Salon de nahed

صباح الخير والربح قالو ناس زمان
أول شيب من الدنيا الغريبة
ثاني شيب من قهر الرجال
ثالث شيب من الغربة صعيبة
رابع شيب من قلة المال
خامس شيب من الجاهل مصيبة
ومن الجيعان مايشبع موحال
وسادس شيب كي ولدك تجيبه
ويطلع خايب في وسط الرجال
وسابع شيب من الدنيا الصعيبة
قد ماتدير ماتلحق كمال
وثامن شيب من لي خرج منو العيب
كي توثق فيه ويخرج بدال
وتاسع شيب من لي عايش كي الذيب
وفي وسط الناس شايفينوا غزال
وعاشر شيب ملي فارق حبيبه
عايش مكسور القلب والدمع سيال

مساء الخير للجميع هذي كانت نتائج دورة شينو نتمنى لهم التوفيق♥️♥️♥️

مساء الخير لبنات نحوس على وحدة نقصلها هذا لكوب باطل غدو بصح صباح برطاجيو لبنات ولي حبت تتعلم تبع لايف 😘😘😘

مساء الخير حبيباتي هذه كانت نتائج دورة القص وكانوا في القمة كونهم ممبتدئات في المقص والموس ونتمنالهم المزيد من التطور 🥰❤️❤️🤲🏻والحمدلله روحوا فرحانات❤️❤️

صباحكم عسل وهناء❤️❤️❤️

- ثلاثة و أمهم , واش يلمهم
- ثلاثة يحمرو الوجه: زواج الابكار , صلاة الافجار , و الوالدين اذا كانو فالدار .و ثلاثة يصفرو الوجه: الطعام المسوس و الزواج المنحوس, و الداخل للسوق بلا فلوس.
- ثلاثة عدياني : عيني ووذني ولساني , ولوكان ماهو , ماندخل لقبري هاني.
- الثقة و الامان , تدخلك لدار السلطان.ولحديث قياس😉

السلام عليكم
دورة الشينيون 3D راح تكون ايام 20-21-22 نوفمبر
لمزيد من المعلومات الاتصال على رقم الصفحة
0662185612

صباح الخير
دورة القص راح تكون يوم 24-25 نوفمبر
لمزيد من المعلومات الاتصال على رقم الصفحة
0662185612

يصبحكم بالخير و يرزقكم من خيراته كيما يرزق الطير... قالو نا س بكري

بكري تهدر تموت
اليوم أهدر حتى تموت

بكري دير الخير ونساه
وليوم دير الخير وتصور معاه

بكري كنا مجمولين ولقلوب صافيا ولحب ماليها وليوم صبحت طبسانا مفروقين ولقلوب مدمرة ولحسد عاميها

بكري لمحبة كانت في لقلوب
وليوم المحبة ولات في جيوب

بكري كان الزواج مسؤولية
وليوم رجع زواج شهرية

بكري كانت قيمت بنادم واش عنده في راسه وليوم رجعت قيمت بنادم في لباسه

بكري كانو ذو الناس في العشرة زينين
ولي شين الناس بالمطرڨ تسويه

بكري كان قليل من يطعن في الدين
ومول العيب يدس عيبه ويغطيه

بكري بلحرفي وعاشو متهنيين
سلكو في دنيا ولقبر فازو بيه

وليوم ألومو في وقتنا وحنا شينين
ولعب لعيبنا هو خاطيه

ماعشنا في الدنيا كي ناس هانيين
ماوجدنا للقبر ماحرنا فيه

مافزنا بعلوم كي ناس خرين
ماحلقنا في سما ماشفنا فيه

ماهدمنا ما بنينا بني متين
مادرنا تاويل نلقو لهنى فيه

ماجينا موتا ماجينا حيين
ماجينا منا ماجينا منهيه

صباح السرور والورد المنثور🌸🌸🔹بكري ڨالوا :🎤👇👇👇

🟤إلّي يكسب شليڨة بعد عراه، يبدى يمشي و يتلفت وراه.
🟠كول من التوت العالي و إذا طاح خليه للذراري.
🟢السطل كي تعبيه بالفلوس يبقى ديما سطل.
🟣اللقمة إلّي ماكش عارق عليها و لو تشرب عليها الماء تبقى ديما شارق.
⚪️ما غاضتنيش من الكامل المكمّل بش تغيضني من الهامل المڨمل.
⚫️إلّي يمشي بالمظاهر عمرو ما يفرّق بين لمسخ و الطاهر.
🟡زلقة الساقين توجع الركايب و زلقة اللسان توجع الحبايب، أما زلقة الأيام مصايب ما كيفها مصايب.
🔵تعديت على العين و العين ما أحلى ما، غاضتني مُهرة الخيل جحش البهايم خذاها.
🔴عمرو الخاتم ما يولي خلخال، و عمرو المال ما يرفع الأنذال.
🔷أحفر البير بإبرة و ما تطلبش من الرخيص فأس، يجيء نهار و تكسب الخبرة و اللحاس يبقى طول عمرو لحاس.
⚫️كان جت كلمة سامحني ترجّع إلّي فات، راي كلمة البركة فيك ترجّع إلّي مات.
🟠لا يعجبك راجل بحبوح و لا يعجبك لباسو، و لا يعجبك حيط منقوش حتى تشوف ساسو

ناس بكري قالوا:
ما يفوح بخور بلا جمر وما ينبت زرع بلا مطر وما دوم محبة بلا قدر لمرا لحرا تجيب لحر وراجل ما يتبعش الذر .

طيح وشوف شكون يوقف معاك غيب وشوف شكون يسال عليك .... بعد غربل وصفي الرجال بالرجال ورجال بالله ضحكت لحباب بمال الدنيا وماتبدلهاش

لاديت من لجيال عبرة
ولا ديت من ليام والو
ولا مشيت لا تصد على الجرة
ولا تبع الفحل على مالو
ولا تصاحب لي عشرتو مرة
ولا تربح راحتك من هبالو
صاحب الراجل ولد الفحل والحرة
يجي نهار وتسال على حوالوا
لكلام كبير ولمعنى بحر
صبحتكم بالخير ياوجوه الخير

صباح الخيرات إلى عشاق الشعر جد قصير ونحترم كل لاذواق وكل واحدة نخدملها على حسب رغبتها وزبونتي طلبت هذا القصة ولون بصحتها وتبقى الحقيقة اجمل

يصبحكم ويربحكم.. يا نساء الخير
ياما مشينا في الطريق وطحنا
وياما وقفنا شادين الحيل
ويا ما اسمعنا من كلام جرحنا
رميناه و خلينا الصبر دليل

يصبحكم ويربحكم... 💋💋❤️❤️
الموسوس محال داويه الطبة
يبقى خايف طول والشك مشييه

ماتامنش لي اتصنع المحبة
شوف لقلبو واش راه مخبي فيه

ضحكات الحيلة تقابلها غدرة
مادح نفسو ماتطولش وخليه

عود الشركة مايليقش للكسبة
راها قبلك راكبة فرسان عليه

ياسر من ضلاموه ناس بلا سبة
وفي ذ الوقت قليل من اصلو ينهيه

ياقلبي مزال تامن بالصحبة
ومزال لي ڨاع يضحكلك تبغيه

يصبحكم و يربحكم.. اسمعو
نبكي واحد كان ظني فيه خليل *
نفخر بيه نڤول سعدي درت ونيس.
كي جربتو فالسفر نلڤاه ثڤيل *
كي جربتو فالوعر نلڤاه رخيس.
كي جربتو فالنڤار ظهر ذليل *
كي جربتو في جماعه موش جليس.
كي جربتو فالكرم يابس وبخيل*
كي جربتو فالعقل فيه توسويس*
كي جربتو في اسراري واد يسيل *
كي جربتو في اخلاقوبليس

يصبحكم و يربحكم.. هذي شعرها درولو ليماش وتحرق فصلتها هذالكوب.
نبكي واحد كان ظني فيه خليل *
نفخر بيه نڤول سعدي درت ونيس.
كي جربتو فالسفر نلڤاه ثڤيل *
كي جربتو فالوعر نلڤاه رخيس.
كي جربتو فالنڤار ظهر ذليل *
كي جربتو في جماعه موش جليس.
كي جربتو فالكرم يابس وبخيل*
كي جربتو فالعقل فيه توسويس*
كي جربتو في اسراري واد يسيل *
كي جربتو في اخلاقو فات بليس.

مساء الخير فورمسيون في القص في ولاية قسنطينة نقولهم يعطيهم الصحة اول دورة منتعبش فيه وفهمو عليا واول مرة يستعمل مقص والموس يعني مبتدءاة يعطهم الصحة لهم كل التقدير

ربي اينعمهم في الجنة حسبنا الله والنعم الوكيل في كل ظالم
لا تحسبن الله غافلا عما يعمله الظالمون 🇪🇭🇪🇭🇪🇭🇪🇭🇪🇭🇪🇭
لك الله ياغزة وماالنصر الا بالله اللهم انصرهم نصرا عزيزا
اللهم لا تحقق لليهود غاية
ولا ترفع لهم راية

يمسكم بلخيرو يستركم مايفضحكم و من كل خير يرزقكم...
الصحبة ظنيتها احسن صحبة
الضحكة صفراء والقلوب امراض
اشيانت أفعال و الشر اتربى
في قلوب الناس يهتك فالاعراض
راح زمان الخير و اعوام الصابة
انشف بير العز حتى ماه اخواض
راهو قل الخير حتى في القربى
خوك عدوك اليوم فتان و قراض
يحسدك في العيش من غير سبة
يتمناك تموت تتحقق له الاغراض
كي يشوفك سعيد يرجع في غلبة
عيني عينك جاي يبحث ع لقباض
و اللعاب يسيل كي العاب الكلبة
اللسان اطويل والشوارب اغلاض
والعشرة ولات عيشة في الغربة
حتى حق الجار راهو في انقراض
هذا الارض حسبتها تربة خصبة
انا زرعت الورد والشوك الي ناض

تحياتي لكم جميعا ....

يصبحكم ربي بالخير... اسمع ياولدي و اتصنت للفال
قالو ناس زمان كي تعاشر عاشر الذيب من بعيد تسمع عواه
ولا تعاشر بنادم قريب كي الجمل يغدر مولاه
نوصيك يا ماكل الراس في البير ارمي عضامه
ونوصيك يا قاعد مع الناس فمك ديرله لجامه
وماتخالط وما تقول انا غالط
وما تعاشر النحل وما تشكي من لسعاتو
احكي سرك للبعيد اذا فشاه يكون بعيد على
دوارك ولا تحكيه للقريب يجيبلك العيب لباب دارك

TikTok · Khaoula 🇹🇳🇩🇿🇲🇦🦁🦁 16.3K j'aime, 80 commentaires. « #دويتو مع @🇹🇳المشاكس🇹🇳 #🇩🇿💚❤️🤍💎🇩🇿🇩🇿 @🇹🇳المشاكس🇹🇳 @الراقص معا الذئاب🇩🇿 »

مساء الورد🌸🌸والياسمين علي الناس الحلوين وربي يهني عرائسي الزينين
قالو ناس زمان :
خسارة القمح في الدّواب...
وخسارة العسل في الكلاب ...
وخسارة الواجب في الي مايعرف الجّواب ...
وخسارة المسمار في اللّوح الرّاشي...
وخسارة المحبّه في لي مايستاهلهاش ...
والي راح من العمر راح ماعاد ترجع أيامو ...
والي طاح من العين طاح ماعاد يعلا مقامو ...
إذا فاتك لكلام قول اسمعت واذا فاتك الطعام قول اشبعت
📌قالوا ناس الزمان
الرجلة عندها ميزان
ومعدن البنادم مع الوقت يبان
كاين الراجل والمرجل والرويجل
وكاين لي وسط الرجال باش يترجل
وكاين لمعاشر الرجال باش يتسمى راجل

يصبحكم و يربحكم
قالو ناس زمان.. كثرة الكلام.. خصام
و كثرة السماح مذلة..
و كثرة الدموع حرام..
و كثرة الطيبة علة 💔😢

يصبحكم و يربحكم.... اسمع يا
قالو ناس زمان :
الحي كلاوه والميت ردموه ،والرخيس علاوه والراجل دمروه
نوصيك كي تكثر عليك الهدرة، اقنطهم بالسكات وكي تجيك الدالة اخلفها بالهدات، النية اعمرها لاتعاشر الحيلة، هذي هي الحياة اتقري والايام توري، الدنيا دالات كما اعطات ادات.
القانع بالنصيب يعيش مرتاح، يعيش هاني والدنيا تصفالوا
ياك الرزق مقسوم عند الفتاح، كل واحد من العباد واش عطالو ،حيط الرمل لا تعليه يعلى و يطيح ساسو، وولد الغير
لا تربيه يكبر و يرجع لاهلو و ناسو ،و المحبة عندها ناسها
و ناس المحبة كبار كل حاجة عندها ساسها، كيما الساس
لي تبني بيه الدار دير الخير، وطيشو في بحر جاري اذا
ضاع عند العبد ما يضيع عند الباري .

صبا الخيرات 💋💋شـد لسانك يعلى شانك و خلي سكاتك يوجع اكثر من كلامك.... و الحديث قياس

صباح الخيرات
بكري كان الراعي سراح ولكلب نباح ولمرا قايمة بلمراح .
وليوم الراعي رجع سواڨ ولكلب عواڨ
ولمرا تطلب فالطلاڨ.
بكري كان الباب لوح ولقلب مشروح ولخير مفتوح.
اليوم الباب حديد ولقلب صديد وخو على خوه بعيد.
بكري كان الجار هو مول الدار واليوم صباح الخير ياجاري أنت في دارك وأنا في داري.
بكري كنا خاوة وناكلو في طاوة و اليوم كل واحد وكاسو وكل واحد ونعاسو وكل واحد هز همو فوق راسو .
بكري كان التمر و لحليب و اليوم الطاكسي والطبيب .
بكري كان المغزل ولقرداش واليوم البورطابل ولفراش .
بكري كانو يحلبو البڨرة ونعاج واليوم غير السيشوار والمكياج.
بكري كانت الرجلة خصال واليوم رجعت الرجلة مال.. 💔

يصبحكم و يربحكم

👌💚❤️

الخداع يبقى خداع... يعيا و يريب ساسو
والبصل يبقى بصل..... طول حياتو يتغرس على راسو
ناس لسانها عسل ......وناس لسانها سمّ
ناس في جرّتها الخير .....وناس في جرتها الهمّ
الڨمح أرزرعو وذرّيه...... و الريح يجيب غبارو
والڨلب لا كان مهموم... الوجه يعطيك خبارو 👀وعروستي ربي يهنيها فوتنا نهار تقول عرس في صالون 🙏

قالو ناس الزمان
الكذب مايطلع الساس والذهب الحر مايرجع نحاس، ولا تامن فالذيب ولا دير العساس، المحبة يعرف قيمتها الڤلب الحساس، والغدرة ماتجيك غير من عند الرخاس، والحديث الموززن راه قياس

نوصيك يابنتي
الحوش بلا كبير .
زي الجنان بلا بير . أمنتك تصوني كبار العيلة .ͦ

عدوك تقتليه بالسكات ..
واصبري على طبق الجمر . لين يجيك طبق التمر

زيني فالك كل صبح وعشية .وكلمة السو من مولا بيتك .. أنسيها ، وكلمة الحق قوليها ماتخافي وتدسيها
وكان شوفتي عيبة في ناسه استريها ، وحاجة السر مع زوجك في البير طيحيها .ᷮ

و الفم المسكر مايخشله ذبان . قللي كلامك ودسي اللسان
ومش عيب ع الي تخش الفم .. العيبة فاللي يطلع منه
والحرة كلامها ينحط على الجرح يبرا .ⷶ
ويذوب ...
وتفرح بيه القلوب ..
والعبيها عمية .طرشة .ماتجيبلك معرة .ᷝ
واضحكي بحنانة..
ونيتك زينيها وماكلتك ذوقيها.
والي ينصحك بالسر اسمعيله. والكبير لاتقاطعيله كلام
وخلي حاجة الضيف ديما مدسوسة.. والحاجة النازكة ديما ملبوسة .
وديما اغسلي وجهك ماتعرفي مين يلاقيك .
ونضفي حوشك ماتعرفي من يجيك.
الحوش يشدوه الاوتاد.. والمرا مايشدها غير لولاد.. وولدك على القرآن والدين ربيه ..وما تخلي مولا بيتك يركب راسه .ويغير ساسه. ما تقوى مكانته .. ويكبر غير بأصله وناسه

✴️الى كل الراغبات في تعلم أساسيات الحلاقة النسائية من الصفر نعلمكم عن فتح دورة تعليمية لفنون الحلاقة النسائية بأحتراف
الدورة مدة 3 اشهر 😍
اهم محاور الدورة:
✅1-اساسيات تسريح الشعر (بروشينغ) وتشمل غسل الشعر وتقسيمه وكيفية تسريحة والتعريف بادواته...
✅2-قصات الشعر بانواعها وتشمل مقص و موس...
✅3- صباغة الشعر وتشمل صبغات الشعر العادي وتغطية الشيب وليماش...
✅4- تسريحات المناسبات وتشمل اوندولي وايفي وتسريحات شعر ( كواف سامبل)...
✅5- تعلم فنون الماكياج خطوة بخطوة مع التعريف بادواته...
✅6-وكل ما يخص مجال الحلاقة النسائية ❤️
❇️الدورة تكون نظرية و تطبيقية ✔️💯
نضري / عملي / تطبيقي
يتم تسليم عند اكتمال التعلم شهادة مشاركة 😍
وكل هاذا تحت اشراف المدربة الدولية والاستاذة ناهد بن يحي ❤️
لاستفسار اكثر يرجاء اتصال على
✅ رقم التالي 0662185612

يصبحكم و يربحكم
👌💙❤️
إذا سلكت أسلك طريق يوصّل
ما إتبّع مسالك تعود بيك لتالي
و إذا حكيت أنطق جواب معسّل
و رد بالك كثر القال و القلقالي
و لا بغيت صاحب عليك بصاحب مأصّل
من الغدر قلبو و المكايد خالي
و إذا نويت تلبس خيّط لباسك فصّل
يبدى مقامك في المجالس عالي
و إذا بغيت تكسب طريق الشقا إتوصّل
و بالعزم تملك كل ماهو غالي
و أخطيك كثر النّوم و لا تتكسّل

صباح الربح والهناء 🌸🌸قالو ناس زمان #الشتاء شم و غم،،، #والربيع أشكر و لا تذم ،،، #والخريف اجري ولم،،،ومحلى الصيف لوكان يتم،،،قال الربيع أنا بزهوري...وقال الصيف انا ببحوري..وقال الخريف انا بتموري...و قال الشتاء انا بكانوني و بخوري...
الشتاء شدة.. والربيع منام.. والصيف ضيف.. والخريف بركة العام.
وهما الي قالو مش اني الي قلت

يمسيكم ربي بالخير
قالوا جدودنا
- ناس اذا مشاو القلب ما ينساهم ... و ناس اذا مشاو ترتاح من عزاهم
- الي فيه طبة ما تتخبى ... و العبد الرخيس ما يتربى
- خوذ حذرك م الثعلب و الضبع .. و زيدهم الجيعان إدا شبع
- العبد الدوني ما ابانش فيه .. لوكان م العسل تسقيه
- الكرم ما يثمر بلا ذكار ... و الصابون ما يغسل العار......... مساء الخير

يصبحكم و يربحكم و يستركم ما يفضحكم.. اسمع ياولدي و افهم المعاني
ناس بكري قالو :
إذا غرستي اغرس النخلة تربح الظل وتاكل من العرجون
وإذا راك كاسب اكسب الرخلة عز ما تاكل والجيب مضمون
وإلى راك مريض شوف عسل النحلة هو أحسن غذاء ودواء في الكون
وإذا راك خاطب شوفها على أصلها وفحلة في بالك ترتاح ولعرضك تصون
وإذا مليت اخرج وأعمل رحلة خير ما تعيش ديما مغبون

البقرة النطاحة والنعجة الصياحة والمراة النواحة ما تخليهم يدورو فالساحة
والمرأة الخبارة والدجاجة الغبارة كسيبتهم في الدار خسارة والسلوقي إذا نبح والراجل إذا شطح ادي للواد واذبح
والمكحلة الثقيلة والمرأة الهبيلة والضرس العليلة ما فيهم حتى صيلة

يصبحكم و يربحكم و يستركم
لا تجري جرية النعامة
ولا تكابش السما بيديك
ما تاخذ إلا ما كتبلك
و ماتكسب إلا ما يعطيك

يصبحكم و يربحكم... اسمعو مليح
قالو ناس زمان ، عوم في بحر غارق وما تعومش في دموع ولية ،دعوة الولية بلية وكان مالقيتهاش في الصحة تلقاها في الذرية
اللطف يا ربي

يصبحكم و يربحكم...

ماشي كل لي ساكن قصر تهنى ....
وماشي كل لي كتم غيضو صبار
وماشي كل لي رفع صوتو غنى ....
و ماشي كل لي ركب قد المشوار
و ماشي كل لي كسب عود دنى....
و ماشي كل لي بحر يسمى بحار
و ماشي كل لي ركع نال الجنة .....
وماشي كل لي عصى يدخل للنار
هذي الدنيا غدارة ما بقات فيها بنة .... تتقلب في كل يوم تعطيك اخبار
في الدنيا هذي واحد ما تهنى ..... خداعة بعد العسل تسقيك مرار...