Danuma Potha / දැනුම පොත

ඔයාට වයස අවුරුදු 10 යි,
හැමෝම ගෙදර. අම්මා උයනවා,
තාත්තා ටීවී බලනවා,
ඔයාගේ අයියලා අක්කලා
එයාලගේ දේවල් කරනවා.
ඒත් හැමෝම ගෙදර.

ඔයා ඔයාගේ කාමරයේ ඇඳ උඩ දිගා වී,
ඔයා ලොකුවෙලා
ඔයාට කැමති ඕනෑම දෙයක්
කරන්නට නිදහස ලබන දිනයක් ගැන
සිහින මවන්නට ඇති.
ඔයාට ඉක්මනට ලොකු වෙන්න
අවශ්‍ය වූනේ පවුලේ සෑම කෙනෙකුම
නිවසේ සිටීමෙන් ලැබෙන සතුට
සැනසුම ඔයාට අගයක්
නොදැනුන නිසා විය හැක.

දැන් ඔබ ඔබේ විසි තිස් ගණන්වල
පසුවන අතර ඔයාට ආපසු
ඒ දවස්වලට යාමට
හැකි නම් ඔබ කැමතිය.

ඔබ සහ ඔබේ සහෝදර සහෝදරියන්
සියල්ලෝම ගෙදරින් පිටව ගොස් ඇත.
ඔබේ මාපියන් වයසට ගොස් ඇති අතර,
ඔවුන් තනිකමට හුදකලාවට
හුරු වීමට උත්සාහ කරමින් සිටී.
ඔබ ඔවුන්ගේ සුදු හිසකෙස් දැකීමට
පටන් ගන්නා අතර කාලය
කොච්චර ඉක්මනට ගෙවී ගොස්
ඇත්දැයි කල්පනා කරනු ඇත.

ඔබ සියල්ලන්ම එකට ජීවත් වන
තවත් දිනක් කිසි දිනෙක නොමැති
බව ඔබට වැටහේ.
ඔබේ සහෝදර සහෝදරියන්
දැන් සිටින්නේ එහා පැත්තේ කාමරයේ නොව, සමහරවිට ඔවුන් වෙනත් රටකය.
ඉඳහිට ඔබ ඔවුන් බැලීමට යනු ඇත,
නමුත් ඔබ එහි රැඳී නොසිටිනු ඇත.
ඔබ නැවත කිසි දිනෙක
එකට සෙල්ලම් නොකරනු ඇත,
ඔබ ආයෙ සෑම රෑකම
එකට රාත්‍රී ආහාරය නොගනු ඇත,
සහ තවත් පවුලේ චිත්‍රපට රාත්‍රීන් නොමැත.
ඔබ සෑම දිනකම එකිනෙකා දකින්නේ නැත.
මම, මගේ මහ ගෙදර යන හැඟීම
සඳහා ආශා කරමි,

නමුත් මට ආපසු යා නොහැක.
මගේ මහ ගෙදර ඉරා දමා ඇති අතර,
එහි කෑලි විවිධ ස්ථානවල විසිරී ඇත.
මහ ගෙදර දැන් කවුරුත් නැත..🥺

Copied ✍️

ඉර එළිය නොඅඩුව ලැබෙන රටේ ජනගහනයෙන් සෑම තුන්දෙනෙකුගෙන් අයෙක්ට විටමින්-D ඌණතාවය?

සූර්යාලෝකයට නිරාවරණය වන විට සමෙහි විටමින් D නිපදවෙන බව අප කුඩා කාලයේ පටන් ඉගෙනගෙන තිබෙන විද්‍යාත්මක කරුණක්. එහෙත්, වසර පුරාම හොඳින් හිරු එළිය ලැබෙන සමකාසන්න රටක් වන ශ්‍රී ලංකාවේ සිදු කර ඇති සමීක්ෂණ මගින් හෙළිවන තොරතුරු ඇතැම්විට ඔබ විමතියට පත් කරන්නට ඉඩ තිබෙනවා.

එක් සමීක්ෂණයකට අනුව ලංකාවේ නාගරික ජනගහණයෙන් සෑම තුන් දෙනෙකුගෙන්ම එක් අයෙකු (31%) විටමින් D ඌණතාවයෙන් (Vitamin D Deficiency) පෙළෙන අතර අඩකට වඩා (59%) පිරිසකගේ ශරීරයේ විටමින් D මට්ටම ප්‍රමාණවත් නැහැ (Vitamin D Insuficiency). දකුණු පලාතේ කාන්තාවන් අතර සිදුකල සමීක්ෂණයකිනුත් මෙයට සමාන ප්‍රතිඵල ලැබී ඇති අතර අඩකට වඩා වැඩි පිරිසකගේ (56%) විටමින් D මට්ටම ප්‍රමාණවත් නැති බව බව තහවුරු වී තිබෙනවා. වයස 10 -18 අතර පාසැල් සිසුන් අතරත් ආසන්න වශයෙන් අඩකගේ පමණ (46%) විටමින් D මට්ටම ප්‍රමාණවත් නැහැ.

අපව ආසාදන වලින් ආරක්ෂා කරන ප්‍රතිශක්තිය උපරිම මට්ටමෙන් පවත්වාගැනීමට උපකාරී වන, ශ්වසන රෝග වළක්වාලන, ශක්තිමත් අස්ථි සඳහා අත්‍යාවශ්‍ය, මාංශ පේශි වල මෙන්ම මොළයේ ක්‍රියකාරීත්වයට වැදගත්වන, කෙටියෙන් කිවහොත් සෞඛ්‍ය සම්පන්න ක්‍රියාශීලී ජිවිතයකට ඉතා වැදගත්වන පෝෂකයක් මෙලෙස ඌණ වීම අපට සුලු කොට තැකිය හැකි තත්වයක් වන්නෙ නැහැ. හිරු එළියෙන් නැහැවෙන එළිමහනේ සක්‍රීය ජීවිතයකට හුරු වී සිටි අපේ මුතුන්මිත්තන් ගතකල ජීවන රටාව වෙනස් වෙමින් වැඩි වැඩියෙන් නිවාස /ගොඩනැගිලි අභ්‍යන්තරයේ රැඳී සිටින්නට අප හුරු වී සිටීම මෙයට එක් හේතුවක් වන්නට ඉඩ තිබෙනවා.

සාලයා, සූඩයා, හුරුල්ලන්, බෝල්ලු වැනි තෙල් සහිත මත්ස්‍යයන්, බිත්තර කහමදය, රතු මස්, සත්ව අක්මාව (පීකුදු ) වල මෙන්ම සහ පිටතින් විටමින් එක් කරන ලද ආහාර වර්ග වල විටමින් D අඩංගු වෙන නමුත් දෛනික අවශ්‍යතාවයට සරිලන තරම් ප්‍රමාණයක් අප අතරින් බොහෝ දෙනකුට එදිනෙදා ආහාර රටාව තුලින් ලැබෙන්නේ නැහැ. එම නිසා ඉහත කී ආහාර හැකි තාක් කෑම වේලට එකතු කරගන්නා අතරේම අප මුලින් සඳහන් කල පරිදි හිරු එළිය ට නිරාවරණය වීමෙන් දිනපතා අවශ්‍ය විටමින් D ප්‍රමාණය සිරුර තුලම නිපදවා ගැනීම කල හැකි ආකාරය ගැන දැනුවත් වීම සහ ඒ අනුව ක්‍රියාත්මක වීම වැදගත්. පවත්නා ආර්ථික වශයෙන් ගැටලුකාරී වාතාවරණය තුල මෙය කාලීන වැදගත්කමකින් යුතු විකල්පයක් ද වනු ඇති බව නොඅනුමානයි.

ඒ සඳහා ඔබ, එදිනෙදා භාවිතා කරන සාමාන්‍ය ඇඳුමෙන් සැරසී, උදෑසන 10 ත් සවස 3 අතර විනාඩි 15 - 30 අතර කාලයක් හිරු එළියට නිරාවරණය වීම කළයුතු වෙනවා. ශරීරයට අවශ්‍ය සම්පූර්ණ විටමින් D ප්‍රමාණය නිපදවා ගැනීමට නම් මේ ක්‍රියාවලිය දිනපතා සිදු කළ යුතු යි.

මේ හිරු එළියට නිරාවරණයවන කාලය අතරතුර ව්‍යායාම, ගෙවතු වගාව හෝ වෙනත් ඕනෑම ඔබ කැමති කටයුත්තක යෙදෙන්නත් හැකියාව තිබෙනවා.

යම් සමේ රෝග තත්වයක් නිසා ඔබට හිරු එළියට නිරාවරණය නො වන ලෙස වෛද්‍ය උපදෙස් ලැබී ඇති නම් මේ ක්‍රමය ඔබට සුදුසු වන්නේ නෑ​​. ඔබ යම් රෝගයක් සඳහා දිගු කාලීනව ඖෂධ ලබාගන්නා කෙනෙක් නම්, හිරු එළියට නිරාවරණය වීමේ ගැටලුවක් තිබේ දැයි ඔබේ වෛද්‍යවරයාගෙන් කල් ඇතිව විමසා දැනගැනීමත් වැදගත් වනවා. යම් හෙයකින්, හිරු එළියට නිරාවරණය වීමේ දී සමෙහි අපහසුතාවයන් ඇති වේ නම් එය වහාම නවතා වෛද්‍ය උපදෙස් ලබා ගැනීමත් වැදගත්.

අභියෝග හමුවේ තවත් සවිමත් වෙමින් නිරෝගීමත් සහ ශක්තිමත් පුරවැසියන් බවට පත්වන්නට මේ නොමිලේ ලැබෙන මහඟු දායාදය අපතේ නොහැර භාවිතා කරන්නට ඔබ කටයුතු කරනු ඇතැයි අප බලාපොරොත්තු වෙනවා.

'මංකිපොක්ස්' හඳුනාගැනීමේ නිර්ණායක නිකුත් කෙරේ…

වේගයෙන් ලොව පුරා පැතිරී යන 'මංකි පොක්ස්' වසංගතයට මුහුණ දීමට සූදානම් වන ශ්‍රී ලංකාවේ සෞඛ්‍ය අංශ විසින් රෝගය නිශ්චය කිරීමේ පරීක්ෂණ ආරම්භ කිරීමට සමගාමීව සැක සහිත රෝගීන් හඳුනාගැනීමට අවශ්‍ය මාර්ගෝපදේශ නිකුත් කර තිබෙනවා.

ඔබ, 'මංකිපොක්ස්' බවට සැක කල හැකි රෝගියෙක් ද? 'මංකිපොක්ස්' රෝගියෙකුගේ ආශ්‍රිතයෙක් ද? යන්න දැනගැනීමට අවශ්‍ය මූලික දැනුම මෙන්ම ඒ ඒ අවස්ථා වලදී කල යුත්තේ කුමක් දැයි යන අවබෝධයත් ඔබ වෙත සමීප කිරීම මෙම සටහනේ අරමුණයි.

👉 'මංකිපොක්ස්' ආසාදිතයෙකු බවට සැක කල හැකි පුද්ගලයින් ( Suspected cases - Monkeypox)
වෙනත් නිශ්චිත හේතුවක් හඳුනාගත නොහැකි,

එක් වරම හටගත් සමේ කුෂ්ට තත්වයක්
සමඟ,

හිසරදය
එක්වරම හටගත් උණ
වසාගැටිති ඉදිමුම
මස් පිඩු වේදනාව
කොන්දේ වේදනාව
තදබල තෙහෙට්ටු ස්වභාවය

යන රෝග ලක්ෂණ එකක් හෝ පවතී නම් එම පුද්ගලයා 'මංකි පොක්ස්' ආසාදිතයෙකු බවට සැක කල හැකි අයෙකු ලෙස සැලකෙනවා.

කෙසේ නමුත් , මීට සමාන ලක්ෂණ හටගන්නා පැපොල, සරම්ප, හර්පීස් සොස්ටර් ( අංශ පැපොල), සමෙහි බැක්ටීරියා ආසාදන වැනි රෝග බොහොමයක් පවත්නා නිසා, ඉහත ලක්ෂණ සහිත පුද්ගලයෙක් 'මංකි පොක්ස්' ආසාදිතයෙක් බවට සැක කල යුතු දැයි යන්න වෛද්‍ය උපදෙස් මත තීර්ණය කිරීම වඩාත් සුදුසු වනවා.

👉 'මංකි පොක්ස්' ආසාදිතයෙකු විය හැකි පුද්ගලයින් ( Probable cases - Monkeypox)

පෙර කී රෝග ලක්ෂණ අනුව 'මංකි පොක්ස්' බවට සැක කෙරෙන පුද්ගලයෙක්,

තහවුරු කල 'මංකි පොක්ස්' රෝගියෙකුගේ සමඟ ඉතා සමීප ශාරීරික සබඳතා හෝ ලිංගික සබඳතා පවත්වා ඇත්නම් හෝ
රෝග ලක්ෂණ හටහැනීමට දින 21ක් ඇතුලත, නාඳුනන අයෙකු සමඟ හෝ එක් අයෙකුට වැඩි දෙනෙකු සමඟ ඉතා සමීප ශාරීරික සබඳතා පවත්වා ඇත්නම් හෝ
රුධිර පරීක්ෂණ හෝ PCR පරීක්ෂණ මඟින් මංකිපොක්ස් වෛරසය අයත් වෛරස කාණ්ඩයට අදාල ප්‍රතිඵල ලැබේ නම්

ඔහු හෝ ඇය, 'මංකි පොක්ස්' ආසාදිතයෙකු විය හැකි බවට වර්ගීකරණය කෙරෙනවා.

දැනට යමෙකු 'මංකි පොක්ස් රෝගියෙකු' බවට නිශ්චිතවම තහවුරු කල හැක්කේ සමෙහි ඇති වූ තුවාල වල කබොල්ල, සම් කොටස් හෝ තුවාලයේ ඇති සැරව ආශ්‍රයෙන් සිදු කෙරෙන PCR පරීක්ෂණයක් මඟින් පමණයි.

👉 'මංකි පොක්ස්' ආශ්‍රිතයින් (Contacts - Monkeypox )

මුල්ම රෝග ලක්ෂණය හටගැනීමේ පටන් තුවාල වියලී, කබොලු සියල්ලම හැලී යන තුරු 'මංකිපොක්ස්' රෝගියෙකු වාහකයෙක් විය හැකියි. එම වාහක කාලය තුල ඉහත විස්තරකල ' 'මංකිපොක්ස්' ආසාදිතයෙකු බවට සැක කල හැකි' හෝ ' 'මංකි පොක්ස්' ආසාදිතයෙකු විය හැකි ' කෙනෙකු,

මුහුණට මුහුණලා සමීපව ඇසුරු කලහොත් හෝ
ඉතා සමීප ශාරීරික සබඳතා පැවැත්වුවහොත් හෝ
පරිහරණය කල උපකරණ හෝ ඇඳ ඇතිරිලි යනාදිය භාවිතා කලොත්

එම පිරිස ආශ්‍රිතයින්, ලෙස සැළකෙනවා.

රෝග ලක්ෂණ කිසිවක් නැති ආශ්‍රිතයින්, සෞඛ්‍ය උපදෙස් අනුව දින 21 ගතවන තෙක් පරීක්ෂාවෙන් පසුවිය යුතු අතර රෝග ලක්ෂණ එකක් හෝ හටහතහොත් වහාම අන් අයගෙන් වෙන් වී උපදෙස් අනුව කටයුතු කල යුතු වනවා.

ඔබත් මංකිපොක්ස් ආශ්‍රිතයෙකු වුවහොත් ඔබ කලයුතු දෑ පිළිබඳ වැඩිදුර විස්තර පියවරෙන් පියවර මීලඟ ලිපියෙන් ඔබ වෙත ගෙන එන්නට අප බලාපොරොත්තු වෙනවා. එතෙක් මේ වසංගත අවදානම පිළිබඳ දැනුවත් ඔබ සියලු දෙනා, ඔබේත් ඔබේ ආදරණීයන්ගේත් සෞඛ්‍යය පිළිබඳව විමසිල්ලෙන් පසුවනු ඇතැයි අප බලාපොරොත්තු වෙනවා.

ෆ්ලෙමින් නම් දුප්පත් ස්කොට්ලන්ත ගොවියෙක් තම ගොවිපලේ වැඩ කරමින් සිටියදී, හදිස්සියේ ඇසුණු කෑ ගැසීමක් නිසාවෙන් ඒ දෙසට දිව යයි...

ඔහු දකින්නේ තම දරුවාගේම වයසේ කුඩා දරුවෙක්, අසල වූ මඩ වගුරෙහි ගිලී යමින් සිටින බිහිසුණු දර්ශනයි.
ඔහු තම දිවි දෙවනි කොට දරුවා බේරා ගැනීමට ඉදිරිපත් වෙයි...

ඉන්පසු දවසේ, විසිතුරු කරත්තයක් ස්කොට්ලන්ත ජාතිකයාගේ නිවස වෙතට ඇදී යයි, අලංකාර ඇඳුමින් සැරසුණු වංශාධිපතියෙක් ඉන් පිටතට පැමිණ, ගොවියා වෙත තමන් පිරිමි ළමයාගේ පියා ලෙස හඳුන්වා දෙයි...

“ඔබ මගේ පුතාගේ ජීවිතය බේරුවා, ඒ වෙනුවෙන් මට ඔබට මුදල් ලබා දිය යුතුයි”
වංශාධිපතියා පැවසීය...

" නැහැ..., මා කළ උපකාරය සඳහා මුදල් භාරගත නොහැකිය, එය ඕනෑම මනුෂ්‍යයෙක් ඒ මොහොතේ කරන දෙයක්...”

ස්කොට්ලන්ත ගොවියා පිළිතුරු දෙමින් පැවසීය..

ඒ මොහොතේ ගොවියාගේ පුතා නිවසේ දොර ළඟට පැමිණියේය.

“ඒ ඔබේ පුතාද..?”
වංශාධිපතියා ඇසීය...

“ඔව්...”
ගොවියා පිළිතුරු දුන්නේය.

“ ඔබ මගේ මුදල් ත්‍යාග භාර නොගන්නේ නම්, මම කැමතියි මගේ පුත්‍රයාගේ දිවි ගලවා ඔබ කල උපකාරයට, ඔබගේ පුත්‍රයාව ලන්ඩන් නගරයට රැගෙන ගොස් උසස් අධ්‍යාපනය ලබාදෙන්න...”
දුප්පත් ගොවියා එයට එකඟ විය...

කාලයාගේ ඇවෑමෙන් ගොවියාගේ පුත්‍රයා ලන්ඩනයේ ශාන්ත මරියා රෝහල් වෛද්‍ය විද්‍යාලයෙන් උපාධිය ලබා ගනී...

ඉන් නොනවතින ඔහු ලෝක ඉතිහාසයේ සුවිශිෂ්ට සොයාගැනීමක් වූ 'පෙනිසිලින්' නම් පළමු ප්‍රතිජීවකය නිපදවමින්,
"ශ්‍රීමත් ඇලෙක්සැන්ඩර් ෆ්ලෙමින්" ලෙස ලොව පුරා ප්‍රසිද්ධියට පත්වෙයි...

ඉන් වසර ගණනකට පසු වංශාධිපතියාගේ පුත්‍රයාට නියුමෝනියාව වැළඳෙයි...

ඔහු මරණයෙන් බේරාගන්නා ඖෂධය අන් කවරෙකුත් නොව 'පෙනිසිලින් ය...'

වංශාධිපතියාගේ නම රැන්ඩොල්ෆ් චර්චිල් ය.
ඔහු නොදත් බොහෝ දෙනෙක් ඔහුගේ පුතාගේ නම දනී.
ඒ මහා බ්‍රිතාන්‍යයයේ කීර්තිමත්ම අග්‍රාමාත්‍යවරයා වූ,
"ශ්‍රීමත් වින්ස්ටන් චර්චිල් ය."

ඒ අහිංසක දුප්පත් ගොවියා තම දිවි දෙවැනි කොට කල උපකාරය නොවන්නට, පසු කලෙක දෙවනි ලෝක මහා සංග්‍රාමයේදී බ්‍රිතාන්‍ය ප්‍රමුඛ හමුදා ජයග්‍රහණය කරා මෙහෙය වූ වින්ස්ටන් චර්චිල් බිහිසුණු වගුරේ ගිලී යන්නට තිබුණි....
එසේ වූවා නම් ලෝක ඉතිහාසය වෙනස්ම අයුරකින් ලියවෙන්නට ඉඩ තිබුණි....
එසේම සාමිවරයාගේ ප්‍රතිඋපකාරය නොවන්නට, ඇලෙක්සැන්ඩර් ෆ්ලෙමින් තම දුප්පත් පියාගේ පිය උරුමයෙන් ලද ගොවිතැන රැකියාව කොට ගොවියෙක් ලෙසම මිය යන්නට ඉඩ තිබුණි...
එය එසේ වූවා නම් අදටත් මරණාසන්න කෝටි ප්‍රකෝටි ගණනක් ජීවිත රැකගන්නා ප්‍රතිජීවකයක් බිහි නොවන්නට ඉඩ තිබුණි...

පළමු වර මරණයෙන් ගැලවුණු වින්ස්ටන් චර්චිල් දෙවන වර මරණය හමුවේ පරාජය වන්නටත් ඉඩ තිබුණි...

එක්තරා මිනිසෙකුගේ මනුෂ්‍යත්වය, ලෝකයක ඉරණම වෙනස් කරන්නට හේතු විය.
එනිසාවෙන් මනුෂ්‍යත්වය දිගු කල හැකි සෑම මොහොතකම නොපැකිලව ඉදිරිපත් වන්න...

එහි ප්‍රතිඵලය කවදා හෝ පෙරළා ඔබට ලැබෙනු නිසැකය...

අප, අප වෙනුවෙන් කල දේවල් අපත් සමඟ මියයයි....
අප, අන් අය වෙනුවෙන් කල දේවල්, අප මියගියද සදාකාලිකව පවතී...

_______________________________
ඉතා අගනා කතාවක් නිසා
උපුටාගතිමි.
මේ කතෘ සදහන් නොවිනි .ගෞරවය කතෘට හිමිවිය යුතුය

අප දැන් සිටින්නේ පුරන් වූ කුඹුරු සහ වගා භූමි යළි අස්වැද්දීම සඳහා ශ්‍රී ලාංකීය ජනතාව තුළ ඉතා දැඩි උනන්දුවක් පවතින අවස්ථාවකයි. මීට අමතරව පහුගිය සති කිහිපය පුරාවටම ලැබුණු අධික වර්ෂාව සහ විටින් විට ඇති වුන ජල ගැලීම් ද හේතුකොටගෙන ජල මූලාශ්‍රවලට සහ ජලය එකතු වූ ස්ථානවලට මිනිසුන් නිරාවරණය වීමේ අවදානම සැලකිය යුතු ලෙස ඉහළ ගොස් ඇත. මෙලෙස ජලය එක්රැස් වන ස්ථාන මීයන්ගේ මුත්‍රා මගින් අපවිත්‍ර වී ඒ හරහා සම්ප්‍රේෂණය වන ලෙප්ටොස්පයිරෝසිස් (මී උණ) නැමැති ආසාදන තත්ත්වය ඇති කරන බැක්ටීරියාව ඉතා ඉක්මනින් පැතිර යෑමට ආරම්භ වී ඇත. මේ අවස්ථාව වනවිට රෝහල්වලට වාර්තාවන මී උණ සහිත රෝගීන් සංඛ්‍යාව සැලකිය යුතු ලෙස ඉහළ ගොස් ඇති බවද වාර්තා වනවා.

මෙවැනි පසුබිමක් යටතේ, මේ රෝගය සම්ප්‍රේෂණය විය හැකි ආකාරය සහ ඉන් වැළකී සිටීමට අප කළ යුත්තේ කුමක්ද පිළිබඳව විමසා බැලීම ඉතාමත් කාලෝචිත වනු ඇත.

මී උණ හෙවත් ලෙප්ටෝස්පයිරෝසිස් ‘leptospirosis' රෝගය මීයන්,ගවයන් සහ මී ගවයන් වැනි සතුන්ගෙන් මිනිසාට බෝවිය හැකි රෝගී තත්ත්වයකි. මෙම රෝගයම ‘ වෙල් උණ , පතල් උණ‘ යනුවෙන්ද හඳුන්වනු ලැබේ. මීයන් හෝ වෙනත් සතකුගේ ශරීරයේ ඇති මෙම බැක්ටීරියාව ඔවුන්ගේ මුත්‍ර මගින් ජලයට එකතු වේ. ඒ අනුව කුඹුරු, දියකඩිති, ඇළ මාර්ග ,කානු, පතල්වල ජලයට මෙම බැක්ටීරියාව එකතු වී රැඳී තිබිය හැකියි.

ඉහතින් සඳහන් කළ ජලය රැඳෙන ස්ථානවලට එකතු වන මෙම බැක්ටීරියාව ශරීරයේ කැපීම්, සීරීම්, තුවාල හෝ ශ්ලේෂ්මල පටල ( ඇස්, මුඛය, ලිංගාශ්‍රිත ප්‍රදේශ) හරහා ද මිනිසාගේ සිරුරට ඇතුළු විය හැකියි. මෙම ආසාදන තත්වය අක්මාව / වකුගඩු වැනි අභ්‍යන්තර අවයව වලට හානි සිදුකල හැකි අතර මෙනින්ජයිටීස් තත්වයන් වලට ද හේතු විය හැකියි.

රෝග ලක්ෂණ

සාමාන්‍යයෙන් බැක්ටීරියාව ශරීර ගතවී දින 02ත් 14ත් අතර කාලයකදී පහත සඳහන් රෝග ලක්ෂණ මතුවිය හැකියි.

♦ උණ
♦ මස් පිඩු වේදනාව
♦ ඇස් රතු වීම
♦ හිසරදය
♦ මුත්‍රා කහ පැහැ වීම
♦ මුත්‍රා යාම අඩු වීම
♦ වමනය
♦ සිරුරේ අප්‍රාණිකත්වය

මී උණ රෝගය වැළඳුණ පුද්ගලයකුගෙන් තවත් පුද්ගලයකුට රෝගය බෝ නොවේ.

මී උණ මාරාන්තිකද?

නිසි කලට නොපමාව ප්‍රතිකාර නොගතහොත් රෝගය උත්සන්න වී මරණය පවා සිදු විය හැකියි. මෙම රෝග කාරකයට සිරුරේ ඇති සියලුම ඉන්ද්‍රිය පද්ධතිවලට හානි කිරීමට හැකියි. විශේෂයෙන් වකුගඩු, අක්මාව, පෙනහළු සහ හෘදය අකර්මණ්‍ය කරයි.

මී උණෙන් වැලකී සිටීමට නම්..

♦ කුඹුරු, වගුරු බිම්, ඇළවල්, කාණු සහ පතල් ආශ්‍රිත රැකියාවල නියැළෙන පුද්ගලයන්ට මෙන්ම ගං වතුර වැනි තත්ත්වයන්ට මුහුණ දෙන අයටත් රෝගය වැළඳීමේ අවදානම ඉතා ඉහළයි. එවැනි අවදානම් කණ්ඩායම් රෝගයෙන් වැලකීම පිළිබඳව දැන්වත් වී සිටිය යුතු වේ.

♦ මී උණ යැයි සැක කළ හැකි රෝග ලක්ෂණ ඇත්නම් වහාම වෛද්‍ය උපදෙස් ලබා ගත යුතුයි.

♦ තුවාල ,සීරීම් ඇත්නම් අපවිත්‍ර ජලයට බැසීමෙන් වලකින්න. නොඑසේනම් එම තුවාල මනාව ආවරණය කර ගැනීමට උනන්දු වන්න.

♦ කුඹුරු ආශ්‍රිතව වැඩ කිරීමට ප්‍රථම රෝගය වැලැක්වීමට ලබා දෙන ප්‍රතිජීවක ඖෂධ ප්‍රදේශයේ සෞඛ්‍ය වෛද්‍ය නිලදාරී කාර්යාලයෙන් ලබා ගන්න.

♦ මී උණ වළකන ප්‍රතිජීවක ඖෂධ නිසි කලට සේම නිසි මාත්‍රාව ලබා ගැනීම කෙරෙහි සැලකිලිමත් වන්න.

♦ ගං වතුර වැනි ආපදා තත්ත්ව පවතින කාල වකවානුවලදී ද රෝග ලක්ෂණ ඇත්නම් නොපමාව වෛද්‍ය ප්‍රතිකාර ලබා ගැනීමට අමතක නොකරන්න.

♦ විශේෂයෙන් කුඹුරු අවට ඇති කුඩා දිය කඩිතිවල මසුන් ඇල්ලීමේදී හෝ දිය නෑමෙන් / ඇඟ සේදීමෙන් පසු වුවද රෝග ලක්ෂණ මතු වේනම් වහාම නිසි වෛද්‍ය ප්‍රතිකාර වෙත යොමු වීම වැදගත් .

මේ සෞඛ්‍ය අවදානම ගැන දැනුවත් වූ ඔබ, ඔබගේ හිතවතුන් අතරත් මේ දැනුම බෙදා හදාගෙන, හැකි උපරිමයෙන් මී උණ තත්වය වළක්වා ගැනීමට උත්සුක වනු ඇතැයි අප බලාපොරොත්තු වෙනවා. විශේෂයෙන් ම මේ අර්බුදකාරී වාතාවරණය අතරතුර මෙවන් සෞඛ්‍ය ගැටලු හැකිතාක් වළක්වා ගැනීමේ වැදගත්කම මෙන්ම සංකූලතාවයන් ඇති නොවන පරිදි ප්‍රතිකාර වලට කඩිනමින් යොමු වීමේ අවශ්‍යතාවයත් අප නැවතත් අවධාරණය කරනවා.

VISA ගන්න තක්සේරු වාර්ථාවක් ඉල්ලුවද?

ඔබ නොසිතන වත්කමක් 💎 ඔබ ළඟ තිබෙන බව ඔබ නොදන්නවා ඇති.

පිලිගත් විදේශ රැකියාවකට හරි, උසස් අධ්‍යාපන හරි , ශිෂ්‍යත්වයකට හරි, ස්ථිර පදිංචියට (PR) හරි ඔබ විදේශ ගතවීම දැන් ඉතා සීඝ්‍රයෙන් ඉහල ගිහින්. ඉතින් VISA ලබාගැනීමේදී ඔබට ඔබේ වත්කම් තක්සේරු කරගැනීම අත්‍යාවශ්‍යම කාරනයක්. ඒ ඒ රට අනුව එම තක්සේරු වටිනාකම් වෙනස් වෙනවා. ඉඩම් හෝ දේපල ඔබේ නමට නැතිනම් ඒක ලොකු ගැටලුවක්.

ඉතින් ඔබ නොසිතන වත්කමක් ඔබ ලගම තියනවා. ඒ මොකක්ද ඒ. 💰 💰 රත්තරන් 🎖️🎖️️️රත්තරන් මිල පසුගිය මාස 4 ක කාලයක්තුල වටිනාකම 70% කින් පමන ඉහල ගිහින් තියනවා. ඉතින් ඔබට ලෙහෙසියෙන්ම ලක්ෂ 20 වගේ වටිනාකමක් සහිත වත්කමක් පෙන්නන්න අවශ්‍ය වෙන්නේ රත්තරන් පවුම් 10-12 අතර ප්‍රමානයක්. මේක ඔබේ මවගේ හෝ සහෝදර සහොදරියන්ගේ රත්තරන් භාණ්ඩ එකතුකර ගැනීමෙන් පහසුවෙන් සිදුකල හැක.

💎ඉතින් කොහෙන්ද තක්සේරුවක් කරන්නේ?
රත්තරන් වල තක්සේරුවක් කරනන්න පුලුවන් පිළිගත් එකම රාජ්‍ය ආයතනය තමයි ජාතික මැණික් සහ ස්වර්ණාභරණ අධිකාරිය. එහි පිහිටා ඇති වටිනා ලෝහ විශ්ලේෂණය කිරීමේ කාර්‍යංශය මගින් ඔබට එම කාර්‍ය පහසුවෙන් කරගත හැක. එම කාර්‍යංශය අධිකරණ, රක්ෂණ , මහබැංකු - බැංකු , රේගු හා රාජසන්තක කිරීම් යන අංශ යටතේ රත්තරන් හා අනිකුත් වටිනා ලෝහ සදහා පිලිගත් තක්සේරු වාර්තා නිකුත් කරන එකම රාජ්‍ය ආයතනයයි.

තක්සේරු වාර්තා අනිවාර්යයෙන්ම VISA කාර්යාල පිලිගත් ආයතයකින් නිකුත් කල යුතුයි. ඔබ ස්වර්ණාභරණ අලෙවිසැලකින් හෝ වෙනත් මාර්ගයකින් තක්සේරු වාර්තා ඉදිරිපත්කිරීම ඔබේ VISA ප්‍රතික්ෂේපවීමට මුලීක කරුණක් විය හැක.

ජාතික මැණික් හා ස්වර්ණාභරණ අධිකාරියෙහි වටිනා වටිනා ලෝහ විශ්ලේෂණය කිරීමේ කාර්යාංශය, අන්තර්ජාතික වටිනා ලෝහ විශ්ලේෂණය කිරීමේ කාර්යාංශයේ පූර්ණ සාමාජිකත්වය ලබා ඇති අතර ආභරණ මුද්‍රා තැබීම පිළිබද ජ්‍යාත්යන්තර වියානා සම්මුතියෙහි නිරීක්ෂණ සාමාජිකයෙක් ලෙස ක්‍රියා කරයි. මේ හේතුවෙන් එම වාර්තා සදහා ජ්‍යාත්යන්තර ලෙස පිලිගැනීමක් ඇත. අනික් කාරණය
තක්සේරු කිරීම සදහා නියුක්ත කාර්‍ය මංඩලයද ජාත්‍යන්තර සුදුසුකම් සහිත පිරිසකි. (LONDON ASSAY OFFICE AND AMERICAN SOCITY OF APPRAISAL )

ඉතින් කොහොමද තක්සේරුවක් කරගන්නේ?

ජාතික මැණික් සහ ස්වර්ණාභරණ අධිකාරියේ ප්‍රධාන කාර්‍යාලය හරහා පමනයි තක්සේරු වාර්තා නිකුත් කරන්නේ. මේ දිනවල තක්සේරු වාර්තා ලබාගැනීම සදහා සීඝු වර්ධනයක් පෙන්නුම් කිරීම හේතුවෙන් කලින් වේලාවක් වෙන්කරගැනීම අනිවාර්යයි. මේ සදහා ඔබ 0112390652 ඔස්සේ සතියේ දිනවල 8.30-4.15 දක්වා අමතා දිනයක් හා වේලාවක් වෙන් කරගන්න. සාමාන්‍යයෙන් තක්සේරු වා‍ර්ථාවක් නිකුත් කිරීම සදහා අදාල අයිතම ප්‍රමානය මත පැය 3-4 කාලයක් ගතවනු ඇත. ඔබට ස්වර්ණාභරණ භාරදී රිසිට්පත ලබාගෙන ඔබට අවශ්‍ය වෙනත් කටයුතු කරගැනීමට පිටත්ව යා හැකි අතර එසේ අවශ්‍ය නැතිනම් එම ස්ථානයේ රැදීසිටීමට පහසුමක් සලසා ඇත. වාහන නතර කිරීමේ පහසුකම් සහිතයි.

රැගෙන ඒමට අවශ්‍ය දේ මොනවාද?
1. විදේශ ගමන් බලපත්‍රය
2. ජාතික හැදුනුම්පත
3. ස්වර්ණාභරණ (රත්තරන් , රිදී හා ප්ලැටිනම් පමනි)
4. VISA අයදුම් කරන රට පිලිබද ලියවිල්ලක් (OFFERING LETTER - ජායාරූපයක් ප්‍රමාණවත්)

කොතනින්ද කරගන්නේ?

ජාතික මැණික් සහ ස්වර්ණාභරණ අධිකාරිය,
වටිනාලෝහ විශ්ලේෂණය කිරීමේ කාර්‍යංශය (ASSAY OFFICE), අංක 12, මැක්සන් ටවර්, ඇල්ෆ‍්‍රඞ් හවුස් උද්‍යාන පාර, කොළඹ 03. (දුරකථන අංක 0112390652)

ගාස්තු
අනුමත ගාස්තුලෙස තක්සේරු වටිනාකමින් 2% ලෙස අයකරයි. එය ඔබට DEBIT/ CREDIT CARD මගින් හෝ CASH මගින් ගෙවීමට පහසුමක් සලසා ඇත.

ඔබට සුහදශීලී, කඩිනම් හා විශ්වාසවන්ත සේවාවක් සපයා දීමට අපි බැදී සිටින්නෙමු.

ස්තුති

ඉන්දික බණ්ඩාර
සහකාර අධ්‍යක්ෂ ( වටිනාලෝහ විශ්ලේෂණය කිරීම)
ජාතික මැණික් සහ ස්වර්ණාභරණ අධිකාරිය

විදුලි බිල ගන්න..!!
(උස් හඬින්..)
මෙන්න කරන්ට් බිල ගන්න..!!!!

"ආ මල්ලි.. ඕක මීටර් පෙට්ටිය උඩින් තියල යන්න.. අපි ගන්නම්"..
ගේ ඉහළ මාලයේ ඉඳන්ම බිරිඳ පිළිතුරු දෙනු ඇසී මම නිවස ඉදිරිපසට ආයෙමි..

"ආ සර්.. මෙන්න කරන්ට් බිල.. පහුගිය මාසවල ලයිට් බිල් ටිකත් තාම මෙතන.. !!

"ඔව් මල්ලි.. කොච්චර පාවිච්චි කළත් රුපියල් 30 නේ එන්නේ.. ඒ නිසා බිල ගැන එච්චර උනන්දුවක් නෑ.."

"ඒක ඇත්ත.. සර්ගෙ "සෝලා" පැනල ටික හොඳටම වැඩ කරනවා.. ඒත් අපේ ඉංජිනේරු මහත්තුරු කියන විදියට, මේ වැඩෙන් අපිට හෙන පාඩුවක් වෙන්නේ.. අඩුම ගානේ මේ මීටරය කියවන්න යන වියදමවත් කවර් වෙන්නේ නෑ..!!"

ඇත්තටම මල්ලි ඔයාලා ඔය කරන වැඩේ Remotely කරන්න බැරිද.. ?

"මොකද බැරි සර්.. Smart Meter එක සවිකරන එක විතරයි තියෙන්නේ.. අපි මේ Meter Readers ලා කියලා කරන්නේ මහ බොරු රස්සාවක්.. මෙච්චර තාක්ෂණය දියුණු කාලේ, ගෙවල් ගානේ ඇවිදින්නේ නැතිව, මේක Remotely කරගන්න බැරි වෙන්න හේතුවක් නෑ.. එකම දේ අපේ මිනිස්සුන්ට ඕනෑකමක් නැතිකම...!!"

ඒත්, එතකොට ඔයාලාගේ රස්සා වලට මොකද වෙන්නේ ?

"ඔහොම තමයි අපේ හුඟක් දෙනෙක් හිතන්නේ .. ඒත් මම දකින්නේ වෙනස් විදියට.. අපිට මේ බලශක්ති ක්ෂේත්‍රයේ ඕනෑ තරම් කරන්න දේවල් තියෙනවා.. මේ Meter Reading කියන බොහොම පොඩි දේට කොටු වෙලා ඉන්නේ නැතිව.. අපි ලංකාවේ Meter Readers ලා 5000 ක් විතර ඉන්නවා.. මම කියන්නේ අපි ඔක්කොම බලශක්ති කළමනාකරුවන් විදියට පාරිභෝගිකයන් ඉස්සරහට එන්න ඕන.. ඒ කීවේ "Energy Managers" ලා විදියට..

මට තේරුණේ නෑ..?

"මේකයි සර්.. බලශක්තිය කියන්නේ අපේ රටේ සංවර්ධනයට තදින්ම බලපාන සාධකයක්.. විදේශ විනිමය අතින් ගත්තත්, භාණ්ඩ නිෂ්පාදන පිරිවැය අතින් ගත්තත්.. ජීවන වියදම අතින් ගත්තත්.. හැම දේටම මේක බලපානවා.. "
"ඉතිං මේ බලශක්තිය හරියාකාරව කළමනාකරණය කරලා පාවිච්චි කරන්න අපිට මිනිස්සුන්ට, ආයතන වලට උදව් වෙන්න පුළුවන්.. විදුලිය නාස්ති වෙන තැන්, කාර්යක්ෂම තාක්ෂණ විධි හඳුන්වා දෙන්න පුළුවන්.. විශේෂයෙන්ම කර්මාන්ත ශාලා, කාර්යාල, රාජ්‍ය ආයතන වගේ තැන්වලට.. මේකට කියන්නේ Energy Audit කියලා.."

ඉතිං ඒකෙන් අන්තිමේ පාඩු වෙන්නේ ඔයාලාටමනේ ?? විදුලි බිල අඩු වුණාම.. ??

"අන්න ඔතන තමයි සර් වැරැද්ද.. අපේ ලොකු පුටුවල ඉන්න මහත්තුරුන්ගේ ආකල්පයත් ඕකමයි.. එයාල හිතන්නේ මේක Business එකක් විදියට.. වැඩිපුර විකිණුවොත් වැඩිපුර ලාභ.. !! ඒත් මේකෙ අවසාන ලාභය යන්නේ අපේ රටට ගල් අඟුරු, බොරතෙල් පටවන පිටරට කොම්පැණිකාරයින්ගෙන් සාක්කුවට කියන දේ දකින්න තරම් රට ගැන කැක්කුමක් ඒ අයට නෑ..!!"

"අපේ විදුලි උත්පාදනයෙන් සීයට විස්සක් Transmission Loss එක.. ඒක අමතක කරමු.. තව සීයට තිහක් විතර පාරිභෝගික මට්ටමේ නාස්තිය.. අපි මහන්සි වෙලා ඒකෙන් සීයට දහයක් කපා හරින්න පුළුවන් නම්, රුපියල් කෝටි කීයක ඉතිරියක් ද රටට ?.. එයිට අමතරව, සූර්ය බලශක්තිය, බැටරි තාක්ෂණය, කාල සීමා අනුව විදුලි භාවිතය වගේ දේවල් ගැන දැනුවත් කරන්න පුළුවන්.. අන්න එතකොටයි අපේ රස්සාව රටට වැඩදායක එකක් වෙන්නේ.."

ඉතිං ඕක ඔයාලට දැනුත් කරන්න පුළුවන්නේ... විදුලි බිල දෙන ගමන් විදුලිය පිරිමහන හැටි කියලා දෙන්න..

" නෑ සර්.. ඒක කවදාවත් එහෙම වෙන්නේ නෑ.. අපේ කට්ටිය එන්නේ එදා දවසට කවර් කරන්න තියෙන මීටර් ටික read කරලා යන්න.. අඩුම ගානේ, ඉස්කෝලෙකටවත් ගිහින් ඒකෙ ළමයින්ට කියලා දෙන්න උනන්දුවක් නෑ, කොහොමද විදුලිය අරපිරිමැස්මෙන් පාවිච්චි කරන්නේ කියන එක.."

මුලින්ම වෙන්න ඕන ආකල්ප සංවර්ධනය..

- copied-

මීට ප්‍රථමයෙන් අප ඔබ දැනුවත් කළ පරිදි පසුගිය නොවැම්බර් මස 26 වෙනි දින ලෝක සෞඛ්‍ය සංවිධානය විසින්, "දැඩි අවධානය යොමු කළ යුතු කොවිඩ් වෛරස ප්‍රභේද" අඩංගු කාණ්ඩයට ඔමික්‍රොන් නම් විකෘති ප්‍රභේදය ඇතුළත් කරනු ලැබුවා. එම නිවේදනයත් සමඟ, ඒ වන විට මෙම ප්‍රභේදය බහුලව පැතිරෙමින් තිබූ දකුණු අප්‍රිකාව, බොට්ස්වානා, ලෙසතෝ, නැමීබියාව, සිම්බාබ්වේ සහ ස්වාසිලන්තය යන රටවලින් පුද්ගලයින් ශ්‍රී ලංකාව තුළට ඇතුලු වීම වහාම ක්‍රියාත්මක වන පරිදී අත්හිටුවනු ලැබුවා. එයට සමගාමීව, පසුගිය මාසය පුරාවට එම අවදානම් රටවලින් පැමිණි පුද්ගලයින් අමතර PCR/ RAT පරීක්ෂණ වලට භාජනය කිරීමටත් ඔවුන්ගේ සෞඛ්‍ය තත්ත්වය පිළිබඳ විමසා බැලීමටත් කටයුතු කෙරුණා. එමෙන්ම විදේශයන් හි සිට පැමිණ, කෝවිඩ් -19 රෝගීන් ලෙස PCR පරීක්ෂා මගින් හඳුනාගෙන ඒ වනවිටත් වෛද්‍ය ප්‍රතිකාර සඳහා යොමුකර සිටි පිරිසගේ සාම්පල ජානමය පරීක්ෂා ( ප්‍රභේදය හඳුනාගැනීමට) වලට විද්‍යාගාර වෙත යොමු කෙරුණ අතර ඒ අතරින් එක් සාම්පලයක ඔමික්‍රෝන් විකෘති ප්‍රබේධය අඩංගු බව දැන් තහවුරු වී තිබෙනවා. අදාළ පුද්ගලයාගේ ආශිතයින් හඳුනාගැනීම හා නිරෝධායනයට යොමු කිරීම ඒ හා සමගාමීව සිදුවී තිබෙනවා.

කොවිඩ් -19 වෛරසයේ ඔමික්‍රොන් ප්‍රභේදය පිළිබඳව දැනට අප දන්නා කරුණු බොහොමයක යම්කිසි අවිනිශ්චිතභාවයක් තිබෙනවා. එය ලොව පුරා දැනට පැතිරී පවතින ඩෙල්ටා ප්‍රභේදයට ද වඩා වේගයෙන් පැතිර යාමේ හැකියාවක් ඇති බවට දැනට සොයාගෙන ඇති ඇතැම් කරුණු වලින් සැක ඇති කෙරෙනවා. මෙය සත්‍ය වශයෙන්ම කෙතරම් දුරකට වැඩිවීමක් ද යන්න පිළිබඳව බොහෝ විට ඉදිරි සතිය තුළදී තොරතුරු ඉදිරිපත් වේවි.
ඔමික්‍රෝන් ප්‍රභේදය ආසාදනය වූ පුද්ගලයන් සුළු අසනීප තත්ත්වයේ සිට බරපතළ තත්ත්වයන් වලටද ලක්විය හැකි බවට දැනට සිදුකරන ලද නිරීක්ෂණ වලින් දැක්වෙනවා. එහෙත් ඩෙල්ටා ප්‍රභේදයට සාපේක්ෂව මෙයින් ඇති කරන රෝග තත්ත්ව වල තීව්‍රතාව (virulence) පිළිබඳව දැනට අනාවරණය වී ඇති සාක්ෂි වලින් නිශ්චිතව කරුණු දැක්වීමට අපහසුයි.

යුහුසුලුව සිදුවෙමින් පවතින පර්යේෂණ කටයුතුවල ප්‍රතිඵලයක් ලෙසින් ඔමික්‍රෝන් සම්බන්ධ වැඩිදුර තොරතුරු ඉදිරි සතිය හෝ දෙක තුළ බොහෝ වශයෙන් හෙළි වීමට නියමිතයි. කරුණු එසේ වුවත් මෙම නව විකෘති ප්‍රභේදයෙන් ආරක්ෂාවීමට අප කළ යුත්තේ ඩෙල්ටා ප්‍රභේද යන ආරක්ෂා වීමට ගත් සියලු ආරක්ෂණ පියවරයන්ම තව දුරටත් තීව්‍ර කිරීම බවට ලෝක සෞඛ්‍ය සංවිධානය ඇතුළු විද්වතුන් පෙන්වා දෙනවා.

මේ වන විට විවිධාකාර වූ කොවිඩ් -19 ප්‍රභේදයන් ආසාදනයෙන් ඇතිවන රෝග ලක්ෂණවල තීව්‍රතාවය අවම කිරීමට සමත් වූ, දැනට භාවිතාවන එන්නත් නියමිත පරිදි නිර්දේශිත මාත්‍රා ගණන ලබා ගැනීම ඉදිරි වසංගත තත්ත්වයන්ට මුහුණ දීම සඳහා ද ඉතාමත් වැදගත් වනවා.

පෙර ප්‍රබේධ මෙන්ම , විවිධ උත්සව හා ප්‍රිය සම්භාෂණ වලදී සංවුර්ත පරිසරයක් තුළ බොහෝ දෙනා එකට කාලය ගත කිරීම වෛරසයේ නව ප්‍රභේද වේගයෙන් පැතිර යාමට හේතු වනු ඇති. එමෙන්ම වැඩි පිරිසක් සමග ගැවසීම, වාතාශ්‍රය අවම වීම, එකට හිඳ ආහාර ගැනීම වැනි විවිධ සාධක නිසා විවාහ මංගල උත්සව ආදි විවිධ ප්‍රිය සම්භාෂණ වෛරසය පැතිරීමට ඉතාමත්ම සුදුසු පරිසරයක් නිර්මාණය කරනු ඇති.

එළඹෙන කාලය තුළ මෙවැනි අවස්ථා හැකිතාක් දුරට මඟ හැරීම සහ අප දන්නා අනෙකුත් කොවිඩ් නිවාරණ සෞඛ්‍ය පුරුදු අඛණ්ඩව පිළිපැදීමෙන් අපත් අපේ ආදරණීයන් සියලු දෙනා නව කොවිඩ් ප්‍රභේදයන්ගෙන් ආරක්ෂා කර ගැනීමට මෙන්ම රටෙහි ආර්ථික කටයුතු අඩපණ වන ආකාරයෙන් වසංගත තත්ත්වය පැතිර යෑම වළක්වාලීමටත් බොහෝ දුරට උපකාර වනු ඇති.

ශ්‍රී ලංකාවේ මේ වන විට කොවිඩ් එන්නත් මාත්‍රා දෙකම ලබා ගත් පුද්ගලයින් සංඛ්‍යාව වයස 16න් ඉහළ ජනගහනයෙන් ප්‍රතිශතයක් විදිහට 85% ක් වැනි ඉහළ මට්ටමක්. අවදානම් කාණ්ඩ හඳුනාගනිමින් , ප්‍රමුඛතා අනුපිළිවෙල අනුව තුන්වන මාත්‍රාව ලෙස ෆයිසර් එන්නත ලබාදීමත් මේ වනවිට දිවයින පුරා සෞඛ්‍ය වෛද්‍ය නිළධාරී කාර්‍යාල මට්ටමෙන් ආරම්භ වී තිබෙනවා. වයස අවුරුදු හැට සහ ඉන් ඉහළ පුද්ගලයින්ට මෙන්ම සියලුම සෞඛ්‍ය සේවකයින්ට දෙවන මාත්‍රාවෙන් මාස 3කට පසුවත් , ප්‍රතිශක්ති ඌණතා සහිත පුද්ගලයින්හට
දෙවන මාත්‍රාවෙන් මසකට පසුවත් මෙය ලබාගැනීමට හැකියාව තිබෙනවා. කුමන එන්නත් වර්ගයකින් පළමු සහ දෙවන මාත්‍රා ලබාගෙන තිබුණත් , ප්‍රතිශක්තිය තවත් ඉහළ දමන තුන්වන මාත්‍රාව ලෙස ෆයිසර් එන්නත ලබාගැනීමට එය බාධාවක් වෙන්නෙ නෑ.

සෞඛ්‍ය උපදෙස් උපරිමයෙන් අනුගමනය කරමින් වසංගතය පාලනයට මෙතෙක් නොමද සහයෝගයක් ලබා දුන් ජනතාව ඉදිරි කාලය තුළ ද එළඹි සිහියෙන් කටයුතු කිරීම තුළින් නව වෛරස ප්‍රභේද ව්‍යාප්තිය වළකා ගැනීමට ද සියලු සහයෝගය ලබා දෙනු ඇති බවට අපි විශ්වාස කරනව

කොවිඩ් - 19 රෝගී තත්ත්වයට හේතුවන නව කොරෝනා වෛරසය චීනය වූහාන් නගරයෙන් වාර්තා වීමත් සමග බෝවන රෝග පිළිබඳ නැවතත් ලොව පුරා කතිකාවතක් නිර්මාණය වුනා.

කොවිඩ් ආසාදන තත්ත්වයෙන් මියයන පුද්ගලයින් සහ එමගින් රෝගාතුර වන පුද්ගලයින් පිළිබඳ දෛනික දත්ත ගැන සියලු දෙනාම සාකච්ඡා වෙනවා. කොවිඩ්-19 කියන්නේ වෛරසයකින් ඇතිවන රෝගී තත්ත්වයක්. ඒ වගේම පහුගිය කාලය තුල දක්නට ලැබුණු SARS, ඉබෝලා, කුරුළු උණ වැනි රෝග තත්ත්ව පවා වයිරස වලින් ඇතිවන ඒවා. ලෝක ඉතිහාසයේ අවුරුදු සීයකට එපිට කාලයක් තුළ මහා ව්‍යසනයන් ඇති කළ ඇතැම් බැක්ටීරියාවන් අද බොහෝ දුරට පාලනය වී පවතින්නේ අපි හැමෝම හොඳින් අඳුනන ප්‍රතිජීවක ඖෂධ, එහෙම නැත්නම් ඇන්ටිබයොටික් නිසාවෙන්.

එහෙත් වර්තමානය වන විට මේ ඇතැම් බැක්ටීරියාවන් ඒවා පාලනය කිරිමට යොදා ගැනුන ප්‍රතිජීවක ඖෂධවලට ප්‍රතිරෝධයක් ගොඩනඟා ගනිමින් පවතින බව පෙනී යනවා. මෙය අති භයංකර වසංගතයක පෙර නිමිත්තක් විය හැකි බව කියවෙනවා.

මේ උවදුරට පිළියම් සෙවීමට් නම් , මේ තරම් ප්‍රතිජීවක වලට ප්‍රතිරෝධී (ඔරොත්තු දෙන ) රෝගකාරක අප අතරට එන්නට හේතුව කුමක් දැයි අප මුලින්ම සොයා බැලිය යුතු වනවා.

අපි භාවිතා කරන ප්‍රතිජීවක ඖෂධ හමුවේ රෝගකාරක විෂබීජ එක්වරම පරාජය භාර ගන්නේ නැහැ. ඔවුන් නැවත ප්‍රතිජීවක ඖෂධ සමඟ සටන් කරනවා කරනවා. ප්‍රතිජීවක මගින් අඩපණ කෙරෙන ජීව ක්‍රියාවලි සඳහා වෙනත් විකල්ප ක්‍රම භාවිතය, ප්‍රතිජීවක ඖෂධය හානි කිරීමට පෙර බිඳ හෙලීම, සෛල තුළට ඇතුළු වීමට නොහැකි පරිදි බාධක නිර්මාණය කිරීම, ප්‍රතිජීවක ඉලක්කය ලබාගත නොහැකි පරිදි එය වෙනස් කිරීම සහ හැකි ඉක්මනින් ආක්‍රමණික සෛලයෙන් පිටතට පොම්ප කිරීම රෝගකාරක ජීවීන් විසින් සුලබවම භාවිතා කරන සටන් උපක්‍රම වනවා. එවැනි හැකියාවන් ලබා ගැනීමෙන් පසු ඒවා ඉදිරි පරම්පරාවට උරුමකර දීමටත්, ජානමය ද්‍රව්‍ය හුවමාරු කර ගැනීමෙන් මේ භයානක හැකියාවන් එකිනෙකා අතර හුවමාරු කර ගැනීමටත් මෙම ක්ෂුද්‍ර ජීවීන් ට හැකියාව තිබෙනවා. කොයිතරම් කාර්යක්ෂම සහ අලුත් ප්‍රතිජීවක ඖෂධ සොයාගත්තත්, ඒවා වගකීමකින් යුතුව භාවිතා නොවන පරිසරයක දී ඉක්මනින්ම ඊට ඔරොත්තුදීමේ හැකියාව ලබාගන්නට රෝගකාරක ක්ෂුද්‍ර ජීවීන්ට හැකියාව ලැබෙනවා.

බොහෝවිට වෛරස ආසාදන නිසා ඇතිවන, සාමාන්‍ය උණ සෙම්ප්‍රතිශ්‍යාව වැනි රෝග තත්වයන්ට පවා "ඇන්ටිබයොටික් කරල්/ පෙති" සොයා යන සහ ඒවා අනවශ්‍ය පරිදි නිර්දේශ කරන සියලු දෙනා ප්‍රතිජීවක ඖෂධ ප්‍රතිරෝධීතාව සඳහා කෙලින්ම වග කිව යුතු වෙනවා. මීට අමතරව සත්ව පාලනයේ දී සතුන් ඇති කරන්නන් විසින් නිර්දේශිත මාත්‍රාවන් ඉක්මවමින් සහ හිතුමතයේ සිදුකරන ප්‍රතිජීවක ඖෂධ සතුන්ට ලබාදීම නිසා ද මෙම තත්වය තවත් තීව්‍ර වෙමින් තිබෙනවා.

ලෝකයම වසර දෙකකට ආසන්න කාලයක් අඩපණකල කොවිඩ්-19 වසංගත රෝගය සඳහා නිශ්චිත ප්‍රතිකාර ලෙස භාවිතා කළහැකි ඖෂධ ගණනාවක් ගැන ලෝකය මේ වනවිට බලාපොරොත්තු තබාගෙන සිටිනවා. ඒ අතරින් සමහරක් දැනටම භාවිතයට අවශ්‍ය අනුමැතිය ලැබී තිබීම සහ ඉතා ඉහළ මටමකින් අසාධ්‍යවීම් සහ මරණ වළක්වන බව විද්‍යාත්මකව තහවුරු වී තිබීම සතුටුදායක තත්වයක්. අනාගතයේ අප විසින් භාවිතයට ගනු ලැබීමට ඉඩ ඇති එවැනි ඔසු මෙන්ම දැනට භාවිතයේ ඇති ප්‍රතිජීවක ඖෂධ සියල්ලේම ඉරණම රැඳී පවතින්නේ ඒවා කොතෙක් වගකීම් සහගතව භාවිතා වන්නේද යන්න මත බව ඔබට දැන් වැටහෙනවා ඇති.

වෛද්‍ය නිර්දේශයකින් පමණක්, අත්‍යාවශ්‍ය අවස්ථාවල ප්‍රතිජීවක ඔසු භාවිතය, නිර්දේශිත මාත්‍රාව නිවැරදිව සම්පූර්ණ කාලයම භාවිතා කිරීම, සතුන් සඳහා භාවිතයේ දී වගකීම් සහගත වීම, පරිසරයට එකතු නොවන පරිදි නිසි ආකාරයෙන් බැහැරකිරීම වැනි පියවර සැමවිටම අනුගමන කිරීම, තනි තනිවත් සමාජයක් ලෙසත් අපේ දැඩි අවධානයට යොමු විය යුතු වගකීමක් වෙනවා.

එසේ නොවුවහොත්, අප මේ දුටු වෛරස වසංගතයට වඩා ඉතා භයානක සහ මාරාන්තික බෝවන රෝග සහිත ලෝකයක් අපේ අනාගත පරපුරට උරුම වීමත්, ප්‍රතිරෝධී වූ විෂබීජ හමුවේ බෙල හීන වූ ප්‍රතිජීවක ඖෂධ සමඟ ඔවුන් අසරණ වීමත් වළක්වන්නට නොහැකිවනු ඇති බව අප යළිත් අවධාරණය කරනවා.

අපි මුලින්ම තෙරුම්ගමු තමන්ගෙ Covid level අදුරගන්නෙ කොහොමද??.. PCR එකක් කොහොමද කියවන්නේ කියන එක..
ඔයාලගේ PCR එකේ බලන්න තියනවා CT Value කියලා එකක්.. ඔය පහල තියෙන්නේ මගේ වාට්ටුවෙ මම කරපු PCR එකක්... එකෙ බලන්න CT Value එක.. මේකෙන් මොකක්ද කියැවෙන්නේ..
CT Value (Cycle Threshold)
මොකක්ද මේ RT - PCR එකක් කියන්නේ
Reverse transcription polymerase chain reaction (RT-PCR)
කෙටියෙන්ම කිව්වොත් මේකෙදි අපි කරන්නේ Virus RNA එක වෙන් කරගෙන, ඒක විශේශ වූ ජෛව රසායනික ක්‍රියාවලියක් මගින් මෙන්න මේ RNA එක අදුර ගැනීමයි,, ඇත්තටම මීට වඩා සන්කීර්න ක්‍රියාවලියක් තමයි මෙතන වෙන්න, ඒ කියන්නේ ඉතාම කුඩා Virus ප්‍රමනයක් උනත් මෙ ක්‍රමයෙන්වෙ detect නවා...
එතකොට Rapid Antigen (RAT)???
මේකෙදි අදුරගන්නෙ Virus ප්‍රෝටීනයි.. මේක ගොඩාක්ම ගැලපෙන්නේ රෝග ලක්ශන තියෙන අයටයි.. RAT Positive කියන්නේ ඔයාට තියෙන්නේ High viral load එකක්, ඔයාගෙන් තව කෙනෙක්ට හැදෙන්න ලොකු අවස්තාවක් තියනව... එතකොට Low viral load තියෙන කෙනෙක්ගෙ මෙක NEGATIVE වෙන්න තියෙන අවස්තාව වැඩියි... ඒ අයට PCR පරීක්ශනයකුත් කිරීම ඉත වැදගත්.. දැන් මම උඩින් දාපු .PCR report එක අයිති පුද්ගලයාට මම RAT එකකුත් කලා, නමුත් ඒක Negative...
දැන් බලමු CT Value (Cycle Threshold) එක ගැන.
කෙටියෙන්ම කිව්වොත් virus එක detect කරගන්න test එක run වෙන්න ඕනෙ cycle ගනනයි... Cycle ගනන අඩු වෙනවා කියන්නේ CT VAlue එක අඩුයි... වැඩි වෙනවා කියන්නේ CT value එක වැඩියි... එහෙනම් CT VAlue එක වැඩි උන කියලා නෙවෙයි ප්‍රශ්නෙ තියෙන්නෙ, අඩු උනොත් තමයි...
සාමාන්‍යයෙන් CT එක 35 අඩු උනොත් තමයි අපි Positive කියලා කියන්නේ, හැබැයි 35ට වැඩි වෙලා Neg කියලා report එකක් ආවා කියල Covid නැහැ කියන්න බැහැ, මොකද ඒ අවස්තාවෙ ඔයගෙ CT එක තමයි ඒ, ඕක වෙනස් වෙන්න පුලුවන්...
අනික් එක .CT Value එකෙන් කියවෙන්නේ නැහැ ඔයගෙ රෝගයේ severity එක, එහෙමත් නැත්නම් අමාරු වෙනවද නැද්ද කියන එක... නමුත් ඒකෙන් කියැවෙනවා ඔයගෙන් රෝගය බෝ කිරීමේ හැකියාව, CT value එක අඩු වෙනවා කියන්නෙ ඔයාගෙන් රෝගය බෝ වීමෙ හැකියාව වැඩියි..
දැන් හිතන්න ඔයාට පොසිටිව් උන කියලා...
ඔයව Home Quarantine/ Intermediate or Treatment center එකකට දානවද, Discharge කරනවද කියන එක අදාල පුද්ගලයින් විසින් තීරනය කරයි...
අලුත්ම Circular එකේ හැටියට CT Value එක 30ට වැඩිනම් අපි කිසිම Quarantine එකක් කරන්නේ නැහැ, කෙලින්ම ගෙදර යවනවා,, සාමන්ය විඩිහට වැඩ ටික කරන් යන්න කියලා, නමුත් තමුන්ට Covid තියෙනව කියන එක ගැන සිහියෙ තියාගන්න වෙනවා...
දැන් බලමු මොනවද ඕනෙ බෙහෙත්..
රෝග ලක්ශන නැති හා මද රෝග ලක්ශන තිබෙන නිවෙස් වල හා අතර මැදි මද්‍යස්තාන වලට දාන අයට අපේ National Guideline එකෙ බෙහෙත් දෙන්න කියලා නැහැ.... අපි කියනව ඒකට Supportive & Symptomatic care කියලා..
අනික් විශේෂ දෙය තමයි එයාලට තියෙන දියවැඩියාව, ප්‍රෙශර්, වකුගඩු අමාරුව, හදවතේ ප්‍රශ්න මේවා ටික හරියට control කරන්න ඕනේ...
Vit C, ZIncovit, Vit D ගන්න කියල කීප තැනකම තිබ්බ, අපිත් දෙනවා, නමුත් Placebo effect එකක් ඇරෙන්න Covid සුව වීම ඉක්මන් වීමක් නැහැ...
Zinc දෙන්න එපා කියල trials කිහිපයක්ම තියනවා.....
දැන් ප්‍රශ්නෙ තමයි බෙහෙත් නැතුව ඛොමද සනීප වෙන්නේ?? අපි පොඩි කාලෙ හෙම්බිරිස්සවක් හෙදුනහම අම්මලා මොකද කරන්නෙ??? අන්න ඒ ටික කරන්න..
මූලිකම දෙ සැහැල්ලු වෙන්න.. බය නැති කරගන්න, මේක මහ බයානක ලෙඩක් කියලා හිතන්න එපා...
උනු වතුර විතරක්ම බොන්න, හුමාලය අල්ලන්න, දවසකට දෙවරකට වඩ එපා ඒකත්..
කොත්තමල්ලි සුවදරනි වගෙ දෙවල් බිව්වට කමක් නැහැ..
ආයෙත් කියනව Vit C, D, Zinc ගැන කරපු Trial වලින් හොයාගේ තියනවා මේවායෙන් Covid සුව වීම ඉක්මන් වීමක්වත්, අමාරු වීම අඩු වීමක් වත් වෙන්නේ නැහැ...
අනික් එක තමයි Vaccine එක. ඔයාට රෝගය වැලදිලා කොච්චර කාලෙකින්ද Vaccine එක ගහන්න පුලුවන්?
Positive උන දිනයේ ඉදන් සති 4කින් තමයි ගහන්න කියලා reccommend කරලා තියෙන්නේ, ඒ කියන්නෙ නිරෝදායන සති දෙකෙන් පස්සෙත් තව සති දෙකක් ඉන්න ඕනේ..

Copied from
Doctor Tharaka Jayalath

COVID ආශ්‍රිත හුස්ම ගැනීමේ අපහසුතාවයක දී සුදුසු ඉරියව්...

COVID -19 වෛරසයේ ඩෙල්ටා ප්‍රභේදය මේ වන විට රටපුරා සීඝ්‍ර පැතිර යාමක් සිදුවෙමින් පවතින බව ඔබ දන්නවා. මේ පසුබිම තුළ ආසාදිත පුද්ගලයින් හට රෝහල් තුළ ප්‍රතිකාර කිරීමට සමගාමීව රෝග ලක්ෂණ නොදක්වන හා සුළු රෝග ලක්ෂණ සහිත ආසාදිතයන් හට තම නිවසෙහි ම රැඳී ප්‍රතිකාර ලබා ගැනීමට වැඩපිළිවෙලක් සකස් කර තිබෙනවා. මේ පිළිබඳව අප විසින් ඉහතදී විස්තර සහිතව සාකච්ඡා කරන්නට යෙදුනා.

නිවසේ රැඳී ප්‍රතිකාර ලැබීමේ දී රෝග ලක්ෂණ උත්සන්න වීම කලින්ම හඳුනා ගැනීම, ඉතාමත්ම වැදගත් වනවා. විවේකීව සිටියදී හෝ සුළු මහන්සි වීමකින් පසුව, හුස්ම ගැනීමේ අපහසුතාවයක් හෝ හතියක් ඇතිවීම මෙහි දී, වහාම රෝහල්ගත වීමට හේතුවක් සේ සැලකෙනවා. එමෙන්ම රුධිරයේ ඔක්සිජන් මට්ටම, විවේකීව සිටියදී හෝ සුළු මහන්සි වීමකින් පසු 96% කට වඩා, අඩු වේ නම්, එයත් තව දුරටත් නිවසේ රැඳී සිටීමට සුදුසු තත්වයක් නොවේ. යම්කිසි කෙනෙක් නිවෙස් ගත COVID-19 ප්‍රතිකාර සම්බන්ධීකරණ පද්ධතියෙහි ලියාපදිංචි වීමෙන් පසුව මෙවන් තත්ත්වයක් ඇති වුවහොත් වහාම අදාල වෛද්‍ය කණ්ඩායමට දැනුම් දිය යුතුයි. ඉන්පසුව එම වෛද්‍ය කණ්ඩායම විසින් විශේෂඥ වෛද්‍යවරුන් සමඟ සාකච්ඡා කිරීමෙන් අනතුරුව එම රෝගියා වහාම රෝහලකට ඇතුළත් කිරීමට කටයුතු කෙරෙනවා ඇති.

එසේ රෝහලකට ඇතුල් කිරීම සම්බන්ධීකරණය කිරීමට ගත වන කාලය ඇතුළත හුස්ම ගැනීමේ අපහසුතාවය පවතින්නේ නම් රෝගියා හට පහත ආකාරයට ඉරියව් වෙනස් කිරීමෙන් එම හුස්ම ගැනීමේ අපහසුතාව යම් දුරකට අවම කරගන්න පුළුවන්.

මෙම රූප සටහනේ දැක්වෙන ආකාරයට සෑම පැය 2 කට වරක් ම

⦾ විනාඩි 20-30 මුනින් අතට ද, ( ගර්භනී කාන්තාවන් හා ස්ථුල පුද්ගලයන් විසින් මෙම ඉරියව්ව මග හැරිය යුතු වේ)

⦾ විනාඩි 20-30 දකුණු ඇලයට ද,

⦾ විනාඩි 20-30 වාඩි වී ද,

⦾ විනාඩි 20-30 වම් ඇලයට ද ,

ස්ථානගත වීමෙන් මෙම අපහසුතාවය අවම කරගැනීමට පුළුවන්.

මෙය ලොව පුරා COVID - 19 ප්‍රතිකාර මධ්‍යස්ථාන වල හුස්ම ගැනීමේ අපහසුතාව අවම කරගැනීමට භාවිතා වන එක් සරළ උපක්‍රමයක්.

එහෙත් මෙහිදී තදින් ම අවධාරණය කළ යුතු සහ වඩාත්ම වැදගත් කාරණය වන්නේ, හැකි ඉක්මනින් ම මේ සඳහා වෛද්‍ය උපදෙස් ලබා ගනිමින් ලැබෙන උපදෙස් වලට අනුකූලව රෝහල් ගත වීමට කටයුතු කිරීමයි.

රට පුරා ශීඝ්‍රයෙන් පැතිර යන නව කොරෝනා වෛරසයෙන් ගැලවී, එම රෝග ආසාදනය නිසා සිදුවන විවිධ අපහසුතා වලින් මිදීමට ඔබ මේ අවස්ථාවේ ගත යුතු වඩාත්ම වැදගත් පියවර වන්නේ සියලු අත්‍යාවශ්‍ය නොවන ගමන් බිමන් හා හමුවීම් වහාම නවතා දැමීමයි. මෙම අභියෝගාත්මක කාල පරිච්ඡේදය පුරාවට පුරවැසියන් ලෙස අපේ වගකීම පිළිබඳ සැළකිලිමත් වුවහොත් සුවපත් අනාගතයක් ඉක්මනින්ම උදා කරගැනීමට අපට හැකිවනු නොඅනුමානයි.