Ms/ Eman Omar
Contact information, map and directions, contact form, opening hours, services, ratings, photos, videos and announcements from Ms/ Eman Omar, Tutor/Teacher, .
16/10/2023
السلام عليكم♥️
مساء الخير يا صديقي العزيز👋
طبعا قاعد متذنب جنب الشاحن عشان الموبايل هيفصل 😕😂
ايه دا تليفونك مشحون؟! غريبه 😂
المهم يعني عمرك جيت تحط الفون ع الشحن وإيدك لمست الشاحن ف اتكهربت؟
لأ طبعا الشاحن مش بيكهرب أص....... إيه دا هو ازاي الشاحن بيتوصل ف الكهربا ومبيكهربش
أكيد كلنا قبل كدا لمسنا الشاحن كتير جدا وعمره ما كهربنا ولا زعلنا ف حاجة
عايز تعرف ليه؟
تعالي أقولك
بص يا سيدي
هسألك سؤال الأول...
هو ليه مش بنشحن الفون بسلك عادي؟ نجيب أي فيشة نوصلها بالكهربا ويكون في فتحه ف الشاحن نحط فيها السلك دا ف يشحن ليه لازم نصرف ونكلف ونجيب شواحن😏
طبعا الكلام دا مينفعش لإن الشاحن مصنوع عشان وظيفتين
أول وظيفة هو إنه يحول التيار المتردد لتيار مستمر
التيار الكهربي اللي عندنا ف البيت دا أصلا عبارة عن تيار متردد والفون مينفعش يدخله تيار متردد لإنه هيتحرق هو محتاج تيار ثابت يملا البطارية
ف راس الشاحن بيكون فيها محول صغير كدا يحول التيار المتردد دا لتيار مستمر
تاني وظيفة هي إنه يقلل الجهد الكهربي
الجهد الكهربي العادي اللي موجود عندنا ف البيوت بيكون 220 فولت ودا كتير أوي بطارية الفون متستحملش كل دا
ف تاني وظيفة لراس الشاحن هي إنها تقلل الجهد دا تخليه حوالي من 5 ل 12 فولت بس علي حسب احتياج بطارية الفون
وبالتالي بقي يبدأ الجهد الصغير دا يخرج من رأس الشاحن ويمشي ف الوصلة بتاعته ويخرج من المخرج اللي بيتحط ف الفون
إيه دا طب مانت بتقول اهو برضو إنه بيخرج منه كهربا
ليه مبنتكهربش بقي؟
يا سيدي انت عايز تتكهرب وخلاص 😂
استني اشرحلك...
أي مادة ف الدنيا بيكون ليها مقاومة كهربية
يعني بتقاوم مرور التيار الكهربي جواها وبتحاول تمنعه
في مواد بقي مقاومتها بتكون كبيرة ومواد تانية مقاومتها صغيرة
(لو عايز تعرف يعني ايه مقاومة بالتفصيل ارجع للبوست اللي قبل اللي فات)
المهم يعني جسمك كمان زي أي مادة له مقاومة يعني بيقاوم مرور التيار الكهربي جواه
أحيانا بيقدر يمنع التيار إنه يمر ودا ف حالة إن التيار يكون ضعيف
لكن لو التيار أقوي مقاومة الجسم مبتقدرش تمنعه وبيقدر يمر ف جسمك ووقتها بيسبب مشاكل كبيرة ممكن توصل للموت ف لحظات
يبقي انت كدا استنتجت أكيد ليه الشاحن مش بيكهرب
أكيد لإن التيار الكهربي اللي بيخرج منه ضعيف
صح برافو عليك انت كدا فهمت
التيار الكهربي بتاع الشاحن فعلا ضعيف جدا لإنه جهده بيكون ضعيف حوالي من 5 ل 12 فولت زي ما قولتلك
ودا رقم قليل جدا وبالتالي جسمك بيقدر يقاوم دخوله
طيب هي مقاومة الجسم دي قيمتها كام؟
هي بتختلف من جسم لجسم علي حسب سمك الجلد لكن بشكل عام متوسط مقاومة جلد الإنسان البالغ بتكون ما بين 1000 إلي 100000 أوم
كمان مقاومة الجسم دي بتختلف وقيمتها بتتغير علي حسب درجة رطوبة أو جفاف الجلد
يعني كل ما الجسم رطوبته كانت عالية يعني كان مبلول مثلا ف مقاومته بتكون أقل وبالتالي بيوصل الكهربا بشكل أكبر
عشان كدا ف العادي لو إيديك مبلولة وانت بتعمل اي حاجة ليها علاقة بالكهربا ف انت عرضة أكتر انك تتكهرب
وكمان علشان كدا اللسان مقاومته بتكون قليلة جدا مقارنة بباقي الجسم لإنه دايما بيكون دايما رطب بالإضافة لكونه أوعية دموية وأعصاب كتير ودا بيقلل مقاومته ويخليه يوصل أكتر
عشان كدا لو انت حطيت لسانك على الشاحن وهو ف الكهربا هتحس بلسعة الكهربا بالفعل لكن مش هتتكهرب جامد لإن زي ما قولتلك الجهد الخارج منه ضعيف أقل من مقاومة جسمك
و ع فكرة في ناس لو شاحنها مش بيشحن وعايزين يتأكدو هو بيمر فيه كهربا ولا لا بيختبروه بلسانهم
بس متعملش كدا طبعا لإن دا غلط وعشان متعرضش نفسك للخطر
وبما إننا اتكلمنا عن الشاحن ف تعالي أقولك نصيحة مهمه جدا
أغلبنا بيسيب الشاحن ف الكهربا حتي لو مش بيشحن بيه ودا غلط جدا لإن لو حصل تغيير ف جهد الكهربا اللي ف البيت الشاحن هينفجر وممكن يسبب حريقة لا قدر الله
كمان لما تسيب الشاحن وقت كبير ف الكهربا دا بيقلل عمره الإفتراضي ويخليه يبوظ أسرع
ف قوم شيل الشاحن من الكهربا لو مش بتشحن دلوقت يا صديقي
استني قبل ما تقوم اعمل لايك وفولو وشير للبوست واستني البوست الجي
#فيزياء
14/10/2023
أهلا بيك يا صديقي منور الدنيا كلها💡
بس مش انت لوحدك اللي منور ع فكرة
اللمبة اللي فوقك كمان منورة
أيه دا دي منورة فعلا طب مانا عارف
مانا عارفه إنك عارف 😂
بس تعرف هي منورة ازاي؟
طب تعرف إن من حوالي اتنين مليون سنة مكنش فيه أي نور غير الشمس والقمر والبرق
بعدها بحوالي 100 ألف سنه اكتشفو النار وبقو ينورو عن طريقها وبعدها عملو مصابيح زيتيه بتشتغل بالنار برضو
المهم يعني بعدها بوقت طوييييل جدا
جه عالم من العلماء وعمل أول فكرة لمصباح كهربي.....
ودا عن طريق إنه جاب قطبين من الكربون واحد موجب وواحد سالب ووصلهم بكهربا ف لاحظ إن الشحنات الكهربية بتعدي بينهم ف الهوا ودا بيعمل ضوء كدا شبه البرق
لكن الضوء دا مكنش مستقر ولا ثابت بيخطف بس كدا زي البرق بالظبط نفس فكرة البرق
بعدها بدأو يعملو كدا برضو بس غلفو القطبين دول بمصباح زجاجي عشان يحميه من الهوا لكن برضو المصباح مكنش بينور غير وقت صغير جدا وبعدها يطفي
بعد عدد مش قليل من التجارب جه العالم توماس أديسون واخترع أول مصباح كهربي بينور لوقت كبير شبه اللي موجود حاليا دا
ومن وقتها والمصباح بتاع أديسون عمال يتطور لكن الفكرة واحدة
إيه بقي الفكرة؟
الفكرة كلها هي تحويل الطاقة الكهربية لطاقة ضوئية
بس ازاي دا بيتم؟
أول حاجة المصباح دا بيكون له قاعدة معدنية عشان تدخله الكهربا من الدايرة.....
القاعدة دي متواصلة بسلكين جامدين شوية اسمهم طرفي التوصيل
الكهربا اللي هي عبارة عن إلكترونات أصلا بتمشي في الأسلاك بتاعت الدايرة وتعدي في القاعدة المعدنية وتروح لطرفي التوصيل
طرفي التوصيل بقي بيكون متوصل بينهم سلك كدا رفيع خالص اللي هو بينور دا عارفه؟
بينور ازاي بقي؟
السلك دا إسمه الفتيلة وبيكون مصنوع من مادة اسمها التنجستين
اشمعنه التنجستين بالذات ليه مش نحاس أو حديد أو أي حاجة تانية ؟
السبب يا سيدي إن مادة التنجستين دي مقاومتها عالية جدا اول ما الإلكترونات بتعدي جواها بتفضل تخبط ف الذرات بتاعتها لحد ما جزيئاتها تسخن جدا جدا تبقي حوالي 2700 درجة مئوية و ممكن توصل كمان لدرجة حرارة 3000 درجة مئوية
ومن كتر السخونية دي الفتيلة بتتوهج وتطلع ضوء ودي ظاهرة فيزيائية معروفه بإسم الإشعاع الحراري
طيب هو ليه السلك دا لما سخن أوي لدرجة دي مش انصهر مثلا؟
ماهي دي بقي أكبر ميزة ف التنجستين إن درجة انصهارها عالية جداااااااااااا بتوصل ل 3422 درجة مئوية
يعني مش بينصهر إلا لما درجة الحرارة تكون 3422 درجة
كمان معامل التمدد بتاعه قليل جدا يعني مهما سخنته مش بيتمدد إلا بدرجة بسيطة جدا
ودا اللي خلاه أنسب حاجة للمهمه دي
لكن طبعا لو بدلنا التنجستين دا بنحاس النحاس هيسيح ويتمدد ومش هينور
الفتيلة بقي وطرفي التوصيل والحاجات دي كلها بتكون محطوطة ف علبة زجاجية
بس العلبة الزجاجية دي لازم تكون مفرغة تماما من أي هوا وبدل الهوا بيحطو غاز خامل زي الأرجون أو النيون
تمام بس ليه كدا؟ ليه مش بيسيبو جواه هوا وخلاص؟
هما أصلا حاطين العلبة الزجاجية مخصوص عشان يعزلوه عن الهوا
لإنه لو موجود هوا ذرات الأكسجين هتفضل تصطدم بذرات الفتيلة والفتيلة هتتقطع يعني المصباح يتحرق
وكمان الأكسجين ممكن يخلي الفتيلة تتأكسد وبالتالي يتلف برضو المصباح
عشان كدا بيحطو غاز خامل لإنه بيكون قاعد ف حاله مبيتفاعلش مع حد ولا له دعوة بأي حد
بس كدا يا صديقي المصباح بينور بالطريقة البسيطة دي
بس لو انت وصلت لحد هنا يبقي انت منور فعلا ومش محتاج مصباح أصلا 😂❤️
لايك وفولو بقي واستني البوست الجي
#فيزياء
12/10/2023
صباح الخير يا صديقي👋
ركبت مواصلات النهارده؟
ليه الطريق بيكون فيه مطبات؟
عشان ترخم علينا 😂
لأ أكيد مش بيحطوها رخامة يعني 😂 😂 😂
قد ماهي رخمة قد ما لها فوايد
فوايدها إنها بتقلل سرعة العربيات عشان نتجنب الحوادث
عارف نفس الفكرة دي هي هي فكرة المقاومة الكهربية اللي بتكون في الدايرة
رغم إنها رخمة بتعمل مشاكل إلا إن مفيش دايرة كهربية بتكمل من غيرها
ف تعالي أشرحلك بطريقة بسيطة كدا يعني إيه مقاومة أصلا وليه لازم الدايرة الكهربية يكون فيها مقاومة؟
مبدأيا مقاومة يعني ممناعة حاجة بتقاوم حاجة أو بتحاول تمنعها
ف المقاومة دي هي حاجة ف الدايرة الكهربية بتقاوم وتحاول تمنع مرور التيار الكهربي وتعطله
زي مانت عارف إن التيار الكهربي عبارة عن شوية إلكترونات بيجرو جوا مادة موصلة..... سلك من النحاس مثلا
وطبعا الإلكترونات دي بتكون ماشية بسرعه جدا وبالتالي دا ممكن يسبب تلف الدايرة كلها ولو في لمبة أو أي جهاز ممكن يتحرق..........
وعلي الرغم من إن السلك نفسه بيكون ليه مقاومة لإن الإلكترونات وهي معدية بتخبط ف الذرات بتاعته إلا إن مقاومة السلك مهما كانت بتبقي ضعيفه لإن السلك كدا كدا بيكون من مادة موصلة للتيار
وبالتالي كان لازم يكون في حاجة تانية تقلل شوية من سرعة التيار الكهربي وتنظم سرعته بحيث نحافظ على الأجهزة بتاعتنا ونتحكم ف التيار المعدي
ودا بقي دور المطب.... قصدي المقاومة 😂
بتعطل التيار الكهربي شوية وتقلل سرعة الإلكترونات وتخلينا نقدر نتحكم في شدة التيار الكهربي اللي ماشي في الدايرة
طيب المقاومة دي عبارة عن إيه أو بتتصنع ازاي؟
المقاومة بتكون عبارة عن عنصر أو مادة توصيلها الكهربي قليل شوية وممكن تكون شبه عازلة
بحيث إنها تعطل التيار..... والإلكترونات تعدي منها بالعافية كإنك معدي من شارع زحمة كدا أو من مكان ضيق أووووي ف دا بيقلل جدا من سرعتك طبعا
برضو التيار لما بيمر ف المقاومة بيتعطل وسرعته تقل يعني تقل شدة التيار
طيب لو مفيش مقاومة ف الدايرة؟
التيار هيمشي بسرعة جدا جدا ماهو مفيش حاجة ف طريقه
طريقه سالك....
وبالتالي هيسبب تلف للدائرة كلها
لكن بوجود المقاومة أقدر اتحكم ف شدة التيار اللي ماشي ف الدايرة علي حسب حاجة الجهاز يعني لو جهاز محتاج كهربا قليلة أحط قبله مقاومة كبيرة عشان تعطل التيار ف يقل
لو جهاز محتاج كهربا أكتر أحط مقاومة أقل عشان التيار يبقي أسرع شوية
والمقاومة عندي نوعين
مقاومة ثابته يعني قيمتها مبتتغيرش بتعيق التيار بدرجة ثابته يعني لو حبيت أغير المقاومة هكون مضطرة أشيلها خالص وأحط واحدة تانية
ومقاومة متغيرة اللي بنقول عليها ريوستات
المقاومة التمغيرة دي أقدر أقلل قيمتها أو أزودها بسهولة بدون ما اضطر اشيلها من الدايرة وأغيرها
طيب إيه بقي اللي بيأثر علي المقاومة دي يزودها أو يقللها؟
أولا نوع المادة اللي المقاومة مصنوعة منها في مواد مقاومتها كبيرة ومواد مقاومتها صغيرة المواد اللي مقاومتها كبيرة جدا زي الكربون مثلا لكن المواد اللي مقاومتها صغيرة زي الحديد مثلا
تاني حاجة بتأثر علي قيمة المقاومة هي طول السلك
كل ما طول السلك يزيد تزيد المقاومة يعني أنا لو عايزة أعمل مقاومة كبيرة أطول في السلك ف مقاومته تزيد
تالت حاجة هي مساحة مقطع السلك دا
بالبلدي يعني السلك دا واسع ولا ضيق كل ما السلك يكون واسع الإلكترونات تعدي براحتها بدون عطل ف المقاومة تكون قليلة
والعكس كل ما السلك يكون رفيع وضيق الإلكترونات تخبط أكتر ف ذراته وتعدي منه بصعوبة ف يكون مقاومته أعلي
ف النهاية أحب أقولك إن يمكن يكون طريقك فيه مصاعب ومطبات لكن مش بالضرورة تكون المطبات دي حاجة وحشة ممكن جدا المطبات دي تكون سبب ف نجاحك والجدع بجد اللي يقدر يستغل المطبات دي لصالحه وبدل ما توقفه يتعلم منها ♥️
وفقك الله يا صديقي ♥️
لو عجبك البوست لايك وشير واستني البوست الجي
#فيزياء
11/10/2023
مساء الخير يا صديقي👋
أكيد دلوقت قاعد بتشرب شاي😂
أو بتفكر تعمل شاي 😂
أصلا أول حاجة بتفكر تعملها الصبح هي إنك تشرب كوباية شاي
وطبعا بدل ما تولع نار وتسخن مية وكل الحوار دا ف بتقرر إنك هتستخدم الكاتل أسهل وأسرع
أكيد طبعا أنا مش جية أكلمك عن الشاي لإني أصلا مبشربوش😂
أنا جية أكلمك عن الكاتل نفسه يا صديقي (سخان الشاي)
أكيد وانت واقف مستني الكاتل يغلي المية
فكرت ولو مرة هو ازاي الكاتل دا بيسخن المية ويغليها بدون نار؟
حاجة غريبة شوية فعلا وحقك تتساءل
ف أنا جية كالعادة أجاوبك عن التساؤل دا بشكل بسيط ولذيذ.......
تعالي احكيلك الحكاية باختصار.....
ف يوم من الأيام العالم جول لاحظ إن لما بيمر تيار كهربي ف سلك بيخلي السلك دا يسخن
ف قال أكيد في علاقة بين الكهربا والحرارة ولازم اتأكد من دا
وبعد دراسة طويييييلة جدا وتجارب اكتشف إن فعلا في علاقة بين الحرارة وشدة التيار الكهربي وعرف كمان إن السبب في الحرارة اللي بتتولد ف السلك هي مقاومة السلك دا
وبناءا علي ذلك عمل قانون اسمه قانون جول
والقانون دا بقي يا سيدي بيقول إن أي مادة موصلة بيكون ليها مقاومة بتخلي المادة تسخن لما يمر فيها تيار
طيب لحظة هو يعني إيه أصلا مقاومة؟
مش انت عارف إن التيار الكهربي دا أصلا عبارة عن شوية إلكترونات بيجرو جوا سلك.......
السلك دا زيه زي أي مادة ف الدنيا مكون من شوية ذرات....
ف الإلكترونات بتاعت التيار الكهربي وهي ماشية ف السلك بتقعد تخبط ف الذرات بتاعته وتحتك بيها والإحتكاك دا بيولد حرارة....
وكل ما يزيد الاحتكاك تزيد الحرارة
يعني كل ما السلك مقاومته تزيد حرارته تزيد وبرضو كل ما التيار يبقي أسرع الخبطات تكون أكتر وبالتالي تزيد الحرارة
وقانون جول دا هو الأساس العلمي لكتير جدا من الأجهزة
زي أي سخان أو مكواة أو دفاية أو أي جهاز بيسخن
يعني الفكرة الأساسية للسخان هي تحويل الطاقة الكهربية لطاقة حرارية
ف بكل بساطة سخان الشاي دا عبارة عن دايرة كهربية عادية جدا......
سلك متوصل بفيشة ف الكهربا الإلكترونات بتاعت الكهربا تمشي ف السلك دا توصل لملف اسمه ملف التسخين
ملف التسخين دا عبارة عن سلك من مادة مقاومتها عالية شويتين بس السلك دا ملفوف علي شكل ملف
توصل الإلكترونات ملف التسخين دا تخبط ف ذراته ف يسخن ويسخن المية اللي حواليه
بس هو ليه السلك بنلفه علي شكل ملف؟
سؤال جميل
عشان يزود مساحة السطح المعرض للتيار الكهربي وبالتالي يزود مساحة السطح اللي هيسخن ف يخلي المية تسخن أسرع لإنها متعرضة أكتر للحرارة
ودا برضو بيوزع كمان الحرارة بشكل متساوي علي أكبر مساحة من المية
لكن كان في مشكلة كبيرة جدا وهي إن من كتر الحرارة اللي بتتولد كان السلك نفسه بيسيح ويتحرق
لحد ما جه العالم ألبرت مارش
وقال إن من الأفضل إن السلك بتاع الملف دا يكون من سبيكة النيكل كروم لإنها آمنه أكتر وعمرها أطول ف السلك مش هيتحرق ولا يسيح بسهولة
بس كدا يا سيدي هو دا سخان الشاي أو ما يسمى الكاتل
استني البوست الجي ولو عندك أي سؤال قوله ف الكومنتات عشان نتكلم عنه البوست الجي
أشوفك البوست الجي🌸
#فيزياء
06/10/2023
معلومات فيزيائية عن المخ🧠
06/10/2023
السلااام عليكم ورحمة الله وبركاته
ازيك يا صديقي 👋
أكيد ف الأيام اللي فاتت سمعت عن موضوع العاصفة الشمسية اللي بيقولو احتمال تضرب الأرض 😨
هل دي حقيقة؟
ويعني إيه أصلا عاصفة شمسية؟
ازاي بتحصل؟
وإيه سبب حدوثها؟
وهل حصلت قبل كدا؟
تعالي الأول أعرفك يعني إيه عاصفة شمسية........
مبدأيا العاصفة الشمسية هي ظاهرة فيزيائية طبيعية جدا بتحصل بسبب المجالات المغناطيسية الضخمة اللي موجودة ف الشمس....
والمجالات المغناطيسية عادة بتتولد نتيجة حركة الجسيمات المشحونة زي الإلكترونات والبروتونات
وفي الشمس داخل اللب بيكون في بلازما بتدور
ف المجال المغناطيسي بيتولد عن طريق دوران البلازما دي داخل اللب
وطبعا البلازما دي بيكون فيها مليارات الجسيمات مشحونة زي البروتونات والإلكترونات والدوران دا بينتج عنه مجال مغناطيسي مكثف جدا بيسبب بقع شمسية علي سطح الشمس
المجال المغناطيسي اللي بيكون حوالين البقع الشمسية دي بيكون غير منتظم وبالتالي بيسبب ضغط كبير جدا
وعشان تخفف الضغط دا البقع الشمسية بتطلق طاقة مهولة ع شكل بلازما عشان تخفف من الضغط شوية
وبتخرج الطاقة دي علي شكل قذيفة بلازما ملتهبة ضخمة جدا مليانه إشعاعات خطيرة
سرعتها بتفضل تزيد لحد ما توصل ل آلاف الكيلومترات في الثانية الواحدة
وهي دي الرياح الشمسية
وبتقطع المسافه بين الأرض والشمس تقريبا في يومين أو أقل أو ممكن أكتر على حسب السرعة
ودا بيتكرر بشكل منتظم كظاهرة طبيعية جدا
لكن سبحان الخالق خلقلنا درع يحمي كوكبنا من كل دا وهو الغلاف الجوي
أول ما بتوصل العاصفة دي للغلاف الجوي بتندمج مع المجال المغناطيسي بتاع الأرض وبيحصل تفاعلات بينهم بينتج عنها فوتونات ضوء ودا بيظهر بشكل واضح في القطبين وبيكون عبارة عن ألوان وأضواء جميلة بتظهر ف السما والظاهرة دي اسمها ظاهرة الشفق القطبي أو الأورورا
(هتكلم عنها بالتفصيل ف بوست منفصل)
تمام زي الفل يعني كدا احنا ف أمان أهو والموضوع بيتكرر وعادي فين المشكلة؟
لأ
يؤسفني إني أقولك إن أحيانا بيكون في بقع شمسية كتيرة جدا وأحجامها بتكون ضخمة جدا جدا
وبالتالي بينتج عنها مجال مغناطيسي ضخم يعني بتطلع قذيفة أكبر وهنا بتحصل عاصفة شمسية ضخمة
وقتها الغلاف الجوي مش بيقدر يحمي الأرض منها بشكل كامل
وبما انها موجات مغناطيسية ف هي بتأثر علي حاجات كتيرة جدا أولها الأقمار الصناعية وكابلات الكهربا والنت
ف أول حاجة المحولات بتتدمر والكهربا بتقطع
وبالتالي مفيش أي أجهزة
أماكن كتير مش هيوصلها مية لإن مفيش مواتير
مفيش مصانع ولا مستشفيات....... إلخ
الموضوع بيوصل لصدمات كهربية ضخمة وحرائق كبيرة
والعواصف دي حصلت قبل كدا بالفعل
على سبيل المثال
♦️في يوليو 2012
كان في عاصفة شمسية ضخمة كانت هتضرب الأرض وتسبب كوارث لكن سبحان الله الأرض فلتت منها بمعجزة
♦️وفي مارس 1989
حصل عاصفة شمسية حجمها تقريبا 36 ضعف حجم الأرض
اصطدمت بالغلاف الجوي وسببت شفق قطبي بالليل غطي الأرض كلها مش بس القطبين وكل الناس شافته
لدرجة إن الناس وقتها ناس كتير فكرو إن في قنبلة ذرية انضربت ف مكان قريب منهم
لكن دي مكنتش أكبر عاصفة شمسية
♦️وفي عام1921
حصلت عاصفة تانية ضخمة
ف بدايتها لاحظ العمال اللي ف السنترالات إن الأجهزة عمالة تتعطل وتطلع ودخان
بعدها بشوية بدأت الكبلات تسيح
وسببت خسائر كبيييييرة جدا
والموضوع وصل لشرر كهربي ضخم سبب حرائق ضخمة مدمرة
وناس كتير اتكهربت وماتت
♦️وفي عام 1959
حصلت أضخخخخم عاصفة شمسية واللي اتقدرت إنها تقريبا بتعادل 10 مليار قنبلة ذرية
ووقفت كل أجهزة التليجراف واللي كانت قمة التطور وقتها
ومش بس وقف دا سبب صعق كهربي لناس كتير والدوائر الكهربية وقتها بدأت تطلع لهب مشتعل
وطبعا عاصفة زي دي لو حصلت حاليا هتسبب كوارث لا نهائية لإتها هتقطع الكهربا والنت وكل الوسائل الحديثة ومتوقع إن الكهربا لو قطعت يوم واحد في أمريكا بس ف هي هتسبب خسائر تقريبا 7 مليار دولار ف يوم واحد وف بلد واحدة تخيل بقي انت لو قطع عن العالم كله لوقت الله أعلم هيكون قد إيه
وعشان كدا العلماء دايما متابعين نشاط الشمس والبقع الشمسية عشان يتوقعو معاد العواصف دي ويعملو احتياطات أمان بقدر الإمكان
وبدأو بالفعل يعملو محولات تتحمل فولتات عالية وأقمار صناعية محصنة كمحاولة للسيطرة علي الوضع في حالة حدوثها وتقليل الكوارث الناتجة عنها
و العواصف دي بتتكرر بانتظام كل 50 سنة تقريبا كظاهرة طبيعية لكن الحمد لله بتكون ضعيفة
ولحسن الحظ إن العواصف الضخمة اللي بتسبب الكوارث دي بتكون نادرة الحدوث بتتكرر كل 500 سنة تقريبا
أما بالنسبة لموضوع العاصفة الشمسية المتوقعة ف 11 أكتوبر 2024
ف هي مجرد إشاعة غير صحيحة ووكالة ناسا نفسها نفت الكلام دا وأكدت إن الموضوع كل إنه كان في فيديو قديم أعيد نشره مش أكتر
لو عجبك البوست فولو وشير واستني البوست الجي👋
#فيزياء
05/10/2023
مرحبا يا صديقي👋
عارف أحلي اختراع 😂
أيوا الميكرويف 😂
اختراع عظيييم وفر علينا وقت وجهد كتيييير
لإنه بيجهز الأكل في أقل وقت ممكن
بيفك أي حاجة مجمدة
بيسخن أي حاجة بسرعه
بيطبخ أي حاجة ف أقل وقت🍗
خلي الدنيا سهلة ولذيذة وسريعة
بس لحظة!!
كل دا من غير نااار
ازااااااي!
ازاي الأكل يستوي من غير نار؟ ازاي يسخن أصلا؟
هو سحر؟
أكيد الموضوع فيه سر
تعالي أفشيلك السر دا يا صديقي
فكرة عمل الجهاز دا بتعتمد علي نوع من الموجات الكهرومغناطيسية اللي اسمها موجات المايكرو او المايكرو ويفز
وهي موجات غير مرئية مبنقدرش نشوفها زي الأشعة السينية وأشعة الراديو....... الخ
الموجات دي بمجرد ما بتوصل للأكل المية والدهون والسوائل اللي جوا الأكل بتمتص الموجات دي ف بيحصلها إثارة وطاقة حركتها بتزيد ف تبدأ تتحرك وتخبط ف بعضها ودا بيرفع درجة حرارتها ف يسخن الأكل بسرعه جدا ويستوي ف وقت قياسي
والغريب إن قدرة الموجات دي على التسخين تم اكتشافها بالصدفة جدا عن طريق العالم سبنسر لما كان بيحاول يولد موجات كهرومغناطيسية دقيقة عشان يصنع أجهزة ردار وبينما كان بالقرب من جهاز بيولد موجات ميكروويف لاحظ إن قطعة الشوكلاته اللي كانت ف جيبه ساحت بسرعه جدا رغم إن المكان كان بارد
ف جرب يجيب درة فشار وفعلا ف وقت قليل جدا اتحول لفشار ومن هنا استنتج إن موجات الميكرويف بتولد طاقة حرارية كبيرة تقدر تسخن الأكل بعد كدا قرر يعمل جهاز منفصل لتسوية الأكل عن طريق الموجات دي
وف البداية فرن الميكرويف كان ضخم جدا وواحدة واحدة اتطور لحد ما وصل للشكل الحالي
إيه الفرق بقي بينه وبين الفرن العادي؟
الفرق هو إن الفرن اللي بيشتغل بالنار بيسوي الأكل من برا لجوا
لكن الميكرويف بيسوي الأكل كله مع بعضه لإنه بيشتغل علي جزيئات الأكل نفسها عشان كدا الأكل بيستوي أسرع وبشكل أفضل وبالتساوي
لكن.....
ناس كتير اوي بتقلق منه وكل شوية يطلع إشاعة من شكل
اللي يقولك بيسبب سرطان......
واللي يقولك بيضيع فايدة الأكل........
واللي يقولك الإشعاع اللي بيخرج منه ممكن يأثر على الإنسان.........
لكن كل الكلام دا غير صحيح تماما
الحقيقة إن منظمة الصحة العالمية نفت تماما الكلام دا وقالت إنه مش بيسبب أي نوع من السرطانات وإن الإشعاع بتاعه مش بيخرج برا لإنه محكم الغلق وبمجرد ما بيتفتح باب الفرن بيتوقف إنتاج الموجات تلقائيا طالما الفرن بحالة كويسة وبنستخدمه صح
وفرضا لو خرج منه أي إشعاع ف بيكون ضعيف جدا جدا وآمن مفيش منه أي مشاكل
المهم نستخدمه بطريقة صححححح
والطريقة الصح هي إننا نستخدم أواني من الخزف أو الفخار أو السراميك وهكذا....
عشان تمتص الموجات
ونبعد عن أي حاجة لامعة زي المعادن بشكل عام زي الألومنيوم والاستيل وهكذا
ليه بقي؟
لإن المعادن بتكون لامعة ف بتعكس موجات الميكرويف علي جدران الفرن نفسه وبالتالي بيسخن جدا الفرن ودا هيسبب تلفه وممكن كمان ينفجر ويسبب كارثة
من أهم النقط بقي هي إننا المفروض نبعد تماما عن مادة البلاستيك
مش عشان هتسيح لأ
البلاستيك لما بيسخن بيخرج منه تقريبا 95٪ من مكوناته الكيميائية زي مادة الديوكسين
والمادة دي لوحدها من أخطر المواد لإن الأطباء أثبتو إنها بتسبب السرطان والعقم وارتفاع ضغط الدم ومشاكل تانية
ولو مضطر تستخدم بلاستيك ف أوعي تستخدم غير البلاستيك اللي مكتوب عليه إنه آمن مع الميكرويف
لإنه بيكون بلاستيك معدل ومضاف ليه مواد تانية بتمنع انحلال مواده
آخر إشاعة هي إنه بيضيع فايدة الأكل😂
وبعض الأطباء عشان يتأكدو من دا جربو بنفسهم وجدو العكس
ف مثلا لما جربو يطبخو فيه البروكلي لقو إنه احتفظ أكتر بالقيمة الغذائية بتاعته مقارنة بالبروكلي اللي استوي علي نار عادية
ف الخلاصة استخدم الميكرويف ومتخفش لإنه اختراع عظيييم وهيسهل عليك حياتك 😂
#فيزياء
04/10/2023
أهلا بيك يا صديقي👋
تعالي أقولك معلومة غريبة عنك
تعرف إن أتقل عضو ف جسمك هو مخك؟!🧠
ودا طبعا نتيجة وظيفته المعقدة جدا لإنه تقريبا بيتحكم ف كل حاجة ف جسمك ومتوصل بكل جزء ف جسمك وفيه مليارات من الخلايا العصبية ودا بيخلي كتلته تقريبا 1700 جرام يعني حوالي اتنين كيلو إلا ربع 😯
ودا كتير جدا مقارنة بكتلة جسمك
ومع ذلك عمرك ما حسيت ولا هتحس بالكتلة الكبيرة دي
يعني مثلا هل انت حاسس دلوقت إنك شايل اتنين كيلو إلا ربع جوا دماغك؟
قطعا لأ دا أصلا شئ مرهق جدا
طب إيه السبب إنك مش حاسس بالكتلة دي كلها؟
السبب هو إن مخك بيكون عايم في مادة سائلة اسمها النخاع الشوكي
وتبعا لقوانين الفيزيا وخاصة قانون أرشميدس اللي بيقول:
"كل جسم يغمر في سائل يفقد من وزنه بقدر وزن السائل المزاح"
ودا بدون الدخول ف تفاصيل كتيرة معناه إن أي جسم لو حطيته ف سائل ف الجسم دا بيفقد جزء من وزنه وبالتالي وزنه جوا السائل بيكون أخف من وزنه الحقيقي....
ولو جينا طبقنا الكلام دا علي المخ هنلاقي إن المخ دا طالما جوا مادة سائلة ف هو بيفقد برضو جزء من وزنه نتيجة تواجده داخل السائل دا اللي هو النخاع الشوكي
وبالحسابات أثبت العلماء إن وزن المخ جوا الدماغ بيكون 50 جرام فقط😯
بينما خارج الجسم بيكون وزنه الحقيقي 1700 جرام عادي
وهو دا السبب اللي بيخلينا مش بنحس بتقل المخ
ودا يلفت انتباهك لمدى أهمية الفيزيا وإنها لذيذة وسهلة وبتفسر كل حاجة حوالينا إحنا بس نتعامل معاها صح 😂♥️
وكمان يخليك تدرك مدي عظمة وقدرة الخالق عزوجل♥️🌸
استني البوست الجي لو عجبك دا
ولايك وشير وفولو فضلا ❤️
#فيزياء
03/10/2023
أهلا بيك يا صديقي 👋
سمعت قبل كدا عن وحوش الكون؟!!
لو مسمعتش عنها تعالي احكيلك.....
وحوش الكون دي اللي هي الثقوب السوداء
بعض العلماء أطلقو عليها الاسم دا من كتر ماهي قوية وغريبة وتقدر تغير حرفيا ف شكل الكون
ف تعالي احكيلك النهاردة عنها شوية
مبدأيا هي مش ثقوب ومش سودا😯
هي حفر كروية مظلمة محدش بيقدر يشوفها بعينه أصلا وهقولك السبب دلوقت
الثقوب السوداء دي عبارة عن حاجة لها كتلة كبيييييييييييييرة جدا مهولة حرفيا ولكن متركزة ف مكان صغييييييييير جدا يعني كثافتها لا نهائية ودا بيخلي جاذبيتها عالية جدا جدا لدرجة إن مفيش أي حاجة بتقدر تهرب منها ولا حتي الضوء نفسه......
عشان كدا احنا مش بنشوفها لإنها بتكون ضلمة جدا ودا بسبب إن الضوء اللي هو سبب الرؤية مش بيقدر يهرب منها رغم إنه أسرع حاجة ف الكون
طب طالما مش بنشوفها! بنعرف مكانها ازاي؟
بنعرف مكانها بسبب إن الغازات اللي هي بتحاول تجذبها درجة حرارتها بتعلي جدا وبتبدأ تشع ومن خلال الإشعاع دا بنستدل علي وجود ثقب أسود في المكان
طيب هي الثقوب السوداء دي ازاي بتتكون؟
الثقوب السوداء دي في الأساس كانت عبارة عن نجوم عادية منورة وحلوة زي الشمس مثلا بس أكبر طبعا بكتير
ازاي بقي اتحولت لثقوب سودا؟
وليه جاذبيتها عالية اوي كدا؟
مبدأيا النجوم بتكون عبارة عن تجمع كبير جدا من غاز الهيدروجين......
وكل نجم بيكون جواه لب بيحصل فيه تفاعلات نووية
التفاعلات النووية دي عبارة عن إن انوية ذرات الهيدروجين بتندمج سوا وبتكون أنوية أكبر شوية اللي هي أنوية الهيليوم
ودا بينتج طاقة مهولة الطاقة دي بقي بتحاول تخرج برا اللب بتاع النجم وتهرب من سيطرة الجاذبية
وطول ما في هيدروجين في تفاعل وفي طاقة بتحاول تهرب كدا النجم بيفضل تمام ومنور وزي الفل زي شمسنا الجميلة كدا
لو نجم أكبر بقي في الكتلة والضغط والحرارة بيحصل جوا اللب بتاعه اندماج لعناصر أكبر من الهيليوم
يعني مثلا من اندماج الهيدروجين والهيليوم يتكون كربون وبعد الكربون يتكون نيون وبعد النيون أكسجين...... وهكذا وكل العناصر دي اندماج أنويتها بيسبب طاقة مهولة لحد ما توصل إنها تكون عنصر الحديد
لكن على عكس باقي العناصر الحديد اندماجه مش بينتج طاقة وبالتالي مفيش طاقة الجاذبية تقاوم خروجها اصلا ودا بيسبب خلل في توازن النجم وبيبدأ الحديد يزيد ويتراكم جوا اللب لحد لحظة معينه بينهار فيها النجم وبينكمش جدا بسرعة تعادل ربع سرعة الضوء ودي سرعة كبيرة جدا ع فكرة
ف الحالة دي بقي لو النجم صغير بيتحول لنجم نيوتروني
لكن لو النجم ضخم أكتر بيتحول لثقب أسوووود
وف الحالة دي بقي كل كتلة النجم بتكون متكدسة ف مكان صغييييير جدا نتيجة انكماشه ودا بيسبب كثافة مهولة ودا بيخلي جاذبية الثقب لانهائية ومفيش اي حاجه تقدر تهرب منها
والثقوب السوداء دي أحجام مختلفة في منها صغير وفي منها كبيييير جدا
أحد الثقوب دي.....
كتلته 40 مليار ضعف كتلة الشمس
وقطره حوالي 236 مليار كيلومتر
يعني أكبر 170 الف مرة من الشمس
فقط تخيل!!
طيب هل ممكن ثقب أسود يسحب كوكب الأرض كله؟
أكيد طبعا ممكن لو قربنا منه
لكن متخفش أقرب ثقب أسود بينا وبينه 3000 سنة ضوئية ف احنا ف أمان إن شاء الله
وعلي الرغم من إنها تخوف إلا إن بعض العلماء بيتوقعو إنها بتحافظ علي توازن المجرات وإن ف مركز كل مجرة بيكون في ثقب أسود كبير وكل حاجة ف المجرة بتدور حواليه
طب ماااااذااا لو
ثقبين اصطدمو ف بعض
اللي هيحصل إنهم هيندمجو مع بعض وهيتكون ثقب أسود كبير
طب هل الثقب الأسود له نهاية ؟
أيوا الثقب الأسود بيفضل يطلع اشعاعات ودا بيخليه يفقد كتلته لحد ما يفني يموت بس دا طبعا بيحتاج وقت كبييييييير جدا
أكبر من عمر البشرية يمكن
لو عجبك البوست لايك وشير واستني البوست الجاي ان شاء الله ♥️
#فيزياء
28/09/2023
أهلا بيك مجددا يا صديقي👋
تعرف الكواكب؟!
أيوا اللي هي عطارد والزهرة والأرض...........إلخ
هيحصل حاجة لو الكواكب دي مبقتش موجودة؟!
يعني تخيل كدا مفيش مجموعة شمسية مفيش غير الأرض والشمس بسسسس
هل هنتأثر لو اختفت ولا مش هتفرق معا بما إننا مش بنشوفها أصلا؟
الإجابة هي إننا هنتأثر جدا واحتمال بنسبة كبيرة جدا الحياة تنعدم علي كوكب الأرض😱
ليه؟
تعالي اوضحلك بكل بساطة...
انت عارف إن الكواكب طبعا بتدور حول الشمس في مدارات محددة وكل كوكب في مسافة بينه وبين التاني.....
من الآخر كل كوكب عارف مكانه ومستحيل يخرج منه لإنه لو خرج منه هتحصل كوارث زي انه ممكن يخبط ف كوكب تاني مثلا
بس هما ازاي بيدور في مدارات محددة كدا إيه اللي مخليهم ثابتين في المدارات دي؟؟!
السبب ف دا هو الجاذبية
جاذبية الشمس أولا
والجاذبية المتبادلة بين الكواكب وبعضها ثانيا
تأثير الجاذبية المتبادل بينهم دا هو السبب في وجود المدارات
يعني ببساطة نقدر نقول إن كل كوكب منهم بيحمي الباقي
وإن الجاذبية هي السبب في ثبات شكل الفضاء
جميل....
ليه بقي الأرض بس اللي عليها حياة؟
ناس كتير مفكرة إن السبب ف دا هو وجود مية
لكن دا مش صح....
لإنها مش الكوكب الوحيد اللي عليه مية في كواكب تانية فيها مية
عطارد مثلا عليه مية بس أغلبها بيتبخر بسبب قربها الشديد من الشمس
بلوتو كمان عليه مية لكن متجمدة لإنه بعيد جدااا عن الشمس
لكن الميزة اللي ف الأرض هي انها واقعه في نطاق الحياة
اللي هو المكان اللي يصلح للحياة
مكان كدا لا هو بعيد اوي عن الشمس ولا هو قريب اوي
وبالتالي الحرارة فيها معتدلة والمية سائلة..
نرجع بقي لموضوعنا...
تخيل بقي معايا كدا لو اختفت الكواكب!
طبعا في الحالة دي كدا مفيش كواكب هتأثر على الأرض وبالتالي
الأرض هتكون حرة أكتر
ودا مش هيكون في صالحنا خااااالص لإن الأرض هتتحرك بحرية في الفضاء ف هتحصل حاجة من دول
يإما الشمس هتبعد اوي عن الشمس
في الحالة دي هتكون الدنيا ضلمة جدا ومش بس كدا دي هتكون برد جدا لدرجة إنها هتتحول لكوكب جليدي وكل المية طبعا هتتجمد ومحدش هيقدر يتكيف مع الظروف دي إلا بعض الكائنات.
يإما هتقرب اوي من الشمس
وفي الحالة دي بقي الجو هيكون حررررر جدا و المية تتبخبر والزلازل والبراكين هيزيدو جدا وهيعم الجفاف ومحدش هيقدر يعيش برضو وهتتحول لكوكب بلا حياة
طيب نفترض إن ربنا هداها وعقلت وفضلت مكانها متحركتش! 😂😂
في الحالة دي برضو مش هتنجو لإن حزام الكويكبات القمر دا بيحمي الأرض من خطر النيازك والأجسام الفضائية
ف بدونهم الأرض هتتعرض بشكل مهول للنيازك والأجسام الفضائية الضخمة وبالتالي هتتدمر الأرض برضو
سبحان الله خلق كل شئ بمقدار ♥️
لو عجبك البوست لايك وفولو واستني البوست الجي
#فيزياء
26/09/2023
أهلا بيك يا صديقي👋
لعبت بالمغناطيس قبل كدا؟
أكيد كلنا لعبنا بيه وأكيد فكرنا قبل كدا هو ليه بيجذب حاجات أيوا وحاجات لأ وليه بيجذب أصلا! إيه المميز فيه؟
هل دا سحر؟
أكيد طبعا لأ
الكلام دا له تفسير علمي تعالي أبسطهولك خالص☺️
بص ي سيدي..
انت عارف طبعا إن أي ذرة بتكون عبارة عن نواة وبيلف حواليها إلكترونات ⚛️
كل إلكترون من الإلكترونات دي بيكون له مجال مغناطيسي أو بمعنى أصح كل إلكترون نقدر نقول عليه مغناطيس صغير....
غريب!
طيب ماهو المفروض كل المواد مكونة من ذرات وكل ذرة فيها إلكترونات ف هل دا معناه إن كل المواد مغناطيسات!
لأ طبعا
المشكلة إن في أغلب الذرات الإلكترونات كلها بتتحرك بشكل عشوائي مش في اتجاه واحد
كمان الإلكترونات بتحب تكون في المدار الواحد على هيئة أزواج يعني كل اتنين في مدار واحد ودايما بيكون واحد اتجاهه عكس التاني
وبالتالي بيلغو مجال بعض يعني بيبقي محصلة مجالهم المغناطيسي صفر
وهكذا بقي كل إلكترونين عكس بعض يلغو مجال بعض وبالتالي تبقي محصلة المجال المغناطيسي للمادة كلها صفر أو ممكن يكون في مجال مغناطيسي لكن ضعيف جدا ملوش لزمه..
ف علشان المجال المغناطيسي دا مش يتلغي مع بعضه بقي لازم يكون عندي إلكترونات مفردة مش أزواج....
ودي هى اللى بتكون مسؤولة عن الخاصية المغناطيسية
ودا بيكون في بعض المواد زي الحديد والنيكل
لكن.....
هل ممكن يكون في إلكترون مفرد لكن ميولدش مجال مغناطيسي!!؟
أيوا...
ودا بيكون بسبب إن ممكن إلكترون تاني في ذرة تانيه في اتجاه معاكس له ف يلغي مجاله.....
وبالتالي المغناطيس بقي بيتصنع من بعض المعادن زي الحديد والنيكل برضو لكن بيتم تعريضها لمجال مغناطيسي قوي جدا بحيث إن الذرات والإلكترونات كلها تكون تكون مجبرة إنها تترتب في اتجاه واحد عشان مفيش إلكترون يلغي مجال إلكترون تاني....
وبالتالي يتكون عندي مغناطيس قوي له قطبين أو جنبين جنب سالب وجنب موجب
يعني ببساطة شديدة يا سيدي نقدر نقول إن المغناطيس هو عبارة عن مادة مثالية فيها إلكترونات مفردة وكل ذراتها مترتبة في نفس الإتجاه وبالتالي كل المجالات بتاعت الإلكترونات الصغيرة بتتجمع وبتخلي في مجال مغناطيسي كبير للمادة نفسها
جميل بس برضو مفهمتش ازاي المغناطيس بيجذب الحديد
ومش بيجذب الخشب مثلا؟
دا بيتحدد علي حسب هل المادة دي فيها إلكترونات مفردة ولا لأ
لو فيها إلكترونات مفردة بتنجذب للمغناطيس
لكن لو مش فيها إلكترونات مفردة وكل إلكتروناتها أزواج ف هي مستحيل تنجذب المغناطيس
ليه بقي وازاي؟
يعني لو أنا عندي قطعة حديد ومغناطيس ازاي المغناطيس بيجذب الحديد؟
ببساطة المغناطيس لما هيقرب شوية من قطعة الحديد هيأثر عليها ف هيجبر ذراتها إنها تكون مترتبة في اتجاه واحد وبالتالي الإلكترونات المفردة اللي جوا الذرات تكون كلها في اتجاه واحد ف قطعة الحديد دي تتحول لمغناطيس هي كمان ويكون لها قطب موجب و قطب سالب برضو وبالتالي يبدأ القطب السالب يجذب الموجب و الموجب وهكذا....
لكن الخشب مفيهوش أصلا إلكترونات مفردة ف المغناطيس مش هيقدر يأثر عليه
بكل سهولة هو دا المغناطيس الغريب اللي بنفضل نفكر هو ليه بيجذب الحاجات
لو عجبك البوست لايك وفولو للبيدج واستني البوست الجي
#فيزياء
22/09/2023
شكله حلو
بس مرعب!!
البرق⚡
علي الرغم من إن شكله حلو لكن كلنا بنخاف منه😯😱
هل فعلا هو يخوف؟!
تعرف إن في تقريبا 24 ألف شخص كل سنة بيموتو بسبب البرق؟!
ف من ناحية يخوف ف هو يخوف جدا وممكن يسبب حرايق وكوارث وحاجات كتير جدا 🙃
ليه هو البرق عبارة عن إيه؟!
البرق عبارة عن تفريغ ضخم لشحنات كهربية
أو هو شرارة كهربية ضخمة جدا يعني هو أصلا في الأساس كهربا⚡
تخيل؟!
طيب هو ازاي عبارة عن كهربا بتجيله منين الكهربا دي؟
ببساطة دا بيحصل نتيجة تصادم شحنتين واحدة سالبة والتانية موجبة
طيب السحابة بيكون فيها الشحنات دي ازاي؟
بص يا سيدي.....
في هواء بيكون سخن وفي هواء بيكون بارد
الهوا السخن أخف من الهوا البارد وبالتالي بيطلع لفوق ومعاه قطرات مية وتلج صغير خفيف وبيستقر في الجزء العلوي من السحابة
أما الهوا البارد ف بيكون لإنه تقيل ف بينزل لتحت ومعاه بلورات التلج الكبيرة ف بيستقر في الجزء السفلي من السحابة
قطرات المية والتلج الخفيف دا لما بيكبر شوية ويتقل بيبدأ يتحرك وينزل لتحت ويطلع مكانه تلج خفيف تاني وقطرات مية
وأثناء الحركة بيحصل احتكاك بين بلورات التلج التقيلة وقطرات المية ونتيجة الإحتكاك دا الإلكترونات السالبة بتنفصل من قطرات المية وبتروح لبلورات التلج التقيل وبالتالي التلج بيكون شحنته سالبة ف لما بيترسب في قاع السحابة بيخلي الجزء السفلي من السحابة سالب الشحنة
والمية بعد ما تفقد الإلكترونات السالبة شحنتها بتكون موجبة وبالتالي لما بتطلع لفوق بتخلي الجزء العلوي من السحابة موجب الشحنة
كدا السحابة بقت نصين نص سالب ونص موجب وبالتالي بينشأ بينهم فرق جهد والموجب بيبدأ ينجذب للسالب
وبالتالي بتحصل الشرارة الكهربية
اللي هي البرق
وطبعا دا مش لازم يحصل في سحابة واحدة
كمان ممكن الشحنات الموجبة في سحابة تنجذب للشحنة السالبة في سحابة تانية وبالتالي يحصل البرق بين سحابتين
المشكلة الكبيرة بقي إن أحيانا الشحنات السالبة دي بتنجذب للشحنات الموجبة اللي موجودة علي سطح الأرض ف ينزل البرق لسطح الأرض وكمان الجاذبية بتساعد على دا
وهنا بيحصل برق بين السحب والأرض وبيكون اسمها (صاعقة)
ودي بيكون الدمار الناتج عنها كبير جداااااا
لإن سرعة البرق كبيرة جدا حوالي 400 ألف كيلو متر في الساعه
ودرجة حرارته بتكون أعلي من درجة حرارة الشمس ب خمس أضعاف تقريبا
وبالتالي كمية الطاقة الناتجة عنه بتكون كبيرة جدا كفيلة إنها تدمر حاجات كتير
هو دا البرق بكل بساطة
لو عجبك البوست لايك وفولو واستني الجي ✌️
#فيزياء