Rata Rakina Ran Pawra - රට රකින රන් පවුර

2002 වසරේ රුපියල් කොටි 12,500 කට වඩා වැඩි වත්කම් තිබු ශ්‍රී ලංකා රක්ෂණ සංස්ථාව රුපියල් කොටි 600 කට එවකට පවතී රජය, අරක්කු සමාගමකට විකුණා දමන ලදී. 2007, ජනවාරි මස 12 වන දින මා ඉදිරිපත් කල COPE වාර්තාව අනුව රක්ෂණ සංස්ථාව, ලංකා හොස්පිටල්ස්, වරාය ඉඩම් නැවත රජයට පවරා ගන්නා ලෙසට මා නිර්දේශ කලේ ජීවිත තර්ජන මද්‍යයේ සහ නිවසට වෙඩි වරුසා එල්ල වෙද්දීය. ඒවා නැවත පවරා ගැනීමට ශ්‍රේෂ්ඨාධිකරණයේ නඩු පැවරු විට මහින්ද රාජපක්ෂ රජය ඒවා රජයට පවරා ගැනීමට එරෙහිව වසර 2ක් නඩුව කල් ඇද්දේය. එවකට ශ්‍රේෂ්ඨාධිකරණය ලබාදුන් ඓතිහාසික තීන්දු 2ක් මත නැවත රජයට ඒවා පවරා ගන්න ලදී. පි.බි. ජයසුන්දරට රුපියල් ලක්ෂ දෙක හමාරක වන්දියක් ගෙවීමට නියම කොට මුදල් අමාත්‍යංශ ලේඛම් තනතුරෙන් නෙරපන ලද්දේ එම තීන්දු මගින්ය.

රක්ෂණ සංස්ථාව නැවත ජනතා අයිතියට ලබාදීම වෙනුවෙන්, රක්ෂණ සංස්ථාවේ සේවක මණ්ඩලය මා හට උපහාර දැක්වීම පිණිස උත්සවයක් සංවිධානය කළේය. එම දිනයේදී මා හට රක්ෂණ සංස්ථා භූමියට ඇතුළුවීම තහනම් කලේද එම රජයමයි. අද දින රක්ෂණ සංස්ථාව රුපියල් බිලියන 73ක් රක්ෂිතයන්ට බෝනස් ගෙවූ බව දක්වමින් 60 වන සංවත්සරය අභිමානවත්ව සමරයි. මම රජයට සහ ජනතාවට මෙම අභිමානය ලබා දුන්නේ ජීවිත තර්ජන නොතකා මා සැලූ ලේ දහඩිය කඳුළු වලින් බව මමද අභිමානවත්ව සිහිපත් කරමි. තවද රක්ෂණ සංස්ථාවේ පවතී අරමුදලක තිබු මුදල් යොදාගෙන ලිට්රෝ ගස් සමාගමද ආරම්භ කිරීමට හැකිවුයේ එම නඩු තීන්දුව නිසාය.

Sri Lanka Insurance, Wijeyadasa Rajapakshe Parliament of Sri Lanka Litro Gas Lanka Lanka Hospitals PLC Sri Lanka Ports Authority

ලෝක ළමා දිනය හා වැඩිහිටි දිනය අදයි...

ලෝක ළමා දිනය සහ ලෝක වැඩිහිටි දිනය අද (01) දිනට යෙදී ඇත. මෙවර ලෝක ළමා දින සැමරුම් තේමාව “සියල්ලටම පෙර දරුවන්” යන්න වන අතර වැඩිහිටි දින සැමරුම් තේමාව වී ඇත්තේ ‘සියලු වයස් කාණ්ඩ සඳහා ඩිජිටල් තාක්‍ෂණය’ යන්නයි.

රටක ජනගහනයෙන් ළමා සහ වැඩිහිටි නියෝජනය සැලකිය යුතු ප්‍රමාණයකි. ළමුන් යනු රටක අනාගතයයි. වැඩිහිටියන් එම අනාගතය සැකසීමට මනා පිටිවහලක් වී ජීවිතයේ සැදෑ සමය ගෙවන පිරිසකි. ඒ අයුරින් බලන කළ ළමුන් සහ වැඩිහිටියන් යන කොට්ටාස දෙකම රටකට සම්පතකි. එම නිසාම ළමුන් සහ වැඩිහිටියන් සදහා ජාත්‍යන්තර දින වෙන්වී ඇත.

ළමා අයිතීන් සුරැකීම සඳහා ප්‍රමුඛතාව දීම සියලුම මානව වර්ගයාගේ අතිමහත් යුතුකම ලෙස සලකමින් ලෝකයේ සියලුම රටවල ලෝක ළමා දිනය එසේත් නොමැතිනම් විශ්ව ළමා දිනය සමරනු ලබයි. එක් එක් රටවල වර්ෂයේ විවිධ දිනයන්හිදී මෙම ලෝක ළමා දිනය සැමරීම විශේෂත්වයකි. වර්ෂ 1856 දී ජුනි දෙවැනි ඉරිදායින් ඇරඹි ලෝක ළමා දින සැමරුම ලොව පුරා රටවල් ජුනි පළවෙනි දින, නොවැම්බර් විසිවන දින ආදී ලෙස විවිධ දිනයන්හිදී යොදා ගෙන ඇති අතර ශ්‍රී ලංකාවේ ලෝක ළමා දිනය සමරනු ලබන්නේ ඔක්තෝම්බර් 01 වැනිදා ය.

ලොව පුරාම ලෝක ළමා දිනය ප්‍රථම වරට එක්ව සමරනු ලැබුවේ 1955 ඔක්තෝම්බර් මස 01 වැනිදා ය. ලෝක වැඩිහිටි දිනයද ඔක්තෝම්බර් පළමුවෙනිදාට සමරනු ලබයි.

දියුණු රට වල වයස අවුරුදු 65 ට වැඩි ජනගහනය වියපත් ජනගහනය ලෙසත් දියුණු වෙමින් පවතින අප රට වැනි රට වල අවුරුදු 60 ට වැඩි ජනගහනය වියපත් ජනගහනය ලෙසත් ගණන් ගැනේ. රටක ජනගහනය ප්‍රධාන කොටස් 03ක් යටතේ වර්ගීකරණය කෙරෙන අතර, උපතේ සිට වයස අවුරුදු 14 දක්වා ළමා ජනගහනය ලෙසත්, අවුරුදු 15 ත් 59 ත් අතර ජනගහනය ශ්‍රම බලකාය ලෙසත්, 60 ට වැඩි ජනගහනය වියපත් ජනගහනය ලෙසත් සැලකෙයි.

ළමා ජනගහනය අනාගත නිෂ්පාදකයන් නියෝජනය කරයි. වර්තමානයේ සෘජුවම ආර්ථිකයට දායක වන්නන් ශ්‍රම බලකායයි. විශ්‍රාම යන වයස් වල පසුවන්නන් වියපත් ප්‍රජාවයි. වර්තමානයෙහි ළමා ජනගහනය අඩු වීමත්, වියපත් ජනගහනය ක්‍රමිකව වැඩි වීමත් දැකිය හැකිය. මෙයට ප්‍රධානම හේතුව වන්නේ උපතේදී ආයු අපේක්ෂාව වැඩි වීමයි.

වියපත් ජනගහනය තුළද වයස් කාණ්ඩ හදුනාගත හැකි අතර 60 – 70 වයස් කාණ්ඩය වියපත් ජනගහනයේ වැඩි පිරිසක් නියෝජනය කරයි. ඔවුන්ගේ බහුතරයක් තුළ මනා සෞඛ්‍යයක් ඇති අතර හොද කාර්යක්ෂමතාවක්ද පවතී.
අන් වයස් වල වියපත් ජනගහනයට සාපේක්ෂව මොවුන් ආර්ථිකයට ඵලදායී ලෙස යොදාගත හැකි පිරිසකි. මොවුන් රටට සම්පතක් ලෙස සිතා කටයුතු කළ යුතුයි. විශ්‍රාම යාමෙන් පසු බොහෝ වැඩිහිටියන් කිරීමට දෙයක් නොමැතිව මානසික පීඩනයෙන් පසු වීම නිසා බොහෝ විට රෝගාතුර වෙයි.

ළමුන් සහ වැඩිහිටියන් පිළිබදව කොතෙකුත් කතා කළද නිසි පිළිසරණක් නොමැතිව අසරණ වුණු ළමුන් සහ වැඩිහිටියන් ලොව සෑම තැනකම වෙති.

එම නිසා අනාගතය භාර ගනිමින් පිපෙන්නට වෙර දරන පුංචි කැකුළු වලටත්, දරුවන්ගේ ලොව ගොඩනැගුමට දහඩිය හෙළා ජීවිතේ සැදෑ සමය ගෙවනා වැඩිහිටි ප්‍රජාවටත් තම යහපත් ප්‍රාර්ථනා ඉටු කරගැනීමට අදට යෙදී ඇති ජාත්‍යන්තර ළමා දිනයේ සහ ජාත්‍යන්තර වැඩිහිටි දිනයේදී උපහාරයක්ම වේවා..!

විජයදාස රාජපක්ෂ

2021 අගෝස්තු මස 13 දින දීය,

ජනපති ගෝඨාභයට - විවෘත සංදේශයක් ?

හිතවත් ගෝඨාභය,

මෙහෙම ආමන්ත්‍රණය කළේ ඔබ හිතවත් ඇතැයි කියලා හිතලා. මම නම් හිතවත්. මොකද ඔබ මගේ පමණක් නොවේ රටේ මිලියන 22 ක ජනතාවගේ ම රාජ්‍ය නායකයානේ. ඔබෙ හිත රිදුනත් කමක් නැහැ. ඔබට තේරෙනවා ඇතිනෙ මම කථා කළේ රට සහ ජනතාව ගැන හිතල කියලා. මොකද ඔබව පත්කර ගන්නත්, ආණ්ඩුව හදන්නත් මම දායක වුණා. මම පසුගිය කාලෙ කියපුවට ඔබගෙ හිත රිදිලත් ඇති. ඇත්ත කතා කිරීම මහජන නියෝජිතයන්ගෙ වගකීමනෙ. සමහර නාලිකා වුනත් කියන්නේ පැත්ත ගියත් ඇත්ත කියනව කියල යි. ඒ වුණාට ඔබගෙ ගෝල බාලයො නම් කිව්වෙ මට ඇමතිකම නැති නිසා හිත අමනාපෙන් ඉන්නවා කියලා. මේ ලෝකෙ ජීවත්වන කෙටි කාලය තුළ වගකීම් නැතිව නිදහසේ ජීවත්වන්න ඇත්නම් මොන තරම් වාසනාවන්ත ද?

මම ජීවිතය විඳවන්න මේ ලෝකෙට ආපු කෙනෙක් නෙමෙයි, විඳින්න ආපු කෙනෙක්. ඒත් රටට වෙන දේ බලාගෙන ඉන්න බැරිම තැන් වල දි මමත් දේශපාලනයට මැදිහත් වුණා. මම ඇමතිකම් භාර ගත්තා. මා භාරගත්ත වගකීම් සියල්ල ම හරියට ම ඉටු කළා.

මහින්දගේ ආංඩු කාළෙ නිර්මාණය වුන SAITEM ප්‍රශ්නය අවුරුදු තුනක් රට අකර්මණ්‍ය කළා. පෙළපාලි, උද්ගෝෂණය 410 ක් තිබුනා. මම සතියක් ඇතුළත එය සම්පූර්ණයෙන්ම විසදුව. 2017 දි මා විසින් පවත්වන ලද එක්සත් ජාතීන්ගේ වෙසක් උත්සවය තමයි ලෝකයේ පවත්වන ලද විශාලතම බෞද්ධ උත්සවය. රටවල් 74ක සහභාගිත්වයෙන්. අපි ජාත්‍යන්තර කීර්තියක් දිනා ගත්ත.

ඔබලා යුධ අපරාධ කලයි කියල බැංකි මූන් හේග් ජාත්‍යන්තර අධිකරණය ට ගෙනියන්න 2011 ක්‍රියාකළ වෙලාවෙ මම විතරයි ඔහුට අභියෝග කළේ. ඒකත් විපක්ෂ යෙ ඉදන් කළේ. ඔබලා ඉල්ලලා පත්කර ගත්ත දරුස්මාන් කොමිටිය ම තමයි ඔබලා යුධ අපරාධ කළයි කියල චෝදනා ඉදිරිපත් පත් කළේ. ඒකට මහින්ද මට ප්‍රසිද්ධියේ ස්තුති කළා. 2015 ආණ්ඩුවෙ අපි ජිනීවා ගිහිල්ල බොහොම අමාරුවෙන් තමයි ඒවා සමනය කළේ.

මම ඇමතිකම් පස් වතාවක් ප්‍රතික්ෂේප කළා. වරක් ඉල්ලා අස්වුණා. මම කාගෙන්වත් පලිගත්තෙ නැහැ. එහෙම කරනවා නම් මගේ ගෙදරට වෙඩි තියපු අයගෙනුත් පලිගන්න තිබුන. ඔබ වැලිකඩට නොගිහින් බේරුනෙ ඒ හින්දමයි. එහෙම කළා කියලා මම තවමත් හරියට බැණුම් අහනවා. මම කටයුතූ කළේ සැමට සම ව නීතියේ ආධිපත්‍යය ක්‍රියාත්මක කරන්නයි. පාලිතයා පමණක් නොව පාලකයා ද නීතියට යටත් විය යුතුය. නීතියට උඩින් කිසිවෙකු සිටිය නොහැක. නීතියට යටින් ද කිසිවෙකු සිටිය යුතු නැත.

මම වගේ ම දශලක්ෂ සංඛ්‍යාත ජනතාවක් ඔබ මේ රට වෙනස් කරයි කියලා විශ්වාස කළා. System එක Change කරයි කියලා හිතුවා. ඔබ ඇමරිකානු පුරවැසියෙක් වූ නිසා අඩු තරමේ ජනාධිපතිට Mr. ගෝඨාභය කියලා කියන තරම් වත් ඔබ ජනාධිපති තනතුර ජනතාවට ළං වුන ප්‍රජාතන්ත්‍රවාදයේ අංගයක් බවට පත් කරාවි කියලා හිතුවා. 19 සංශෝධනයෙන් අපි බොහෝ දුරට රට ප්‍රජාතන්ත්‍රවාදයේ ඉසව්වට ගෙනාවත් පාලකයො අමන වැඩ කරන්න ගත්තා. ඒක ව්‍යවස්ථාවෙ වරදක් නොවේ. පාලකයන්ගෙ තෘෘෂ්ණාව සහ බලලෝභය නිසා ඇති වූ අවුලක්.

ඇමරිකාවෙ ජනතාව Mr. ඔබාමා, Mr. බයිඩන් කියල තමයි ඔවුන්ව අමතන්නේ. ඒ රට ධනවාදී රටක් වුනත් ඒ තරමට ප්‍රජාතන්ත්‍රවාදයට පාලකයො ගරු කරනවා. ඒත් ඔබත් ආපු ගමන් ම අතිගරු වුනා. උපදේශකයන්ට අමතක වෙන්න ඇති මුලට ‘අති උතුම්’ කියලා යොදන්න. එහෙම යෙදුවා නම් ඊටත් වඩා එය ගරු ගාම්භීරයි කියල ඔවුන් හිතාවි.

තිස් අවුරුදු යුද්ධය දිනලා වසර 3-4 ක් යනකොට රාජපක්ෂලාට බහුතර ජනතාව වෛර කරන්න ගත්තා. රට කෑලි කෑලි වලට විකුණුවා. ට්‍රිලියන අටකට ජනතාව උකස් කළා. දැන් අපි සමග රට රු. ට්‍රිලියන 16 ට උකස්. කොමිස්, අල්ලස්, කුඩු ජාවාරම, ප්‍රධාන මාතෘකා වුනා. පවුල්වාදය ඊටත් උඩින් රට වැනසුවා. අවුරුදු හතරක් ගිය තැන ජනතාව පාලනය වෙනස් කළා. ජනතාව හිතුවා ඔබ ඇතුළු පවුලේ අය පාඩමක් ඉගෙන ගත්තා කියලා. ඔබ කවදාවත් කුණු ලේ පාට සාටකය පැලඳුවේ නැති එකට මිනිස්සු ගරු කළා. ඒ නිසා ඔබ අන් රාජපක්ෂලාට වඩා වෙනස් කියලා ජනතාව හිතුවා. System එක Change කරයි කියලා විශ්වාස කළා. ඒත් ඉතින් මොන වෙනසක් ද? මිනිස්සු කියන්නෙ බූවල්ලො පැටව් ගැහුවා කියලා.

රුවන්මැලි සෑයේ දී දිවුරුම් දෙනකොට මට රට ගැන මහ බයක් ඇති වුනා. රුවන්මැලි සෑය වඳින්න දහස් ගණන් දෙවි දේවතාවො වඩිනවා. එතන ගිහියන්ට කැප නැහැ. බුදු දහමට දිවුරුම පටහැණියි. ඒක රාජ නීතිය පමණයි. දළදා මාළිගාව සහ කැළණි රජ මහ විහාර පරිශ්‍රයනුත් ඒ වගේ ම පාරිශුද්ධයි. සමහරු මෙහෙමත් හිතනවා. අන්‍ය ආගමිකයෙක් ජනාධිපති වෙලා කෝවිලක හෝ පල්ලියක දිවුරුම් දුන්නා නම් සිංහල බෞද්ධ අපට මොනවා හිතේවි ද? භික්ෂූන් වහන්සේලා හැමදාම පෙරට ආවෙ රටට විපත්තියක් වෙන වෙලාවකට. ඒ රට බෙරගන්න. ඔබත් පොරොන්දු වුනානෙ හම්බන්තොට වරාය ඇතූලු විකුණපු ජනතාවගෙ සම්පත් ආපහු ගන්නවා කියල. මහින්දත් කිව්වනෙ. සමහර හාමුදුරුවො හිට්ලර් කෙනෙකු ඕනයි කියන්න ඇත්තෙ ඒ වැඩේ කර ගන්න. හිට්ලර් රට කොටස් කරල විකුණුවෙ නැහැනේ. මිනිහ යුද්ධ කළේ රටට කොටස් එකතු කර ගන්න. රටේ බලය ලෝකයටම පතුරවන්න. ඔබට ඒක තේරිලා නැහැ. ඔබ රට කොටස් වශයෙන් විකුණන එකනෙ කරන්නෙ. ඒකනේ ඔබව බලයට ගෙනාපු මුරුත්තෙට්ටුවේ ආනන්ද නාහිමි, ඇල්ලේ ගුණවංස නාහිමි වගේ හාමුදුරුවෝත් ඔබට අද නැත්තේ. හාමුදුරුවෝ ඔහොම නායකයන් තෝරන්න හැමදාම එන්නෙ නැහැ. 1956 ජන්දෙදි බණ්ඩාරනායක මහත්තයා ට වැඩියෙන් ම උදව් කළේ කැළණියෙ නායක හාමුදුරුවෝ. අවාසනාවකටදෝ උන් වහන්සේ ම ඔහු ව ඝාතනය කලා. ඊට පස්සේ හාමුදුරුවෝ රැල්ලක් හැදුවෙ ඔබට. ඒ රනිල්ගෙ වෙන්දේසිය නතර කරන්න මිසක් ඒක වේගවත් කරන්න හෙම නොවෙයි.

ඔබ ජනාධිපති වෙලා මාස තුනෙන් කොරෝනා රැල්ල ආවා. ඒක පළවෙනි රැල්ල. අනිල් ජාසිංහ, පබා පලිහවඩන, ඉඳුනිල් බණ්ඩාර, හද්‍රාණි ජයවර්ධන ඒක හොඳට පාලනය කළා. රට ම පාස් වුනා. ඔවුන් ඔක්කොම ඉවත් කළා. ඒගොල්ලා ෆේල් වුනා නම් තවමත් ඒ තනතුරු වල. ඒකට ජනතාවට කේන්ති ගියා. සර් ෆේල් කිව්වා. ෆේල් වුනා ම කරන්න ඕන ආයෙමත් පාස් වෙන්න උත්සාහ කරන එක මිසක් ෆේල් කියන කොල්ලන්ට තලන එක නෙමෙයි. අම්මා තාත්තා දාපු නම කීවට තරහ ගන්න එපා. ඒ නම් ඇහෙන කොට දෙමාපියො ඉන්න ලෝකෙක ඉඳන් සතුටු වෙනවා. ආශිර්වාද කරනවා.
ඔබ නීතියේ ආධිපත්‍යය තහවුරු කරනවා කිව්වට විස්සෙන් ඒකාධිපතියකු හදන බව හොඳට ම දැනගෙන හිටියා. ඔබ ජේ.ආර්.ටත් වඩා බලයෙන් වැඩියි. දැන් තාක්ෂණය දියුණු නිසා මිනිසෙක් ගැහැණියක් කරන්නත් පුළුවන්. ඒත් ඇහැට නොපෙනෙන දූවිලි අංශුවක් තරම් වෛරසයකට හැකි වුනා අපි විතරක් නොවෙයි ලෝකය ම දණගස්සන්න. බලයට ලොකු බලයක් නැති බව ඒකෙන්ම පේනවා නේද. ඒක තාවකාලික දෙයක්. කළොත් හොදක් නම විතරක් පවතීවි. 2021 නොවැම්බර් 16 ට පෙර අළුත් ආංඩුක්‍රම ව්‍යවස්ථාව අනිවාර්යයෙන්ම සම්මත කරන බවට ඔබ අපටත්, රටටත් පොරොන්දු වුනා. ඒ එකගතාවය නිසයි අපි මංත්‍රිවරු 20 ක් 20 සංශෝධනය ට අත ඉස්සුවේ. ඒක කරන්න බැරි බවත් දැන් ස්ථිරයිනෙ.

කෝවිඩ් 19 දෙවැනි රැල්ල එනකොට සෞඛ්‍ය අංශයේ අර හිටපු කවුරුත් ඒ තැන්වල හිටියේ නැහැ. කොවිඩ් දිනුව, අපි පරාද වුණා. වසංගතයෙන් උතුරා ගිය යුක්‍රේනයෙන් ඔබගේ ඥාතියා වෙන වීරතුංග සංචාරක බුබුළු ගෙනාවා. බැලින්නම් ඇත්තට ම ගෙනත් තිබුණෙ කොරෝනා බුබුළු. ඔබගේ මලයා, බැසිල් කිව්වෙ ඒක අත්හදා බැලීමක් කියලා. මලය කිව්වට අමනාප වෙන්න එපා. ඒක ගිරුවාපත්තුවෙ අපි ආදරේට කරන ආමන්ත්‍රණයක්. පර්යේෂණ ය සාර්ථක වුනා. රට අනතුරට වැටුණා. අඩු තරමේ 2020 ඔක්තෝබර් 15 දින රට වහන්නන කියලා වසංගත රෝග විශේෂඥයින් උපදෙස් දුන්නා. ඒත් ඔබට වැඩිය වටින්නෙ විස්සනෙ. විස්ස 22 දා සම්මත කරලා රට වැහුවෙ 26 වැනිදා. දින 11 ක් ප්‍රමාදයි. වසංගතය රට පුරා ව්‍යාප්ත වුනා.

තුන්වෙනි රැල්ලත් ආවා. සියලු ම වෛද්‍ය විශේෂඥයො ඉල්ලා සිටියා අප්‍රේල් 8 සිට 22 දක්වා රට වහන්න කියලා. ඒ උපදෙස් සහිත ඉල්ලීම ඔබ විසි කළා. මැයි පහ කොළඹ වරාය නගරය චීනෙට විකුණන්න පනත සම්මත කරගන්න තෙක් වහන්නෙ නෑ කියලා ඔබ තීරණය කළා. අපි පනතට විරුද්ධ ව උසාවි ගියා. තීන්දුව ආවෙ පහුවෙලා. පනත මැයි 20 සම්මත කළා. එදින ම රට ලොක් ඩවුන් කළා. දින 43 ක් ප්‍රමාද වුනා. වසංගතය රට ම ගිලගත්තා. එතකොට ජනතාව ඔබ ෆේල් කියපු එකේ තියෙන වරද තේරුම් ගන්න අමාරුයි.

ලෝකෙ බොහෝ රටවල් වසංගත කාලෙ හොටල්, ක්ලබ්, කඩසාප්පු වැහුවා. ඉතා ඉක්මනට පාසල් සහ විශ්ව විද්‍යාල ඇරියා. අපේ රටේ දැන් මාස 17 ක් ම පාසල්, විශ්ව විද්‍යාල වහලා. දරුවන්ට අනාගතයක් තියේවි ද? ලක්ෂ දහයකට වඩා තරුණ තරුණියො රටවල් අරිනකම් බලා ඉන්නවා. රටේ දරුණුතම බුද්ධි ගලනය ඉදිරි අවුරුදු දෙක-තුන තුළ සිදු වේවි. බොහෝ ව්‍යාපාරිකයො සිය ව්‍යාපාර වලට වෙනත් රටවල් තෝරගෙන. ඉතා ඉක්මනට ඔවුන්ගේ ප්‍රාග්ධනය අරන් ඔවුන් විදෙස්ගත වෙනවා. ඉතිරි වන්නේ අධ්‍යාපන සුදුසුකම් නැති අයයි, අසාර්ථක ව්‍යාපාරිකයොයි, ඔබයි මමයි වගේ වයසක කණ්ඩායමයි පමණයි. එතකොට මේක නිකන් ම චීන කොලණියක් වෙන එක කාටවත් වළක්වන්න බැහැ.

බලන්නකො චීනගෙ නගරංකාරකම. බංගලාදේශයට ඩොලර් 10 ට විකුණපු සයිනොෆාම් එන්නත අපිට දුන්නෙ ඩොලර් 15 ට. ඕව සහගහන අපරාධනෙ. මේක චීන කොලණියක් වෙයි කියලා මුලින් ම අනතුරු ඇඟෙව්වෙ සර් ජෝන් කොතලාවල අගමැති. ඒ 1955 දි බැන්ඩුන් සම්මේලනයේ දි. එවෙලෙ චෞඑන්ලායි, ශ්‍රී නේරු එහෙමත් හිටියා. බලන්නකො එතුමා අවුරුදු 65 කට පෙර අද දවස ගැන දැකපු හැටි. ගමේ කොල්ලන්ට මම ඕක කිව්ව ම ඔවුන් කිව්වෙ ඒක ‘පට්ට මොලයක්’ කියලා. තරුණයන්ගෙ භාෂාවනෙ. කාලය දැන් වෙනස්. කොල්ලො කෙල්ලො හරි බුද්ධිමත්. ඒ වගේ ම කටකාරයි. දැන් ලෝකය එක යායක් නෙ. ඒකනෙ වසංගතයත් එක යායට ම පැතුරුනෙ.
ප්‍රජානත්ත්‍රවාදී පාලනය යනු ජනතාව විසින් ජනතාව උදෙසා ගෙන යන ජන සම්මතවාදී පාලනයක් කියලා කිව්වෙ ඔබ ජීවත් වුන රටේ 16 වන ජනාධිපති ඒබ්‍රහම් ලින්කන්. ඒ වුණාට අපේ ගුරුවරුන්ට වසර 24 ක් තිස්සෙ තියෙන ගුරු ප්‍රශ්න විසඳලා දෙන්න කියලා ඒගොල්ලා ඉල්ලුවහම ඔබගේ ඇමතිවරු ඒ ගොල්ලන්ට කාලකණ්ණි කිව්වා. අපි තාමත් අපිට උගන්නපු ගුරුවරයෙක් මුණගැහෙනකම් ආශාවෙන් බලා ඉන්නෙ. ඒ ඔවුන්ට කාලකණ්ණි කියන්න නෙවෙයි, දණ ගහලා වඳින්න. කෘතගුණ සළකන්න. ජනතාව කියන්නෙ ඕව කියන ඇමතිවරු ඔබගේ සට්ටැඹිරාළලා කියලයි.

පාස්කු ඉරිදා ඝාතනයේ මහ මොලකරුවන්ට දඬුවම් දෙන බවට ඔබ පොරොන්දු වුනා. එහෙම නොකිව්වා නම් ඔබ පරාදයි. ජනාධිපති කොමිෂන් වාර්තාව ජනවාරි මාසෙ ආවා. ඒක අසම්පූර්ණයි. ඔබ අප ව කැඳවලා ඇහුවා ඒ ගැන ගත යුතු පියවර. මම කිව්වෙ වගකීමට සම්බන්ධ නැති පොලිස් නිලධාරී කණ්ඩායමකට සිද්ධිය මෙහෙයවපු අය ව මාස දෙකක් ඇතුළත හොයන්න බාර දෙන්න කියලා නීතිපතිගෙ සෘජු අධීක්ෂණය යටතේ. අපි හිතුවා ඔබ ඒක කරාවි කියලා. නමුත් මාස හයක් ගත වුනා. තව ම ප්‍රතිඵල නෑ. වින්දිතයන්ගේ මර අඳෝනාව තවමත් අපේ කන්වල දෝංකාර දෙනවා. ඒක ගැන කිව්වයි කියලා කට්ටිය හැදුවෙ මාව උල තියන්න. සිද්ධියට මාස 29 කට පෙර මම ඒක කිව්වෙ පාර්ලිමේන්තුවෙ දි. ඒකට බොහෝ අය කිව්වෙ මම ජාතිවාදියෙක්, අන්තවාදියෙක් කියලා. දෛවයේ සරදමක්. වාර්තාව කියනවා එවකට ආණ්ඩුව පණිවිඩකරු මරා දැම්මා කියලා. ඒ මාව. මේ අපරාධ ගැන පියවර ගත්තනං කවුරුත් මැරෙන්න නැහැනෙ.

කොළඹ දිස්ත්‍රික්කයේ ඇමතිවරු හතර දෙනෙකු ළඟ දි කොළඹ ප්‍රසිද්ධ පංසලකට ඇවිල්ලා කිව්වනෙ ‘අනේ හාමුදුරුවනේ, අපිට වැරදුණා’ කියලා. අපි දන්නෙ නැහැනෙ අපේ ආණ්ඩුව මොනවද කරන්නෙ කියලා. ඔබගේ ඇමති අයියාලත් පංසල්වලට ඇවිල්ලා කියනවා ‘අනේ හාමුදුරුවනේ, මේ මනුස්සයා මොනවද කරන්නෙ කියලා අපිටත් තේරෙන්නෙ නෑ’ කියලා.

ස.තො.ස. සීනි වලින් රු. කෝටි 1,600 ක් පාඩු කරපු නුෂාඩුත් පාස්. පොල්තෙල් වල ඇෆ්ලොටොක්සින් නෑ කියපු, අනෙක් ආහාර වල වස තියෙනවා කියලා කිව්වොත් සමාගම් කඩා වැටෙන නිසා ඒවා හංගනවා කියපු සිද්ධිකාත් පාස්. මුහුදෙ නැව් ගිණි ගත්ත ම මාලු මැරෙන්නෑ කියපු වියතුනුත් පාස්. ඒ විතරක්යැ මගෙ කෝප් වාර්තාව අනුව රු. කෝටි තිස් දාහක් රජයට අලාභ කළ බව ඔප්පු උනයි කියල ශ්‍රේෂ්ඨාධිකරණය තීරණය කරලා ලේකම් කමින් එලියට දාපු පී. බී. ජයසුන්දරත් ඔබේ ලේකම් වෙච්චි. ඒකෙ අනිත් හවුල්කාරය වුන මිලින්දත් මහ කොමසාරිස් වෙච්චි. එසේ මෙසේ රටක නොව ඉන්දියාවේ. හෙජින් ගනුදෙනුවෙන් රු. කෝටි 11,000 ක්ද, ග්‍රීක බොන්ඩ් වලින් රු. කෝටි 1,400 ක් ද, මහ බැංකු බැදුම්කර මගින් රු. කෝටි 1,100 ක් ද පාඩු කළ, ඇමරිකානු CIA ඔත්තුකරුවෙකුට රු. කෝටි 1,400 ක් මහජන මුදලින් සන්තෝසම් දුන්න කබ්රාල් ද පාස් ය. ඒ ඇති. ලැයිස්තුව දිග වැඩියි. මිනිස්සු කියන්නෙ 69 ලක්ෂය ෆේල් කියලා. ඒකත් වැරදියි. විරුද්ධ ව ඡන්දෙ දුන්න අයගෙත් ජනාධිපති ඔබමනේ. ඉතින් ඒ ගොල්ලන් එක්ක අපට සෞභාග්‍යය උදා වෙයි ද?

දැන් රට ම තියෙන්නේ ඉතා භයානක තැනක. කොළඹ සහ හම්බන්තොට අපේ වටිනම සම්පත් චීනය ට දීල ඉවරයි. කොළඹින්, ත්‍රිකුණාමලය ඇතුළු ආරක්ෂක මර්මස්ථාන වලට ඇමරිකාව, යුරෝපා හවුල, ඉංදියාව ළඟ දි ම මැදිහත් වෙනවා ස්ථීරයි. ‘දකුණ චීනයට නම් අපිට උතුර’ ක්‍රියාන්විතය බලාත්මකයි. කෝවිඩ් නිසා ටිකක් ප්‍රමාදයි. දෙවන ලෝක යුද්ධය ඉවර වෙන කොටත් කොරියාව එක රටක්. ජපන් පාලනයට යටත්වයි තිබුණෙ. යුද්ධය කාලෙ උතුරු කොටසෙ සිටියෙ රුසියානු හමුදාව, දකුණු කොටසේ සිටියෙ ඇමරිකානු හමුදාව. රුසියාවයි ඇමරිකාවයි එකඟ වුණා කොරියාව දෙකට බෙදන්න. බලවතුන් ඔවුන්ගේ බලය රැක ගන්න එහෙමයි කරන්නෙ. අප රටටත් ඒක අදාලයි. ඇමරිකාව සහ එක්සත් ජාතීන්ගේ සංවිධානය සූක්ෂ්ම ලෙස 1948 අගෝස්තු 15 දින දකුණු කොරියානු රාජ්‍යය ප්‍රකාශයට පත් කළා. උතුරු කොටසෙ සිටි කිම් ඉල් සුං 1948 සැප්තැම්බර් 9 රුසියානු යුධ බලයත් සමග උතුරු කොරියානු රාජ්‍යය බිහි කළා. ජනතාව ට වෙන්නෙ මොකක්ද කියල වත් ඔවුන් ට අවබෝධයක් තිබුණෙ නැහැ. උදේ නැගිට්ටමයි සමහරු දැනගත්තේ ස්වාමි පුරුෂයා උතුරු කොරියානු පුරවැසියෙක්, බිරිඳ දකුණු කොරියානු පුරවැසියෙක් කියලා. අවුරුදු 76 ක් ගිහිල්ලත් තාමත් එහෙමමයි. කොරියාව දෙකට බෙදන්න ඇදපු රේඛාව ට සමාන රේඛාවක් කොළඹ සිට ත්‍රිකුණාමලය දක්වා ඇදලයි තියෙන්නෙ. ඒක තියෙන්නෙ SOFA ගිවිසුමේ. ඔබගේ මැතිවරණ වේදිකාවලත් ඒක දිගහැරුන. ඒක උතුරු ශ්‍රී ලංකාවේ සහ දකුණු ශ්‍රී ලංකාවෙ බෆර් ෂෝන් එක. දකුණ චීනයට යන විට උතුර අල්ලා ගන්න ඉංදියාව, ඇමරිකාව, යුරෝපා හවුල, ජපානය ඒකරාශී වී අවසන්. ඔබගේ බුද්ධි අංශයට මේක නොතේරෙනව ඇති. 2005 ට පෙර රට විකුණන පාලකයො ගුරුවාපත්තුවෙන්වත්, දකුණෙන් වත් බිහි වුනේ නැහැ. දැං ඉතිං මන්ද?

ඔබගේ ක්‍රියා කලාපය අනුව මට කියන්න තියෙන්නෙ අපේ රටටත් කොරියාවට වුන දේ වේගෙන එනව කියලා. නීතියේ තියනවා ආප්තෝපදේශයක් 'යමෙකුගේ බිරිඳ සහ දරුවන්ගේ නිත්‍ය වාසය කොහි ද, ඔහුගේ නිත්‍ය වාසය ද එහි ම වේ' කියලා. ඒ නිසා ඔබගේ ප්‍රමුඛතාවය මෙරටට දැයි ජනතාව ප්‍රශ්න කරනවා. අපේ ගමේ ඇත්තෝ කියනව ' වත්ත බද්ධට දීල ඇස්සට දත නියවනව වගේ දෙයක් අපිට වෙලා තියෙන්නේ' කියලා. සමහරු කියනවා ආණ්ඩුවේ වැඩ හරියට 'අරියාදුවට මඩ ඉඩමෙ පොල් හිටවනවා වගෙයි' කියලා.

ඇත්ත කතා කරන අයට ආංඩු ඇතුළෙ ඉඩ නැති කම අපේ දේශපාලන සංස්කෘතිය. 2007 මම කෝප් වාර්තාව ඉදිරිපත් කළා කියල මහින්දටත් කේන්ති ගියා. ශ්‍රි ලංකා රක්ෂණ සංස්ථාව, ලංකා රෝහල, වරාය අක්කර 8.2 කෝප් නිර්දේශ අනුව ආපහු ගන්න කියලා ශ්‍රේෂ්ඨාධිකරණය කියන කොට මහින්ද නීතිපති මොහාන් පීරිස් යවලා අධිකරණය ට කිව්ව ඒව ආංඩුවට ඒව එපැයි කියලා. රක්ෂණ සංස්ථාවෙ සේවකයන් ඒකට උපහාර උත්සවයක් සංවිධානය කරලා මටත් ආරාධනා කළා. මහින්ද අයිගෙ ආංඩුව නියෝග කරළල තිබුණ මට රක්ෂණ සංස්ථා භූමිය තහනම් කියල. සරත් එන් සිල්වා අග විනිසුරු තුමාගේ නඩු තීන්දු දෙකකින් අපි නැවත අත්පත් කර ගත් දේපළ වල වටිනාකම අදට අනුව නම් රු. කෝටි දෙලක්ෂයක්වත් වටිනවා. ඒවයෙ සල්ලි වලින් තමයි Lithro Gas සමාගම හැදුවෙත්. රනිල් 2003 විකුණුම් ලං.ග.ම. බේරා ගැනීමට මහින්දවත් ඉදිරිපත් වුණේ නැහැ. මම තනියම ශ්‍රේෂ්ඨාධිකරණයේ සටන් කරල තමයි ඒකත් බේරා ගත්තෙ. දැන් ඒකෙ වටිනාකම රු. කෝටි හාර ලක්ෂයකටත් වඩා වැඩියි. රනිල්ගෙ ඉඩම් පනත දෙවතාවක්ම අධිකරණයට ගොස් අප පරාද නොකරා නම් අද අඩුම ගණනේ ගොවි පවුල් ලක්ෂ හත අටක් මහ පාරෙ අනාත වෙලා. එහෙම කලා කියල රනිල් වෛර බැන්ද. මා ඇති තරම් දූෂිතයන්ගෙ වෛරයට පාත්‍ර වෙලා තියනව. ඒකට මම පදම් වෙලා. සරත් එන් සිල්වා අගවිනිසුරුත් රටට ආදරය කරන කෙනෙක්. සමහරු අහනවා අපි රටට මොනවද කළේ, 225 ම හොරු කියලා. ඒක යි මේව මතක් කළේ. පඩුරු පාක්කුඩම් හෙම බලාගෙන නෙමෙයි.

මා ඕ සේතුං කිව්වා සිංහාසනයේ ඔබ හිඳවන අයගේ ම දෑත් වලින් තමයි ඔබ ව නැවත ඔසවා පොළොවෙ ගහන්නෙ කියලා. චීන නායකයා කියපු දෙයක් අපි කොහොමද අහක දමන්නේ. ඒ නිසා මහාචාර්ය ආරියරත්නයන් ලිව්වා ‘පූජාසනයේ ඔබ හිඳුවා ඔබට පුදන මේ ලෝකයමයි හෙට ඔබට එරෙහි වී නැගිටින්නේ’ කියලා. මේක කවුරුත් නොදන්නවා නෙමෙයි. එය නන්දා මාලනිය විසින් ගැයුවා. රාජ්‍ය මාධ්‍යයේ තහනමටත් ලක් වුනා. යදැමින් බැඳ විලංගු දා මගේ පුතා රැගෙන යන්නෙ' ‘කුමට එරට අධිකරණය, නීතිය සහ විනිසුරන්’ කියලා ගීතයෙන් ප්‍රශ්න කළා කියලාත් ඇය ව තහනමට ලක් වුනා. ඒත් නන්දාවන් තව ම ගයනවා.

ඔබ ෆේල් කියලා කියන්න තරම් මගේ හිත දරුණු නෑ. ඒ වුනාට ගෙවී ගිය සතියෙ ජන අනුපාතය අනුව වැඩිම කොරෝනා මරණ වාර්තාවේ අංක එක ලංකාව. දැන් ලංකාවෙ මරණ සංඛ්‍යාව ඊයෙට 5,464 යි. පහුගිය කාලෙ අපේ පැත්තෙ මැති-ඇමතිලා ජනතාවට එන්නත් දුන්නා. මම නම් ගියේ නැහැ. මට ඒක තේරෙන්නේ නැති නිසා. වසංගත මර්ධනයට වෛද්‍යවරුන්ගෙන් ම උපදෙස් ගත්තොත් හොඳයි. ඒවා ක්‍රියාත්මක කරන්න හමුදාව ඉතා ම දක්ෂයි.

දැන් ශ්‍රී ලංකාවෙ බුද්ධ ශාසනය සංරක්ෂණය කරන්න යනවා කියලා ආරංචියි. ඒකට වෛද්‍ය විශේෂඥයො උපදෙස් දෙන බව රට ම දන්නවා. අපේ සමහර වියත් සාදුලා කීප දෙනෙකුට මහානායක හාමුදුරුවන්ටත් වඩා උඩින් ඉන්න ඕනලු. වියත් අයට එහෙම පහළින් ඉන්න අමාරු ඇති. ඒ වුනාට මහානායක, අනුනායකකම් ආවට ගියාට ගත්ත ඒවා නම් නෙවෙයි. තුන්කල් බලලයි ඒව දෙන්නෙ. ඒකනේ අවුරුදු 2650 කට වැඩිය මේක පැවතුනේ. ත්‍රිපිටකයට ව්‍යවස්ථාපිත බලතල දුන්නොත්, බයිබලයටත්, කුරානයටත් ඉල්ලුවොත් දෙන්න වේවි. එතකොට ආගමික ගැටුම් වලින් ම රට විනාශ වේවි. මෙය තවත් ඊශ්‍රායලයක් ම වේවි.

ශ්‍රී ලංකාවේ ප්‍රධාන යැපීම් මාර්ගය ගොවිතැන සහ කෘෂි ආර්ථිකය. ඒ වුනාට ගොවියො ඔක්කොම අසරණ වෙලා. විශේෂඥයො කියනවා වකුගඩු, පිළිකා හැදෙන්නෙ රසායනික තෙල් සහ පොහොර නිසා කියලා. මසුරන් වටින කතාවක්. ලෝකයේ වස විස කන රටවල් අතරින් ලංකාව අංක එක. අපි කාබනික පොහොර වලට හුරු විය යුතුමයි. ඒත් සියයට සීයක් එහෙම කරන්න බැහැ. අපි ‘පෝර’ ප්‍රශ්නෙට පෙර ‘බීජ’ ප්‍රශ්නය තේරුම්ගත යුතුයි. අද පාරම්පරික බීජ හරි අඩුයි. ලෝක බීජ මාෆියාව හරි ප්‍රබලයි. මාස හයෙන් පැහෙන වී මාස දෙකෙන් පැහෙන්නෙ දෙමුහුන් කරලා. ජාන තාක්ෂණය හරි දියුණුයි. ඒ බීජ හදන්නෙ ම නියමිත කාල වල දි නයිට්‍රේට්, යූරියා වැනි ඒවා ලැබුනොත් විතරක් වර්ධනය වෙන්න. ගොයම් ගහ තාක්ෂණය විසින් අඩි 2 ට මිටි කරපු නිසා වල්ගස් ගොයමටත් උඩින් යනවා.

පිටරටවලින් ගේන බීජ වලට ජෙනරේෂන් සීස් කියන තාක්ෂණය යොදලා තියෙනවා. ඒ බීජ පැලවෙලා හැදෙන ගස්වැල් වල ඇට වලින් ආයෙත් ඒකෙ ඵලදාව එන පැලයක් හදන්න බැහැ. ඒ නිසා හැම කන්නෙ ම බීජ ආනයනය කරන්න රුපියල් බිලියන ගණනක් යනවා. මේවායේ දත්ත කෘෂිකාර්ම දෙපාර්තමේන්තුවේවත් ඇත්දැයි සැකයි. අපේ විද්‍යාඥයින්ට කිව්වා නම් නරක ද බීජ ගැන පර්යේෂණ කරලා කාබනික පොහොරට ගැලපෙන බීජ හදන්න කියලා. ඒක කරලා වසර දෙක තුනකට පසුව රසායනික පොහොර ක්‍රමානුකූල ව සීමා කරගත හැකියි. එහෙම නොකළොත් විශාලාවේ තුන්බිය මෙන් ඊළඟ කන්නයේ දී සාගතයක් ඇති වෙනවා ස්ථිරයි. මම අදටත් කුඹුරු වලට බැහැලා ගොවිතැන් කරන කෙනෙක් නිසයි මෙහෙම කියන්නෙ. තෙල් පෝර නැති නිසා බොහෝ ගොවීන් ලබන කන්නෙ කුඹුරු වපුරන්නෙ නැහැ. එතකොට චීනය කියාවි ඒගොල්ලො අපට හාල් දෙන්නම්, කුඹුරු ටික ඒ ගොල්ල වවන්නම් කියල. එතකොට අපි චීනගෙ කුලී කාරයො. ඔබට ඒක නවත්වන්න බැහැ. මම කැට තියල කියනව. අපිට උදව් කරන්න හිටපු රටවල් සියල්ල තරහ කර ගෙන හමාරයි. චීන බලය කඩන්න බලවත් රටවල් අපටත් ගහනව.

ඔබට තිබෙන ධුර කාලය සීමිත යි. තව මාස 38 යි. නිවැරැදි වෙන්න. ප්ලේටෝ කිව්වා පාලකයො දාර්ශනිකයො විය යුතුයි කියලා. නැත්නම් දාර්ශනිකයො පාලකයො විය යුතුයි කියලා. වසර 2350 කට පමණ පෙර ඔහුට මොනවා හිතිල ඒක කිව්ව ද කියලා අපිටත් දැන් තමයි තේරෙන්නෙ.
ඔබතුමත් ඒක අවබෝධ කරගෙන සිටි බව පැහැදිලියි. ඒක නිසා වෙන්න ඇති අපිට දාර්ශනිකයො නැතැයි සිතා වියතුන් ඉදිරියට ගෙනාවෙ. ඒ අය ගැන ජනතාව කියන දේ මම මේකෙ ලිව්වොත් ඔබ මාත් එක්ක තරහ වෙනව ස්ථිර යි. ඒක නිසා මෙහි ලියන්නෙ නැහැ. උඩ බලාගෙන කෙළ ගහගන්න එක හොඳ නැහැ කියලා ගමේ ඉන්න සයිමන්ලා, ජේමිස්ලා නිතර කියනවා.

ඇරිස්ටෝටල් කිව්වෙ ‘මිනිසා නිවැරදි විට ඔහු ලෝකයේ සිටින හොඳ ම සත්වයා ය. ඔහු නීතියෙන් සහ යුක්තියෙන් ඈත් වූ කළ ලොව සිටින දුෂ්ඨතම සත්වයාය’ කියල. ඔබ කියූ එක රටක් එක නීතියක් බොහොම හොඳයි. අද රට මෙහෙම තියෙන්නෙ ව්‍යවස්ථාදායකය හෝ විධායකය පිළිබඳ ජනතාවට තිබෙන විශ්වාසය නිසා නොව අධිකරණය පිළිබඳ ඉතිරි වී ඇති විශ්වාසය නිසාමයි. ඒක අහෝසි කළොත් රාජ්‍ය බිඳ වැටෙනවා. එදාට ත්‍රිවිධ හමුදාව සහ පොලිසියත් අසරණ වෙනවා. ඒ අයටත් ජනතාවගෙ පැත්ත ගන්න සිද්ධ වෙනවා.

මේක කියවලා තරහක් ආවොත් වතුර සෙලවන ලිඳේ පතුල නොපෙනෙනවා වගේ සියල්ල විකෘති වී පෙනේවි. නිවී සැනසිල්ලේ ඉහත කරුණු ආවර්ජනය කර බැලුවොත් යථාර්ථය තේරුම්ගත හැකියි. බුදුන්වහන්සේ දේශනා කළ පරිදි ඔබට ඔබ ම ආලෝකයක් වන්න. තනිව සිතන්න. ඇත්ත වටහා ගන්න. පුරෝහිතලාගේ උපදෙස් අනුව ගියහොත් ‘සුබ සහ යස’ රජ කතාව නැවතත් වේදිකාගත වේවි.

සොලමන් රජ දවස සිදුවූ සත්‍යය සිද්ධියක් පදනම් කර ගෙන ජර්මන් ජාතික බර්ටෝල් බ්‍රෙෂ්ට් නිර්මාණය කළ Cocasian Chalk Circle නම් නාට්‍ය හෙන්රි ජයසේන සාහිත්‍යධරයා 'හුණුවටයේ කතාව' නමින් සිංහලට පරිවර්තනය කළා. ඒ වේදිකා නාට්‍ය ආරම්භ වන්නේ මෙහෙම යි.

ඈත එක් යුගයක - ලෙයින් නැහැවුණු සමයක
කව්කාස්කි නගරයක - සාපලත් නරයයි නම් වූ
විසුවා යුව රාජයෙක්
ජෝර්ජී අභෂ්විල්ලේ, ඔහුගේ පුදුම නම විය................... සිටියාලු මේ රජු හට.
ගෘසේනියාවේ වෙන කිසිම සුරෙකුට,
නොවූ තරම් අසුන් අස්හලෙහි ද
යාචකයින් ද දොරකඩ, භටයෝ ද සේවයේ,
පෙත්සම්කරුවෝ ද ගෙමිදුල.
මේ රජුට සිටියා ,..........
ජෝර්ජී අභාෂ්විල්ලේ ...... කෙසේ නම් විස්තර කරන්න ද ඔහු.
ඔහු සැපෙන් සිටියා......
පාස්කු ඉරිදා උදයේ පවුලත් සමඟ ඔහුගේ. සපැමුණා
රජු දේව මැදුරට.
ජෝර්ජී අභාෂ්විල්ලේ පාස්කු ඉරිදා දේව මෙහෙයට විත් වසර දෙක යනවිට ඔහුද රටද දෙකම අවසන් විය.
අපිත් බලයට ආවේ ජෝර්ජි අභාෂ්විල්ලේ පාස්කු ඉරුදින දේව මැදුරට ආ පරිද්දෙන් ම ය.
ඒ නැවතත් හුනුවටයේ නාට්‍යයක් වේදිකාව මත රග දැක්වීම සඳහා ම ද ?

මෛත්‍රී සහගත චින්තනයෙන් ලිව්වේ,

විජයදාස රාජපක්ෂ ✍

73 වන 'ජාතික නිදහස් දිනය' 🇱🇰
අභිමානවත්ව සමරමු !

ඉන්දිය සාගරේ කලකදි මුතු ඇටය
බටහිර අධිරදුන් අල්ලා ගත් රටය
සිව් සියවස් හමාරක් දීනව සිටිය
හෙළ විරුවන්ගෙ රුධිරෙන් තෙත් වූ බිමය

බිම ඇද දමා පෑගුව ඉංග්‍රීසි කොඩිය
වාරියපොළ හිමිය එසවූ සිහ කොඩිය
ජව බල ලබා දුන්නේ අරහත් කොඩිය
හෙළ විරුවන් නමින් එසවිය යුතු කොඩිය

යළි අනතුරේ රට උකසට යට වුණිය
ලංසු තියෙන නොරටුන් රකුසන් වැනිය
පාව දෙන නඩය දැන් පෙරටත් වැඩිය
එනු ඉදිරියට නැතහොත් හෙට රට නැතිය

ආචාර්ය විජයදාස රාජපක්ෂ (පා.ම)
ජනාධිපති නීතිඥ

දිවයින ඉරිදා පුවත්පත | 2021.01.31 🔴
https://bit.ly/39ETzgN | Click E-Paper 🖱️
තාත්තා මගේ හිතුවක්කාරකම් දිහා ඉවැසිල්ලෙන් බලා හිටපු කෙනෙක්...

හිටපු ඇමැති ජනාධිපති නීතිඥ විජයදාස රාජපක්ෂ

විජයදාස රාජපක්‍ෂ ජනාධිපති නීතිඥයකු ලෙස දිවුරුම් දුන්නේ වයස අවුරුදු 41 දීය. ඒ චන්ද්‍රිකා බණ්ඩාරනායක කුමාරණතුංග ජනාධිපතිනිව ඉන්නා විටදීය. ඒ මොහොතේ එතුමා සමගම තවත් ජනාධිපති නීතිඥවරයෙක් ලෙස දිවුරුම් දුන්නේ මේ රටේ කීර්තිමත් කථානායකවරයකුව සිටි ස්ටැන්ලි තිලකරත්න මහතාය. විජයදාස මහතා සමඟ මේ තනතුර සඳහා තරඟ වැදී සිටි අනෙකුත් සියලූ නීතිඥයෝ අවුරුදු 58 ට වැඩි අය වූහ.

* කලාව හා නීතිය

මෙතුමා දෙස, බස, රැස පෝෂණය කරන මාධ්‍ය ක්‍ෂේත‍්‍රයේදී ඉහළ තනතුරු දැරූ කලාව හා නීතිය එකට ගළපා මිනිස්කම මතු කැර පෙන්වන කළුකෝට්කාරයෙකි. බැංකු නිලධරයකු ලෙස ජීවිතය පටන් ගත් හෙතෙම අන්තිමේ බැංකු සංවර්ධන ඇමැතිවරයා විය. නීතිඥයකු ලෙස වැඩ කළ එතුමා අධිකරණ ඇමැති වශයෙන්ද කාලයක් වැඩ කළේය. මේ පෙරළිකාර චරිතය පක්‍ෂයෙන් පක්‍ෂයට දෝලනය වෙමින් ගියේ කාගේවත් න්‍යාය පත‍්‍රවලට වැඩකිරීමට වඩා නීතියේ පරම ආධිපත්‍යය කවරදාත් හරිහැටි සුරැුකි පුරවැසියකු ලෙසිනි. මේ අපූරු මිනිසා ගොඩනැඟූ ඒ පියතුමා ගැන කියන්නට එතුමා අද ‘දිවයින’ අපේ තාත්තා මණ්ඩපයට ගොඩවදී.

‘‘මගේ පියා රාජපක්‍ෂගේ සයනේරිස්. ගිරුවාපත්තුවේ පරම්පරා සිය ගණනක් මේ පරපුරේ අතීතයට එක්කාසුවෙනවා. එහි වලස්මුල්ල හොරේවල තමයි ගම. වචනයේ පරිසමාප්ත අර්ථයෙන්ම එතුමා හොඳ ගොවියෙක්. කුඹුරු අක්කර 20 ක් විතර තිබුණා. වී කුඹුරු විතරක් නොවේ පැඟිරි, කුරුඳු, පොල් ආදියත් අපට තිබුණා. අම්මා ගම්පොඩිගේ බේබිහාමි. කිරම අම්මගෙ ගම. යෝජිත ක‍්‍රමයේ විවාහයක්. අම්මාව තාත්තගෙ ගම හොරේවලට කැන්දන් ඇවිත්. සීයාට අයත් ඉඩමක අක්ක 3-4 ක් තිබෙන අලූත් ගෙයක් හදලා එතුමිය කැන්දාගෙන ඇවිත් තියෙන්නෙ. සාමාන්‍යයෙන් දරුවෙක් ලැබෙන්න ඉන්නකොට අම්මගෙ මහගෙදර යන සිරිතක් තියෙනවනෙ. මං අපේ පවුලෙ 8 වැනි දරුවා වුණත් මාවත් ලැබෙන්න ඉන්නකොට අම්මගෙ ගම ‘කිරම’ ට ගිහින් තියෙනවා.

* කිරම කඳු පන්තිය වටේටම

අපේ කුටුම්භයේ දරුවන් 9 යි. අයියා, අක්කා, අයියා, අක්කා, ඊට පස්සෙ ඔක්කොම පිරිමි. මං 8 වැනියා. මේ ගම හරිම සුන්දරයි. රම්මලේකන්ද පාමුල කිරම කඳු පන්තිය වටේටම තියෙන තැනක ආච්චිලගේ ගේ තිබුණෙ. වරාපිටිය ගිල්ම පැත්තට කිට්ටුව. චින්තන්ගල්ලෙනත් කිට්ටුවම පිහිටියා. තාත්තගෙ ගම හොරේවෙලත් ඉතාම සුන්දර මනස්කාන්ත ගමක්. තාත්තයි අපියි හිටපු ගෙදරට උඩින් කැලේ කඳුවැටියක් තියෙනවා. ඇළ දොළ රිදී දිය දහරාමෙන් ගලා යනවා. සාමාන්‍යයෙන් හම්බන්තොට පළාතෙ කියලා හිතන්න බැරි පරිසරයක්. හරියට දෙණියාය පැත්ත වගේ. දේශගුණයත් සෞම්‍යයි.

* පොඩි උදැල්ලක් අරන්

තාත්තා උදැල්ල අරන් කුඹුරට යනකොට මාත් පොඩි උදැල්ලක් අරන් කුඹුරට යනවා. අපිට නිකම් බලා ඉන්න බෑ. අයියලත් එහෙමයි. වී මෝරන කාලෙට වපුරන කාලෙට අස්වැන්න කපන කාලෙට අපටත් ජය මඟුල්.

* පොල් අතු හෙවිල්ලපු පාසල

ගමේ කොල්ලො කුරුට්ටො එක්ක අපිත් ගහගන්නවා. ඇළේ දොළේ පීනනවා. හරක් පිටේ ලගිනවා. කොච්චර ගහගත්තත් රණ්ඩුවුණත් ඒවා එකෙන්ම විසඳගන්නවා මිසක් ගෙදර ගෙනෙන්නෙ නෑ. එහෙම වුණොත් තාත්තා ගන්නේ අපේ පැත්ත නොවේ. අනෙක් පාර්ශ්වයේ අයට හිතවත්වයි.

මාව මුලින් දැම්මෙ හොරේවල ප‍්‍රාථමික විදුහලට. (අද ඒක මහා විදුහලක්) 1 ඉඳන් 3 දක්වා මං ඒකෙ ඉගෙන ගත්තා. පොල් අතු හෙවිල්ලපු පොඩි කාමර දෙකක් ඉස්කෝලෙ. එතකොට මගේ ඉගෙනීම දැකලා ලොකු අයියා මාවත් අරන් නුගේගොඩ ගංගොඩවිල එතුමා පදිංචි නිවසට ගෙනාවා. 4 ශ්‍රේණියේ ඉඳන් 8 වැනි පන්තිය දක්වා මා ඊළඟට අකුරු කළේ ගංගොඩවිල ශ‍්‍රී රේවත විදුහලේ. නවරත්න ගමගේ මගේ පන්ති සගයෙක්. 9 වසරේ ඉඳන් උසස් පෙළ දක්වා මා ගියේ වලස්මුල්ල උතුරුකණුමුල්දෙණිය විදුහලට. මට කොළඹ එපා වෙලා. මං ආයිත් ගමට ගියා 8 පාස්වුණාට පස්සෙ. පොඩි අක්කා මැදිහත්වෙලයි මාව ඒ ඉස්කෝලෙට දැම්මෙ.

* අමාවක දවසේ ලී කපන්නෙ

තාත්තා මගේ හිතුවක්කාරකම දිහා උපේක්‍ෂාවෙන් බලා හිටියා. එතුමා ලොකු උගත්කමක් ලැබූ කෙනෙක් නොවුණාට ප‍්‍රායෝගික ඥානයෙන් හරිම පොහොසත්. මගේ ගමන පිළිබඳ එතුමා විශ්වාසයෙන් හිටියා. අම්මා තාත්තා අතර දෙන්නාට දෙන්නා හොඳ ගැඹුරු අවබෝධයකින් හිටියා. තාත්තයි අම්මයි දරුවන් උපන්නාට කේන්දර හැදුවාට ඒවා පස්සෙ එතරම් ගියේ නෑ. පාරම්පරික ගොවිඥානය නම් තාත්තාට ඉහළට තිබුණා. අද සීතලයි. තව දවසකින් දෙකකින් හොඳටම වහිනවාමයි කියලා එතුමා කීවානම් වහිනවාමයි. වී වපුරලා එන ගමන් ‘මේ පෝයට දවස් 2 ක් තියෙද්දී මහ වැස්ස එනවා.’ කිව්වොත් ඒත් එහෙමයි. ලී බඩුවක් හදන්න පරාලයක් ගන්න ගහක් කැපුවත් ඒක කරන්නෙ අමාවක දවස බලලයි. කවරදාවත් ඒ ලීවල කෘමීන්, ගුල්ලො වහන්නෙ නෑ.

* ගෙවල් අලෙවිය

තාත්තාට ගමේ ප‍්‍රභූත්වයක්, නායකත්වයක් නිතැතින්ම හිමිවුණා. ගමේ ගොවියො තමන්ගෙ කුඹුරුවල මුලින්ම වී ටික ඉස්ස ගන්න කතා කරන්නෙ තාත්තාට. ගහක් හිටෙව්වොත් ඒ ගහ ඵලදාව ලබනවා. ඉක්මනින් හැදෙනවා කියලා ගැමියන් කියනවා. සිංහල අලූත් අවුරුද්දට ගෙවල් අලෙවි කරන්න තාත්තා යනවා. අලෙවි කරනවා කියන්නේ කෑම මේසෙ මුල්කට ඉඳුල් කරලා එන්න යනවා කියන එකටයි. ගෙවල් 50-60 ක් තාත්තා මේ විදියට ‘ඉඳුල්’ කරනවා. එහෙම කරලා බුලත් කොළයක ඔතලා කීයක් හරි දීලා එනවා.

* කොප්පරා පොළට ගෙනයන දවස

වී අස්වැන්න කපා ගන්නා කාලෙට මාත් යනවා බොයිලේරුවට දාලා තම්බන්න. මේවා අපිම කරගන්නකොට අපට ලාබයි. තාත්තා ඒකට කැමැතියි. තාත්තා ගමේ දානපතියෙක් එක්කාසු කරලා මට මතකයි මං මුලින්ම ගිය පොල්අතු මඩු ඉස්කෝලෙට ස්ථිර ගොඩනැඟිල්ලක් හැදෙව්වා. වලස්මුල්ල සති පොළටත් කිරම පොළටත් කොප්පරා වේළගෙන ගෙනයන වෙලාවට මාත් යනවා. අපට අවශ්‍ය එළවළු, පළාජාති, දෙල්, කොස්, මේවාත් එක්ක දෙහි, ගොරකා, සියඹලා ආදිය තිබෙන නිසා පොළෙන් ගන්නේ මුහුදු මාළු ටිකත්, තුනපහ ටිකත් විතරයි. දෙල් අටුකොස්, කොස් අටුකොස් ගෙදර ඇඳයට, අටුවට උඩින් මැස්සෙත් නොයෙක් ජාති. වැලි කොස් ඇට. අද ළමයි වගේ නිතරම චොකලට් ආදිය කන්න ඕනෑ නෑ. ඕනෑ තරම් පෝෂ්‍යදායී කෑම ගෙදරම තිබුණා. මුව මස්, ගෝන මස් ඉඳ හිටලා ගෙනාවා. ගොඩක් සත 10 යි. විකුණන් තියෙනවා. හරස් මස් නම් කන්නෙම නෑ. අපේ තාත්තා අල්පේච්ඡතාව අගය කළා.

* හම්බ කිරීම හා හරි හම්බ කිරීම

‘දේශපාලනඥයන්, දේශපාලනයට සම්බන්ධ නිලධාරීන් තනතුර පාවිච්චි කරලා හම්බ කරලා තියෙනවා’ කියන කතාව තාත්තාට අල්ලන්නෙම නෑ. තාත්තා කියන්නෙ එහෙම කරන අය හම්බ කරනවා කියන්න එපා. හොරකම් කරලා පෝසත් වෙලා කියලා කියන්න කියලා. අපේ තාත්තා කීවෙ හම්බ කරනවා නොවේ වචනය. හරි හම්බ කරනවා කියන එකයි හරි කියලා. හරියට හම්බ කිරීම කියලා එතුමා කියන්නෙ සම්මා කම්මන්තෙන් හම්බ කිරීම ගැනයි. කවරදාවත් එතුමා වැරදි විදියට හම්බ කිරීම අගය කළේ නෑ.

* බෙලි ටික ගිහින් දීපන්

අපේ ගමේ හොරේවෙල පන්සලේ බෙලි ගහක් තියෙනවා. දවසක් හාමුදුරුවො නැති වෙලාවක පන්සලට ගිහින් මං බෙලිගෙඩි 7-8 ක් කෝටුවකින් ඇනලා කැඩුවා. මේක මල්ලක දාගෙන එනකොට තාත්තාට හසුවුණා. ඇහුවා මේවා කොහෙන්ද කියලා. මං කීවා පන්සලෙන් කියලා. හාමුදුරුවන් දුන්නද කියලා ඇහුවා. මං නෑ කියලා හාමුදුරුවන් හිටියේ නෑ කීවා. ගිහින් හාමුදුරුවන්ටම භාරදෙන්න කියලා තරමක් සැර කළා. ඒවා සාංඝික දේ ගන්න එපා කියලත් කීවා.

අපේ තාත්තා ප‍්‍රවෘත්ති අහන්න ආසයි. ගමේ ශාන්ති කර්ම, පන්සලේ නාට්‍ය, නගරයේ තොරණ මේ හැම දේටම තාත්තා ඉදිරියෙන්ම ඉන්නවා. ඒ සමිති සමාගම්වල සභාපතිකම් දරනවා. අපේ තාත්තා ඉඳහිට චිත‍්‍රපට බලන්න යනවා. එයාගෙන් ගමේ අයගෙත් සිනමා වීරයා හා වීරවරිය ගාමිණී ෆොන්සේකා හා මාලිනි ෆොන්සේකා. මං නම් චිත‍්‍රපටයක් මුල්වරට බැලූවෙ ගංගොඩවිල ඉන්නා කාලේ. 1969 දී මහරගම නැෂනල් සිනමා ශාලාවේ. මං ‘බක්මහදීගේ’ චිත‍්‍රපටය බැලූවා.

* ගම සරුවීම

අපේ තාත්තා ගරු කළේ ඞී. එස්. සේනානායක මැතිතුමාට. ඊළඟට ඩඞ්ලිට. මැතිනිය සිරිමාවෝ ගැන ලොකු පැහැදීමක් තිබුණා. අපේ ගම් සරුවුණේ මැතිනිගෙ කාලෙ. වගා සංග‍්‍රාමයෙන්. ඩඞ්ලිගේ වගා සංග‍්‍රාමය ප‍්‍රායෝගික නෑ. අසාර්ථකයි. 1970 මැතිනිය කළ වගා සංග‍්‍රාමෙදී හැම ගමකම ගොවි ජනසේවා මධ්‍යස්ථාන 300 ගණනක් අලූතින් ඇතිකළා. ඒ හැම තැනකම ලංකා බැංකු ශාඛාවක් තිබුණා. ගොවියන්ට බිත්තර වී ටික ලැබුණා. ගම්වල අලූත් කර්මාන්ත ඇතිවුණා. අපේ තාත්තලගේ ගෙදරත් රෙදි විවීම් යන්ත‍්‍ර 4-5 ක් දාලා පටන්ගත් ව්‍යාපාරයේ යන්ත‍්‍ර 10-12 ක් වගේ වුණා. වත්තේ බුරුත ගස් කපලා මේ යන්ත‍්‍ර හැදුවෙ. ඒකෙ නූල් පන්දුව සැට්ල් එක විතරයි පිටින් ගෙනාවෙ. බෝල්ට් ඇණ පවා දේශීය ඒවා. හඳුගල (ලංලෝ) කර්මාන්තශාලාවෙන් ගෙනාවෙ. මිනිස්සු චීනෙ ඉන්දියාවෙ බඩු එපා කියලා දොරලොක්, සරනේරු පවා ලංලෝ හඳුගල සමාගමෙන් ගත්තා. තාත්තා ගොවි කටයුතුවලට අමතරව මේවායේ සුපවයිසර් වගෙ වැඩකළා. ගමේ ගෙවල් 15 ක් 20 ක් මේ ව්‍යාපාරයේ තමයි ඒ කාලෙ හිටියේ.

* කොළඹින් මුදලාලිලා

කොළඹින් මුදලාලිලා මාසය අවසානයේ ගමට එනවා. සරම් 500 ක් 600 ක් එකතු කරගෙන යනවා. ගෙදර වැඩ කරන ගමන් අම්මා අක්කා මාරුවෙන් මාරුවට මේකේ වැඩ කරනවා. ගමේ පිබිදීමක් සශ‍්‍රීකත්වයක් බලා සිටියදී ඇතිවුණා. ඇන්. ඇම්. පෙරේරා කියපු දේ අහලා අඟහරුවාදා, සිකුරාදා, බත් නැති කරලා මිරිස් පොලූ නැති දේවල් නිසා මැතිනිය නැතිවුණා. 1977 ජේ. ආර්. ජයවර්ධන බලයට ආවෙ ඒ විරුද්ධ රැල්ල නිසයි.

* බුරුත මැෂින් ලිපට

මාස 3 යි ගියේ ජේ. ආර්. ආණ්ඩුව ඇවිත්. මං ගෙදර එනවිට අර බුරුත මැෂින් අම්මා දරට දාලා තිබුණා. ගොවිජන සේවා මධ්‍යස්ථාන වැහිලා. බැංකු ටිකත් වහලා තිබුණා. ලක්‍ෂ 20 ක විතර ජනතාවක් කළුසල්ලි පොලී කරන්නන්ගේ ග‍්‍රහණයට යළිත් අහුවුණා. තාත්තා මේවා ගැන කම්පාවෙන් කතා කළා.

පෝයදාට පන්සල් යන එක තාත්තගේ අම්මාගේත් ප‍්‍රධානම රාජකාරිය. දේශපාලනය ගැන මට හැඟීමක් ආවෙ ගමේ තිබෙන දේශපාලන රැස්වීම් පොඩි කාලේ ඉඳන් බලලා. තාත්තාත් මේ දෙපැත්තෙම කතා අහන්න යනවා. 1965 දී මුල්ගිරිගල ආසනයට ඉල්ලූවෙ රළුවෙ රාලහාමි. එජාපයෙන්. ශ‍්‍රීලනිපයෙන් ඉල්ලූවෙ ජෝර්ජ් රාජපක්‍ෂ. තාත්තා ඒ රැස්වීම් පවා බලලා තියෙනවා. 1970 ගණන්වල මගේ පිබිදීම පටන් ගන්නේ. 1976 දී ජෝර්ජ් රාජපක්‍ෂගේ මරණයෙන් අතුරු මැතිවරණයක් එනවා. ඒකට ශ‍්‍රීලනිපයේ ජෝර්ජ්ගේ පුතා ලක්‍ෂ්මන් රාජපක්‍ෂ ඉල්ලූවා. මේක හරිම දරුණු මැතිවරණයක්. සිරිමාවෝ, ඉලංගරත්න, කොබ්බෑකඩුවගේ ඉඳන් දැවැන්තයෝ ලක්‍ෂ්මන්ගේ උදව්වට ආවා. එජාපයෙන් ඉල්ලපු ටී. ඞී. ප‍්‍රැන්සිස්කු උදව්වට ජේ. ආර්., පේ‍්‍රමදාස, ගාමිණී අතුකෝරළ, විමලා කන්නන්ගර, සමරවීර වීරවන්නි මේ අය එකතුවෙලා හිටියා. අතුරු මැතිවරණය දිනුවෙ ඡුන්ද 4001 කින් ලක්‍ෂ්මන් රාජපක්‍ෂයි. මං ඒ කාලෙ උසස් පෙළ හදාරන තරුණයෙක්. උසස් පෙළ හදාරන්න මට කොළඹ ආනන්දයත් ලැබුණා. මං ඒ ගේට්ටුව ළඟ පැය 2 ක් කල්පනා කළා. අන්තිමේ තීරණය කළා මෙච්චර හොඳ සාමාන්‍ය පෙළ ප‍්‍රතිඵල දුන්න පාසල හොඳයි කියලා නැවත ගමටම ගමේ ඉස්කෝලෙටම ගියා. මං එජාප තරුණ සමිතියේ සභාපති. සමාජවාදී ශිෂ්‍ය පෙරමුණේ නායක වශයෙන් ඒ කාලෙ ගමේ හිටියෙ. දෙස්නි අතපත්තු කරන කතාවක් අහන් ඉඳලා. කට දිහා බලා හිටියාද? කියලා උතුරු කණමුල්දෙණිය පි‍්‍රන්සිපල් අපට කළ දඬුවමකට එරෙහිව ආසන බල මණ්ඩලයට එජාපයෙන් තරග කරලා දිනුවා 1976 දී. 1977 මහ මැතිවරණයේදී ප‍්‍රැන්සිස්කු ආසනය දිනුවා. ඔහු මට ගුරුපත්වීමක් දාන්න මුලින්ම යෝජනා කළා. මං ඒ අවස්ථාව ගමේ දුප්පත් අය සමඟ ඉගෙන ගත් දරුවෙකුට ප‍්‍රදානය කළා.

* ගුරුකම ගැන තාත්තා කැමැතියි

තාත්තා කෙනෙකුට උදව් කරනවාට විරුද්ධ නෑ. ඒ එතුමා කීවා ගුරුකම කොච්චර හොඳද? ඇයි? භාරගත්තෙ නැත්තෙ කියලා. 1971 දී ජවිපෙ හම්බන්තොට නායකයා බබාසිඤ්ඤො මරා පුළුස්සලා දමා තිබූ නිසා එතුමා මා දේශපාලනයට යනවට එච්චර කැමැත්තක් තිබුණෙ නෑ. ඊළඟට මං මහජන බැංකු හා ලංකා බැංකු තරග විභාගයට ලීවා. ඒකෙන් වැඩිම ලකුණු තිබුණේ හම්බන්තොට දිසාවෙන්ම මටයි. රොනී ද මැල් මහත්මයා හැම ආසනයක්ම ලංකා බැංකුවට හා මහජන බැංකුවට තරුණයන් 5 දෙනෙකු සුදුසුකමට ඇතුළත් කරගන්න කියන නිර්දේශය අපට වැදගත් වුණා. 1978 අපේ‍්‍රල් උසස් පෙළ ලියලා මැයි 14 පත්වීම අරන් මං කොළඹ යෝක් වීදියේ ලංකා බැංකු ප‍්‍රධාන කාර්යාලයේ නිෂ්කාෂණ දෙපාර්තමේන්තුවෙ බැංකු සහායක ලෙස වැඩට ගියා. තාත්තා එදා හරියට සතුටු වූ බව මා දන්නවා. මං අවුරුදු 5 1/2 ක් බැංකුවේ හිටියා. අපේ උතුරු කණුමුල්දෙණියෙ පි‍්‍රන්සිපල් දේශපාලන කතාවක් අහන් හිටපු වරදට මට දඬුවම් දුන් නිසා නීතිඥයෙකු වෙන්න ඕනෑ කියන කල්පනාව මට ඇවිත් තිබුණෙ.

* මගේ පඩිය රුපියල් 414 යි

ලංකා බැංකුවෙ එදා මගේ පඩිය 1978 දී රුපියල් 414 යි. තවත් දීමනා හම්බෙලා රුපියල් 1000 ක් විතර ලැබෙනවා. ඒ කාලෙ දිසාපතිවරුන්ටත් රුපියල් 600 ක් විතර ලැබුණෙ. පොලිස් ස්ථානාධිපතිවරුන්ටත් මට වඩා පඩිය අඩුයි. මේවා ගැන තාත්තා ආඩම්බර වෙලා කතා කළ අවස්ථා තියෙනවා. මං බැංකුවේ හිටපු අවුරුදු 5 1/2 තුළ විභාග පහක් පාස් කළා. නීති ප‍්‍රථම, මධ්‍යම, නීති අවසාන, එල්. එල්. බී. බැංකු ඩිප්ලෝමා මේ විභාග.

මං 1984 අපේ‍්‍රල් 6 වැනිදා අගවිනිසුරු නෙවිල් සමරකෝන් මැතිතුමා ඉදිරියේ නීතිඥයකු හැටියට දිවුරුම් දුන්නා. එදා අම්මයි තාත්තගේ පවුලෙ අයයි සියලූ දෙනා කොළඹ ආවා. ගමේ පොඩි මිනිස්සුන්ට මං ආදරෙයි. ඒක තාත්ත දන්නවා. එතුමා එදා කීවා පුතා මේ ගමන හොඳට සාර්ථක වන්නේ පොඩි මිනිසුන් වෙනුවෙන් සාධාරණය ඉෂ්ට කරන විටයි කියලා. ඒ වචන ඊයම් බරු වගේ මගේ හිතේ තැන්පත් වුණා.

* මුරුතමල්ගම

අපේ ගමේ තිබුණා අක්කර 50-60 ඉඩමක්. ඒ ඉඩම මැතිනිය විසින් එල්. ආර්. සී එකට අරන් තිබුණෙ. ප‍්‍රැන්සිස්කු මේක නැවත මුල් අයිතිකාරයාටම දෙන්න සූදානම් වුණ වෙලාවෙ මං පේ‍්‍රමදාස අගමැතිතුමා හමුවෙලා කීවා මේකෙ උදාගමක් ගහන්න කියලා, ගමේ මිනිසුන්ට සේවයක් වෙන්න. එතුමා මගේ යෝජනාව ස්ථිර කළා. ගෙවල් 100කට වැඩියෙන් හදලා ‘මුරුතමල්ගම’ කියලා උදාගමක් හදලා ගමේ මිනිසුන්ට අක්කර 1/2 බැගින් ඉඩමක් එක්ක නිවාස දුන්නෙ මගෙ ඉල්ලීමට. තාත්තා ඉතාම අඩුවෙන් කතා කළේ. ඒත් ගමේ ඇත්තොත් එක්ක ඒ ගැනත් ආඩම්බරයෙන් කතා කළ බව මා දන්නවා. මැතිනියගේ පක්‍ෂයේ නඩු ගොඩාක් කතා කළේ මමයි. 1991 දී මා හිටියෙ පාගොඩ කුලී නිවසක. ජනවාරි 25 උදේ අපේ ගමේ රණවීර අයියා මට කෝල් එකක් දුන්නා. ‘තාත්තා කියනවා’ පුතා ආවෙත් නෑ ළඟදී. බලන්න ආසයි කියලා කියනවා කියලා. මං අලූත්කඬේ උසාවියෙ වැඩ කරලා ඉවරවෙලා කෙළින්ම ගමට ගියා තාත්තාව බලන්න. එතකොට මට තිබුණේ ‘ට‍්‍රැක් සනී’ කාරයක්.

* ගිලින්න අපහසුතාවක්

මං ගිහිල්ලා බලනකොට තාත්තා කුඹුරෙ වක්කඩවල වතුර බලන්න රවුමක් ගිහින්. තාත්තාට කෑම ගිලින්න අපහසුතාවක් ඇවිල්ලත් තිබුණා. මා කීවා මාත් එක්ක යමුද? කියලා. තාත්තා ආවා. එන ගමන් හික්කඩුව ටුවරිස්ට් හෝටලයකින් ආප්ප කෑවා මතකයි. අපේ ගෙදර තාත්තා නවත්වා ගෙන හිටියත් කෑම ගන්න බැරි අමාරුව වැඩිවුණා. එකපාරටම සිහි නැතිවුණා. මං එතුමාව අරන් රත්නම් රෝහලට ගියා. ඒත් 1991 ජනවාරි 29 දා තාත්තා නැතිවුණා. වයස නිසා ස්වභාවිකවම හෘදය දුර්වල වීම තමයි හේතුව. මටත් දරුවො 3 යි. මගේ බාලපුතාට සම්පූර්ණයෙන් තිබෙන්නෙ මගේ අම්මාගේ මුහුණවර. කකුල් අතපයත් ඒ වගේමයි. බාලපුතාගේ දුවගේ මුහුණුවර මගේ තාත්තාගේ වගේ. මට එහෙම හිතෙනවා. මුණුබුරු මිණිබිරියන්ට මේ දෙන්නාම හරිම ආදරෙයි. අම්මගේ වැඬේ මේ අයට තලගුලි, මුංගුලි මේවා හදන එක. අවුරුද්දට අපේ මුළු පවුලම මහගෙදර. කැවුම්, කොකිස් අතිරස මේවා සතියක ඉඳන් අම්මා හදන්නෙ.

* පැය 7 ක් අදත් ගොවිකම කරනවා මමත්

තාත්තාගේ ගොවිකම කැත්තෙ උදැල්ලෙ වැඩ මටත් එලෙසම පිහිටියා. නිට්ටඹුව පුඹිටියාවේ අපේ ඉඩමේ ගොවිතැන් කෙරෙනවා. පොල්, පලතුරු හැම දේම තියෙනවා. සතියකට සැරයක් ගිහින් උදැල්ල ගහලා පැය 7 ක් 8 ක් වැඩ කළේ නැත්නම් අදත් මට අමාරුයි. ඒක මට දැන් පුරුදු වෙලා.

මගේ පේ‍්‍රම සම්බන්ධයක් ඇතිවුණා 1986 දී. එතුමිය පුහුණු කාලේ (නීතිඥ විභාගයට පසු) හිටියෙ. නම මාලා. මං ඒ විවාහය සම්බන්ධයෙන් ඇයට කතා කළා. එතුමිය කීවා දෙමාපියන් කැමැතිනම් මා කැමැතියි කියලා. අම්මලාගෙන් ඇහුවාට කීවෙ ඔය ළමයා මෙතෙක් ගත් තීරණ වැරදිලා නෑ. අපට ඔයා විශ්වාසයි. ඔයාට ගැළපෙනවා නම් කරන්න කියලා. 1987 මැයි 08 මගේ විවාහ මංගල්‍යය සිදුවුණා.

* මෙනු එක 115 යි

කොළඹ ටාජ් සමුද්‍රා හෝටලයේ එදා එක් පුද්ගලයකුට හොඳ මෙනු එක රුපියල් 115 යි. අපේ තාත්තලා විවාහය වගේ දේවලදී බලන්න දෙන්නා අතර අවබෝධය විතරයි. අනෙක් කාරණා වැදගත්ම නෑ. අපේ ගෙදර ලොකු අක්කයි එක් අයියා කෙනෙකුයි හැරෙන්න අනෙක් හැම දෙනාටම කපුවො කතා කරපු මඟුල් සිදුවෙලා නෑ.

තාත්තාට මා ගැන කවදත් විශ්වාසයක් තිබුණා. 1972-75 කාලෙත් ගමේ ඉඳන් මං තනිවම ගංගොඩවිල ලොකු අයියාගේ ගෙදර එනවා. ඒ එනකොට තාත්තා රුපියල් 10 ක් දෙනවා. මාතර ඉඳන් කොළඹට එදා රුපියල් 3 යි ශත 05 යි. මට භාගෙ ටිකට් එකට රුපියලයි ශත 55 යි යන්නෙ. එතැන ඉඳන් ජම්බුගස්මුල්ලට යන්න. මොනවා හරි මඟදී කන්න ඉතිරි ටික.

* සංසාරෙත් මේ අය මගේ

සංසාරයේ මගෙ මේ තාත්තා අම්මා මට හිටියා කියලා විශ්වාසයි. අනාගත සංසාරෙදිත් ඒ දෙන්නා මට හමුවෙනවා. මගෙ දරුවොත් බිරිඳත් සංසාරයේ ඉඳන් එන්නෙ. අදත් මගේ දරුවො ලොකු වුණත් මගෙ තුරුල්ලේ ඉඳන් මා බදාගන්ට කැමැතියි.

ඔහු අද සුන්දර ගේය පද රචකයෙක්ද වෙයි. ඔහුගේ නවතම ගී නිර්මාණයේ ‘‘අරුණ උදයක’’ ගීතයෙන් කියැවෙන්නේ ඒ තාත්තාගේ ගුණවරුණෙන් බිඳකි. ජනපි‍්‍රය ගායකයන් වන භාතිය සන්තුෂ් දෙදෙනා මේ ගීය ගයති. එසේම අම්මා ගැනද ඔහු එහි ගීයක් ලියා තිබේ.

* අම්මා බලාගත්තෙ මගෙ බිරිඳ

මට අම්මා හා තාත්තා දෙන්නාම නැතිවුණාට පස්සෙ තමයි ඇමැතිකම් ලැබෙන්නෙත්, දේශපාලනයේ යමක් කරන්න ලැබුණෙත්. මා ඒ අයව ලංකාවේ හැම තැනම වන්දනාවෙ එක්කගෙන ගිහින් තිබෙනවා. අම්මවනම් එංගලන්ත, මැලේසියා, සිංගප්පූරුවෙත් එක්කගෙන ගියා. දඹදිව වන්දනාවෙත් ඇරියා. මගෙ අම්මා අන්තිම කාලෙ පිළිකාවක් වැළඳිලා අමාරු වුණා. ඒ වෙලාවෙ එතුමියව බලාගත්තෙ මගෙ ආදරණීය බිරිඳ මාලා.

* මේ පින හොඳටම ඇති

එයා දුවෙකුටත් වඩා හොඳට මගේ අම්මා බලාකියා ගත්තා. අම්මා අන්තිම අවස්ථාවෙ මෙහෙ කීවා පුතේ, නුඹට නිවන් දකින්න තවත් පින් අවශ්‍ය නෑ. අපට කරපුවා පමණක් අති කියලා මගේ නෝනටත් මටත් කීවා. තාත්තාට නම් මගේ ජීවිතයේ වටිනාම අවස්ථා දැකගන්න බැරිවුණා. අම්මටත් තරමක් දුරට එහෙමයි.

එහෙත් මගේ නෝනගේ අම්මා මගේ ජයග‍්‍රහණ දැක්කා. ඒ අම්මට හෘද අමාරුවක් හැදිලා කෙනෙක් මට දැනුම් දුන්නා. මං කීවා ගම්පහ ඉස්පිරිතාලෙට ගෙනියන්න කියලා. මං හිටියෙ අයවැය ඡුන්ද ගණන් කරන අවස්ථාවේ. එළියට යන්න බෑ. (2004 දී) මං යනකොට අම්මා ඇඳ උඩ දඟලනවා. ඇයට හුස්ම ගන්න බැරිව තිබුණෙ. නාසයට ගහලා තිබෙන ශ්වසන උපකරණ තිබුණත් මෙයා දඟලන්නෙ මොකද? කියලා බලනකොට ඒ යන්ත‍්‍රය කි‍්‍රයාකරවන ස්විචය හරියට ගහලා නෑ. මං කලබල වුණා. මමයි ඒක නියමිත විදියට සවිකළේ. අපේ ඉස්පිරිතාලවල සමහර නිලධාරීන් වැඩකරන්නෙ එහෙමයි.

* මට ආඩම්බරයි

මගේ තාත්තා ගැන මං ආඩම්බර වෙනවා. එතුමා ඉතාම අව්‍යාජ පරමාදර්ශී බෞද්ධයෙක්. අඩුම තරමේ මං බුද්ධ ශාසන ඇමැති වෙනවා දකින්න හිටියා නම්........

සටහන : උපාලි සමරසිංහ