Moonego

Polɩɩsã taoor dãmb sega kiba-kɩtbã

Sapaolg kiuug rasem 26 yʋʋm 2022 soabã, polɩɩs rãmbã taoor dãmb talla sɛk ne kiba kɩtbã n na n kõ-b vẽenem, sẽn na n yɩlẽ tɩ b bãng b tʋʋmdã sẽn ya a soaba, la b sẽn segd n kogl nebã ne b arzɛkã toto. Komisɛɛr Apolineer KAFAAND sẽn ya polɩɩs rãmbã kiba-kɩt togsame, tɩ f sã n dat n kõ ned sɩda, rẽnd f reng n bãng a sẽn ya a soaba. Yaa rẽ n kɩt tɩ b bool kiba-kɩtbã n na n wilgb polɩɩs tʋʋm na-kẽndr sẽn segd n yɩ a soaba. Polɩɩs rãmbã taoor soab a Rooze WEDRAOOGO, sõasgã ne kiba-kɩtbã sõngame tɩ b paamd vẽenem wʋsgo, polɩɩs rãmbã sẽn be tẽngã pʋg n tʋmdẽ võore. Polɩɩs p**i tʋʋm pakre, yaa nebã ne b arzɛkã koglgo. Yaa rẽ n kɩt tɩ b rɩk na-kẽndr n wilg-b polɩɩs rãmbã tʋʋmde, sẽn na n yɩlẽ tɩ b tõog n tʋm b tʋʋmdã kibayã kũun wɛɛngẽ t’a tẽeg tɩrga. Polɩɩs rãmbã taoor soab pẽga kiba-kɩtbã tʋʋmde, b kibaya kũun sẽn ya toto wã.

Kell n yɩɩ wakat polɩɩs rãmbã taoor soab sẽn wilg bãmb tʋʋma na-kẽndre, la neb sõor sẽn be a pʋgẽ, la btʋʋma zãmsg na-kẽndr sẽn ya a toto. Veẽnmã kũun poore, kiba-kɩtbã tall sogsg buud toor-toore, la b kõ b me tasgo, sẽn na n sõng tɩ b ne polɩɩs rãmbã tʋmd-n-taar tõog n paam pãnga. Kiba-kɩtbã sẽn gom a soab n yɩɩda, yaa ninsaal yam daabã , sull ning sẽn zabd ne rẽ wã rãmb sẽn wilg tɩ polɩɩs rãmbã n be taoorã.
Zĩ-kãnga, a Rooze WEDRAOOG kos-b lame tɩ b sã n wa yã tɩ polɩɩs tʋmd ninsaal yam daab tʋʋmd bɩ b ning pãng tɩ ta b taoor dãmbã. A kell n kosa nebã fãa tɩ b sã n yã polɩɩs t’a yals sor zug n yeel t’a yao la a looge, a soabã ka segd n kõ-a ligd ye. B sẽn yet t’a soab yao wã tog n talla gomdã n kẽng Komsɛɛrya sẽn pẽ n tɩ wilg sebr ning b sẽn kõ-a wã, la a yao yaood ning b sẽn yeel t’a yao wã. Polɩɩs rãmbã taoor soab wilgame tɩ wakat sẽn wat pʋgẽ, b na n le sigla tʋʋm a taaba, sẽn na n kɩt tɩ kiba-kɩtbã ne polɩɩs rãmbã tʋmd-n-taar paam pãnga.
kibarã yii Faso.net

raamde-bf.net

Moonego
raamde-bf.net

Burkĩna Faso tẽngã taoor soab togsa tẽngã nu-gãaga

Rasem sẽn looge, tẽngã taoor soab ra sega lagem-n-taar sula buud toor-toor taoor dãmba, la pagtɩ Politikã rãmba. B seg-taabã fãa poore, Sapaolg kiuug rasem 13 yʋʋm 2022 soabã, Ɛɛrtebe la sull ning sẽn get na-zakẽ kibayã, yiisa tẽngã taoor soab koees a sẽn gomd ne Burkĩna Faso nin-buiidã n togsd bũmb nins b sẽn segd n maan tẽngã koglg wɛɛngẽ.

A wilgame tɩ tẽngã beoog neer bee ned kam fãa nugẽ, la zu-bʋkã, neb wʋsg pa rɩk tẽngã sẽn vʋɩ nug ningã tɩ ya b zuloees ye. A paasame tɩ sodaasã sula kẽera ra kẽesa mens politikã tʋʋm pʋga. Rẽ kɩtame tɩ ba b sã n boond nebã tɩ b kẽes b toog n sõng tɩ b zabe, leokrã pa tolg n ya vẽeneg fasɩ ye. A wilgame tɩ bãmb sẽn da be zabrã pʋgẽ wã, b ra nee bũmbã fãa sẽn kẽnd toto. Kapitɛnd Yɩbrayɩɩm TARWAR wilgame tɩ nebã sã n na n wa bãng tɩ tẽngã bee yell pʋgẽ, ya b sẽn na n wa mik tɩ b ka le tõe n yi tẽn-bɛdã pʋsẽ bɩ b yi ye. Wakat kãng masã, la neb wʋsg na n bãng yellã sẽn taẽ. A kell n bẽdame n wilg tɩ nin-wẽnsã sẽn yãmb babg nins pʋsã neb wʋsg vʋɩɩ ninbãaneg pʋgẽ. Yaa rẽ t’a wilg tɩ nebã fãa n segd n kẽes b toogo. Bala, ka arzɛk n ka be tõnd tẽngã ye, yaa nebã n pa tar ninbãanzoeer ne taaba. A kẽnga taoor n paas tɩ yellã yãgre, yaa nebã fãa n wa ne-a. Sõng-taabã boogdame. Yaa rẽ t’a kot nin-buiida tɩ b gãd taab nus tɩ rẽ, la b na n tõoge.

Kibarã yii Burkĩna 24

A Wʋsmaan BUGMA lebga tãrãzisẽo wã depite rãmb taoor soaba

Sapaolg kiuug rasem 11 yʋʋm 2022 soabã, tãrãzisẽo wã depite rãmb sega taab Asãmble nasnall wala, b sẽn gʋls n wilg tãrãzisẽo wã sẽn segd n zã toto wã pʋgẽ. Tʋʋmdã sɩngrẽ, yɩɩ Asãmble wã seb -gʋnd-kaseng n dɩk koɛɛga, tɩ tʋʋmdã sɩnge. Tʋʋmdã tɩʋʋsg poore, b yãk a Burɛɛma TARWAR sẽn ya depite rãmbã fãa kasem t’a lʋɩ tʋʋmdã taoore. Yaa rẽ poore, la b yãk neb nins sẽn na n lʋɩ depite rãmbã taoore.
Yɩɩ depite rãmb a tãab n wilg tɩ b rat n lʋɩɩ Asãmble wã taoore. Sẽn wilg-ba, ya a Daooda GƐLLO, a Wʋsmaan BUGMA, la a Benedit BAYILU. A Daooda GƐLLO, wa n wilgame t’a yiis a meng wags-taabã pʋgẽ. Yẽ yi wã, wa n kell a Wʋsmaan BUGMA ne a Benedit BAYILU. Votã pʋgẽ depite rãmbã yãka a Wʋsmaan BUGMA t’a lʋɩ b taoore. A Wʋsmaan BUGMA ra yɩɩ deptte tʋʋlg kiuug n tãag bõn-bɩʋʋng kiuug yʋʋm 2022 soabã, Asãmble ning sẽn lʋɩ wã pʋgẽ, n da get ninsaal yalẽ wã yelle. Dogtɛɛr Wʋsmaan BUGMA yaa sari karen-saamba, n be Yinivɛrsite Tooma SÃNKARÃ pʋgẽ. Depite rãmbã yãk-a lame t’a lʋɩ b taoore.

kibarã yii Faso.net
www.raamde-bf.net

Rog-N-Mikã Ne Dĩinã Taoor Dãmb Sega Tẽngã Taoor Soaba

Posted on 25 mars 2022 Authorjuleskaf

Tʋʋlg kiuug rasem 24 yʋʋm 2022 soabã, Burkĩna Faso tẽngã taoor soaba, Letena Kolonell Poll Ãari Sãadaoogo DAMIB reega rog-n-mik nannambse, tigung katoliki, merka , la lislambã taoor dãmb Kosyam.

B sõsa ne taaba, sẽn kẽed ne tẽnga nug gãag sẽn be zĩig ningã, n ges ned kam fãa sẽn tõe n kẽes a toog toto tɩ tãrãzisẽo wã tõog n kẽn wa sẽn segde. Tẽngã taoor soab sũur yɩɩ noogo. A kell n kos-b lame tɩ b sɩd tʋm n sõng-a, tɩ nin-buiidã vɩɩmd-n-taare la b wʋm taabã tõog n kẽng taoore, tɩ tẽngã gãad bãane. Sõasga poore, rog-n-mik nanambsã la dĩinã taoor dãmb wilgame tɩ zu-loees nins sẽn be wã ya b fãa yel-pakre, la b na n yãag taab n tʋm tɩ laafɩ lebg n wa. B pegame la b wilg tɩ b be a poorẽ wĩndg la yʋngo. B na n maoome tɩ tãrãzisẽo wã tõog n kẽnd ne zemsgo tɩ tẽngã kamb lebg n wʋm taaba.

Kibarã yii na-zakẽ kiba-kɩtba nengẽ
raamde-bf.com

Minisr Ning Sẽn Get Kadensã La Yõ-Koglgã Keoogda Nin-Buiidã

Posted on 16 mars 2022 Authorjuleskaf

Miniis Kolonell Mazoor Omeer BATEONO yiisa mooneg koɛɛg tʋʋlg kiuug rasem 15 yʋʋm 2022 soabã, n wilg tɩ neb n be reezo soso rãmbã pʋs n kõt kibay sẽn pa sɩda, sẽn kẽed sodaarã tʋʋm wɛɛngẽ. Ya arẽ t’a pĩnd n keoogd-b rãmba, tɩ b sã n leb n yiis kibare, tɩ b mik tɩ yaa ziri, b na n paama sɩbgre.

A wilgame tɩ neb n yiisd kibayã, la b kibayã sãamda sodaasã nins sẽn zabd-b ne nin-wẽnsã yʋya. Sẽn yɩɩd fãa nug n bãensã b sẽn boond tɩ reezo soso rãmbã zutu. B rãmb bãng tɩ b rɩka na-kẽndre, n na n sɩbg neb nins sẽn kõt kibay n yaool n pa tar kaset vẽenes b kibayã zugu. Miniisrã paasame tɩ b sã n yã kibay sẽn tõe n wa ne Burkĩna Faso nin-buiidã welgre, pa rẽ bɩ sẽn na n wa ne mo-yõsr tẽngã pʋga, b pa na n maan zoe nif ne a soab ye, b na n dɩka sɩbgr sẽn zems ne a soabã tʋʋmd n dogl-a. Kolonell Mazoor Omeer BATEONO kell n tũnuga mooneg koɛɛgã n bool Burkĩna Faso nebã fãa tɩ b yɩ maag-m-mens rãmba; la b tʋm nin-buiidã na zems taab n n zab n tõog nin-wẽnsa sẽn sãamd nebã sũy wakat fãa wã.

Kibarã yii minut.bf
raamde-bf.com

Gosneerã Taoor Soab Zĩnda Ne A Miniisr Dãmb Kẽer Tɩ B Sõs Tẽngã Koglg Yelle

Posted on 22 mars 2022 Authorjuleskaf

Tʋʋlg kiuug rasem 21 yʋʋm 2022 soabã, gosneerã taoor soaba a Albɛɛr WEDRAOOG talla sɛk ne a miniisr dãmb nins sẽn get yõ-koglgã yelle. B seg taabã, pʋgẽ, b gesa na-kẽnda nins b sẽn na n dɩke, n paam n kogl nin-buiidã yõya, la b ges tɩ b vɩɩmã paam manegre. Miniisr nins sẽn zĩnd seg taabã pʋgẽ wã, wilgame tɩ b na n modga b pãng sẽn tõe tɛka, n tʋm ne tʋʋlem la yãgbo, tɩ yel-tɩɩm paame.

Tãrãzisẽo wã miniisr dãmb p**i sɛk taab sẽn zĩnd tʋʋlg kiuug rasem 18 yʋʋm 2022 soabã, b ra goma yal ning sẽn pɩʋʋgd tẽngã rũnda-rũnda wã yelle, n wilg tɩ sẽn yɩɩd fãa yaa soay la rabay nins b sẽn na n dɩk n zab ne yõ-koglg kaalma tɩ nin-buiida tõog n vɩɩmd bãane.

B seg-taab-kãngã yaa no-rɩkrã na paam pidsg n kɩt gosneerã taoor soab zĩnd ne-ba, tɩ b na n ges b sẽn tõe n sigl yõ-koglgã na-kẽndr toto. Sekã pʋgẽ minisr fãa wilga zu-loees nins sẽn be a tʋʋm-noor pʋga, la a kõ a me tagsg yal kẽer zugu.

Albɛɛr WEDRAOOG wilgame tɩ wakatã yaa pẽdga. Yaa rẽ n so, tɩ b segd n ning pãnga n tʋm n tõog n tũ tẽngã taoor soab sẽn dat tɩ bũmb nins pidã.

Miniisr ning sẽn get sodaasã yelle, Zenerall Bagtelemi SẼEMPOOR wilgame tɩ b seg taabã sõngame tɩ b tõog n pʋɩ zu-loees nins sẽn be wã ne taaba. A pasaame, tɩ sodaasã taoor dãmb na n tʋmame tɩ yɛlã kolg weoogo.

Minisr Lionelll BILGO, sẽn ya goosneer no-rɛɛsã wilgame tɩ miniisr rãmbã rɩka noya sẽn tũud ne tẽngã sẽn be nug-gãag ning zugã, la b naag taab n dɩk noore, sẽn tũud ne nin-buiidã fãa na lob b toog n sõnge. Sã n ya ne yẽ, seg taabã, yaa bũmb sẽn wat ne naag taab tagsgo, la naag taab n bao zu-loeesã tɩɩm. A kẽnga taoor n paas tɩ ka sodaarã tʋʋmd bal n tõe n fãag tẽngã ye, yaa gosneer tʋʋm-noya sẽn be tẽngã babs fãa pʋs sã n tõog n tʋmd wa sẽn segde, rẽ n tõe n wa ne zu-loeesã weoog kolgre. A wilgame tɩ sẽn sɩngd ne tʋʋlg kiuug rasem 22 yʋʋm 2022 soabã, sɛk la b na n zĩnigi. Seg-taab-kãng tʋlsem ya b ning sull b sẽn boond tɩ « task force » tɩ b zĩnd n tags noy nins b sẽn dɩk seg-taabã pʋgẽ n pids-a. Sɛkã pʋgã miniisr dãmbã kell n tẽega sodaas 13 sẽn maan kaalma, la b kos Wẽnd t’a kõ sẽn paam-b sãmpoagã laafɩ. Miniisr Lionell BILG pasaame tɩ seg-taabã zĩnda wakat ning tẽngã sẽn le be sũ-sãams pʋgẽ, la raood sẽn na n sõng tɩ b tʋm tɩ tẽng gãand bãanã tõog n zĩndi.

Kibarã yii permye ministɛɛrã kiba-kɩtb nengẽ
raamde-bf.com

Communiqué de l'Association D Bãng Moore

Ne y wĩndga d saam-biisi
Tõnd sullã D Bãng Moorã paam a rogem-sebre. Ya tʋʋmda na kẽng taoor yĩnga la sullã taoor dãmba yãk yam n na kẽne tɩ sulla paama a rogemã sebre.

Sullã sigla moor karengo sibr la hat daar fãa n na sõng neb nins n dat n zãms b moorã gʋlsgo la karenga. Karenga na sɩnga tʋʋlg-kiuug rasem pisi la yoobe. Karenga ya sibr la hat daar fãa wakat piig n na te tãag wakat pii la yiibu.
Yao n naaga ya wakɩr tus a yiibu kiuug kareng fãa.

L'association D Bãng Moore a obtenu son récépissé dans le but de concrétiser ce que les membres fondateurs ont initié dès le début.

L'association organise des formations d'apprentissage de l'écriture et de la lecture en mooré chaque samedi et dimanche à partir de 10h00. Le prix de participation est fixé à 10 000f par mois.

Association D Bãng Moore
Contact : 54269566
Contact WhatsApp : 00 226 58772319

Burkĩna Faso Rãmb Maana Tõnd Sẽn Dog Ne Goam Ninsã Raare

Posted on 22 février 2022 Authorjuleskaf

Ãnduni wã tẽns fãa pʋse, b yãka wao-fugdg kiuug rasem 21 wã tɩ ya ninsaal sẽn dog ne gomd ningã raare. Rẽ n so, tɩ Burkĩna Faso ministɛɛr ning sẽn get kaorengã la buudã goam maan a tẽegre. Gom zug b sẽn tiki, yaa « Buudã goam sõngda ne bãngre, la minim kaorengã taoor kẽnd wɛɛngẽ ».

Ministɛɛr ning sẽn get kaorengã la buudã goam seb-gʋnda porfesɛr Kalifa TARWAR boonda neb nins sẽn be a pʋgẽ wã, tɩ b tʋm tɩ buudã goam kẽng taoore, la b kɩte, tɩ waoog taab lebg n wa zamaanã pʋga. A rɩka makre, wala nasaarendẽ wã b sẽn boond tɩ « demi fɛrɛɛrã » sã n ya buudã goamẽ ba y pa ma biidu, bɩ saam-biiri, ned sã n yɩɩd-fo, f boond-a lame tɩ f kasem soaba, ka rẽ bɩ f saamba, wall a ba.

Yaa na-kẽnd-kãng ra yaa bũmb sẽn sõngd tɩ nebã ne vɩɩmd-n-taar ya sõma. Ministɛɛrã seb-gʋnd wilgame, tɩ buudã goam sã n kẽ kaorengã pʋgẽ Karen-biisã na n bãnga yel-kẽer võore, la a yõodo, n yɩɩd b sẽn na n karemd nasaarendã bala.

Ministɛɛrã sigla sõs-kaseng wao-fudg kiuug rasem 21 soabã. B kotame tɩ b sõangdbã mao n tʋm tɩ buudã goam katɛk sẽn be Burkĩna Faso wã kẽng taoore, t’a na n sõngame tɩ zɩɩlmã kolg weoogo. Porfesɛr Kalifa TARWAR wilgame tɩ rɩk buudã gomd n naag nasaara wã gomd n karmã wekda kambã yam wʋsgo. A kaoren-dotã pʋse, yʋʋm a nu tɛka, kambã baooda bãngr kaset sebr b sẽn boond ne farend tɩ sɛtfika wã. Sã n ya nasarẽnda zĩigẽ, yaa yʋʋm a yoob la b zĩndid Karen-doogẽ wã n yaool n paam seb-kãnga. Tẽegre, Burkĩna Faso, yaa Farẽnda la b gomd gosneer tʋʋm-noyã fãa pʋsẽ, la buud goam sẽn be tẽngã pʋg yaa bãmb pisoob la zaka. Goam b sẽn gomd n yɩɩd yaa moore, zʋlle , la Silmiirindi. Goama a taabã, b nan be b menesg zugu. Bala, b goamdbã sõor pa waoog ye. Porfesɛr Kalifa WATARA pʋlmame tɩ b na n maoome tɩ gom-kãens me ra menem ye.

Kibarã yii aouaga.com
raamde-bf.com

Polɩɩs Rãmbã Yãka Yam N Na N Tʋm Tɩ Kambã Meneg Kolg Weoogo

Posted on 23 février 2022 Authorjuleskaf

Sẽn sɩng ne wao-fugdg kiuug yʋʋm 2022 soabã, kamb piig la zak n meneme, tɩ b ka tar b nao n dɩkdẽ ye. Rẽ n so, tɩ polɩɩs tɩ rãmba tʋʋm-noor sẽn get kambã yellã sẽn wilgi, tɩ b na n maoome n zab kambã meneng t’a leb poorẽ. B tʋʋm-noor ning sẽn get nin-buiidã la b arzɛkã koglg na n dɩka na-kẽnda n tʋm t’a sã n ka fas me, bɩ a kolg weoogo. B kota nin-buiidã tɩ b kell n kõ-b sɩda, tɩ bãmb me na n maana pãng sẽn tõe tɩ kambã sẽn menemdã, bɩ b lebg n paam-b n lebs b ba rãmbã. Polɩɩs taoor rãmb bẽda zĩ-kãnga, n kot kambã roagdb tɩ b ges b kambã sõma, la b ra bas tɩ b gõod yaar ye. Ned kam kẽes a toogo, tɩ b naag taab ne koglgo, tɩ boto me tõe n sõngame t’a kolg weoogo.

Kibarã yii minute. bf
raamde-bf.com

Tẽngã Taoor Soab Yãka Gosneer Kombɛɛmb A Wɛ

Posted on 2 mars 2022 Authorjuleskaf

Tʋʋlg kiuug p**i daare yʋʋm 2022 soabã, tẽngã taoor soaba letena Kolonell Poll Ãari Sãandaogo DAMIB yãka kombɛɛmb tɩ b na n zĩnd reezẽo rãmb a wɛ pʋse.

Komber fãa ne a reezẽo : Baho Pɛɛr BASENGA, yaa polɩɩs rãmb taoor soaba. Yaa yẽ n lebg Bukldimuhũndã kombere. Kolonell Mazoor Raymond, David Valãntẽ WEDRAOOGO, yaa reezẽo di Noor kombere. Letena Kolonell Fabyẽ SORG yaa reezẽo di Sayɛllã kombere. Kolonell Yibɛɛr YÃMBWEOOGO, yaa reezẽo de Lɛst soolmã kombre. Kolonell Mazoor Zoewẽndmanego Bilɛɛs WEDRAOOG yaa Sãntr noor kombre. Kolonell Bukar ZŨNGRÃANA, yaa Sãntrɛst kombre. Komsɛɛr Bʋryaam SAWADGO, yaa Sɩɩd wɛstã kombere. Kolonell Zãnsagl SOME yaa Kaskaadã soolmẽ kombere. Kolonell Muusa Gɛllo yaa Wobasẽ soolmã kombere.

Kibarã yii minut.bf
raamde-bf.com

Burkĩna Faso Paama Gosne-Paalle
Posted on 7 mars 2022 Authorjuleskaf

Tẽngã taoor soab sẽn yãk a Albɛɛr WEDRAOOG, tʋʋlg kiuug rasem a 3 yʋʋm 2022. Tʋʋlg kiuug rasem a 6 daare, a yãka neb 25 tɩ b na n zĩnd ministɛɛr dãmbã taoore. Neb 25 wã pʋgẽ pagb ya a yoobe.

Ministɛɛr fãa ne a taoor soaba :

Na-zakẽ miniisr sẽn na n ges nin-buiidã vɩɩmd-n-taar la b zems taabã zĩigẽ yaa : a Yero BOLI

Na-zakẽ miniisr sẽn na n ges sodaasã yaa: Zenerall Eme Bagtelemi SẼEMPOORE

Miniisr sẽn na n ges kadensa la yõ-koglgã zĩigẽ yaa : Kolonell Mazoor Omeer BATIONO

Miniisr sẽn na n get Burkĩna Faso la zamaan-zẽnsã zoodo, n paas Burkĩna Faso kambã sẽn be we-loorã zĩigẽ ya a Olviya Rayãgnewẽnd ROAMBA.

Miniisr sẽn na n ges ninsaal yalẽ wã, la sari wã zĩigẽ ya a : Metr Bagtelemi KEERE

Miniisr sẽn na n ges arzɛkã zĩigẽ ya a : Segaloro Abɛl SOME

Miniisr sẽn na n ges laafɩ wã zĩigẽ ya a : Robɛɛr Luisẽ Zãnkolood KARGUUGU

Miniisr sẽn na n ges sõng taabã zĩigẽ ya a : Lazaar Wẽndlasɩda ZŨNGRÃANA

Miniisr sẽn na n ges Wẽnd-tũudmã la rog-n-mikã zĩigẽ ya a : Yisɛka SURWƐMA

Miniisr sẽn na n ges koobã la rũmsa zĩigẽ ya a : Yinoosã KƖƖBA

Miniisr sẽn na n ges we-n-vɩʋʋgã, koomã, yɩlgemdã, la kʋʋrã wã zĩigẽ ya a : Minata TARWARE/ KULBALI

Miniisr sẽn na n ges karen-bi-bɛdã, la bãngrã baoob zĩigẽ ya a : Ferederik WATARA

Miniisr sẽn na n ges sãnmã zĩigẽ: Zãn Alfõs SOME

Miniisr sẽn na n ges meebã zĩigẽ ya a : Kolonell Mazoor Sagl Zosafat ZŨNGRÃANA

Miniisr sẽn na n ges kaorengã, la buudã goam taoor kẽnd zĩigẽ ya a : Leonell BILGO

Miniisr sẽn na n ges kiba-kɩtbã, kʋdemdã, la gilg n ges yel-soalmã zĩigẽ ya a : Valeeri KABOORE

Miniisr sẽn na n ges gosneer tʋʋm-noyã la tʋmtʋmdbã zĩigẽ ya a : Basolma BAAZIYE

Miniisr sẽn na n ges nasaara nug tʋʋm-te-paalã zĩigẽ ya a : Aminata ZƐRBO/SABANE

Miniisr sẽn na n ges tʋʋm-no bɛdã taoor kẽndre, leebgã, la nus tʋʋma rãmb zĩigẽ ya a : Abdulae TALLE

Miniisr sẽn na n ges zagsã la pagbã zĩigẽ ya a : Salimata NEBIYE/ KÕNOMBO

Miniisr sẽn na n ges so-togsã, tẽng pʋgẽ kẽna la sorã zug yõ-koglg zĩigẽ ya a : Mahmuudu ZÃMPALƖGRE

Miniisr sẽn na n ges zagsã, la galentẽngã zĩigẽ ya a : Bukare SAVADGO

Miniisr sẽn na n ges yĩn-wɩsgrã, la kom-bɩɩbã tʋʋm zĩigẽ ya a : Abdul Wahaab DARABO

Miniisr sẽn na n sõngd Miniisr ning sẽn get arzɛkã zãabo, la a get moendã zĩigẽ ya a : Birizit Maari Siizan KÕMPAOORE/ YONI

Miniisr sẽn na n sõngd Miniisr ning sẽn get Burkĩna Faso tẽngã ne zamaan-zẽnsã zoodo, la Burkĩna kamb sẽn be we-loorã, la a get Burkĩna Faso ne tẽns a taabã tʋmd-n-taar zĩigẽ ya a : Karamoko Zãmaari TARWARE.

Kibarã yii Zoodomail.com
raamde-bf.com

Pagb Nins Sẽn Be Waogdg Bãensã Roogẽ Wã Paama Zãmsgo

Posted on 9 mars 2022 Authorjuleskaf

Wa ãndũni wã gilli, yãka tʋʋlg kiuug rasem 8 wã tɩ yaa pagbã yel-segdɩ waoogr daarã,

Burkĩna Faso rãmb me ka pa poorẽ ye. Rẽ n so t’a Nestorind SÃNGAAR sẽn da yɩ miniisr sẽn get pagbã la zagsã yell yãk yam n tɩ sõs ne pagb nins b sẽn be Waogdg bãensã roogẽ. Yɩɩ wakat a sẽn kell n bẽd n dɩk zãmsg buud toor-toor n taas-ba, sẽn kẽed ne nusã tʋʋm wɛɛngẽ.

Yaa pagb sõor na ta bãmb 50 n be bãensã roogẽ, la b sʋkã yaa yɛl buud toor-toor n wa ne ned fãa. Yaa rẽ so tɩ miniisr kʋdg ning sẽn da get pagbã la zagsã yell yãk yam n kẽng n na n tɩ keng b pelse. A Nestorind SÃNGAAR wilgame tɩ pʋg-kãensã segdame tɩ b keng b raoodo. Sẽn na n yɩl n pids rẽ, a rɩka zãmsg buud toor-toor sẽn gomd ninsaal vʋɩɩmã na kẽng taoorã yell n kõ-ba. Yam yãk-kãng yaa sẽn na n yɩlẽ, tɩ b sã n wa sa, b bãensã roogo, bɩ b tõog n pak b toor n tʋʋm-noyã. A le yaa bũmb sẽn na n sõng-ba, tɩ b sã n wa yi, bɩ b yĩm zu-loees kẽer b sẽn vʋɩ-a pʋgẽ, b sẽn wa n bãensã roogẽ wã. A na n sõngame tɩ b sã n paam n yi bɩ b tõog n zã b mense, la b zagse.

A kõ-b-la sagls buud toor-toore. Rẽ poore, a wilg-b lame tɩ ned kam fãa tara sor n tõe n soog a menga. B bãng tɩ ka b sẽn be bãensã roogẽ wã, b tõe n tagsame n maneg b beoog vʋɩɩmã, n tõog n sigl-a. Zãmsgã sẽn yãk a toogo, a kõ-b-la rɩɩbo. Tẽegre, pagbã soog-b-mens daarã, ya a vuk 165 soabã. Rõandã yʋʋmdã b tika gom-zu-kãnga : « na-kẽnd bʋs la d tõe n dɩk n kogl pagbã yõ-koglg kaalmã la laafɩ wã kaalem pʋgẽ? »

Kibarã yii Minut.bf
raamde-bf.com

Miniisr Ning Sẽn Get Karen-Bi-Bãoonesã La Buudã Goam Sɩnga A Tʋʋma

Posted on 10 mars 2022 Authorjuleskaf
Tʋʋlg kiuug rasem a 9 yʋʋm 2022 soabã, gosneer seb-gʋnd-kaseng a Zak Sostɛnd DĨNGARA zĩniga miniisr Leonell Wẽndkũuni BƖLG a tʋʋm zĩigẽ, t’a na n ges karen-bi-bãoonegã la buudã goam taoor na kẽng taoor Ministɛɛre. A segd n tʋmame n tũ tẽngã taoor soab sẽn gãneg bumb ninsi, kaorengã na kẽng taoor pʋgẽ wã. B sẽn zĩnig-a wã poore, a Leonell BILG rɩka koɛɛga. A kosame t’a tʋmd-n-taasã kẽes b toogo, n tʋm ne pʋ-peelem n yãag-a, t’a tõog n pids tʋlsem ning MPSR taoor soabã sẽn datã. A wilgame tɩ tʋʋmd ning b sẽn pʋʋs-a t’a tʋma yaa zɩɩb sẽn ya kasenga, la a tʋmd-n-taasã sã n sak n na n sõng-a ne sɩda, rabeem pa tar-a ye. A paasame tɩ kaorengã yaa beoog vɩɩmã kʋɩlen-bila. Yaa rẽ t’a kotẽ tɩ b sõng-a la b yãag-a, t’a tʋm tɩ ministɛɛrã raab paam pidsgu. A Leonell BILGO yaa arzɛk zãad b sẽn boond tɩ Ekonomiisã, a leb n tara bãngr politikã wɛɛngẽ. A yaa seb-gʋnd me bala a gʋlsa sebre, b sẽn boond tɩ « Burkĩna Faso : d yi zãmsda pʋgẽ la d tʋme, tɩ beoog yɩ neere». Yaa bi-bɩɩga, sẽn nan tar yʋʋm 41. B yãk-a-la tʋʋlg kiuug rasem a 5 yʋʋm 2022 soabã, t’a led a Ɛstanislas WAARO.

Kibarã yii minut.bf
raamde-bf.com

Waogdg Tigung Roogã Kiris Neb Maana B Tẽeb So-Toaka

Posted on 7 février 2022 Authorjuleskaf

Wa b sẽn minim n maandẽ, yʋʋmd fãa wao-fugdg kiuug sã n ta, p**i hat yaa Waogdg Diyosɛɛzã kiris neb tẽeb so-toaka Yagem tãngã zugu. Yʋʋm 2022 soabã zĩnda wao-fugdg kiuug rasem a 6. Yɩɩ zãma kõn bãng n sõde, n yi tẽns ka tɛk n seg taaba, n pʋʋse, pʋʋs tẽnga yĩnga la b kos a Maryam sõng kũun buud toor-toore. Yaa Kagdinall Filip WEDRAOOGO, Waogdg tigung roogã ba, bãmb n lʋɩ pʋʋsgã taoore, n paas sõangda Musoyẽer Leopoll WEDRAOOGO, Musoyẽer Zãnmaari KÕMPAOORE, la Pap no-rɛɛsã sẽn be Burkĩna Faso ka wã. Pɛrɛtr rãmb ka tɛk me zĩnda pʋʋsgã pʋgẽ.

Gom-zug b sẽn tik n maan rõandã tẽeb so-toakã ya «D lagem taab pʋʋsgo, la d kũm-taaba, d tẽngã Burkĩna Faso laafɩ yĩnga». Pʋʋsgã sɩngrẽ, Musoyẽer Leopoll WEDRAOOG pʋʋsa neb nins fãa sẽn zẽk b naoor n wa Yagma, la b kos t’a Maryam sõng pids b sẽn wa n na n bõos b ma sõng t’a sõng-b ne kũun ninsã.

Wẽnd gomdã wɛgs wakato, Kagdinall togsa kiris nebã tɩ b pʋʋs ne tẽebo, la b tʋm tɩ laafɩ zĩnd tẽngã pʋgẽ. B kos-b lame tɩ b ra maan kʋɩʋm ne pʋʋsgã ye. Ned kam fãa mao t’a zak pʋgẽ bɩ wʋm-taabã reng n zĩndi. Bala, laafɩ sã n zĩnd zagsã pʋsẽ, tẽngã fãa tõe n vɩɩmda ne laafɩ. B kell n kosa kiris neba tɩ b pʋʋs Sapɩle pʋʋsg wakat fãa, tɩ bala, b sã n pʋʋsdẽ a Maryam sõng pa tõe n pa leok b pʋʋsgã ye.

Meesa pʋgẽ, b rɩka Burkĩna Faso tẽngã ne a nin-buiidã laafɩ koglg n ning a Maryam sõng nugẽ, t’a kos a biiga a Zeezi, t’a gom ne Wẽnd tɩ laafɩ lebg n wa zamaanã pʋgẽ.

Pɛrɛtr ning sẽn get Yagem tẽeb so-toakã, a Labe Zɩll Paskall ZABR koeesã pʋgẽ, a kosa neb nins sẽn maan tẽeb so-toakã, tɩ b kẽes b toog n sõng tɩ b tõog n me zĩigã t’a kẽng taoore. A togsa tʋʋm kẽer b sẽn gãneg n na n tʋme. Sẽn yɩɩd fãa ya b na tõog n me lalg n gubg zĩigã. A pẽga neb nins fãa sẽn sẽn zoe n kẽes b toog tʋʋmdã pʋgẽ, la a kot kiris nebã tɩ ned kam fãa kõ a nug n bũmb tɩ b paam n me zĩigã. Meesa wa n tɩ baasa ne a Zeezi yĩngã waoogre, zama wã gilg bark ningri. B kõo taab sɛk yʋʋm 2023 soabã tẽeb so-toakã, a Maryam sõng taoore, n na n pʋʋs b zaamẽ beoogo.

Zɩll KAFAANDO
raamde-bf.com

Kiuug A Yoob Pʋgẽ Tɩ D Tõog Bɛɛbã, Wall Bɛɛbã Tõog-Do

Posted on 8 février 2022 Authorjuleskaf

Wao-fugdg kiuug rasem 7 yʋʋm 2022 soabã Asoosɛsẽo Amuur divind rãmb boola kiba-kɩtbã Sãntr de Pɛrɛs Noorbɛɛr Zãong sẽn be Waogdgã. Boollã võore, ya b sũur koees la taas kiba-kɩtbã, tɩ b taas MPSR taoor soab a Poll Ãarĩ Sãandaoogo DAMIB ne a poorẽ dãmbã. Asoosɛsẽo Amuur divind rãmb wilgame tɩ tẽngã zãadb segd n modgame tɩ nin-buiidã lebg n wa b burkĩndã sor zugu. B sã n dat tɩ rẽ pidi, b tik tẽn-peelmã n zã nin-buiidã, la b modg tɩ b sã n na n ning neb b tʋʋma taoore, bɩ yɩ burkĩmba, la neb sẽn dat tʋʋma. Na-kẽnd-yood nins sẽn da zĩnd pĩnda, tɩ ya karen-bi-taas la zo-rãmb rɩgs n lʋɩɩs tʋʋma taoor tɩ tẽngã ka kẽnd taoorã b bas yẽ. Sẽn kẽed ne nin-wẽnsã tʋʋm-yood yalsg wɛɛngẽ, b wilgame tɩ wakatã ka waoog ye. Yaa ka la kiuug a yoob pʋgẽ. Kiuugã yoobã pʋg tɩ tõnd sã n ka tõog nin-wẽnsã, b na n soog tõndo.

Asoosɛsẽo Amuue divind yaa lagem-n-taar sull sẽn tʋmd burkĩnd na zĩndi, la d yaabã vʋɩɩm Wẽnd minim la b pʋ-peelmã wɛɛngẽ. Sullã pʋgẽ dĩin buud toor-toore, n naag taab n lugl-a. Sã n ya ne Filip Maari Zistind Wedraoogo, bũmb buud fãa be dũni wã pʋg gilgdame. Bũmb sẽn zĩnd n looge, wat n maandame. Yal nins fãa sẽn zĩnd tɩ b gomd Wẽnnaam sebrã la Alkʋrãanã pʋga, yaa bũmb sẽn maan tõnd me tẽngã ka. A wilgame t’a Tooma Sãnkar rãmb yaa neb sẽn wa n na n lebs tõnd d burkĩndẽ wã. La ninsaal fãa tara a rũngu, t’a vʋɩɩm na-kẽndr wẽnd rũngã. Nebã kẽnda b naas-naase. Neb a naasã pʋgẽ ned a ye n ya b baaga. Wakat fãa, yaa baagã, n paad poorẽ n gũ zakã. La ka rat n yeel t’a soabã yaa baag ning nebã fãa sẽn mi wã ye. A yaa baaga, a sɩɩgã pʋgẽ, a vʋɩɩmã na-kẽndrẽ. A manesmã buud toor-toor wẽnda wa baaga, la a soabã meng ka mi ye.

A Tooma Sãnkara, a Ligani, a Ãari Zãongo, la a Bilɛɛs Kõmpaoore. Neba b naasã pʋga, a Bilɛɛs Kõmpaoor ra ya b baaga. Bala, b sã n tik ninsaalbã ãdsẽ, ned sẽn dog wao-fugdg kiuug rasem a tãab fãa, a soabã yaa ninsaan-baaga. A wilgame tɩ yẽ meng sẽn togsdã, a yaa ninsaan-kãng buudã, bala, a roga wao-fugdg kiuug rasem a tã. A Bilɛɛs Kõmpaoor sẽn da ya neb a naasã baagã, yaa rẽ n kɩte, t’a Tooma Sãnkar sẽn da wa n na n lebs nin-buiidã b burkĩndẽ wã, a Bilɛɛs kʋʋ neb a taabã, la a pa n gũ zakã. A Bilɛɛs sẽn deeg naamã yaa Fãrens raabã bala a maan yã. A Maari Filip Zistind Wedraoog wilgame tɩ zakã gũub ra segd n saa rõanda yʋʋmdã. Ra segd n yɩ a Bilɛɛs Kõmpaoore, n na n gũ-a, la sẽn wa n naag ne a Bilɛɛs rigbã, a Rok a yembr kibar sẽn be Bɩɩblã pʋgẽ. Na-kãng ra riga a ba n deeg naam. Rẽnd a Rok me yaa wa a Bilɛɛs Kõmpaoor biiga. Yaa wa biig sẽn s*k a ba n deeg naam. A leb n dɩka mak wa Moognaab a Zombr ne b biigã. Bãmb yãabã pʋgẽ, b ra yãame t’a Rok naamã saam yʋʋm-sar kiuugã pʋgẽ. A wilgame tɩ bãmb ra gʋlsa a Rok sebre. B wilg-a-la a naamã saabo, la a sẽn segd n maan a soaba. B sẽn kõ a Rok sebr ningã b yãka a yembr Asãmble, la Perzidãase, tɩ b ka kelg bãmb ye. Seb-kãng pʋgẽ b wilgame t’a Rok ra segd n midgame t’a Bilɛɛs kẽ Burkĩna yʋʋm-sar kiuugã pʋgẽ. Yʋʋm-vẽkr kiuug rasem 22 yʋʋm 2022 b yãa a Rok naamã saabo, n bool-a n togs t’a sig la bas naamã tɩ b na n kʋ-a lame. Rẽ fãa, a ka kelg ye. Kiuugã rasem 23 n wata a rasem 24 raare, MPSR rãmb maana a Rok naam wẽ-n-dɩke. A Maari Filip Zistind Wedraoog kell n kẽnga taoore, n toge t’a ra goma ne Pastɛɛr Filip KARENBIIR n wilg-a tɩ b bas nin-buiidã tɩ b yi Wẽnd-dotã pʋse, n paam laafɩ, tɩ bũmb sẽn tar pãng n wata, la a sã n wa, a na n yiisa nebã. A wakatẽ, Pastɛɛrã, ka kelg ye. A yeelame tɩ yaa yẽ n dat n maan yell n paam n sãam pʋʋsgã. Gom-kãng me ka yã n zãar raare, nin-wẽnsã wa n kẽe tẽngã, n tar nebã n kʋʋb la b rigd-b tɩ b yikd nebã b tẽnsẽ. Nin-wẽnsã sooga zĩigã n pagd Wẽnd-dotã la gosneem tʋʋm-noya. Fãrens naab a Emanwɛll MAKÕRÕ, sẽn na n wa Burkĩna Faso wã, a ra gʋls-a lame n wilg t’a sã n ka tab Burkĩna tẽn-gãongã, ne a sɩda, a na n yã a zugẽ yelle. Yẽ me ka yã n zãag raare, nin-buiidã la dũni wã rãmb yam yii Fãrense. Sã n ya ne Asoosɛsẽo Amuur divind taoor soabã MPSR naamã bãmb pʋʋsd-b-la ne b waoongo. Bala, yaa naam sẽn wa n na n pids tʋʋmd ning a Tooma Sãnkar sẽn da tɩʋʋsã. B wilgame t’a Poll Ãari Sãandaoogo DAMIB sẽn dɩk a p**i koɛɛɛgã n wa tɩ baas ne:tõnd tẽngã yĩnga d saka kũumã, la a wilg tɩ bãmb waame n na n lebs tẽngã a toosã, la b lebg n sigl tõnd burkĩndã bãmb sũur yaa noogo. B wilgda MPSR rãmb tɩ b segd n modgame tɩ nin-buiidã lebg n wa b burkĩndã pʋgẽ. B tik tẽn-peelmã n zã nin-buiidã, la modg tɩ b sã n na n ning neb b tʋʋma taoore, bɩ yɩ burkĩmba, la neb sẽn dat tʋʋma, la b tar bãngr la minim tʋʋmdã pʋgẽ. B bas na-kẽnd-yood nins sẽn da zĩnd pĩnda, tɩ ya karen-bi-taas la zo-rãmb rɩk n lʋɩɩs tʋʋma taoore, tɩ b ka tõe n tʋm tɩ tẽngã kẽng taoorã. B rɩk neb sẽn ya burkĩmba, la b rat ba-yirã neer n nig tʋʋma zĩisẽ. Sẽn kẽed ne nin-wẽnsã tʋʋm-yood yalsg wɛɛngẽ, b wilgame tɩ wakatã ka waoog ye. Yaa ka la kiuug a yoob pʋgẽ. Kiuugã yoobã pʋg tɩ tõnd sã n ka tõog nin-wẽnsã, b na n soog tõndo. Yellã tɩɩm ya b modg n lebs nin-buiidã b burkĩndẽ wã. B sã n bas tɩ kiuug a yoob loog tɩ b ka rɩk na-kẽnd-sõngo, nebã na n yiime n dig-ba.

Pẽgdwẽnde Erik Zĩnaaba
raamde-bf.com

Tẽngã Taoor Soab Zĩniga Sull Ning Sẽn Na N Zĩnd N Tagse, La B Togl Tãrãzisẽo Wã Nao-Tũudsi

Posted on 9 février 2022 Authorjuleskaf

Wao-fudg kiuug rasem a 8 yʋʋm 2022, tẽngã taoor soaba, Letena Kolonell Poll Ãari Sãandaoogo DAMIB zĩniga sull ning sẽn na n zĩnd n tags n gʋls tãrãzisẽo wã nao-tũudsã.

Tẽngã taoor soab wilgame tɩ noy nins b sẽn tog n gʋlsã segd n yɩɩ noy b sẽn na n dɩk n sõng tɩ Burkĩna Faso lebg n wa bãmb sẽn dat t’a rɩk sor ningã. Tõnd tẽngã sẽn segd zu-loees ninsã, MPSR taoor soab boola sullã rãmb tɩ b reng tʋm tɩ tẽngã lebg n wa a burkĩndã sor zugu. B tʋm tɩ laafɩ zĩndi, sẽn na n yɩlẽ tɩ neb nins sẽn zoe n bas b tẽnsã tõog n leb n tẽnsẽ wã. B mao tɩ noyã pʋsẽ bɩ tẽngã paam zã-sõngo. Letena Kolonell Poll Ãari Sãandaoogo DAMIB le wilgame, tɩ sullã tʋʋmd pʋga, bũmb sẽn ya zu-loɛɛg ne b ya b tʋm tẽngã na kẽng taoore, la nin-buiidã raab na paam pidsgu. B tʋʋmdã segd n sõngame tɩ ba-yirã kamb gãd taab nusi, n lebg n sigl b tẽngã vʋɩɩm. Yaa nug tikr b sẽn da maan ne taab wao-fugdg kiuug rasem a 3 yʋʋm 2022 soabã, la b lugl sullã. Suulã pʋga, yaa neb 15 n be a pʋgẽ. B tʋʋmdã ya b lebg n gʋls noya, tɩ b tik yẽ n zã tẽngã. Tʋʋmdã yaa kẽes-m-meng tʋʋmde, a ka tar yaood ye. La yaa rasem 14 la b na n zĩnd n kʋms-a t’a pidi, tɩ b rɩk n taas MPSR taoor soabã.

Kibarã yii na-zakẽ kiba-kɩtba nengẽ
raamde-bf.com

RÃAMDE Nasẽo zini la SEDEYAO rãmb sõsa ne sodaas nins sẽn zãad tẽnga, la a Rok KABOORE Burkina : Une mission conjointe CEDEAO/Nations unies échange avec le Chef de l’Etat et rend visite à Roch KABORÉ Karme/ Lire  Sodaas nins sẽn deeg naamã wilga na-kẽnda nins b sẽn na n dɩk n za....

Tẽngã Taoor Soab Reega Nin-Zaalsã Lagem-N-Taar Sula

Posted on 10 février 2022 Authorjuleskaf

Burkĩna Faso tẽngã taoor soaba, Letena Kolonell Poll Ãari Sãandaoogo DAMIBA, taoor soab reega nin-zaalsã lagem-n-taar sula wao-fudg kiuug rasem a 9 yʋʋm 2022 soabã Kosyam. B sõasgã pʋga, a kos-b lame tɩ b kẽes b toog tẽngã meeb pʋgẽ.

Sɛkã pʋgẽ, MPSR taoor soabã wilgame tɩ sula buud toor-toor sẽn be tɩ Burkĩna Faso ka, b fãa mii tẽngã sẽn vʋɩ toto rũnda-rũnda. A vʋɩɩmã nu-gãag ka politika rãmb bal n kong ye. Kongrã yaa tʋʋm-noya, la sulã me kongre. Rẽ n so t’a wilgd-ba tɩ b sak n wɩd b mense, la b sõng n tʋm tɩ tẽngã sẽn dat tekr ningã paam pidisgu. Letena Kolonell Poll Ãari Sãandaoogo DAMIB kell n togsame tɩ wɩdg buud sã n wa beẽ, yaa sẽn na n sõng tẽngã t’a kẽng taoore. Yaa rẽ n so t’a boond-b tɩ b lebg n ges b na-kẽnda wã.

Sula wã taoor dãmb kẽer pẽgame n wilga b belem ne tẽngã taoor soaba, n wilg-a zu-loees kẽer b sẽn yãte. Yaa wala, yõ-koglg kaalmã, neb nins sẽn zoe n bas b tẽnsã, la rɩk kom-bɩɩbã lagem-n-taar sula n kẽes tẽngã meeb na-kẽnd paalle, MPSR rãmb sẽn tikã pʋgẽ.

A DAMIB wilgame t’a wʋma b kosgã la a na n tʋma ne Burkĩna Faso nin-buiidã fãa. Tẽngã kom-pugli la a kom-dibli na n zĩnda sʋka, tɩ b naag taab n tʋm tɩ tẽngã gãand bãane. MPSR taoor soabã a Poll Ãari Sãandaoogo DAMIB togs-b lame tɩ ba-yirã nonglem segd denga taoore, tɩ sẽn ketã pʋge.

Kibarã yii na-zakẽ kiba-kɩtbã nengẽ
raamde-bf.com

Logtoɛɛmb 63 N Paam B Bãngr Kaset Sɛba
Posted on 14 février 2022 Authorjuleskaf

Wao-fugdg kiuug rasem 12 yʋʋm 2022 soabã, logtoɛɛmb a kaoreng zĩig b sẽn boond tɩ Notr dam di perpetiyɛl sekuurã pʋgẽ, logtoɛɛmb n sa b kaorengo, n pʋlem la b reeg b bãngr kaset sɛba. Yɩɩ logtoɛɛmb b sẽn boond tɩ Obstetirisyẽ rãmba. Yaa pog-roagdsba la sẽn get logto-yi-bãonesã pʋsẽ tɩbsgã yelle.

Yaa logtoɛɛmb 63 sẽn tʋmd tɩbsg sul a tãab pʋgẽ n yals n pʋlem n deeg b bãngr kaset sɛba. B pʋlengã yʋʋr yaa «Zɩstẽ Poda kõ-m-meng-vɩɩm-n-fãag-m taabã». Bũmb ning sẽn kɩt tɩ b yãk b yʋ-kãngã, ya b karen-saamb a Zistẽ Poda, sẽn zĩnd lekollã pʋg n tʋm n maan kaalem tɩ b pẽgd-a t’a tʋʋmdã yaa sõma. A tʋʋmdã sẽn yɩ sõma wã, b rɩka a yʋʋrã n pʋde, sẽn na n yɩlẽ n ket n tẽegd a yelle. Tʋʋmdã ba-yãkd yɩɩ Porfesɛɛr Kiristof DA, logto-kaseng n dɩk a vʋʋsem, n paas mise Pɛɛr ZŨNGRAANA, tʋʋm-noor ning b sẽn boond tɩ Burkĩna nuvel vizẽo wã taoor soaba.

Lekollã taoor soaba, a Vigtoor ZÃONG wilga a sũ-noogo, tɩ bala d sã n na n ges Burkĩna Faso logtoɛɛmbã lekols sẽn maan b wags-taabã rõanda wã, yɩɩ bãmb lekollã n lʋɩ taoore. Koabg zugu yaa karen-biis 98 n paame. Karen-biig ning sẽn lʋɩ a taabã taoor Burkĩna zãnga yita bãmb lekollã pʋga. Yaa rẽ n so, t’a kotẽ tɩ karen-biisã kell n kẽng taoor ne kaorengã n wa tõog n lebg logtoɛɛm-bɛda. B modg n dɩk b bãngrã n pʋɩ ne b yaopã la kambã, sẽn wat beoogo. A kos-b lame tɩ ra zĩnd n teeg gosneerã t’a wa rɩk b tʋʋm ye. Bãmb mensã, tõe n zemsa taab n pak b toorẽ logto-yiri, n sõng nin-buiidã.

Porfesɛɛr Kiristof DA, tʋʋmdã ba-yãkdg koɛɛg pʋgẽ, a boola karen-biis nins sẽn nan sa b kaorengã n yita, tɩ b tall b tʋʋmdã nonglem. B sã n nong b tʋʋmdã a na n sõng-b lame tɩ tõog n kẽng taoore. A leb n pasaame tɩ logto-sõng segd n yĩma a mengã yelle, n tõog n tɩbs bãad rãmbã ne sũ-bʋgsem.

Mise ZƐMBA Sayidu, ministɛɛr ning sẽn get a laafɩ wã zĩigẽ tʋmtʋmd a yembre, sẽn zĩnd zĩigẽ wã ministɛɛrã yʋʋr yĩng pẽga logtoɛɛmb nins sẽn sa b kaoreng n nan yitã, tɩ b zãmsgã yɩɩ sõma. Yɩɩ wakat a sẽn pʋlem-ba, t’a na n tɩ taasa ministɛɛrã taoor rãmba, sẽn na n yɩlẽ tɩ b tõog n paase, b logtoɛɛmbã rɩkr yʋʋmd fãa wã sõore. A togsame t’a kõo sɩd ne logtoeem nins sẽn yi lekollã yaa neb sẽn paam bãngre. Logtoɛɛmb nins sẽn nan yitã no-rɛɛs rɩka koɛɛga. A koɛɛgã pʋgẽ, a pẽng karen-saamb dãmbã la lekollã taoor soaba. A wilgame tɩ b sɩd sak n dɩka b weer n yãag-b kaorengã wakate. A boonda a yap nins sẽn na n pʋgl n wa zĩnd lekollã zẽkẽ, tɩ b mao tɩ wakat fãa bɩ b wʋmdẽ lekollã yʋ-noogo.

Zɩll KAFAANDO
raamde-bf.com