مديتيشن بالمصري Mindfulness Meditation

دي قناتي على اليوتيوب لشرح المديتيشن

مديتيشن بالمصري Mindfulness Meditation

التعبير عن نفسك .. كل انسان ليه الحق انه يعبر عن نفسه مهما اتريق عليه الناس او اعترضو او استغربو او رفضو باي شكل من الاشكال ومهما هوا نفسه حس بتردد وقلق وخوف وندم
لما الواحد بيعبر عن نفسه فهوا بيعبر عن حقيقته او الحقيقة كما يشعر بها ويراها
فالحقيقه الاكبر هيا اللي بيحس بيه ، مشاعره .. مش ممكن تيجي تقول لحد انك زعلان ويقولك انت غلطان مش دا الاحساس اللي انت حاسس بيه
الحقيقة اللي بعدها في الدرجة هيا الرأي ، هوا التاني في الدرجة علشان داخله لخبطه كتير وتحليلات كتير وفيه احكام وتقييمات .. ودي ممكن يختلف فيها معاك الناس عادي
لما بتعبر عن مشاعرك فانت بتخاطر لانك مش عارف الطرف اللي ادامك هيستقبلها ازاي ويتعامل معاها ازاي .. الخوف الزياده من تعبيرك عن مشاعرك ممكن يخليك بتلكك للي بيتكلم معاك على اي حاجه يقولها خصوصا لو معرفش او مرضيش يعبر عن مشاعره هوا كمان وهوا ببيكلمك واللي ممكن تحس فيها انك اضعف او مكشوف اكتر
تعبيرك عن مشاعرك لو فيه صعوبة ممكن يكون معاه رغبة في الحصول على تعويض والاعتقاد في استحقاقك للتعويض دا ، طالما عبرت عن مشاعرك يبقى تستحق الموقف يتغير او ان اراء اللي حواليك تتغير وسير الامور يبقى في اتجاه اللي انت عايزه ونفسك فيه
التحدي هنا هوا استمرارية تذكير نفسك بان تعبيرك عن مشاعرك هوا مسئولية شخصية خاصة بيك وانك بتعمله لنفسك بالدرجة الاولى وانه مش ضعف و انه تفتيح لابواب وقنوات التواصل بينك وبين نفسك قبل اي حد وانك مع الوقت كل ما هترتاح في تعبيرك عن مشاعرك هتبقى متزن اكتر في علاقاتك وانك مسئول مسئولية كامله عن مشاعرك ومفيش مع التعبير عنها الزام واقع على اي حد حواليك انه يعمل حاجة معينه
وعلشان ميحصلش لخبطه هل دا معناه اننا نتعامل مع بعض بشكل جاف ؟ دا عكس النتيجة اللي هتحصل لو اللي بيتعاملو مع بعض بيعبرو عن مشاعرهم ومسئولين عنها .. لأن دايما في مشاعر واي تفاعل صادق فيه تعبير عن المشاعر من ناحية انسان ما هيأثر في الانسان اللي بيتواصل معاه بدرجات متفاوته خصوصا لو كان هوا كمان ملتزم بتعبيره عن مشاعره
الوصول لنتيجة بسيطه جدا جدا وهيا ان التعبير عن المشاعر شيء طبيعي وعادي واكتر اهمية من التعبير عن الاراء والحكايات بيصنع تغييرات كبيره مع الاخذ في الاعتبار ان التعبير عن المشاعر يكون غرضه والمحرك وراه هوا التواصل مش قفل الابواب .. والهدوء مش التسرع .. والقرب مش التلكيك والاستعلاء
والمشاعر جزء مهم واساسي في تكوين الاراء واتخاذ القرارات يعني كل ما زادت قدرتك واتزانك في تعبيرك عن مشاعرك واحساسك بالمسئولية ناحيتها كل ما اتحسنت في اتخاذ قراراتك وتعبيرك عن اراءك
وحاجة مهمه جدا كمان هيا ان التعبير عن المشاعر مهارة علشان يحصل لها اتقان عالي المستوى-مش كمال حتى- محتاجه وقت وتجارب ولخبطه وغلطات وشوية اضطرابات وقلق وتردد ..

طول ما انت بتلوم نفسك اتأكد انك متلخبط مش شايف تجربتك ونفسك كويس ... كل ما تشوف نفسك وتتعرف عليها اكتر وتقدر تجربتك اكتر واللي بتحاول تعمله هيقل اللوم بتاعك وهتحترم نفسك اكتر

المديتيشن
تجربة بدأتها من حوالي تلت سنين ونص يمكن اكتر .. استفدت منها كتير جدا جدا لأن اساسها مهم لاي بني ادم وهوا انك تقعد مع نفسك وتتفرج وتشوف بس ايه اللي حاصل جوا لأن في العادي احنا مبنعرفش نقعد مع نفسنا ولو بصينا على اللي بيحصل جوا دماغنا بيبقى عندنا ردود افعال كتير واحكام مختلفه .. لكن مش دايما سهل علينا نلاحظ بس من غير احكام ولا لوم
الاغراق في تجربة المديتيشن بيفكك حاجات كتير ومنها حاجات مهمه زي الدوافع مثلا .. لو مش واخد بالك ممكن يفكك شوية اهتمامك بمشاعرك او يخليك تقلل ردود الافعال اللي بتاخدها بناءا على المشاعر بشكل زايد عن الحد شوية ،يمكن لدرجة الاهمال وهتكون مستريح عادي لكن مش متفاعل اوي في حياتك .. فممكن يتشابه مع الاكتئاب لكن مش بالضرورة اكتئاب خالص
الاغراق في تجربة المديتيشن وتفكيك القصص التاريخية بتاعة الأنا ممكن يعمل حالة انفصال بينك وبين نفسك وشوية غربه او عازل .. وتبدأ القصص بتاعتك القديمه مهما كانت بتناديك مش هتديلها اهتمام كبير ومش هتضايقك
هتقولي ماهو دا عز الطلب، هقولك ماشي بس بنسبة .. القصص القديمه وذكرياتك القديمه هيا دي اللي اتعلمت منها تكون منطلقات في الحياه وتبني على اساسها دوافع واهداف , والشخصيات القديمه بتاعتك ، الاطفال الصغيرين كان ليهم اهداف وتطلعات ولسه نفسهم يحققوها .. فلو اهملت قصصهم بالكامل واتفككت بالكامل واتفرغت شحنات المشاعر بتاعتها -تجاوزا يعني- هتحتاج تتعلم تاني يعني ايه دافع اصلا والظاهر كدا دي من الحاجات اللي لازم تتعلمها وانت صغير وكله بيتعلمها وهوا صغير بس بيكون فيها مشاكل وتحديدات وتحجيمات .. لو سيبناها وفككناها مش هتضايقنا بس مش هنقدر نعيش في جو تنافسي ، فممكن نستفيد شوية من التفكيك دا خصوصا لو القصص عنيفه في توترها وضغطها لكن انا مازلت محتاجها محتاج افك التعقيد بتاعها واسمع للطفل الصغير بتاع القصه دي كان نفسه في ايه وكان زعلان من ايه ومتضايق من ايه ولما اسمعه ابدأ احاول اربط القصص دي باللي بيحصل دلوقتي في المواقف المشابهه ، زي مثلا طفل مكنش بيتم تشجيعه في الدراسه والناس تتريق عليه، فخايف من الدراسه طول عمره مش متشجع فيها ويطلع خايف من الشغل وعايز يتشجع فيه علطول ومحتاج دايما دعم عمال على بطال فبتلاقي ان نمط واحد بيتحور معاك طول حياتك ويقرفك فلازم ترجع للأصل والقصص القديمه وتسمع العيل الصغير اللي كان بيعاني منها
اهم حاجة في القصص هيا المشاعر ، كلاكيع المشاعر هيا اللي عامله الازمة ، مشاعر متسمعتش .. شوف الفرق بين انك تتكلم مع حد وتقوله انك متضايق او زعلان وبين انك تفضل كاتم في نفسك .. تخيل اللي حاصله كدا عيل صغير عنده اربع سنين نفسه يتكلم ومش عارف وخايف اصلهم كانو مش مهتمين بيه بيقولو بطل هبل ولا اخرس يلا ولا شوفلك لعبه العبها ولا ينضرب ...
انك تتعلم تعبر عن مشاعرك مهاره اساسيه علشان تحسن جودة حياتك ، ممكن تبدأ كل يوم انك تسأل نفسك انا حاسس بايه دلوقتي " متضايق ، مبسوط ، سرحان ، مقروف، زعلان ، طاير من الفرحه، مخنوق، زهقان، قلقان، خايف، مضطرب، متوتر، تايه، مستريح ، هادي، مش على بعضي، حاسس بامان، محبوب، مقبول، حاسس بالذنب، محبط ، مكتئب، موجوع، مجروح، محرج، حاسس اني ضحيه، عندي امل ، حاسس بالامتنان ، واثق من نفسي، راضي، ناقم، كاره، متردد ،حاسس بالتهديد ،ملل ، مخذول ، متلخبط ، متفاجيء ، متحمس، متلهف"
اهم حاجة تبقى بتستخدم كلمات تعبر عن مشاعر .. وكل ما تخلي الطفل او الاطفال اللي جواك تتكلم كل ما هتقرب من نفسك اكتر.. كل ما تعرف تعبر عن مشاعرك اكتر كل ما هتتحسن اكتر وتعقيداتك تتفك اكتر ودي مش عملية بسيطه طبعا وفيها لخبطه وبتاخد وقت ودايما فيها مجال للتحسن والتطوير وسهل في الاول تبقى مش عارف الشعور اللي انت حاسس بيه دا ايه
بعد ما بتكتب المشاعر ممكن تكتب الحكايات بقى ويا سيدي على الحكايات ، مفيش حد مننا معندوش مئات الحكاوي القديمه اللي بتدور في دماغه آلاف المرات ... احكيها بقى بعد المشاعر او مع المشاعر لو كل جزء في الحكايه فاكر حسيت فيه بايه او بيحسسك بايه لما بتفتكره اكتب عنه
افتكر دايما ان اهم حاجة انك تحس انك مسموع ومقبول من نفسك الاول ، دي بداية احساسك النفسي بالامان ، ولو لقيت دا برا مع صديق او حبيب يبقى كويس بردو بس ابدأ من عندك متستناش ..
ربط النقطه دي بالمديتيشن يتلخص في اني متخلاش عن الماضي بتاع الانا بتاعتي، لأن فيه حاجات كتير اساسيه اتعلمتها زي الدوافع والتنافسيه والاهتمام بالانا وحمايتها ، مشاكل الحاجات دي لما تزيد ويبقى معاها اثار سلبية زي الحكم على نفسك باحكام تقيله واللوم والاحساس بالذنب والتقليل من نفسك ويبقى معاها ألم وخوف وغيرها من المشاعر اللي ممكن يشارك في تعزيزها ناس حواليك بس مش موضوعنا لانها حاجة مش في ايدينا نتحكم فيها لكن نقدر مع الوقت منهتمش بيها كتير لما نفهم اكتر ان حتى اللي بيحكمو علينا مطلعين عين نفسهم بردو لأن النمط اللي شغالين بيه برا شغال معاهم جوا دماغهم عادي
يعني احتفاظك بتاريخ الانا بتاعتك وفك تعقيداته من خلال الكتابة مع ملاحظة طريقة تفاعلاتك وتفكير دماغك في التصرفات والسلوكيات من خلال المديتيشن هيديلك نتايج حلوه جدا .. تزود فيها هدوءك وتكون محتفظ بدوافعك ورغبتك في التنافس في الحياه عادي بعيدا عن الفكر اللي فيه تخلي عن كل شيء
طريقة تكوين الاهداف اكتر والمباديء اللي الانسان يلتزم بيها مع نفسه في شغله دي قصة تانيه بردو حلوه لما ابقى اتعلمها كويس ابقى اكتب عنها

دي playlists بالفيديوهات اللي عملتها

اول بلاي ليست عن (ايه هوا المديتيشن)

https://www.youtube.com/playlist?list=PL3nD-k2EcYRDPM4FWJF2AanL412Y9B8bk

الاكتئاب واللوم
https://t.co/SVayK5wNpk?amp=1
مباديء وأساسيات في المديتيشن
https://t.co/GE5fV34rBF?amp=1
الكتابة التعبيرية
https://t.co/7wIbIDrUAF?amp=1
كبسولات مديتيشن وكتابة
https://t.co/FYuPuVpiTZ?amp=1
دقيقة مديتيشن
https://t.co/jrQ0oc6jOB?amp=1
ازاي اعمل مديتيشن
https://t.co/YAgcV94CdY?amp=1

ايه هوا المديتيشن - YouTube

يا ريت لو حد عنده سؤال حابب يسأله عن المديتيشن او الكتابة يبعته للصفحة