Frankie.C - 攝影大叔的下半場

昨日，清酒評審嘅結果出爐，去年係直播形式，今年就改為先錄影剪好之後於9月5日在Youtube首播，由於要到當日大家先可以知道邊枝清酒得到榮譽，為尊重大會，所以今日嘅文字同相片內容係唔會出現任何關於得獎清酒嘅消息。

The Mira Hong Kong係贊助商之一，所以往年同今年嘅拍攝場地，都係由Mira提供。

呢間房嘅佈置一直都冇變，而且都有我嘅回憶響度，十幾年前，一對有超級豪門背景嘅新人Big Day，就係響呢度出門，前一晚我仲緊張到失眠，開始時更手忙腳亂，仲要手足安撫返我轉頭，咁樣就過左十幾年。

往後都有響呢間房影過兩三個婚禮，呢間房係幾舒服，一整列落地窗好似好光猛，但外面其實係酒店嘅中庭，四面都被包圍，只要稍為陰天，都要落燈先影到相。

唔講大家未必知，Mira係被行內譽為全港最難影嘅酒店其中之一，如果響佢地一般出門嘅套房拍攝，落兩三枝燈係基本。

難影，係因為佢地燈光做得較有情調，如果係渡假，會幾舒服，但要打卡嘅話呢，自己帶多枝LED燈仔會好D。

Mira收工有樣好，就係一收工就搭電梯落Donki買野返屋企食，尋晚嘅Dinner，都係響呢度買壽司，響我就快行到收銀處時，有個女仔問我係咪香港人，我話係又點？佢就叫我幫幫手，送返Donki coupon比我，點知原來係申請信用卡，我停低係因為佢一句"香港人"，最後我都有幫佢手，始終而家搵食都艱難，我唔知會唔會批，但我就知道就算批到我都未必會用。

是日休息，留肚約左兩位死黨去食西餐。

上星期影完3日清酒評審，之後嘅時間就係要響屋企嘅家族辦公室裡面一張一張咁處理好。

由上星期六起計至前日星期四，我只有兩次因為要買外賣落過一陣街，其餘時間都用晒響呢輯相上面。

每一個評酒嘅動作都好專業，搖、睇、聞、最後先入口感受 (佢地唔會飲落肚，酒留在口腔感受過後就會將酒吐出)，一整套動作基本可以影到幾十張相，在場有幾十位專家，有兩日係全部上場，最後一日final judge就由十位專家+一位主席負責。

加上其他嘅活動，影左嘅相都有唔少。

影完3日嘅相，就用左6日時間去處理，昨日早上，4000張相終於處理完成，交埋比大會。

執相期間，對得電腦太耐係有機會對顏色失去敏感度，所以每隔一個鐘左右我都會行開一陣郁動下，稍後返回書房，一望到個mon，就有可能發現隻顏色好似唔多啱，咁就又會再tune過，所以離開個mon一陣，係會成品嘅顏色準確度有幫助。

整個禮拜都冇游水，連太太都摸住我肚腩，叫我搞掂後快D落返水。

昨日早上交相後，稍作休息，下晝就踩陣單車遊左一陣，再去我嘅主場cafe飲返杯放鬆一下。

今個星期嘅工作已經完成，今明兩日都係屬於自己嘅時間，好好休息，下星期二清酒評審嘅結果會出爐，到時會再去多一次進行拍攝，會繼續努力。

我對腳，其實好多年前已經出問題。

2009年，入行第一次出overseas去日本影pre wedding，當年好興薄底波鞋，我都有一對，我著住去日本影相，點知幾日裡面隻左腳腳面都有一個位好酸痛，為工作忍住痛，返到酒店就浸熱水，幫助唔大，去到尾聲仲要拐住行，嗰陣時我只認為係著錯鞋，返到香港，對波鞋已經唔再著。

近年，每當有連續嘅婚禮工作，做到一半，左腳好自然會出現酸痛，不過我好少對人講，正常做好工作先，收工返到屋企一除鞋，左腳腳面同一個位置會有少少拱起，一按就痛，所以有時候，如果酸痛持續，收工後我放低器材都會去按下腳舒緩下，不過我就一直冇去認真了解係咩問題。

早前影左一日動漫展，然後第二日又影一日婚禮，由呢兩日開始，左腳肘亦開始出現酸痛，係以前未試過。

通常呢D徵狀，在完成工作得到休息過後就會消失，直到下一次工作先會再出現。

早幾日剪完頭髮，路過花園街排檔，見到一檔賣鞋墊，抱住姑且一試心態買左一對，在剛完成拍攝嘅3日清酒評審裡面，腳面同足弓酸痛情況大大改善，係腳肘一個位置仍然有D問題，呢3日裡面同我一齊做野嘅好兄弟忠哥話我似係足底筋膜炎，佢比左條片我睇，教我拉筋做舒緩。

工作完成，而家在家都有keep住拉筋，希望可以改善到。

好似有D長氣，呢part到此為止。

今年嘅清酒評審活動已經順利完成，今年規模比去年更大，活動時間由去年兩日加至今年三日，而傾談間得知今年開放比公眾參與嘅活動pass早已經全數售出。

今年活動都係響Mira舉行，由於今年活動豐富左，好似品酒工作坊同大師班，仲有Sake Cocktail嘅教學小班，我同好拍檔忠哥3日裡面都要在酒店內嘅唔同樓層來回穿梭。

雖然我對酒認識唔深，但近年我都係鐘意飲清酒多過紅酒，而能夠置身現場感受態度嚴謹嘅評酒場面，得以開到眼界，我覺得係我攝影工作上嘅另一番得著。

一個評酒活動，會有數十位專家同場，背後亦有數十位嘅後台helper幫忙，為保公正，每枝參賽酒都被專用膠袋封住樽身，只有一個代號代替，亦只有極少數人知道每枝酒所擁有嘅代號，而且需要保密，同場亦有會計師監察、點票、做紀錄。

今年主辦單位亦得到一位日本殿堂級嘅酒評家參與。

傍晚時間就係另一重點活動Sake Walker，今年Mira開放晒頂樓Ballroom全層去搞活動 (去年係開半層)，買左pass嘅公眾可以到場任飲任試所有清酒，試完鐘意仲可以即場購買，Mira全晚不斷提供佐酒小食，以我所知，係有客人醉住離開。

我同忠哥影到咁上下時間，都有攞野食，每樣都可以送酒，個蠔餅同炸雞好食到我唔記得影相，而評酒活動完左，Helper亦會到呢度協助每個清酒攤位，有幾位見到我冇相影時，就叫我過去，話斟杯好野比我舒服下，真係好窩心。

好多謝主辦單位主腦Paula同MC Michelle嘅信任，同對我地工作嘅肯定。

如果你都係清酒愛好者，都有興趣參與佢地未來嘅活動，可以follow OSAHK嘅IG：
https://www.instagram.com/osa.hk

更多故事，請點擊相片繼續閱讀

1984，係一本著名小說，雖然我未睇過，但有人形容現今香港嘅情況，同小說所描述嘅好相似。

而現實中嘅1984年，我記憶中，其實係一個好快樂嘅年代。

雖然世界兩大陣營在冷戰中，但整體總算和平。

同年，蘋果推出第一代Mac機 (如有錯請指正)。

香港經濟開始加速起飛，人人有瓦遮頭，生活環境雖然未到好好，但充滿希望同機會之下，大家都生活得好開心，而我正值青春，最無憂無慮嘅年紀，狂熱迷上日本文化，直到而家。

所以上屆東京奧運，我一直都好期待，疫情籠罩下仍然舉辦得好有體面同創意，我已經滿足。

1984年嘅洛杉磯奧運，因為我未夠年齡做暑期工，所以都可以睇到，而中國奧運史上嘅第一金，就係響呢屆獲得。

我仍然好記得呢一屆開幕禮上，睇到84座鋼琴一齊彈Rhapsody in Blue嘅畫面係好震撼。

下一屆奧運，相隔44年後再次重回L.A.，應該係我人生中目前唯一一次，可以睇到兩次奧運在同一地方舉辦，到時再睇，一定感慨良多。

今年嘅巴黎奧運，有東京在前做比較，原本我都不寄厚望，但能夠將城市同運動連結起來，意外地好睇。

終於都完結，可以回復正常作息，4年後嘅事無法預計，可能我已經退休，甚至某個國家……都係唔好講喇。

84年奧運開幕禮嘅full version，可以在youtube搵到，係美國電視台版本，可以睇到當年嘅廣告，開始投入創意，而相關影像同音樂，都能夠如實反映到當時真係一個好快樂嘅年代。

有興趣可以到此重溫 (英屬香港隊在 1:40:30後出場)，見到港英旗飄揚，確實十分懷念。
https://youtu.be/qyH7UOXNIJE?si=vkD9KjRTeo_jsLVW

時常聽到人話好懷念90年代，當時如何繁榮安定，生活如何富足，盛世底下無憂慮。但對我黎講，最值得回憶應該係80年代，呢段時間，社會上創意同科技大爆發，而且不論你出身如何，眾人都皆平等，只要肯努力，都可以按你付出得到相等嘅回報，每個人眼前都睇到向上流動嘅希望。

90年代雖然繁榮，但帶住嘅係一股來自金錢嘅銅臭味，而80年代，每人都努力向夢想進發之餘，朋友和鄰里間係會守望相助，充滿住嘅係濃厚嘅人情味。

兩個快樂繁榮嘅年代，放在我地人生之中，其實係好短暫，而我作為當中嘅幸運兒，有份經歷過，無憾矣。

所以今日我地點解會經常懷念昨日？往往就係因為今日並沒有過得比昨日好。

最後一提：1984年，相機嘅自動對焦技術仍然未成熟，好多經典運動照片都係用手動對焦去拍攝，盡顯攝影師功架。

最新頭號粉絲大點名！💎 Edmond Shi, Vince Lam, Gary Tai, Howard Chan

過去呢個星期，天氣極唔穩定，亦因為工作，整個星期都冇去過游水，希望下星可以繼續。

往年呢個時間，我都已經曬到成舊炭咁，今年天氣比往年差，望住個陰天，心情都會倍受影響，好彩有工作在身，冇機會比自己鑽牛角尖。

曾經睇過一篇報導，北歐冬天日照時間極短，好多人都會響呢個時間情緒病發，呢幾年游水嘅經驗話比我知，除左運動，曬多D太陽，都會幫助到自己思想保持積極，能夠撐得過過去幾年艱難嘅日子，我相信運動同陽光都有一定嘅幫助。

上星期六幫手影左一日動漫展，收工趕返屋企就要做準備應付星期日嘅一個full day嘅婚禮，兩日企左差唔多24個鐘，返到屋企第二朝訓醒就要即刻開機過相，雙腳仍然有D酸軟，日頭過完相後都冇乜精神做野，去到夜晚就正式開始通宵趕工，執相執到眼訓流住眼水都要繼續呢個情況已經好耐冇試過，但總算能夠趕及完成任務。

都係同一句，能夠有人信任給予機會，應該感恩同珍惜，你話工作辛苦？點都及不上冇機會發揮嗰種辛苦。

忙碌過後，今明兩日都可以有時間休息下，做自己喜歡嘅事，我打算下晝踩架單車出去舊區漫遊一陣，飲杯咖啡後去買返個鏡頭蓋，上星期日婚禮完成後衝忙執野，點知前晚攞部相機準備叉電時先發現鏡頭蓋唔見左，應該係漏低響酒店。

昨日都有參與另一件工作，去返一個我充滿回憶嘅地方，可以貼擊圖片繼續閱讀。

我爸爸係打仗時走難黎香港，初時，佢係學剪頭髮，所以我整個學生生涯，都唔使出街剪頭髮。

後來，佢轉去學調酒，仲響老香港年代嘅夜總會做過bar tender。

記憶中，爸爸有個寶箱，收埋左佢嘅飛髮剪，同以前嘅cocktail recipe。

到我長大後，我都有個寶箱，收起自己眼中嘅寶物，應該都有廿幾年冇打開過。

近日屋企做左啲執位，所以順便執好埋其他角落，我執返自己個寶箱出黎，原本忙碌緊都停下來，用左個幾鐘，逐件寶物攞出黎再次回味。

中學校章、小學同中學嘅畢業紀念冊、開始憧憬戀愛時，寫滿歌詞嘅記事簿、仲有初學影相時嘅菲林相底同幻燈片……

感覺好夢幻，每件物件都能夠帶出自己年青時嘅記憶，一個最冇煩惱嘅年代、一段最開心嘅打工日子。

對住堆菲林相底，而家我又好後悔當年掉左部可以scan埋底片嘅scanner，當年買黎係為左scan新人嘅相做成長片段，到我買左all in one嘅printer之後就掉左，如果而家想重新scan過堆底片，都要再諗辦法。

用個幾鐘找回年青時嘅自己後，又回到現實，要繼續執返好間屋，不過，心情好左好多。

有啲物同事，其實係好難斷捨離的。

更多故事，請點擊相片。

沒有工作嘅日子，我就係咁樣過。

起身，check同覆訊息，回過魂後，執拾裝備，set好部單車，中午手機鬧鐘一響，就出發去泳池。

泳池逗留大約兩個鐘左右，回程路經街市，買個生菜，呢個就係當晚主菜，然後，再踩去大部份下午都會去發呆嘅cafe，回下氣先至返屋企，食完野，有相執就執，冇就隨便做自己鐘意做嘅事。

有朋友話我似半退休，我都曾經有同其他朋友咁樣形容過我目前狀態，係有少少似，但我仲未想真正退休，去泳池鍛練，除左想減磅，亦都係為未來有工作嘅時間我可以有體能應付，另外，就係唔想冇工作嘅時間留響屋企唔知做乜，雖然我唔會悶，但都唔想日子過得咁頹。

去年有幸成為香港舉辦嘅日本清酒評審嘅大會官方攝影，今年亦幸運再次得到呢個機會，下個月中，需要連續3日嘅拍攝，練好體能，先有氣力應付。

今日陽光唔錯，雖偶有烏雲遮蓋，但當烏雲散去，陽光會再次燦爛，身體會留下更明顯嘅夏天記印。

本文寫於cafe發呆時，唔知有咩做好嘅時候寫，冇帶老花眼鏡，如有不順或錯字，敬請原諒😊🙏🏻

千呼萬喚，Canon正式公佈兩部新機。

近年每個牌子出新機，規格都有顥著提升，亦都會有所謂新嘅"黑科技"加入。

以前我地有句說話：買機送技術，係用黎嘲諷一D以為買部貴機返黎就一定會影到靚相嘅人，但而家，的確係買機送技術。

而家嘅新一代，如果接觸攝影日子唔耐，我可以講，佢地真係係好幸福。

菲林機年代，幫人影婚禮，最容易買到嘅菲林係100同200度，便利店已經買得到，400度我就未用過，而800度以上嘅菲林微粒粗，而且貴，多數用響新聞或運動攝影等專業領域，並唔適宜用在婚禮上。

用200度嘅菲林影合照，加埋一般閃光燈，快門只能夠比到1/60秒，隻手少少唔夠定都會炒粉，所以就有師傅會用"鎚仔燈" (Metz 60 CT-4)，利用強大火力去縮短快門時間，呢枝燈當時係屬於貴野，唔係個個捨得用。

到我入行時，經歷緊由菲林轉型入數碼嘅時代，二萬五買返黎嘅EOS 5D，已經僅次於旗艦1D，連拍1秒3張，ISO想用到1600時就要想清楚，因為noise會多，但當時能夠用得上ISO1600，對老一輩人黎講，已經算係一個好大突破。

後來添置5D2，ISO1600可以隨便用，ISO3200就要諗清楚，然後到1Dx可以隨便使用ISO3200，大家一直都經歷緊時代轉變，尤期係同一個年代開始，新人對snap shot越來越睇重。

我而家用緊嘅無反，要用到ISO6400時我都可以毫不猶疑，我就感受到而家買機真係送技術。

有時，我碌手機睇下野時都會唔覺意睇到新一代對老一輩嘅攝影手法表現出疑惑，話我地仍然會用燈，有大光圈鏡又唔用到盡，或者，要去到佢地有我呢個年紀時，先至會明白自己當時呢個睇法係幾咁愚昧，我入行初期，都曾經同我嘅前輩有過交集，我都也曾覺得佢地某D手法係跟唔上時代嘅變化，但就係因為全靠佢地嘅經驗，佢地拯救過我一次，從此，對任何行內朋友，我都會保持謙卑。

忽發奇想，如果叫一位新一代用5D影一次婚禮，限制ISO在1600以內，唔知佢能唔能夠好似而家咁得心應手。

正因我地經歷過，所以如果話而家新一代用機好幸福，咁我地就更加幸福。

舊嘅事物，都會有佢值得紀念同實用嘅價值，正如而家手機越出功能越強大，但人與人之間嘅溝通就越冷淡，我始終都好懷念年青時候，同個妹爭電話用，同埋夜晚霸住屋企個電話同朋友煲電話粥嘅時光，可以透過聲音直接感受到對方嘅心情，所以而家，我都仲係鐘意直接傾電話多過用whatsapp，只係時移世易，我被迫多個選擇而已。

Send a message to learn more

以前資訊貧乏，相機價錢昂貴，造成老一輩人買相機猶如揀老婆，千挑萬選，買左鐘情嘅相機返屋企之後，就真係會當老婆咁錫。

話老一輩人玩相機如同娶老婆講法係幾啱，除左千挑萬選，揀啱之後，亦會從一而終，並非話一部機會用一世，而係形容佢地會成為同一品牌嘅永遠忠實用家。

我人生第一部相機係Canon，就好自然地一直追隨。

成為婚禮攝影師十多年來，我都一直係用Canon，由EOS 5D開始，過左幾年，略有小成，就開始想在生涯之年擁有一部頂級嘅EOS 1D，自2009年起，正式成為1仔用家。

頭尾都用過3部，一直用到1Dx II，到第3代出嘅時候，我工作量已開始緩緩下跌，我冇繼續追了。

去年，隨住我都換左無反機，相機箱裡面就只有一部1Dx做後備，其餘兩部，1D4早已退役，長放在收納箱，1Dx II超級大後備，間中攞出黎叉電保持電池活躍。

開工作用機同生活用機我會分得好清楚，我從來唔會帶開工嘅相機去朋友聚會，玩嘅時候，我就只會帶我嘅玩具機，不過呢個多年慣例，隨住去年添置無反機後都打破左。

工作用Canon，玩嘅機我就無限制，目前以sony為主。

Canon下星期會有個發佈會，估計將會公佈推出無反嘅旗艦機。

如果係以前，我一出就會買，但目前作為一個過氣攝影師黎講，我就唔會考慮了。

經過咁多年，我同一班行內朋友都有同樣睇法，用頂級器材，多數都係滿足自己多，同埋對客嘅門面會靚D而已，其實我地用乜野機都會影到相，而手上揸住頂級旗艦機同會唔會多左工作機會係並無直接關聯，係關乎人品同誠信兩件事。

將來係個未知數，但如果有一日，我能夠再有個高峰，我會再考慮一下。

聽日後日，我會去會展幫老友手擺婚紗展，有緣過黎的話，歡迎探班。

Send a message to learn more

今個星期嘅拍攝工作已經順利完成晒，接下來嘅工序就係要響我嘅家族辦公室裡面坐定定執好D相。

早前影過嘅台式餐廳，趁個新menu定案前有新菜式想加入，所以昨日我就返影樓搬器材過北角再次進行拍攝。

為左能夠保持返統一效果，我將上次影過嘅相過晒落手機，然後再砌返一模一樣嘅setting。

燈光搞得掂，但角度調教就要好小心，打開手機對住張相慢慢調，呢part最考功夫，影嘅時候，都要跟返上次用嘅ISO、光圈、快門，甚至鏡頭焦距都跟到足。

下一個難關，就係返黎執相，要跟返上一次影嘅色調同光暗細節調整，盡量做到同上次一模一樣。

店主Fredrick同佢嘅同事都對我好好，啱啱去到，就先整碗招牌牛肉麵比我食，我好鐘意湯底有少少藥材香氣，都未開始影，佢地已經請我飲左兩杯珍珠奶茶，十分感謝你地嘅熱情。

過程都好順利，離開時搬好器材上貨Van，Fredrick交左一袋外賣比我，連我昨晚嗰餐都照顧埋😋

工作上，能夠主客雙方都有信任，又可以響開心嘅環境下完成，係好難得。

前日趁冇工作，繼續去泳池鍛練，或者上天真係接收到我願望，整個下晝都有好靚陽光，今日一樣會去泳池，但願繼續陽光普照😊。

星期日朝早，返左去影樓，好耐冇影過家庭相了，好多謝比機會我嘅client。

11點開始，我10點鐘就返到去，為左盡早開盡個冷氣，唔好等人黎到嘅時候好似入焗爐咁，同時可以早少少set好D燈同背景。

習慣上都會先同client傾陣計，等對方涼返乾個身先開始。

拍攝好順利，不過感覺冷氣開盡仍然都唔夠，中途都要加多把風扇，以前都唔會咁樣，其實冷氣冇問題，舊年仲請專人洗過，呢排一唔落雨出返太陽，就覺得熱左好多。

拍攝完，client離開之後，我立即攞條毛巾衝入洗手間沖個凍水涼，不過呢個時候大廈水箱已經曬到滾左……D水係熱嘅。

如果係去泳池，遇到呢種陽光我會十分快樂，不過工作為先，呢日我只好望住陽光輕嘆。

昨日，就影個公司team building。

同行派job比我，我從來唔會諸多挑剔，又嫌遠又嫌個pay唔好 (除非個pay真係低到離晒地)，我遠近都到，因為機會實在得來不易，除非我發覺我個人能力上未必會做到個job嘅要求，我會如實相告再等job owner衡量做決定，否則，我都唔會say no。

正午時間入西貢，因為唔清楚路面情況，我早個半鐘就call的士入去，最終早到左一個鐘。

同樣望住個藍天同猛烈陽光，我祈求拍攝順利，同埋希望今日我去泳池時，請補返個靚陽光比我。

呢間酒店我未去過，所以都請教過曾經去呢度影過婚禮嘅老友，佢地多數話走嘅時候會難call的士，我睇地圖，酒店行路去市中心，都係10分鐘左右，而且我個job黃昏就會完成，搵車估計唔會太困難。

而原本嘅設定，就係工作完成後，想趁magic hour沿海邊漫步去市中心，可以沿途吹下海風影下相先慢慢搵的士，但完成後，拖住器材，加埋幾個鐘嘅non stop拍攝個身D汗仲未停，最後我都係打消念頭，托酒店職員代call的車，3分鐘後，我就上左車，踏上歸途。

落左車，買盒意粉返屋企做dinner，食完就立即訓著，剛剛5點鐘，我就自然醒左。

今日冇相影，會繼續到泳池享受下陽光，明日下晝，會再進行另一個商業拍攝，要好好加油。

早兩日，因為有野做，所以只係匆忙地寫少少分享就完，其實我仲有一樣野想分享，而家終於得閒寫。

係大叔生涯上嘅一D小回憶。

香港出名舖租貴，新人在香港搞結婚，若干年以後，佢地曾經用過嘅場地，都好大可能成為集體回憶。

我入行之後，曾經影過但已經成為回憶嘅酒店，記憶中有中環Ritz Carlton，銅鑼灣Excelcior、尖沙咀洲際前身嘅Regent (現已重開)。

我在2006年入行，同年，婚姻監禮人制度正式推出，市場上即時有大量證婚場地開設，新人可以有更多選擇，當年氣勢最盛一定係"伊甸園"，K11 Musea位置前身嘅新世界中心、紅磡都會廣場、中環聖佐治大廈、中港城……等，都有佢地嘅場地，嗰個年代，每年都有好多人結婚，而每個月，我幾乎都會有機會去伊甸園嘅場地拍攝，當年人流多到每個場地都會水洩不通，聖佐治大廈假日等電梯上去證婚同觀禮嘅人流量，係唔會輸比纜車總站嘅遊客。

不過，以上所有伊甸園嘅場地，而家都已經成為一大班當年新人嘅集體回憶了。

我係好幸運，入行那年，碰正結婚大潮嗰幾年，每年都可以做到冇停手，至於點解會咁，我會稍後再寫。

6月30號，九展正式結束營運，呢度，都有屬於我嘅回憶。

在我入行初期，冇咁快有婚禮接到，為左生活同累積經驗，我就生日會都會接，我第一個有錢收嘅生日會拍攝，地點就係九展，當時，九展嘅頂樓，係一間叫"君豪會"嘅私人會所，影3個鐘生日會，我只開$400，當年呢個價錢，其實都可以算係做爛市，因為我需要機會累積經驗，所以我願意，而為左報答呢一家人，我同自己講，以後呢家人搵我影生日會，我都會係收呢個價錢，不過，我只係幫佢地影左兩年，如果我冇記錯，小小女主角當年係6歲，今年都24歲了。

我亦都響君豪會影過婚禮，記憶中，係一個好搞笑嘅新郎，同溫柔嘅新娘，我從結婚證書上睇到新郎係再婚，所以我亦開始第一次，證婚後新人接收結婚證書嘅畫面，我建議兩位唔好打開比我影到，兩人明白我意思，向我報以放心嘅笑容。

當時技術唔夠純熟，呢輯相，合照點執都係偏黃，呢個時候開始，我就一路思考要點樣做到好嘅光線，成為跳入以後每次出動都帶幾袋器材深淵嘅契機。

君豪會結業後，由煌府接手，煌府接手後同時開放埋頂樓露天位置做證婚場地，我有好多對以後仍然同我好friend嘅新人朋友，都係響呢度進行婚禮。

時光飛逝，今日九展已經成為回憶，我嘅攝影事業亦隨住年齡增長從高峰自然滑落，但曾經響呢度所經歷過嘅一切，我仍然歷歷在目。

一路寫呢篇野，一路想起以前，除左時間、地點、人物，仲有想起當年嗰一腔熱血同衝勁，今日我心裡面團火依然未熄，但追求嘅野隨時日洗禮已經唔同以前，目前，我追求快樂地工作，好好珍惜同享受每位朋友比我嘅機會。

附圖為古惑仔第3集，細細粒同陳浩南永別嘅經典一幕，地點就係興建中嘅九展頂樓。

上星期，感恩身邊兩位"神"，老友Winson同Carson。

多得兩位，我過左好充實嘅一星期。

Winson同一個商業客戶，同一個地方，同樣門口位嘅印相位置，當然同樣好熱，所以我今年帶多把風扇黎做野。

跟Carson影嘅商業event，一個頒獎禮每個上台攞獎影4張都影左千幾張，晚宴迫爆會場我地唔夠位企，遠距離影個台，腳架升到兩米可以應付得到，不過位置太窄就算有梯都放唔到因為會阻礙賓客，所以影相係由宴會開始就抬住頭舉高手去影直到宴會結束。

呢日大家都企左差唔多10個鐘頭，體能上固然消耗大，但能夠同老友一齊做野，透過walkie一路影一路傾真係幾開心，暫時我未係好多機會幫Carson影野，但我都感受到佢帶隊時嘅領袖魅力，大部份時間會同大家講笑令大家放鬆，需要認真時又會好投入認真，我心目中佢已經係一位好大佬。

再次多謝好朋友比機會。

過去呢個星期，有幸運亦有不幸。

逢係有猛太陽嘅日子，我都唔能夠去到泳池，係不幸。唔能夠去泳池嘅原因，係因為工作，所以係幸運。

我影樓樓上嘅鄰居多年來都係洗衣工場，一大排機就在我頭殼頂日夜運作，機器運作時嘅密集式低頻震動聲，搞到我影樓已經唔可以做到拍片相關嘅工作，以前試過同樓上溝通，都好快改善到，到近年再次出現問題，搵管理處同佢反映，我先知道已經轉左手，而新老闆亦都表明態度，回左一句"你估呢度係甲級商廈呀？"

除左噪音問題，樓上又曾經經歷過火燭，同爆水喉，兩次我都有返黎睇過，都冇即時問題。

火燭開喉救火、同爆喉一樣，水經過地板慢慢滲入我天花板，日子一耐，我天花板部份位置慢慢起泡，但冇即時危險。

兩星期前，影樓管理處又打比我，我樓上又爆水喉，叫我返黎睇下，因為事忙，所以冇即刻返去。

到左星期一，返影樓影麵包，我睇到個泡面積又大左，中午lunch時間，大家食緊飯期間，突然嘭一聲，天花板終於甩石屎，好彩當時嗰個位置冇人，如果唔係肯定會爆光入廠。

我影左相通知管理處，但佢地只能夠比份水浸報告我，我要自己寫信同樓上claim，如果對方冇反應，我就要自行告小額錢債。

我討厭信來信往，Time-consuming之餘，一日未有結果一日都唔可以維修，而且仲要估對方反應，最後，我打比我嘅裝修師傅，攞左初步報價，然後直接走上樓上同佢地傾。

因應之前嘅反應，我原本預左要嘈交，今次我影晒相比佢地睇，冇得抵瀨，而且師傅報幾多，我就claim幾多，我唔鐘意趁火打劫，而今次對方爽快答應，即日賠埋錢，於是我就約定師傅星期五黎開工，星期六已經維修完成。

冧天花係不幸，但能夠快速解決，而且唔需要再成日望住個泡擔憂，係幸運，而今次冇傷到人，係最幸運。

望樓上生生性性，唔好再爆喉。

送多幾張本週嘅作品，更多故事，請看相片內貼文。

難得有機會拋頭露面，當然要留個紀念🤣

Send a message to learn more

兩星期前，多謝老友Edmond推薦，我終於可以揸下相機拍攝婚禮。

但近日嘅工作，mark到今日為止，今年嘅schedule都係印相多過影相。

對我黎講，都冇所謂嘅，能夠繼續在行內有個位置有少少貢獻，都已經滿足。

如果攝癮起，都一樣可以走出去，影下自己鐘意嘅題材，或者睇下約唔約到朋友做model大家娛樂下。

上星期日印相job傍晚先開始，我下晝仲可以同爸媽出去飲茶當係做節，飲完先返屋企抬器材去酒店。

Rosewood已經影過唔少次，黎呢度印相今次係第二次，呢間酒店又真係好靚嘅，好多位都可以打到靚卡，做印相壓力相對冇影相咁大，所以我有少少時間可以響場地遊走。

呢晚大約十點就完成可以離開，避得開散席時難搵車嘅情況，但據當晚都在場拍攝嘅老友Winson講，佢12點幾先叫啱啱收工。

淡季裡面，我地比較容易約下老友見面飲下咖啡，過去幾日都見左幾位，仲有手信收添😊

期待已久嘅新filter已經從老友手中收到，遲少少出去街拍玩下。

下次見😊

今個星期天氣唔好，游水被迫暫停，而且我已經幾日冇踏出過屋企門口，希望打完呢個post可以出到去飲杯咖啡。

早前已完成嘅拍攝工作，都係同食相關，多得有好兄弟推薦，我能夠為一間台式餐廳拍攝新menu。

拍攝期間，都有機會同老闆傾下計，我感受到佢地對出品嘅執著，對未來嘅期望，響而家香港呢個氛圍底下，仍然好努力咁對待自己事業，真係好難得，所以呢日嘅拍攝係做得好開心，我亦都有得著。

最近，同一位年青人重遇，原本佢去年已經到左外國生活，因為想家，所以返黎香港，再思考以後嘅路，我同佢傾左一段時間，送上鼓勵加油。

回憶我年青嘅時候，放工同同事去happy hour，因為自己社會資歷尚淺，我都只能夠坐定做聆聽者，但係我十分享受聽年長嘅同事講野，感覺每一句都係人生哲理，我獲益之餘，亦憧憬自己幾時先可以有佢地呢種魅力。

渴望自己快啲變成熟，但實際上係冇野可以做，隨住歲月如流，我所經歷過嘅故事，今日都成為可以同年青人分享嘅材料，我亦都好慶幸我認識嘅年青人都冇嫌棄我長氣。

自踏入五以後，感覺人生走到另一個關口，令我思考得更多，呢幾年，"年紀大"呢幾個字一直都掛在口邊，連我都覺得自己好煩，因為呢幾個字，內裡或多或少總帶住一啲比較負面嘅意味，我而家正努力戒掉呢個壞集慣，唔知道我呢個情況會唔會其他人都會遇到，踏入50之年，就不其然認老，再過幾年，就開始唔想認老，點都好，我都會緊記，千萬唔好比自己成為一件廢老。

我FB耐唔耐都會睇到朋友轉發一啲心靈雞湯文，其實一直我都會skip走，但最近開始感到越黎越煩，我覺得，如果你有個希望想自己明日會點樣，就請由今日開始去做，我睇到一個FB朋友，每年總會轉發幾次呢啲毒雞湯文，然後就話一定要改變，然後就繼續每年都見到佢重覆講幾次……

我甚至一直都懷疑，李嘉誠、馬雲、劉青雲、發哥……佢地幾時有留下過咁多金句？？

如果幾篇心靈毒雞湯就可以拯救到自己人生，咁而家個個都會活得開心啦。

所以而家見到朋友每轉發一篇，我就一律直接將呢類毒雞湯專頁封鎖。

有啲慶幸自己唔鐘意呢啲婆媽雞湯文，代表住某程度上我思想上仲未真係變老。

可能真係唔啱聽，但活自己想活嘅人生係要靠自己，要改變亦係要靠自己，而唔係靠幾篇雞湯文。

最後，放幾張近期嘅成品，下次見😊

今個禮拜要游嘅水昨日已經完成，但今朝起身望出去見到陽光燦爛，好自然就走去執好背囊出發。

今日輕輕游左幾個塘當朝早熱身，然後就浸在水中好好享受左90分鐘陽光。

有朋友建議我游水唔好帶錶或locker帶，會留低個烘，但係我覺得冇所謂，因為呢個係我有幾努力嘅記印。

每個人身上都總會有唔同嘅記印，有細個貪玩留下嘅，亦有大個衝動引起嘅，我在攝影工作上都有留低過好多記印，只不過不在皮膚上，係留在身體各關節上。

各位朋友好耐冇見，稍後先再更新一下近況。

而家當重回一個以前經常到嘅地方工作，我都會有一種既似曾相識但又不太熟悉嘅感覺。

昨晚嘅Job，我人在香港大學。

我80年代會考full cert但差一分上唔到預科，我在band 1母校裡面嘅職責就係墊底，圍住我坐嘅同學今日個個唔係位高權重就係事業美滿，而家大家都進入收成期，我依然在戰鬥。

佢地一定好熟悉呢個地方，而我如果唔係做左攝影師，相信我一生都唔會有機會踏足呢個校園。

記憶中以前港大係可以隨便影婚紗相，唔記得邊年開始，就改左只準許舊生在事先申請下先可以拍攝。

往後隨住流行飛去外國影婚紗相，同近年嘅郊外小清新橫行，相信而家會去港大影婚紗相嘅人係少左。

我係從自己FB或IG觀察同行post出黎嘅相做結論，近年真係極少在港大影嘅婚紗相出現。

多謝好友Michelle今次令我有機會再到港大。

認識Michelle多年，佢除左有個演員身份，多年來亦係一位活動統籌同出色嘅司儀，由商業活動策劃到婚禮統籌都有好高嘅統籌能力同豐富經驗。

如想認識多D Michelle，可以follow: https://www.facebook.com/sai.events.planning/

因為明日會有拍攝工作，所以今日提早完成本週嘅操練。

經過昨日嘅休息，雙腿酸軟同痛嘅感覺已減輕左好多，適應情況比我想象中快，今日相同運動量，亦開始唔太覺辛苦。

並非想做運動家，只係大叔我想健康D，所以唔會強行去谷自己體能，有工作就努力工作，未有工作就泳池見。

本週開始復操就已經能夠順利有3日嘅運動量，結果算好理想，因應下星期一有婚禮拍攝，我正思考可否提早本週日開始屬於下週嘅操練。

我唔會假期去泳池係因為怕多人，但夏天期間若果假期當日放晴的話，我都一樣會入去曬下太陽。

今日老天爺好比面，由出門到返屋企之間5個幾鐘頭都好好陽光，仲送上涼爽嘅清風，在寧靜嘅公園內，心裡面覺得好平靜，可以暫且脫離昏亂嘅世界一陣間。

環境氣氛再差都要過好屬於自己嘅生活，明日要好好工作，祈求一切順利。

未有工作嘅日子，我每個下午就會去深水埗泳池游水，我心目中最理想情況就係一個星期可以游到四日。

深水埗池每年到二月中就會關閉兩個月做年度維修，去年關閉時，我就口口聲聲話會轉去美孚游，但整整兩個月我都冇付諸行動，到四月中深水埗池重開之日我出發時，先至識摸住自己個大肚腩來後悔。

今年情況有d唔一樣，我好想好想過去，但擔心踩單車路程長左好多，唔知體力得唔得，或者好似以前咁搭巴士去，游完行路返太子，不過我又猶豫不決。

到真係想出去，又落雨，又或者天太陰，最後打退堂鼓，但呢d月份，回藍天氣係經常有，唔通又想學去年咁後悔多一次？

今個星期終於的起心肝，唔好比天氣影響，只要比自己行到出門口就會勝利。

計算過，路程上我比起平時去深水埗泳池來回要踩多6公里，辛苦左少少，但總算能夠去得到，就當額外加操吧。

來回差不多9公里，加埋游水繼續keep住1200米，運動量十分足夠，所以對腳兩日就開始出現酸痛狀況，但我相信個幾星期時間就會適應到。

過去兩日天氣唔太理想，偏偏今日泳池例行封閉清潔冇得游時，就陽光普照，世事就係咁，都冇得怨天。

今日天氣唔錯但唔使去游水，有朋友約我今朝早飲個早晨啡，大家見面傾下計。

有心事嘅時間，搵朋友見面傾下係個好方法，就算心結未解得晒，起碼都叫有個機會抒發一下，比自己個心休息一陣。

曾經講過，面對改變唔到嘅大環境，如何過好自己生活，唔好令屋企人擔心先係目前嘅重要課題。

有朋友話我好似已經乜都唔理咁，我答佢我都會有唔開心，若果又喊又鬧可以改變到結果，我願意再落力d，但而家個世界唔係咁，不如將時間重點先放到自己身上，被困嘅人都冇放棄，我又憑乜野去沮喪？

最起碼，我舊年比人偷晒d野，我所有證件都重新申請返，連759會員卡我都重新攞返，偏偏到而家我就係未攞返張回鄉卡，我唔會跟潮流上大陸飲飲食食行山姆costco先，我之前有回鄉卡，都只限於需要上華強睇下器材，可以親身試下，但而家去唔到住我都唔會在乎。

我有朋友會上大陸玩我唔會在意，我有朋友每日一哭個社會我都唔會再勸，如果佢嘅原則冇變到，我會睇成係佢自己抒發嘅一個途徑，佢地覺得大陸野好食，都叫做開心過，佢地每日要為社會哭喪一次，都叫做抒發過情緒，總好過屈喺個心度。

我選擇去做運動，因為我喜歡水中嘅寧靜，可以遠離負面嘅事物，而且對自己健康都有幫助。

唔知幾時開始我已經接受同體諒唔同人應對壓力嘅方法，佢覺得舒服就由得佢，但我唔可以比任何負面情緒影響到。

先照顧好自己，留有用之軀，就算目前黎睇勝利只係幻想，但世事嘅野，大家點知聽日又會點？

目前我能做到嘅就只有保持善良，能力有限，其餘嘅野，就交比上天安排吧。

我係悲觀，但我唔會比自己絕望。

大家共勉之。

[關於卡片的一些往事]

我地行內朋友聚會時，如果當中有朋友幫手影完相，我地都會講句笑：吖……師傅你真係好喇，比張卡片我，等我姨甥女結婚嗰陣我叫佢幫襯你下……

以上笑話並非虛構，而係確實發生過在我同好多我熟識嘅行內朋友身上。

當年遞上辭職信時，我已經下定決心離開做左接近20年嘅銀行業，但其實我仲未考慮以後要行嘅路，到細心思考後，我就想在攝影行業試下。

Last day朝早，我最後一日利用公司資源，整左好多張紙仔，印左我個名同電話，到派散水餅時同時派埋呢張紙仔，我同同事講話我將會轉做攝影，有機會可以搵我，然而，我都預左結局會係點，相信我一行出office門口，呢張紙仔就會被當垃圾處理，但嘗試過總好過乜都唔做。

回復自由身後，身邊一位對我好好嘅兄弟同我一齊諗左個brand name，其實開始時，我嘅品牌名並唔係Frankie.C Photography，但無論用咩名都好，我都會為自己整卡片。

開始有婚禮嘅工作，每當團隊表現唔錯嘅時候，就會有新人嘅長輩親戚問我攞卡片，佢地所講嘅說話，就係同本文開始時所提過嘅笑話一模一樣，分別就唔只有姨甥女，仲有侄仔、契仔、我雀友個女……

初入婚攝行，面對呢個處境，初時真係好開心，派卡片時亦都滿懷希望，但現實係我太天真太傻。

在經歷過散席時，在已空蕩蕩嘅餐檯上同檯底，執返自己張卡片後，好快我就決定不再帶卡片出去工作，亦都練成左日後面對任何讚美說話，都係聽過就算，千萬唔好抱有任何幻想，有冇做好當刻嘅工作，全場人都會睇到，有心人想搵你，天腳底都會搵到。

往後日子，每當有人問我攞卡片，我就會好有型咁答我今日係黎影相，唔係黎派卡片，到佢地再追問點聯絡我，我先會攞部手機出黎，打開我呢個專頁，叫佢地影低個畫面，返去慢慢睇左先。

睇過梁朝偉套"金手指"，見到佢響地下執返自己卡片呢一幕，就令我回憶起自己呢一段往事。

故事到此為止。

題外話，分享一個我地行內不成文規矩：當我地出去拍攝，如果個job係唔屬於我自己，我地係唔可以派自己卡片比任何人，甚至唔可以私下同任何人交換聯絡，此行為會被視為搶job，屬死罪。

隨住時代進步，早幾個月，婚禮上一位富貴阿姨 (媽媽朋友)想同我交換微信，我當然婉拒，事實我手機都冇裝微信，然後佢就想攞我電話號碼，我最後答佢我老闆唔準。

因為唔可以同富貴阿姨交換聯絡，所以我要繼續努力了。

🎉 本星期我獲得 Facebook 認證為「熱門創作者新星」！

又黎個講故事時間。

好耐好耐之前開始，執婚禮相又好、執婚紗相又好，我都會特別留意地面，除左執走垃圾，更加多嘅係留意地面既反光。

並唔係話地面係滑到反晒光嗰種，而係我留意到日間時份影嘅相，地面永遠係吸收光線最多既地方，尤期係陽光普照既時候就更明顯，會影響到畫面細節嘅表現，有時仲會搶左少少視覺上嘅焦點。

所以我會特別留意住地面部份，如果有需要，我就會落一個漸層mask去收暗地面，呢個用在婚紗相係好有幫助，視覺上由上至下嘅光暗比達到比較平衡，亦可以拯救回比較多婚紗嘅細節。

呢張攝於2016年嘅婚紗相，我仍然記得整個後製過程，我用上述方法收暗左下方地面，然後再落多一層mask想收暗埋畫面上方以將整個海面光暗調至平均，因為手一滑，誤將曝光值一下推到最大，我望見後腦袋就突然"叮"左一下，覺得呢個效果有少少似電影poster，我好鐘意，於是我就先save呢個版本，再做返個原先想做嘅版本大家最後比較，發覺各有各好，如果我冇記錯的話，最後我係有交呢個版本比新人，同一組其餘相片就交返正常光暗，等新人揀相時有多個選擇。

雖然係2016年，但呢次之後，至今我都未有機會到澳門影婚紗相了，當年熟識嘅地方，我都唔知而家變成點，對每個地方名嘅記憶都開始變得模糊。

有時諗爆頭都諗唔到或原先冇計劃想整嘅效果，往往都會因為一個無心嘅錯誤操作，因而再得到啟發。

其實呢類效果好多高手都識做，只係我資質所限，本文亦唔係想教人執相，我冇呢個資格，大家當係大叔嘅回憶錄咁睇就足夠。

[開工大叔]

昨晚工作地點，係跑馬地。

好耐冇見我嘅另一位徒弟阿樂，相信有部份我嘅新人會對佢有印象，近年佢響攝影以外嘅事業發展得非常唔錯，今晚主家係阿樂嘅朋友，特別邀請佢回港今晚幫手，而我都有幸能夠有一個位置可以幫上忙，造就我地今晚久別重逢。

睇住阿樂出外見識多左、人際網絡擴闊左，整個人變得越來越成熟，氣場都改變埋，但佢並冇因為身處順境而自滿，而且仍然好懷念以前我地一齊拼搏嘅日子，真係好有心。

所有賭嘅野我都唔啱，但馬場開揚嘅景觀真係幾靚，每次黎呢度做野都感覺唔錯。

從未試過夜馬時間黎工作，走嘅時候遇到封路，就拖住器材行到去時代廣場搭車返屋企，雖然我比較喜歡寧靜，但只係十點幾，睇見時代廣場都人流疏落，睇黎大家未來嘅日子都需要努力撐住。

昨晚印相，我被安排在會場入口嘅reception位置，於是整晚我就被數人問過洗手間喺邊、有一個人問我有冇尿袋借、有一個人攞走我枝原子筆填飛一去冇回頭、仲有人見到我部電腦同印相機以為我呢度可以落飛。

阿樂用左6年嘅studio就快要搬，而且將會搬到一個好靚嘅地方，我尋晚睇到佢新studio嘅設計圖，極有品味，佢話搬好後會安排大家再聚會，我正期待呢一日。

以前嘅香港，資訊好自由，只係流通嘅渠道好有限。

我初接觸攝影時，唔好講互聯網，我自己連電腦都未有，我唯一可以接觸到攝影資訊嘅渠道，就只有每月一期嘅攝影雜誌，又或者每年一度嘅攝影器材展。

嗰陣時，我身邊只有一位中學舊同學對攝影有興趣，我地每隔一段時間，就會約埋帶住相機週圍去街拍，在那個手機都未出現嘅年代，我地都可以好專心咁去影相，一邊影相一邊傾下計，如果我同學唔得閒，我就自己帶住部walkman，相機袋袋住幾盒cassette就出發，一個人一邊影相一邊聽歌。

在街上搵攝影題材，影到咁上下都要搵d野食休息下，在資訊並唔流通嘅年代，我同我同學就係靠對眼睇、靠個鼻去聞，用呢兩個標準就行入食店醫肚，於是，我地就係唔知頭唔知路嘅情況下，第一次食左上環九記牛腩同西環源記糖水。

當然我地都會有睇錯嘅時候，遇到唔好食嘅，至多下次唔去，我地比左錢，人地煮左野我食，實際上我係冇損失，但若果你夾硬話我有，咁我就形容我係浪費左一次食野嘅機會，但我地有一樣野確實係賺左，就係經驗。

買器材都係一樣，當年只有雜誌介紹，冇得比你上網睇人話佢好唔好，我已經比較幸運，Canon同Nikon兩大牌都有陳列室比你攞到資訊，但鏡頭實物都唔會有好多比你試，就算有，都只係好貴嘅頂級鏡頭，如果玩Minota同其他歐洲牌子想摸下實物仲慘，有錢有面嘅可以去相機舖摸下，如果兩樣都冇，就只有等攝影器材展吧。

我舊同學正正就係用Nikon，我呢個Canon用家連問嘅機會都冇埋，所以想買鏡頭時，最終就只能請教相機店員，咁樣去買鏡頭，自然撞過板，枝鏡影出黎嘅效果同我期望有落差，失望固然會有，但係我點都會賺左經驗，就當係交學費吧，起碼以後我可以憑自己經驗同人講得出枝鏡嘅優點缺點。

買菲林都一樣，我每個牌子都試過，先至知道邊個牌子嘅顏色係我最鐘意，然後到曬相，由街坊舖到攝影界名店、到專業嘅Lab我都幫襯過，先會學識分點為之好點為之差。

自互聯網建立以來，資訊量係幾何級上升，亦都出現左一大班"器材達人"、"飲食foodie"，提供左海量資訊，某程度上，係可以令人減少中伏嘅機會，不過近年，似乎信左照樣中伏嘅例子都有唔少。

我上Youtube睇飲食片，純粹只係我鐘意食，同埋睇片kill time，我長期對佢地講嘅野都會有保留，大家不妨留意下，佢地永遠讚就大大力讚，然後假作持平點都會彈下，但都係細細力輕描淡寫，拍飲食片夠膽響現場大大力狠插落去我咁耐只見過一個"屌總理"。

似乎做Foodie同做攝影一樣，只要夠膽就做得，但做得好唔好，就係後話，我細個睇食家上電視，隨口就講得出大陸唔同地方唔同菜系嘅烹調分別同特色，相同食材唔同烹調方法同時間如何影響味道，去到日本嘅料理評論家，都會話到比你知點解關東關西嘅玉子燒係唔同味，唔同地方嘅拉麵點解湯底會有唔同煮法，而唔係一味識得話好食同唔好食。

所以呢類片我覺得睇還睇，攞個參考就算。

只靠人提供資訊幫你避開晒所有伏位，最後只會令你唔識得分高同低嘅標準。

如果大家有響yotube睇過"文苑飯莊"，你就會明我今晚所講嘅野。

而家有晒咁多"專家"提供資訊，經驗就好似變得唔係咁有價值同意義咁，但其實經驗裡面係會包含住一定嘅知識，對自己眼界都有益，呢個時代，網絡確實係提供左便利，但同時亦提高埋人嘅依賴性。

我影婚禮嘅時間，夜晚crew meal二百幾蚊一碟炒河粉、三百蚊一個burger我都食過，但時間緊迫，我都只能三扒兩撥快快食完趕住影相，根本冇心情去了解佢有幾好；又有時新人安排我地入座，我又冇時間食，叫侍應姐姐幫忙入盒外賣，餓住返到屋企完全放鬆後，坐定打開兩盒已經凍晒嘅食物，我都會覺得係人間美味。

與其一味依賴網上資訊，不如嘗試下自己尋寶吧，靠自己能力搵到驚喜，會更加開心呢。

圖為我耐唔耐都會去一次嘅深水埗街邊茶檔，有潔癖同熱愛打卡嘅人多數唔會去，但佢地咁就會錯過可能係深水埗最好味嘅奶茶。

遲來嘅新年快樂，祝各位身體健康，未來日子任何困難都能夠順利渡過。

過年時，大家有冇參與過乜野盛事？睇煙花？去廟街篤燒賣？睇花車？睇賀歲波？

我自己除左年初一去左父母屋企拜年外，其餘時間都係留響屋企，初二開始cafe有開，我每日下晝就踩住部單車，先感受一下人少車少嘅深水埗，然後就去飲杯咖啡順便派利是，整個新年假，我就係咁樣渡過。

我都有留意美斯之亂，所以一個人嘅見識、能力，就反映到佢能唔能夠成就到大事，由一班廢人把持住權力，以為比少少錢就可以用到你盡，結果大家都睇到。

國際都會個朵唔係夾硬煲出黎，係由上至下，上層嘅透明高效有法治有制度，至普羅市民層面嘅文明高質素結合而成，進步之中仍保留過去值得堅守嘅核心價值，種種加埋，先可以成為呢個城市嘅個性。

而家我城失守，任你班權貴點樣吹點樣煲，可惜你做出黎嘅事情全部都違背晒核心價值，你自己唔知自己蠢唔緊要，你都唔好當全世界都同你一樣咁蠢先得架。

新年流流唔開心嘅事就講到呢度算，不如再想下當年，80年代，日本風襲港，氣勢絕對唔會比而家韓風弱，當時大家眼中嘅日本，已經係潮流、精緻、進步嘅代表，而日本人有禮貌已經係世界公認嘅 (當然同時亦有好多人話日本男人好咸濕🤣🤣)。

1985-86年之間，日航出左個大型推廣計劃，香港除左密集嘅電視同平面廣告，仲有響商業電台贊助左個節目，每個禮拜六深夜，會播好多日本歌，主持仲會介紹好多日本嘅風土同潮流，對於嗰個年代屋企冇能力搭飛機旅行嘅我，每個禮拜準時聽呢個節目就係我最大嘅快樂來源。

進步、多樣、活力、有禮、潮流先驅呢幾種特質當年已經令好多人對日本十分之神往，呢個大型promototion只係錦上添花而已。

值得一提，當年呢個大型promotion嘅主題曲，亦都係一首充滿活力嘅歌，可以籍此機會，再分享一下:
https://youtu.be/-egTzHF9k-I?si=SrEUh4sAUoOgxLBA

最後我想講：日日自己話自己靚係冇用架，要人地都認同你係靚先得架。

但願各位同路人今年平安，激少D氣 (唔好睇咁多新聞)

TOKYO,CITY OF WONDERS.-村田恵里(무라타 에리) 村田恵里(무라타 에리) 2nd single 곡작사:마츠모토 잇키작곡:사토 타케루편곡:사쿠마 마사히데

[大叔收爐]

昨日，終於完成晒所有農曆新年前嘅婚禮，可以準備過年。

過去幾日感覺病病地，昨日早上出發時把聲其實已經沙晒，去到夜晚越來越差，上的士時，我連講個目的地都要費好大氣力，至出post嘅呢一刻，我已經進入完全失聲嘅狀態。

太太昨日已幫我買左藥，而家一路食緊，今晚幾家老表集體團年飯，註定我會好似個謝師宴毒撚咁出唔到聲。

如果呢兩日都未開到聲，我星期一就會去睇醫生打枝針，希望新年前可以好返，唔好帶病過年。

值得慶幸係我撩左4日鼻，都確認唔係又中招。

在此，再次感謝過去一年搵過我幫手嘅所有同行朋友、商業客戶，你地對我嘅情與義，令我可以安然走過好艱難嘅一年。

亦都要感謝一直響呢度睇住我成長同改變嘅各位朋友，由一隊人變成一個人，雖偶然會感覺孤獨，但響呢度寫幾隻字抒發一下情緒嘅同時，亦會得到大家嘅回應同鼓勵，係好窩心嘅，我好討厭賣慘搏取同情，而家香港有邊個唔慘？我亦無意扮命運鬥士，做回本來嘅自己，保持唔迷失先最重要，人一生本來就會遇到風雨同陽光，好境與逆境互相交織，人生先算完滿。

預祝各位新年快樂，最緊要身體健康😊🙏