بٹ پرہیزی

ایک صاحبِ عقل صاحب کا فرزندِ بے ہنر کمال مہارت سے دن رات شدید آوارگی کے عالم میں محو رہتے ہوئے محنت مشقت کر کے کتابوں سے اجتناب برت کر میٹرک کے امتحانات میں رحمتِ خداوندی کے بعد اعانتِ ہم مکتب کی بدولت 1100 میں سے 457 نمبرز لے کر مکان بھر میں اوّل درجہ پر رہا۔
ابا نے بیٹے کے روشن مستقبل کے متعلق اس کے معلم سے مشاورت کرتے ہوئے اپنی خواہش کا اظہار یوں کیا،
"میں چاہتا ہوں کہ میرا بیٹا میڈیکل کی فیلڈ میں جائے اور ڈاکٹر بنے ! آپ کیا کہتے ہیں ماسٹر جی؟ "
معلم بہت زیرک اور بھلے آدمی تھے ، مسکراتے ہوئے نہایت عاجزانہ انداز اور بھاری آواز میں بولے " جنابِ والہ ! بچے کو میڈیکل کروانے سے بہتر ہے اس کا میڈیکل کروائیں اور فوراً سے پہلے بیرونِ ملک بھیجنے کی چارہ جوئی کریں ، محنت مزدوری کرئے ، روزی روٹی کمائے ۔"

یہاں پر عزتِ زن کا یہ عالم ہے شناورؔ
کہ اک عورت کو بھی کہتے ہیں لیڈیز احتراماً

کھال ہا کھال اور اک پایہ
کوئی بھی تو نہ میرے ول آیا
خود ہی شاپر کو میں نے جنبش دی
خود ہی بکرا سا میں نکل آیا

عید کا دن ہے گلی میں نہ غلاظت پھینکیں
رسمِ دنیا بھی ہے ، موقع بھی ہے ، دستور بھی ہے

ہمارے ہاں عورت کی عزت کا یہ عالم ہے کہ اکثر لوگ ایک عورت کو بھی بصد احترام لیڈیز کہتے ہیں۔

اعجاز صاحب اسکول میں اردو پڑھاتے تھے۔ ایک دن انہوں نے بچوں سے ایک کہانی لکھوائی۔
ایک بچے نے سب سے اچھی کہانی لکھی جو استاد کو بہت پسند آئی لیکن استاد نے آخر پر کچھ ایسا دیکھا کہ غصے سے سیخ پا ہوگیا اور بچے کو مارنے لگ پڑا۔
بچے نے کہانی کا جو نتیجہ لکھا وہ کچھ یوں تھا ،

" ضرورت اعجاز کی ماں ہے"۔

میں عمران ریاض کے ساتھ کھڑا ہوں لیکن ابھی میرے لیٹنے کا وقت ہے۔

خدا کے لئے چھوڑ دو اب یہ میک اپ
حقیقت چھپانے سے چھپتی نہیں ہے
تمہیں دیکھ کر چیخیں نکلیں گی اپنی
ذرا رخ سے میک اپ ہٹا کر تو دیکھو

اسلام آباد میں ڈاکٹر کی غفلت سے نرس ایک مریض پر مر گئی۔

بیوٹی پارلر کی اُردو !
”نشستِ گاہِ مرمتِ حسن برائے جنسِ لطیف“