Hanri Htun
WRITER
18/08/2023
လျှောက်ပြီးသား လမ်းကို
ဘယ်တော့မှ ပြန်မလှမ်းဘူး ။
ဘယ်သူ့ကိုမှ ဖက်တွယ် မထားတော့သလို
ဘယ်သူ့အပေါ်ကိုမှလဲ အနိုင်မလိုချင်ခဲ့ဘူး ။
ပြန်တွေးကြည့်မိတိုင်း လိပ်ပြာသန့်တဲ့ လမ်းကိုပဲ ရွေးချယ်မယ် ။
ရှေ့လျှောက်တော့ ပျော်စရာတွေပဲ အတတ်နိုင်ဆုံး စဉ်းစားမယ် ။
ကောင်းကင်ကြီးကို မော့ကြည့်မယ် ။
လေတွေကို အားရပါးရ ရှုသွင်းမယ် ။
လွတ်လပ်တဲ့ ခံစားချက်ကို တစ်ဝကြီး ခံစားမယ် ။
ပန်းလေးတွေကို အများကြီး ပိုချစ်မယ် ။
ပန်းလေးတွေကိုပဲ ကြည့်မယ် ။
ပန်းလေးတွေကိုပဲ ထွေးပွေ့မယ် ။
ပန်းလေးတွေကိုပဲ နမ်းရှုံ့ကြည့်မယ် ။
ကိုယ့်အနားမှာ ပန်းကလေးတွေကို ထားထားမယ်။
အလုပ်တွေ ကြိုးစားမယ် ။
စိတ်အပန်းဖြေချင်တဲ့အခါ နားကြပ်တစ်စုံနဲ့
သီချင်းတွေ နားထောင်မယ် ။
သီချင်းတွေကို ရိုးအီသွားတဲ့အခါ
ကိုယ်ကြိုက်တဲ့ စာရေးဆရာမတွေရဲ့ audio bookတွေကို တစ်လှည့်နားထောင်မယ် ။
စိတ်တူ ကိုယ်တူ သူငယ်ချင်းတွေနဲ့
လွတ်လွတ်လပ်လပ် ခရီးတွေထွက်မယ် ။
ကလေးတွေကို တွေ့ရင်
ကိုယ့်ဆီရှိတာလေးတွေ တတ်နိုင်သလောက်
ဝေမျှမယ် ။
အရိုးသားဆုံး ပြုံးပြမယ် ။ ရယ်မောမယ် ။
ကိုယ့်လောက်မပြည့်စုံတဲ့သူတွေကို
ကိုယ်လက်လှမ်းမီသလောက် ကူညီပေးမယ် ။
တွဲခေါ်ပေးမယ် ။
နေ့ရက်တိုင်းမှာ ကိုယ်ရဲ့ ဖြစ်တည်မှုကို အဓိပ္ပာယ်ရှိအောင်
ကြိုးစားနေထိုင်မယ် ။
ဘယ်နေရာ ရောက်ရောက် ဘာသာတရား
ကိုင်းရှိုင်းမယ် ။
ကိုယ့်အနားမှာ တစ်ယောက်ယောက် ရှိနေတာ
ရှိမနေတာထက်
ဒါလောက်ဆိုရင် ဘဝဟာ အဓိပ္ပာယ်ရှိနေပါပြီလို့ ခံယူထားတယ် ။
🌻
17/08/2023
အဲ့ဒီ့ မိန်းကလေးကို
လျော့မတွက်လိုက်ပါနဲ့ ။
သူမ မျက်ဝန်းတွေထဲမှာ
ရဲရင့်မှုတွေရှိတယ် ။
သူမရဲ့ နှလုံးသားထဲမှာ
ကြင်နာမှုတွေရှိတယ် ။
ပြိုလဲရတဲ့ အချိန်တွေမှာတောင်
ပြန်ပြီး ရှင်သန်နိုင်တဲ့
သန်မာတဲ့ စိတ်ဓာတ်ခွန်အားတွေလဲ သူမဆီမှာ ရှိသေးတယ် ။
အဲ့ဒီ့ မိန်းကလေးဟာ
တခြားသူ မဟုတ်ဘူး ။ ကောင်မလေးရေ ...
မင်း ကိုယ်တိုင်ပါပဲ ။
🌻
16/08/2023
လူကူးမျဉ်းကျားမှာ ပခုံးချင်း ယှဉ်ပြီး
ဖြတ်သွားမိခဲ့ရုံလေးကို
မျက်နှာချင်းဆိုင်မိတော့
တကယ်ဆုံပြီလို့ ထင်ခဲ့တာ ။
အမှန်တော့ ကျောခိုင်းပြီး တစ်လမ်းစီကို သွားနေခဲ့ကြတာ ။
🌻
15/08/2023
You can be the sole person
who can't be found in other places.
Just keep staying
in your own paradise and making yourself proud of.
13/08/2023
ကျွန်တော် ကြုံတွေ့ခဲ့ဖူးတဲ့ လူတွေထဲ
ဘယ်သူ့ကို အမှတ်မရှိဆုံး အဖြစ် ရွေးမလဲ ။
ဘယ်သူ့ကို အနုံဆုံး အ အ ဆုံး အဖြစ် ရွေးမလဲ ။
ဘယ်သူ့ကို အသုံးမကျဆုံးလို့ ရွေးမလဲ ဆိုရင်
ကျွန်တော့်ကိုယ် ကျွန်တော်ပဲ ရွေးလိုက်ပါမယ် ။
ကျွန်တော်ဟာလေ အသုံးမကျတဲ့ သူတွေထက်
ပိုပြီးတော့ကို အသုံးမကျရာရောက်ပါတယ် ။
ခင်ဗျားကို မမေ့နိုင်ခြင်းဟာ ကျွန်တော့်ဘဝရဲ့
အသုံးမကျမှု ...
မိုက်မဲမှုတစ်ခုပဲ ။
ကျွန်တော်မေ့နိုင်ပြီ ထင်ပေမယ့် ခင်ဗျားနဲ့ပတ်သက်တဲ့ အသေးအမွှားတစ်ခုလောက် တူးဆွ မိလိုက်ရင်တောင် ...
ကျွန်တော့်အတွက် ကြီးကြီးမားမားဖြစ်သွားတတ်တာ အခုချိန်ထိပဲ ။
အမြဲ မဖြစ်နိုင်တာတွေကို တွေးတောနေတယ်လို့ ပြောလဲ ကျွန်တော် ခံရတော့မှာပဲ ။
ခင်ဗျားဟာ ကျွန်တော့်အတွက် ကောင်းကင်နဲ့ မြေကြီးလို ကွာခြားတယ် ။
ခင်ဗျားဥယျာဉ်ထဲ လှပနေကြတဲ့ တော်ဝင် ဇာတ်မြင့် ပန်းတွေထဲ ကျွန်တော်ဟာဖြင့် နေလောင်ပန်းသာသာလောက်ပဲ ။
ခင်ဗျား လှမ်းမယ့် ခြေလှမ်းတွေမှာ ကျွန်တော်ဟာ ဆူးညှောင့်ခလုတ်လဲ ဖြစ်နိုင်တယ် ။
ခင်ဗျားခြယ်နေတဲ့ တန်ဖိုးကြီး ပန်းချီတစ်ချပ်ပေါ်
ကျွန်တော်ဟာ အရုပ်ဆိုးတဲ့ ဆေးတစ်စက်လဲ ဖြစ်နိုင်တယ် ။
ခင်ဗျားအတွက် ကောင်းတာတွေပဲ ပေးချင်ပေမယ့် ခင်ဗျားနဲ့ကျွန်တော်ဟာ Timingလွဲနေတဲ့ရထားနဲ့ဘူတာလိုပါပဲ ။
ခင်ဗျားရှိတဲ့ ဘူတာဆီ ကျွန်တော်ဟာ အချိန်မီမရောက်လာနိုင်သလို ကျွန်တော်ရှိနေတဲ့ ဘူတာမှာလဲ ခင်ဗျားအချိန်ကြာကြာမစောင့်နေနိုင်ဘူး မဟုတ်လား ။
ဒါပါပဲ ။
နောက်ဆုံးတော့လဲ ။
ဘယ်လိုပဲ အဖြေထုတ်ထုတ်
ဘယ်လို သီအိုရီတွေနဲ့ပဲ တွက်တွက်
ဒီပုစ္ဆာရဲ့ အဖြေဟာ ဒီတစ်ခုတည်းပဲ ထွက်ပါတယ် ။
အဲ့ဒါကတော့ ကျွန်တော်ဟာ ခင်ဗျားအတွက် လိုက်ဖက်ထောင့်တစ်စုံ မဟုတ်ခဲ့ပါဘူး ။
ဘယ်တော့မှလဲ မဟုတ်နိုင်ဘူးပေါ့ ။
06/06/2023
ဘာတွေအတွက်နဲ့ ပြိုလဲနေမှာလဲ ..
လူတစ်ယောက် သန်မာခြင်းရဲ့ နောက်ကွယ်မှာ
အကြိမ်ကြိမ် အခါခါ ပြိုလဲရခြင်းတွေ ရှိနေတယ်။
အပြုံးတွေဟာ အရင်လို ချိုချင်မှ ချိုတော့မယ်။
စကားလုံးတွေဟာ အရင်လို နူးညံ့ချင်မှ နူးညံ့လိမ့်မယ် ။
ဖျော့တော့တဲ့ မျက်လုံးတွေနေရာမှာ မာကျူရီတွေ အစားဝင်ချင် ဝင်လာလိမ့်မယ် ။
လှိုင်းလုံးတွေ ကြမ်းလာတိုင်း မင်း တစ်ခါပြိုလဲမှာပဲ ။
ဒါပေမယ့် အဲ့ဒီ့လှိုင်းလုံးတွေကြား ပြန်ပေါ်လာအုံးမှာလား ...
အပြီးတိုင် နစ်မြုပ်သွားမလားဆိုတာဟာ
မင်းရဲ့သန်မာခြင်းကို ပြတာပဲ ။
ပြိုလဲပါ ။
လူတိုင်းဟာ အကြိမ်ကြိမ် ပြိုလဲဖူးကြပါတယ် ။
ဒါပေမယ့် ပြိုလဲပြီးတိုင်းလဲ အကြိမ်ကြိမ် ပြန်ထဖို့ မမေ့လိုက်ပါနဲ့ ။
ကိုယ်ထူ ကိုယ်ထရတဲ့ သူတွေဟာ
လောကမှာ အသန်မာဆုံးတွေပါပဲ ။
မင်း ဘဝကို အလှပဆုံး ဖန်တီးပါ ။
လဲကျပြီးတိုင်းမှာ ပြန်ထပါ ။
ကိုယ့်ရဲ့ တစ်ရက်တာ 💜
ကိုယ့်ရဲ့ မနက်ခင်းအစမှာ
မင်းရဲ့ မျက်နှာလေး မြင်ယောင်ပြီး နိုးထလာခဲ့တယ် ။
စိတ်ကလေးကို ရှင်းလင်းထားပြီး
မင်း အကြောင်းကို အစကနေ အဆုံးထိ
အပြန်ပြန်အလှန်လှန် တွေးတောရခြင်းဟာ
ကိုယ့်အတွက် ရသစုံလင်တဲ့ မနက်ခင်း စာစောင်တစ်စောင်လိုပါပဲ ။
အချိန်တိုင်း လိုလို
ကိုယ့်အတွေးတွေထဲ မဖိတ်ခေါ်ဘဲ
ရောက်ရောက်လာတာဟာလဲ မင်း အကြောင်းတွေချည်းပဲ ။
မင်း ဆိုတဲ့ ဖြစ်တည်မှုလေးကို
သိခွင့်ရတဲ့ အတွက်
လောကကြီးကို ကျေးဇူးတင်ပါတယ် ။
ကိုယ်ရဲ့ ပျော်ရွှင်ခြင်းဟာ မင်းကို သိခွင့်ရတဲ့ အချိန်ကစလို့ တဖန် ပြန်လည်မွေးဖွားလာခဲ့တယ်။
ကိုယ့် အိပ်မက်တွေဟာ မင်းရဲ့ဖြစ်တည်မှုလေးနဲ့ ထိတွေ့ခွင့်ရချိန်ကစလို့ တဖန် ပြန်လည်တောက်ပလာတယ် ။
မင်း အကြောင်းလေး တွေးမိလိုက်တိုင်း ကိုယ့်ရဲ့ စိတ်ကူးတိုင်းဟာ အသစ်အဆန်းတွေ ဖြစ်လာကြတယ် ။
ဒါဟာ ဘယ်လို စွမ်းအားမျိုးပါလိမ့် ။
ချစ်ရသူသာ ကမ္ဘာတစ်ခုပါဆို ..
မင်း အပြုံးလေးတွေနဲ့ ကိုယ့်ကမ္ဘာကို
ဖန်တီးထားတယ် ။
သိပ်ကို အေးချမ်းတာပဲ အချစ်ရယ် ။
Htun