أكلاتك و حلوياتك أسهل مع مي
أكلات و حلويات سهلة و بسيطة و مش مكلفة وكمان سريعة علشا?
05/05/2020
كالزونى بيتزا أو التوربيد الإيطالى زى ما بيسموه فى محلات البيتزا سهل جدا وطعمه تحفة
إفتحوا الصور مكتوب عليها الطريقة
إدخلوا الصفحة شوفوا باقى الوصفات
ده تلخيص المقادير و طريقة العمل للناس اللى عايزة تاخد سكرين شوت للوصفة كلها على بعض
المقادير
عجينة بيتزا
وده لينك البيتزا علشان تعرفوا طريقة العجينة
https://www.facebook.com/113673696960543/posts/116903336637579/
معلقة كبيرة صلصة طماطم على كاتشب وعليهم رشة ملح و فلفل إسود وزعتر و بصل بودر
أى حشوة عايزنها أنا عملت ميكس فراخ و بسطرمة و لانشون و زيتون و طماطم وفلفل وجبنة رومى
جبنة موتزاريلا
أول حاجة هنفرد عجينة البيتزا و تبقى طبقة رفيعة
هننقل العجينة فى صينية مدهونة بالزيت ونحط فى نص منها معلقة الصلصة ونبعد عن الاطراف ونسيب النص التانى فاضى مش هنحط عليه صلصة
وبعد كده هنحط الحشوة
وبعدين الجبنة الموتزاريلا ودى إختيارى لو مش موجودة مش مشكلة
بعد كده هنقفل العجينة هنجيب نص العجينة الفاضى على الحشوة ونقفل الأطراف كويس ونضغط عليها علشان متتفتحتش فى الفرن وهى بتستوى ونخرمها بشوكة من فوق علشان متتنفخش وهندخلها الفرن على درجة حرارة 180 متسخن قبلها بربع ساعة هتقعد من تلت ساعة ل 25 دقيقة لغاية أما تاخد لون دهبى حسب الفرن
وبعد ما تخرج من الفرن هنغطيها بفوطة 5 دقايق بالظبط علشان نضمن إنها تفضل طرية وبعدين نقدمها يارب تجربوها و تعجبكم وبالهنا و الشفا
04/05/2020
قطايف محشية كريم شانتيه سهلة وسريعة ومش بتاخد وقت
المقادير
نص كيلو قطايف جاهزة
كريم شانتيه
"هنضرب كوب كريم شانتيه وعليه 3 معالق كبار سكر بودر وكوب لبن متلج "
سيرب تقيل
"2 كوب سكر عليه كوب ماية نحطهم فى حلة عالنار وأول ما يغلوا ننزل بعصرة نص ليمونة ونسيبهم يغلوا دقيقتين و نحط رشة ڤانيليا ونطفى"
أول حاجة هنقفل القطايف زى القرطاس أو نقفلها لغاية نصها بس
ونقليها فى الزيت ولما تتحمر نطلعها وننزلها فى السيرب ونقلبها فيه كويس وبعدين هنطلعها من السيرب ونحطها فى مصفاة تنزل السيرب الزيادة ونحشيها بالكريم شانتيه أو القشطة لو عايزين ونزينها زى ما نحب سواء مكسرات أو شوكلت شيبس أو كريز
30/04/2020
منيو الإسبوع التانى من رمضان
كل عام وأنتم بخير
30/04/2020
البفتيك الكداب سهل جدا وموفر وطريقته بسيطة
إفتحوا الصور مكتوب عليها الطريقة
إدخلوا الصفحة شوفوا باقى الوصفات
ده تلخيص المقادير و طريقة العمل علشان اللى عايز ياخد سكرين شوت للوصفة كلها على بعض
المقادير
لحمة مفرومة أنا عملت نص كيلو طبعا الكمية زى ما تحبوا
بصلة كبيرة مبشورة ومعصورة كويس من الماية
بيضة
معلقة كبيرة دقيق
معلقة كبيرة بقسماط
توابل ملح ، فلفل إسود ، بابريكا ،رشة قرفة ، رشة جنزبيل ،
بهارات لحمة
هنحط المقادير كلها على بعض
هنخلطهم مع بعض ونعجنهم كويس بإدينا
هنقسم اللحمة لكور و هنجيب كيس تلاجة كبير ونفرده ونحط جواه كورة أو إتنين على حسب حجم الكيس
ونضغط عاللحمة بإدينا ونفردها كويس على أد ما نقدر علشان لسه لما هتستوى هتكش فى الزيت
وبعد ما نخلص الكمية كلها هاندخلها الفريزر لغاية أما تمسك نفسها علشان لما نحطها فى البيض و البقسماط متفكش مننا
بعد ما اللحمة جمدت فى الفريزر هنطلعها ونجيب طبق فيه بيضة وشوية لبن وعليه رشة ملح و فلفل إسود ونحط فيه البفتيك
وبعد كده هنحطها فى البقسماط ونضغط عليها كويس علشان البقسماط يمسك فيها وميفكش من عليها لما تتقلى
بعد ما نخلص الكمية كلها هنشيلها فى الفريزر نص ساعة وبعدين نقليها على نار متوسطة ولما تستوى نطلعها على مناديل مطبخ تشرب الزيت و نقدمها وبالهنا و الشفا
27/04/2020
أسهل و أسرع بلح الشام هتقوموا تعملوه دلوقتى إفتحوا الصور مكتوب عليها الطريقة
إدخلوا الصفحة شوفوا باقى الوصفات
ده تلخيص المقادير و طريقة العمل للناس اللى طلبت تاخد سكرين شوت للوصفة كلها على بعض
المقادير
مقادير السيرب
كوب سكر
نص كوب ماية
نص ليمونة
ڤانيليا
عجينة بلح الشام
كوب دقيق
كوب إلا ربع ماية
ربع كوب زيت
بيضتين
ڤانيليا
معلقة كبيرة نشا
رشة ملح و رشة سكر
أول حاجة هنعمل السيرب علشان لازم يكون بارد
هنحط كوب السكر ونص كوب الماية أول ما يغلوا هنعصر عليهم النص ليمونة ونسيبهم دقيقتين يغلوا مع بعض ونحط الڤانيليا ونطفى
وبعدين ننزله فى طبق ونسيبه يبرد خالص
فى حلة هنحط كوب إلا ربع الماية وربع كوب الزيت ورشة الملح و السكر ونسيبها يغلوا مع بعض
بعد ما الماية تغلى هننزل بكوب الدقيق و معلقة النشا ونقلب كويس لغاية أما الدقيق يختفى
هننزل العجين فى بولة ونسيبه يبرد
بعد ما برد هننزل بأول بيضة ونخلط كويس لغاية أما تختفى فى العجين
هننزل بالبيضة التانية والڤانيليا ونخلط كويس
كده العجين بقى جاهز هنحطه فى كيس حلوانى
هنبتدى ننزل العجين فى زيت بارد ونقطعه الحجم اللى نحبه وهنستخدم المقص نضغط على كيس الحلوانى وأول ما نوصل للحجم اللى عايزينه هنحط المقص فى الزيت ونقص علشان ميلزقش فى العجينة وده بيخلى بلح الشام يبقى شكله مظبوط وبعدين نشغل البوتاجاز على نار هادية علشان يستوى كويس
ولما ياخد لون دهبى هنطلعه ونحطه فى السيرب ونقلبه فيه كويس وبعدين نحطهم فى مصفاة ينزلوا السيرب الزيادة ونسيب الزيت يبرد وننزل بباقى الكمية وبعد ما نخلص الكمية كلها نقدمه وبالهنا و الشفا
26/04/2020
الحمام الكداب تحفة و سهل جدا ومش بياخد وقت
إفتحوا الصور مكتوب عليها الطريقة
إدخلوا الصفحة شوفوا باقى الوصفات
ده تلخيص المقادير و طريقة العمل للناس اللى طلبت تاخد سكرين شوت للوصفة كلها على بعض
المقادير
أوراك فراخ مخلية العدد اللى عايزينه طبعا
بصلتين مبشورين
رز على حسب العدد
ملح و فلفل إسود
هنشيل من البصل حوالى معلقتين كبار علشان نعمل بيهم الرز
ونحط على باقى البصل ملح و فلفل إسود وندعك بيهم الفراخ من جوه ومن بره ونشيلهم فى التلاجة ساعتين أو أكتر هنعمل الرز هنحط سمنة ونحط البصل يدبل شوية وبعدين ننزل بالرز ونحط ملح و فلفل إسود ونزود ماية وأول ما الرز يشرب الماية بتاعته هنشيل منه مقدار معلقة كبيرة لكل ورك فرخة علشان نحشيها ونسيبه يبرد ونسيب باقى الرز يستوى عادى علشان هنقدمه جنب الأكل
هنطلع الفراخ من التلاجة ونحط الرز فى النص
هنلفها رول على بعض وممكن نقفلها بخلة أسنان لو معرفناش نقفلها كويس
هنجيب ورق فويل ونحط الفراخ وتبقى العضمة بتاعة الدبوس ظاهرة من تحت علشان مش هنلفها بالفويل لأن دى اللى هتدى شكل الحمام
هنسلقهم فى ماية مغلية لمدة ساعة ولما يتسلقوا هنطلعهم يبردوا
وبعدين هنحمرهم فى شوية سمنة من كل الجوانب
ونقدمها مع الرز وبالهنا و الشفا
24/04/2020
كل سنة وإنتم طيبين طبعا العصاير فى رمضان شئ أساسى يمكن أهم من الأكل نفسه علشان بنكون عطشانين بعد يوم صيام طويل
النهاردة جمعتلكم طرق عصاير رمضان كلها علشان نقدر نعملها بسهولة كل يوم
التمر الهندى :
هنجيب حلة نحط فيها نص لفة تمر هندى وننزل عليها ب لترين ونص ماية ونحطها عالنار تغلى وبعد ما تغلى نهدى النار عليها ونسيبها ربع ساعة كمان علشان الطعم يتركز و بعدين نطفى ونسيبه يبرد ونصفيه ونضيف السكر زى ما نحب
الكركدية وليه طريقتين يا إما نغليه أو ننقعه
لو هنغليه هنجيب حلة ونحط فيها كوباية كركدية وننزل عليه ب لترين ماية ونسيبه يغلى عالنار وبعد ما يغلى نهدى النار خالص ونسيبه ربع ساعة كمان علشان الطعم يتركز وبعدين نطفى ونسيبه يبرد ونصفيه ونضيف السكر زى ما نحب
لو هننقعه هناخد نفس المقدار من الكركدية والماية وننقعهم فى بولة ونسيبهم ساعتين و بعدين نصفيه و نضيف السكر
الخروب :
هنجيب حلة ونحط فيها كوب سكر يتكرمل وبعدين ننزل عليه بكوباية خروب ونقلبه مع السكر المتكرمل كويس وننزل ب لترين ماية ونسيبه يغلى وبعد ما يغلى نهدى النار خالص ونسيبه ربع ساعة كمان علشان الطعم يتركز وبعدين نطفى ونسيبه يبرد ونصفيه ولو إحتاج سكر تانى نزودله
الدوم :
هنجيب حلة وحط فيها كوباية دوم قطع وننزل عليه ب لترين ماية ونحطها عالنار تغلى وبعد ما تغلى نهدى النار عليها ونسيبها ربع ساعة كمان علشان الطعم يتركز و بعدين نطفى ونسيبه يبرد ونصفيه ونضيف السكر زى ما نحب
قمر الدين :
هنجيب نص لفة قمر الدين ونقطعه قطع صغيرة ونحطه فى بولة وننزل عليه ب لتر ماية سخنة ونسيبه منقوع ساعتين وبعدين نحطه فى الخلاط بالماية اللى كان منقوع فيها وننزل عليه بكوبايتين ماية ساقعة و السكر ونضربه كويس وبعدين نصبه فى كوبايات أو نشيله فى إزازة
العرقسوس :
كوباية عرقسوس عليه معلقة صغيرة كربوناتو وعليهم نص كوباية ماية دافية و نعجنهم مع بعض ونغطيه ونسيبه ساعتين وبعدين نجيب شاشة بيضة نضيفة ونحط فيها العرقسوس ونربطها كويس ونجيب بولة فيها لترين ماية وننزل فيها الشاش ونسيبها ربع ساعة علشان الماية تمتص العرقسوس كويس وبعدين نشيلها
ونصبه فى الكوبايات أو نشيله فى إزازة
السوبيا :
أول حاجة هنعمل بودرة السوبيا
كوب سكر بودرة
نص كوب لبن بودرة
نص كوب جوز هند
ربع كوب كريم شانتيه خام
4 معالق دقيق رز ولو مش موجود ممكن نغسل كمية من الرز ونسيبه ينشف كويس وبعدين نطحنه
معلقة كبيرة نشا
معلقة صغيرة ڤانيليا
هنقلب كل المكونات دى مع بعض ونحفظهم فى برطمان ولما نيجى نستخدمه هناخد 3 معالق من بودرة السوبيا و عليهم نص كوب لبن ونص كوب ماية ونضربهم فى الخلاط ونصبه فى الكوبايات
24/04/2020
كل سنة وإنتم طيبين ربنا يعود علينا و عليكم الأيام بخير
23/04/2020
أقراص البطاطس المقرمشة حلوة جداااا وسهلة ممكن تبقى طبق جنب الأكل أو ممكن نتسحر بيها فى رمضان وممكن نعملها سندوتشات إفتحوا الصور مكتوب عليها الطريقة
إدخلوا الصفحة شوفوا باقى الوصفات
ده تلخيص المقادير و طريقة العمل للناس اللى طلبت تاخد سكرين شوت للوصفة كلها على بعض
المقادير
2 بطاطس متوسطة
بيضة
معلقة كبيرة دقيق
أول حاجة هنبشر البطاطس بالمبشرة و نصفيها كويس من الماية بتاعتها هنحط عليها البيضة ومعلقة الدقيق وملح و فلفل إسود وبابريكا و رشة بصل بودر هنخلطهم مع بعض كويس
هنجيب طاسة نحط فيها زيت ونحط البطاطس بالمعلقة ونساويها تبقى على شكل دايرة زى الشكل اللى فى الصور ونهدى النار شوية علشان البطاطس تستوى
لما تاخد لون من تحت هنقلبها عالناحية التانية
بعد ما تاخد لون من الناحيتين وتستوى هنطلعها على مناديل مطبخ علشان تشرب منها الزيت
جميلة جدا مقرمشة من بره وطرية من جوه
ممكن نعملها سندوتشات هنجيب عيش كيذر و نحط خس كابوتشا ونحط عليه قرصين من البطاطس وعليه شرايح فلفل رومى و كاتشب بيبقى طعمه تحفة جربوها ويارب تعجبكم وبالهنا و الشفا
22/04/2020
أسرع وأسهل تشيز كيك عالبارد طعمه تحفة مش بياخد وقت ومش مكلف
إفتحوا الصور مكتوب عليها الطريقة
إدخلوا عالصفحة شوفوا باقى الوصفات
ده تلخيص المقادير و طريقة العمل للناس اللى طلبت تاخد سكرين شوت للوصفة كلها على بعض
المقادير
4 باكو بسكوت سادة وسط أو 3 باكو كبير نفرمه فى الكبة وعليه نص كوب زبدة سايحة ونفرده فى صينية التشيز كيك ونضغط عليه كويس ونشيله فى الفريزر
كوب كريم شانتيه
علبة جبنة كيرى
علبتين زبادى
ربع كوب سكر
معلقتين كبار چيلاتين بودر
هنضرب الكريم شانتيه مع كوب لبن و3 معالق كبار سكر بودر
هنفضى الجبنة فى طبق وعليهم معلقتين كبار لبن ونهرسهم مع بعض كويس علشان الجبنة تبقى كريمى
هنحط عليهم السكر ونخلطهم كويس
هنضيف عليهم علبتين الزبادى ونقلب كويس
هندوب معلقتين الچيلاتين فى ربع كوب ماية دافية
هنصفى الچيلاتين وننزله على خليط الجبنة و الزبادى
هنضيف خليط الجبنة و الزبادى على الكريم شانتيه
هنطلع الصينية من الفريزر ونحط الخليط على البسكوت
فى الآخر هنحط الصوص اللى نحبه شيكولاتة أو فراولة أو كراميل أو چيلى
هقولكم طريقة عمل الصوصات
صوص الكراميل :
بحط كوب سكر يتكرمل وأكون مهدية النار علشان ميتحرقش وبعد ما يتكرمل أنزل عليه بمعلقة كبيرة زبدة وأقلب وبعدين أنزل بكوب لبن سخن واحدة واحدة لغاية أما كل كمية السكر تدوب فى الآخر بضيف معلقة كبيرة نشا مدوبة فى ربع كوب لبن وأقلب يغلى غلوة وأطفى وأصبه فى برطمان يبرد وأحطه عالتشيز كيك
صوص الشيكولاتة :
هنجيب 100 جرام شيكولاتة مبشورة أو شوكلت شيبس وننزل عليها بنص كوب لبن سخن ونقلب لغاية أما الشيكولاتة تدوب ونسيبها تبرد وبعدين ننزلها عالتشيز كيك
صوص الفراولة:
هنحط نص كيلو فراولة فى حلة عالنار ونحط عليها نص كوب سكر ومعلقة كبيرة نشا مدوبة فى ربع كوب ماية ونقلب لغاية أما السكر يدوب وتبقى عاملة صوص ونطفى ونسيبها تبرد وننزل بيها عالتشيز كيك
وممكن نعمله بالچيلى ده أسرع حاجة هنعمله بالطريقة المكتوبة عالعلبة بس هنحط نص كمية الماية المكتوبة علشان ميبقاش خفيف ونسيبه يبرد وبعدين نصبه عالتشيز كيك
وبعد ما نحط الصوص اللى عايزينه هنحط الصينية فى الفريزر ساعة وبعدين نحطها فى التلاجة ساعتين أو تلاتة تمسك نفسها أكتر وبعدين نقطعها ونقدمها
21/04/2020
كل سنة وأنتم طيبين بمناسبة شهر رمضان الكريم يارب يعود علينا الأيام بخير ويرفع عنا البلاء و كل سنة وإخواتنا المسيحيين بخير بمناسبة عيد القيامة المجيد
أنا نزلت إسبوع كامل لمنيو شهر رمضان وكل إسبوع هنزلكم منيو مختلف و هاحفظ اللى قبله فى ألبوم Menu علشان اللى عايز أفكار للأكل فى أى وقت يقدر يرجعله
21/04/2020
طاجن المكرونة باللحمة المفرومة زى اللى بيتباع فى محلات الكشرى بالظبط ومن غير ما نسلق المكرونة سهل جدا وسريع هيعجبكم جدا إفتحوا الصور مكتوب عليها الطريقة
إدخلوا الصفحة شوفوا باقى الوصفات
ده تلخيص المقادير و طريقة العمل للناس اللى طلبت تاخد سكرين شوت للوصفة كلها على بعض
المقادير
نص كيلو لحمة مفرومة عايزين تزودوا أو تقللوا براحتكم
بصل مفروم لتعصيج اللحمة
نص كيلو عصير طماطم
كيس مكرونة أقلام
معلقتين كبار خل
معلقة كبيرة معجون طماطم
4 فصوص توم مفرومين
أول حاجة هنعصج اللحمة هقولكم سريعا بعملها ازاى بحط شوية زيت وأنزل عليهم بالبصل يدبل شوية وبعدين أنزل باللحمة وأقلب كويس وأحط التوابل ملح وفلفل إسود وبهارات لحمة وبابريكا ورشة قرفة ورشة جنزبيل وزعتر وكزبرة ناشفة وأقلب كويس لغاية أما اللحمة تستوى
فى نفس الطاسة اللى عملنا فيها اللحمة هنحط معلقة كبيرة زيت و ننزل بالتوم المفروم ونشوحه شوية وبعدين ننزل بمعلقتين الخل ونقلب بعد كده هننزل بعصير الطماطم ونقلب كويس هنحط معلقة الصلصة والتوابل ملح وفلفل إسود وكمون وكزبرة ناشفة وبابريكا ورشة بهارات لحمة ونقلب كويس ونسيبها تغلى غلوتين ونطفى مش عايزينها متسبكة عايزين تكون سايلة علشان المكرونة تستوى فيها
هنجيب طاجن أو بيركس مدهون بالزيت ونحط فيه اللحمة المتعصجة ونفردها فيه كويس
بعد كده هننزل بكيس المكرونة كله ونفرده فوق اللحمة
بعدين هننزل بالصلصة ونوزعها كويس فوق المكرونة
هنزود شوية ماية مغلية فوق الصلصة يدوب بس تغطى المكرونة علشان تستوى كويس وناخد بالنا منزودش الماية علشان المكرونة متعجنش
هنغطيها بورق فويل وندخلها الفرن على درجة حرارة 200 متسخن قبلها بربع ساعة وهنحطه عالشبكة فى النص وهيقعد بالظبط نص ساعة
بعد ما يخرج من الفرن هنسيبه يبرد خالص وندخله التلاجة ساعة يمسك نفسه علشان لما نقلبه ونقطعه تبقى القطع متماسكة
20/04/2020
كل سنة وأنتم طيبين بمناسبة شم النسيم
يلا مين بقى لون البيض يورينا شكله الجميل ويقولنا إستخدم إيه فى التلوين أنا إستخدمت الكركدية والكركم وحطيت بيض بلدى وبيض أحمر لأن البيض الأحمر هتلاقيه واخد لون أغمق شوية عن البيض التانى وتحسى إن فى تنوع فى الألوان وفى نفس الوقت مستخدمناش حاجات كتير وفى معلومة غلط عند أغلب الناس إن الكركدية بيدى لون أحمر ده غلط خالص الكركدية بيدى لون رمادى أو بنفسجى غامق لو عايزة لون أحمر إستخدمى بنجر أو بابريكا
19/04/2020
حفظت منيو الإسبوع اللى فات فى ألبوم Menu وهاحفظ كل المنيوهات فيه علشان لما نحتار نعمل أكل إيه نلاقى أفكار كتيير
19/04/2020
بريوش شم النسيم كل سنة وإنتوا طيبين
تحفة وهش أوووى جربوه هيعجبكم جدا
إفتحوا الصور مكتوب عليها الطريقة
إدخلوا الصفحة شوفوا باقى الوصفات
ده تلخيص المقادير و طريقة العمل للناس اللى طلبت تاخد سكرين شوت للوصفة كلها على بعض
المقادير
نص كيلو دقيق
نص كوب لبن دافى
ربع كوب سكر
ربع كوب زبدة سايحة
بيضة
ڤانيليا
معلقة كبيرة خميرة
معلقة كبيرة خل
نص معلقة صغيرة بيكنج بودر
أول حاجة هنعمل إختبار للخميرة علشان نتأكد إنها شغالة
هنجيب ربع كوباية ماية دافية ومعلقة صغيرة سكر ونقلب فيها معلقة الخميرة ونسيبها فى مكان دافى 10 دقايق
بعد ما نتأكد إن الخميرة خمرت
هنحط عالدقيق رشة ملح والبيكنج بودر والبيضة والڤانيليا والخميرة والخل
هنقلب المقادير مع بعض بإدينا كويس
هندوب ربع كوب السكر فى نص كوب اللبن الدافى وننزل بيهم عالدقيق ونعجنهم
هنحط ربع كوباية الزبدة ونعجن كويس
هننزل العجينة عالرخامة أو ترابيزة المطبخ ونعجن كويس جدا مش أقل من 10 دقايق
بعد ما خلصنا عجن هنحط العجينة فى بولة ونغطيها ونحطها فى مكان دافى تخمر
بعد ما تخمر هنبتدى نشتغل فيها
هنلفها رول و نقطعها قطع بالسكينة علشان نشكلها
شوفوا الصور فى البوست أنا عاملة أكتر من شكل
بعد ما نخلص كل الكمية هنحطهم فى الصوانى المدهونة بالزيت نسيبهم نص ساعة يرتاحوا ويخمروا تانى
بعد ما خمروا هنجيب طبق نحط فيه صفار بيضة ومعلقة كبيرة لبن ورشة ڤانيليا وندهن بيها وش البريوش وندخله الفرن على درجة حرارة 180 متسخن قبلها بربع ساعة وهيقعد من 10دقايق لربع ساعة مبياخدش وقت فى السوا تابعوه على طول علشان بياخد لون بسرعة وأول ما يخرج من الفرن هنغطى الصينية 5 دقايق بفوطة علشان نضمن أن وش البريوش مينشفش
18/04/2020
صينية البطاطس بحشوة الفراخ المفرومة والبشاميل سهلة جدا وجميلة و مبتاخدش وقت إفتحوا الصور مكتوب عليها الطريقة
إدخلوا الصفحة شوفوا باقى الوصفات
ده تلخيص المقادير و طريقة العمل للناس اللى طلبت تاخد سكرين شوت للوصفة كلها على بعض
المقادير
كيلو إلا ربع بطاطس متقطعة مكعبات علشان تتسلق بسرعة
نص كيلو فراخ بانيه مفرومة
بصلة كبيرة وجزرة و فلفل رومى هنضربهم فى الكبة مع بعض والجزر والفلفل إختيارى بس بيدى قيمة غذائية أعلى للأكل وكمان بيزود الحشوة
البشاميل
3 معالق كبار دقيق مش مليانين أوى علشان البشاميل يبقى خفيف
3 كوب لبن
هنجيب طاسة ونحط فيها معلقة كبيرة سمنة وننزل فيها بالبصل والجزر و الفلفل ونقلب لغاية أما يدبلوا شوية هننزل عليهم بالفراخ المفرومة بعد ما قلبنا الفراخ مع البصل والفلفل والجزر هنحط التوابل
ملح و فلفل إسود و بابريكا و حبهان بودر و رشة قرفة وزعتر وكمون وكزبرة ناشفة وبهارات فراخ ومعلقة صغيرة صويا صوص
وكده حشوة الفراخ خلصت
هنسلق البطاطس ولما تستوى نحطها فى بولة ونحط عليها ملح و فلفل إسود وبابريكا وكركم ومعلقة كبيرة زبدة ونهرسها كويس
هنعمل البشاميل هنجيب حلة ونحط فيها 3 معالق سمنة وننزل عليهم ب 3 معالق الدقيق ونقلب بمضرب سلك ونلاحظ إن الدقيق مش تخين علشان البشاميل يبقى خفيف
هننزل بلبن شوية شوية ونقلب منحطوش كله مرة واحدة علشان ميكلكعش ونحط مكعب مرقة و ملح و فلفل أبيض لو مش موجود يبقى فلفل إسود ورشة جوزة الطيب ومعلقة كبيرة جبنة كريمى أو مثلثين جبنة نستو ولو مفيش برده مش مشكلة بيبقى جميل ونقلب لغاية أما قوامه يتقل شوية وممكن نحط أى نوع جبن عايزينه سواء موتزاريلا أو رومى أو شيدر كل ده بيخلى البشاميل طعمه تحفة وكده البشاميل بقى جاهز
ولو إنتى بتعملى البشاميل وملاقتيش عندك لبن كتير هتحطى نص كمية اللبن و النص التانى ماية ومعلقتين كبار لبن بودر أو شوربة يعنى متأيديش نفسك كله بيشتغل وبيبقى جميل فى الآخر
هنجيب صينية وندهنها بالزيت ونفرد فيها البطاطس المهروسة بإدينا ونساويها كويس
هننزل بعد كده بحشوة الفراخ ونفردها كويس عالبطاطس
آخر حاجة هننزل بالبشاميل وندخل الصينية الفرن على درجة حرارة 200 متسخن قبلها بربع ساعة
بعد تلت ساعة هنطلع الصينية من الفرن ونحط عالوش جبنة موتزاريلا وندخلها الفرن نفتح عليها الشواية الجبنة تسيح وتاخد لون والجبنة طبعا إختيارى لو مش موجودة هنفتح الشواية من فوق علشان البشاميل ياخد لون ونطلعها هنسيبها تبرد و ندخلها التلاجة على الأقل ساعة علشان تمسك نفسها وإحنا بنقطعها وبعدين نقدمها وبالهنا و الشفا
18/04/2020
أحلى ساندوتش تفطروا بيه الصبح أحلى من ماك مافن بالبيض بتاع ماكدونالدز 🥯🍔
هنجيب عيش كيذر نقسمه بالنص وندهن جزء بالمايونيز والجزء التانى بأى نوع جبنة موجود ونحط عالجزء اللى تحت خس كابوتشا وعليه شريحة بيض أنا بعمله فى الميكرويڤ بجيب الطاجن الصغير بتاع أم على وأدهنه بالزيت وأكسر فيه بيضة وعليها رشة ملح و فلفل إسود وشوية جبنة موتزاريلا وأدخله الميكرويڤ وأظبطه على دقيقة و 30 ثانية ولو مفيش ميكرويڤ نقلى البيض عادى فى الطاسة ونقطعه دواير
وبعدين نحط عالبيض شرايح فلفل رومى و كاتشب وشريحة كبيرة لانشون وشريحة جبنة شيدر لو موجودة وبالهنا و الشفا
17/04/2020
أسهل حواوشى هتعملوه فى البيت رووووعة
إفتحوا الصور مكتوب عليها الطريقة
إدخلوا عالصفحة شوفوا باقى الوصفات
ده تلخيص المقادير وطريقة العمل للناس اللى طلبت تاخد سكرين شوت للوصفة كلها على بعض
المقادير
لحمة مفرومة طبعا الكمية زى ما تحبوا أنا عملت نص كيلو
بصلة كبيرة مبشورة
فلفل رومى متقطع ويكون كميته نص كمية اللحمة يعنى النص كيلو لحمة عليها ربع كيلو فلفل وهكذا لأنه بيدى طعم جميل للحواوشى
معلقتين كبار سمنة سايحة
هنحط المقادير كلها على بعض ونحط التوابل
ملح ، فلفل إسود ، كمون ، كزبرة ناشفة ، بابريكا ، قرفة ، قرنفل ، حبهان بودر ونعجنهم كويس مع بعض بإدينا ونشيل خلطة اللحمة دى فى التلاجة ترتاح ساعة أو أكتر
هنجيب عيش الحواوشى أو عيش بلدى عادى و طبق هنحط فيه سمنة على زيت هنحط عليهم رشة ملح و فلفل إسود
هنحشى الرغيف ونفرد اللحمة كويس جواه بس متبقاش طبقة اللحمة تخينة علشان تستوى كويس فى الفرن و متاخدش وقت بعد ما نخلص كمية العيش اللى عندنا حندهن كل رغيف بخليط السنمة عالزيت من الناحيتين بالفرشاة هندخل الحواوشى الفرن على درجة حرارة 200 متسخن قبلها بربع ساعة وهنحط ورق فويل على الشبكة ونحطه الأول على وشه لأن وش العيش من فوق بيبقى خفيف وعايزينه يشد شوية الأول بعد 10 دقايق هنقلب العيش عالناحية التانية ونسيبه ربع ساعة يعنى كده أخد فى الفرن 25 دقيقة مش بياخد وقت فى السوا
لو بتحبوه مقرمش شوية هنطلعه من الفرن ونقدمه على طول لكن لو بتحبوه طرى هنطلعه ونحطه فى صاج أو صينية كبيرة ونغطيه بورق فويل أو ورق زبدة ونسيبه ربع ساعة هيطرا ونقدمه
إن شاء الله كل إسبوع هنزلكم منيو جديد علشان منحتارش كل يوم فى عمل الأكل وكل إسبوع هعدله و هاحفظه فى ألبوم Menu علشان لو حد عايز أفكار للأكل يقدر يرجعله
منيو الإسبوع
1/صينية بطاطس بالفراخ ورز بالشعرية وسلطة
" نعمل كمية علشان يفضل لتانى يوم "
2/باقى البطاطس والفراخ
3/كشرى مصرى
4/كباب حلة وسلطة وعيش أو رز أبيض
" طريقتة عالصفحة "
5/ طاجن لسان عصفور بالكبد والقوانص وبطاطس محمرة وسلطة
6/بيتزا زى ما نحب " سجق ، خضار ، فراخ " وشيبسى ومخلل
" طريقتها عالصفحة "
7/ سمك أى نوع ورز وسلطة و طحينة
16/04/2020
أسهل وأسرع كب كيك فى الخلاط محشى بالكريمة عملت
28 قطعة ببيضة واحدة إفتحوا الصور مكتوب عليها الطريقة
إدخلوا عالصفحة شوفوا باقى الوصفات
ده تلخيص المقادير وطريقة العمل للناس اللى طلبت تاخد سكرين شوت للوصفة كلها على بعض
المقادير
بيضة
ڤانيليا
كوب لبن
كوب سكر
نص كوب زيت
معلقة كبيرة خل
كوب ونص دقيق
نص كوب كاكاو خام
رشة ملح
معلقة كبيرة بيكنج بودر
مهم إن تكون كل المقادير بنفس الكوباية اللى عندك
هنحط اللبن و السكر والزيت والبيضة والڤانيليا ومعلقة الخل فى الخلاط ونضربهم مع بعض كويس ونصبهم فى بولة
هننخل الدقيق و الكاكاو الخام و البيكنج بودر ورشة ملح وننزلهم على الخليط
هنقلبهم مع بعض كويس بالمضرب السلك
هنجيب صينية الكب كيك ونحط فيها الورق ونصب فيها خليط الكيك أنا بحط بمعلقة الآيس كريم علشان أعرف أتحكم فيه ونراعى إننا نحط لغاية نص الورقة علشان لسه هيتضاعف لما يدخل الفرن
هندخل الصوانى الفرن على درجة حرارة 180 متسخن قبلها بربع ساعة وقعد بالظبط ربع ساعة تابعوه بعد عشر دقايق و إختبروه بخلة أسنان علشان كل فرن غير التانى
بعد الصوانى ما تخرج من الفرن نسيبها تبرد خالص علشان نذوق الكب كيك بتاعنا
أنا ضربت كوب إلاربع كريم شانتيه مع معلقة كبيرة كريم باسترى وكوب إلا ربع لبن متلج ومعلقتين كبار سكر بودر وممكن يتضرب بماية بيبقى جميل برده هنفرغ الكب كيك بمعلقة صغيرة ونحشيه بالكريمة ونغطي الكريمة بالكيك اللى فرغناه هنذوق بقى براحتنا نعمل وردات أو حلزونى
نحط عالكريمة شوية شوكلت شيبس
نحط صوص شيكولاتة ونعمل عليه شكل بالكريمة
نعمل شوية كريمة بالشيكولاتة نحط عليهم معلقة كاكاو أو صوص شيكولاتة ونزين بيهم
أى فاكهة عندك أو بسكوت ذوقى بيه هيبقى شكله جميل
15/04/2020
كفتة الفراخ الرهيبة جميلة جدا وسهلة مبتاخدش وقت هنعملها عالبوتجاز من فوق من غير الفرن إفتحوا الصور مكتوب عليها الطريقة
إدخلوا الصفحة شوفوا باقى الوصفات
ده تلخيص المقادير و طريقة العمل للناس اللى طلبت تاخد سكرين شوت للوصفة كلها على بعض
المقادير
نص كيلو فراخ مفرومة وطبعا الكمية زى ما تحبوا
بصلة كبيرة مبشورة ونعصرها كويس من الماية بتاعتها
هنعمل سائل التلميع للكفتة
طبق هنحط فيه ماية البصل وعليها معلقة كبيرة صلصة ومعلقة كبيرة زيت و رشة ملح و فلفل إسود
هنحط الفراخ المفرومة فى الكبة والبصل وعليها ملح وفلفل إسود وبابريكا وبهارات فراخ وحبهان بودر ومعلقتين كبار دقيق ومعلقة كبيرة سمنة سايحة ومعلقة صغيرة مستردة ونضربهم كويس كده كل المقادير إتخلطت مع بعض
هنصبع الكفتة على خلة الشيش ونقفل كويس الكفتة من الناحيتين أولها وآخرها منسبهاش مهوية علشان متفكش وهى بتستوى
بعد ما نخلص كل الكمية هنسيبها ترتاح فى التلاجة نص ساعة وبعدين نسويها
هنجيب طاسة تيفال علشان الكفتة متلزقش فيها ونحط فيها شوية زيت ونرص الكفتة
هنخليها تاخد صدمة من كل ناحية وبعدين نهدى النار علشان تستوى كويس
هنجيب فرشة وندهن الكفتة بماية البصل والصلصة بتخلى الكفتة طرية ومش ناشفةلأن فى ناس بتشتكى إن كفتة الفراخ بتنشف منهم وبتخلى طعمها رووعة وكل ما نخلص ناحية نقلب عالناحية التانية وندهنها وبعد ما تستوى هنحط فحمة فى ورقة فويل نكون مولعين عليها أول ما نبتدى نعمل الكفتة ونحطها فى نص الصينية ونحط عليها معلقة زيت ونغطى الصينية وبالهنا و الشفا
14/04/2020
البوريك التركى باللحمة المفرومة اللى قالب الدنيا عالفيس و اليوتيوب إفتحوا الصور مكتوب عليها الطريقة
إدخلوا عالصفحة شوفوا باقى الوصفات
ده تلخيص المقادير و طريقة العمل للناس اللى طلبت تاخد سكرين شوت للوصفة كلها على بعض
المقادير
لفة جلاش نص كيلو
لحمة مفرومة متعصجة
المكونات :
بيضة
نص كوب لبن
نص كوب زيت على سمنة أو زبدة
معلقة كبيرة دقيق
نص معلقة صغيرة بيكنج بودر
دى تشريبة الجلاش وهنحط عليها رشة ملح و فلفل إسود
هنفرد ورقة جلاش ونسقيها بالتشريبة كويس وكل رول هنلفه هياخد 3 ورقات جلاش
كده عملنا 3 ورقات جلاش وبين كل ورقة والتانية هنسقى بالتشريبةهنحط اللحمة المفرومة على طرف الورقة ولو الصينية اللى عندك كبيرة ممكن تحطى اللحمة بطول ورقة الجلاش هنلفه رول هنحضر صينية مدهونة بالسمنة كويس ونحط فيها الرول وبعد ما نخلص الكمية كلها
هنقطع الرولات صوابع وهيتبقى عندنا تشريبة هنحطها عالجلاش وندهنها كويس ونسيبها فى التلاجة ساعتين تتشرب كويس
هنطلعها من التلاجة ونرش عليها شوية سمسم وده إختيارى وندخل الصينية الفرن على درجة حرارة 200 متسخن قبلها بربع ساعة هنتابعها بعد ما تعدى نص ساعة وأول ما تاخد لون من تحت هنطفى الفرن ونشغل الشواية تاخد لون من فوق ونطلعها هنغطى الصينية بورق فويل نص ساعة علشان ترتاح وبعدين تتقدم
إيه رأيكم أنزل كل إسبوع منيو للأكل علشان منحتارش ونسأل السؤال بتاع كل يوم هناكل إيه بكره 🤔🤔
وكل إسبوع هعمل تعديل للمنيو
13/04/2020
قوارب البطاطس باللحمة المفرومة تعملوها جنب الأكل هتعجبكم جدا إفتحوا الصور مكتوب عليها الطريقة
إدخلوا عالصفحة شوفوا باقى الوصفات
ده تلخيص المقادير و طريقة العمل للناس اللى طلبت تاخد سكرين شوت للوصفة كلها على بعض
هنجيب كمية البطاطس اللى هنستخدمها زى ما نحب ونغسلها كويس هنقطع ورق فويل على حسب عدد البطاطس ونحط على كل واحدة رشة ملح ومعلقة كبيرة زيت وندهن البطاطس بإدينا من كل ناحية بالزيت
هنلفهم بالفويل ونحطهم فى صينية وندخلها الفرن على درجة حرارة 200 متسخن قبلها بربع ساعة ونسيبها حوالى ساعة وبعدين نختبرها بخلة أسنان نشوفها إستوت ولا لسه بعد البطاطس ما تستوى هنشيلها من الفويل ونسيبها تبرد شوية بس متبردش خالص علشان لما نهرسها تتهرس بسهولة وتبقى كريمى هنقسم كل واحدة بالنص ونفرغها بمعلقة صغيرة زى ما موجود فى الصور وبعد ما نفرغ كل كمية البطاطس هنحط عليها ملح و فلفل إسود وبابريكا ورشة كركم ومعلقة كبيرة زبدة ونهرسهم مع بعض كويس هنحط عالبطاطس اللحمة المفرومة وممكن تحطى أى حاجة تانية ممكن بسطرمة وزيتون أو فراخ مفرومة وممكن متحطيش حاجة خالص وتكتفى بالبطاطس طعمها لوحده جميل جدا هنخلط البطاطس واللحمة ببعض كويس هنحشى بيهم البطاطس المفرغة هنحط عليها جبنة موتزاريلا من فوق وندخلها الفرن ونفتح عليها الشوايةالجبنة تسيح وتاخد لون ونطلعها وبالهنا و الشفا
13/04/2020
الشيش طاووق الخطير جربوه ومش هتندموا إفتحوا الصور مكتوب عليها الطريقة
إفتحوا الصفحة شوفوا باقى الوصفات
ده تلخيص المقادير و طريقة العمل للناس اللى طلبت تاخد سكرين شوت للوصفة كلها على بعض
المقادير
طبعا الكمية زى ما تحبوا أنا عملت 2 أوراك فراخ مخلية وممكن بالصدور بس هى الأساس بتاعها تتعمل بالأوراك لأنها أطرى ومبتاخدش وقت فى السوا
تانى حاجة التتبيلة اللى هننقع فيها الفراخ
ربع كوب لبن أو معلقتين كبار زبادى
ربع كوب زيت
معلقتين كبار معجون طماطم
ليمونة
معلقة صغيرة مستردة
معلقة صغيرة صويا صوص
ملح ، فلفل إسود ، بابريكا ، بصل بودر ، توم بودر ، حبهان بودر ، بهارات فراخ
هنقطع الفراخ قطع متوسطة و هننقعها فى التتبيلة حوالى ساعتين أو تلاتة وطبعا كل ما قعدت أكتر هيبقى طعمها أحلى وممكن من قبلها بيوم
هنحضر الخضار اللى هنحطه مع الفراخ زى مانحب بصل ، فلفل رومى ، طماطم ، فلفل ألوان وفى ناس بتحط مشروم
وهنحط خلة الشيش فى ماية قبل ما نستخدمها بربع ساعة علشان متتحرقش فى الفرن هنحط الخضار والفراخ فى خلة الشيش بالترتيب اللى نحبه وبعد ما نخلص الكمية كلها هنجيب صينية ونحط فيها ورق فويل ونرص فيها الشيش طاووق وندخلها فرن متسخن قبلها بربع ساعة على درجة حرارة 200 ولما تطلع من الفرن نكون مولعين فحمة ونحطها فى ورقة فويل ونحط عليها شوية زيت ونغطى الصينية وبالهنا و الشفا
12/04/2020
دستة جاتوه ببيضتين زى بتاع المحلات إفتحوا الصور مكتوب عليها الطريقة
إدخلو عالصفحة وشوفوا باقى الوصفات
ده تلخيص المقادير و طريقة العمل للناس اللى طلبت تاخد سكرين شوت للوصفة كلها على بعض
المقادير
بيضتين وهنفصل الصفار عن البياض
ڤانيليا
نص كوب سكر
نص كوب ماية
كوب و نص دقيق
معلقة كبيرة بيكنج بودر وياريت يكون كيك شيف
رشة ملح
معلقة كبيرة خل
هنضرب بياض البيض مع رشة ملح ونعمله مارينج ويبقى قوامه زى الكريم شانتيه ونتأكد إن البولة و المضرب ناشفين خالص مفيش ولا نقطة ماية علشان المارينج ميبوظش
هنضرب فى الخلاط صفار البيض مع السكر ونص كوب الماية والڤانيليا ومعلقة الخل ونتأكد إن السكر داب ونحطهم فى بولة هننزل عليهم بالدقيق و البيكنج بودر ورشة الملح
هنقلبهم بالمضرب السلك مع بعض كويس لغاية أما الدقيق يختفى هنضيف المارينج شوية شوية مش كله مرة واحدة يعنى أنا ضيفت كمية المارينج على أربع مرات ونقلب بإسباتيولة بالراحة من تحت لفوق علشان الهوا ميروحش من الكيكة هنحط الخليط فى صينية متبطنة بورق الزبدة ولو مفيش ورق زبدة ندهن زيت ونبطن بالدقيق ونخبطها خبطتين عالرخامة وندخلها الفرن على درجة حرارة 180 متسخن قبلها بربع ساعة
هى أخدت بالظبط نص ساعة بس برده كل فرن بيختلف عن التانى بعد نص ساعة إختبريها بخلة ولما تخرج من الفرن هنسيبها تبرد خالص وبعدين ونطلعها من الصينية ونقسمها نصين وممكن تسبيها فى التلاجة كام ساعة قبل ما تشتغلى فيها
هنجيب نص كوب لبن أو أى حاجة عندك ممكن سبرايت أو سيرب حلويات المهم نسقى الكيكة لأن مفيهاش أى مادة دهنية
أنا ضربت كوب كريم شانتيه عليه معلقتين كبار كريم باسترى و3 معالق كبار سكر بودر وكوب لبن متلج وممكن بالماية برده بيبقى جميل
هنوزع الكريم شانتيه ونفرده عالكيكة كويس و نحط عليها طبقة الكيك التانية ونسقيها باللبن ونحط عليها الكريم شانتيه
هنبتدى نذوق أنا حطيت صوص شيكولاتة بالشكل
جبت السكينة المشرشرة ومشيت بيها عالصوص طالع نازل علشان تعمل شكل الزجزاج زى اللى موجود فى الصور
هنساوى الكيك من الحروف وهقولكم عملت إيه بالأطراف دى
قطعت الأطراف قطع صغيرة ورصيتهم فى الكاس وعليهم صوص شيكولاتة و شوكليت شيبس
قطعت الجاتوه على 12 قطعة وذوقتهم بكريم شانتيه و كريز وممكن نعمل 6 قطع عليهم صوص شيكولاتة و 6 قطع التانيين نذوقهم بأى شكل تانى علشان يبقى الجاتوه مشكل
وكده بقى عندنا دستة جاتوه وكمان كوبايتين جاتوه مخدتش وقت و بمكونات بسيطة وأحلى من المحلات كمان
12/04/2020
البيتزا الرهيبة هقولكم كل التكات بتاعتها العجينة ازاى تبقى هشة ، أسهل طريقة للصلصة ، تنقلوا العجينة ازاى بسهولة للصينية بعد ما تتفرد ، إمتى نحط الجبنة الموتزاريلا علشان تبقى سايحة وبتشد ، وقت السوا إفتحوا الصور مكتوب عليها الطريقة
إدخلوا عالصفحة وشوفوا باقى الوصفات
ده تلخيص المقادير و طريقة العمل للناس اللى طلبت تاخد سكرين شوت للوصفة كلها على بعض
أول حاجة هنجيب ربع كوباية ماية نحط فيها معلقة صغيرة سكر ومعلقة كبيرة خميرة علشان نعمل إختبار الخميرة ونتأكد إنها شغالة
هنجيب بولة ونحط فيها كوبايتين دقيق ، معلقة كبيرة زبادى ، معلقتين كبار زيت ، معلقة كبيرة لبن بودر ، معلقة كبيرة خل ، رشة ملح ، زعتر ، بصل بودر ، توم بودر ، نص معلقة صغيرة بيكنج بودر
المقادير دى عملت بيها صينية كبيرة لو عايزة تعملى أكتر من صينية يبقى تضاعفى الكمية
أول حاجة هنقلب المقادير مع بعض ونفركها كويس علشان نتأكد إن المقادير كلها دخلت فى بعض
بعد كده هننزل بالخميرة شوية شوية لغاية أما العجينة تلم معانا بعد ما العجينة لمت معانا والبولة بقت نضيفة
هنحطها على الرخامة أو طرابيزة المطبخ ونفضل نعجن فيها حوالى 10 دقايق لأن كل أما إتعجنت كويس هتلاقى العجينة تحفة لما تستوى
العجينة خلصت هنحط عليها معلقة كبيرة زيت وندهنها بيها ونحطها فى البولة ونغطيها و نسيبها تخمر فى مكان دافى
هنحضر الحشوة ودى طبعا زى ما تحبوا أنا عملتها نص فراخ ونص سجق وشرايح زيتون و فلفل شرايح و جبنة موتزاريلا وصلصة الطماطم هقولكم على أسهل طريقة تعملوا بيها صلصة البيتزا
معلقة كبيرة معجون طماطم و معلقة كبيرة كاتشب وعليهم رشة ملح وفلفل إسود و رشة زعتر وتوم بودر وبصل بودر ولو مفيش كاتشب يبقى نحط معلقتين كبار معجون طماطم
بعد ما العجينة خمرت هنرش دقيق عالمكان اللى هنفرد عليه ونرش على العجينة من فوق علشان متلزقش فى النشابة ونفرد العجينة ونحطها فى الصينية
دى طريقة سهلة بنقل بيها العجينة للصينية بلفها عالنشابة وأحطها عالصينية
هندهن الصينية بشوية زيت ونفرد فيها العجينة و نخرمها بالشوكة علشان متتنفخش فى الفرن
هنحط عليها الصلصة أنا بفردها بالفرشاة بتبقى سهلة وفى نفس الوقت طبقة الصلصة بتكون رقيقة
نحط الحشوة بتاعتنا زى ما نحب بس مش هنحط الجبنة الموتزاريلا دلوقتى
هنسخن الفرن على درجة حرارة 200 قبل ما نحط البيتزا بربع ساعة وهنحط الصينية على أرضية الفرن 5 دقايق علشان العجينة تتشمع من تحت
بعد كده هنرفعها عالشبكة فى نص الفرن ونسيبها 10 دقايق
بعد كده هنطلع البيتزا ونحط عليها الجبنة الموتزاريلا وندخلها الفرن تانى 5 دقايق علشان الجبنة تسيح ونطلعها يبقى كده أخدت تلت ساعة فى الفرن ولو صينية البيتزا أصغر هتاخد وقت أقل فى السوا وبالهنا والشفا
Videos (show all)
