نظرا للظروف الحالية التي يمر بها موقع توصيلة ، فقد قررنا الاتي :
التخلي نهائيا وبلا رجعة عن الفكرة، مش حنرميها يعني لا بس مش حنكمل ولا حنطور فيها.
اغلاق الموقع تماما، معلش مش حنصرف على الموقع ومحدش حيستفيد منه.
تحويل موقع توصيلة الى كود مفتوح المصدر (open source) كي يستفيد به جمهور الشعب العظيم، مش معقول شغلنا حيضيع على الفاضي، والي عاوز يستفيد من خبرتنا فى الفكرة احنا ممكن نساعده
الاسباب التي دعت الى اتخاذ هذا القرار :
الظروف السيئة التي تمر بها البلاد، النهاردة كل واحد خايف يمشي فى الشارع ، حتقوله خد حد معاك فى العربية !!
الفكرة تحتاج لتغير كثير في ثقافتنا>، وانا حستفيد ايه لما اوصل حد معايا !!
الخوف على الممتالكات الخاصة ، احنا شعب بيخاف على حاجته ، لما تقول لحد خد حد معاك فى سكتك يقولك العربية حتتوسخ !!
لكي تنجح الفكرة يجب ان يكون هناك عدد كبير من المستخدمين وانت ايه رأيك : الفكرة مش حتنجح علشان محدش حيستخدمها ، طيب وانت حتستخدمها .. اكيد !!
بعض الاخطاء الشخصية، مش بعض الصراحة لا كتير، مش عيب اننا نغلط بس العيب اننا منعرفش ايه الغلط وازاي نستفيد منه.
ابدأ بنفسك .. وده اي علاقته بالفكرة حضرتك ، الفكرة فى الاساس قايمة على مساعدة الغير ، مع القليل من المكاسب الشخصية ، فلو انت معندكش استعداد ، يبقى اكيد غيرك حيبقى زيك.
الفكرة مستمرة وممكن تطبقها .. ازاي يعم مش بتقول ان الموقع حيقفل !! الفكرة طبعا تقدر تطبقها مع اصحابك بس الموقع الي كان معمول علشان يسهل الموضوع ده مش حيبقى موجود .. ممكن تشوف موقع تاني !!
عاوز اعمل مشروع جديد !! افتح سنترال !! كل واحد عاوز الفكرة بتاعته هي الي تنحج وهو الي يكسب ، محدش بيفكر انه يحط ايده فى ايد الي جنبه علشان يعمل حاجة واحدة مشتركة بينهم وكبيرة ، كله بيحاول وممكن يفشل ، مع ان كان ممكن كله يحاول وكله ينجح ان شاء الله.
على الرغم ان معظم المشاكل الي فاتت قمنا بحلها من خلال موقع توصيلة إلا ان في ناس كتير بتحاول تكون دايما هي المستفيدة ، يعني تضحية قليلة مكاسب كتير كان هو شعارهم، محتاجين نتغير كتير ، محتاجين نفهم اكتر محتاجين نفتح عقلنا اكتر واكتر واكتر.
