Ministériu Solidariedade Sosiál no Inkluzaun

BELUN DOBEN LEE-NA’IN PÁJINA MSSI MAK AMI HADOMI
HO HAKRAIK AN AMI INFORMA BA BELUN SIRA KATAK, HAHÚ AGORA BA OIN PÁJINA FACEBOOK MSSI LA’ÓS ONA RUA MAIBÉ IDA DEIT HO ENDERESU “Mídia MSSI IX Governu Konstitusionál”. NUNE’E, HAHÚ AGORA BA OIN INFORMASAUN HOTU-HOTU SEI ATUALIZA DEIT IHA PÁJINA FOUN “Mídia MSSI IX Governu Konstitusionál”. BA BELUN SIRA-NIA KOMPRENSAUN BA MUDANSA IDA-NE’E, LA HALUHA AMI HATO’O AGRADESIMENTU WA’IN.

Ministra MSSI Partisipa Iha Inaugurasaun Sentru Sosiál Padre Manuel Nunes Formigão

Ministra Solidaridade Sosiál no Inkluzaun, Verónica das Dores ho Ministra Saúde, Élia dos Reis Amaral, akompaña Primeiru Ministru (PM) Kay Rala Xanana Gusmão hodi hala'o inaugurasaun ba Sentru Sosiál Padre Manuel Nunes Formigão, ne’ebé hala’o iha Suku Tapo Memo, Postu Administrativu Maliana, Munisípiu Bobonaro, Sexta-Feira, (28/06/2024).

Serimónia inaugurasaun ne'e koa fita husi Primeiru-Ministru, Kay Rala Xanana Gusmão akompaña husi Ministra MSSI, Verónica das Dores, Representante Kongregasaun, Irmã Rosa Ribeiro, Prezidente Fundasaun no Diretora Sentru Sosiál, Irmã Cristina Macrino no bensaun husi Amu Paroku Maliana, Pe.Valério Gusmão.

Primeiru-Ministru, Kay Rala Xanana Gusmão liu hosi diskursu hateten, problema bo'ot ne'ebé Timor Leste infrenta mak kualidade edukasaun, tanba falta profesór sira no menus kualidade. Tanba ne’e, Xefe Governu hato’o agradese wa’in tebes ba doadór sira nia apoiu, inklui mós madre sira nia tulun hodi harii sentru formasaun ka sentru sosiál atu forma Timor oan sira, liu-liu labarik sira, jerasaun foun sira atu sai matenek nu'udar aset ba Timor atu lori Timor-Leste ba oin.

“Ha’u kontenti mai iha ne'e, ita hotu hamutuk inaugura fatin ida ne'e, Sentro Sosiál Padre Manuel Nunes Formigão. Bainhira ami hasoru malu iha Konsellu Ministrus, ko’alia kona-ba problema edukasaun, falta profesór no falta kualidade profesór sira nian. Ha’u hatene profesór sira balun husi Maliana ba Díli halo protesta, maibé ita tenke tuir regra. Ita tenke prepara ita-nia labarik sira ho kualidade, hadi’a sira nia mentalidade liu hosi formasaun sira,” katak Xefe Governu Kay Rala Xanana Gusmão.

Iha fatin hanesan, Ministra Solidariedade Sosiál no Inkluzaun, Verónica das Dores hateten, konstrusaun ne'ebé di’ak iha nasaun ida hatudu katak, nasaun ne'e iha prosperiedade, paz no inkluzaun, valor aban-bainrua nian ba futuru jerasaun foun.

“Ha’u husi ministériu ida ne'ebé haree ba feto faluk, oan ki’ak no sira ne'ebé hasoru problema oi-oin iha fatin-fatin wainhira IX Governu simu posse hahú iha dia 1 Jullu 2023, ema rihun atus mak tanis no fakar mataben ba governu ida ne’e ninia kabaas, maibé atu hateten iha ne’e katak ohin obra ida ne’e sai mós sasin ba ami-nia responsabilidade ba ema moris sira no ba martires no eroi sira nia ran, iha ema rihun atus ida resin nia kontribuisaun ba ita nia ukun rasik aan.
Konstrusaun nasaun no konstrusaun estadu ne’e presiza prepara ita-nia jerasaun foun para aban bainrua lori ita-nia nasaun ne’e prósperu, inkluzivu, paz no armonia. Ita harii eskola ida ne’e, liu husi madre sira hamutuk ho Instituisaun Solidariedade Sosiál-ISS, ita prepara ita-nia jerasaun foun sira ne’ebé kualidade iha futuru,” dehan Ministra Verónica das Dores.

Nia hatutan tan katak, nu'udar Timor oan tenke halo buat ruma ba futuru nasaun ida ne'e. Iha misaun rua mak Timor oan sira tenke hala’o mak responsabilidade ba ema atus ba atus ne’ebé mak mate ba rai ida ne'e, tanba nasaun ida ne’e harii ho ran no ruin.

“Iha Ásia Pasífiku, Timor-Leste ema haree nasaun ki’ik oan ida mak la serve no la vale. Tanba ne'e, ha’u lori Ministériu Solidariedade Sosiál no Inkluzaun-MSSI nia naran hato’o agradese wain ba ita bo'ot sira nia kontribuisaun ba rai ida ne'e hodi harii sentru sosiál ida ne'e. Ida ne'e ami labele selu, maibé hakerek hela iha lalehan no hakerek mós iha rai ida ne'e,” tenik Ministra Verónica.

Nune’e mós Prezidente Autoridade Munisípiu (PAM) Bobonaro, Alexandre Pires hato’o agradese wa’in ba fundasaun madre sira nian ne’ebé ho esforsu tomak no tau forsa hamutuk bele harii sentru sosiál ka sentru formasaun iha Munisípiu Bobonaro.

“Ha’u lori povu no autoridade lokál sira nia naran, hato’o agradese wa’in ba Prezidente Fundasaun no Diretora Sentru Sosiál ne'ebé ho domin tomak, domin ba povu Bobonaro hodi harii sentru formasaun ida ne’e,” katak Alexandre.

Partisipa iha Serimónia inaugurasaun mak, Embaixadora Portugal, Padre no Madre sira, Diretor Jerál MSSI, Diretóres Nasionais MSSI, Diretór Sentru Solidariedade Sosiál no Inkluzaun Munisípiu Bobonaro, Autoridade Lokal Munisípiu Bobonaro, Estudante no Komunidade Memo inklui Kompania sira ne’ebé mak fó apoiu ba Konstrusaun Sentru Sosiál. DNPCRP

SSSIMD Hala’o Enkontru Daruak Ho Membru Rede Referál

Sentru Solidariedade Sosiál no Inkluzaun Munisípiu Díli-SSSIMD hala’o enkontru ho membru rede referál Munisípiu Díli. Enkontru daruak ba tinan 2024 ida ne’e, ho objetivu atu partilla informasaun ba malu kona-ba progresus no dezafius servisu liga ho atendimentu uma mahon ba vítima sira, nune’e bele identifika hamutuk atu foti desizaun estratéjiku balun hodi mellora atendimentu ba vítima sira (labarik sira ne’ebé hetan kazu violénsia seksuál, kazu abandona, insestu, violénsia doméstika no violénsia bazeia ba jéneru). Enkontru refere lidera husi Diretóra SSSIMD, Judit dos Reis Sarmento ne’ebé hala’o iha Edifísiu MSSI-Bemori, Sexta-feira, (28/06/2024).

Partisipa iha enkontru ne’e mak hanesan, Xefe Departamentu protesaun no promosaun ba labarik, Xefe Departamentu Asisténsia no Inkluzaun Sosiál ba SSSIMD, Funsionárius SSSIMD inklui Parseirus.

DNPPD Sensibiliza POP Integradu Saúde Mental no Apoiu Psikososiál

Baucau - Diresaun Nasionál Portadores Ema ho Defisiénsia (DNPPD-sigla Portugês), hamutuk ho Sentru Solidariedade Sosiál no Inkluzaun Munisipiu Baucau, ho Pontu Fokal Ema ho Defisiénsia, organiza workshop kona-ba Sensibilizasaun Padraun Operasionál no Prosedementu Integradu Referal Saúde Mentál no Apoiu Psikososiál ba komunidade iha Timor-Leste, ne’ebé realiza iha
Salaun INFORDEPE Postu Baucau Vila, Segunda-feira (24/06/2024).

Padraun Operasionál no Prosedementu (POP) nia Objetivu maka, atu guia tékniku sosiál sira, pesoal saúde no parseiru relevantes sira ne’ebé servisu ba área saúde mental, inklui membru komunidade sira, hodi hahú husi identifikasaun, no re-integrasaun ba iha prosesu tomak hodi apoiu psikososiál ba kliente.

Objetivu seluk, hodi guia familia no komunidade oinsá kolabora ho partes relevantes hodi responde ba slogan saúde mental katak “família maka klínika no komunidade maka ospital”. Objetivu ikus maka, hodi define papel no responsabilidade husi kada instituisaun no organizasaun sosiedade sivil, inklui liña koordenasaun ba iha prosesu tomak ba apoiu ba ema ho moras mental.

Enkuantu aplikasaun POP referal saúde mental no apoiu psikososiál ba membru rede referal sira tenke uza mata-dalan ida-ne’e wainhira hala’o atendimentu ba saúde mental no apoiu psikososial iha Timor-Leste. Mata-dalan ne’e nia aplikasaun hodi responde ba atendimentu saúde mental no apoiu psikososial iha Timor-Leste sein haree ba nia jéneru, orientasaun seksual, orijin, rasa, suku, fé, idade, ema ho defisiénsia, no ema moris ho HIV inklui labarik sira.

Tuir mata-dalan ne’e, kada membru rede referal atendimentu saúde mental no apoiu psikososial tenke hala’o tuir prosidementu ne’ebé sita ona iha mata-dalan, no komplementa ho matan-dalan ne’ebé ligadu ba protesaun labarik no grupu vulneravel sira hanesan Ema ho Defisiénsia, Ema ho HIV, no LGBTI. DNPCRP

Ministra MSSI Lidera Enkontru Konsellu Konsultivu Daruak

Dili, 27 Juñu 2024 – Ministra Solidariedade Sosiál no Inkluzaun, Verónica das Dores, lidera enkontru Konsellu Konsultivu ba daruak Ministériu Solidariedade Sosiál no Inkluzaun (MSSI), iha Salaun MSSI Kaikoli Dili.

Haktur ba Lei Orgánika nú.54/2023, MSSI iha dever atu realiza enkontru Konsellu Konsultivu, nu’udar forum ofisial ministériu nian, hodi halo diskusaun estratéjiku kona-ba implementasaun programa, atinjimentu sira no rona mós desizaun estratéjiku no polítika sira-ne’ebé pertinente ba implementasaun programa no atividade iha ministériu.

Forum ne’e mós sai nu’udar plataforma hodi análize susesu ka atinjimentu sira, fatór hirak ne’ebé kontribui ba susesu sira no identifika mós obstaklu sira, no koletivamente foti desizaun hodi hadi’ak.

Tan ne’e, enkontru Konsellu Konsultivu ne’e lidera direta husi Ministra, akompaña husi Vise-Ministra no Diretór-Jerál na’in rua. Enkontru ida-ne’e organiza husi Diresaun-Jerál Protesaun Sosiál kada trimestral, bazeia ba artigu 11 Orgánika MSSI, maibé iha mós posibilidade hodi hala’o enkontru Konsellu Konsultivu extraordinariamente bainhira nesesita.

Enkontru Konsellu Konsultivu ne’e partisipa husi Diretór Jerais, Prezidente INSS, Inspetór, Diretóres Nasionais, Diretóres Sentru Solidariedade Sosiál no Inkluzaun Munisipais, Assesores, Xefe Gabinetes no Xefe Departamentu sira iha MSSI. DNPCRP

Ministra MSSI Apresia Fiskalizasaun Komisaun C ba INSS-FRSS

Dili, 27 Juñu 2024 – Ministra Solidariedade Sosiál no Inkluzaun, Verónica das Dores, hato’o apresiasaun ba Prezidente Komisaun C Parlamentu Nasionál, ne’ebé trata asuntus Finansas Públikas, Cedelísia Faria dos Santos, ho ninia komitiva ne’ebé foti inisiativa hodi halo fiskalizasaun ba Institutu Nasionál Seguransa Sosiál no Fundu Rezerva Seguransa Sosiál (INSS-FRSS).

“ami agradese tanba Prezidente Komisaun C ho komitiva bele to’o iha ne’e hodi halo fiskalizasaun ba INSS-FRSS. Tanba ne’e, tékniku sira husi INSS-FRSS iha ne’e hotu, sei aprezenta ba Prezidente ho komitiva lalaok ezekusaun orsamentu no programa sira, inklui hakarak rona mós hanoin di’ak sira husi Parlamentu Nasionál ne’ebé reprezenta povu nia lian, reprezenta mós Nai Maromak-Nia lian”, katak Ministra.

Iha fatin hanesan, Prezidente Konsellu Administrativu INSS-FRSS, Arlindo Pinto hatete, Komisaun C halo fiskalizasaun ba Administrasaun Sentral INSS-FRSS, hodi halo diskusaun no rona esklaresementu husi INSS-FRSS kona-ba ezekusaun Orsamentu Jerál Estadu ne’ebé atribui ba INSS-FRSS.

“fiskalizasaun ne’e importante tebes ba deputadu sira, tan ne’e ami agradese tanba sira bele mai iha administrasaun sentral, hodi buka hatene ezekusaun Orsamentu Jerál Estadu ne’ebé atribui ba INSS-FRSS”, dehan Prezidente INSS-FRSS ne’e.

INSS mós hasai ona sirkular ba liña ministeriál hotu-hotu atu fó instrusaun ba parte Rekursu Umanus, atu kada fulan hato’o deklarasaun remunerasaun mai INSS-FRSS atu ajusta iha Sistema, hodi halo produsaun ba sira-nia kartaun NISS,” husu Prezidente INSS ne’e.

Entretantu Prezidente Komisaun C, deputada Cedelísia Faria dos Santos apresia ho esforsu INSS-FRSS ne’ebé selebra ona akordu Investimentu kapitalizasaun Fundu Rezerva Seguransa Sosiál kona-ba Depósitos a Prazo durante fulan neen (6), ho Banco Nacional de Comércio de Timor-Leste (BNCTL), ho total investimentu pruvolta $50 milloens, no Banco Nacional Ultramarino (BNU), $30 milloens. Husi total investimentu ne’e, banku rua sei oferese jurus (funan) rentabilidade ba INSS-FRSS pruvolta $1.5 milloens. DNPCRP

MSSI Apoia Ai-han ba Ema ho Defisiénsia Iha Faturasa

Aileu- Ministériu Solidariedade Sosiál no Inkluzaun (MSSI), liuhusi Sentru Solidariedade Sosiál no Inkluzaun Munisipiu Aileu (SSSIMA), apoia ai-han food item ho non-food item ba Ema ho Defisiénsia (EhD), iha Suku Faturasa, Postu Administrativu Remexio, Munisipiu Aileu, Kuarta-feira (26/06/2024).

Atividade apoia ai-han ne’e organiza husi Diretór SSSIMA, Salvador da Costa de Andrade ho ninia ekipa, akompaña husi autoridade lokal Suku Faturasa. Família benefisiáriu sira apresia ho apoiu ida-ne’e, tanba bele tulun membru família ne’ebé ho kondisaun defisiénsia.

Atividade apoiu ai-han ne’e bazeia ba programa asisténsia sosiál MSSI nian, ho objetivu atu garante resposta sosiál adekuadu ba sira ne’ebé moris iha situasaun vulnerável, hanesan família ne’ebé afetadu husi dezastre, família kbiit-laek, feto faluk, oan-ki’ak abandonadu, pasiente vulnerável, idozus no ema ho defisiénsia.

Alende hala’o atividade apoia ai-han ba EhD, hala’o mós atividade dezaminasaun informasaun kona-ba Programa Bolsa da Mãe Kondisionál ba komunidade sira iha Suku Faturasa no Suku Bandudato, Postu Administrativu Aileu villa. DNPCRP-SSSIMA

Sentru Solidariedade Sosiál no Inkluzaun Munisipiu Aileu (SSSIMA), partisipa iha atividades dezeminasaun informasaun kona-ba lalaok Administrasaun, Rekursu Umanus no Patrimóniu iha salaun enkontru SSSIMA, Kuarta-feira, (26/06/2024).
Atividade dezeminasaun ne’e hala’o husi Diresaun Nasionál Administrasaun, Rekursu Umanus no Patrimóniu, husi Ministériu Solidariedade Sosiál no Inkluzaun (MSSI), ho objetivu atu mellora lalaok administrasaun, rekursu umanus no patrimóniu sentru nian, hodi evita erru iha ezekusaun programas no atividade sira.

SSSIMB Dezemina Informasaun ba Autoridade Sukus no Komunidade

Baucau - Sentru Solidariedade Sosiál no Inkluzaun Munisipiu Baucau (SSSIMB), realiza atividades dezeminasaun informasaun kona-ba programa Bolsa da Mãe Kondisionál, Lei Protesaun ba Labarik no Joven iha Perigu (LPLJP), Violénsia Bazeia ba Jéneru (VBJ), Programa Asistensia Sosiál no pensaun sosiál ba idozus no inválides, ba autoridade sukus no komunidade Suku Triloka no Suku Samalari, Postu Administrativu Baucau Vila, Munisipiu Baucau, Kuarta-feira, (26/06/2024).

Programa Bolsa da Mãe Kondisionál nia objetivu atu hamenus ki’ak, promove frekuénsia ba ensinu báziku obrigatóriu, no hasa’e utilizasaun atendimentu saúde primária. Tuir programa ne’e, labarik iha ensinu primaria (SD) simu $8 kada fulan, ensinu pre-sekundaria (SMP) simu $9, labarik iha Ensinu Sekundaria (SMA) simu $10 kada fulan, no ba labarik ho defisiénte iha nivel eskolaridade tolu ne’e simu $15 kada fulan.

Nune’e mós Lei nú. 6/2023–LPLJP ninia objetivu atu promove direitu no protesaun ba labarik no joven iha situasaun perigu, liuhusi dalan garante sira-nia moris di’ak no dezenvolvimentu integral. Enkuantu dezeminasaun knaar rede referral VBJ nia objetivu atu hamenus no finalmente halakon violénsia bazeia ba jéneru ne’ebé afeta ba feto, mane no labarik sira iha komunidade.

Entretantu programa Asisténsia Sosiál nia objetivu mak atu garante resposta sosiál adekuadu ba sira ne’ebé moris iha situasaun vulnerável, hanesan família ne’ebé afetadu husi dezastre, família kbiit-laek, feto faluk, oan-ki’ak abandonadu, pasiente vulnerável, idozus no ema ho defisiénsia. Ikus liu ba idozu sira ne’ebé iha tinan 60-69 simu $60 kada fulan, tinan 70-79 simu $80 kada fulan, no tinan 80 ba leten simu $100 kada fulan. DNPCRP-SSSIMB

Sentru Solidariedade Sosiál no Inkluzaun Munisipiu Baucau - SSSIMB, realiza atividade divulgasaun informasaun kona-ba servisu sosiál iha Suku Tequinomata, Sexta-feira, (21/06/2024). Partisipa iha atividade refere mak hanesan lideransa suku, komunidade no Ofisiál Polisia Suku (OPS). Objetivu husi divulgasaun informasaun ne’e atu komunidade bele hatene servisu sosiál ne’ebé hala’o husi Ministériu Solidariedade Sosiál no Inkluzaun (MSSI), liuhusi Sentru Solidariedade Sosiál no Inkluzaun Munisípiu Baucau, liga ba programa asisténsia sosiál ba ema vulnerável. DNPCRP

Ministra MSSI Akompaña Husi Ministra Saúde Distribui Ai-Han ba Maluk Afetadu Moras Lepra Iha Munisípiu Manatuto

Manatuto, Tersa 25 Juñu 2024, Ministra Solidariedade Sosiál no Inkluzaun, Verónica das Dores akompaña mós husi Ministra Saúde, Elia dos Reis Amaral, distribui ai-han ba maluk sira ne’ebé maka afetadu ba moras lepra iha Munisípiu Manatuto, Postu Administrativu Laleia, Suku Cai-Rui no kontinua ba Postu Administrativu Manatuto Villa, Suku Aiteas, Aldeia Rembór, no ikus mak iha Aldeia Ili-Manu, Suku Uma Kaduak, Postu Administrativu Laclo.

“Atu hatene deit ohin ami nain rua mai tanba iha objetivu atu apoiu ai-han ba maluk sira ne’ebé maka afeta moras lepra, tanba moras lepra uluk kedas iha, entaun ho objetivu husi apoiu ai-han ba maluk afetadu ba moras lepra ne’e atu hasae sira nia nutrisaun hodi nune’e bele rekopera fila fali sira nia saúde,” dehan Ministra MSSI.

Governante ne’e afirma, ohin mai ho ekipa ida husi Ministériu Solidariedade Sosiál no Inkluzaun-MSSI no Ministériu Saúde-MS ne’ebé mak hamutuk ho Autoridade sira vizita iha Munisípiu Manatuto ne’e ho objetivu ida atu haree liu ba maluk sira ne’ebé maka afeta moras lepra.

“Tanba maluk sira ne’e balun halo tiha ona tratamentu hotu ona maibe presija nutrisaun entaun ohin mai lori ai-han ba maluk sira afeta moras lepra, atu nune’e rekopera fila fali sira nia saúde liu husi ai-han hirak ne’e ami sei kontinua apoiu nafatin,” hateten Ministra MSSI.

Nia akresenta, maluk afetadu lepra ne’e identifika husi Asosiasaun Transforma Lepra iha Timor-Leste (ATLETIL), total pasiente ne’ebé mak afeta ba moras lepra iha Munisípiu Manatuto hamutuk ema nain 160 maka afeta ba moras lepra.

Iha fatin hanesan, Ministra Saúde-MS, Elia dos Reis Amaral haktuir, moras lepra ne’e mai husi mikro bakteria ne’ebé maka afeta ba ita nia kulit, entaun moras ne’e bele halo ita nia liman, ain no ibun sira sai defisiénsia.

“Husu ba inan no aman sira hakbesik a’an ba fasilidade saúde ne’ebe besik hodi halo tratamentu depois husu nafatin ba familia no vizinu sira keta halo deskrimina ba ita nia maluk sira ne’ebé maka afeta moras lepra,” dehan Ministra Saúde.

Nune’e mós, Sekretáriu Asuntu Sosiál Munisípiu Manatuto, Natalino M. Carvalho informa, lori autoridade nia naran hakarak hato’o agradese ba Ministra MSSI no Ministra Saúde tanba bele fó tempu mai haree direitamente maluk defisiénsia moras lepra sira ne’e.

“Hau hato’o agradese ba Ministra MSSI no Ministra MS nia prezensa hodi haree direitamente ami maluk defisiénsia sira ne’ebé maka afeta ba moras lepra iha Munisípiu Manatuto,” dehan Natalino.

Partisipa iha Atividade ne’e maka, Ministériu Solidariedade Sosiál no Inkluzaun-MSSI ho nia komitiva no Ministériu Saúde-MS ho nia komitiva, Diretóra Exekutiva ATLETIL ho nia ekipa, Komadante PNTL Munisípiu Manatuto no Autoridade Lokal sira. DNPCRP

Ministra MSSI Partisipa Serimónia Entrega “GOLDEN BUOY”

Ministra Solidariedade Sosiál no Inkluzaun, Verónica das Dores hamutuk ho membru IX Governu Konstitusionál partisipa iha Serimónia entrega “Golden Buoy” no Primeira Instalasaun Kabu Submarinu Fibra Óptika, ne’ebé ho Objetivu atu moderniza rede telekomunikasaun hodi fasilita komunikasaun ba povu tomak.
Serimónia Primeira Instalasaun Kabu Submarinu Fibra óptika ne'e ofisialmente lansa husi Primeiru Ministru, Kay Rala Xanana Gusmão iha Bebonuk, Díli, Segunda-feira (24/6/2024).

Partisipa iha serimónia ne'e mak Membru IX Governu Konstitusional, Diplomata sira, parseirus dezenvolvimentu no konvidadus sira. DNPCRP

Vise-Ministra MSSI Fila Hikas Husi Nova Iorke

DILI - Vise Ministra Solidariedade Sosiál no Inkluzaun, Céu Brites fila hikas mai Timor-Leste iha Loron Sábadu (22/06/2024), hafoin partisipa enkontru “17th Session of the Conference of states parties to the convention on the rights of person with disabilities, iha Nova Iorke, Estadus Unidus Amérika.

Lansamentu Apoiu Ai-han Ba Komunidade Ne’ebé Afeta Bailoron Naruk (El-Nino)

Ministériu Solidariedade Sosiál no Inkluzaun-MSSI, Ministériu Saúde hamutuk ho Ajénsia Nasoens Unidas ba Programa Ai-han Mundiál (WFP-Sigla Inglés) hala’o lansamentu apoiu ai-han ba komunidade sira ne’ebé afeta husi bailoron naruk (El-Nino). Benefisiárius ba programa ida ne’e mak hanesan, inan isin rua, inan fó susu inklui labarik. Atividade refere hala’o iha Suku Guiço, Postu Administrativu Loes, Munisípiu Liquiça, Sexta-feira, (21/06/2024).

Ai-han hirak ne’e suporta hosi WFP ne’ebé distribui ba komunidade 394 uma kain kompostu husi Suku tolu (3) mak hanesan, Suku Lisadila, Watuboro no Guiço.

Distribuisaun ai-han refere sei kontinua iha Munisipius lima (5) seluk mak hanesan; Munisípiu Bobonaro, Covalima, Ermera, Manufahi no Lautem.

Iha oportunidade ne’e, Ministra Solidariedade Sosiál no Inkluzaun, Verónica das Dores hateten, “apoiu ai-han ida ne'e, hala'o la'ós Timor-leste mak kiak liu, maibé apoiu ai-han ida ne’e hala’o, hodi responde ba bailoron naruk/El nino ne'ebé akontese no fó impaktu ba produsaun agríkola komunidade sira nian menus”.

Aproveita oportunidade ida ne’e, Ministra husu mós ba komunidade sira atu labele sunu rai no tesi ai arbiru hodi asegura labele akontese bai loron naruk, tenik Ministra.

Iha fatin hanesan, Sekretáriu Administrasaun Munisípiu Liquiça, Zito Antonio de Oliveira da Costa apresia no agradese ba MSSI ho nia parseiru WFP ne'ebé ho hanoin di'ak hodi fó apoiu ba nia komunidade sira.

Nia konsidera, programa distribuisaun ai-han ida ne’e hanesan momentu importante, tanba governu, liu husi MSSI ho nia parseiru WFP bele fó apoiu ai-han ba komunidade, liu liu ba família vulneravél sira hodi fó resposta ba ameasa bailoron naruk/El-Nino.

Maibé nia mós husu ba nia komunidade sira atu servisu no prodús ai-han, hodi labele dependénsia hela deit ba governu ho nia parseiru sira, katak Zito.

Nune’e mós Country Director WFP, Cicilia Garzon hateten, “objetivu husi distribuisaun ida ne’e atu ajuda komunidade sira ne’ebe afeta ba bailoron naruk. Ai-han hirak ne’ebé ami apoiu mak foos, koto no Mina. Ba futuru ami sei kontinua Servisu hamutuk ho MSSI hodi responde ba komunidade sira ne’ebé presiza tulun”.

Entretantu, Diretóra Jerál Kuidadu Saúde Primaria, Elisabeth Leto Mau husi Ministériu Saúde hateten, Mudansa klimátika ne’ebé akontese bailoron naruk fó impaktu ba saúde komunidade sira nian, tanba hamlaha no mál nutrisaun bele akontese inklui moras sira seluk bele afeta ba komunidade sira, liu liu ba inan isin rua, inan fó susu no labarik sira. tanba ne'e, presiza servisu integradu entre governu ho parseirus sira hodi responde no ultrapasa situasaun El-Nino refere.

Partisipa iha lansamentu distribuisaun ai-han ida ne’e mak, Deretór Jerál Protesaun Sosiál-MSSI, Diretores Nasionais inklui Diretores Sentru Solidariedade Sosiál no Inkluzaun Munisípiu Bobonaro, Covalima, Ermera, Manufahi, Lautem no Liquiça, Assesores husi Ministra MSSI, Administrador Postu Loes, Xefi Sukus no Xefi Aldeias inklui PNTL Munisípiu Liquiça. DNPCRP

𝐌𝐢𝐧𝐢𝐬𝐭𝐫𝐚 𝐌𝐒𝐒𝐈 𝐄𝐧𝐤𝐨𝐧𝐭𝐫𝐮 𝐡𝐨 𝐑𝐞𝐩𝐫𝐞𝐳𝐞𝐧𝐭𝐚𝐧𝐭𝐞 𝐔𝐍𝐅𝐏𝐀

Ministra Solidariedade Sosiál no Inkluzaun, Verónica das Dores, enkontru koordenasaun servisu ho Reprezentante UNFPA ba Timor-Leste, Bruce Campbell, iha salaun enkontru Ministériu Solidariedade Sosiál no Inkluzaun (MSSI) Kaikoli Dili, Kinta-feira, (20/06/2024).

Objetivu husi enkontru ne’e parte rua partilla kona-ba futuru kooperasaun, no fahe esperiénsia sira ne’ebé bele ajuda governu, hodi implementa programa sira iha kontestu inkluzaun sosiál, tanba iha inkluzaun sosiál labele husik ema ida ba kotuk. 𝐃𝐍𝐏𝐂𝐑𝐏

𝐖𝐅𝐏 𝐄𝐧𝐭𝐫𝐞𝐠𝐚 𝐏𝐚𝐥𝐞𝐭𝐚𝐬 𝟗𝟐𝟓 𝐁𝐚 𝐌𝐒𝐒𝐈

Programa Ai-han Mundiál¬ (WFP-Sigla Inglés) entrega Paletas hamutuk 925 ba Ministériu Solidariedade Sosiál no Inkluzaun-MSSI. Serimónia entrega paletas ne’e, hala’o iha Armajen MSSI Bebora-Díli, Kuarta-feira (19/06/2024). MSSI sei uza paletas hirak ne’e hodi asegura ai-han no sasan sira seluk ne’ebé iha armajen.

WFP sai hanesan parseiru MSSI, desde WFP existe iha Timor-leste, apoiu ne'ebé durante ne'e WFP fó ba MSSI mak hanesan, Ai-han no la'ós ai-han (food item no non food item).

Iha okaziaun ne'e, Deputy Country Director WFP iha Timor-leste, Amin Said hato’o nia apresiasaun ba MSSI, tanba durante ne’e bele kopera servisu di’ak ho WFP.

“Ba futuru, WFP sei kontinua haforsa liu tan kooperasaun ho MSSI, hodi kontinua fó apoiu ba ministériu” (red-tuir nesesidades ne’ebé mak iha), tenik Amin Said.

Entretantu, Diretór Jerál Protesaun Sosiál, Florencio Pina Dias Gonzaga hato’o nia agradesementu ba WFP, tanba bele fó apoiu paletas ba MSSI hodi bele asegura ai-han iha armajen nasionál no munisípiu sira.

“Espera katak, WFP bele kontinua kopera no apoiu di’ak liu tan ba MSSI iha futuru”, dehan Diretór Jerál Protesaun Sosiál, Florencio Pina Dias Gonzaga.

Partisipa iha serimónia entrega paletas ne’e mak hanesan, Diretór Nasionál Asisténsia Sosiál, Xefe Departamentu Asisténsia Humanitária, Xefe Protokolu MSSI, Xefe Gabinete no Assesor sira husi Ministra MSSI inklui funsionárius armajen MSSI nian. 𝐃𝐍𝐏𝐂𝐑𝐏

Ministra Solidariedade Sosiál no Inkluzaun, Verónica das Dores, akompaña husi Prezidente Institutu Nasionál Seguransa Sosiál no Fundu Rezerva Seguransa Sosiál (INSS&FRSS), Arlindo Pinto, ho Assesora Prinsipal Ministra MSSI, Dulce da Cunha, enkontru konsultasaun servisu ho Governadór Banku Sentrál Timor-Leste (BCTL- sigla Portugês), Helder Lopes iha edifisiu sentral BCTL, Tersa-feira, (18/06/2024).

Konferénsia Imprensa Lansamentu Ba Pagamentu Programa Bolsa da Mãe Kondisionál Faze Dahuluk Ba Tinan 2024, iha salaun enkontru MSSI, Kaikoli, Díli 18 Juñu 2024.

𝐌𝐢𝐧𝐢𝐬𝐭𝐫𝐚 𝐌𝐒𝐒𝐈 𝐕𝐢𝐳𝐢𝐭𝐚 𝐅𝐮𝐭𝐮𝐫𝐮 𝐄𝐝𝐢𝐟𝐢𝐬𝐢𝐮 𝐒𝐒𝐒𝐈𝐌𝐁

𝐌𝐚𝐥𝐢𝐚𝐧𝐚, 𝟏𝟓 𝐉𝐮𝐧̃𝐮 𝟐𝟎𝟐𝟒 - Ministra Solidariedade Sosiál no Inkluzaun, Verónica das Dores hala'o vizita ba rai ne'ebé tuir planu atu harii edifisiu foun Sentru Solidariedade Sosiál no Inkluzaun Munisipiu Bobonaro (SSSIMB), iha Aldeia Samelau, Postu Administrativu Maliana, MunisipiuBobonaro.

Hafoin fila husi neba, Ministra kontinua halo viazen kortejia ba Uma Mahon Maria Tapo hodi observa situasaun real ne'ebé uma mahon ne'e hasoru, liuliu atu halo ho lalais manutensaun ba kareta ida ne'ebé durante ne'e uza hodi tula vitima sira ba tribunal.

Ikus liu Ministra mós hala'o vijita ba Asosiasaun Halibur Defisiénsia Rejiaun Oeste (AHDRO), simu direta husi Diretor AHDRO, Sebastiano Goveia de Fátima, hodi rona preokupasaun sira kona-ba apoia fasilidade formasaun letra braille ba formandu sira.

Diretor asosiasaun ne'e hato'o agradesementu ba Ministra tanba bele vijita ona sira hodi rona mós sira nia preokupasaun. 𝐃𝐍𝐏𝐂𝐑𝐏

𝐃𝐢𝐫𝐞𝐭𝐨́𝐫 𝐒𝐒𝐒𝐈𝐌𝐁 𝐑𝐞𝐥𝐚𝐭𝐚 𝐏𝐫𝐨𝐠𝐫𝐞𝐬𝐮 𝐒𝐞𝐫𝐯𝐢𝐬𝐮 𝐁𝐚 𝐏𝐫𝐢𝐦𝐞𝐢𝐫𝐮 𝐒𝐞𝐦𝐞𝐬𝐭𝐫𝐞 𝐓𝐢𝐧𝐚𝐧 𝟐𝟎𝟐𝟒

𝐁𝐚𝐮𝐜𝐚𝐮 𝟏𝟕 𝐉𝐮𝐧̃𝐮 𝟐𝟎𝟐𝟒-Diretór Sentru Solidariedade Sosiál no Inkluzaun Munisípiu Baucau-SSSIMB, Clementino Sarmento relata progresu servisu ba semestre primeiru-2024 ho nia dezafius ne’ebé hasoru iha implementasaun atividades no programa. Progresu servisu no dezafius hirak ne’e, Diretór SSSIMB hato’o ba Ekipa Média-MSSI, Segunda-feira, iha Edifísiu Sentru Solidariedade Sosiál no Inkluzaun Munisípiu Baucau.

Diretór Sentru Solidariedade Sosiál no Inkluzaun Munisípiu Baucau-SSSIMB, Clementino Sarmento hateten, “hahu husi fulan janeiru to’o juñu 2024, SSSIMB hala’o atividades hanesan, dezeminasaun programa protesaun labarik, violénsia bazeia ba jéneru-VBJ, programa defisiénsia nian ba iha Suku no Postu Administrativu sira ne’ebé parténsia husi Munisípiu Baucau, aleinde hala’o dezeminasaun, SSSIMB mós fó apoiu asisténsia humanitária ba grupus vulnerável sira ne’ebé presiza tebes MSSI nia tulun, liu husi pedidu Autoridade Komunitária, maibé antes fó apoiu ba benefisiárius hirak ne’e, ekipa SSSIMB hala’o uluk asesmentu hodi identifika no haree kondisaun real benefisiáriu sira nian”.

Diretór friza liu tan, wainhira hala’o atividades hirak ne’e, SSSIMB hasoru dezafius mak hanesan, falta transporte, distánsia ne’ebé dook entre suku ida ba suku sira seluk, ne’ebé difikulta tékniku sira iha sentru no iha postu administrativu hodi hala’o sira nia servisu ho di’ak,

“Ba futuru, dezafius hirak ne’e la’os sai hanesan bareira ba ami, maibé ami nafatin esforsu hodi buka meus oi-oin hodi solusiona no kontinua nafatin fó atendimentu ba ita nia komunidade sira iha Munisípiu Baucau”, hakotu Diretór Sentru Solidariedade Sosiál no Inkluzaun Munisípiu Baucau-SSSIMB, Clementino Sarmento.

Hafoin entrevista, Ekipa Média-MSSI entrega mós kalendáriu Ministériu Solidariedade Sosiál no Inkluzaun tinan 2024 ba Diretór SSSIMB. 𝐃𝐍𝐏𝐂𝐑𝐏

𝐌𝐢𝐧𝐢𝐬𝐭𝐫𝐚 𝐌𝐒𝐒𝐈 𝐀𝐬𝐢𝐧𝐚 𝐀𝐤𝐨𝐫𝐝𝐮 𝐏𝐚𝐫𝐬𝐞𝐫𝐢𝐚 𝐇𝐨 𝐈𝐒𝐒 𝐁𝐚 𝐓𝐢𝐧𝐚𝐧 𝟐𝟎𝟐𝟒

𝐃𝐢𝐥𝐢, 𝟏𝟖 𝐉𝐮𝐧̃𝐮 𝟐𝟎𝟐𝟒 - Ministra Solidariedade Sosiál no Inkluzaun, Verónica das Dores, asina akordu parseria entre Ministériu Solidariedade Sosiál no Inkluzaun (MSSI), ho Instituisaun Solidariedade Sosiál (ISS) hamutuk 30, ne’ebé hetan ona utilidade sosiál husi MSSI ba Programa Subvensaun Públika tinan fiskál 2024, ho totál orsamentu US$ 1,309,453.24. Selebrasaun akordu parseria ne’e hala’o iha salaun enkontru MSSI Kaikoli Díli.

Hafoin asina tiha akordu, Ministra apela ba ISS sira atu utiliza orsamentu ida-ne’e tuir regras, hodi tau matan ba ema vulnerável sira liuliu feto no labarik sira, liuhusi hadi’ak mekanizmu atendimentu, tanba sira presiza tebes hetan tratamentu espesiál.

Iha biban ida-ne’e Ministra mós relata ba mídia sira kona-ba akordu ne’ebé asina ho ISS katak “Ohin ita asina akordu ho ISS tanba Instituisaun sira ne’e reprezenta MSSI nia liman ain, atu tau matan ba vítima sira hanesan; feto faluk, oan ki’ak, ema ho difisiénsia, ferik ho katuas, no sidadaun sira ne’ebé iha situasaun vulnerábilidade, entaun instituisaun sira ne’e maka atu tau matan ba sira,” dehan Ministra.

Entretantu, Diretór Jerál Protesaun Sosiál, Florêncio Pina Dias Gonzaga iha ninia intervensaun, husu ba ISS sira atu implementa orsamentu tuir programa ne’ebé previstu ona. Diretór Jerál ne’e mós apresia prestasaun servisu ISS sira nian, tanba mesmu iha prosesu avaliasaun todan uitoan, maibé MSSI hakarak promove transparansia iha ezekusaun orsamentu no programa sira hotu, katak Floréncio. 𝐃𝐍𝐏𝐂𝐑𝐏