සිතක සිතුවම්
Contact information, map and directions, contact form, opening hours, services, ratings, photos, videos and announcements from සිතක සිතුවම්, Author, .
බිඳීයන බැඳීම්
කොනිත්තන විට හැඟීම්
හිනාවෙන් ගෙන ඒ රිදීම්
සිත ඇතුලෙ පිරිමැදම්
සිටින්නට හැකිනම්
විශාලයි ඔබෙ වත්කම්....
ලක්ෂ්මී අබයසේකර
පිංතූරය ලක්ෂ්මී අබයසේකර
හිම වැස්ස පුතාගෙ ඇසින්
Leeds England
08.02. 2024
ඇස රැඳෙන හැම තැන ම
හිනා වියැකුණ මුහුණුය
සිහින හේදුණු ඇස් ය
හිස් අත්ල දිගුකොට
ජීවිතේ යදින මිනිසුන් ය
වෙනසක් විසඳුමක්
නො සොයන මිනිසුන් ය
බීජයක් වැටුණු සැණකින්
පණපොවා නැගිටුවන සරු පොළොව ය
අවුරුද්ද පුරාවට එක සිතින්
මහ පොළොව සිඹිනා හිරු කිරණ ය
පොළොව තෙමමින් ගලන වැසි දිය ය
එහෙව් රටකට
මෙහෙම ගිය කල දවස ය
විසඳුමත් වෙනසත්
තමා ළඟ බව
නොදකිනා තුරු මේ මිනිසුන්
උන් මිනිස් රූකඩ පමණ ය
ලක්ෂ්මි අබයසේකර
පිංතූරය දුලිප්
මම
මා තුළ ම රැඳී රැඳී
යළි යළි ඉපිදෙමින්
සොයද්දී නුඹ
නුඹ
අහස් ගැබ
වළාකුළු මත
නිදහසේ පාවෙවී.
ලක්ෂ්මී අබයසේකර
27 08 2023
අතු අගිසි අග
පිපී තිබුනට
රුවැති සුවදැති
කුකුළු
ගී ගයාගෙන
ඉගිල ආවාට
කුරුල්ලනි එහි
කූඩු හැදුමට බෑලු
ලක්ෂ්මී අබයසේකර
( පිංතූරය පුතාගෙන්)
වෙන්දේසියට තැබු
මල් වට්ටියක්
කාගෙ අතකට ගියත් මොකදැයි
විකිණුනේ වැඩි ලංසුවට නම්
මුදල ගෙව්වේ අයිතිකරු නම්.
ලක්ෂ්මී අබයසේකර
ටිකක් කල් ගතවුනා වැඩි තමයි
ටක්කෙටම දැනගන්න
මේ ඇත්ත
සහසුද්දෙන්ම දන්නවා දැන්නම්
නුඹේ ආදරය
ආදරය විතරමයි කියලා.
තම හිසට තම අතමය කියා
අසා තිබුනත් කොපමණ වරක්
අපමණක් වර මට හිතුනෙ
මගෙ හිසට නුඹදුන් සෙවණ ගැනමයි
විඩාබර අව්වැසි වලින්
වහ0 කරගෙන
නුඹ දුන්න සෙනෙහස අපමණයි.
අහස
නුඹ මට ආදරයෙ අහසමයි
ලක්ෂ්මී අබයසේකර
ගමන් මග
අතරමග
අතරමං විය යුතුමය
දවසකදි ඔබ
මෙතෙක් නුදුටුව
මග හැරි ගිය බොහෝ දේ
තිබෙන බව
හැඟෙනු ඇත
එදවස ඔබට
අතරමං විය යුතුමය
ගමන් මග අතරමග
ජීවිතේ හරි හැටි දකින්නට
ලක්ෂ්මී අබයසේකර
වෙන් වෙන්ව
ඇවිද ගියද මේ මග
මුණ ගැසෙනු ඇත අප
එකම තැනකදි යලි එකට.
තනි තනිව නෙලාගත්
මල් සුවඳ
බෙදාගමු අපි
නතරවී යලි මොහොතකට.
ලක්ෂ්මී අබයසේකර
ඔහෙ ඇවිත් යන
වළාකුලකට
උනත් පුළුවනි
තනි රකින්නට
පාළු හිස් අහසකට
ලක්ෂ්මී අබයසේකර
මේ මහ සයුර
කෙතරම් කුඩාදැයි
හැඟිනි මට..
ඔබ
මාලගම සිට
හුස්ම ගන්නා විට.
ලක්ෂ්මී අබයසේකර
21 03 2023
සෑම දුෂ්කර සෘතුවකම
මගේ කුටියෙහි
මල් පිපුන මැජික් එක
ඔබ තබා ගිය මල්
හැම දිනම
සුවඳවත් වී
සුවඳ විහිදන බැවිනි.
ලක්ෂ්මී අබයසේකර
06 03 22023
හෙන්දිරික්කා මල්
හිනාවෙයි නුහුරට
මල් නොදුන්
රෝස ගස යට
ලක්ෂ්මී
04_02_2023
පරව යන බව දැන දැනම
ඔබේ උයනෙහි
මල් පිපෙන්නට ඉඩ දෙන්න
ලක්ෂ්මී අබයසේකර
20 ~ 12 ~ 2022
බෙදී අතු ඉති
වෙන් වී ගියද ඈතට
එය මහා ගසක් මැයි
මහ පොලව හා බැඳුන
ඇවැසි කෙනෙකුට සෙවණ දෙන
ලක්ෂ්මී අබයසේකර
අපි අපව
ආදරෙන් රැකගත් තරම්
වෙන කවුද දන්නේ
ඉර හද තරම්
ලක්ෂ්මි අබයසේකර
20 ~08 ~ 2022
කෙහෙම්මලක් ගිය උඩ😄
මුදුනෙන් ගැට ගසා
පහළට මුදාහල
කලුත් නැති සුදුත් නැති
රන් පැහැති
ඇගේ වරලස
දකුණට වමට
වමට දකුණට
පැද්දි පැද්දී
ඇගේ උරහිස
සිඹින හැඩ......
මගේ ඇස් අස්සෙන්
රිංගා ඇවිත්
හිත ඇතුලෙ
සක්මන් භාවනාවක.....
ඇගෙ කෙස්ස
නිදහසේ පැද්දෙයි
මගේ හිත
ඒ අස්සෙ පැටලෙයි
ලක්ෂ්මී අබයසේකර
යන්න.....
තබා පා සටහන්
බලා තුටුවෙනු පිණිස....
රළ....
නොතෙමන්න පායුග
මගෙ පුතුගෙ,
මැකෙනවා නම්
පැමිණි මඟ ලකුණු...
වෙරළ....
රැකගන්න මගෙ පුතු
තබා යන හැම පියවරම
බලා තුටු වෙනු පිණිස
මතු දිනක...
ලක්ෂ්මී අබයසේකර
02-11-2020
ඊයේ නුඹෙ නමට
උගස් කල සිත
කඳුළු වාරික ගෙවා
නිදහස් කළෙමි අද...
සින්නක්කරව නොලීවෙන්
සිනාසෙන්නට හැකිය හෙට
සිතේ අයිතිය තනි මටම විට
ලක්ෂ්මී අබයසේකර
30-08-2020
නොකඩවා ඇද වැටෙන
මහා වැසි කෝඩයට
දෙවෙනි නෑ ගස් කොලන්
අඹරවන සැඩ සුළඟ
ළපටි සියුමැලි නුඹට
මේ හැටිම දුක් ගන්ට
පුළුවන්ද කියාපන්
කොතෙක් කල් ඉවසන්ට
නුඹ තාම දන්නෙ නෑ
විෂ දළය හැම තැනම...
අහම්බෙන් වගෙ දිනක
ඉර එළිය වැටුනාට
ශීත ඍතුවයි තාම
මල් වරා කල් මරණ
හකුලගෙන පෙති යළිත්
හංගගෙන මුව කමල
පිපෙන්නට පුළුවන්ද
වසන්තයෙ නිසි කලම...
(නුඹ ආව කල් වැඩියි
ඒ නිසා දුක් වැඩියි)
ලක්ෂ්මී අබයසේකර
25-08-2020
ශීත ඍතුවේ දවසක
ඉර එළිය යහමින් තිබූ උදයක
ලෝභ වී ඉර එළියට
බොහෝ දුර ගියෙමි පසුකර
පුරුදු නැවතුම...
ඔබ ඇවිත් යන්නට ඇත
මා මග හැරුන බව දැන
ලක්ෂ්මී අබයසේකර
03-06-2020
මත් වෙන්ට ආදරේ මිස කිසිත්
ඇවැසි නැති බව කියන්
ආදරෙන් මත් වෙච්ච කොවුලෙක්
ආදරේ ගැන ගැයූ
මිහිරිතම ගී අසමින්
මලක් නො පිපුන ගසක
කුළුදුලේ පිපි කැකුලියක්
හෙමි හෙමින් විහිදවා මුදු පෙති
බලා හිටියා නෙතු පියන්.....
මත් වෙන්ට ආදරේ විතරක්
මදි කියා දැන හිටිය බමරෙක්
කොවුල් ගීයට දැහැන් ගතවුන
කැකුලි ළඟ දැවටිනි පෙමින්..
කොවුල් ගීයේ මිහිර විඳිමින්
ආදරය ගැන සිහින දැකඋන්
කැකුලි ඇහැරුනෙ
ඉගිල්ලී යන බමර තටු වැද
ශේෂ වුන දුක්බර හඬින්.....
(වැරදීම වරදක් උනේ එහෙමයි)
ලක්ෂ්මී අබයසේකර
17-04-2020
අලවගත් සිනහවකි
සැබෑවට අයිති නැති..
තෝරගත් වචන දෙයි
හිතේ ගෑවිලා නැති..
සුවච කීකරු වගෙයි
හදේ දැල්වේය ගිනි..
නමට ඇය නුඹෙ තමයි
සහතිකේ ලියා ඇති..
ගිහි ගෙදර හිරකාර පතිනියක්
තම හඬට ඉඩක් නැති
ලක්ෂ්මී අබයසේකර
23- 02-2020