣ او ٤ غ مي ... لهون تمام
لما بتجي بتقطع الكارب و تمشي كيتو ؛ بتبلش نسبة الغلايكوجين (كارب مخزن بالعضلات و الكبد) و الكارب بشكل عام تقل و بالتالي هالمي المخزن مع غرامات هالكارب ح تبلش تتحرر و تطلع برا جسمكو هاد احد ابرز اسباب النزول السريع الي بصير و هو فعليا نزول وهمي بالوزن يعني رقم عالميزان مانو دهون و مجرد ما بلشت ترجع الكربوهيدرات لاكلك حترجع تخزن مي و يطلع وزنك و هون بقى بتبلش نوبات الاكتئاب و الإحباط .
هلا بنجي لنحكي شوي عن اضرارو و فوايدو :
كلا بنعرف انو جسمنا بفضل الكربوهيدرات كمصدر طاقة .... لما بتبلش كيتو ف جسمك بدو وقت كتير ليبلش يتعود عاستخدام الدهون كمصدر طاقة و وارد جدا حصول بعض الاعراض التالية خلالو :
* حالات من الوهن و الضعف
* الارتباك الذهني
* الاكتئاب ....في عالم بتتاقلم و عالم ما بتحسن تمشي فيه.
*طريقة التغذية هي (بالكيتو) بتحط حمل ضخم عالكبد و الكلية .

و فوايدو انو بساهم بنزول الوزن بشكل سريع جدا نسبيا و بيحمي شوي من امراض الانسولين متل السكري و توابعو .

طيب ... لمين هاد النمط من الحميات؟؟
برأيي الشخصي الكيتو هو واحد من أفشل الأساليب او الحميات الي ممكن تتبعها ك رياضي او كشخص عادي بشكل عام .
هيك دايت ممكن تستخدموه كدايت اسعافي لشخص عم يعاني من وزن كتيييير كبير (140/150 كيلو) و هالوزن عاملو ضغط و ضرر عالقلب و المفاصل و توابعن و بدكن حل سريع قدر المستطاع فممكن نستعمل هيك شي شغلة شهرين زمن ماكسيمم و نقطة اخر السطر لانو حتى بهيك وزن غالبا هيك شخص ممنوع من الرياضة اصلا.
مو يتاخد اسلوب حياة و تضلوا عليه كل عمركن او وزنك ٧٠ و ماشيلي كيتو سواء انت او انتي ....حرام مو شغل هاد
انا بكل مسيرتي المهنية خلال حوالي ٣ سنين ما استخدمت الكيتو الا مرة وحدة مع شخص وزنو كان 155 كيلو كيلو و نزلنا لل132 فقط كحالة اسعافية و ماشالله عنو وضعو و لياقتو كتير تطورت و رجعنا دخلنا كارب عمهلنا باسلوب مدروس رجع طلع الوزن حوالي كيلو و نص و رد رجع ينزل بشكل طبيعي
المختصر : الكيتو جيد و اكيد نمط ظريف انما الو حالات خاصة المفروض يستخدم فيها و رايي الباحثين فيه لساتو ما بين مؤيد و معارض لهيك نمط ...انما برايي الشخصي اي #حمية فيها #تهميش او #عزل لمادة اساسية او مغذي اساسي من المغذيات لا تصلح ان تكون نمط حياة .
تاغ لرفيقتك/رفيقك يستفيد و ما تنسوا تعملوا لايك للبوست و الصفحة و تخلوا كومنت عالبوست لتصلكن بقية المقالات 👌
موفقين
💙

مسا الخير 😁
موضوع اليوم ح نناقش فيه سؤال بيتكرر كتير ألا و هو :
عل الأكلة الفلانية بتسمن؟ أو هل الأكلة الفلانية بتنحف؟؟

بالمختصر المفيد : ما في اكلة بتسمن و اكلة بتنحف
يعني مثلا ما بتسمن لانك اكلت نوع معين من الاكل انت بتسمن لانو هالنوت مثلا فيو سعرات كتير و بطريقة و كمية اكلك قطعت سعراتك اللازمة لتحافظ ع وزنك ع سبيل المثال
يعني بمعنى تاني لنفرض بدك 2000 سعرة حرارية بالنهار لتحافظ ع وزنك
جيت اكلك بقلب النهار اكلت 3 برغر و بيتزاية وسط و ميلك شيك و حيت تحسب سعراتن بتطلع اكل فوق ال 3000 سعرة حرارية !!
بينما ك أكل صحي بدك أضعاف هالكميات لتجيب هيك رقم
فمثلا وحدة برغر بالمتوسط ما بتنزل عن 600 ل 700 سعرة هاد اذا ما كانت فيا جبنة و دبل ....بينما تجي توزع 600 سعرة ع اكل صحي بيطلعلك فين حوالي 200 غ صدر جاج و و معن 200 غ رز مطبوخ و بيطلعلك تفاحة معن او ممكن نص موزة
طبعا غالبا مستحيل الواحد يشبع بوحدة برغر فبتنفدلك ب تنتين او تلاتة و هي ركد 1600 صعرة عالاقل ... ينما هيك وجبة مكونة من رز و جاج و حبة فواكة متكاملة اكتر و افضل ... فالقصة بالنهاية قصة سعرات .
طيب بفرض البرغر فيا 500 سعرة و انا بدي 2000 سعرة بالنهار ..بصير اكل بنهاري 3 برغر و انحف؟؟
نظريا كارقام الموضوع ممكن بس عمليا شبه مستحيل لانو هدول التلاتة انت مجبور ما تاكل غيرن لتضل متقيد بنطاق السعرات و تانيا السعرات الي فيهن اسمهن سعرات فارغة يعني ما بتفيد جسمك بشكل صح
ف ميتين سعرة من صدر الجاج المطبوخ بشكل صح غير ميتين سعرة من البرغر
الموضوع الو تشعبات كتيرة و عوامل كتيرة بتتداخل مع بعضها بس ك ملخص ما في اكلة بتسمن بحد ذاتها و اكلة بتنحف ...الموضوع موضوع سعرات و الشغلة ما فيا شطارة ... الاكل الصح و المحسوب من قبل اختصاصي هوي الي ح يعطيك النتيجة الصح 💪👌
هي كانت نهاية مقالنا لليوم ما تنسوا تعملوا لايك للصفحة و البوست و تعملوا كومنت باسئلتكن و منشن لرفقاتكن الي بهمن الموضوع
ملاحظة : في صورة توضيحية بالتعليقات تحت 🙏
موفقين
💙

مسا الخير 🌺
اليوم ح نحكي عن شغلة انتشر الحكي عنها كتير بالفترة الاخيرة و الي هية :
عل فعلا لحم #التونة المعلبة بتعمل تسمم بالزئبق ؟!
ما حدا فينا بينكر انو المحيطات زادت نسبة تلوثها اخر 50 سنة و هالشي اكيد ح ينعكس ع طبيعة الحيوانات الي ساكنة فيه او بمعنى تاني تغيير بالمأكولات البحرية و التونة منهن .
التسمم الزئبقي حسب الدراسات بكون اكبر بالاسماك الكبيرة الي بتتغذى ع الأسماك الأصغر منها .
لنحكي شوي بواقعية ...
ل الي عم يحكي عن التسمم بالزئبق ... الضرر الي بتاخدوه من شم سيكارة او اركيلة و الهوا بغالبية المدن ملوت اكتر منها مليار ضعف
ع سلم لترتيب الاسماك الاكثر سمية التونة خارج التصنيف و بيتصدر القايمة سمك القرش و تصنف التونة ك متوسط سمية و ليس عالي و يجوز استهلاكها بحكمة .
حشوة السنان الي ٩٩ بالمية من الناس كانوا يستخدموها و لهلا لساها موجودة بترفع نسبة الزئبق بالدم و كل ما زادت مدتها و عددها بتمك زادت النسبة الي ممكن تعرضك للتسمم و الحمدلله في ناس عندن ياها من ٢٠ سنة و ما سمعنا قبل عن هيك حالة و الها سجل استخدام أكتر من ١٠٠ سنة دون تسجيل حالة تسمم وحدة بسببها رغم أنها بتتكون من نسبة 50% زئبق .

و بنفس الوقت في الف اجراء تعملو لتخفف او تتخلص من التسمم المعدني بجسمك بشكل عام مو بس من التونة.
تناول الكزبرة و الخضروات الورقية ممتازة للموضوع .
او العلاج بالاستخلاب عن طريق حمض EDTA (بغض النظر عن فاعليتو) أو عن طريق حمص DMSA الي بتوصي فيه معايير الرعاية في أمريكا.
طبعا هاد موضوع ما بدنا نخوض كتير فيه خلوه عجنب شوي.
السردين يصنف منخفض السمية و فيك تبدلو بالتونة
و بياض البيض نفس الموضوع بديل ممتاز ك جودة بروتين بدلا عن التونة
و كمان نظام غذائي صح و غني بالالياف و تحافظ ع صحة جهازك الهضمي بشكل صحيح كفيل انو يخفف من تعرضك و قابلية حدوث تسمم

و بالتالي في كتير خيارات بديلة عن التونة و بنفس الوقت حالات التسمم بالزئبق نادرة نسبيا.

اذا عم تدوروا ع شي توقفوه من حياتكن ف وقفوا البطاطا المقلية الي صنفت أسوأ اختراعات القرن العشرين التغذوية و وقفوا الدخان و الاركيلة و توابعن ... اما تخافوا ع صحتكن من علبة تونة ف لا عمي لا معليش كلوها ....المغزى انو بحياتنا اليومية في الف شغلة و شغلة لازم تخاف عحالك منها أكتر من علبة التونة 💪
بالنهاية الموضوع بيرجع لقناعاتكن الشخصية و الاعتدال احسن حل لكل شي 😁
تاغ لرفقاتكن و لايك للصفحة و البوست و خلولي اسئلتكن بالتعليقات 😁
موفقين

مسا الخير 😁
موضوعنا اليوم هيك شوية توضيحات حول مفهوم كلمة #دايت

أولا :
كلمة دايت مقصود فيها فعليا حمية و نمط تغذية معين و ممكن تكون حمية لخفض الوزن او لرفع الوزن ... فلما بنقول لحدا نحيف بدك تعمل دايت صح مو معناها ينحف حالو لانو كتار هيك بيفهموها و بقلولي " لك انا نحيف/ة بدي اسمن مو انحف " و بصير اخبط راسي بالحيطان انا 🙂

تانياً :
لما بنقول لحدا يعمل حمية و لنفرض لخفض الوزن فهاد معناه شي محسوب و مدروس بالارقام عن طريق مختص
تقلي/تقليلي قاطع سكر و خبز و ملح و كولا هاد مو دايت
قاطع حلويات و معجنات هاد مو دايت
قاطع كولا و وجبات سريعة هاد مو دايت

هدول ما بكفوا هدول بعض المبادئ الأساسية بالدايت بس الدايت بحد ذاتو لازم متل ما ذكرت يكون محسوب بشكل صح من قبل مختص.

تالتاً :
و هي الاهم ؛ الدايت مو حرمان و مو تجويع و تخفيف اكل و مجاعات و دوخات .... يلعن اعداء ربكن هاد انتحار ... الدايت لما بينحسب لازم يتواجد فيه كل العناصر الغذائية الضرورية للجسم لتمدو بالطاقة و تضل وظايفو شغالة ع أكمل وجه ... مو فطور بيضة و الغدا نص صدر جاج و صحن سلطة و العشا انكن تتغرجوا ع حبة فواكه !!
و بعد اسبوع يصير وشكن سالت و طاقة ما في و بتتحولوا لزومبي او مخلل بعد تلت اسابيع ! شبنا!
الدايت بدو اختصاصي فهماااااان يشتغلو فلا كتير تخبصوا بجسمكن و تستعملوا دايتات عشوائية او تجربوا تعملوه من مخكن و تتبعوا خرافات و دايتات الانترنت لانها فاشلة...ما بصير ينحط دايت للعموم و ينقال اي هاد بطير ٧ او ٥ كيلو بالاسبوع .... هاد جريمة ...الاجسام و الاحتياحات كلا بتختلف...خلوكن واعين 👌
تاغ لرفقاتكن يشتفيدوا و لا تنسوا تعملوا لايك عالضفحة و البوست لتصلكن بقية المقالات 👌
💙

مسا الخير جميعا 😁
موضوعنا اليوم عن اكتر شغلة محببة لقلوبنا 😂
او
بعض المفاهيم الأساسية و بعض الأخطاء حولها .
شو هية التشيت ميل ؟
التشيت ميل هية عبارة عن وجبة فري بناكلها مرة اسبوعيا او كل ١٠ تيام بعد التزام بالدايت
يعني كل الاسبوع دايت او عشر تيام عالدايت تمام و عنا هالوجبة بعدهن ...
مفاهيم أساسية :
اسمها تشيت ميل و ليس تشيت داي ....يعني وجججججبة وحدة غش فقط مو يوم كامل لانو بيوم بتضرب شغل سنة لقدام 😂
يفضل تكون التشيت ميل غالبا وجبة غنية بالكارب و تكون نضيفة نسبيا ... يعني ما تكون كتير مجغبصة او حلو و نوتيلا و بلاوي و بساكيت و شيبس و هالبلاوي (طبعا بعرف انو محدة فينا بيلتزم بهل النقطة ... من ناحيتي بلتزم نص التزام بفتحلا بيتزا و برغر لطق ما بدخل حلو و سكر الا نادرا😂بس يعني واجب ذكرها 😂)
المهم ... ليش ما تكون فيا حلو و تخبيص كتير؟؟ لانو جسمكن بكون بطور حرق دهون و صرلو فترة ماشي صح... ادخال كميات سكر كبيرة هيك ح يعمللكن شي اسمو انسولين سبايك فبترتفع مستويات الانسولين و بتضلا مرتفعة ممكن لتلت و اربع تيام و هالشي ح ياثر عحرق الدهون .
و بالتالي انا بحب غش متل ما ذكرت بشي اكل مزبوط متل برغر و بيتزا اكتر ما غش و الله بميلك شيك و نابلسية و حباشاتن و هيك شغلات .
ليش تعتبر ضرورية؟
كتار ممكن يلغوها بنوب بحجة انو لا بلاها هلا بترجع بتسمني و بروح عليي شغل الاسبوع ... التشيت ميل جزء اسااااسي من الدايت يعني شي ضروري لانو بعد فترة من اكل سعرات حرارية قليلة نسبيا بيتعود جسمك عكمية هالسعرات و بينزل معدل الحرق و بالتالي وجبة متل التشيت ميل ح ترجع تنشطلك معدل الحرق 😁👍
هي كانت نهاية مقالنا لليوم ما تنسوا تعملوا لايك للصفحة و المقال و تخلوا اسئلتكن عالبوست و منشن لرفقاتكن تبع الكروش اكيد بهمن المقال 😂
💙

عيب يا شعب 🔥😤

مسا الخير جميعا
اليوم البوست بصراحة خارج النطاق الي تعودتوا عليه و ارفعولي البوست اعتبروها طلب اخوي مني لو سمحتوا🙏 ... يعني فعليا هاد مسج خفيف اللهجة و رسالة لكم شخص ح يعرفوا حالن مزبوط.
ليك ياخي ... لما بدي بلش سلسلة فيا مستوى علمي عال نسبيا و تصحيح لمفاهيم غلط كتير منتشرة بمجتمعنا او انشر مقالات تغذوية و حطن عصفحات الفيس بوك فالغاية اني فيد العالم بشكل عام ، لهون نحنا متفقين ... هلا حضرتك انت و غيرك لما عم تجي تسرق السلسلة و المقالات حرررررفيا و تنشرها عندك بصفحتك او غروبك لتلملم عليها لايكات و عالم و تبان انك فهمان هون المشكلة ، و شيلك عن قصة المعلومات .. المعلومات لسى ممكن عم انشر ١% من الي عندي و هاد حقي بنشر بكيفي كوني درستا و تعبت عليها و دفعت عليها بالعملة الصعبة و بحثت و قدمت امتحانات لشاب شعري من الضغط و التوتر و لسا ناقصني كتييييييير و مع هيك بغرقك معلومات باخدك و بجيبك الف مرة روحة جية ... المشكلة التانية اني زعلان عاسلوب الكتابة الي بستعملو و الي هوي اساس توصيل الفكرة و المعلومة يعني و لو تقدمتلك المعلومات كلياتها و زيادة ... فالاسلوب بضلو موضوع تاني

هلا غطيت بعض الاسامي و اعتبروه تنبيه من باب انو عيب يا شباب .

بدكن تاخدوا من الصفحة و تشيلوا صوري الي بتنحط عالبوستات و تحطوا صوركن بلعناها ... بس عالاقل اتركوا المصدر و الهاشتاغ الي بسفل المقال .
و احيانا من صفحة المستر نيوتريشن عم ينسرق البوست بصورتو!! طيب بربكن تعذبوا شوي بس عدلوا الصور عالاقل!!! و كلو كوم و كتابي الالكتروني تبع رمضان كوم تاني !🤦‍♂️
حسبي الله و نعم الوكيل احسن شي 🤦‍♂️

مسا الخير 😁
موضوعنا اليوم هوي موضوع انحكا فيه كتيييير و كتار الي سالوا عنو و طبعا كالعادة الحمدلله شعبنا ما بيترك شغلة بلا ما يجاوب عليها حتى لو ما كان بيعرف🤦‍♂️و بالتالي العالم كلمالها ضاعت .
السؤال : اديش جسمي بيحتاج بروتين باليوم ؟؟؟
باختصار شديد احتياجك من البروتين بيعتمد على عدة عوامل متل انك رياضي او لا و معدل نشاطك و شو نوع هالرياضة.
الحكي الي عم احكيه هون حكي علمي و مدروس و منتهي النقاش فيه و صادر عن الكلية الامريكية للطب الرياضي

الشخص الطبيعي بحالة الراحة بيحتاج 0.8 غ لكل كيلو غرام من وزنو
رياضيي التحمل متل لاعبين كرة القدم بيحتاجوا بين 1.2 ل 1.4غ بروتين لكل كيلو من وزنهن
رياضيي القوة بيحتاجوا ما يقارب 1.6 ل 1.8 غ بروتين لكل كيلو من وزنهن
و بنجي للبدي بلدرز او لاعبي كمال الأجسام و الي هنن عراس القايمة بيحتاجوا 2 غ بروتين لكل كيلو من وزنهن و فقط .
اكيد كلنا شايفين الدايتات الغبية او المجنونة حرفيا الي بتلاقي فيا الشخص عم يفطر شي ١٥ بيضة و ياكل نص كيلو لحمة ونص كيلو جاج و علبتين تونة و شي لترين حليب و نص كيل جبنة باليوم و بقلك عم اعمل عضل!!! انت عم تعمل بحالك جريمة!!
الدراسات اثبتت عدم فاعلية تناول 2.4غ بروتين لكل كيلو بزيادة تخليق البروتين...يعني طلعتك بعد 2 غ لكل كيلو من وزنك مالها طعمة هي من الاخير فما في داعي لهل الاسلوب الارعن👌
جسمك امانة بين ايديك لا تتصرف بهمجية لانو ممكن تدمر كبدك و كلاويك .
و انتوا؟ اديش عم تدخلوا بروتين لجسمكن باليوم و شو رياضتكن ؟
هي كانت نهاية مقالنا لليوم تاغوا لرفقاتكن يستفيدوا و ما تنسوا تعملوا لايك عالصفحة و البوست لتصلكن بقية المقالات 👌
موفقين
💙

مسا الورد 🌺
موضوعنا اليوم حنحكي فيه عن موقف عمل جلطة لشي ٩٩.٩% من الصبايا الي بينزلوا عالنادي لينحفوا بالذات اول اسبوع او عشر تيام 🤣🤣
هاد يا سيدي بتنزل هالصبية بتنوي نسجل بالنادي لينزل وزنها و بتروح بتسجل اول نهار و تاني نهار بتجي لابسة بجاما هالرياضة و خلص ناوية تنزل وزنها و هاجمة بهمة ... بتتدحرج عدرج النادي لتصل لجوا و بتتلفت يمين يسار و بتهجم مباشرة عجهاز المشي و نط الحبل و الاوزان و بتبلش تنطوط عليهن و تتمرن ليعضلوا مفاصلها مو بس عضلاتها ...المهم بتطلع بعد ما تخلص و هية فارطة و بتمرق من حد محل الشاورما و بتبرم وشها بكل عزة نفس و بتحس اول مرة انها انتصرت ع كرشها ...
المهم بعد اول اسبوع بتطلع عالميزان و بتجي ساعة الحقيقة و اذ.... زايد وزنها كيلو او نص كيلو عن وقت بلشت و هون ببلش البكي و الدموع و الانهيار العصبي و بتفوت بحالة اكتئاب الله لا يورجيكن🤦‍♂️.
طب ليش؟؟؟؟
هاد يا صديقتي موضوع ما بخليكي تكتئبي الموضوع عادي جدا و طبيعي ... ليش؟؟
لما بتبلشي تلعبي حديد و تستعملي اوزان و تطبقي انماط هالضغط عالعضلات الجسم ببلش يخزن غلايكوجين اكتر و الغلايكوجين عبارة عن شكل الكاربوهيدرات المخزنة بالجسم و بخزنها بالكبد و العضلات ... هلا لانو ما كان عندك هيك نوع من الضغط فجسمك ما كان عم يخزن هيك شي بكميات كبيرة نسبيا و لما بلشتي تلعبي بلش يخزن جسمك غلايكوجين و هالشي ممكن يستمر لحوالي ١٠ تيام و ممكن اسبوعين ....هاد غلايكوجين مو شحووووم ...مو دهووون .... شغلة عادية و طبيعية جدا ما تتوسوسي منو و تفوتي باكتئاب اوك؟؟ تيك ات ايزي ...خليكي مزبطة اكلك و ماشية صح و التزمي بالرياضة و الحديد بالذات لانو الانسب لحرق الدهون و الشد بالذات اذا ترافق مع الكارديو و النتايج بدها بين ٨ ل ١٢ اسبوع لتبلشي تحسي فيا مزبوط .
طبعا مو تنزلي عالنادي و تطلعي تاكلي الاخضر و اليابس و تطلعي عالميزان بعد شهر زايدة شي نص طن تقولي غلايكوجين !! تمام؟؟؟ 😁
هي كانت نهاية مقالنا لليوم تاغوا ل الي بهمن الموضوع🤣👌و لا تنسوا تتركولي اسئلتكن تحت بالتعليقات و تعملوا لايك للصفحة و البوست لتصلكن بقية المقالات
موفقين🌺
💙

وصفة سريعة ح (تسااااعدكن) بزيادة وزنكن
طبعا كلكن بتعرفوني اني بقول دائما ما في شي اسمو وصفة لزيادة الوزن او كبسولة او دوا ليزيادة الوزن
الموضوع بيرتبط باكلكن عمدى النهار بس هاد الشيك المكونات و السعرات الي فين كفيلة بانو تساعدكن و تغطي قسم كبير من احتياجاتكن للسعرات و بالتالي تسهل عليكن الوصول للنتيجة النهائية و الي هية زيادة الوزن 🙏
مكونات الشيك :
٢٥٠ مل حليب كامل الدسم
٤ حبات موز صغار او ٣ عاديات
٨٠ غ كورن فليكس(انا استخدمتو ع شوكولا) او شوفان
٦/٧ حبات فريز مفرز (مو ضروريات)
سكوب واي بروتين للنكهة و التحلية و لتجنب اضافة سكر (فيكن تستغنوا عنو كل الي فيه حوالي ١٠٠ سعرة)

البروتين : ٤٢ غ
الكربوهيدرات : ١٣٥ غ
الدهون الصحية : ١٠ غ
السعرات الحرارية : حوالي ٧٥٠ لل ٨٠٠ سعرة حرارية 🔥

الطعم : بعطيه تقريبا ٩/١٠

ملاحظات : تجنبوا اضافة السكر المكرر الكورن فليكس عشوكولا فيو زيادة و البروتين كمان بيعطيكن طعم حلو و اذا اضطريتو استعملوا ملعقة عسل .

حاولوا ما تشربوه قبل وجباتكن الرئيسية متل الفطور او الغدا لانو بصد النفس شوي ...اوك كتير مو شوي لانو تقيل🤣
برايي ظريف بين الفطور و الغدا او قبل النوم بحوالي ساعة 🙏

بربكن اصحا تتغابوا و تحطوا بيض ني بقلبو عاساس عم تعملوا شي منيح ... اسلقن حدو او اقليهن و كول :) محدا ناقصو امراض
تاغ لرفقاتكن يستفيدوا 😁👌 و ما تنسوا تتركوا لايك و كومنت لتصلكن بقية الوصفات من الصفحة😁👌
💙