Designiw

ملي كانفكرو فالتغيير و التطوير، كانتخيلو واحد النسخة مستقبلية د ريوسنا لي واصلا لداكشي لي بغينا 😎

داك الإحساس كايكون زوين و كايكون بمثابة هدف ليك توصلو و لكن بعض المرات كانبداو بالجهد و كاندخلو صحيح تا كاتوصل واحد الوقيتة كاتعيا و تدريجيا كاتفشل 😔

الواحد يبدا بخطوات صغيرة و شويا بشويا يزيد تا يولي داك التطوير جزء من الحياة اليومية ديالك و تولي عادة فحياتك 💙

واحد فالمية كل نهار كافية باش تولي 37 فالمية حسن فظرف عام. و العام دغيااااا كايدوز 😬

إلى عندكم أي سؤال أو تساؤل, حطوه فالتعليقات 💬 أو سيفطو ليا ميساج 💌 شوووكران بزاف على وقتكم 🙏 و ديزاينيو كل نهار 💙

Hey hey 👋 it's been a while 😁

فهاد الپوسط كاينة واحد المجموعة ديال الألعاب 🎮 لي غادي يعاونوك كديزاينر باش تطور المهارات ديالك 💪

الأغلبية د هاد الألعاب بساط و لكن صعاب حيت كاتعتامد على الحس البصري ديالك 👁️‍🗨️ ماكاينش نمط أو لوجيك معين باش تحللو بالمنطق. كولشي على دوك العوينات لي عندك 👁️👁️

الصراحة اللعبة لي نفعاتني و عاوناتني هي اللعبة اللولة ديال الپين توول. كانت ديك الأداة معقداني فاللول و بسبابها حبست الگرافيك ديزاين مدة طويييلة و فشلاتني. و لكن ديك اللعبة رجعات فيا الروح 😄

إلى عندكم أي سؤال أو تساؤل ❓ حطوه فالتعليقات 💬 أو سيفطو ليا ميساج 💌

شوووكران بزاف على وقتكم 🙏 و ديزاينيو كل نهار 💙

ماعندي باقي تا شي عذر. سنين وانا كانگول نبدا و كون بديت شحال هادي كون راني دبا وصلت للنيڤو لي كنت كانحلم بيه 😔

نقدر أني نگلس و يتنادم معابا الحال و نكره راسي و نبقا فبلاصتي سنين أخرى، أولا نتقبل الواقع و ننسى هاد السنين لي فاتو و نركز على دبا و المستقبل 😼

كاينين بزااااف د الحوايج بغيت نرسمهم و داك الخوف ديال "راني عيان فالرسم" خاصني نحيدو. داكشي لاش غادي نرسم كل نهار باش نتدرب و نپوسطي باش نحيد من راسي داك الخوف و ديك الحشومية 😁

سوو، غير صبرو و قبلو عليا عفاكوم 😆 غادي نكون عيااان و لا علاقة و لكن هكا باش غادي نتعلم 🙏

إلى عندكوم أي نصيحة تنصحوني بيها فيما يتعلق بالرسم، ما تبخلوش عليا 💙💙💙

الگرافيك ديزاين عامر بقوالب لي كانطيحو فيهوم حيت كانعتامدو بزاف على الپيسي و على العبار د الأرقام و القياس و كانعتابرو أي حاجة مقادا رياضيا/حسابيا فراها مقادا بصريا 👌

بالرغم أنه واحد الديزاين يقدر يكون مقاد بالعبار، ماي تشوف فيه "كاتحس" بلي شي حاجة ماشي هي هاديك بلي كايبان شكل و مامقادش 🧐

عينينا أفضل وسيلة باش نحصلو بيهوم هاد الأوهام البصرية و نصححوها. الرؤية ديالنا للعالم ماشي مثالية و التماثل ماشي شي حاجة زوينة ديما. عتامدو على عينيكم 👀 ماشي الپيسي 🖥️

"Imperfection is perfection"

إلى عندكم أي سؤال أو تساؤل, حطوه فالتعليقات 💬 أو سيفطو ليا ميساج 📥

شوووكران بزاف على وقتكم 🙏 و ديزاينيو كل نهار 💙

ملي كانبداو شي حاجة جديدة علينا و كانبغيو نبينو داكشي لي عندنا للناس، كانبنيو توقعات و كانتصورو شنو غادي يگولو علينا هاد الناس: التعليقات، الإنتقاد، واش يعجبهوم و لا لا، واش غادي نشوه راسي قدامهم، إلخ 😖

هاد التفكير عادي بزاف و لكن كايخلينا نبقا فبلاصتنا و مانديرو والو، حيت ماكانعرفوش شنو غادي يظنو الناس على الخدمة ديالنا فالبدية، و لكن هديك هي الكلمة المهمة: البدية 💪

كولشي على البدية. ديك الخطوة اللولة هي لي غادي تخليك تعرف الرأي د الناس عليك باش تعرف فين غلطتي و شنو تقدر دير باش تحسن من النيڤو ديالك، و خطوة بخطوة غادي تزيد كاتطور من راسك باش توصل لداك النيڤو لي بغيتي

عندك هدف بغيتي توصل ليه و كايبان بعيد؟ خود الخطوة اللولة اليوم باش توصل ليه واحد النهار 📅

إلى عندكم أي سؤال أو تساؤل, حطوه فالتعليقات 💬 أو سيفطو ليا ميساج 📥
شوووكران بزاف على وقتكم 🙏 و ديزاينيو كل نهار 💙

Hey Hey 👋
أي عنصر كايتحط فواحد الديزاين كاين سبب علاش تحط تما. داك الفراغ لي كانخليو و لي كايكون داير بالديزاين حتا هو عندو هدف: يخلينا نركزو على الديزاين! 🔎

هادشي علاش ماكانعمروش اللوحة كاملها غير باش نعمروها و صافي الفراغ زوين حيت كاايخلي الديزاين يبان و يكون مركز الإهتمام و كايخليه يتنفس 👃🏻

هاد الفراغ ماشي بالضرورة يكون بيض. يقدر يكون بأي لون أو أي شكل أو ملمس. المهم هو ما يسرقش الأنظار من الديزاين الرئيسي، و إنما خاصو يعاون الديزاين باش يبان 🌟

إلى عندكم أي سؤال أو تساؤل, حطوه فالتعليقات 💬 أو سيفطو ليا ميساج 📥
شوووكران بزاف على وقتكم 🙏 و ديزاينيو كل نهار 💙

Hey Hey 👋

مع المجالات ديال الگرافيك ديزاين كثار و كاملهوم زوينين، كاين لي كايتلف و ماكايعرفش منين يبدا و لا باش يبدا و غالبا كانبغيو نديرو كولشي و لكن خصنا نبداو بواحد 1️⃣

كاين لي كاتكون عندو أصلا فكرة على واحد المجال و كايزعم يبدا فيه، و كاين لي ماعندوش أدنى فكرة على تا شي مجال أولا عندو فكرة صغيرة بزاف و ماعارفش منين يبدا. الحل هو تختار واحد و تجرب 🧪

يكفي أنك تجرب واحد المجال لمدة معينة (مثلا 14 يوم) باش تشوف واش غادي يعجبك و كاتلقى فيه راحتك. عجبك؟ كمل فيه. ما عجبكش؟ بدل بشي مجال أخر و جربو واحد 14 يوم حتا هو 🔄

و إلى كان الخوف ديالك أنه يضيع وقتك فلا داعي للخوف ⌛ القواعد د الگرافيك ديزاين ماكايتبدلوش. داكشي لي تعلمتي فواحد المجال غادي طبقو على المجالات لوخرين، غير كاتبدل طريقة و وسيلة الإستعمال

إلى عندكم أي سؤال أو تساؤل, حطوه فالتعليقات 💬 أو سيفطو ليا ميساج 📥
شوووكران بزاف على وقتكم 🙏 و ديزاينيو كل نهار 💙

بمناسبة شهر رمضان المبارك, كانتمنى ليكم و لحبابكم رمضان مبارك كريم فينما كنتو و كانتمنى ليكم كل الصحة و الفرحة بالرغم من كل الظروف 🤗 كل الحب ليكم 💙💙💙 و تكايسو على الحريرة 🍲
#رمضان2020

Hey Hey,
وقتما كانقراو شي حاجة أو كانشوفو شي ديزاين، كانتبعو ديما واحد التسلسل بلا مانحسو بيها. عينينا كاتگيديهوم شي حاجة بواحد الطريقة طبيعية بلا مانبذلو حتا شي مجهود و هذا هو الفضل ديال التسلسل البصري 〽️

على حساب الثقافة، كانقراو من فواحد الإتجاه معين. مثلا عندنا ملي كانقراو العربية كانقراو من اليمين لليسر و كاندوزو ثاني لليمين و حنا غادين تا كانوصلو للتحت و عاد كانعاودو نسكانيو واش كاينا شي حاجة أخرى، و لكن كاينين شي طرق باش كاتهرس بيهوم هاد التسلسل و تجبد الأنظار لحوايج أخرين 👀

هادشي داخل فالپسيكولوجبا ديالنا كبشر و من شبه مستحيل أنك تقاومها و تحاول تمشي ضدها. قوااااالب هادوو 😐

شوووكران بزاف على وقتكم 🙏 و ديزاينيو كل نهار 💙

Designiw updated their website address.

Hey hey 👋
من بين أهم الحوايج لي خاص الفنان و الديزاينر يديرهوم هي يفكر برا الصندوقة:
يفكر خارج المعتاد، يجيب أفكار فشكل، مايفكرش كيبحال كامل الناس، إلخ... و لكن كيفاش؟ كيفاش غادي دير باش ماتفكرش كيبحال كامل الناس؟ راك واحد منهم فنهاية المطاف 🤔

كاتبقا فالتفاصيل. الأفكار واخا يكونو جداد، بعض المرات كايبانو بخطرة وحدة عند جهات مختالفة، و لكن التفاصيل هي لي كاتلعب دور حاسم فتحديد شكون فيهوم لي الفكرة ديالو "فشكل" و "مختالفة" بالرغم من كونهم نفس الفكرة 🙌

الدقة فالتفاصيل مهمة بزاف، و ماكاينش شي تفصيل لي هو "لا علاقة". كل تفصيل راه كاين تما لسبب ما. دير تحليل لدوك التفاصيل و عرف علاش كاينين تما و شنو الهدف من الوجود ديالهم. التفكير فهاد التفاصيل غادي يديوك من حاجة لحاجة أخرى و زيد و زيد تا طيح فشي حاجة جديدة، شي حاجة "فشكل" لي تقدر طبقها لشي فكرة ديجا كاينة! شي حاجة لي خارج الصندوق 🔥

شكر كبييير بزاف للديزاينر الرائع و الموهوب نور الدين جنا من NJANA Design
على الكولابوراصيون 💙 هادي أول كلابوراصيون فالصفحة و غادي يجيو بزاف أخرين فالمستقبل مع ناس واعرين 💪
شووووووكران بزاف على وقتكم 💙🧡 و ديزاينيو كل نهار 🙏

عفاكوم بقاو فديوركوم و عتانيو بالنظافة ديالكم. هادشي مابقاش فيه اللعب، و التهاون و اللامبالاة غادي يكون عندهوم عواقب وخيمة عليك و على لي ضاير بيك. نحاولو نوعيو بعضياتنا و المحيط ديالنا بالمخاطر د الڤيروس 🙏

حميو ريوسكوم تحميو الناس 💙

**khome

قاديت هاد الپوسط ب Paint 🎨

أوف

بغيت فقط نتحدى راسي و نقاد پوسط ب Paint فالپيسي القديم ديالي باش نثبت النقطة لي هدرت عليها فالپوسط د البارح. واخا تعذبت بالمزيان و خدا مني بزاف د الوقت (5 سوايع) و لكن كانت تجربة زوينة. الپيسي ديما كايتقال و كايتپلونطا مرة مرة (1 جيجا فلا رام... 1 جيجا) و ماخاصنيش نحركو و إلا غادي يتحرك الكابل و يتطفا و خاصني ديما نرد البال مع Paint فين كانكتب و فين كانحط كل حاجة حيتاش ماشي بحال Illustrator و Photoshop. بالرغم من كل ذلك قاديت الپوسط واخا مدرّح شويا.

ماكانگولش ليكوم كونو متطرفين و خدمو ب Paint 🤣 خدمو بلي عندكوم ها ماتحبسوش الخدمة على ود أعذار واهنة!

شكرا على وقتكم و ديزاينيو كل نهار (ولكن ماشي ف Paint) 💙

هادو ها أدوات

بعض المرات كانطيحو فداك الفخ ديال "خاصني نشري هاديك باش ندير هادي" و "كون ها كانت عندي هاديك غادي نقدر ندير بها هادي" و كايتصحاب لينا بلي إلى شريناها غادي نطورو فديك اللحظة و نوليو واعرين (بحال بوكيمون أولا ديجيمون 😛) و لكن أغلب الحالات كانديرو هكا باش نتجنبو أننا نخدمو كثر باش نتعلمو لديك الحاجة لي باغين نديرو و كانستعملو ديك "خصني هادي" كطريق مختصر و كمبرر و كانقنعو ريوسنا بلي ضروري من ديك الحاجة باش نزيدو للقدام، و هاداك هو الخطأ.

الفنان هو لي كايستعمل الأداة باش يدير الفن، ماشي العكس.

شكرا على وقتكم و ديزاينيو كل نهار 💙

Designiw Quotat

كاينين بزاف ديال الناس لي كايديرو الگرافيك ديزاين و لكن بلاصت ما تنافس معاهوم أنك تكون "حسن" منهوم، خاصك تكون ف"شكل" عليهوم و تكون عندك شي حاجة مختالفة. شي حاجة لي ديالك. الستيل، الطريقة باش كاتپريزونطي، كيفاش كاتستعمل الألوان، العملية علاياش كادوز ملي كاديزايني، أي حاجة مهم خاصها تختالف على الناس لوخرين باش تميز عليهوم. سوا كان شي ستيل ديال الرسم لي دري د 5 سنين يقدر يديرو أولا شي لوغو لي يقدر أي واحد يصايبو ف Paint، دير حاجة لي تكون ديالك.

أش بان ليكوم فالمقولة؟ حطو رأيكم فكومونطير.

شكرا على وقتكم و ديزاينيو كل نهار 💙

Designiw Coor Coor 1
الخطوط-الجزء الثاني

التكميلة ديال الپوسط ديال البارح. شخصيا، كانأمن بلي الخطوط أهم عنصر فالگرافيك ديزاين حيتاش تقدر تقاد بيهوم شي ديزاين بلا ماتستعمل تا شي عنصر أخر، بينما إستعمال الألوان و الأشكال و الكتابة ضروري مايحتاجو للخطوط.

شكرا على وقتكم و ديزاينيو كل نهار 💙

Designiw Coor Coor 1
الخطوط -الجزأ الأول

ها حنا بدينا القراية 😛 المهم أ الطلاب و الطالبات السيري غادي تكون على هاد الشكل باش تبان مزيان فالبروفيل لي باغي يرجع ليهوم كاملين من بعد. غادي نقسمهوم كذلك لجوج أولا ثلاثة د البوسطات (على حسب الموضوع) باش يكون داكشي مختصر و ساهل يتقرا و غادي ننوع من الألوان باش يجي داكشي ملون و زوين.

التكميلة غادي تكون غدا. كانتمنا البوسط يعجبكم و تعجبكم الفكرة حتا هي. شكرا على وقتكم و ديزاينيو كل نهار 💙

دبا نبداو Designiw coor coor 🙌

هاد الفكرة كنت غادي نبداها عاجلا أم أجلا و لكن مع كايحتاج لشويا ديال الوقت باش نوجد لداكشي لي غادي نقرا و نقاد البوسطات بواحد الطريقة لي تجيكوم ساهلة. كاينين بزاف ديال الحوايج لي غادي نهضر عليهوم فهاد السيري و كاينين سيريات أخرين جايين فالطريق و كلشي على الديزاين 😁

كانتمنا تعجبكم الفكرة و تسناو الپوسط ديال غدا 🔥

شكرا على وقتكم و ديزاينيو كل نهار 💙

المهارات لي تحتاج(ي) باش تكون(ي) Good designer

ضروري غادي شي مهارات اي خاص الواحد يتعلم ليهوم باش يولي ديزاينر مزيان، هادشي ليغادي يفرقو من بين لوخرين. بطبيعة الحال غادي يكونو مهارات أخرين لي نسيت ما درتهومش و لكن هادو لي حطيت هما لي بانو ليا شخصيا مهمين باش لواحد يكون مزيان كديزاينر. إلى عندكم شي مهارات أخرى فبالكم حطوها فكومونطير 👇

شكرا على وقتكم و ديزاينيو كل نهار 💙

الفرق بين الإلهام و النقيل

كاين واحد الخط رقيق بين الإلهام و النقيل لي ماخصش الواحد يفوتو. النقيل هو ماشي حاجة خايبة في حالة الواحد كايتعلم، راه كاملين كانتعلمو حيت كانقلو داكشي لي دارو هادوك اي سبقونا و هادشي كاين فأي حاجة و أي مجال. الخاااايبة هو تنقل واحد الحاجة و تگول أنا لي درتها/الفكرة ديالي حيت فديك الحالة كاتولي شفرة. شكرا على وقتكم و ديزاينيو كل نهار 💙

منين نجيب الإلهام؟

بعض المرات كاتبغيو تشوفو ديزاينات باش تأنسپيراو و طيح شي فكرة فراسكوم باش تخدمو عليها، أولا كاتكون عندكم فكرة فراسكوم و كاتبغيو تأنسبيراو من ديزاينات أخرين باش تحسنو من الفكرة لي عندكوم. تقدرو تأنسبيراو من بلايص أخرين من غير الأنترنيت و لكن بما أنه كاينين مواقع كايحطو فيها ناس خدمتهوم، فراها بلاصة مزيانة باش تشوف شنو كايديرو الناس و شنو تقدر تعلم من عندهوم.

أنا ملي يلاه بديت كنت باغي ندير فيها صعصع و نعصر الأفكار من راسي بلا مانطل على والو. المشكل يلاااه بادي و مامكونصوميش الگرافيك ديزاين بالمرة 😂 الله عليك يا أنا ف2013

شكرا على وقتكم و ديزاينيو كل نهار 💙🙏

كيفاش تريني الديزاين؟

معا البدية كاتكون فواحد المرحلة خاصك تزيد فيها للقدام و تعلم لحوايج اخرين، خصوووصا ملي كاتخدم بزاف بشي بروگرام و كاتلقا فيه راحتك تا كاتولي كاتركز عليه كثر من القراية على المجال ديالك و هادي حاجة عادية.

و لكن باش تقدر تزيد للقدام خاصك تكون جايب الخبار لشنو واقع فالضومين باش تتكيف (ماشي هاديك لي طاحت فبالك يلاه دابا) مع التغيرات لي واقعين فالضومين و تعرف حتا الضومين فين غادي من دبا للقدام حيتاش ديما كايتبدل و خاصك تكون موالف تشوف جميع أنواع الديزاينات فالضومين ديالك باش تاخد المزيانة و تفادى العيانة. هادو حتا هما من أشكال القراية حيتاش فنهاية المطاف راه كاتعلم.

شكرا على وقتكم و ديزاينيو كل نهار 💙🙏

واش الديبلوم ضروري؟

الى كنتي باغي(ة) تعلم(ي) للديزاين، فالمدرسة ماشي عذر. كلشي غادي تلقا(ي)ه فالأنترنت و فابور (شوييييا د الفلوس د الكونيكسيون و صافي) و لكن أهم حاجة هو الديسيپلين و تكونطرولي راسك و يكون عندك واحد الهدف لي باغي توصل ليه و بدا(ي) تعلم(ي). واخا صراحة ماعنديش فكرة كبيرة على المدارس د الديزاين فالمغرب، واش غادي يكونو فعلا مزيانين أولا كيبحال الصورة النمطية لي على المدارس د المغرب، و لكن المدرسة مزيانة كاتلاقا(ي) فيها مع ديزاينرز أخرين بحالك، و لكن إلى كنتي أكتيف و كاتهضر مع الناس بحالك وكاتاخد من غندهوم واحد التجربة، فغادي تحصل(ي) على نفس النتيجة.

شكرا على وقتكم و ديزاينيو كل نهار 💙🙏

شناهو مشروع 𝗗𝗲𝘀𝗶𝗴𝗻𝗶𝘄 𝗖𝗼𝗺𝗺𝘂𝗻𝗶𝘁𝘆

الفكرة لي قلت نديرها هي أنه يكون شي كروب لي يكونو فيه ديزاينرز من مجالات مختلفة باش يشاركو التجربة ديالهوم مع لي يلاه باديين و يوريوهوم الطريق. ما بغيتش هادشي يبقا مجرد صفحة فإنستغرام و نهضرو فيها ها من بوسط لبوسط. خاص شي بلاصة فين تقدر تبارطاجي خدمتك باش يشوفوها الديزاينرز لوخرين و تعرف الرأي ديالهوم و يعطيوك نقد بناء ماشي إنتقاد. بطبيعة الحال خاص تكبر الصفحة شويا و يكونو بعدا معانا ناس ليباغين يعاونو لي يلاه بداو. يقدر من بعد ما يبقاش مجرد مجتمع إفتراضي و يولي شي حاجة أكبر. المهم شويا بشويا و خطوة بخطوة حتا يتقاد هادشي.

شكرا على وقتكم و ديزاينيو كل نهار 🙏💙

Now it's easier to send Designiw a message.