El Analista

شباب البيدج القديمه اتسرقت ياريت تخشوا تعملوا فولوا على البيدج الجديده ♥️
Facebook.com/mohamedmamdoh.1994

El Analista متخصصين في تحليل اهم الماتشات المصريه والعالميه وتكتي?

El Analista updated their website address.

يا جماعه الصفحه اتسرقت - الادمن بتاعها و صاحبها اتشال منها والايديتور بس هو اللي موجود - هل في حد يقدر يساعدنا نرجعها؟

لا تأمن غدر مدريد الا مع صافره الحكم

فوز ملحمي لريال مدريد بعد 120 دقيقه صعبه جدا امام تشيلسي في دوري الابطال يؤكدلك العقيده والإصرار اللي بيتمتع بيها ريال مدريد ورغبتهم في القتال علي جميع البطولات المتاحه حتي اخر نفس ممكن

ريمونتادا جديده بيقوم بيها الريال بعد ريمونتادا باريس والعوده امام تشيلسي بطوله المهدور حقه إعلاميا رودريجو و فينيسوس جونيور و ناتشو وكاربخال واستعاده شيء من مستواه المعهود
وإخراج كارلو انشيلوتي

انشيلوتي اللي استطاع قراءه المباراه وتغيير طريقه تفكيره بأخراجه كامافينجا ودخول رودريجو واعاده فالفيردي لوسط الملعب ومن بعده اخراج مودريتش وفازكيز واشراك ناتشو واسينسيو.

فوز يقرب ريال مدريد كثيرا من اللقب وابتعاده عن اقرب منافسيه برشلونه ب 15 نقطه ولو فاز برشلونه بمؤجلاته يصبح الفارق 9 نقاط و ب 6 مباريات متبقيه يكفي ريال مدريد الفوز ب 3 مباريات فقط ليضمن رسميا لقب الليجا

Mohamed Mamdoh

الأهلي امبارح قدم اداء كويس ولكن نتيجه المباراه لم تعكس ما حدث علي ارض الملعب ولكنه شيء وارد الحدوث في كره القدم - هنا بيجي دورنا اننا نحلل وننتقد ولكن نقد بنّاء علشان الفريق مستواه يتحسن لأن اصلا الفريق قدم اداء جيد ولكن بعض الحاجات هي اللي ادت ان النتيجه متبقاش اكبر من كده.

-لازم نفهم ان دور المدير الفني هو خلق المنظومه اللي تخليك توصل لمرمي الخصم وفنفس الوقت تأمنك دفاعيا وفعلا ده اللي حصل ولكن المدير الفني مش هينزل يحط الكره في الجول والكلام ده معناه ان موسيماني عمل الواجب بتاعه وذاكر الرجاء وحط طريقه اللعب المناسبه.

-مسلسل اهدار الفرص يتحمل مسؤليته محمد شريف وبيرسي تاو, انا شخصيا كنت فالمدرجات والثنائي تحركاته رهيبه ومزعجه لاي خصم وخصوصا بيرسي تاو ولكن الفاعليه الهجوميه مطلوبه ولازم يحصل تطور في اتخاذ القرارات امام مرمي المنافس ويبقي في هدوء اكتر من كده.

-عتابي لموسيماني هو من بعد الطرد والمباراه ماشيه فاتجاه واحد والأهلي مستحوذ وزانق الرجاء فنص ملعبه فالوقت ده الرجاء تكتل جوا منطقه جزاءه وكلنا شوفنا علي سبيل المثال مباراه السيتي اتليتيكو مدريد ازاي ان بيب جوارديولا نفسه برغم المحاولات انه فشل في فك التكتل الدفاعي وده دليل علي ان اصعب حاجه تقدر تتغلب عليها هو التكتل الدفاعي ولكن... القرارات اللي انت بتاخدها كمدرب بيتم تقييمها ت, تنشيط الجبهتين والاعتماد علي العرضيات وإخراج محمد شريف وعدم الدفع بحسام حسن المميز فالرأسيات اومال مين اللي هيجيب العرضيات اهداف؟ بيرسي تاو ولا وليد سليمان؟

-المهاجم عند موسيماني ليه بروفايل معين لازم يبقي متحرك ومزعج وسريع وبيلعب كوره عالارض وهي مش مميزات حسام حسن الاقوي ولكن امتلاك اكتر من مهاجم باكتر من أسلوب هي ميزه وعمق فقايمه الفريق ولازم تبقي قادر تستفيد من الميزه دي خصوصا ان من بعد الطرد بروفايل بيرسي وشريف مبقاش مناسب لطريقه الرجاء لان أصلا مفيش مساحه يتحركو فيها وانت أصلا بقيت عمال تحط عرضيات.

- واخيرا ليه السوليه يشوط ضربه الجزاء التانيه ؟ وليه فنفس المكان بالظبط ؟ ليه محدش من بره قال ان حد تاني اللي يشوط وليه السوليه مشاطش فزاويه تانيه او فوق شويه او حتي فنص الجون!

النتيجه مش كارثيه ولكن برده مش حطاك فاحسن موقف لان هتلاعب الرجاء فاجواء اكيد هتبقي صعبه وفاستاد ممتليء عن اخره ولكن يمكن النتيجه دي هي اللي تخلي اللاعيبه تاخد العوده بجديه اكبر ونشوف ملحمه اهلاويه جديده.

أستمتعنا كلنا بمباراه القمه بين مانشستر سيتي وليفربول بس اكيد هيجي فبالك سؤال هو ليه احنا حسينا مانشستر سيتي مسيطر اكتر واخطر ومع ذلك المباراه انتهت بالتعادل؟

الأجابه يا صديقي هي الكلمه السحريه في كره القدم ( الفــاعليـه ) وهي قدره الفريق علي تحويل اكبر عدد متاح من الفرص الي اهداف
وهي دي النقطه الأضعف فمنظومه جوارديولا الهجوميه والاقوي فمنظومه كلوب وحتي الأرقام بتثبت الكلام ده

النهادره علي سبيل المثال لا الحصر 11 محاوله و تسديده مباشره علي المرمي من فريق السيتي اسفرت عن احراز هدفين بنسبه فاعليه 18% فقط لاغير.
اما ليفربول ليه 6 محاولات علي المرمي فقط احرز منهم برده هدفين بنسبه فاعليه 33% وهي نسبه اكثر من جيده.

ده برده يفسرلك عدم ثبات تشكيل الثلاثي الهجومي لبيب جوارديولا من بعد اجويرو مفيش لاعب بيحول معظم الفرص لاهداف كل اللاعيبه باستثناء دي بروين بتلجأ ساعات كتير للاستعراض او انها تجيب اهداف جميله اكتر من اهتمامها بمجرد احراز الكره في المرمي لدرجه دفعت جوارديولا فمره يقول علي سترلنج لما اتسأل بعد مباراه سترلنج جاب فيها هدفين عن اداءه: " سترلنج افضل عندما لا يفكر امام المرمي بل فقط يضع الكره في الشباك فعندما يفكر تسوء الأمور"

فكرت اعملكو ملخص الفرص اللي ضيعها السيتي امام المرمي النهارده وسذاجه اتخاذ القرارات من خيسوس وسترلنج ورياض اللي ضيعت اكتر من 3 اهداف محققه وتفضيلهم الحل الفردي الا اني لقيت ان الأفضل هو المقارنه
نفس الكوره اللي ضيعها سترلنج في بدايه المباراه هي هي نفس الكوره اللي حطها مانيه فالهدف التاني

موسيماني ومحدوديه الاختيارات وصعوبه ايجاد البديل

الحقيقه ان في ناس ممكن تختلف مع الكلام ده ولكن من وجهه نظري ان الأهلي بيعاني من محدوديه الاختيارات او بمعني تاني يفتقد للعمق في قايمه الفريق لأسباب كتير منها موسيماني ومنها من التعاقدات اللي حصلت ساعه رحيل رمضان صبحي واحمد فتحي لمجرد التعويض واسكات الجماهير ولكن لم ترتقي تلك الأسماء للمستوي المطلوب

بيعتمد موسيماني بشكل كبير علي الأطراف وعلي قفشه في عمق الملعب وعمليه الصناعه ولكن ماذا لو قفشه مش فيومه ؟
الحقيقه ان ممكن نقول ان مصر كلها مفيهاش لاعيب 10 يرتقي للمستوي وان قفشه افضل المتاحين ولكن للأسف جاي بعد عبداالله السعيد ومن قبله تريكه لاعيبه مستواها واستمراريتها فتقديم الأداء العالي لمباريات متتاليه كانت كبيره لذلك اقل هفوه او فتره صعبه يعدي بيها قفشه لا ترحمه بعدها سهام النقد ولكن من البديل؟
مصر كلها يمكن مفيهاش 10 علي المستوي المطلوب وده كان سبب رغبه الأهلي فالتعاقد مع محمد إبراهيم لفتره اثناء تألقه ولكن طبعا الصفقه ملاقتش استحسان جماهيري وكمان عدم مقدره محمد إبراهيم علي تقديم فرق عن الموجودين

وينطبق نفس الكلام علي الظهيرين – من بديل معلول ومن بديل اكرم توفيق ؟ برده مفيش اجابه واضحه الفرق كبير فالمستوي بين الأساسي والبديل
مين الوينج اليمين الأساسي للنادي الأهلي؟ الشحات ولا ميكيسوني ولا طاهر ولا تاو؟ محدش فيهم عنده الاستمراريه اللي كانت عند بركات او وليد سليمان او أي لاعيب كبير لعب فالمركز ده فالاهلي فدايما معرضين للنقد
ولو اتفقنا ان عبد القادر هو الأساسي علي الوينج الشمال مين بديله؟
وأخيرا حسام حسن باين جدا انه مش مركز بشكل كبير وعلي خلاف مع موسيماني حتي لما نزل فمباراه المصري ان حسيت انه بيتمشي وبياخد قرارات تمرير غريبه وبينزل فاماكن غريبه رغم انه المفروض نازل علشان العرضيات.

عمليه التدوير لما بيحاول النادي الأهلي يعملها دايما بتحس بفرق فالاداء وده نتيجه اختلاف المستوي بين الأساسي والاحتياطي وكذلك التغييرات مش دايما بتعملك الفرق الا اذا كنت مقعد لاعيبه اساسيه بره.

Mohamed Mamdoh

تعالو كده نبص علي الهدف اللي دخل فالأهلي واللي اتسبب فخساره المباراه

طبعا الكل اجمع ان أفشه هو السبب الرئيسي فالهدف وهي حقيقه ولكن هل هو المتسبب الوحيد ؟

#أولا بص علي هجوم المصري كام لاعب بيهاجم الأهلي من بدايه اللقاء وهي جرئه مش متعود عليها النادي الأهلي فمباريات الدوري – المصري مهاجم ب 5 لاعيبه جوا ال 18 واللي بيلعب عالوينج واللي رفع – 7 لاعبين علي حدود منطقه جزاء الأهلي 5 منهم جوا ال 18 ومحطوطين كلهم فموقف 1 علي 1 يعني أي كوره جوا ال 18 نسبتها 50-50 بين المدافع والمهاجم

#ُثانيا تمركز اليو ديانج انا فاهم دور اليو ديانج فالكوره فالدفاع عن منطقه ال 18 ومحاوله مليء زون 14 ولكن .... مفيش ولا لاعب من المصري واقف قريب من زون 14 بل علي العكس المصري عامل زياده علي الوينج اليمين ب 2 لاعيبه وكانو 3 فاول الهجمه يبقي كان الطبيعي اليو ييجي مع الراجل اللي هيرفع وشريف هو اللي يقرب شويه من ال 18 للحفاظ علي زون 14 ومحاوله الفوز بالكوره التانيه ان وجدت.

#ثالثا عشوائيه التمركزمن مدافعي الأهلي – هتلاقيني معلملك علي تمركز السوليه حاطط المهاجم فالاوفسايد وباقي الدفاع مغطي الاوفسايد فده كان حل كمان لحامل الكوره من المصري

#رابعا تمركز أفشه كمان غريب هتلاقي ان افشه طالع لبره اكتر من المهاجم سايبله مساحه يجري فيها مع ان الطبيعي ان أفشه ياخد الراجل فصدره زي وضع مدافع الأهلي اللي ورا افشه مع مهاجم المصري بحيث ميبقاش في مساحه خصوصا انك واقف تدافع علي كوره عرضيه.

#خامسا بقي طريقه اللعب كلها - ليه تاو هو المهاجم و ليه قفشه عاليمين و ليه بيرسي تاو قدام وشريف اللي وراه وبيرجع مش العكس ولكن برده قد يكون ده محاوله لتضليل نادي الرجاء وجهازه الفني ولكن الكلام ده عفا عليه الزمان المباريات كلها مسجله ومذاعه والاجهزه الفنيه ومحللي اداءها بيحللو اكتر من مباراه للمنافس فطبيعي ان الرجاء هيحلل كل الماتشات المهمه والقويه اللي لعبها الاهلي الموسم ده - ولكن أعتقد ان ده كان تفكير موسيماني وان ماتش الرجاء قصه مختلفه

فيل فودين ينقذ جوارديولا ويصنع هدف فوز السيتي علي اتليتيكو مدريد الذي ذهب للأتحاد لأجل الدفاع فقط.

الحقيقه ان المباراه كانت صعبه جدا علي السيتي اتليتيكو مدريد لعب بدفاع متكتل منخفض بيقفل بيه المساحات و يغلق كل زوايا التمرير في قلب الملعب ويوجه اللعب علي الاطراف تماما ويقتل اي فرصه خطوره للسيتي لدرجه ان السيتي وصل استحواذه ل 71% ولكن سدد كورتين فقط علي المرمي منهم كره الهدف والاخري كانت تسديده من كره ثابته.

افتقاد السيتي للحلول الفرديه كان واضح اللاعيبه كانت بتطبق نظام اللعب والاستحواذ لكن دون ابتكار او محاوله لصنع الفارق بمهاره فرديه او اختراق عمودي الي ان جاءت الدقيقه 68 ودخل فيل فودين ارض الملعب فمن هنا تبدأ قصه اخري.

استطاع فيل فودين بمهارته الفرديه ان يخترق عموديا ويتمركز بين الخطوط ويستدرج لاعبي اتليتيكو مدريد خارج تمركزاتهم الصحيحه وبالتالي وجد ديبروين المساحه للتحرك في العمق واكمل فودين معزوفته ووضع اسيست ولا اروع لديبروين وهديه لا يمكن رفضها وبالتالي سجل السيتي بعد دقيقه واحده من دخول فودين, وصنع بعدها الخطوره في اكثر من كره ولكن لم يستطيع الفريق ترجمه الفرص اللاحقه الي اهداف.

فيل فودين جوهره ويمكنه ان يصنع الفارق في منظومه جوارديولا الذي يحتاج الي لاعبين بامكانهم الارتجال بعض الشيء وصنع اللا متوقع.

نظره علي قرعه كأس العالم🏆

#المجموعه الأولي: صداره شبه مضمونه لهولندا وبصراحه مستوي السنغال اللي ظهرت بيه فامم افريقيا وامام مصر فالتصفيات لا يشفع ليها انها تروح بعيد فكاس العالم الاكوادور مش المنافس الاقوي ولكن يقدر يعمل مفاجأه وقطر تسعي لتحقيق مفاجأه مدعومه بسلاح الأرض والجمهور
صداره محسومه وصراع ثلاثي متقارب علي بطاقه التأهل الثانيه وكل الاحتمالات مفتوحه

#المجموعه الثانيه : في مجموعه الحرب النوويه و صراع الامريكان والبريتيش اكسنت إنجلترا الأقرب للصداره بدون منازع بجيل مميز من الشباب والخبرات قدروا يوصلوا نهائي كأس أوروبا وقادرين علي الذهاب بعيدا فكأس العالم
المقعد التاني اعتقد هو اقرب للمتأهل من الثلاثي ( ويلز و سكوتلندا وأوكرانيا ) ال 3 منتخبات عندهم لاعيبين مميزين اشهرهم جاريث بيل ف ويلز و روبرتسون فسكوتلندا و زينتشينكو فاوكرانيا
أمريكا ملهاش تجارب مميزه فكاس العالم وصعدت بصعوبه فقاره المنافسه فيها سهله نسبيا وايران وان كانت منافس عنيد واحد اول الواصلين لكأس العالم الا ان حظوظهم مش الأقوي

#المجموعه الثالثه: ميسي اكيد هيحاول ياخد الارجنتين لابعد نقطه ممكنه - الفريق اداؤه متميز منذ الكوبا أمريكا وفريق جيد علي المستوي الفني والتكتيكي مش مجرد بيعتمد علي ميسي ومن هنا شايفه الأقرب للصداره
المكسيك فريق صاحب صولات وجولات وبولندا عنيده بقياده ليفاندوفسكي والسعوديه هي الحلقه الأضعف ولكن بجيل مميز من الشباب والمحترفين وبيحاولوا يعملوا مشروع ودي تاني سنه علي التوالي يوصلوا كاس العالم
من اصعب المجموعات فالتوقع وكل الاحتمالات مفتوحه علي المركز التاني

#المجموعه الرابعه: تونس في موقف لا تحسد عليه علي اللاعبين بذل الغالي والنفيس في مواجهه بطل العالم و فريق وصل نصف نهائي كاس أوروبا وغالبا بيرو فريق متميز بالسرعات
اتمني حدوث مفاجأه من تونس خصوصا ان حتي تأهل تونس لكاس العالم كان بأداء دفاعي دون التسديد علي مرمي الخصم في مبارتين
ولكن منطقيا فرنسا والدنمارك للدور الثاني مع التمنيات لتونس بتقديم أداء يشرف العرب وافريقيا

#المجموعه الخامسه: ناس كتير سمتها مجموعه الرعب والموت وحاجات كده وانا مش عارف ليه الحقيقه – المعركه هنا عالصداره وفقط اليابان تأهلت كاس العالم بصعوبه و وكوستاريكا ونيوزلندا بعيد جدا عن مستوي المانيا واسبانيا.
الاسبان ليهم تار عند مدرب المانيا هانز فليك اللي كان مدرب بايرن ميونيخ قدام برشلونه فمباراه ال 8-2 ومعظم قوام اسبانيا الأساسي من فريق برشلونه فهل يثأر أبناء اللاروخا؟

#المجموعه السادسه: المجموعه الاقوي والأكثر تقاربا من وجهه نظري بلجيكا مبتقدمش أداء مبهر بالرغم من قوه الأسماء الهجوميه ولكن دفاعيا عندها مشاكل كتير ودفاع بلجيكا هو السبب الرئيسي والعائق الأول امام تحقيق أي انجاز لجيل مميز بقياده مايسترو السيتي كيفن دي بروين وحامي عرين الريال كورتوا
كرواتيا وصيف بطل العالم بقياده امير البلقان لوكا مودريتش وفريق قوي علي المستوي الجماعي دايما قادرعلي المنافسه واحراج أي فريق
المغرب بقياده اشرف حكيمي وللأسف كلنا عارفين الخلافات اللي بين المدرب خليلوزيتش وبين نبيل مازراوي نجم الاياكس و حكيم زياش نجم تشيلسي ولكن يظل منتخب المغرب عنيد وقوي جدا فرديا وجماعيا ومعظم لاعبيه بينافسوا في المستوي العالي في أوروبا بالتالي حتي في وجود رهبه كأس العالم الا ان اللاعيبه متعوده علي الأجواء دي وهو المنتخب العربي الأقرب لتحقيق نتيجه مشرفه في المونديال
كندا: كتير ميعرفوش منتخب كندا لكنه منتخب قوي يتميز بالسرعه والقوه البدنيه اشهر لاعيب فيه هو الفونسو ديفيز نجم البارين وجونثان ديفيد مهاجم وهداف ليل والاتنين من اسرع اللاعيبه فالعالم – منتخب كندا كمان اتأهل كأول فتصفيات كاس العالم عن قاره أمريكا الشماليه وجه بعده المكسيك وامريكا.
الأقرب للتأهل حسابيا بلجيكا وكرواتيا ولكنها من رأيي اكتر مجموعه مفتوحه الاحتمالات

#المجموعه السابعه: نزهه للبرازيل ومنافسه علي بطاقه التأهل الثانيه بين صربيا والكاميرون وسويسرا – وسويسرا الأقرب لحسم بطاقه المركز التاني بسهوله.

#المجموعه الثامنه: كأفراد وكمجموعه منتخب البرتغال قادر علي التأهل كأول بسهوله بقياده رونالدو اللي غالبا ده اخر كاس عالم ليه واكيد نفسه يبقي الوداع علي نفس مستوي الرحله الكرويه اللي قدمها
الاوروغواي هي اللي خرجت البرتغال فكاس العالم اللي فات وده دافع وحافز اكبر للبرتغال للتفوق والثأر
كوريا بقياده سون هتحاول تعمل مفاجأه وهتكون مزعجه للاوروغواي
غانا هي الحلقه الأضعف وبتقدم مستويات غير مقنعه بالمره وكان اخرها لما خرجت من الدور الأول فامم افريقيا.

انت ايه رأيك فالمجموعات ومين تتوقع يصعد ؟

Mohamed Mamdoh

مش كان زماننا بنحسبها وبنقول كده كده هنكسب الاكوادور ونتعادل مع قطر ونخسر من هولندا !

هل اتوتر محمد صلاح قبل ضربه الجزاء ؟

طيب هل اتوتر فضربه جزاء الصعود اللي فات؟
طيب هل اتوتر فضربه جزاء نهائي دوري الابطال؟
طب هل اتوتر فضربه جزاء كاس العالم ؟ او اي حاجه غيرهم

الحقيقه ان صلاح ضيع ضربه الجزاء ولكنها غلطه مينفعش تدبحه عليها.

هل صلاح مش بيلعب مع المنتخب زي ليفربول ؟
هجاوبك من حيث المصلحه الشخصيه لصلاح - صلاح نفسه يبقي افضل لاعب في العالم وجزء اصيل فالوصول لكده هو تحقيقه لانجاز مع المنتخب سواء الوصول لكاس العالم او تحقيق بطوله افريقيا.

انا مش بتكلم بقي علي وطنيه و كرامه وتحيا مصر - انا بكلمك حتي من وجهه النظر الشخصيه ومبدأ يللا نفسي اللي الناس بتتهمه بيه بالباطل والراجل غير كل ده بيموت نفسه فالملعب بس مينفعش تحاسبه علي فشل منظومه كرويه كامله لوحده.

من باب اولي كنتو شجعو فالملعب زي السنغاليين ما عملو النهارده بدل ما نجيب شيبسي وبيبسي ونغني فالمدرجات ومحدش يشجع فمعظم اوقات الماتش وبعدين لوموا محمد صلاح.

كنت عايز اتكلم عن الماتش وعن المنظومه وعن كيروش وعن غيره حاجات كتير ولكن...

حمله هجوم غريبه وعجيبه علي اللاعب الافضل في العالم واتهامه بالتقصير ومقارنه وتمجيد فساديو مانيه !!!

للأسف هجوم لمجرد الهجوم والشوو واللقطه وان سهل اننا نعلق الفشل علي شماعه محمد صلاح واتهامه بالتقصير طيب هل المنظومه الهجوميه للمنتخب تشبه المنظومه الهجوميه للسنغال ده لو اعتبرت اننا بنهاجم اصلا قارن كده بين المواقف اللي صلاح بيستلم فيها الكوره واغلبها ضهره للجول او داخا التحامات ومعهوش اي مسانده وشوف مانيه وهو معاه الكوره ومعاه كام واحد من فريقه بيهاجم وبيبقي محتار من كتر الخيارات المتاحه - انت عارف ان السنغال المنتخب الافضل والاكثر استقرارا في القاره منذ 2018 تقريبا ووصل نهائيين افريقيا ورا بعض وتوج بلقب الاخيره علي حسابنا وانت متعرفش يعني ايه منظومه كرويه من بعد 2011.

هل تعرف اننا مبنلعبش كوره هجوميه من 2017 وكل انجازاتك اللي حققتها كان بطلها الاول والاخير محمد صلاح لوحده من بعد برادلي لشوقي غريب لكوبر لحسام البدري لكيروش وانت مكتفي باستقبال اللعب وياريتك بتعرف تلعب عالتحولات الهجوميه.

طيب لما صلاح ومانيه بيلعبو فنفس المنظومه ايه اللي بيحصل - صلاح يكتسح ل 5 مواسم علي التوالي مع ليفربول وضمن افضل لاعبي العالم ومانيه مبيتحطش اصلا فالمقارنه دي بين الافضل في العالم. طيب انت عارف انك حتي لو قارنت ارقامهم دون الاخذفي الاعتبار ان مانيه لاعب موسم زياده عن صلاح مع الليفر برده صلاح يتفوق

تخيل ان حتي مع العقم الهجومي بتاعنا ارقام صلاح مع منتخب مصر تكتسح ارقام مانيه مع السنغال المرعب هجوميا.

مانيه ف 88 مباراه دوليه احرز 28 هدف وصنع 20 يعني ساهم ف 48 هدف
صلاح بقي لعب 82 سجل 45 وصنع 25 يعني 70 مساهمه ف 82 مباراه مع فريق بمنظومه دفاعيه!

ميسي ضيع ضربات جزاء مهمه مع الانديه والمنتخب وكل لاعبي العالم - صلاح سجلك ضربات جزاء مهمه وحسمتلك ماتشات ومجابش واحده بس في غيره ضيع - ليه كل اللوم علي صلاح ؟ انا شايف ان ده شيء من العبث بصراحه

وهسيبلك فالصور ارقام صلاح مع ليفربول هو ومانيه وارقامهم مع المنتخبات واحكم بنفسك!

اختيار التشكيل هو حق اصيل للمدير الفني وفقط وبعد المباريات يأتي الحساب

الحقيقه ان في الماتشات المهمه بتنتشر اراء كتير حول التشكيل الامثل علي سبيل المثال وقبل ماتش بكره المصيري هتلاقي استوديوهات تحليليه فيها ناس كتير بتحاول تدلو بدلوها وكل ضيف ومحلل وصحفي وناقد بيقول وجهه نظره فالتشكيل وكذلك بعض صفحات الفيسبوك المتخصصه وبعض محللين الاداء.

فالحقيقه كل ده لا يخرج عن نطاق العبث والفتي قد يكون مثلا في لاعب مختلفين عليه مثلا مين باك شمال مين حارس مرمي مين مهاجم وليه وده مقبول
انما تحديد عناصر فريق كامل! هل انت عارف ايه افكار المدير الفني اللي عايز يطبقها فالمباراه واللي بتختلف من مباراه لأخري؟ هل تعرف ايه العيوب اللي المدير الفني شافها في مباراه الذهاب وعايز يصلحها فمباراه العوده ؟
طب هل تعرف المدير الفني عايز يهاجم ويضغط عالي ولا يدافع؟ هيلعب ببلوك متوسط ولا منخفض ولا مرتفع ؟ وايه هي العناصر الامثل لكل طريقه ؟

انت عارف ان دور محلل الاداء بيقتصر علي تحليل ما يراه في المباريات وابراز عيوب و مميزات كل فريق بناءا علي رؤي لمباريات سابقه واحيانا
بيتوقع التشكيل اللي الخصم هيلعب بيه نتيجة احصائيات و اسس علميه مش رؤيته الشخصيه.

اسمع للي يوريك كره القدم بشكلها السليم ممكن نتناقش مين يبتدي مكان الونش فقلب الدفاع وليه وده مقبول واي حاجه شبه كده انما اللي عايز يحط طريقه لعب وتشكيل ومنظومه ده بيقول اي كلام ومش شرط ان الكلام علشان شكله حلو يبقي سليم خصوصا ان اي طريقه لعب ليها مميزات وليها عيوب والشكل بيتغير فالملعب حسب بندافع او بنهاجم وازاي نلعب علي نقاط قوتنا و نغطي نقاط ضعفنا.

والاهم اننا نبقي واثقين فاللاعبين والجهاز وان الاختيارات بتتم علي اسس ورؤيه فنيه ونبقي ورا اللاعيبه اللي فالملعب ونبقي واثقين ان اي 11 بالرجوله وبالروح يقدروا يحققولنا الحلم ويوصلونا كاس عالم

بعد تأكيد غياب عبد المنعم والونش وبعد تألق ياسر ابراهيم امام السنغال في مباراه الذهاب واستدعاء علي جبر ورامي ربيعه لتعويض الغائبين ووجود محمود علاء في القائمه.

من وجهه نظرك ما هي الثنائيه الافضل للبدء امام السنغال في مباراه العوده ولماذا ؟

مات في القريه ساحرا فاستراح الناس من أذاه , فخلف الساحر جنيا فاق في السحر اباه.

الكلام ده ينطبق علي غياب طارق حامد عن المنتخب وتعويضه بحمدي فتحي اللي محسسناش بغياب طارق علي الاطلاق وكمان بوجود منظومه بتخلي كل عناصرها الدفاعيه بتبان بشكل مميز تألق فيها وبرز حمدي فتحي

ودي نظره علي احصائيات حمدي فتحي امبارح:
- التمريرات القصيرة 26/29 بنسبة 90%
- التمريرات الطولية 3/4 بنسبة 75%
- استخلاص الكرة 17 مرة (الافضل في المباراة) ⭐
منها استعادة الكرة الثانية 9 مرات (الافضل) ⭐
- التدخلات الناجحة على الخصم 3 مرات (الافضل) ⭐
- قطع التمريرات والاستحواذ على الكرة 4 مرات (الافضل) ⭐
- فقد الكرة مرتين فقط

وده يبينلك اهميه حمدي بالنسبه للمنتخب وقوته الدفاعيه في ظل المنظومه الحاليه

مصطفي محمد وعمر مرموش والتكوين المحلي والمستورد.

فالحقيقه ان مصطفي محمد امبارح وبقالو فتره كبيره الحقيقه مبيقدمش افضل مستوياته اللي خلت الجمهور يطلق عليه لقب الاناكوندا مصطفي محمد اللي المفروض هو المهاجم الtarget او المحطه اللي بيعتمد عليه المنتخب دخل مع مدافعي السنغال ف 3 صراعات ارضيه ( كرات مشتركه ) وخسرهم كلهم و دخل ف 6 صراعات هوائيه خسر منهم 4 وده طبعا بيقتل طريقتك الهجوميه اللي بتعتمد اما علي الكرات الطويله او التحول السريع لانك ببساطه بتفقد الكوره بعد تاني او تالت تمريره اللي هي رايحه للمهاجم المحطه بتاعك اللي انت بتبقي عايز تطلع عليه.

كمان قرارات التمرير للخلف كانت غريبه جدا في كوره منهم كانت فنص ملعب السنغال قريبه من حدود ال 18 فالشوط التاني وبغرابه شديده بيرجع الكوره للشناوي وقصيره كمان وياسر ابراهيم اللي لحقها - اعاده بناء الهجمه او ال recycling هو جزء مهم في كوره القدم لاطاله الاحتفاظ بالكوره وعدم خساره الهجمه بس ده ليه حدود واوقات انما مصطفي تمريراته معظمها كان غريب و لمسته الاولي للكوره كانت بتخليه يفقدها بسهوله شديده ويدخل فصراعات ارضيه خسرها وساعات كان بيضطر يعمل فاول علشان يصلح الغلطه بتاعته

مع نزول مرموش اختلف الوضع للأحسن الدخول في 4 صراعات ارضيه كسب منهم 3 - قدام لاعيبه قويه جدا قدر يتفوق عليهم منهم الكوره اللي سبق فيها كوليبالي الاقوي دفاعيا فالسنغال وحطه فضهره وحجز عليه واخد الكوره الطويله منه ودي الحاجه اللي فشل فيها مصطفي طول احداث اللقاء- ودخل برده في صراع هوائي وتخيل تفوق فيه بالتالي ظهرنا هجوميا افضل شويه بعد نزول مرموش.

هنا بيبان فرق التقنيه وفروق التأسيس بين اللاعب المحلي واللاعب المحترف احتراف حقيقي - مع احترامي للدوري التركي ولكنه اكيد مش بقوه وسرعه وتطور الدوري الالماني.

نفس الفروق دي برده تقدر تقيس عليها الفروق بين لاعبين منتخب مصر المحليين و لاعبي المنتخبات الاخري المحترفين فاقوي الدوريات العالميه وساعتها هتقدر تقيم فعلا قوه المنظومه اللي خلقها كارلوس كيروش واللي بتحققلك التفوق علي منتخبات اقوي منك بكتير واعتقد ان مرموش هيبقي افضل اختيار لقلب هجوم مصر في الفتره اللي جايه ولازم نبتدي بيه فماتش العوده ينقصه فقط القليل من الجماعيه ويبقي الافضل بلا منازع.

منتخب مصر والواقعيه الكرويه بقياده كارلوس كيروش

لازم قبل ما ننتقد كارلوس كيروش نفتكر وضع المنتخب سابقا مع اجيري و حسام البدري ومحاوله تقديم اداء وطريقه لعب مختلفه عن ما قدمه المنتخب مع كوبر وما يقدمه حاليا مع كيروش وان كان من وجهه نظري كيروش يتفوق علي كوبر.

حقيقي اننا مبنلعبش احسن كره ممكن تتلعب او تتقدم بس هل انت تقدر تعمل احسن من كده ؟ وهل تفوق الانديه المصريه القاري وخصوصا الاهلي لازم ينعكس علي اداء المنتخب ؟

الاجابه ببساطه لأ وهبتدي من السؤال التاني هل التفوق القاري ( المحلي ) للانديه يجب ان ينعكس علي المنتخب ؟ طيب السؤال بطريقه مختلفه هل الانديه المصريه فالمسابقات القاريه بتقابل احسن لاعيبه افريقيه؟ اكيد لأ الافضل في افريقيا بيحترف بره القاره وده بدليل انك لاعبت منتخبات بحجم ( كوتديفوار - المغرب - السنغال - الكاميرون ) بقوام اغلبه محترفين وده طبعا بينعكس علي جوده اللاعبين التقنيه وبيحطهم فضغوط مختلفه بتخلي شخصيتهم الكرويه ووعيهم انضج واكبر بكتير من اللاعيبه اللي جوا القاره.

هل بقي منتخب مصر يقدر يلعب كوره احسن من دي؟ اكيد الاحسن دايما ممكن بس ده هيبقي علي حساب انك من اقوي المنتخبات القاريه دفاعيا حاليا انت لعبت فبطوله افريقيا امام عتاوله القاره ( كوتديفوار - المغرب - الكاميرون - السنغال ) وبعدهم السنغال تاني امبارح دخل مرماك هدف واحد من ضربه جزاء قدام المغرب

وفي الاخر احب اقولكم حاجه مقدونيا يوم الخميس كسبت ايطاليا في مباراه سيطرت فيها ايطاليا طولا وعرضا مقدونيا مراحتش عالجون تقريبا شاطو كورتين منهم واحده جون طول المباراه وفي الاخر مقدونيا عندها فرصه تروح كاس عالم وايطاليا لأ لانها لعبت علي قد امكانياتها فطلعت احسن ما عندها في ظل المنظومه المناسبه لامكانيات اللاعبين و مننساش ان ايطاليا هم مخترعين منظومه الكاتيناتشو الايطالي.

ف اي وقت و ف اي زمان و ف اي مكان هتتفوق منظومه نص ملعب المنتخب بتاع 2009 بوجود ( حسني عبد ربه و احمد حسن واما شوقي او تريكه او حسام غالي ) علي نص ملعبنا دلوقتي وهو ده السر الحقيقي من وجهه نظري فاختلاف الاداء - فا مينفعش نقارن جيل ذهبي و لاعيبه تقنيا كانت من الافضل فتاريخ مصر باللي موجود دلوقتي ونطلب نفس الاداء بتاع حسن شحاته.

الانظار كلها متوجهه حاليا علي مباراه مصر والسنغال في تصفيات كاس العالم.
ناس كتير انتقدت بعض من اختيارات كيروش بس قبل ما تنتقد الاختيارات لازم تفهم ما يلي:

1- الله اعلم ايه هي الطريقه اللي كيروش عايز يستعملها وبالتالي محتاج لاعيبه معينه تقدر تنفذ الفكره اللي فدماغه خصوصا ان دي قايمه ماتشين بس يعني اضرب واجري مش حاجه للمدي الطويل ولو ربنا اراد وروحنا كاس العالم في كذا لاعب فالقايمه ممكن ميبقوش موجودين علشان اكيد هيبقي في افكار مختلفه وبالتالي محتاجه ادوات مختلفه

2- في فوارق تقنيه كبيره وفيما عدا محمد صلاح الفروق الفرديه اكيد فصالح السنغال فريق قوامه الاساسي بيلعب فاكبر انديه ( انجلترا - فرنسا - ايطاليا ) وبالتالي بيلعبو الكوره بمستوي اعلي بكتير من لاعيبه منتخب مصر وبالتالي لازم تبقي واخد بالك كويس جدا فا مش هينفع تنزل مطير الباكات وبتهاجم ب 6 لاعيبه والكلام ده علشان بعكس البطولات المجمعه الغلطه معناها انتهاء حلم المونديال سريعا

3- استبعاد محمد شريف- طيب مبدئيا لازم تفهم هو كيروش بيحب يلعب ازاي - تفضيل كيروش دايما للمهاجم ال target او المحطه اللي يقدر يجيب الكوره فالاتحامات الثنائيه فالهوا - تتفق او تختلف مع فكر كيروش وكيفيه تطبيقه دي نقطه مختلفه - ولو تفتكر تصريح كيروش بعد المباراه اللي نزل فيها شريف فالوقت الاضافي وطلعه قبل ضربات الجزاء قال ان نزل شريف لعل وعسي بسرعته يقدر يخطف جول ولما الماتش خلاص كان هيروح لضربات الجزاء طلعه ونزل زيزو - وده يعكسلك تفكير كيروش في المهاجم هو فاهم كويس ان البروفايلات مختلفه وهو ليه فلسفه مبيفضلش المهاجم ال runner زي شريف ولكن ال targtet زي مصطفي و مروان حمدي.

4- احنا عايزين نروح كاس العالم ليه ؟ هل لمجرد المشاركه بس زي المره اللي فاتت ونلعب ماتش واحد ونطلع المنتخب الاخير ؟ ولا علشان نعيد ذكريات زي كاس القارات ف 2009 ؟
الاختبار قدام السنغال في مباراه ثأريه موجود فيه الدعم الجماهيري الكبير و الرغبه في تعويض خساره النهائي والروح والعزيمه والاصرار وكل المقومات اللي المفروض تعوض الفوارق الفنيه بين الفريقين - لو مع وجود كل ده ومقدرتش تتفوق عالسنغال يبقي انت عايز تروح كاس العالم تعمل ايه ؟

5- واخيرا في ظل عدم استبعاد نيمار و ميسي وهاري كين و بنزيما من قايمه المنتخب فالاهم هو وجود الروح والعزيمه والاصرار وان الناس تنسي الوان التيشيرتات سواء اهلي او زمالك او غيره وكلو يبقي ورا المنتخب سواء داخل الاستاد او خارجه - وندعم المنتخب علي السوشيال ميديا و في الاعلام ونترك الانتقاد لما بعد المبارتين علشان حتي لو اتأهلنا اكيد هيبقي في نقاط ضعف محتاجين نعالجها قبل كاس العالم.

ورساله للاعبي المنتخب ارجوكم كونوا رجالا علي قدر المسؤليه!

النهارده هنتكلم شويه بشرح مصور عن اهم لقطات اللقاء واهم افكار تشافي وهوسه بفكره خلق الزياده العدديه
والعجز والفقر التكتيكي والافتقار لايجاد الحلول والاخطاء الفرديه اللي وقع فيها ريال مدريد

فتعالا كده معايا اخدك فرحله سريعه تفهم من خلالها ايه اللي حصل فاللقاء

ومتنساش تفاعلك مع البوست بلايك او كومنت او شير بيساعدنا اننا نكمل ♥️

غاب بنزيما فاحتار انشيلوتي وغرق الريال!!

هزيمه ثقيله واداء باهت من ريال مدريد في مباراه كان المتوقع ان تكون متكافئه خصوصا بعد الاداء الجيد الذي يقدمه برشلونه مع تشافي ولكن ما السبب ؟

الاسباب عديده يا عزيزي فرديه وجماعيه وتكتيكيه ولكن علي انشيلوتي يقع اللوم الاكبر فلا يمكن ان تغير طريقه لعب فريقك وهيكلك التكتيكي الذي تعتمد عليه ليس منذ بدايه الموسم فقط ولكن طوال فترات تدريبك لريال مدريد لمجرد غياب لاعب حتي وان كان الاكثر تأثيرا فظهر مدريد تائها.

ظهر الريال بمظهر جيد لمده 8 دقائق ومن بعدها اكل برشلونه الاخضر واليابس واضاع فينيسيوس فرصه التعادل فارتدت بهدف قتل اللقاء واستسلم لاعبو الريال وظهرت الحيره علي وجه انشيلوتي وهو الذي يجب ان يجد الحلول.

هل ممكن ان تغير تكتيك الفريق وتلعب بلا مهاجم وانت لم تفعلها من قبل وليس في اي مباراه بل فالكلاسيكو؟ لم نعرف من هو المهاجم وانهار الفريق تحت الضغط فلجأ للكرات الطويله وخسرها جميعا في غياب المهاجم الذي يلتحم في الهواء سواء بنزيمه او غيره- حاول انشيلوتي التصحيح بين الشوطين وادخل ماريانو ولكنه اخطأ وترك كاسيميرو و ناتشو وميليتاو امام غارات هجوميه بدون حمايه فتلقي هدف في اول 20 ثانيه فالشوط الثاني قضي علي امال العوده ومن بعدها الهدف الرابع وما حدث بعد ذلك لم يتغير كثيرا فلم يجد الفريق طريقا للعوده.

فماذا سيفعل الفريق امام تشيلسي ؟ وماذا سيحدث ان غاب بنزيما ايضا ؟

لا يمكن ايضا الانتقاص من الجوده والوعي والشراسه التي ظهر بها برشلونه والذي احترم مدريد ففاز باللقاء عن جداره واستحقاق ولكن للحديث بقيه.

نتيجه قرعه دور ال 8 فدوري ابطال اوروبا🤩

نهائي مبكر بين تشيلسي و ريال مدريد العاشق للمواجهات الصعبه
والفائز منه سيواجه الفائز من مباراه اتليتيكو مدريد و مانشستر سيتي في مباراه بين جوارديولا وسيميوني غالبا ما تفوق فيها جوارديولا

مواجهات اقل صعوبه للبايرن ميونيخ امام فياريال الطامح لصنع المفاجأه
والفائز سيواجه الفائز من مواجهه بنفيكا وليفربول في مباراه سهله علي الورق لكلوب ومحمد صلاح ⚽️

قرعه الدور ال ٨ لدوري ابطال اوروبا الساعه ١ علي بي ان سبورت الاخباريه المفتوحه

توقعاتكم؟؟

امبارح شفنا مباراه ممتعه بين ارسنال وليفربول وكانت كمان مباراه بين الاتنين مدربين خارج الخطوط مليانه تفاصيل وتغييرات فطريقه اللعب وفي النهايه خرج يورجن كلوب منتصرا واشعل صراع الدوري مع السيتي

تعالو مع بعض نشوف ايه اهم الافكار وايه سبب تحول اللقاء وازاي قدر الليفر وكلوب يحولوا مسار المباراه لصالحهم

الحارس هو نصف الفريق وفي بعض الاحيان الفريق بأكمله

الحقيقه ان اليسون النهارده بيثبت انه حارس كبير وعنصر فارق فعلا فمنظومه ليفربول عمل تصدي ولا اروع كان كفيل بدخول ليفربول اجواء اللقاء وعمل رده الفعل اللي ادت للسيطره والهدفين

الحقيقه برده ان تدخل كلوب وتغيير منظومه الضغط ساهمو في فوز ليفربول بشكل كبير بس تخيل لو كان عمل كان والنتيجه 1-0 لارسنال كان الوضع هيكون مختلف وهنشوف تسرع واندفاع- انما الفضل فالهدوء والتركيز اللي كمل بيه الماتش يعود وبشكل رئيسي لاليسون بيكر

وطبعا علي الناحيه التانيه غلطه من رامسديل فالهدف الاول ادت لخساره ارسنال

رالف رانجنيك مدرب مانشستر يونايتد يتسبب في خروج مانشستر من دوري ابطال اوروبا

عنوان ممكن يختلف عليه ناس كتير ولكن دي قناعتي الشخصيه بسبب الطريقه اللي اختار يلعب بيها قدام فريق صلب دفاعيا زي اتليتيكو بيتميز بالدفاع الكومباكت المنخفض وتحت كل صوره من دول هشرحلك باختصار سبب المباراه الممله اللي اتفرجنا عليها ولو ان اليونايتد وصل استحواذه ل 60% ولكن خلق فرصه خطيره وحيده طوال ال 90 دقيقه

وتعالا اشرحلك باختصار:
ج

عااااجل…. بدء طرح تذاكر مباراه مصر والسنغال في التصفيات المؤهله لكأس العالم بأسعار تبدأ من ١٠٠ جنيه وحتي ٢٠٠٠ جنيه

ايه سر تفوق تشافي والتحول اللي عمله مع برشلونه؟ انا جاي اقولك جزء من الاجابه وهشرحلك علي هجمه الهدف الاول لبرشلونه

ففيلم وثائقي اسمه Clase magistral: Xavi Hernandez بيشرح فيه تشافي رحلته كلاعب من الجانب التكتيكي و ازاي اثرت فافكاره وبيشرح فيه اهم انماط اللعب اللي بيحب يستخدمها سواء:
دفاعيا ( الضغط العالي و استعاده الكره بسرعه او اجبار الخصم علي الكرات الطويله وضروره الفوز بالكوره التانيه وغيره ).

او هجوميا زي ( التدرج بالكوره - او خلق التفوق العددي و ايجاد اللاعب الحر) او اهم نقطه اللي جاي اتكلم فيها النهارده el tercer hombre او الراجل التالت واللي اطلق عليها لقب DNA Barca او جينات برشلونه.

الفكره باختصار هي ايجاد حل لجعل لاعبي الوسط فمركز 8 ( جابي و بيدري فماتش النهارده ) لجعلهم خاليين من الرقابه وفوضع يخليهم فموقف 1 ل 1 او موقف يحقق لبرشلونه التفوق العددي الهجومي ويخلي لاعيبه مركز 8 تعمل الاسيست عن طريق انك اصلا تبني علي المهاجم بتاعك اللعب بنزوله لنص الملعب ويستلم الكوره فيسحب معاه الرقابه وبالتالي يفضي مساحه للاعب رقم 8 للاختراق وده يفسرلك سبب احراز ( بيدري - جابي - فرانك دي يونج - او اي حد بيلعب فمركز 8 ) اهداف اكتر مع تشابي من قبل كده و كذلك اسيستات اكتر.

وبرده يفسرلك عدم الاعتماد علي فرانك دي يونج كتير او بشكل مستمر وتفضيل ابناء اللاماسيا لان بحسب وصف تشافي قال انهم بيتمرنو عالافكار دي فاكاديميه برشلونه ( اللاماسيا ) منذ الصغر وسماها صراحتا DNA barca وكان لتشافي تصريحات بعد ما جه برشلونه معناها ان دي يونج لسه بيحاول يفهم المهام المطلوبه منه بشكل افضل ويتأقلم عليها في حين ان عنده لاعيبه شاربه الطريقه دي وهم ابناء برشلونه و لاعيب زي فيرران توريس بسبب لعبه مع لويس انريكي فالمنتخب و جوارديولا فالسيتي.

واتطرق كمان لفكره ال cuarto hombre او الراجل الرابع ودي مش هنشرحها النهارده ولكن دي من اسباب تألق ديمبيلي و اداما تراوري مع برشلونه وهنشرحها فوقت لاحق.

ويالا نشوف شرح بسيط تحت الصور مع هجمه الهدف الاول

هاري ماجواير واستمرار الحظ السيء
الحقيقه ان هاري ماجواير النهارده قدم مباراه رائعه كانت ممكن تخفف من عليه الضغط بعد المباراه الكارثيه اللي عملها قدام السيتي ولكن رفض سوء الحظ انه يفارق قائد اليونايتد واحرز هدف بالخطأ في مرماه علشان يمسح الاداء الرائع اللي عمله فماتش النهارده ويتم التركيز كالعاده علي الخطأ.
قبل ما نحكم فالمطلق علي ماجواير لازم نفهم هو اللي بيحصل سببه ايه مبدئيا ظهر ماجواير وتألق مع ليستر كلاوديو رانييري بعد احراز ليستر الدوري ساعتها وبعديها بموسم راح لليونايتد ب 80 مليون يورو بس ايه الفرق بين الفريقين؟
ايام ليستر المنظومه الدفاعيه كانت بتعتمد علي الدفاع المتأخر والمنظومه عموما كانت تعتمد علي الدفاع الصلب المتماسك فالمقام الاول و محرز و البرايتون و فاردي يخلصو الدنيا قدام فالبتالي وبسبب المنظومه الدفاعيه بلغه الكوره الدفاع كان متدفي حاجه اقرب لمنظومه كيروش مع منتخب مصر ساعدت بظهوره بشكل ملفت لان مفيش سباقات سرعه فالمقام الاول واغلب الصراعات اما كانت هوائيه او بدنيه فالبتالي تفوق فيها بل اكتسح هاري ماجواير واتصنف ساعتها كافضل مدافع انجليزي.
من ساعه ما جه اليونايتد وابتدي ماجواير يتكشف من وجهه نظر البعض دون النظر لمتغيرات كتير اهمها منظومه الفريق اللي يا تحميك يا تكشف نقط ضعفك كلاعب لان ببساطه مفيش مدافع متكامل 100% وده برده علي سبيل المثال اللي حصل مع ماركينيوس قدام مدريد اللي كان بيتحط دايما فصراع مع فينيسيوس جونيور لاعيب وينج سريع المفروض اللي يقابله حكيمي او احد لاعبي الارتكاز وماركينيوس يغطي من وراهم ولكن اللي حصل انه محدش كان بيدافع فنقطه ضعف ماركينيوس اتكشفت قدام سرعه فينيسيوس وادت لارتكابه الاخطاء , وهي نفس المواقف اللي اتحط فيها ماجواير بسبب الصبغه الهجوميه اللي بيحاول يطبقها اليونايتد وهو مش قادر يتحكم فالكوره بشكل دائم فبترتد الكوره علي دفاع اليونايتد وهو مكشوف - او برده لما بيتطلب من ماجواير بناء الهجمه وهو ليس الافضل فالتمرير الارضي اللي يخليك تطلع بالكوره فبيرتكب اخطاء
النهارده لما قرر اليونايتد يأمن دفاعه ويسيب الاستحواذ ويلعب دفاع كومباكت و منخفض تألق ماجواير وقدم الارقام اللي هوريهالك وهقارنهالك ب فاران اللي بيلعب جنبه فنفس المنظومه وهتشوف تفوق ماجواير:
شتت الكوره 4 مرات من مناطق الخطر مقابل 3 لفاران - منع تسديدتين مقابل ولا منع لفاران - 4 تدخلات ناجحه مقابل 0 لفاران - عمل تاكلينج صحيح مقابل 0 لفاران - تفوق في 3 صراعات مقابل صراعين لفاران.
ولكن تأتي الرياح بما لا تشتهي السفن وتحط ماجواير فموقف لا يحسد عليه فوقت اصلا كل سهام الانتقاد موجهه للاعب وهنا بقي هتظهر قوه او ضعف شخصيه ماجواير اللي شخصيا صعبان عليا.