DR.Muhammed Ezzat

حالياً بقى فيه انتشار كبير جداً فى الأورام السرطانية بكل أنواعها و عشان كدا لازم نفهمها كويس و نعرف أعراضها و تشخيصها و نفحص نفسنا بصورة دورية لأن للأسف الأورام السرطانية مبتظهرش غير بعد إنتشارها فى الجسم و وصولها لمراحل متقدمة و هنتكلم النهاردة عن واحد من أنواع الأورام و هو
( سرطان المبيض ) ...
أسبابه لحد دلوقتى غير معروفه لكن فيه سيدات أو بنات بتكون أكتر عرضه من غيرها مثلاً :
١- يكون فيه تاريخ مرضى عائلى للإصابه بالأورام السرطانية و مش شرط يكون نفس نوع الورم ممكن (سرطان الثدى أو البروستاتا أو القولون ....) و رغم كدا معظم النساء المصابة بسرطان المبيض معندهمش تاريخ مرضى عائلى للأورام
٢- البنات اللى بتعانى من ارتفاع فى هرمون الذكورة
٣- السيدات بعد سن انقطاع الطمث
٤-السيدات اللواتى لم يحملن إطلاقاً
٥- التدخين

**خطورة المرض ده إن مش بنكتشفه إلا بعد إنتشاره بصورة كبيرة فى الجسم و ده لأنه أعراضه نفس أعراض أمراض و التهاب الجهاز الهضمى زى
-الانتفاخ بصورة مستمرة
- عدم الرغبة فى الأكل و الأحساس الدائم بالشبع
- احساس مستمر بعدم الراحة فى منطقة الحوض
و ده بيبين مدى خطورته لأنها أعراض عادية جداً لكن طبعاً هنفضل ننبه بأهمية الفحص المستمر للجسم لأن الأورام السرطانية علاجها فى المراحل الأولى بيكون أفضل كتير و لازم كل البنات و السيدات فى كل المراحل العمرية تهتم بعمل السونار على الأقل مره كل ٦ شهور عند مركز الأشعه أو الدكتور المختص و لو فيه أى أعراض بنشتكى منها بصورة مستمرة لازم نروح للدكتور و نشوف سبب الأعراض و نعالجها ازاى
* الصحه تاج على رؤوس الأصحاء *
نفهم كويس جسمنا و نفهم رسايله لينا و نهتم بيها لأن ده أعظم كنز ربنا وهبهولنا
و أخيراً دمتم بصحة و سالمين 🍁

انيميا نقص الحديد أو فقر الدم ...
حوالى ٢٠% من السيدات و ٥٠% من الأطفال بيعانوا من أنيميا نقص الحديد
و دى بتكون ناتجة غالباً عن سوء التغذية
أعراضها :
-قلة التركيز
-الإمساك
-فقدان الشهية
-الدوخة
-شحوب فى لون البشرة
-صداع مستمر
-برودة فى أطراف الجسم
- إرهاق مستمر
-عدم انتظام فى ضربات القلب و ضيق التنفس
ممكن يكون شخص بيعانى من الأعراض دى بسبب الأنيميا أو بسبب أى مرض أخر و ممكن ميكونش بيعانى من الأعراض و عشان كدا بنحدد إن الشخص بيعانى من أنيميا نقص الحديد أو لا عن طريق التحاليل زى صورة الدم الكاملة و مخزون الحديد فى الجسم .
✨هل ممكن علاج الأنيميا عن طريق النظام الغذائى ؟!
الإجابة غالباً لا لازم نحتاج مكملات غذائية أو فيتامينات بجانب طبعاً النظام الغذائى الجيد و لكن التغذية السليمة و إننا ندى الجسم كل الفيتامينات والمعادن اللى محتاجها ده بيكون وقاية جيدة للجسم
✨لازم نعالج انيميا نقص الحديد حتى لو مفيش أعراض مترتبة عليها ؟!!
انيميا نقص الحديد بتأثر عالصحة و عالجسم عموماً و طبعاً لازم نعالجها لأن دى أساس صحتنا و أساس كمان شكلنا الخارجى يعنى ناس كتير بتشتكى من تساقط زائد للشعر و شحوب شديد فى البشرة أو هالات سوداء حول العين مهما استخدمت منتجات عنايه بالبشره والشعر و بيكون السبب الأساسى فى الأنيميا ده غير إن مضاعفاتها على الصحه بتسبب أمراض أخرى
كلمة السر فى علاج أنيميا نقص الحديد فى ٤ مكونات
(الحديد / فيتامين سي / فوليك اسيد / فيتامين بى ١٢ )
الحديد. تشمل الأطعمة الغنية بالحديد، اللحم البقري، والبقوليات، والعدس، والخضراوات الورقية ذات اللون الأخضر الداكن، والفواكه المجفَّفة.
الفولات  في الفواكه والخضراوات الورقية ذات اللون الأخضر الداكن والبازلاء الخضراء والفستق ومنتجات الحبوب الكامله زى الخبز والمعكرونة والأرز.
فيتامين B-12 الأطعمة الغنية بفيتامين B-12 تشمل اللحوم ومشتقات الحليب والحبوب الغنية ومنتجات فول الصويا.
فيتامين C. تشمل الأطعمة الغنية به: الفواكه البرتقال و الفراولة والفلفل بألوانه والبروكلي والطماطم والبطيخ.
أنيميا نقص الحديد ملهاش علاقة بحجم الشخص سواء نقص أو زيادة فى الوزن و ملهاش علاقة طبعاً إن الشخص بياكل كميات كبيرة من الأكل لأن ممكن يكون كميات الأكل كبيرة لكنه بيعانى من سوء التغذية بسبب فقر الطعام اللى بياكله للفيتامينات و المعادن اللى بيحتاجها الجسم
يفضل شرب الماء بكثرة لو بناخد مكملات فيها حديد لأنه ممكن يسبب الإمساك و طبعاً بناخد المكملات الغذائيه أثناء الطعام
*يجب مراجعة التعليمات بالصورة رقم٢
دمتم بصحة 🍁

*من اكتر الحالات المنتشرة الفترة الحالية للبنات و السيدات :
تكيس المبايض / تأخر الإنجاب / الإجهاض المتكرر / الأورام الليفية
و دا بيحتاج من الطبيب التشخيص و الفحص الجيد و المتابعة المستمرة من أول علاج الأعراض و المسببات حتى الشفاء التام إن شاءالله ...
✨فى عيادة دكتور محمد عزت بنقدم خدمة طبية بأعلى جودة ✨
✨و بنفكرك إن أول مراحل العلاج السليم أختيار الطبيب المناسب ✨
يسعدنا تشريفكم 🍁

لأننا بنهتم بصحة المرأة عملنا offer ٦٥% على الكشف بالسونار يوم السبت ١٣ فبراير من الساعه ٤:٨ مساءاً بدون انتظار خارج العيادة
✨ الحجز بيكون مسبق بالتليفون و الدخول بيكون فى نفس الميعاد المحدد
يسعدنا تشريفكم 🍁

حالياً نسبة كبيرة من البنات و السيدات بيعانوا من تكيس المبايض ..
و عشان نتأكد من دا بيتم عمل عدة فحوصات هنتكلم عنها النهاردة ....
✨ أولاً مينفعش اننا نحكم من السونار فقط لكن بنقدر نحكم من كذا حاجه لازم على الأقل يتوفر سببين منهم
- الأعراض :
زى اضطراب أو إنقطاع الدورة الشهريه أو حدوثها بمعدل منخفض كل عدة أشهر
ظهور شعر كثيف فى أماكن معينة فى الوجه أو فى منطقة البطن و الصدر
و بعض حالات تأخر الإنجاب للسيدات
و بعض حالات السمنه
ظهور حبوب شديدة فى الوجه و الجسم
و مش شرط إن يكون الشخص عنده كل الأعراض ممكن يعانى من عرض أو أكتر بتختلف من شخص للتانى
٢- الفحوصات :
أولهم الفحص بالسونار و دا بيكون للبنات فحص عن طريق البطن للمبيض و الرحم
و للسيدات بيكون سونار مهبلى و دا بيكون أكثر دقه خصوصاً للسيدات اللى بتعانى من السمنه
ثانياً بنحتاج بعض التحاليل
فى الأول بنعمل تحاليل نتأكد إن الأعراض مش بسبب أمراض تانيه لاستبعاد الحالات الأخرى اللى بيكون ليها أعراض مشابهة لمتلازمة تكيس المبايض
تحليل هرمون الغدة الدرقية (TSH)
تحليل قياس نسبة البرولاكتين
الهرمونات المرتبطة بوظيفة الغدة الكظرية (الغدد الموجودة فوق الكلى)
و بنقوم بعمل تحاليل FSH و LH
لما الدكتور بيتأكد من وجود تكيس المبايض بنبدأ نمشى على العلاج المناسب لكل حاله و حسب تأثير التكيسات على الجسم و لكن لازم نبقى عارفين كويس إن مع التكيسات لازم الدكتور يتأكد من التاريخ المرضى للحاله و لعائلة الحاله زى وجود أمراض وراثية زى السكر و أمراض القلب و ضغط الدم لأن فيه روابط بين متلازمة تكيس المبايض ومقاومة الأنسولين وزيادة الوزن. 
عشان كدا لو فيه عوامل إننا ممكن نصاب بأمراض معينة بيتم فحص
الكوليسترول
ضغط الدم
الجلوكوز  بصفة دورية
✨و أخيراً بالنسبه للبنات فى سن المراهقه أو فى بداية البلوغ بيكون فيه اضطراب طبيعى فى الدورة الشهريه بتسببه عوامل تانيه غير تكيس المبايض إلا لو استمرت الإضطرابات لمدة سنتين مثلاً أو ظهور أعراض أخرى من اللى اتكلمنا عليها زى الحبوب أو الشعر الزائد لازم نلجأ للطبيب
دمتم بصحة و سالمين 🍁

ايه بيميز خدمة العيادة عندنا عن أى مكان تانى :
- فى تحديد لميعاد الكشف الوقت اللى بيتحجز بالتليفون هو الوقت اللى هتدخل فيه للدكتور مفيش انتظار خارج العيادة
- وقت الكشف بيكون حسب الحاله الدكتور بيسمعك كويس جداً و بتاخد وقتك فى الكشف و الفحص عشان تطلع مطمئن و فاهم حالتك كويس
- سعر الكشف بيكون شامل السونار و الاستشاره مجاناً
-بيكون فيه تواصل دائم مع الدكتور عن طريق الواتس آب

✨عيادة دكتور محمد عزت لمتابعة الحمل و حالات الحمل الحرج و الإجهاض المتكرر و تأخر الإنجاب و تكيس المبايض
عنوان العياده : ٦ أكتوبر الحى الأول عماره ١٩٣ فوق صيدليه د/أحمد ماهر أمام معهد الحصرى الدينى
رقم الحجز :
01013867445
✨✨لا يسمح بدخول العيادة بدون كمامه حفاظاً على صحتكم 🍁

يسعدنا تشريفكم ⁦❤️⁩

من اهم الحاجات الطبيعية اللى بتساعد إننا نعالج الأنيميا بشكل سريع جداً ..
✨ الشمندر أو (البنجر)
يعتبر الشمندر من اهم الاغذية اللى بتمنع الاصابة بالانيميا و بتساعد على علاجها لانه بيعمل علي زيادة انتاج كرات الدم الحمراء وزيادة نسبة الهيموجلوبين في الدم وبيحتوي علي نسب عالية من الحديد وكذلك فيتامين C اللى بيعمل علي زيادة امتصاص الجسم للحديد.

ممكن نستخدمه على السلطة أو نعمله عصير (كوب يومياً ) و ممكن كعصير يضاف عليه فراولة أو كركدية و بكدا بتكون فوايدة أكبر ..
**** لكن برغم فوائد البنجر العظيمه و إنه فعلاً علاج فعال جداً بنصح مرضى الجهاز الهضمي و القولون إنهم يبتعدوا عنوا لأنه ممكن يسبب أثار جانبيه زى الانتفاخ الشديد و إضرابات القولون و المغص ***
دمتم بصحة و سالمين 🍁

#الشمندر
#الأنيميا

🌟مخاطر واضرار التدخين بكل أنواعه (السجائر والشيشه) أثناء الحمل ..

السجائر تحتوي علي أكثر من ٤٠٠٠ مواد كيميائه ضاره مثل النيكوتين واول اوكسيد الكربون والسيانيد والرصاص ...إلخ
بالإضافه الي انها تحتوي علي أكثر من ٦٠ نوع من المواد المسرطنه ......
كل المواد دى بتختلط بدم الام ومنه تنتقل الي الجنين و ممكن يتسبب فى مشاكل كثيره :
-سقوط المشيمه
-انفصال المشيمه
-تمزق الغشاء الامنيوسي ( فتح كيس المياه)
و التدخين كمان بيعتبر المسئول عن ٢٠ : ٣٠ % من حالات نقص وزن الاطفال
ومسئول عن حوالي ١٤ % من حالات الولاده المبكره و١٠ % من حالات وفاة الاطفال حديثي الولاده
✨وثبت ان التدخين كمان له علاقه بمرض حساسيه الصدر عند الأطفال بالإضافه الي بعض المشاكل الآخري مثل عيوب خلقيه بالقلب وتأثير علي الجهاز العصبي للبيبي........إلخ
هل يا دكتور التدخين بيأثر أبرضوا علي الأم ؟؟؟
أكيد .. التدخين عموما من البدايه قد يؤثر علي القدره علي الانجاب و بيزيد نسبه احتمال حدوث حمل خارج الرحم
و أخيراً ياريت نحافظ على صحتنا و نمنع التدخين بأشكاله تماماً
دمتم بصحة و سالمين 🍁

#التدخين

✨أهم العلامات والأعراض الخطره أثناء الحمل اللي لو حصلتلك لازم تستشيري طبيبك في اسرع وقت..
**اولا :
-الاعراض الخطره في النصف الاول من شهور الحمل:
اي نزيف مهبلي حتي لو بسيط
وجع او تقلصات في البطن
إفرازات مهبليه غير طبيعيه
ارتفاع في درجه الحراره
وجع وحرقان أثناء التبول
استمرار القيئ لعدة مرات طوال اليوم

**ثانيا :
-الأعراض الخطره في النصف الثاني من شهور الحمل:
تشمل كل الأعراض السابقه بالإضافه الي .....
الاعراض المصاحبه لإرتفاع ظغط الدم أثناء الحمل مثل زغلله بالعين اوألم مستمر في فم المعده او ألم شديد بالبطن أو تورم بالساقين .
الأعراض المصاحبه لمرض السكر مثل كثرة التبول أو الاحساس بالعطش دائماً أو الاحساس بحكه جلديه في الجسم.
نقص في حركه الجنين
نزول مياه بطريقه مفاجئه من المهبل
✨✨لو حصلك اي عرض من الأعراض ديه لازم تستشيري الطبيب المعالج ليكي على طول
دمتم بصحة و سالمين 🍁

#الحمل

من الأمراض المنتشرة و اتكلمنا عنها قبل كدا **تكيسات المبيض** و اللى بيعانى منها كتير من البنات و السيدات ...
✨ حوالى 50% من البنات و السيدات بتعانى من عرض السمنه مع تكيسات المبيض لكن زى ما قولنا فى post مسبق إن السمنه مش شرط أساسى لتكيس المبيض لكن سواء بنعانى من عرض السمنه أو لا فا تكيس المبيض ممكن يسبب أمراض نقدر نتجنبها لو مشينا على العلاج المناسب مع الطبيب و نظام غذائى سليم...
"بنتبع النظام الغذائى مع وجود عرض السمنه أو مع عدم وجوده "
✨ليه نمشى على نظام غذائى ؟!!
- لأن تكيسات المبيض بتسبب زيادة الإنسولين فى الجسم و بيكون الجسم عرضه لأمراض كتيرة زى السكر و ارتفاع ضغط الدم و أرتفاع الدهون اللى بيأثر على صحة القلب دا غير إن اتباع نظام غذائى سليم بيقلل حدوث المضاعفات اللى بتحصل من تكيس المبيض و بتأثر على الصحة الإنجابية للمرأة و زى ما قولنا هو جزء كبير من العلاج
✨أفضل نظام غذائى لتكيس المبيض إننا طبعاً نبعد تماماً عن المقليات و اللحوم المصنعة و الحلويات و الدهون الغير صحية و نقلل من اللحوم الحمراء و بنمنع الدقيق الأبيض و بنستبدلة بالدقيق البنى أو دقيق الشوفان أو الذرة أو دقيق الأرز مع اعتماد كميات بسيطه من المكرونه و الأرز و استبدال الزيوت و الدهون بزيوت صحية زى زيت الزيتون و زيت جوز الهند و زيت اللوز و منع المشروبات الغازية و العصائر المعلبة.
و بنعتمد على الخضروات 🥦🥒🥬🍠🍅 و الفواكه أهمهم التوت و الفراولة 🍓 و بناخد حصة يومية بسيطة من المكسرات أو السودانى الغير مملح كمان البقوليات و البيض و الدجاج و الأسماك الغنية بأوميجا ٣ زى السلمون الماكريل و السردين و ممكن كمان نستخدم الحبوب زى القمح (البليله ) كوجبة فطار مشبعة و صحية
و اكيد من الأساسيات شرب الكثير من الماء و تقليل الكافيين و استبدالهم بالأعشاب زى الينسون و الشمر و نستبدل السكر فى التحلية بالعسل الأبيض مع مراعاة إن يكون 🥄 كبيره فقط تتوزع على مدار اليوم
✨✨✨ الرياضه أكيد من الأساسيات و دى بتعتبر أهم وقاية من أمراض كتيرة حتى لو هنعتمد عالرياضة الخفيفة زى المشى ..
و أخيراً ممكن نستخدم مكملات غذائية زى Omega 3 و folic acid
✨✨Note✨✨
***يمكن الحصول على كتيب التعليمات و النظام الغذائى من داخل العيادة مجاناً
دمتم بصحة و سالمين 🍁

***الحمل ***
رحلة طويلة و مرهقة جداً للأم لكن بتثمر عن حاجه عظيمة شريك حياة حقيقى محبتة و رعايته بتبدأ حتى من قبل ما تشوفوا ، بتتقبله أى كان شكله أو شخصيته و بتحط فيه كل المشاعر و بتكتشف نفسها من جديد
مسؤلية ثقيلة على صحتها ووقتها و حياتها لكنها سعيدة ..
فرفقاً بكل أم تحمل جنين ينمو بداخلها ..
✨تخيل للحظه إن إنسان بيخرج من داخل إنسان أخر ...شئ عظيم وهبه لنا الله عز وجل عشان نفضل عايشين حتى لو عمرنا انتهى بيفضل أولادنا يفكروا الناس بشكلنا و شخصيتنا و تصرفتنا
أتمنى إن كل شخص بيراعى الأم فى فترة حملها يقدر تعبها و يكون رفيق جيد فى المرحله الصعبه دى وإن الفترة دى ربنا يقوى كل أم عليها و يرزقها الصحة و أدعو الله أن يرزق الجميع بالذريه الصالحه ⁦❤️⁩
✨دكتور محمد عزت .

****فيه حالات معينه لازم نعرفها بيتم فيها إجبارى عمل سونار ال 4D عشان نضمن صحة و سلامة الجنين داخل الرحم ...
١- إنجاب طفل سابق يعانى من أحد الإعاقات الذهنيه أو التشوهات
٢- لو فيه تاريخ مرضى للعائلة
٣- لو سن الأم فوق ال ٣٥ سنه لأن كل ما يزيد سن الأم بيكون الطفل عرضه للتشوهات و لازم متابعة جيدة لصحة الطفل و الأم
٤- لو الأم بتعانى من أمراض مزمنة زى الضغط أو السكر ...
٥- قلة حركة الجنين بصورة مستمرة
٦- إقامة الأم فى أماكن صناعية خطرة أو عملها فى مراكز الأشعه
٧- إن الطبيب يلاحظ مشكله فى السونار ثنائى الأبعاد فى حجم رأس الجنين مثلاً أو كمية المايه حول الجنين أو ظهور أى حاجه مش طبيعيه فى قياسات جسم الجنين
٨- تناول الأم أدوية خطأ أثناء الحمل
٩- لو الأم حصلها إجهاض متأخر فى حمل سابق أو وفاة الجنين قبل الولادة
١٠- لو الأم بتعانى من تشوهات خلقيه فى الرحم زى الرحم ذو القرنين ( هنتكلم عنه بشكل مفصل)
١١- لو الأم مدخنة أو بتشرب كحوليات
١٢- حالات الحمل بتوأم
١٣- زواج الأقارب
و ال 4D بيوضح وجود أى تشوهات أو مشاكل فى الرحم نقدر نتابعها أثناء فترة الحمل و نتعامل معاها بالشكل الصحيح .
دمتم بصحة و سالمين 🍁

#الحمل

هنجاوب النهاردة على بعض الأسئلة السريعه اللى بتجيلى من عدد كبير من السيدات و الآنسات ....
١- هل تربية القطط أو التعامل معاهم أثناء الحمل فيه خطورة ؟!
لو القطة أخدت التطعيمات و موجودة دايما جوه البيت مبتخرجش خالص للشارع مفيش مشكله فى التعامل معاها مع الالتزام بلبس جوانتى عند التعامل مع فضلاتها و أنها متخرجش ابدا برا البيت .
٢- داء القطط أو "التوكسوبلازما " مش لازم يكون مرتبط بالقطط لكن ممكن يحصل بسبب أكل اللحوم المصنعه زى اللانشون و السلامى و البسطرمة و كل أشكال اللحوم المصنعه عشان كدا الأفضل إننا نمعنهم أثناء الحمل و الأفضل من كدا كمان إننا نمنعهم أو نقللهم فى حياتنا عموماً لأن أضرارهم كبيرة على الصحه .
- استخدام ال pads سواء اليوميه أو الشهريه مش بيسبب سرطان أو التهابات أو مشاكل لكن الاستخدام السئ ليها ممكن يسبب عدوى قد تؤدى للوفاة .. الكلام دا معناه ايه إنى أختار فوط صحية تكون من القطن و بلاش تكون خامة رديئة أو صناعية و لازم نغيرها كل ساعتين أو ٤ ساعات على الأكثر و من ضمن الأنواع الجيدة الموجودة للفوط الشهرية private القطنيه و للفوط اليومية carefree
- وسيلة منع الحمل مينفعش اخدها حسب وصف جارتى أو أختى أو واحدة صاحبتى حسب كل جسم و التاريخ المرضى الطبيب المعالج بيختار مع حضرتك انسب وسيلة ليكى
- أى زيادة فى منطقة البطن مفاجئة لازم اروح لدكتور النسا أو أى مركز أشعه حتى لو آنسه أعمل سونار عشان نطمن إن دى مش أورام ليفيه و لو فيه مشكله نلحقها من بدرى و الأفضل لأى بنت و سيدة إن يكون فيه سونار بصفة دورية مره سنوياً
- مفيش أى عطور أو ما يسمى بمسك الطهارة بتتحط على المنطقة الحساسة لأن دا ممكن يسبب التهابات شديدة
- البريود لو حصل فيها اضطراب بسبب عوامل نفسية زى الضغط العصبى أو بسبب أخذ بعض العقارات زى حبوب منع الحمل مفيش مشكله لكن لو الإضطراب موجود بصورة مستمرة لازم نزور الدكتور و نشوف فين المشكله عشان ممكن يكون فيه مشاكل زى خلل فى الهرمونات أو تكيسات على المبيض .....
-الرضاعة الطبيعية مش وسيلة كافية لمنع الحمل و مفيش حاجه اسمها برضع نضيف أو إن مفيش بريود بتنزل فا مش هيحصل حمل
و أخيراً دمتم بصحة و سالمين 🍁
#الحمل

***امتى أولد قيصرى ؟!
حالياً بقى فى استسهال للعمليات القيصرية بسبب أن فى بعض الأمهات مقتنعة أنها أفضل ليها من ناحية الألم من الولادة الطبيعية أو إن فيه دكاترة بيعتمدوا إنها هتكون أفضل بنسبالهم من الناحية المادية و الوقت ، عشان كدا هنوضح النهاردة ايه الحالات اللى الأفضل فيها الولادة القيصرية ....
أولاً لازم نكون عارفين و مقتنعين إن عملية الولادة الطبيعية هيا الأفضل لصحة الأم و إن الله عز و جل خلق جسم المرأة يتحمل العملية الصعبة دى.
لكن أحياناً حالة الأم و الجنين هيا اللى بتخلى الطبيب يقرر إن الأفضل تكون الولادة بعملية قيصرية و هنتعرف على الحالات دى :
١- إن الجنين يكون قاعد بوضعية معكوسة ( الرأس غير مرتبطة بالحوض) و يبدأ الطلق على الأم و بيكون أفضل الولادة القيصرية عشان نتجنب حدوث أى ضرر للجنين اثناء عملية خروجه
٢- إن فترة الحمل تزيد جدا من غير ما يحصل أى طلق
٣- وجود عدوى بكتيرية فى القناة المهبلية بنضطر للقيصرية خوفا من أنها تنتقل للجنين اثناء الولادة الطبيعية
٤- ضيق مساحة الحوض و ميكونش فيه توافق بينها و بين مقاس رأس الجنين
٥- أغلب حالات التوأم بيكون الأفضل حفاظاً على الأجنة هيا الولادة القيصرية
٦- وجود أمراض لدى الأم زى تسمم الحمل ، الضغط العالى ، أمراض القلب و السكر
٧- تكون الأم قامت بعملية الولادة القيصريه مسبقاً أو أى عملية جراحية داخل الرحم زى استئصال الأورام
٨- لو حصل سقوط للمشميمه فى الجزء السفلى من الرحم أو لو انفصلت المشيمة أثناء الطلق أو التفاف الحبل السرى حول عنق الجنين هنا لازم التدخل الجراحى سريعاً
و طبعاً أخر حاجه هيا الولادة المبكرة لو حصل أى مشاكل صحية للأم أو الجنين بعد الشهر السابع تستدعى التدخل الجراحى الفورى
غير كدا طبعاً بنصح الأمهات إنهم يلجأوا للولادة الطبيعية لأنها الأفضل على مر العصور ..
دمتم بصحة و سالمين 🍁
#الولادة #صحة

هنتكلم النهارده على واحد من أكتر الأسئلة اللى بتجيلى الفترة دى ..
يعنى أيه مخزون المبيض يا دكتور و بيأثر على الحمل و لا لا و هل ينفع يزيد و اعرفه ازاى ؟؟؟!!
أولا : ايه هو مخزون المبيض ؟!
-البنت بتتولد بعدد معين من البويضات تقريباً ٢ مليون بويضة و العدد ده بيقل مع التقدم فى السن... الجسم مش مؤهل إنه يصنع بويضات جديدة و مفيش أى طريقة إننا نغير فى عدد البويضات دى زى ما قولنا البنت بتفضل تفقد عدد من البويضات شهرياً مع كل دورة لحد ما بتوصل لسن إنقطاع الدورة و دى بتختلف من بنت للتانيه لأن العدد بيختلف فى كل جسم عشان كدا دائماً بنصح السيدات اللى بيقرروا يأجلوا موضوع الإنجاب إنهم لازم يتابعوا مخزون المبيض الأول لأن فيه نسبه من البنات بتتفاجئ أن بيحصل إنقطاع للدورة فى سن صغير
طيب يا دكتور نعرف ازاى المخزون دا كويس و لا قليل
ب ٣ فحوصات مهمه ( ١- نعمل التراساوند على المبيض ) (٢- تحليل AMH ) و بيكون النسبه الجيده للهرمون فى الدم 4.0 _ 1.0 ng/ml
( ٣- تحليل FSH ) فى اليوم التانى أو التالت من الدورة و النتيجه الجيدة للتحليل بتكون أقل من 10 ng/ml
طيب يا دكتور انا باخد منشطات للتبويض هل دا يأثر على عدد البويضات عندى ؟!
اهم حاجه نعرفها الاول المنشطات دى لازم تكون تحت إشراف الطبيب و اتكلمنا فى post سابق عنها فا لو بناخدها نكون عارفين إن المبيض بينتج عدد معين من البويضات شهرياً بيكون فيه منها بويضة واحدة فقط ناضجه تصلح للتخصيب المنشطات بتساعد فى نضوج عدة بويضات مش واحدة بس عشان فرصة الحمل تكون أكبر لكن مش بتلعب فى العدد بزيادة أو نقص
طيب لو أنا عندى عدد البويضات المتبقية قليل جداً كدا فرصة الحمل ضاعت ؟!
هو طبعاً دا رزق بيكون مكتوب عند ربنا لكل شخص لكن الحل هنا طبياً الحقن المجهرى و بيكون فيه تنشيط للبويضات قبله
و اخيرا دمتم بصحة و سالمين 🍁

اللهم صلّ وسلم وبارك على سيدنا محمد ❤

ممكن نعرف معلومه سريعة و بيجيلى عليها اسئلة كتير جدا .... أمتى لازم البنت تروح لدكتور النسا ؟
اولا : لو فيه اضطرابات مش طبيعيه فى الدورة الشهريه سواء كانت بتتأخر كتير جدا أو بتيجى كذا مره فى الشهر أو فيه مشكله فى كمية الدم و يكون دا مأثر على حالة البنت و مجهودها
ثانياً : لو فيه ألم مستمر فى منطقة البطن و الحوض و ميكونش متعلق بالقولون أو التهابات المعده
ثالثاً : لو ظهرت حبوب شديده أو شعر زائد فى الوجه و الجسم
رابعا : اضطرابات مفاجئة فى الوزن سواء كان سمنة مفرطة أو نحافة شديده
خامساً : لو بتعانى من إفرازات مسببه أى أعراض أو رائحة مش طبيعية
كل دا وارد أن يكون بسبب خلل هرموني أو التهابات أو تكيسات على المبيض أو حاجات تانيه كتير لازم طبيب يشخصها و لازم منسكتش على الأعراض دى لأن علاجها فى الأول بيكون أفضل كتير
دمتم بصحة و سالمين 🌹

هنتكلم انهارده عن أشهر مرض في فترة الحمل وهو
" أنيميا نقص الحديد فى الحمل "
و دا بيصيب اكتر من ٥٠% من الحوامل..
اول حاجه لازم نعرفها
-ليه انيميا نقص الحديد منتشره بين الحوامل؟
الجسم بيستخدم الحديد لإنتاج الهيموغلوبين، وهو أحد البروتينات الموجودة في خلايا الدم الحمراء اللى بتنقل الأكسجين للأنسجة، فى فترة الحمل بنحتاج تقريباً ضعف كمية الحديد اللى بيحتاجها الشخص العادى و دا عشان الجسم ينتج كميه اكبر من الدم اللى بدوره بيوصل الأكسجين للجنين و دا معناه أن لو مفيش كميه كافيه من مخزون الحديد فى الجسم أو حصلنا على كميه كبيره من الحديد هيحصل فقر دم أو انيميا نقص الحديد
هل يا دكتور الأنيميا هتأثر عليا بس ولا كمان على الجنين؟
نعرف الأول التأثير على الأم
الأنيميا الشديده فى فترة الحمل بتزود من مخاطر الإجهاض و الولادة المبكرة ونزيف قبل او بعد الولاده و حدوث اكتئاب ما بعد الولادة وعدم القدرة علي الرضاعه الطبيعيه بصوره كافيه
دا غير أنها بتسبب بعض الأعراض السيئة زى التعب المستمر و الصعوبة في التركيز و احيانا بيحصل ضيق فى التنفس و نبضات سريعه أو مش منتظمه كمان بتكون البشره شاحبه و بتؤدى لتساقط الشعر ...
اما بالنسبه للجنين ،بعض الدراسات بتقول أن دا بيزود مخاطر وفاة الرُضع قبل الولادة أو بعدها أو أن الطفل يتولد بوزن قليل و ممكن تعمل مشاكل فى التنفس للجنين
بنعرف الأنيميا من الأعراض اللى اتكلمنا عليها مع الفحوصات (صوره دم كامله مع قياس نسبه مخزون الحديد)
نقدر نحمى نفسنا من الاصابه بأنيميا نقص الحديد اكيد لازم ناخد الڤيتامينات اللي كتبها الطبيب بشكل مستمر اثناء الحمل و ممكن نحتاجها بعد الولادة و التغذيه الجيدة بتناول المصادر الغذائية التي تحتوي على الحديد زى اللحوم الحمراء والدواجن والأسماك و الكبده و البنجر و الموز والتفاح و التمر ..
و نداوم على معلقه من دبس التمر أو العسل الأسود
و مننساش حمض الفوليك طبعاً ممكن ناخده من حاجات طبيعيه زى ( الأفوكادو و البنجر و العدس و الخضروات الورقيه..)
لازم كمان نركز على فيتامين سي لأنه بيساعد على امتصاص الحديد و بيكون موجود مثلا فى البرتقال و الطماطم و الفراولة و الفلفل الملون ..
ومن الافضل نتجنب اخذ الحديد مع منتجات الكافيين زى القهوه و الشاى لأنها ممكن تحد من امتصاص الحديد
**و أخيراً **
"صحتنا دايماً لازم تكون أولوية فى حياتنا ، نحافظ عليها لأن أغلى حاجه بيملكها الإنسان هيا صحته و لأن دايما بيكون علاج إهمالنا لنفسنا مرهق ماديا و جسديا و نفسياً "..
دمتم بصحة و سالمين🌹
#الحمل

هل زيادة الوزن بتسبب الإصابة بمتلازمة تكيس المبايض أو هل تسبب متلازمة تكيس المبايض حدوث زيادة فى الوزن ؟
مفيش علاقة طبية مؤكدة بين متلازمة تكيس المبايض و زيادة الوزن و الدراسات أثبتت أن ٤٠ % تقريبا من السيدات اللى بيصابوا بمتلازمة تكيس المبيض بيعانوا من السمنه و ده لأن جسم النساء المصابات بمتلازمة تكيس المبايض بينتج كمية كبيرة من الأنسولين، أو لا ينتج أنسولين بشكل طبيعى و عشان كدا عدم قدرة الأنسولين على العمل بشكل طبيعي يعتبر من أحد أسباب زيادة الوزن أو صعوبة التخلص من الوزن الزائد .
وفيه بعض النساء تتطور إصابتهم بمتلازمة تكيس المبايض بعد زيادة الوزن. و بكدا يكون النساء اللى عندهم زيادة فى الوزن معرضين اكتر من غيرهم للإصابة بتكيس المبايض و ايضا النساء المصابة بتكيس المبايض معرضين اكتر من غيرهم للإصابة بالسمنه ..
الملخص أن تكيس المبيض مش لازم يكون ليه علاقه مباشرة بزيادة الوزن فيه سيدات تعانى من النحافة و مصابين بمتلازمة تكيس المبيض لكن المفروض اننا نحب جسمنا و نحافظ عليه
"لجسدك عليك حق "
ودا عشان نتجتنب أمراض كتيرة جدا مرتبطه بالسمنه و عشان نعيش بصحة أفضل.
المحافظه على اجسامنا ضرورة مش أختيار لصحتنا و لأنه بيشكل جزء كبير من ثقتنا بنفسنا
فقدان الوزن كمان بيخفف من أعراض تكيس المبيض و بيزيد الخصوبة و بيحافظ بنسبه كبيرة على إن الدورة الشهرية تكون طبيعية
ممكن بخطوات بسيطه نقلل الوزن بشكل صحى و سليم
-  تقليل كمية الكربوهيدرات.
- تناول الكثير من الألياف.
- تناول ما يكفي من البروتين.
- تناول الدهون الصحية.
- الحد من المواد الحافظه و الاطعمه المصنعه و السكريات
- الاسترخاء والابتعاد عن التوتر.
- النوم بشكل جيد.
- ممارسة التمارين الرياضية بانتظام ابسطها المشى و متوافر لأى شخص فى أى مكان و بيحسن من الصحه النفسيه
دمتم سالمين 🌹



#السمنة

الايام دى فيه هوس حقيقى فى استخدام منشطات التبويض لحالات مش محتاجه دا أصلا ..!!!
طيب امتى يا دكتور نستخدم منشطات التبويض انا بقالى ٤ شهور متزوجة و مفيش حمل و عماله اخد منشطات تبويض عشان احمل ؟!
احنا بندور على أسباب تأخر الإنجاب بدرى فى حالة أن يكون فيه اى مشاكل صحيه معروفه قبل الزواج بالنسبه للزوج او الزوجه أو يكون سنهم كبير سواء الزوج او الزوجه لكن لو الأسباب دى مش موجوده مش بندور على سبب تأخر الإنجاب قبل سنه من الزواج لأن
- بنسبة ٢٠% تقريباً بيحصل حمل بعد شهر من الزواج
- و بنسبة 60% تقريباً بعد 6 شهور بيحصل حمل
- و بنسبة 80% تقريباً بيحصل بعد 9 شهور
و بعد سنة 90% تقريباً بيكون حصل حمل و بيتبقى نسبة 10% تقريباً لتأخر الإنجاب سواء بسبب طبى معلوم أو لسبب غير معلوم
و دا الوقت الصحيح للحالات الطبيعيه انهم يدوروا على سبب تأخر الإنجاب و يعملوا كل الفحوصات المطلوبه ..
لذلك استخدام منشطات التبويض بدون داعى و فى أول سنه قبل الوصول للأسباب الطبيه دا ممكن يؤدى إلى نتيجه عكسيه تؤثر على كفاءة المبيض و صحة المرأة ..
و أخيراً ياريت نخاف على صحتنا و مناخدش حاجه بدون داعى و نجهد نفسنا جسديا و معنويا و ماديا ...الحمل دا بيكون رزق ربنا كاتبه فى ميعاد معين و احنا بنمشى ورا الأسباب و بنسعى و بنعمل اللى علينا بس من غير ما نأثر على صحتنا ...
دمتم سالمين 🌹
#الحمل

كلامنا النهارده عن حاجه مهمه جدا غالباً بيسأل عنها السيدات و البنات و هيه
" الغسولات النسائيه أو الغسول المهبلي "
فى بداية الكلام كدا لازم نعرف إن الغسول دا أضراره أكبر بكتير من فوائده الصحية
أولاً دا مينفعش يكون روتين للنضافه الشخصيه بالعكس لازم نتجنبه بقدر الإمكان و الأفضل اننا نبتعد عنه خالص
كثرة استخدام الغسول ممكن يسبب التهابات شديده فى الحوض و جفاف فى المهبل ممكن تأثر على القدرة الإنجابيه بعد كدا أو تسبب حمل خارج الرحم أو تؤدى لولاده مبكرة بالنسبه للحامل ..
طيب ازاى بنحافظ على النضافه الشخصيه بدون الغسول اننا نستخدم دايما الماء الدافئ بدون اى اضافات عليه ..طريقة غسل المنطقه الحساسه بيكون من الامام للخلف مش العكس لأن دا بيزود العدوى و الالتهابات.. كمان التنشيف المستمر بالمناديل الورقيه غير المعطره منسبش المنطقه رطبه ابدا لأن دا بيكون بيئه مناسبه للبكتريا .. ممكن نستخدم مزيلات العرق للمنطقه الحساسه بس استخدام خارجى فقط زى Beesline Egypt
و نستخدم فوط صحيه يوميه بدون رائحه زى
بالنسبه لفوائد الغسول النسائى فا بيكون ضمن كورس علاجى للالتهابات المرضيه و لازم يكون تحت إشراف الطبيب المعالج ...
دمتم بصحة و سالمين 🌹

عيادة دكتور محمد عزت لمتابعة الحمل و حالات الحمل الحرج و الإجهاض المتكرر و تأخر الإنجاب و تكيس المبايض

نظرا للظروف الراهنة فى عام الكورونا تم فتح الكشف*** مجانا **
داخل العياده لمدة أسبوع يرجى الحجز المسبق بالتليفون
عنوان العياده : ٦ أكتوبر الحى الأول عماره ١٩٣ فوق صيدليه د/أحمد ماهر أمام معهد الحصرى الدينى
الرقم :
01013867445
يسعدنا تشريفكم🌹

بما إن الضغط من أكتر الأمراض المنتشرة بين الناس و الضغط المنخفض منتشر اكتر بين البنات و السيدات و بيسبب أعراض مزعجه فا احنا هنعمل سلسلة كتابات نعرف فيها ايه هو الضغط ..يعنى ايه ضغط عالى و ضغط منخفض ..امتى يكون فيه خطورة.. امتى نحتاج طبيب أو علاج معين ايه الأعراض و ايه القراءات اللى بنسمعها من الدكتور لما نقيس الضغط زى ٩٠/٦٠ و ١٢٠/٨٠ .. إلخ
و هنبدأ فى أول post نعرف
** ايه هو الضغط ؟!!
ضغط الدم هو القوة اللى بيضغط بها الدم على جدران الأوعية الدموية أثناء رحلته اليومية في الجسم، واللي بيقوم وقتها بتزويد الجسم باحتياجاته اليومية من غذاء وطاقة عشان يعمل عملياته الحيوية على أكمل وجه.
قراءات الضغط بتتكون من رقمين ليهم دلالات معينه :
- القراءة الكبرى و دى بتوضح ضغط الدم فى الشرايين لما عضلة القلب بتنقبض
-القراءة الصغرى : بتوضح ضغط الدم فى الشرايين مع انبساط عضلة القلب يعنى بين النبضه و الأخرى
و القراءة دى بتبين الوضع الصحى للشخص
*** أول حاجه هبوط ضغط الدم (Hypotension) لما بتكون القراءة الكبرى ٩٠ ملم زئبقى أو أقل و الصغرى ٦٠ ملم زئبقى أو أقل و دا معناه ضغط منخفض
*** تانى حاجه الضغط الطبيعى ( normal Blood pressure) بتكون القراءة الكبرى ١٢٠ ملم زئبقى أو أقل و الصغرى ٨٠ ملم زئبقى أو أقل و ده احسن وضع للضغط و هو الضغط الطبيعى و المعتدل للشخص
*** الضغط العالى ممكن نقسمه ل ٣ مراحل
الأولى (Hypertension): القراءة الكبرى بين 140-159 ملم زئبقي، القراءة الصغرى بين 90- 99 ملم زئبقي.

الثانية (Hypertension): لما تعادل القراءة الكبرى أو تزيد عن 160 ملم زئبقي، بينما تعادل القراءة الصغرى أو تزيد عن 100 ملم زئبقي.

نوبة فرط الضغط(Hypertensive Crisis): عندما تزيد القراءة الكبرى عن 180 ملم زئبقي وتزيد الصغرى عن 110 ملم زئبقي، وهنا طبعا الشخص لازم يتنقل للمستشفى للتدخل الطبى حالا
هنشرح كل حاجه فى ال بالتفصيل فى ال posts الجايه و أى استفسار ممكن نكتبه على ال post عشان نقدر نرد عليه للأستفادة العامه .. دمتم سالمين 🌼

ايه الحاجات اللى المفروض نعرفها قبل ما نستخدم اى وسيلة لرفع الدورة الشهرية سواء للسفر أو لصيام رمضان كامل أو للزفاف أو أثناء الحج أو العمرة ... فيه اسباب كتير بتخلى السيدات تلجأ للأدوية دى بس لازم نعرف فى الأول إن مينفعش نلجأ لوسيلة زى دى إلا تحت إشراف طبى لأن كل حاله بينفع معاها علاج معين وكل جسم بيستجيب بطريقة مختلفة و لأن الأدوية دى ليها أعراض جانبية لازم نكون عارفينها قبل الأستخدام
أولاً : لو نسينا ناخد الأقراص كلها ممكن دا يتسبب فى نزيف
ثانياً : بتسبب خلل هرمونات ممكن بعد ما نوقف الوسيلة نلاحظ أن الدورة الشهرية مبقتش منتظمه أو بقت تنزل بكميه كبيرة جداً أو أكتر من مره فى الشهر الواحد أو بتغيب بالشهر و الشهرين و أحياناً تلاته
ثالثاً : لو سيده متزوجه ممكن تكون حامل مع عدم معرفتها و تاخد أدوية لرفع الدورة و دا طبعاً هيأثر سلبيا عليها و على الجنين
عشان كدا دى من الحاجات المهمه اللى لازم إننا نستشير الطبيب فيها أولاً تجنبا لأى مشاكل صحيه .
دمتم سالمين 🌼

من أكتر الأسئله الشائعه هل التمر و القرفه بيسببوا إجهاض فى الشهور الأولى أو ولاده مبكره ؟!
التمر و القرفه من أفضل الحاجات المغذيه بشكل عام لأحتوائهم على فيتامينات مهمه لصحة الجسم .. ممكن أخذهم فى فترة الحمل بنسب بسيطه لأنهم لو تم استهلاك كميات كبيرة منهم فى فترات متواصله ممكن يتسببوا فى إنقباضات للرحم و دا طبعا مش مطلوب من الشهر الأول للشهر الثامن و عشان كدا بنفضل اننا نقللهم فى فترة الحمل لتجنب حدوث أى مشاكل

عيادة دكتور محمد عزت
لمتابعة الحمل و حالات الحمل الحرج و الإجهاض المتكرر و تأخر الإنجاب و تكيس المبايض
***اسعار خاصة للولادة بدون ألم
اسعار مناسبه للكشف و المتابعة
* يسعدنا تشريفكم ⁦*
عنوان العياده : ٦ أكتوبر الحى الأول عماره ١٩٣ فوق صيدليه د/أحمد ماهر أمام معهد الحصرى الدينى
الرقم :
01013867445
مواعيد العياده يوميا ماعدا الخميس و الجمعه (للطوارئ)
الحجز المسبق بالتليفون لتحديد ميعاد معين للحضور منعا لحدوث تزاحم لأتباع الإجراءات الوقائية حفاظاً على الصحة العامة..