Heba Colors - Inspired by Colors
هدفنا ننشر الفن والإبداع ونلهم العالم من خلال تصميمات ?
من تصميمي علي Ae
مسائو فل
لما تكتشف شغفك وانت هنا ليه
بتتقابل من نفسك بجد بيطلع منك أمور متتخيلش أنها جزاك وانك بتعرف تعملها ..بتشعر بالسعادة ويتنفس حياة .. متكملش حياتك عادي اللي بتصحي فيه هو اللي بتنام فيه وبتلف في الساقية
اعرف انت هنا ليه لو دورت هتلاقي شغفك جواك مش محتاج حد يدورلك عليه
عيش بشغف هي حياة واحدة هتعيشها
من تحركاتي علي Ae
صباحو فل
كام مرة كان نفسك تعمل حاجات كتير وقولت مافيش وقت او مش هقدر او مش هعرف أو الوقت خلاص فات وكلمات كتير سلبية بنقولها لنفسنا وفعلا مش نعمل حاجة ونفضل متعطلين ونلوم علي الظروف والناس اننا موصلناش لحاجة
لكن اللي عايزة اشجعكم عليه النهاردة هو قوة الكلمة المنطوقة زي اللي في الفيديو تحت I can do it
الا هتصدق فيه هتكونه مش ممكن تصدق في حاجة وتتحرك فيها ومتوصلش
ينفع تغير اللغة اللي بتتكلم بها عن نفسك وعن الظروف
ينفع تقول أنا أقدر اعملها بربنا
ينفع تقول طالما حد عملها قبلي يبقي هي بتتعمل يعني أنا كمان ينفع اعملها
ينفع تقول افضل وقت للبداية بالنسبة لي هو دلوقتي الآن
الغي من قاموسك كلمة مستحيل مافيش مستحيل في ناس عندها إعاقة من ذوي الهمم وتحدي نفسها ووصلت علشان كانت مصدقة في نفسها وفي ربنا
لما بتصدق وتقرر وتبدأ تتحرك الكون كله بيتحرك معاك وربنا بيفتح ابواب وبيبعتلك ناس انت متتوقعهمش بيسندوك في الرحلة ويبارك خطواتك لما تصدق وتتحرك مش وانت قاعد في مكانك
#تصدق #تتحرك #تتفتحلك #ابواب
يومكم جميل ومليانة استنارة
من رسمي علي التابلت
صباحو فل
بنت لابسة لبس رياضي
حبت النهاردة اكلمكم عن الرياضة
الرياضة مش رفاهية وكماليات بالعكس ده حاجة مهمة جدا لصحتنا
أنا متحركتش فيها غير لما حصلي الم جامد و مرض علشان كده حبه اشجعكم تتحركوا فيها مش لازم يحصل معاكم الم أو أزمة صحية علشان تتحركوا
الرياضة مهم تكون أسلوب حياتنا
الموضوع بسيط مش لازم تروح جيم أو تشترك في نادي وتعمل حاجات صعبة ومحتاجة تكلفة كبيرة ووقت فتكسل أو تكون load عليك
ممكن تمشي كل يوم نصف ساعة ممكن تبدأ ب5 دقائق وتبدأ تزود وتلتزم وتهتم وتحافظ عليها
من اغلي النعم اللي ربنا اديهالنا .. هي صحتنا .. صحتك هي ثروتك الحقيقة
اهتم بها هتلاقيها ... خليك فاكر لو مش معك صحتك مش هتعرف تعمل اي حاجة أنت عايز تعملها أو ربنا عايزك تعملها
وكمان هي أمانة عندك ربنا اديهالك واتمنك عليها يا تري بتعمل فيها ايه ؟؟؟
يومكم جميل
من رسمي وتحريكي Ae
صباحو فل
كل مرحلة في حياتنا لها بداية ونهاية
زي ما بيعدي علينا اوقات صعبة وبنحس أنها مش بتخلص وبنكون مش قادرين نشوف اي نهاية في الحقيقة
هي مرحلة أو رحلة أو موسم بيبدأ بس الاكيد أنه بيخلص
حياتنا زي الرحلة لها بداية ولها نهاية
بس المهم خلال الرحلة دي تكون عيشت وعملت اللي ربنا خلقك علشان تعمليه .
اخبار الرحلة بتاعتك ايه . اعمل واقفة وقيم وعدل وطور المهم متكملش وخلاص ؟!
رسمي بالايد علي التابلت
صباحو فل
#7
رسمت النهاردة زجاجة عطر خام
صباح الخير عليكم
اد ايه العطور بيكون رائحتها حلوة اوي ونكون عايزين رائحتها تكون بتفوح مننا وبنكون مبسوطة اووي واحنا شامين رائحتها فينا واد ايه تعليقات الناس اللي بتشم رايحتنا بتنسطتنا تخيل كل ده من ريحة برفان حلوة ..
تخيل بقي لو تصرفاتك وسلوكك وقلبك وكلامك حلو زي البرفان كده بيأثر تأثير جميل علي الناس واد ايه الناس بتشم ريحة جمالك وتصرفات اخلاقك وقلبك اللي مليان بالحب لكل الناس وعطائك اللي مليانة تأثير وبيسيب فرحة في قلوبنا الناس .
يا تري انت زي البرفان الناس بتقول الله علي ريحتك ولا ....
#6
صباحو فل عليكم رسمت واحدة عايزة تنط مرة واحدة للنجاح من غير تعب أو اجتهاد
ساعات كتير بنكون عايزين حاجة نعملها تخلينا ننطط للقمة علطول بدون ما نبذل مجهود ونقع ونقوم ونعيش في تحديات وصراع والم
النجاح جميل وكلنا عايزينه لكن الوصول ليه مش سهل مليان تحديات وإحباطات واخفاقات فمن فضلك اصبر وانتظر علي نفسك وعلي الظروف اللي بتمر بها هي دي اللي هتصنعك بجد
مدورش علي حلول سريعة تتنططك استمتع بالرحلة وبكل مرحلة فيها وتأكد وراء كل سعي واجتهاد نجاح حقيقي وخلي اصرارك ومثابرتك هما يوصلوك
لو حلمك حقيقي وشغوف به ومشتاق تحققه وعندك قيم ووجه هتوصل
الاحلام ممكنة
#5
مساء الخير عليكم النهاردة رسمت
ساعات كتير ال Body language بتاعتنا بتفضحنا وبتقول كل حاجة من غير ما بنقول ولا كلمة
مهم جدا لغة الجسد اللي بتخرج منك لكي وللاخرين ساعات كتير جسمنا بيقولنا حاجات بس احنا مش بنسمعه علشان لغته مش كلام مباشر لنا نعرف نسمعه بسهولة
محتاجين نهدي اوي من الجري والزحمة والساقية اللي بنلف فيها ونتواصل مع نفسنا علشان نعرف نسمعها ونعرف نكون احسن في علاقتنا مع نفسنا ونكون مرتاحين وده بالتالي بينعكس علي علاقات بالآخرين
ليلتكم سعيدة 🙏
#4
مساء الخير عليكم النهاردة رسمت #الصاروخ وهو بيطلع من القاعدة بتاعته علشان ينطلق
كتير بنحب نشوف الصاروخ وهو منطلق لكن مش بنحب نشوف المراحل اللي ما قبل الانطلاق
في ناس بتشعر بالممل
وفي ناس بتفقد الهدف
وفي ناس مش بتكمل
وفي ناس بتستسلم
وفي ناس بتستعجل النتائج
وفي ناس بتكون مستمتعة بالرحلة بكل تفاصيلها
جاوب في التعليقات أنت أنه نوع منهم وقولنا ليه
ولو عايزة توصل لنقطة الانطلاق يا تري هتعمل ايه شاركنا بالافكار
#3
مساء الخير عليكم
تصميم اليوم كان عن الطبيعة وعملت فيه التكنيك ده أن الصورة هي هي وتكون من الجانب كمان
الطبيعة اد ايه ساحرة ومليانة بالجمال بتبين عظمة الخالق اد ايه كل حاجة في الطبيعة لها لون مميز وإحساس مختلف وصوت يجنن واد ايه جمال الطبيعية بيسيب تأثير فينا جميل
مافيش مرة روحت في الطبيعة غير لما رجعت مبسوطة ومرتاحة ومنطلقة لو اوصفلكم القاعدة قدام البحر والراحة النفسية والاستماع عامل ازاي ولا السحاب وجماله ولا الخضرة والزرع والشجر ولا العصافير وجمال شكلها وصوتها ولما بتأمل فيهم اد ايه مش بيعولوا هم حاجة زينا كده ولا خايفين من بكره ولا خايفة النهاردة من اي مواقف يتعرضوا لها ولا عايشين في امبارح طول الوقت بيغنوا ومستمتعين وبيشكروا ربنا
ولو فضلت احكي عن جمال كل حاجة في الطبيعة مش هيكفي بوستات
اسيبكم مع الصورة وشاركونا في التعليقات ايه مشاعركم اول ما سوفتوا الصورة دي ولو افتكروا موقف أو ذكري حلوة أو مش حلوة ياللي شاركونا ومنتظرة إبداعاتكم
#2
مساء الخير عليكم
رسمة النهاردة عبارة عن بنت بتسمع حاجة
عيشتها في حتة تانية
لما تكون مضغوط /ة اسمع حاجة هدي بها وروق اعصابك وافصل من اي مشاكل وضغوط
الحياة بسيطة وجميلة ومتخليش الضغوط والهموم تفقدك جملها
يا تري ايه الحاجة اللي لما بتسمعها بتلهمك وبتساعدك وبتغير مودك وبتخليك في حتة تانية قولنا في التعليقات
#1
مساء الخير عليكم
#البيت
وانا برسم البيت اللي في الصورة اللي تحت ده بكل تفاصيله ده حسيت بالدفي والامان والراحة والحب والاحتواء
شكرت ربنا علي بيتي وعلي الأربعة حيطان اللي مدفينا وحميتنا من مطر وبرد وحر
كتير في حاجات في حياتنا موجودة ومتاحة لنا طول الوقت فبقينا نشوفها عادي ولكنها في الحقيقة هي غير عادية محتاجين نمتن ونشكر عليها اووي دول نعم غالية اوي
شاركينا في التعليقات اول ما شوفتي رسمت البيت اول حاجة جت في ذهنك ايه اكتبها سواء إيجابية أو سلبية