Cook's Corner

فضلا وليس امرا تابعوا هاد الصفحة تاع اخت تحط هي تان وصفات اقتصادية ❤️

صابلي شوكولا ❤️
لبارح طيبتهم والصباح كملت ڤلاصيتهم درتهم سامبل
العجينة فيها 250 غ زبدة طرية مع كأس سكر ناعم خلطتهم مليح حتى تولي كريمة بالباتور وزدت قرصة ملح ولافاني وكملت نخلط وزدت ربع كأس زيت وكملت نخلط وزدت زوج صفار بيض مع بيضة كاملة وكملت نخلط وزدت زوج مغارف كبار كاكاو ونخلط وزدت فرينة مع نص مغرفة صغيرة خميرة الحلوى والفرينة نزيدو بالشوية حتى تتلم العجينة تكون طرية انا الفرينة درت كيلو ناقص زوج كيسان العجينة خليتها خمس دقايق وبديت نطبع.
الحشو: راهي السخانة امالا درت كراميل ثقبتها مع حلوة الترك ودرت كريمة الزبدة خلطتها مع شانتيي ودرت ف الحواشي مكترتش باش ماتسيحليش وڤلاصيتها ب شوكولا دادا زدتلها مغرفة زيت.

تمر محشي بالشامية يوالم المناسبات❤️
درتو بطريقة وحدخرا ماشي تاع نفتح و نعمر الحبة
الوصفة: حطيت الكيفية ف الصور
في أشوار حطيت كمية من التمر كنت مسحتوا ونحيتلوا النواة وزدت عليه كمية من المكسرات رحيتهم مليح حتى تولي عجينة نفتحها على شكل حربوش ونحط وسطها حلوة الترك ونعاود نغلقها (كيما نخدموا المقروط ) ونشكل بودان ونقطع قطع صغيرة قد الحبة تاع التمر ونحطهم فالكونجيلاتور قيس ما تشد الحبة روحها.
ذوبت الشوكولا في حمام مائي وزدت عليها مغرفة زيت وڤلاصيت بيهم الحبات ودرت خطوط بالأبيض والتزيين اختياري.

هاد ليامات راني عيانة مارانيش نحطلكم بزاف ان شاء الله نعاود نولي كيما كنت ❤️
فطائر برغر محشية 🍔
العجينة:
كأس ونصف حليب دافئ زدت عليها ملعقة كبيرة ممسوحة خميرة خبز وملعقة كبيرة سكر خلطتهم وزدت بياض بيضة وكملت نخلط وزدت أربعة ملاعق كبار زيت وخلطت وزدت مغرفة كبيرة حليب بودرة وفرينة حسب الحاجة والملح لمهم العجينة تكون طرية نعجنوها شوية ونجيبوا ملعقة كبيرة زبدة نحطوها وسط العجينة ونكملوا نعجنوها حتى تدخل هاديك الزبدة مليح فالعجينة ونخلوها تخمر مور ما تخمر نقسموها كريات نزيدوا نخلوهم يخمروا شوية.
تفتحوا كل كرية نديرو الحشو انا درت صلصة حمراء تحبوا ديروا مايونيز ولا اي صلصة تحبوها وزدت كفتة وزدت فرماج وغلقت الحبة ( راني حطيت فيديو فالستوري كيفاش نغلق الحبة ) ونكمل كامل الحبات بنفس الطريقة ندهنهم بصفار البيض مخلط مع خل وحليب وندير الجلجلان ولا السانوج وندخلها طيب لتحت ممبعد لفوق حتى يتحمروا.

قغاتان بطاطا وباذنجان بنينة وصيفية 🥘
الوصفة:
اول طبقة درت بيشاميل وممبعد درت درت فريت كنت قليتوا مربعات صغيرة وزدت طبقة باذنجان تحبوا تزيدو قليشة وزدت شوية بيشاميل وزدت صدر دجاج كنت قطعتوا مربعات و مارينيتوا وقليتو وزدت طبقة آخرى تاع بطاطا مقلية ودجاج وملفوق كامل درت بيشاميل وفرماج راپي ودخلتها تتحمر غير ملفوق تجي مشمخة وبنينة

وجدتلهم شوية مادلان لقهوة العصر❤️🧁
الوصفة:
بالخلاط الكهربائي خلطت زوج حبات بيض بدرجة حرارة المطبخ مع كأس إلا ربع سكر وزاست الليمون وفانيليا ورشة ملح حتى يولي خليط بيض زدت نصف كأس زيت بالتدريج و كأس إلا ربع حليب بالتدريج خلطت مليح وزدت فرينة تقريبا كأس ونصف مع زوج أكياس خميرة الحلوى ونكمل نخلط بالباتور شوية ونفرغهم في ليكيسات وحطيت حبيبات شوكولا فوقهم و يطيبوا لتحت ولفوق انا هاد الكمية خرجتلي 12 حبة وشفتوا وين طيبتهم معنديش مول تاع المادلان سلكت راسي بهادوك ليمول اليمينوم.

درت وحد لميني بيتزا طرية وبنينة للبحر 🍕🌊
الناس تعوم وانا نكتبلكم فالوصفة 😅
درت كأس حليب دافي مع مغرفة كبيرة سكر ومغرفة ماشي معمرة خميرة الخبز خلطتهم وزدت ربع كأس زيت وبياض بيضة ولا حبة كاملة خلطت مليح وزدت زوج مغارف كبار لحظة يعني حليب بودرة ولا تحبوا زوج مغارف ياغوورت طبيعي وزدت الفرينة والملح ونلم العجينة تكون طرية نعجنوها شوية ونخليها تخمر نص ساعة حتى لساعة.
ولاصوص شاركتها معاكم من قبل❤️

سلطة المعكرونة بصلصة بزاف بنية سييوها بزااف خفيفة وساهل تاع صيف ❤️
غليت مقارون اي نوع تحبوه مع جلبانة مع شوية زيت وملح.
كي غلا صفيتو ورميت عليه ماء بارد باش يقعد حبات زدت معاه تونة و ذرة ولا كيما تحبو طماطيش بصل لمهم يقعد اختياري والصلصة فيها علبة ولا علبتين فرماج ريجيم ومايونيز وملح وعصروا الليمون وزعيترة وشوية زيت وخلطوا كلش مع بعض وخلوها تبرد شوية وبصحتكم.

كوكيز 🍪 سييت نديرو بالطريقة الأصلية تاعو
الوصفة:
خلطت كأس زبدة ذايبة تكون باردة مع كأس إلا ربع سكر مخلط بين بني وسكر أبيض عادي ادا معندكش بني ديروه كامل أبيض ورشة ملح وفانيليا وخلطت المليح وزدت حبة بيض وكملت نخلط وزدت فرينة وربع ملعقة خميرة الحلوى ونلموا العجينة تكون طرية ماتكتروش الفرينة والفوسط حطو قطع شوكولا ولا كيما تحبوا تقدروا ديرو زبيب ولا تمر.
العجينة ندخلوها للفريجيدار غير ملتحت ساعة ونبداو نشكلوا كريات ادا تحبوهم طالعين ولا كيما درتهم انا هابطين والفور شعلوه من قبل يسخن والكوكيز مايديش بزاف طياب تقريبا ربع ساعة لفوق ولتحت مالازمش تكترولو طياب راح ييبس ملداخل.

هاد الكيكة قد مانديرها ماتتشبعش ❤️تحبوا تسمونها كيكة السبع ملاعق لمهم تجي بنينة وخلاص
الوصفة:
في إناء خلطت زوج حبات بيض مع كأس إلا ربع سكر وفانيليا وزدت سبعة مغارف كبار زيت وسبعة مغارف كبار حليب وربعة مغارف كبار قهوة سائلة ونقعد نخلط غير بخلاط يدوي وزدت زوج مغارف كبار كاكاو بني وفرينة مغربلة تقريبا يجو سبعة مغارف وكيس خميرة الحلوى نخلط مليح حتى نتحصل على خليط ثقيل شوية دخلتها طيب غير خرجت شربتها بالحليب وخليتها تبرد.
الطبقة الأولى درت كريمة شانتيي وعاودت دخلتها للكونجيلاتور تحكم روحها وملفوق درت شوكولا ذوبتها مع الحليب وخلوها تبرد باش تحكم روحها.

ميني سندويتش طري وخفيف ومليح للصيف ❤️
تلقاو الفيديو تاع طريقة التحضير ف صفحتي على tiktok
العجينة درت كأس حليب دافئ مع مغرفة ونص كبيرة خميرة ومغرفة كبيرة سكر خلطت مليح وزدت بياض بيضة وربع كأس زيت وكملت نخلط وزدت زوج مغارف كبار حليب بودرة وملعقة كبيرة ياغوورت طبيعي وخلطت وزدت الفرينة والملح ولميت العجينة تكون طرية نعجنوها ونخليها نصف ساعة تخمر وموراها نحللوها شوية خشين مستطيلات ونغطوهم يخمرو ربع ساعة وندهنوا بالصفار ونديرو جلجلان وسانوج وندخلوها طيب.
الحشو : انا درت صدر دجاج مقطع درتلو ملح +فلفل اسود+توابل شاوارما+ سكنجبير+كيري+نصف م خردل+ عصرة ليمون +مغرفة صغير خل+معدنوس مقطع+ربعة سنات ثوم+ ملعقة ياغوورت طبيعي وخلطت الكل مليح وحطيتو فالفريجيدار.
كي قليتو رميت عليه حبة بصل مقطعة وفلفل أخضر مقطع.

جمعة مباركة ❤️
كل جمعة نسيي ندير حاجة تقليدية وليوم درت البغرير بالعسل والزبدة لقهوة العصر
انا درت كمية صغيرة
زوج كيسان سميد رطب (رقيق)+ زوج مغارف كبار فرينة+ ثلاثة كيسان ماء دافئ+ملح+ نص مغرفة كبيرة خميرة الخبز+ وحدة خميرة الحلوى و خلطتهم بالميكسور تقريبا زوج دقائق وطيبتهم ديراكت مخليتوش يخمر.
العسيلة:
درت في كاسرول كأس سكر مع كأس ماء ونصف حبة ليمون وخليتهم يغلوا.
وفي كاسرول وحدخرا درت كأس سكر خليتوا على نار هادئة حتى يولي كراميل وفرغت عليه بالتدريج هاداك السيرو وقعدت نخلط حتى يعقد شوية طفيت ودرت زبدة.

فطائر مقليين خفاف تاع صيف🥟
العجينة درت كأس حليب دافئ مع نص مغرفة كبيرة سكر ومغرفة صغيرة خميرة خبز ونخلطوا ونزيدو نص كأس زيت وحبة بيض ونخلطوا ونزيدو الفرينة مع الملح ومغرفة صغيرة خميرة خبز نلموا العجينة نغطوها نخلوها نص ساعة ونشكلوا كريات نزيدوا نخلوهم نص ساعة يرتاحوا.
الحشو درت حبة بطاطا مغلية مع علبة تونة وذرة ومعدنوس ورشة ملح وشوية فرماج خلطت الكل مليح افتحوا كل كرية وديرو الحشو وعاودو اغلقوا وزيروا الحواشي باش ماتتفتحش ونقلوهم في زيت يكون سخون وغامق على نار هادية حتى يتحمروا وينتفخوا.
جربوهم يجوا بزااف بناان وخفاف لداخل.

كيكة عيد ميلاد بلا عيد ميلاد 🥳
راني فرحانة كي خدمتها مازال نزيد نتعلم الديكور❤️
الوصفة :
الجينواز البلاطو لي خدمت بيه 30×30 درت خمسة حبات بيض مع كأس إلا ربع سكر ورشة ملح ولاروم تاع البندق ولا لافاني طلعتهم مليح حنتى نتحصل على خليط أبيض ثقيل زدت عليه تقريبا ربع كأس زيت وكملت نضرب فيه وزدت ستة مغارف كبار فرينة مغربلين ومغرفة صغيرة خميرة الحلوى ونخلط بالفويي ملتحت للفوق ونفرغ ف البلاطو ديرو ورق طهي باش ماتلصقش وتدي تقريا 15 دقيقة طياب.
قسمتها بالسارسو مربعات وبديت ندير طبقة ونشربها مليح انا الحشو درت كرام شانتيي طلعت زوج كيسان ونص مع كأس ماء يكون باااارد وقسمتها على زوج نص خليتها بيضة ونص زدت شوكولا
ودرت جوز وشوكولا وبنان ونتوما والاختيار ديرو واش عندكم وحطيتها تبرد مليح كي خرجتها غطيتها كامل بالكريمة تاع الشوكولا وزدت خليتها تبرد والتزيين درت حاجة خفيفة درت شوكولا امباسادور ذوبتها مع كرام ليكيد وخلولي رايكم.

أخرجت السنكوشي الذي بداخلي😁
بيتزا كاري هاد لمرة سييتها بالسميد 🍕
كأس ماء دافئ درت فيه مغرفة ممسوحة خميرة الخبز مع مغرفة كبيرة سكر خلطتهم وخليتهم يتفاعلو وفي اناء حطيت زوج كيسان كبار سميد رطب ناعم مع زوج كيسان كبار فرينة وملح ونص كأس زيت وبسستها مليح وزدت فرغت هاداك الكأس لي خليناه يتفاعل وزدت نص كيس خميرة الحلوى وخلطت وقعدت نلم فيها انا لما جاني سواسوة ولميتها عجنتها شوية وخليتها تخمر وعلى نص ساعة نكسر التخمار بيدي ونعاود نخليها تخمر نص ساعة ندهن البلاطو بالزيت ونبسط العجينة تان بالزيت بيدي باش تجيكم ساهلة ونثقب بالفرشيطة وديرو ملفوق واش تحبوا.
لاصوص انا نرحي حبات طماطم نديرهم ف كاسرول نزيد نص مغرفة طماطم مصبرة وملح وزيت وفلفل اسود وعكري ورند وزعيترة ونخليها طيب بعقلها كي طيب ندير مغرفة صغيرة سكر تجيكم حمرة وحلوة مافيهاش القروصية.
كي طيبوها ملفوق ماتخلوهاش بزاف باش ما تنشفش لاصوص.

قهوة العصر بحلوة الطابع ❤️
الوصفة درت زوج حبات بيض مع بياض بيضة و الصفار باش ندهن بيه زدت مبشور ليمون ولافاني و كأس الا ربع سكر نخلط مليح ونزيد كأس زيت ونخلط ونزيد زوج مغارف كبار مايزينة وزوج خميرة الحلوى وفرينة حسب الحاجة حتى تتلم.
انا الحبات مانحبهمش طالعين ادا حبيتوهم طالعين ومشققين اطبعوا الحبة خشينة وادهنوا بالصفار.

العصبان الجزائري من يديا هاد المرة موالفة غير ماما طيبوا وجا بزااف بنين 👌
الوصفة:
قطعت الرية والأمعاء وشوية دوارة مقطعة إلى مربعات درتلهم قصبر ومعدنوس وكمية من الأرز وحبة بصل مرحية وسبعة سنات ثوم وملح والتوابل درت كركم وفلفل اسود وعكري وسكنجبير وتوابل الشاورما وكمون وشوية قرفة وخلطت كلش مليح.
الكرشة كنت نقيتها وخيطتها بالمقلوب باش مايبانش الخيط وخليت فتحة قيس مانعمر الحشو كي نعمر الحبة نكمل نغلقها ونخلي فتحة صغيرة برك باش الروز ينتفخ.
المرقة في كوكوط درت حبة بصل مقطعة مربعات مع سنات ثوم قليتهم وزدت طماطم مصبرة وزوج حبات طماطم مرحيين ودرت التوابل نفسهم لي درتهم فالحشو وزدت الحمص قليتهم شوية وفرغت الماء سخون وحطيت حبات العصبان يطيبوا.

قلت لازم شاوارما قبل مايخلاص اللحم🌯👌
خبز التورتيلا ادا حبيتو الوصفة نعاود نحطهالك.
اللحم قطعتو صغير ودرتلو فلفل اسود وتوابل شاوارما وعكري وملح وكاري وسكنجبير وعصر ليمون ومغرفة زيت ونصف مغرفة خردل ونصف مغرفة طماطم مصبرة وزوج سنات ثوم ونص حبة بصل مقطعة صغير خلطتهم مليح وحطيت اللحم ف الفريجيدار.
كي طيبتهم دهنتهم بلاصوص لي قعدتلي كي قليت اللحم.
الصلصة درت مايونيز زدت معاها فرماج تاع الحبات ولا العلبة وزوج سنات ثوم وفلفل اسود.
ودرت بطاطا مقلية وبصل وطماطم مقطعين وفرماج.

بسبوسة بالكريمة تجي بزااف بنينة 👌❤️
المول لي خدمت بيه صغير القيس تاعو 18×18 ادا حبيتوا المقادير تاع مول كبير نخليلكم الوصفة ف التعليقات.
الوصفة:
الشاربات اخدموها هي اللولة
درت كأس ونص سكر مع كأس ونص ماء نص حبة ليمون ونص حبة برتقال خلطتهم وخليتهم على النار كي بدات الشاربات تغلي حسبت عشر دقايق وطفيت.
خليط البسبوسة:
درت زوج حبات بيض مع كأس سكر وقرصة ملح و مبشور ليمون خلطت مليح وزدت نصف كأس زيت بالتدريج و نصف كأس حليب لي يكون شوية دافي يعني ماشي بارد خارج من الفريجيدار بالتدريج خلطت مليح ودرت كأس ونص سميد متوسط خلطت وزدت مغرفة مملوءة نواة كوكو ومغرفة فرينة مع نصف كيس خميرة الحلوى خلطت مليح انا الخليط شفتوا شوية خفيف زدت زوج مغارف سميد يعني على حساب السميد والخليط لازم يجي ثقيل شوية ماشي خفيف بزاف.
فرغت نصف الخليط فالمول لي كنت دهنتو بالزبدة وحطيت البسبوسة طيب ماشي حتى تتحمر غير تحكم روحها نخرجها نحط فوقها الكريمة لي فيها زوج كيسان حليب زوج مغارف ممسوحين مايزينة وسكر حسب الرغبة ولافاني نخلطهم ونحط على نار هادية حتى تثقال الكريمة نطفي ونزيد نصف مغرفة زبدة وستة حبات فرماج ومغرفة ياغوورت طبيعي كي نفرغ الكريمة فوق البسبوسة نزيد نكمل هاداك النصف الثاني تاع الخليط فوق الكريمة وندخلها تكمل طيب لتحت ولفوق حتى تتحمر وغير تخرج نشربها مليح ونخليها تبرد باش نقسمها تكون الكريمة حكمت روحها انا قسمتها ديراكت لقيت الكريمة ذايبة بصح كي عاودت خليتها حكمت روحها مليح وتجي بنينة جربوها.

دوام الحال من المحال الحمد لله على كل شيء❤️
موسكوتشو 🍞
بالنفس الطريقة لي موالفة نخدمها غير هاد لمرة درت معاها كرام ليكيد
ثلاثة بيض+ كأس غير ربع سكر+ لافاني خلطتهم بالفويي
زدت عليهم نص كاس زيت بالتدريج وقرصة ملح ومغرفة صغيرة خل ونقعد نخلط مانحبسش وزدت نص كأس حليب مخلط مع نص كأس كرام ليكيد بالتدريج ادا ماكاش ديرو كأس كامل حليب ولا علبة ياوورت + وزوج ونص كيسان فرينة مع كيس خميرة الحلوى ادا لقيتوها خفيفة زيدو فرينة حتى يجي القوام ثقيل شوية فرغت فالمول ودخلتها طيب.
كي طابت جبت هاداك المول تاع السيقار وقعدت ندخل فيه في وسط الموسكوتشو باش يديرلي حفرة وعمرتها بالشوكولا والتزيين يقعد اختياري.

لحم مفور يجي بزااف طري وبنين قدمتو مع الأرز 👌
الوصفة:
في إناء درت زعيترة وورقات رند وملح وفلفل اسود وعكري وكركم وسكنجبير وتوابل الشواء ونص مغرفة كبيرة طماطم مصبرة ومعدنوس مقطع وملعقة صغيرة خل وعصرة ليمون ومغرفة صغيرة خردل ونص حبة بصلة مقطعة صغير وزوج سنات ثوم مرحيين وزوج مغارف ماء خلطت كلش ومارينيت اللحم لي شلحتوا باش يدخل كلش فيه تحبوا تخلوه يشرب تحبوا طيبوه ديراكت.
وحطيت اللحم في ورق طهي وزدت اليمينوم وحطيتهم ف كسكاس والماء لي فالقدرة درت في رند وبصل وزعيترة وملح وفلفل اسود وثوم ونغطو الكسكاس بورق طهي وزيد اليمينوم والغطا باش هادا البخار يطلع للحم ويتنسم مليح يدي زوج سوايع يولي زبدة.
الأرز واش قعدلي من هاديك التتبيلة زدت عليها زوج حبات طماطم مرحيين وطماطم مصبرة وملح وهيل ونجمة الأرض وحطيتهم ف طنجرة يتقلاو وزدت الماء والارز وخليتو يطيب كي ينشف نطفي.

عيدكم مبارك كل عام وأنتم بخير ❤️
فالفطور درت كبدة مشرملة
والعشاء درتلهم بوزلوف
الوصفة نحطها تحت الصور

شوفوا شكون تعلمت أول مرة القريوش وجا مقرمش ومورق برك انا درت الحبات طوال🤗
المهم الوصفة سييوها وعينيك مغمضين:
درت زوج كيلات فرينة ورشة ملح ولافاني نخلطوا النواشف ونزيدو نصف كيلة زبدة ولا سمن انا درت زبدة ونبسسها مليح ونزيد نص كيس خميرة الحلوى ونخلط وندير حفرة فلوسط نجيب كأس نكسر حبة بيض مع زوج مغارف ماء زهر نخلطهم باش نفرغهم فالحفرة هاديك ونزيد مغرفة خل ونزيد نجيب نص كأس ماء نزيد عليه ماء زهر ونفرغ غير بالشوية برك ونقعد نلم فالعجينة لازم تجي طرية نعجنوها شوية بلعقل نغطوها ونخلوها ترتاح نصف ساعة.
التشكيل العجينة قسمتها إلى ثلاث قطع فتحتهم ودرت مايزينة وعاودت طويتهم على ثلاثة لمهم كيما نخدمو العجينة المورقة نقعد نطوي فيهم بالمايزينة وممبعد نفتح رقيق و نشكل مستطيلات وندير خطوط بالجرارة من الأحسن يكونوا بزاف خطوط هكداك 16 خط باش تجيكم الحبة معمرة انا خيرت منكترش باش يجو طوال.
ونقلوا الحبات في زيت سخون ونعسلوهم ورشة جلجلان.

I wanna thank you for 40k🙏
شكرا على 40ألف متابعة ومتابع ❤️
أسعد نفسك بنفسك ✨
كي نلحق 100 ألف متابع بإذن الله نديرلكم كيكة كبيرة😁

حلوى القطيفة👌✨
اتهلاو طلعوا الوصفة
في إناء حطيت نصف علبة زبدة اي 125غ مع نص كأس زيت وكاس الا ربع سكر ناعم خلطتهم مليح وزدت بيضة كاملة مع صفار بيضة ولافاني وكملت نخلط وزدت كأس ماشي معمر مايزينة (نشاء) وزدت مغرفة كبيرة معمرة كاكاو بني وزوج كيسان فرينة ونصف كيس خميرة الحلوى ولميت العجينة ونقعد نزيد الفرينة غير بالشوية حتى نتحصل على عجينة طرية.
خليتها ترتاح خمس دقايق وشكلت كريات وثقبتهم وشكلوهم بيدكم وساعفوهم كاين وين ساعات تتفتح الحبة وتهبلكم.
كي طابت پانسيتها بالمعجون ورمدتها فالنواة كوكو لي خلطتها مع الكاكاو باش يجيني بني وعمرتهم لداخل بالشوكولا.

درت نوع واحد تاع حلوى العيد نحطلكم الوصفة ولا حتى لغدوا بإذن الله

بيتزا صنع منزلي 😁👌
درت زوج كيسان ماء مع مغرفة ماشي معمرة خميرة الخبز ومغرفة كبيرة سكر وثلاثة مغارف كبار زيت ولا زيت الزيتون نخلط كلش نخليهم يتفاعلوا مدة خمس دقايق ونزيد فرينة ومغرفة سميد رطب وملح ونلم العجينة بالفرينة تكون طرية و تتلاصق شوية ماشي تيبسوها حجرة ونخلوها تخمر نص ساعة ونكسروا التخمار وتشكل كريات ونخلوهم يزيدو ساعة يخمروا.
الصلصة رحيت حبات طماطم وزوج حتى تلاتة سنات ثوم وفلفل اسود وعكري وملح وورقة رند وزعيترة وشوية زيت ونغطي عليها ونخليهم يطيبوا كي طيب الصلصة نزيد رشة سكر.
الفرماج لي درتوا napoli.

كايك بارد 👌🍰
راح نحط فيديو توضيحي في TikTok تاعي
الوصفة:
الطبقة الأولى رحيت قاطو وزدت عليه زبدة ذايبة وزوج مغارف كبار حليب حتى يولي عجينة ونزير عليها مليح عليها دخال السارسو.
الطبقة الثانية في كاسرول درت زوج كيسان ونص حليب مع زوج علب فلان كراميل وثلاثة مغارف كبار سكر خلطت بارد في بارد وحطيت على النار حتى يبدا يغلي نطفي ونفرغوا في خلاط كهربائي ونزيد عليه حبات فرماج وعلبة فرماج ريجيم وستة حتى ثمنية حبات قاطو ونخلط كلش مليح ونفرغوا داخل السارسو ونحطوا داخل الثلاجة مدة ساعة ولا ساعة ونص كي يبرد مليح نخرجوه ونزيدو الطبقة الثالثة لي فيها زوج كيسان حليب وزوج مغارف ممسوحين مايزينة (نشاء) وعلبة فلان شوكولا وزوج ولا تلاتة مغارف سكر ونص مغرفة كاكاو بني نخلط بالخلاط اليدوي ونحطوا على نار قليلة ونخلط حتى يبدا الخليط يثقال نطفي ونزيد حبات شوكولا اختياري ونفرغوا كطبقة ثالثة وندخل التحلية تبرد مليح زوج ساعات او اكثر والتزيين اختياري.

عشاء خفيف
سلطة صيفية صحية وسباقيتي بالصلصة🍝👌
السباقيتي انا دايمن نقلي مغرفة طماطم مصبرة وثوم وورفات رند باش نزيد طماطم مسكرفجة وتوابل فلفل اسود وعكري وملح وشوية معدنوس مقطع.
والسلطة بزاف بنينة وصحية ندير فيها خيار مقطع مربعات وبصل وفلفل أخضر وطماطم كامل مقطعين مربعات صغار والصلصة ندير علبة ياوورت طبيعي مع عصرة ليمون وخل وملح وشوية زعيترة تمد نسمة مليحة وأهم شيء زيت الزيتون نخلطهم وتقدم باردة.

مربى الفراولة 🍓👌
قعد في قلبي المعجون تاع الفراز قلت لازم نديروا
الوصفة :
انا درت تقريبا كيلو فراولة غسلتها قطعتها على زوج زدتلها عصير زوج حبات برتقال ولا تحبوا ديروا ليمون وزدت سكر كيلة ونص وخليتهم فالفريجيدار خمس دقايق قيس ما تطلق الما تاعها وفرغتها ف قدرة على نار قليلة حتى يذوب كلش وماتزيدوش الماء وحدها راح تطلق خلوها حتى عشرين دقيقة والقوام يقعد نتوما كيفاش تحبوا ادا ثقيلة ولا خفيفة.