အိုဆာကာစီးတီး ဂျပန်ဘာသာသင်တန်းကျောင်း သည် ၂၀၁၉ ခုနှစ် ဇွန်လ တွင် မြင်းခြံမြို့တွင် စတင်တည်ထောင်ခဲ့ပါသည်။ သင်တန်းကျောင်း၏ ရည်ရွယ်ချက်မှာ ဂျပန်စာကို လေ့လာချင်သော်လည်း နယ်မြို့ဖြစ်သောကြောင့် လေ့လာရန်အလှမ်းဝေးသူများအတွက် ဂျပန်စာကို စနစ်တကျလေ့လာနိုင်ပြီး လက်တွေ့တွင် ကျွမ်းကျင်စွာအသုံးချနိုင်ရန်၊ ဂျပန်နိုင်ငံသို့ ပညာသင်သွားလိုသူများနှင့် အလုပ်အကိုင်အခွင့်အလမ်းဆိုင်ရာဗဟုသုတ သိလိုသူများအတွက် အထောက်အကူပြုရန် ရည်ရွယ်ပါသည်။
ထို့ပြင် စာမေးပွဲအောင်ရန်တစ်ခုတည်းကိုပဲ ဦးစားမပေးပဲ အတန်းထဲတွင် ကျောင်းသား အချင်းချင်း ဂျပန်စကားပြောခြင်း၊ အလုပ်အင်တာဗျူးအတွက် အကြိုလေ့ကျင့်သင်ကြားပေးခြင်း၊ ဂျပန်သီချင်းများ အတူနားထောင်ပြီးလိုက်ဆိုခြင်း၊ ဂျပန်အန်နီမေးရှင်းများ ကြည့်ခြင်း၊ ခေါင်းစဉ်တစ်ခုအောက်တွင် ကိုယ့်ထင်မြင်ယူဆချက်ကို ဂျပန်လို ပြောဆိုခြင်းဖြင့် အပြောစွမ်းရည်၊ နားထောင်နိုင်မှု့စွမ်းရည် မြင့်မားလာစေရန် သင်ကြားပေးနေပါသည်။
O ထို့နောက် အတန်းသားအချင်းချင်း ချစ်ခင်ရင်းနှီးမှုရစေရန်၊ အုပ်စုလိုက်လှုပ်ရှားဆောင်ရွက်တတ်စေရန် ရည်ရွယ်ပြီး လေ့လာရေးခရီးများထွက်ခြင်း၊ အတန်းအတွင်း ဂျပန်အစားအစာများ အတူတကွ ပြုလုပ်စားသောက်ခြင်း၊ ဂျပန်ရိုးရာ စက္ကူခေါက်နည်းများ၊ စုတ်တံဖြင့် ဂျပန်စာရေးနည်းများ၊ ဂျပန်ဝတ်စုံကီမိုနိုဝတ်ခြင်း စသည့် ဂျပန်ယဉ်ကျေးမှုများကို စာတွေ့တွင်သာမက လက်တွေ့သင်ကြားပေးရင်း ဂျပန်နိုင်ငံအကြောင်း ပိုမိုသိချင်လာအောင် ဂျပန်စာကို ပိုမိုလေ့လာချင်လာအောင် သင်ကြားပေးလျှက်ရှိပါသည်။
တည်ထောင်သူ၏ကိုယ်ရေးအကျဉ်း
အိုဆာကာစီးတီး ဂျပန်ဘာသာသင်တန်းကျောင်းကို တည်ထောင်သူ ဆရာမ ဒေါ်ကေသဉ္ဇာဇော်သည် ရန်ကုန်နိုင်ငံခြားဘာသာတက္ကသိုလ်(YUFL) မှ ၂၀၁၃ခုနှစ်တွင် ဂျပန်မေဂျာ(Q) ဖြင့်ဘွဲ့ရခဲ့ပါသည်။ ဆက်လက်၍ ၂၀၁၄ခုနှစ် ဖေဖော်ဝါရီလတွင် YUFL မှ Diploma in English ဖြင့် ကျောင်းပြီးခဲ့ပါသည်။
ဂျပန်နိုင်ငံအစိုးရမှပေးသော MEXT စကော်လာရှစ်ကျောင်းသူအဖြစ် ရွေးချယ်ခံရပြီး ၂၀၁၄ခုနစ် ဧပြီလတွင် ဂျပန်နိုင်ငံသို့ သွားရောက်ခဲ့ပါသည်။ ၂၀၁၄-၂၀၁၅ ခုနှစ်တွင် အိုဆာကာမြို့ရှိ JASSO Osaka Japanese Language Education Center တွင် ဂျပန်ဘာသာစကားကို တစ်နှစ်တက်ရောက်ခဲ့ပါသည်။
၂၀၁၅-၂၀၁၇ ခုနှစ်တွင် Osaka YMCA International College တွင် International Business ဘာသာရပ်ဖြင့် ဒီပလိုမာ ရရှိခဲ့ပါသည်။
၂၀၁၇-၂၀၁၉ ခုနှစ်တွင် ဂျပန်နိုင်ငံရှိ ပုဂ္ဂလိကတက္ကသိုလ်များထဲတွင် နာမည်ကြီးသော Kindai University တွင် Career Management မေဂျာဖြင့် ဘွဲ့ရရှိခဲ့ပါသည်။
ဂျပန်နိုင်ငံတွင် ပညာသင်နှစ်(၅)နှစ်လုံးအတွက် ဂျပန်အစိုးရမှ ၁၀၀% ထောက်ပံ့ပေးသော MEXT Program ဖြင့် ပညာသင်ယူလေ့လာနိုင်ခဲ့သူဖြစ်ပါသည်။
ထို့ပြင် ၂၀၁၃ခုနှစ်တွင် The Youth Exchange Project with Asia-Oceania and North America (Kizuna(Bond)Project ဖြင့် ဂျပန်နိုင်ငံသို့ ဖိတ်ကြားခြင်းခံရပြီး လေ့လာရေးခရီးစဉ်တွင်ပါဝင်ခွင့်ရရှိခဲ့သူဖြစ်ပါသည်။
၂၀၁၅ခုနှစ် ဒီဇင်ဘာတွင် N1 ကို ပထမအကြိမ်ထူးချွန်စာအောင်မြင်ခဲ့ပြီး ၂၀၁၈ခုနှစ် ဒီဇင်ဘာတွင် ဒုတိယအကြိမ်အောင်မြင်ထားသူဖြစ်ပါသည်။
ဂျပန်စာသင်သက်တမ်း ၇နှစ်ကျော်ရှိပြီး ဂျပန်နိုင်ငံတွင် နေထိုင်စဉ်အတွင်း မြန်မာနိုင်ငံသားများအပြင် တရုတ်၊ အင်ဒိုနီးရှား၊ ဗီယက်နမ်စသည့် နိုင်ငံခြားသားများကိုပါ ဂျပန်စာသင်ကြားပေးသည့် အတွေ့အကြုံများရှိထားသူဖြစ်ပါသည်။
