J.V.P Media

'ජාතික ජන බලවේගයේ ඉන්දීය සංචාරයේ ඇතුලාන්තය'
අද (15) රාත්‍රී 10.30ට සිරස TV බලන්න...

"මේ ආරාධනාවෙන් ඉන්දියාව මට ඉඟියක් දුන්නා"

සංවාදය- අනුරාධා හේරත්

• ජනතා විමුක්ති පෙරමුණට ඉතිහාසයේ ප්‍රථම වතාවට නේද ඉන්දීය රජයේ නිල ආරාධනාවක් ලැබුණේ?
"ඔව්. මේක ජනතා විමුක්ති පෙරමුණ හැටියට සුබවාදී හා වැදගත් කාරණයක්."

• මෙම සංචාරය ඔබට ඔබේ අනුගාමිකයින්ට සහ රටට බලපාන්නෙ කොහොමද?
"අපේ දේශපාලන ව්‍යාපෘතිය මෙතෙක් බලය ආසන්නයට ළඟා වී නැහැ අපි පාර්ලිමේන්තුවේ විපක්ෂය එහෙම නැත්නම් remote control පාර්ලිමේන්තු යතුර ඉල්ලපු යුගයක් තිබුණා. නමුත් මෙවර නිශ්චිත වශයෙන් අපි බලය අත්පත් කරගන්න අරමුණු කරගත් සැලසුමක යෙදී සිටිනවා. ඒ නිසා මේ ඉන්දියානු සංචාරය ඉන්දියාවෙන් ලද නිල ආරාධනය මේ සඳහා දිගු පියවරක් හැටියට අපි විශ්වාස කරනවා."

• නමුත් ඔබේ ප්‍රතිවාදීන් චෝදනා කරන්නෙ ජනතා විමුක්ති පෙරමුණ මේ නිල සංචාරය බලෙන් ඉල්ලා ගත් එකක් බව. ඔබලාට ජාත්‍යන්තර සම්බන්ධතා නෑ කියන මතය මකා දමන්නට මෙවැනි පියවරයන් ගනිමින් සිටිනවා කියන කාරණය ඒ චෝදනාවේ තිබෙන්නේ?
"ඔබ බලන්න ඒ චෝදනා කරන්නන්ගේ දේශපාලන බංකොලොත්භාවය කොහොමද කියලා.තමන්ගෙ දේශපාලන බංකොලොත්භාවය වසාගන්න ඉන්න අයට මේ සංචාරය ඇති සති මාස ගණන් තලු මරන්න.ඔය කියන අයට විශාල ලෙස රිදිලා තියෙනවා.අපි රටවල් වලින් සංචාර හිඟාකන යන ව්‍යාපාරයක් නොවෙයි. අපේ දේශපාලනයේ වර්ධනය හා අපේ ශක්තිය හමුවේ ඒ ඒ රටවල් වලින් අපට ලැබෙන පිළිගැනීම තමයි මේ පෙන්නුම් කරන්නේ."

• අනුර කුමාර කියන්නෙ ලංකා රජයට අයිති නායකයෙක් හෝ ඇමතිවරයෙක් එහෙම නැත්නම් විපක්ෂ නායකයෙක් හෝ නොවෙයි. ඔබ පාර්ලිමේන්තුවේ සාමාන්‍ය මන්ත්‍රීවරයෙක් සහ දේශපාලන පක්ෂයක නායකයෙක්. ඔබට මේ විදිහට රජයකින් නිල ආරාධනාවක් කරන්න හේතුව මොකක්ද?
"විශේෂයෙන්ම පාර්ලිමේන්තුවේ තුළ තියෙන නියෝජනය නොවෙයි මේකට බලපෑවේ.අපේ ජනයා තුළ අප පිළිබඳව ලියැවී ඇති මතය සෑම සමීක්ෂණ වාර්තාවකම ලියැවී තියෙනවා. ඒ වගේම බලය ගන්නා ව්‍යාපාරයක් ලෙස අපි ජාත්‍යන්තර සම්බන්ධතාවයන් ගොඩනැඟීමට මේ වන විට විවිධ පියවර අරගෙන තියෙනවා. ඒ පියවරයන්ගේ සාර්ථකභාවය තමයි මේ ආරාධනයෙන් පෙන්නුම් කරන්නෙ."

• ඔබ කියන්නෙ මේ වසරේ එන ජාතික මැතිවරණය ඉන්දීය රජය ඉලක්ක කරමින් ඔබව ගෙන්වූ බවද?
"ඕනෑම රාජ්‍යයක් කල්පනා කරනවා ආණ්ඩු පිහිටුවීමට සූදානම් දේශපාලන ව්‍යාපාර සමග සබඳතා ගොඩනඟා ගත යුත්තේ ඇයි කියන කාරණය.ඒවගේම ආණ්ඩු පිහිටුවීමෙන් පසුව පමණක් නොවෙයි ආණ්ඩු පිහිටුවීමට පෙරත් ඒ දේශපාලන ව්‍යාපාරය සහ රාජ්‍යයන් අතර පවතින අවබෝධතාවයන් වර්ධනය කර ගැනීමේ වැදගත්කම ඔවුන් දකිනවා.මේ එහි පියවරක්."

• ජනතා විමුක්ති පෙරමුණට බොහෝ අවස්ථාවල ඉන්දියාව සමඟ තිබුණේ විවේචන. ඔබලා ඉන්දීය විරෝධීන් ලෙස පක්ෂ අනුගාමිකයින්ගේ මොළ සේදූ ව්‍යාපාරයක් බවට ප්‍රබල විවේචනයක් තියනවා. ඒ විවේචන දිගටම පවතිනවද? එහෙම නැත්නම් මේ සංචාරයෙන් ඒ විවේචන යම් ආකාරයකට සංශෝධනය වෙනවද?
"අපිට කවදාවත් ඉන්දියාව හෝ ඉන්දීය ජනතාව සමග ගැටුමක් තිබුණේ නැහැ. අපට තිබුණේ යම් යම් කාල වකවානුවලින් ඉන්දියානු රජයන් පැත්තෙන් ගනු ලැබූ තීරණත් ඒවගේම ශ්‍රී ලංකා රජයන් ඒ සම්බන්ධ ගත් ප්‍රතිචාරත් පමණයි අපේ විවේචනයට භාජනය වුණේ.ජාත්‍යන්තර සබඳතා යනු හැම වෙලාවකම ඒ සබඳතා පිහිටුවාගත්තට පසු ඒ රජය දෙන ඕනෑම දෙයක් පිළිගැනීම හෝ යටත් වීම නොවෙයි. ඒ නිසා හෙටත් ඉන්දියානු රජයේ ආර්ථිකමය හෝ දේශපාලනික වශයෙන් අපේ රටට අහිතකර ක්‍රියාමාර්ග එනවා නම් ඒ ක්‍රියාමාර්ග විවේචනය කරන්නත් ඒවා ප්‍රතික්ෂේප කිරීමටත් සාකච්ඡා කිරීමටත් අපි කිසිසේත්ම පසුබට වන්නේ නැහැ. ජාත්‍යන්තර සම්බන්ධතා යනු ඒකම තමයි. තව රාජ්‍යයක් විසින් අපේ රටට එල්ල කරන මුළු න්‍යායපත්‍රයටම යටත් වීම නොවෙයි විය යුත්තේ. සාකච්ඡාව එකඟවීම හා එකඟ නොවීම ඒ තුළ තිබෙන්නේ."

• ඔබේ සංචාරයේ මූලිකවම ඉන්දීය විදේශ අමාත්‍ය සුභ්‍රමණියම් ජෙයශංකර් මුණගැහීම සිදුවුණා. ආර්ථික වශයෙන් බංකොලොත් මේ රටට ඉන්දීය රාජ්‍යයේ සහාය උපරිම දෙන බව පැවසුවා. නමුත් ඉන්දියාව සමඟ ප්‍රතිවිරෝධතා තිබූ ඔබට ඔබේ පක්ෂයට යම් චකිතයක් තිබුණෙ නැද්ද මේ සාකච්ඡාව පටන් ගද්දි?
"පළමුවෙන්ම අප හා ඉන්දියාව අතරින් යම් විරෝධතා ප්‍රතිවිරෝධතා සහිත ගැටුම් එක්ක අපි වැඩ කර තිබෙනවා. අප විසින් ඉතා හොඳින් පැහැදිලි කළා ලෝකය වෙනස් වෙනවා. ඒ අනුව අපිත් වෙනස් වෙනවා කියලා."

• ඔහු මොකද කිව්වෙ?
"ඔහු කිව්වා ඔව් ඉන්දියාවත් එහෙම තමයි කියලා . ඒ නිසා ලෝකය එක තැනක නතර වෙනවා යයි කියල හිතන අය කුමක් කිව්වත් ලෝකය වේගයෙන් වෙනස් වෙමින් තියෙනවා. ඒ වෙනස්වීමත් එක්ක රාජ්‍යයන් දේශපාලන ව්‍යාපාරත් වෙනස් වෙමින් තිබෙනවා."

• ඔය කතාව අතරතුර රනිල් වික්‍රමසිංහ ජනාධිපතිගේ ආණ්ඩුව පිළිබඳව ඔවුන්ගේ මතය කියන්න ඇති නේද?
"එවැනි සාකච්ඡාවක් නම් මෙතැනදී සිදු වුණේ නැහැ.හැබැයි අපි පෙන්වා දුන්නා මේ වසරේ ජාතික මැතිවරණයක් තියෙනවා අපි ඒකට මුහුණ දෙනවා ඔක්තෝබර් මාසෙට පෙර ජනාධිපතිවරණය තියෙනවා අපි ඊට ලෑස්තියි කියලා කිව්වා. ඊට එහා දේශපාලනික දෙයක් කතා වුනේ නැහැ."

• ඔබ කුමක් කිව්වත් ඉන්දියාව ලංකාවේ ජාතික මැතිවරණයකදී ඔවුන්ගේ තීරණ ඉදිරිපත් කරනවා.විවිධ රහස් සාකච්ඡා පවත්වනවා.ඒ ගැන මොකක් හෝ ප්‍රකාශ කරන්න ඇති කියලා අපිට හිතෙනවා?
"දේශපාලනික වශයෙන් එවැනි විශේෂ සාකච්ඡාවක් එතැනදි බඳුන් වුණේ නැහැ."

• ඉන්දීය විදේශ අමාත්‍යවරයා අපේ රටේ ආර්ථික අර්බුදය සමනය කිරීමට ඒ රජයේ දායකත්වය දීමට සූදානම් බව ප්‍රකාශ කළා. ඒක කොහොමද ඔහු පැහැදිලි කළේ? ඔවුන්ට මේ රටේ ජනතා ගැටලු ගැන මැනීමක් තිබුණද?
"ඔව්. ලංකාවේ ආර්ථික අර්බුදය පිළිබඳව ඔවුන්ට පැහැදිලි අවබෝධයක් තිබුණා. ලංකාවේ වර්තමානයේ ඇති ආර්ථික අර්බුදය සමනය කර ගැනීම සඳහා ඔවුන්ගේ රාජ්‍යයෙන් ලබා දිය හැකි උපරිම සහායන් ලබාදෙන බවට පොරොන්දු වුණා. ඔහු කිව්වෙ දැනට යම් ප්‍රමාණයක මැදිහත් වීමක් තිබෙනවා සහ ඉදිරියේදී එය වැඩි කිරීමට සූදානම් කියලා කිව්වා."

• ශ්‍රී ලංකාවේ ජනප්‍රියම දේශපාලන නායකයා ඔබ ලෙස ඉන්දීය මාධ්‍ය වාර්තා කළා. ජනතා විමුක්ති පෙරමුණේ නායකයා ලෙස ආ ගමනේ සිට මෙතෙක් ආ ගමනත් මෙම ඉන්දියානු සංචාරයත් ඔබට කොහොමද දැනෙන්නේ?
"මම හිතනවා ජනතා විමුක්ති පෙරමුණත් ජාතික ජන බලවේගයත් විශේෂයෙන්ම මේ අපි තුළ අත්පත් කරගෙන තියෙන ජනතා කැමැත්ත අපේ ප්‍රතිපත්ති මේ ඉන්දියානු සංචාරයට ඉවහල් වූ බව පෙන්නුම් කරනවා.මගේ නායකත්වය පමණක් නොවෙයි අපේ දේශපාලන ව්‍යාපාරය කෙරේ ජනතාව ලෙස ඔබ තැබූ ඒ විශ්වාසයේ කොටසක් මේ දකින්න තියෙන්නෙ."

• මෙම ඉන්දීය සාකච්ඡා තුළ ඔබට යම්කිසි හෝ ඉඟියක් දුන්නද ඔබ ඊලගට රටේ නායකයා වෙනු ඇති කියලා?
"එවැනි අදහසක් නම් කියවුණේ නැහැ. නමුත් මෙම ආරාධනය තුළ එවැනි ඉඟියක් තියෙන බව පේනවා."

• ඒ කියන්නේ ඉන්දියානු ආරාධනාව තුළ ඇත්තේ ජාතික ජන බලවේගයේ ඉදිරි ජයග්‍රහණය ඔවුන්ට පෙනෙන්නට තිබෙන බව?
"ඔව් එහෙම නැත්තම් අපි දීර්ඝ කාලයක් දේශපාලනය කරා මෙවැනි ආරාධනයක් ලැබුණේ නැහැනේ. අපිට මේකෙන් එවැනි ඉඟියක් දෙනවා."

• විශේෂයෙන්ම මේ මොහොතේ රටේ ජනතාව බලාගෙන ඉන්නවා ඔබලාගේ සංචාරයේ සිදුවූ සාකච්ඡාවලදී ලංකාවත්- ඉන්දියාවත් අතර වූ ගිවිසුම් ගැන ඔබලා ඔවුන්ගෙන් ප්‍රශ්න කළාද කියලා?
"අපි ජනතා විමුක්ති පෙරමුණ හා ජාතික ජන බලවේගය ලෙසත් විශේෂයෙන් අමූල් සමාගම මුණගැහුනා. ලංකාවේ NLD ආයතනය සහ මිල්කෝ ආයතනය අමූල් සමාගම විසින් මිලදී ගන්න සාකච්ඡා කරලා තිබුණා. අපි ඔවුන්ට විශාල ලෙස එහි විනිවිදභාවයෙන් තොරභාවය හා අපි ඊට කරන බලපෑමත් පෙන්වා දුන්නා.ඒ වගේම මෙහි තියෙන කිසිවක් පාර්ලිමේන්තුවට කරුණු ඉදිරිපත් කර නැති බවත් ජනාධිපති මේක තමන්ගේ දේපළක් ලෙස භාවිතා කර විකිණීමට කරන මැදිහත් වීම ගැන අපේ ඇති විරෝධයත් අපි පෙන්නුවා. මෙම අමුල් ආයතනය පිළිබඳ විශේෂ මැදිහත්වීමක් කරන ලෙස අපි ඔවුන්ට පෙන්වා දෙනු ලැබුවා."

• ඔවුන් එක පිළිගත්තේ කොහොමද?
"ඔවුන් විසින් තවදුරටත් ඒ ගැන සාකච්ඡා කරන්න සූදානම් කියලා කිව්වා.ඒවගේම මෙහි විවෘතභාවය ගැන ඔවුන් කටයුතු කරන බව කිව්වා."

• පුනර්ජනනීය බලශක්තිය ගැන ඔබ සාකච්ඡා කළා. ඒ සම්බන්ධ රටේ ක්‍රියාත්මක කිරීමට යන්නේ යැයි කියන විනිවිදභාවයෙන් තොර ව්‍යාපෘති ගැන ඔබ ප්‍රශ්න කළාද?
"ඔව්. ඒ සම්බන්ධ මැදිහත් වීමක් කරන්න ලැබුණා. හයිද්‍රාබාද් ප්‍රදේශයේ පුනර්ජනනීය බල ශක්තිය ගැන කතා කළා.ඔවුන් ගිය සතියේ සුළං බලාගාරයක් සම්බන්ධ ව්‍යාපෘතියක් ගැන කතා කළා. ඒක ඩොලර් සත 3.4 කට ක්‍රියාත්මක බව කිව්වා. නමුත් අපට වාර්තා වෙන්නේ අපි අදානිට දෙන්න යන්නේ ඩොලර් ශත හතකට වඩා වැඩි ප්‍රමාණයක් කියලා. ඒ අනුව අපේ ව්‍යාපෘති මොන තරම් අසාර්ථකද කියලා හෙළිදරව් වුණා."

• විශේෂයෙන්ම එරට ජාතික ආරක්ෂක උපදේශක හා ආරක්ෂක ලේකම් ඔබ මුණගැහුනා. එය තීරණාත්මක සාකච්ඡාවක්. ලංකාව සහ ඉන්දියාව අතර ඇති ජාතික ආරක්ෂාව ගැන මොනවද විශේෂයෙන්ම කියැවුණේ?
"විශේෂයෙන්ම අප විසින් පෙන්වා දෙනු ලැබුවේ ලංකාව භූ දේශපාලනයේ තරගකරුවෙක් නොවන බවත් ඉන්දියාව භූ දේශපාලනයේ තරගකරුවෙක් බවත්. ඒ නිසා අපේ රටට ඉන්දියාව ආසන්නයේ පිහිටිම අපේ රට ගනු ලබන දේශපාලන , ආර්ථික ක්‍රියාමාර්ග ඉන්දියාවේ ජාතික ආරක්ෂාවට යම් බලපෑමක් විය හැකියි.ඒ නිසා අපි එම දේශපාලන හා ආර්ථික ක්‍රියාර්මාර්ග ගැනීමේදී ඉන්දියාවේ ජාතික ආරක්ෂාවට බලපෑමක් වෙනවද කියන එක ගැන අපි සැලකිලිමත් වෙනවා කියලා කිව්වා."

• ඔවුන්ගේ ප්‍රතිචාර කොහොමද?
"අපි හැම අවස්ථාවකම පැහැදිලි කරා අපි ඔබට ඉදිරිපත් කරන කරුණු හා රටට ඉදිරිපත් කරන කරුණු දෙකක් නොවෙයි, එකක් කියලා. ඒ නිසා ඔවුන්ට අප තුළ අපැහැදිලි භාවයක් තිබුණා නම් මේ සංචාරයෙන් ඒක නිරාකරණය වෙන්න ඇති.අපේ ප්‍රතිපත්ති ගැනත් ඔවුන්ට හොඳ අවබෝධයක් ඇති වුණා කියලා අපි හිතනවා."

• මේ ආරාධනයේදී බොහෝ දෙනෙක් හිතුවා ඔබට ඉන්දීය අගමැති නරේන්ද්‍ර මෝදි මුණගස්වයි කියලා ?
"මං හිතන්නේ ඒක ඉන්දියානු රජය පැත්තෙන්ම තමයි මේ සියල්ල සූදානම් කර තිබුණෙ."

• මේ සංචාරයෙන් විශේෂයෙන්ම මුණගැහුණු පුද්ගලයින් සහ ආයතන ගත්තොත් අපිට වැදගත් මොනවද?කෙටියෙන් පැහැදිලි කරන්න ?
"විශේෂයෙන්ම අපේ රටට පුනර්ජනනීය බල ශක්ති ක්ෂේත්‍රය වර්ධනය කිරීමේදී විශාල අත්දැකීම් ප්‍රමාණයක් එක් කරගත හැකිව තිබෙන බව පෙනුණා . ඒ වගේම සමූපකාර ක්‍රම ගැන අත්දැකීම් ගත්තා. ග්‍රාමීය ජනතාවට කොහොමද දිළිඳු සහන ලබාදෙන්නේ ඒ සහන ලබාදීමේදී කෙළින්මඒ අයට අතරමැදි යාන්ත්‍රණයක් නොමැතිව තාක්ෂණික කාරණා සමඟ ඒ සහන දෙන්නේ කොහොමද කියන කාරණය , ඒවගේම තොරතුරු තාක්ෂණය භාවිතා කරන්නෙ කොහොමද කියන කාරණා ඉතා වැදගත් වුණා. ඒ නිසා මම හිතනවා මේවා ලංකාවට ඉතා වැදගත් වෙයි කියලා.ඉන්දියාවේ අත්දැකීම්, අපි දේශපාලනයෙන් ගත් අත්දැකීම්, අපේ රටේ ව්‍යාපාරිකයින් බුද්ධිමතුන් සමඟ ඇති දැනුම සියල්ල ඒකරාශි කරගෙන අපි ශ්‍රී ලංකාව වඩාත් යහපත් රටක් බවට පත් කර ගත හැකියි කියලා දැඩි විශ්වාසයක් අපිට තියනවා."

• ඔබට මේ දින පහට ඉන්දීය රජයෙන් විශේෂ ආරක්ෂාවක් ලබා දුන්නද?
"ඔව් ඉන්දියානු රජයෙන් අපගේ ආරක්ෂාව භාර අරගෙන තිබුණා ඊට අනුරූප වන පරිදි."

• දෙමළ ඩයස්පොරාව ගත්තොත් වැරදි අදහසක් තමයි ගොඩක් අය තුළ තියෙන්නේ. නමුත් විවිධ රාජ්‍යයන් ඩයස්‌පෝරාවෙන් සහාය ගන්නවා. මේ සංචාරයෙන් හා ඉදිරියේදී එවැනි ඩයස්පෝරාවෙන් සහාය ගැනීමක් හෝ සාකච්ඡා සිදු කිරීමට බලාපොරොත්තු වෙනවද?
"ඔව්. සියලුම ශ්‍රී ලංකා ඩයස්පෝරා සමග සාකච්ඡා කරන්න අපි ලෑස්තියි. ඒ හැම සාකච්ඡාවක්ම ශ්‍රී ලංකාවේ ජාතිය ගොඩනැගීම, ජාතික සමගිය, රටේ ආරක්ෂාව, ජනතාවගේ දියුණුවත් කල්පනා කරමින් තමයි සිදු කරන්නේ."

- ඉරිදා මව්බිම