Wild Narrative

بينما يبدو طائر الماينا الهندي جميلًا للبعض ، فهو يُعتبر طائراً غازيًا و يُعرف بقدرته على احتلال المناطق البيئية و تشريد الطيور الأصلية و الإستيطان في أعشاشها او تدميرها.
هذا التحدي يؤدي إلى فقدان التنوع البيولوجي وتدهور البيئة الأصلية ويعرّض التوازن البيئي في المنطقة باكملها للخطر.

مكافحة انتشار طائر الماينا الهندي هي استجابة مشروعة للحفاظ على تنوع الحياة البرية وحقوق الطيور الاصلية في البقاء و الازدهار في بيئتها 🫒🕊

* الخوف من #الحيوانات هو شعور و تنبيه من الجسم بالخطر نتيجة تجربة سابقة أو معرفة مكتسبة سواء من الآباء او الأصدقاء أما #الفوبيا أو #الرهاب هو خوف شديد بدون أي أسباب منطقية و ده ممكن يمنع الإنسان من ممارسة حياته الطبيعية.

* الفوبيا بشكل عام يمكن تصنيفها كمرض نفسي و الشخص المصاب بالفوبيا بيبقي عارف ان خوفه ده غير منطقي و بيكون حاسس باحباط شديد لأنه مش عارف إزاي يتخلص من خوفه ده و يمارس حياته بشكل طبيعي.

* زي ما بنحب الحيوانات و بيكون نفسنا كل الناس تحترم شعورنا ده ، لازم برضه نحترم أي شخص عنده فوبيا من الحيوانات و مانتعاملش معاه بشكل هجومي لأن ده ممكن يؤدي إلى تفاقم المشكلة و تحولها لكراهية للحيوانات قد تؤدي لايذائهم بشكل كبير.

الحيوانات الأليفة ليها دور مهم جدا في الدعم النفسي و العاطفي لأصحابها و خصوصا الكبار في السن و اصحاب المرض العضوي أو النفسي شفاهم الله.
في بعض الدول بيقر القانون للطبيب وصف حيوان أليف للمساعدة في الشفاء الجسدي أو الدعم في حالات الأمراض النفسية أو الحالات المتأخرة. الحيوانات بتساعد أصحابها علي التواصل العاطفي و بتهون مرور الوقت في حالات الوحدة و بتكون مستقبل جيد لأفكار صاحبها و شكواه.

من سنة أنا فاكر والدتي قبل وفاتها طلبت مننا عصفورين و رغم اني ضد تربية عصافير في أقفاص لكن استجابنا لطلبها و كانت في اخر أيامها مبسوطة جدا لوجودهم و بتقعد تتكلم معاهم و هونوا عليها الوقت لحد ماجت ساعة القدر.
فضلاً منكم تذكروها في دعائكم النهاردة في ذكري وفاتها هي و كل حبايبنا اللي فارقونا.

جمعة مباركة ❤️

تربية حيوان أليف في المنزل و إضافة فرد جديد للأسرة يحتاج للكثير من الوقت و المجهود و المسئولية و لكن في المقابل هناك فوائد كثيرة لجميع أفراد الأسرة من تربية الحيوانات الأليفة و بخاصة للأطفال ، بعض هذه الفوائد موضحة بالصور و التعليق عليها أسفل كل صورة 🙋‍♀️🙋‍♂️🐶🐱

الذيل في معظم أنواع الكلاب يختلف عن باقي عائلة الكلبيات Canidae و التي تشمل الذئاب و الثعالب و الكلب البري الافريقي و حيوان ابن آوي، أحد آهم الاختلافات الرئيسية هو أن ذيل الكلب له القدرة علي الاتجاه و التكور لأعلى في حين باقي أفراد العائلة يكون الذيل موجها لاسفل في أغلب الأحيان أو ممدا للخلف بشكل مستقيم في أحيان اخرى.

لم أجد أي دراسة أو بحث يتحدث بشكل خاص عن سبب هذا الإختلاف و لكن معظم النظريات و الفرضيات بتحدد أنها قد تكون طفرة جينية بسبب تهجين الكلاب و انتقاء صفات في الشكل الخارجي تميز الأنواع و تجعلها تجذب الإنتباه ، و البعض الآخر من الفرضيات بيرجع التغير في ذيل الكلب للتاقلم مع حياة الكلب بجوار الإنسان و رغبته في التواصل مع الأنسان عن طريق لغة الجسد و منها حركات الذيل.

صدق قائل المثل " ديل الكلب عمره مايتعدل " فقط إذا أراد به المعني الحرفي للجملة 🐕👌

https://www.facebook.com/reel/596381835274148?mibextid=9drbnH&s=yWDuG2&fs=e

#الكلب #الكلاب

الرفق بالحيوان له مباديء بسيطة تتلخص في ٥ مباديء يطلق عليها الحريات الخمس. وهي نقاط مبسطة، اتباعها يضمن بشكل أساسي تحقيق الرفق و الرحمة بالحيوان ألاليف زي الكلاب و القطط سواء بالمنزل أو في الشارع آو حيوان يستخدم للعمل زي الخيول و الحمير و الماشية.

مفهوم الرفق مختلف تمامآ عن مفهوم الرفاهية، فالرفق هو تقديم أسس الرعاية و الاحتياجات الأساسية للحياة أما الرفاهية فهي الإسراف في تقديم أحد الاحتياجات الأساسية أو تقديم أشياء لا يحتاجها الحيوان من الأساس في حياته اليومية.

صباح جميل كله رفق و رحمة و جمعة مباركة 🙏❤

اختلفت الثقافات و الحضارات علي عدد أرواح القطط من ٦ ل ٧ و بعض الروايات ذكرت ٩ أرواح للقطط و لكن اتفق الجميع علي أن القطط لها أكثر من روح او حياة. 🐈‍⬛🐈‍⬛🐈‍⬛🐈‍⬛🐈‍⬛

قدرت القطط إنها تحافظ علي هذا اللقب لعدة قرون و تم تقديسها و اعتبارها من الآلهة المانحة للخير و الحظ وبخاصة في الحضارة المصرية القديمة، الي ان اثبت العلم و الأبحاث أن القطط أغلب من الغلب وعلي الله حكايتها وأن أحد أهم الأسباب في اعتبار القطط كائنات خالدة و غير خاضعة للموت أو الهلاك بسهولة هو مرونة جسمها و عضلاتها و أربطة المفاصل و قدرتها علي تغيير وضع الجسد عند السقوط من الأماكن المرتفعة لتسقط دائما علي قدميها اللي موجود فيها ممتصات للصدمة بتقلل من أضرار الاصطدام.

رجاء ما نعتمدش أن القطط ليها ٧ ارواح و نقدم لهم الرعاية اليومية و الصحية بشكل مناسب و نحاول نبعد عنهم مصادر الخطر و مسببات الحوادث علي قدر الامكان 🙏

لازم نفرق بين قص أظافر القطط و هو بيتضمن ازالة الجزء الزائد من الظفر أو المخلب زي ما بنقص اظافرنا بالظبط وهو روتين مقبول و مافيش منه أي مشاكل ✅️
والحاجة التانية هي إزالة الأظافر جراحياً و هي عملية قاسية جداً جسدياً و نفسياً و بتتضمن إزالة أول عقلة من الاصبع مع الظفر و هي عملية مجرمة في دول كتير. ❎️

رجاء مهما كان المشاكل اللي بتواجهها مع قطك الأليف بسبب الخربشة في المفروشات و الأثاث ماتلجأش لعملية إزالة الأظافر لأنك هتأذي القط طوال حياته و هيفضل متعذب نفسياً و حاسس دايما بعدم الأمان بسبب أنك أخدت منه وسيلة من وسائل البقاء و حماية نفسه.

توضيح: لو في مشكلة طبية في أحد الأطراف زي اورام أو جروح قطعية تستوجب استئصال الاصبع المصاب مافيش أي مشكلة نهائي في قرار الاستئصال للجزء المصاب

بنشتغل الفترة دي علي سلسلة مواضيع متكاملة عن التغذية و الاكل الصحي للحيوانات الأليفة من كل الانواع و الاعمار كمان مواصفات و تركيبة الاكل المخصص لكل المشاكل العلاجية. 🐈🐕🍲

فكنت حابب اخد رأيكم أيه نوع الاكل الجاف المصنع محليا و بالاخص في مصر اللي بتستخدموه لحيوناتكم و إيه ملاحظاتكم عليه سواء الإيجابية أو السلبية؟

تعليقاتكم هتساعدنا كتير في تكملة المواضيع اللي شغالين عليها و إن شاء الله تكون مفيدة لينا جميعاً

الخوف من الكلاب بشكل عام وخاصة الكلاب السوداء من الأفكار المنتشرة في مجتمعات كتيرة. الاسباب تختلف من التشاؤم لسوء الحظ و بعض الناس بتوصفهم انهم شر أو كائنات شيطانية.

الحقيقة أنا عن نفسي مؤمن أن ربنا ماخلقش أي حاجة شر أو فيها نقص أو غير مرغوب في وجودها. كل خلق الله جميل وله دور في النظام الكوني و إحنا اللي محتاجين نغير مفهومنا و نبطل تصنيف علي حسب الشكل و المصلحة الشخصية فقط.

صباحكم جميل و جمعة مباركة مليانة خير ان شاء الله ❤️

الحيوانات الاليفة مابقدروش يعبروا زيينا عن مرضهم أو إحساسهم بالألم ، لكن لكل مشكلة مرضية أعراض ظاهرية أو تغيير في السلوك بينبهنا لوجود مشكلة ما.

بداية ظهور الأعراض أو التغييرات دي مش معناه أنها بداية المرض ، ممكن تكون المشكلة موجودة و بتتطور من فترة ، علشان كدة لازم أول ما نشوف أي عرض من الأعراض دي نروح للطبيب البيطري بشكل فوري.

أحد أهم أسباب زيادة معدل الوفاة في الحيوانات الأليفة هو أن المشكلة الصحية تطورت و أن الضرر اللي أصاب الأعضاء الداخلية أصبح لا يستجيب للعلاج و كل ده بسبب التأخر في تقديم الرعاية الطبية .

الأعراض العامة اللي تستدعي زيارة الطبيب علي الفور :

١. العزلة و الهدوء الغير معتاد وقلة الحيوية و النشاط .
٢. الشهية و الإقبال علي الأكل اصبح أقل من المعتاد أو التوقف عن الأكل بشكل كامل
٣. زيادة الافرازات من مكان الإصابة ( العين و الاذن و الفم او الأعضاء التناسلية ) سواء إفرازات دمعية أو مخاط أو لعاب أو سوائل ذات رائحة سيئة
٤.جروح أو إصابات خارجية
٥. نزيف دموي من أي جزء من الجسم
٦. قيء أو تغيير في معدل و شكل التبول أو التبرز ( إسهال او إمساك )
٧.مشاكل الجهاز التنفسي من عطس أو سعال او زيادة معدل التنفس
٦. مشكلة في حركة الجسم او الأطراف
٩. مشاكل في التوازن او أعراض عصبية ( تشنجات او حركات لا ارادية )
١٠. مشاكل في الجلد او الشعر

و من الحب ما قتل 💔

للأسف كتير من مربي الحيوانات الاليفة بيعبروا عن حبهم لحيواناتهم عن طريق الإسراف في تقديم الأكل و اللي بدوره بيؤدي إلى زيادة الوزن و السمنة.

السمنة بتؤدي إلى مشاكل صحية كتير جدآ زي أمراض القلب و الكلي و مرض السكري و مشاكل المفاصل عند الكلاب و القطط و بتأثر سلبيا بشكل كبير جدآ علي عمرهم المتوقع.

لو حيوانك الاليف في مرحلة من مراحل السمنة ننصح بزيارة الطبيب البيطري للوقوف علي الحالة الصحية العامة و وضع نظام غذائي مناسب يساعد علي نقصان الوزن بشكل تدريجي.

في دراسات بتوضح أن ٦٥% من مربي الحيوانات مايعرفوش أن حيواناتهم في مرحلة من مراحل السمنة، فهنلاقي صورتين ملحقين في البوست فيهم مقياس لزيادة الوزن علي حسب الشكل الخارجي للجسم بيبدأ من ١ لنقص الوزن الشديد و بيوصل ل ٩ عند مرحلة السمنة المفرطة و المقياس المعتدل للوزن الصحي هو عند مقياس ٥

نقدر نمنع حدوث السمنة عند حيواناتنا الأليفة عن طريق:
١. تقديم أكل صحي متوازن مناسب للنوع و السن. 🍲
٢. عدم تقديم بواقي الاكل المنزلي. 🌭🍟🚫
٣. الحد من تقديم المكافأت ل ١٠% فقط من اجمالي كمية الاكل المقدمة علي مدار اليوم 👏
٤. زيادة الحركة عن طريق التمشية او تقديم العاب داخل المنزل تستهلك جزء كبير من الطاقة الحركية.🥎🦮🐕‍🦺

هيكون في منشورات قادمة عن التغذية الصحية للحيوانات المنزلية و طرق الحفاظ علي الوزن المناسب.

القطط بتقدر تميز لما بننادي علي اسمهم لكن هما اللي بيقرروا يتجاهلونا 😼

بيرجع الباحثين السبب في سلوك القطط الغريب ده أن بداية وقت إستئناس القطط ماكنش مطلوب منهم انهم يقوموا باي مهمات أو يستجيبوا لأي أوامر صوتية من الإنسان علي عكس الكلاب اللي كانت بتستخدم لرعي الغنم و الحراسة و الصيد.

سبب تاني أن القطط لما مابتستجيبش لاسماءهم معانا في الغالب مابيبقاش في أي مشكلة بالنسبالهم مرتبة علي ده علي العكس ممكن إحنا اللي نروحلهم فبيريحوا دماغهم 😹

عمليات قص الأذن و الذيل في الكلاب عمليات مؤذية جسدياً و نفسياً للكلاب و لايوجد لها أي فائدة أو سبب طبي غير تعديل في الشكل الخارجي.

يرجع تاريخ عادة قص الاذنين و الذيل عندما كانت تستخدم بعض الكلاب للصيد و مطاردة الفرائس في الغابات و خوفاً من إيذاء الاذنين و الذيل في الأشجار أو من مقاومة الفرائس قام الصيادون بقصهم و توارثت العادة حتي يومنا هذا

الكلاب اللي بتتقص ذيولها و ودانها بتفضل في الم نفسي و جسدي و معظمهم بيحصل لهم الألم الوهمي Phantom pain في المكان الافتراضي لوجود الذيل أو الاذنين 🐕😰

نتمني إنتهاء العادة المؤذية دي من مجتمعنا زي ما بقت مجرمة في معظم الدول و المجتمعات 🙏

توضيح: الحديث في البوست عن عمليات القص التجميلي و لكن لو هناك سبب طبي يستدعي قص الاذن المصابة او الذيل لا مانع من إجراء الجراحة و ده بيحصل في حالات الاصابات القطعية او الاورام و بعض حالات العدوي البكتيرية المزمنة.

مخاطر ممكن يتعرض لها حيوانك الاليف سواء قطط أو كلاب داخل المنزل و معرفتها بتسهل كتير تجنب المشاكل اللي بتنتج عنها و بتكون في ساعات كتير مميتة للأسف ⚠️☣️☠️🐈🐕❤

كلنا شوفنا جمعيات و ملاجيء للحيوانات بتشتكي من قلة الاكل و عدم قدرتهم علي الوفاء بالالتزامات المادية و خاصة في الفترة الاخيرة بسبب الازمة الاقتصادية و إرتفاع أسعار الاكل و الادوية و عدم توافرهم بسهولة.

رجاء ماتنسوهمش من مساعدتكم و صدقاتكم و ساعدوا الجمعيات و الملاجيء اللي تعرفوها سواء مادياً أو بمواد عينية زي الأكل و البطاطين و الأدوية . الحيوانات هناك غلابة جدآ و ماصدقوا لقوا حد رحيم يخفف عنهم الالامهم و يوفرلهم ملجاء أمن.
مش حابين نلاقي مكان بيقفل أو الحيوانات اللي فيه بترجع الشارع تاني علشان مش قادرين يوفوا بالتزاماتهم.

انا مش هحدد شلتر او جمعية بعينها لان كلهم محتاجين المساعدة.

جمعيات و دور الايتام للبشر برضه محتاجين المساعدة جدآ لكن انا بنوه عن اللي يتبع مجال عملي و زي ماقولنا قبل كدة الرحمة مبداء لايتجزاء فلو تقدر ساعد هنا و هنا

صباحكم خير و رحمة🙏❤️


#الرحمة

أثبتت الابحاث أن مربي الحيوانات الأليفة من القطط و الكلاب يتمتعون بصحة افضل و لديهم فرص أقل في الإصابة بأمراض القلب و الأوعية الدموية و ده بسبب إفراز هرمونات زي الاوكسيتوسين و السيروتونين و الدوبامين و اللي بيساعد علي إفرازها الاحساس بالراحة و السعادة الناتج عن التعامل مع الكلاب و القطط. كمان في دراسة أثبتت أن مربي الحيوانات الأليفة لديهم الفرصة علي الشفاء بشكل أسرع بعد المشاكل الصحية و الجراحات .

صباحكم سيروتونين و دوبامين 🐈🐕❤️

ناس كتير شايفة ان الانسان أولي من الحيوان بالرعاية و الرفق و الصدقات، لكن الحقيقة ان الرحمة و الرفق و لين القلب مابتفرقش بين انسان و حيوان ونبات و هنلاقي ان اكتر ناس رحيمة بالحيوان هي الناس اللي عايشة في معاناة و ظروف صعبة.

يومكم جميل و جمعة مليانة بركة و خير و رحمة 🙏❤

مشكلة تبرز القطط خارج طبق الرمل من المشاكل اللي بتتكرر بصورة كبيرة و ليها عوامل و أسباب متعددة ولازم نحاول نتعرف علي السبب الرئيسي علشان نعرف نتفاداه و نحل المشكلة.

* الأسباب بشكل مبسط بتتلخص في :

١. مشكلة صحية في الجهاز الهضمي ( اسهال / إمساك ) أو مشكلة في الجهاز الحركي أو العصبي بتسبب صعوبة للقطط إنها تدخل طبق الرملة أو تقوم بحركات الحفر و الردم ، و دي الطبيب البيطري هيساعد في تشخيصها و علاجها.

٢. مشكلة ارتباط شرطي بسبب ألم حصل قبل كدة أو لسة بيحصل بسبب مشكلة صحية او خوف من صوت او حركة بتتم في نفس منطقة وجود الطبق و القطط بتربط دخولها لطبق الرملة بالإحساس ده فبتفضل إنها تعمل في مكان تاني. تغيير طبق الرمل و مكانه و نوع الرمل ممكن يساعد في حل المشكلة .

٣. خوف القطط من قط تاني بيحرس مكان الحمام و بيضربهم كل مرة يحاولوا يستخدموا الرمل. وده بيحصل كتير في البيت اللي فيه قطط كتير و بشكل عام يفضل أن يكون في اكتر من طبق رمل في أماكن مختلفة من البيت.

٤. طبق الرمل صغير و القطط مش بتاخد راحتها. تغيير الطبق لطبق أكبر

٥. نوع الرمل المستخدم ممكن يكون بيدايق القطط سواء بسبب أن ريحته نفاذة أو فيه تراب صغير بيسبب مشكلة في الانف عند شم الرمل او نوع الرمل بيلزق في شعر الارجل او تحت الديل. نجرب أنواع رملة مختلفة لحد ما نلاقي نوع الكل يتوافق عليه.

٦. الرمل مش نظيف. تنظيف الرمل باستمرار مهم جدا معظم القطط ممكن موضوع عدم نظافة الرمل يسبب لهم توتر و يبدأوا يدوروا علي مكان تاني. الحل التنظيف باستمرار و يفضل استخدام نوع رمل بيتكتل وده بيسهل عملية التنظيف و بيسيب باقي الرمل بدون مخلفات.

٧. مكان طبق الرمل يفضل يكون في مكان سهل الوصول إليه و بعيد عن مكان الاكل و المياه و بعيد عن الأبواب او اي أصوات عالية او حركة مزعجة او فجائية.

القطط حيوانات نظيفة و بتحاول باستمرار المحافظة علي مستوي نظافتها الشخصية و محتاجة مساعدتنا في حل اي مشكلة ممكن تكون السبب في تغيير سلوكها ده. 🐈❤️🙏

تسريب القطط و رميها في الشارع في مكان مش هتعرف تتاقلم فيه ظلم و قلة مسئولية و عمره ماكان حل للمشكلة.

مين افضل شخصية كلب بالنسبة لكم ظهرت في فيلم او مسلسل او كارتون ؟ 🐕💫🎬📺

انا مسلسل لاسي أثر فية بشكل كبير وانا طفل ❤️

#كلب

روزي Rosie (" رزة " سابقا قبل ما تيجي المعادي )

بركة البيت و اكبر فرد في اسرتنا سنا ، جاتلي العيادة سنة ٢٠٠٩ و كان عندها سنة تقريبا، حد لاقاها في الشارع و سابها عندي فترة و وبعدها قررت اتبناها.
شخصيتها مميزة جدا تحس من صغرها انها متقمصة شخص عنده ٨٠ سنة ،في حالها دايما و بتلاقيها دايما قاعدة بتراقب باقي القطيع ولو حد فكر يقل ادبه او يعكر جو السلم العام سواء بني ادم او كلب او قطة روزي تتدخل بدون رحمة 😾

من صفاتها المميزة انها ممكن تلاقيها قاعدة وباصالك عين في عين بطريقة تخليك تحس انك متراقب من كائن غير معلوم الهوية في كون موازي و النظرة في حد ذاتها كافية تسببلك قشعريرة بطول عمودك الفقري ، علي النقيض حبوبة قوي و و عشرية و كلنا بنحبها
احساس صعب قوي علينا لما لاقيناها فجاءة كبرت وعجزت و بنحاول جاهدين نديها اهتمام اكتر و مراعاة لحالتها النفسية و الصحية في السن ده 🐈❤️

القطط نادرا انها تنونو لقطط تانية و علي العكس بتحب دايمآ انها تنونو للانسان، الابحاث لقت ان القطط بتعمل كدة علشان يشاركوا معانا احساسهم و مشاعرهم أو ينبهونا إنهم محتاجين حاجة معينة أو بس يرحبوا بينا و يرموا السلام 😻

الباحثين بيرجعوا السلوك ده لوقت ماكانوا بينونوا لامهم وهما صغيريين علشان نفس الاسباب 🫠❤

20 الف متابع للصفحة. متشكر لدعمكم و متابعتكم للصفحة من كل بلاد الوطن العربي . نتمني نقدم لكم محتوي هادف و له قيمة لزيادة الوعي برعاية الحيوانات 🙏🤗🎉

شاركونا اقتراحتكم عن المواضيع اللي حابين نتكلم فيها الفترة الجاية ✍️