Tamer Fahmy

"لا تضع كل البيض في سلة واحدة"
مثل قديم يجب مراعاته
عطل كبير يصيب مايكروسوفت حول العالم وعودة تدريجية للخدمات الى نشاطها الطبيعي
كثير من العاملين و المستخدمين يعتقدون ان اعتمادهم علي خدمات الشركات العملاقة يحميهم من المشاكل و فترات الأعطال
للاسف هذة معلومة خطاء تماما
حتي مع استخدام هذة الشركات لامكانيات عملاقة في الخدمات و الحوسبة السحابية ، لكن ذلك لا يمنع حدوث الاعطال
اليوم أصبحنا علي تعطل كبير في خدمات شركة مايكروسوفت حول العالم، و من قبل كان تويتر و من قبله فيس بوك
أي متعامل ذو خبرة جيدة في المجال يعلم تماما بأنه لا يوجد ما يسمي بضمان الاستمرارية 100% أيا كانت الامكانيات التي تستخدمها
طبيعي ان يعتمد الكثير من المسئولين عن خدمات تكنولوجيا المعلومات علي الشركات العملاقة ، لكنه يجب العلم بان الاعتماد علي هذة الشركات لن يكون حماية من الاعطال
شخصيا افضل دائما الاعتماد علي السيرفرات الخاصة، لأن ذلك يجعلك علي الأقل ان يكون لك القدرة علي تحديد فترة الصيانة و مواعيدها المناسبة اليك و ان تكون في المواعيد التي تحددها و تقوم بالابلاغ عنها مسبقا
حتي هؤلاء الذين يخشون من مشاكل الأعطال الفجائية ، يمكنهم ببساطة استخدام خواص السيرفرات التبادلية mirror systems لحماية اعمالهم من الاعطال المفاجئة

الناس اللي بتعتمد علي سيرفرات
انتوا في الشارع

البنت دي الكارت بتاعها اتسرق منه فلوس بما يقرب 135 الف جنيه

مش عايز اخش في نقاش ان البنك المفروض يعمل ايه
لكن المشكلة دي بنواجها بقالنا فترة مش قليلة

للأسف ناس كتير بتستهون بتأمين أجهزتها المحمولة ، و بالذات بتحميل تطبيقات غريبة أو فتح لينكات مش موثوق فيها

نرجع للموضوع شوية
دي حالة ظهرلها رسائل OTP علي الجهاز و بعدها تنفيذ عمليات عن طريق الكارت الخاص بها

طالما ان وصل رسالة OTP يبقي تأكد ان بيانات الكارت الخاص بك مسروقة
و طالما انه تم تنفيذ العملية بعد ال OTP يبقي جهاز حضرتك أيضا تم اختراقه

الهاكر المحترف غالبا ما يتابعك في صمت عن طريق جهازك المحمول
يجمع اولا معلومات البنك و مواعيد العمل لاختيار افضل موعد لتنفيذ عمليته التي غالبا ما تكون مرة واحدة بعمليات متتالية
- ملحوظة : لو تليفونك بيحصل عليه سحب كبير في االانترنت "تظهر في استهلاك الباقة " يبقي انت تحتاج الي التأكد من حمايته

المثال الذي امامنا ، الهاكر دخل علي تليفون المستخدم و استخدم كلمة المرور المؤقتة OTP حتي اثناء اتصال المستخدم بالبنك
و قام بتنفيذ اكثر من معاملة في وقت سريع و من عدة مواقع

طيب ... نعمل ايه لو جالنا رسالة OTP غير منتظرة في أي وقت
1- افصل اي انترنت عن جهازك ( داتا أو واي فاي )
2- اتصل بالبنك فورا لايقاف الكارت ، و يفضل من تليفون أخر
3- قم باجراء شكوي الي البنك حالا لايقاف أي معاملات و تقديم شكوي في اي معاملة غريبة تظهر
4- اذا تم التأكد من سحب مبالغ من حسابك بهذة الطريقة ، عليك التوجه فورا بجهازك المحول الي مباحث المعلومات ( لا تنسي أن تترك الجهاز بدون اتصال انترنت ) للابلاغ عن المشكلة
4- حاول تغير جميع باسورداتك ( من جهاز أخر ) خاصة باسوردات البنوك
5- حمل تطبيق حماية فيروسات
انصح بهذا التطبيق من جوجل ستور ( مجاني )
https://play.google.com/store/apps/details?id=com.comodo.cisme.antivirus&hl=en&gl=US&pli=1
أو أي تطبيق أخر موثوق فيه
6- حاول سحب جميع ملفاتك و اعادة تهيئة جهازك المحمول الي وضع المصنع ( تبع نوع كل جهاز ) ثم اعادة تحميل تطبيقاتك السليمة فقط من اماكن التحميل الرسمية فقط و لا تقوم بتحميل اي تطبيق خارج هذة المتاجر

نرجع تاني لنقطة مهمة
لو جهازك المحمول بيتم استهلاك انترنت غير معلوم عليه ( الباقة بتخلص ما تعرفش ليه )... يبقي انت في خطر
جميع الأجهزة الآن لها طرق لمعرفة اكثر التطبيقات استخداما للانترنت
هتلاقي تطبيق غريب يستهلك جزء كبير من الانترنت
قم بحذف التطبيق فورا و الكشف علي جهازك باستخدام برنامج حماية موثوق فيه قبل ان تكون ضحية أخري لهاكر محترف يصطاد فرائسه عشوائي

أرجو الشير لتوعية أكبر قدر ممكن

عشنا و شفنا الكور بتتشحن 🙂

الرسائل الهبلة دي بقت منتشرة اليومين دول
غالبا بتبقي من هاكر عايز يخترق موبايلك و يستخدمة بعد كدة سواء لاختراق ناس تانية أو لسرقة حسابات
اللينك اللي بيتحط كان الاول بيبقي لينك لتحميل تطبيق أو برنامج يتركب علي موبايلك
بعد فترة اصبح اللينك دة بيوديك علي موبايل حد تاني تم اختراقة و يرغي معاك بأي كلمتين لحد ما تثق فيه و بيعتلك ملفات الاختراق بعدها
طبعا احنا كناس متخصصين عارفين كويس ان امازون أو جوجل أو اي شركة مش هتبعت رسايل توظيف بعشوائية لأي حد ، أو انهم مثلا مش لاقين حد يشتغل و بيدوروا علي ناس
لكن للأسف فيه ناس كتير خبراتهم قليلة بيصدقوا و بيقعوا في المصيدة دي ، خاصة في ظل الأزمة المالية العالمية المنتشرة حاليا في كل دول العالم
شير و وعوا الناس ... اي حد يجيله رسالة زي دي يعمل حاجة بسيطة أوي
يضغط علي Report و يسيب علامة الصح متعلمة علي Block contact and clear chat زي اللي موجود في الصورة التانية

اعملوا شير علي شان الناس بتتسرق بياناتها و استهلاك الانترنت و ممكن حاجات تانية كتير
للأسف اللي بيقع في الخدع دي تمن الباقة بيبقي كبير بالنسبة ليه و بيزعل أوي علي الخسارة اللي بيخسرها و بيفتكر ان شركة الانترنت هي اللي سرقاه
فلو سمحتم اعملوا شير علي قد ما تقدروا و نبهوا الناس اللي مش عارفة

إيلون ماسك اللي كان بيقول انه الانترنت هيكون ببلاش للناس كلها ، دلوقتي بيطالب بفلوس للحسابات علي تويتر

الذكاء الاصطناعي و مدي التطور وصل لفين

الذكاء الاصطناعي هوة نوعية برمجة ذكية تخلي الجهاز أو النظام اللي انت شغال عليه يستنتج انت عايز ايه و يطلع ليك الرد المناسب.
كلنا بدأنا نلاحظ الموضوع دة و اشهرها جوجل ماب اللي بتبني ردودها بناء علي مستخدمين تانيين ، يعني مثلا ممكن حضرتك تلاقي جوجل ماب مخليك تاخد يوتيرن عكس علي شان هوة بني معلوماته عن طريق كمية ناس تانية مشيت اليوتيرن دة بالعكس ... " حتة غباء اصطناعي مش ذكاء خالص"

أو مثلا تلاقي موقع زي أمازون يشوف انت بتدور علي منتجات ايه ، أو اشتريت منتجات ايه ، و الناس اللي اشترت منتج زيك غالبا بيدوروا علي منتجات تانية أو منتجات ليها علاقي بيها
يعني مثلا ... حضرتك اشتريت شاشة تليفزيون ... يقوم بعدها علي طول يطلعلك صور حامل تليفزيون مثلا ... وهكذا

الجديد بقي في التطور بيحصل حاليا في موبايلات جوجل Pixel

جوجل نزلت موبايل جديد ببروسيسور جديد بتاعها ، البروسيسور الجديد فيه خاصية اسمها Tensor Processing Unit
الخاصية دي علي شان تساعد في تحليل الذكاء الاصطناعي علي جهازك قبل ما يتبعت البيانات لجوجل

طبعا مش عايز اتكلم علي موضوع الخصوصية و خلافه ... جوجل عايش معانا في البيت

المهم ان الوحدة دي اسرع في تحليل البيانات الخاصة بالذكاء الاصطناعي و بالتالي هتدي سرعات تحليل جبارة لأنظمة جوجل اللي طبعا مش هتبطل هي كمان تحليل ، لكن هتعمل طفرة كبيرة في تحليل الانظمة و بالتالي تطور كبير في سرعة و امكانيات الذكاء الاصطناعي

الموضوع وصل لمرحلة ان جوجل بتعمل تحليل لاتصالك بالكول سنتر عن طريق تحليلها لمكالماتك و مكالمات غيرك
يعني مثلا حضرتك متعود تتكلم بالعربي ، و الكول سنتر دة جوجل عرفت من مستخدمين تانين ان لما بتتصل بيقولك "للمتابعة باللغة العربية اضغط رقم 1 ، و For English press 2 " و حضرتك متعود تكلم الكول سنتر بالعربي
يقوم الموبايل دايس بدالك 1 قبل ما تكمل

انا خايف بعد كدة نلاقي الموبايل بيرد علي الأسئلة بصوتك " رقم التليفون اللي عليه الخدمة / اخر 5 ارقام في بطاقة الرقم القومي / عنوان المراسلات ...." ساعتها اللي عاملين الكول سنتر هيضطروا يشوفوا طريقة تانية يتأكدوا بيها من شخصيتك 😎.

التعليم الرسمي يجعلك تعيش، والتعليم الذاتي سوف يجلب لك ثروة

احذروا الرسائل الخداعية
الرسائل الخداعية الغرض الاساسي منها اختراق البريد الالكتروني أو تحميل ملفات اختراق علي أجهزتك ، يوميا ما نصادف مثل هذة الرسائل و نتغلب عليها بحكم الخبرة .
التحذير دة خاص بان الموضوع تطور شوية
الرسالة دي جميع المؤشرات العادية تدل علي انها جاية من MicroSoft ، لكن اللينك الموجود في الرسالة كان سبب أساسي في فضحها
حتي الهيدير ممكن جدا أن يخدع اشخاص كتير.

تأكد دائما من معرفة أي لينك قبل فتحه ، فشراك الهاكرز تتطور يوما بعد يوم
بمجرد ان تجد اللينك من موقع غريب فتأكد انها رسالة هاكينج

أرجو السلامة للجميع

أنواع الرد علي الميل بطريقة السوشيال ميديا 😅🤣

البوست اللي فات كتبت عن شخصية الأي تي و ازاي تكون مهم في المجال، ظهر تعليقات سلبية و فيها احباط فظيع
البوست دة هديلكم كام مثال علي أهمية الأي تي حول العالم
- في الوقت اللي العالم كله مقلوب و روسيا عملت تعبئة جزئية لقوات الاحتياط، نزل خبر صغير جدا لكنه مهم جدا لينا
تم استثناء العاملين في مجال الأي تي من الاستدعاء للحرب
روسيا اللي قالبة العالم كله ، فاهمة كويس أوي أهمية المجال و العاملين فيه و استثنتهم من استدعاء الحرب .
تاني حاجة
اكبر الشركات العالمية حاليا هي شركات تعمل في مجال تكنولوجيا المعلومات ، هتقولي يا عم دول برة مصر
طيب خلينا نشوف كدة نوعية الشركات اللي نجحت في مصر الفترة الأخيرة و اللي قدرت تواجهة أقوي الظروف الاقتصادية و قيمتها الاقتصادية كبرت جدا
( سوق دوت كوم ... اللي اتباعت الي أمازون و بقت متحكم في جزء كبير من سوق التجزئة في مصر )
جوميا
سويفيل
فيزيتا .... و غيرهم كتير
حتي الشركات اللي مجال شغلها غير معتمد اصلا علي الأي تي ، هتلاقي ادارة الأي تي عامل مهم جدا في شغلها
علي سبيل المثال الكول سنتر ممكن يعلي الشركة جامد جدا و ممكن يدمر سمعتها ، طبعا مش الولاد اللي شغالين هم السبب، السبب بيكون في السيستيم اللي الولاد شغالين عليه
لو السيستيم اللي تحت ايديهم بيخليهم عندهم معلومات كويسة أول بأول و بسرعة مناسبة للرد، هيكون الكول سنتر دة قوي جدا و هيرفع الشركة و قيمتها قدام العملاء ، و لو السيستيم بايظ أو واقع زي ما بنسمع كتير ... اكيد سمعة الشركة هتتأثر
انظمة المبيعات و متابعة المخزون و خلافه
موقع الشركة علي الانترنت و نوعية المعلومات اللي عليه بيكون سبب رئيسي في اختيار العميل للشركة و اختيارها عن باقي الشركات
صفحة الشركة علي الفيس بوك و حساب التويتر و اللوكيشن علي جوجل ماب .... الخ
حضرتك كأي تي مش مسئول انك تعمل كل دة بنفسك ، لكن مسئوليتك انك تقدر تشوف الشركات المناسبة علي شان تتعاقد معاها و تقدم أفضل الحلول لشركتك
كل دة لما هيتشرح للادارة كويس و يتوظف بالطريقة المظبوطة هيكون طوق نجاه لشركات كتير حتي في أشد أوقات الازمات

انا ملاحظ ان كم كبير من مشاكل العاملين بمجال ال IT سببها ان الشركات مش قادرة تفهم أهمية مجال الأي تي بشكل جيد ، و بالتالي مش بتدي العاملين في المجال حقوقهم بشكل لائق
للاسف انا بجيب اللوم الاكبر علي العاملين في المجال و ليس اصحاب الشركات أو مديري الإتش أر
انت كمدير أي تي أو حتي موظف أي تي ماسك شركة لازم يكون مقامك اكبر من مجرد مشغل لسيرفر و شوية أجهزة علي كم سويتش و راوتر
هتسألني ازاي
تعالوا نحط شوية بنود بس علي شان تطبقها لازم تكون فاهم ومستوعب طريقة عمل الشركة و مجالها كويس جدا
استيعابك لمنظومة العمل في الشركة هيخلي عندك قدرة انك تقدم حلول جديدة للشركة
تقدر تدور علي أنظمة تساعد في تطوير الشركة
تقدر تقدملهم حلول مبتكرة للتسويق خاصة الالكتروني
ركز علي الحلول اللي تزود الانتاجية و المبيعات "الاتنين دول من أهم الحاجات للادارة في جميع المجالات"
ابعد دائما عن فكرة طالما الحاجة شغالة خليها زي ما هي
كل فترة اشرحلهم حاجة في المجال و اهميتها ، زي الميل و الباكب و انظمة الحماية
قدم كل فترة تقرير عن حالة الأجهزة و الأنظمة و اذا كانت محتاجة تحديث
ما تنتظرش لحد ما سيستيم أو جهاز يقع، كل فترة غير هاردات و زود رامات ... الخ
لما هتعمل الحاجات دي هتقدر تطلب طلباتك كأي تي محترف
ميزانية تطوير أول بأول للأنظمة و الأجهزة
ميزانية أكبر للعاملين في القسم
أكبر غلط انك تنتظر التقيم بدون هذة الخطوات
ياريت البوست دة يكون بداية لاننا نتناقش في طرق تطوير الشركات و الأفكار اللي ممكن نعملها، لان ببساطة كل دة هيسمع في أهمية المجال و بالتالي أهمية العاملين به