اللجنة الثقافية - إتحاد طلاب طب الأسكندرية

ك و احنا قدرنا أو مجموعنا أو ظروفنا جابتنا في جامعتها شاركنا في الثورة على أرضها.

بنحاول نعوض سنين السكات و نرجع قوة الطالب الجامعي المثقف اللى لما يتجمع على فكرة يهز عرش و يحاكم ظالم..... الطالب اللى حيبقى مواطن عامل يبنى و يزرع و في حالتنا يعالج .....بنحاول نعيد تشكيل القوة الطلابية اللى فرطوها في ساقية الامتحانات و الظروف و الخوف .....

احنا مين ؟!

احنا اللجنة الثقافية كتلة ال12 طالب و طالبة بمختلف توجهتنا الفكرية و الثقافية على بلاطة و من غير حوارات فينا السلفي و الاخوان و اللى مالوش تصنيف و صاحب الفكر المتحرر احنا مراية ليكم كل واحد فيكم ليه واحد شبه عندنا .....فلو عاوز تسمع رجال دين معانا واحد زيك عاوز يسمعه برضه و بيحضرله ندوة و لو غاوية شعر عندنا واحدة بتجرى ورا الشعرا و تجمع أرقام تليفوناتهم عشان يشرفونا في الجامعة .....

المطلوب مننا ايه ؟؟! عشان لو ماعملنهوش تبلغوا عنا شرطة محاربة الفساد المهنى ....صحيح مافيش حاجه اسمها كده بس لازم يكون فيه ......المطلوب

ندوات لاصحاب الفكر المستنير اللى قبل 25 كانوا ممنوعين من دخول الجامعة أصلهم بشر عندها ضمير و اللى عنده ضمير وقتها مكانه أمن الدولة مش منابر العلم

مكتبة تغطى كل الانماط من سياسة و اجتماع أدب و دين

مجلة تعرضوا فيها آرائكم و افكاركم

صالونات ثقافية عشان نسمع بعض

و واسطة العقد... كريزة اللجنة :: الاذاعة اذاعتنا بمجهودات شبابية نقية تغطى شئون الكلية من دراسة و ثقافة

رؤيتنا ايه ؟؟!

قررنا أننا نوظف مرجعياتنا و افكارنا على اختلافها في عمل جماعي مفيد هدفه حرية التعبير عن شتى الافكار و حرية الاختلاف شغلنا الشاغل كيف نختلف باحتراف بآدمية بموضوعية بحيث نعرض الرأى و الرأى الآخر و في النهاية يسلم المختلفين على بعض بحرارة وهما بيتمنوا التوفيق للجميع زى ما الامام الشافعي بيقول " ما جادلت أحدا إلا و تمنيت الحق في جانبه " صدقا مع النفس و انتصارا للحق لا للذات .....نوظف اختلافنا اللى ربنا خلقه سنه فينا كما في سورة هود " " وَلَوْ شَاء رَبُّكَ لَجَعَلَ النَّاسَ أُمَّةً وَاحِدَةً وَلاَ يَزَالُونَ مُخْتَلِفِينَ * إِلاَّ مَن رَّحِمَ رَبُّكَ وَلِذَلِكَ خَلَقَهُمْ "

و في الانجيل " احبب إلهك من قلبك و قريبك كنفسك " و القريب هنا من يفعل الرحمة دون النظر إلى نوعه أو جنسه أو دينه

في انشطة اللجنة مساحة للحوار للكلام الصمت مش وسيلة للتعارف فاتكلموا زى ما عم جاهين قال



لولا اختلاف الرأي يا محـــــترم



لولا الزلطتين ما لوقود انضرم



و لولا فرعين ليف سوا مخاليف



كان بيننا حبل الود كيف اتبرم ؟



عجبي !!!!

فاتكلموا



الكلمة ايد ، الكلمة رجل ، الكلمة بــاب ،

الكلمة نجمه كهربيه فى الضباب

الكلمة كوبرى صلب فوق بحر العباب ،

الجن يا أًحباب ما يقدر يهدمه ...



فاتكلموا محلا الكلام ما أعظمه ما الزمه