Romnick Garcia Quimoyog Official

Agyamanak ⚡

RUPA NI HENERAL ARTEMIO RICARTE, TAMPOK ITI MAIKALIMA A RICE PADDY ART ITI MARIANO MARCOS STATE UNIVERSITY ITI SIUDAD TI BATAC

Balligi a naisayangkat ti pannakairubuat ti maikalima a Rice Paddy Art a naaramid iti Mariano Marcos State University iti Siudad ti Batac.

Daytoy a proyekto ket nagbinnuligan nga insayangkat ti MMSU ken ti Philippine Rice Research Institute wenno (PhilRice) tapno magutigot ken mainspiraran dagiti agtutubo a mangala iti kurso nga agrikultura ken dadduma pay a kaarngi a kurso.

Babaen iti naaramid a Rice Paddy Art
ket ditoy a maipakita ti gapuanan ti siensia ken teknolohia ken maitandudu ti agri-tourism ditoy probinsia.

Kangrunaan a naipakita iti maikalima a Rice Paddy Art ket ti ladawan ni Heneral Artemio Ricarte a naiyanak iti Siudad ti Batac.

Idi tawen 1972, maysa a monumento ti naipatakder para ken ni Ricarte iti Yamash*ta Park idiay Yokohama, Japan.

Ti pagtaengan a nakaipasngayan ni Ricarte ket inaramid kas Pambansang dambana iti nasao a Siudad.

Maysa pay a monumento ti naipasdek idiay Poblacion, General Trias, Cavite para ken ni Heneral Ricarte para iti naglaban daytoy ken dagiti naaramidna a pagsayaatan idiay Cavite.

Segun ken ni Dr. Shirley C. Agrupis, Presidente ti MMSU, babaen iti pannakairubuat ti maikalima a Rice Paddy Art ket daytoy ti mangipakita iti panangpadayaw kadagiti mannalon, agtutubo ken dadduma pay nga umili iti agtultuloy a pananglaban kadagiti agdama a karit ti panagbiag.

Inbatadna ti agtultuloy a panagyamanna iti PhilRice ken dadduma pay a kakinnammayet nga ahensia iti agtultuloy a suporta ti tumunggal maysa.

Inpadanonna met ti napalaos a panagyamanna iti pannakipagpaset ti tumunggal maysa iti naiyuswat a launching.

Kunana a babaen iti Rice Paddy Art, maipakita ti napabaro wagas ti panangpadayaw kadagiti umili, kangrunaana kadagiti mannalon iti pagay.

Innayonna nga agtultuloy ti nairut a binnulig ti MMSU ken ti ahensia iti pannakapasayaat ti produksion ti bagas babaen kadagiti mannalon iti probinsia.

Mainaig iti daytoy, nagatendar ti nasao a programa ni Mayor Albert Chua, dagiti empleado ti Philrice ken dadduma pay.

Maipalagip nga idi tawen 2018 tampok iti Paddy Art ni dati a Presidente Ferdinand Edralin Marcos, idi 2019 ket ni dati a First Lady Imelda Marcos, idi 2020 ni Dr. Santiago Obien, dati nga MMSU President ken idi 2021 ket ni Don Mariano Marcos.

Naammoan a naaraamat ti PSB Rc 82 ken NSIC Rc 222 kas green rice ti paddy art idinto a nausar met ti IR 1552 a purple rice variety tapno maipinta ti ladawan.

Kabayatanna, masarakan ti Rice Paddy Art iti sango ti administration building ti MMSU, amianan a paset ti University Twingate.