عيادة الدكتور خالد حامد لأمراض القلب والقسطرة القلبية

المواعيد الجديدة لعيادات د.خالد حامد >>>

🏰 (عيادة مصر الجديدة ) :

🚙36 ش إسماعيل رمزي _متفرع من الحجاز _ المريلاند.

*السبت والأربعاء: 4:30 _ 7:30 مساء*
*الأحد والثلاثاء : :8:30 _ 11 مساء*

🎯الموقع علي جوجل:

https://goo.gl/maps/bypQskWpG7iM3jHH8

📲 : *01208142006*

===================

🏩 (عيادة التجمع الخامس) :

🚗مركز UMC الطبى بجوار مسجد حسن الشربتلي _جنوب الأكاديمية _ 📌عيادة 131

*الإثنين والأربعاء: 8.30 _ 11 مساء*

🎯الموقع علي جوجل:

https://g.co/kgs/jH5jQia

📲: *01158862675*

==================

🏯 (عيادة حدائق القبة) :

🚕110 تقاطع ش ترعة الجندى مع ترعة القبة _خلف سور المخابرات _ عمارة بيم.

*السبت والخميس: 8 _ 11 مساء*

🎯 الموقع علي جوجل:

https://g.co/kgs/ZEPgHt

📲:*01060568564 _ 01224808472*

سهران بفكر فى فيديو بكرة ان شاءالله اللى ناس كتير طلبته >>>
"أزاى تعالج ضعطك بالدهلكة ومانخدش دواء" ؟؟؟

شوف هو فى فيديوهات كتير لدجالين فى الموضوع دة بس انا واثق ان الناس هتصدقنى أنا إن شاء الله 😄

اللى صاحى يفكر معايا فى فكرة creative
وانتظرونا 🤓

أنتبه.. ألم المعدة قد ينذر بمشكلة خطيرة بالقلب
شكرا " المستقبل " للنشر والتوعية

انتبه.. ألم المعدة ينذر بمشكلة خطيرة في القلب حذر الدكتور خالد حامد، طبيب القلب والأوعية الدموية، من ألم المعدة الذي قد ينذر بمشكلة خطيرة في القلب في حالة كان المريض مدخنًا ويعاني من ضغط و سكر. وقال

الحالة دى قصتها غريبة جدا ، ربنا جعلنا سبب سعادة لعائلة كاملة 🥳
مريض مدخن شره حصله جلطة بالقلب بالشريان التاجى الأيمن وتوجة لأحد المستشفيات الكبرى وعمل فعلا قسطرة إستكشافية وظهر إنسداد حاد كامل للشريان التاجى الأيمن وتضيقات متعددة بالشرايين التاجية اليسرى " الفيديو للأطباء اول تعليق " ورغم ذلك -وبعد مداولات ومباحثات- خرج المريض من غرفة القسطرة بدون أجراء عملية القسطرة العلاجية ولا حتى فتح الشريان التاجى الأيمن فقط اللى فيه الجلطة !!!

وقالوله يقعد فى المستشفى كام يوم عقبال لما يحددوا محتاج جراحة قلب مفتوح ولا دعامات، ودة لا يجوز طبيا فى حال جلطة القلب لان الجلطة تحتاج تدخل سريع لفتح الشريان الأيمن المسدود !!!

المريض رفض الحجز وخرج من المستشفى وجالى فورا !

شوفت سى دى القسطرة الاستكشافية وقولتله الشريان الأيمن مسدود فعلا بجلطة حديثة ولازم نعمله توسيع فورا للحفاظ على كفائة عضلة القلب ، وباقى الشرايين يمكن تصليحها بالدعامات ان شاءالله ومش هنحتاج جراحة قلب مفتوح...

وبالفعل توجهنا للمستشفى وتم توسيع الشريان الأيمن وتركيب دعامتين دوائيتين ورجع تدفق الدم للشريان بشكل طبيعى بفضل الله...

وفى جلسة قسطرة أخرى بعد أسبوع تم توسيع الشرايين التاجية اليسرى بالبالون و٤ دعامات دوائية ورجعت كل الشرايين لطبيعتها وتحسنت حالته وخرج اليوم بالسلامة

(فيديو الحالة كاملا للأطباء أول تعليق )

الحمد الله وصلنا لمرحلة من الإحترافية والخبرة والتطوير فى الأدوات المستخدمة يسمح لنا بعمل قسطرة علاجية ودعامات دوائية للحالات شديدة التعقيد بدلا من جراحة القلب المفتوح وخروج المريض فى أقل من ١٢ ساعة من المستشفى وبدون تخدير كلى او خيوط جراحية💪🏽

شير علشان الناس تعرف ان مش كل الحالات المعقدة لازم لها قلب مفتوح وزراعة شرايين زى زمان ، دلوقتي يمكن استبدال الجراحة فى معظم الحالات بالقسطرة العلاجية والدعامات الدوائية ان شاءالله.

للحجز : 01158862675

أخر يوم عيادة قبل العيد بكرة إن شاءالله علشان بعد كدة طالع مؤتمر طبى 🙄

لو حد بيشاور قلبه يتعب فى العيد زى كل سنة يشرفنا غدا الإثنين بعيادة التجمع الخامس إن شاء الله 😄
كل سنة وانتم طيبين

والشقة كلها

ماهو ماحدش يتسحر كحك وبسكوت بردو ياجماعة ، وإن كان اللى بياكل مجنون فالمستمع عاقل ! وبعدين لما تاكلوا بسكوت العيد دلوقتى، فى العيد هتعملوا إيه؟!! بسكوت تانى؟!!

مرضى القلب اللى قولنالهم مالكمش صيام وصاموا والحمد الله رمضان عدى عليهم بخير ، هندخل على المرحلة التانية "ماتكلوش بسكوت وكحك كتير " 😊

قولتلكم فى أول رمضان مصر بتبقى جميلة اوى بليل والناس نايمين، بس أكتشفت فى أخر رمضان أن مصر بتكون أجمل الصبح بدرى والناس بردو نايمين !!!

فالظاهر أن المشكلة فى الناس مش فى مصر خالص ،فأحنا ان شاءالله نخلينا نايمين منها نستمتع بالهدوء وجمال مصر ومنها نوسع طريق لعربيات الإسعاف والدكاترة لإنقاذ حالات جلطات القلب من الكحك والبسكوت 😬

فى حال حدوث جلطة بالقلب ( ٢ قرص برليك ٩٠ مج ، ٤ اقراص اسبوسيد ٧٥ مج ، ورقم الاسعاف ١٢٣، ورقم الدكتور ) وبالهنا والشفا...

كل سنة وانتم طيبين 🙂

دخلت عليا مريضة مدخنة بشراهة ، بتاخد نفسها بصعوبة (تزييق وصفافير ومزيكة جوة ) 😤

بعد الفحص ورسم القلب والاكو ظهر ان قلبها كويس لكن صدرها هو اللى متأثر بشدة من التدخين وهتحتاج لجلسات موسعة للشعب الهوائية مع بخخات للرئة

قالتلى بس انا عايزة اخد نفسي دلوقتى، مش قادرة !

قولتلها ما انا كتبتلك جلسات تنفس تاخديها النهارده وواحدة واحدة نفسك هيتحسن خصوصا لما تبطلى تدخين !

قالتلى لا انا عايزة اخد نفسي دلوقتى ومش هاقدر أبطل تدخين !!!

قولتلها خلاص تتحجزى فى المستشفى وتاخدى الجلسات والعلاج دلوقتي؟!

قالتلى لا مش عايزة حجز ، عايزة حاجة تخلينى أخد نفسى !!!

قولتلها طيب انتى مش صابرة تاخدى الجلسات ولا تروحى مستشفى ومافيش نية تبطلى تدخين، تتوقعى هتخفى إزاى يعنى ؟!! ماهو أنا مش ساحر !!!

قالتلى لا احنا جايين لك على إنك ساحر والناس بتشكر فيك أوى!

قولتلها لا ياماما انا مش ساحر ، الساحر فى العمارة اللى جنبينا ، وانتى داخله فى يافطة مكتوب دكتور خالد حامد إستشارى القلب ، ساحر دى إسمها "استعارة مكنية " يعنى يقصدوا إنى بكتب علاج يساعد فى الشفاء بإذن الله مش ساحر بحق وحقيقي يعنى 🤔

بنتها قالتلى لا بس والله يادكتور الناس قالوا عليك ساحر بجد واحنا جينا على هذا الأساس 😄

اقسم بالله انا دكتوووور مش ساااااحر ياجدعان 🤦

انت متخيل حوارتنا مع المريض بتروح لفين ؟! وبعدين تستغربوا من أبو كوركومين و ابو الخواطر وابو شعرة وابو الطيبات دة غير فيديوهات إزاى تنضف قولونك وإزاى تغسل الرئة من الدخان وإزاى تسيح دهون الشرايين واللى بيعملوه فيكم ...

تعرف الدكتور اللى يمشى بمبدأ ريح الزبون دة بيروح فين ؟؟؟

الحالة دى متكررة تقريبا أسبوعيا، مع خطأ كبير فى التشخيص لمدة سنيين !!!.. ودائما السبب أى حد غير طبيب القلب ماعرفش ليه؟!! رغم أن الحمى الرماتزمية وحقنة البنسلين طويل المفعول من إختصاص القلب رسمى، لكن للاسف اى طبيب غير مختص _ عظام، انف واذن ، باطنى، طبيب الوحدة الصحية _ يكتبها دون الرجوع للقلب ولا التقييم بالإيكو !

بنت أو ولد من سن 10سنين لحد 25 يجي العيادة مع مامته ويحكي إنه بياخد حقنة البنسلين طويل المفعول على مدار كذا سنة، اللى يجننك أن الدكتور أعتمد فى تشخيص "الحمي الرماتزمية" على تحليل سرعة الترسيب ESR و الاجسام المضادة للميكروب السبحي ASOT وخلاص كدة كتب الحقنة مدى الحياة !!!

تسئل البنت كان جالك التهاب فى اللوز وبعدها بأسبوعين تلاتة حصل إلتهاب شديد في أحد المفاصل الكبيرة ( زى الركبة والانكل والكوع أو الكتف) إحمرار وتورم وماكنتيش قدرة تحركي رجلك أو إيدك من الوجع؟؟؟ حاجة زي دي مش هتتنسى من ذاكرة البنت أو الأم بسهولة؟؟؟.. الإجابة لااااا !!!
.طيب حصل قبل كدة سرعة فى ضربات القلب ونهجان مع أقل جهد ومعه سخونية شديدة أكتر من 39 ؟؟؟.. لا خالص !!!. طيب عملتوا موجات صوتية على القلب " إيكو " وظهر أثر حمى روماتزمية على صمامات القلب؟؟؟.. لا ماحدش طلبها أصلا !!!

طيب أومال ايه اللي حصل علشان تاخدي الحقنة دي؟؟؟
وجع فى ركبتي فضل معايا فترة فالدكتور طلب تحليل سرعة الترسيب وAsot طلع 400 فقالى عندك حمي روماتزمية ولازم تاخدي حقنة البنسلين طويل المفعول علشان صمامات القلب كل أسبوعين لغاية لما سنك يبقى 25 سنة!!!

كدة بالبساطة دي!!!.. ما الطب حلو أهو أومال بيقولوا صعب لية ؟!! 😂

تشخيص الحمي الرماتزمية ماهوش بهذة البساطة للأسف وإلا ماكنش أتعمله جزء منفصل في كتب القلب ومواصفات تشخيص عالمية " Jones Criteria" وتوصيات طبية لوصف دقيق لصمامات القلب المتأثرة بالحمى الروماتزمية عن طريق الإيكو علشان تيجي حضرتك تاخد الحقنة على أساس تحليل سرعة ترسيب ولا تحليل ما يسمي ظلم بتحليل الحمي الرماتزمية ASOT...

تشخيص الحمى الروماتزمية يعتمد على الفحص الطبي أولا مع التاريخ المرضى ثانيا ثم التحاليل الطبية ، ولاااا يمكن تشخصيها بمجرد التحاليل دى منفردة ، لازم توافر مجموعة من الشروط لتشخيص الحمى الروماتزمية وإعطاء حقنة البنسلين بشكل سليم.

والله انتم مش متخيلين مدى المعاناه اللى بيعيش فيها الشاب أو البنت دى بمجرد ماتعرف إنها مريضة قلب أو بتاخد حقنة لحماية القلب والحقيقة أن صحتها قد تكون أحسن من الدكتور اللى كشف عليها شخصيا!!

حقنة مؤلمة جدا وتتاخد كل أسبوعين أو تلاتة وتؤثر على مناعة الجسم ولازم يتعملها إختبار حساسية فى كل مرة مع الشعور بأن صاحبها مريض قلب مايلعبش كتير ومايجريش ومايشاركش فى أى رياضة، دة غير مخاوف الزواج والحمل عند البنات ، كل دة والتشخيص قد يكون غلط من الأساس !!!

لا داعى من إعطاء حقنة البنسلين طويل المفعول دون الرجوع لطبيب أمراض القلب .. اللهم بلغت اللهم فاشهد

د/خالد حامد أستشارى أمراض القلب

_فى ضغط عصبى الفترة دى ؟؟؟
= ايوة يادكتور أصلى محاسب!

_فى ضغط عصبى الفترة دى؟؟؟
=أيوة جامد جدا طبيعة شغلى ،مهندس ومدنى كمان!

_فى ضغط عصبى الفترة دى ؟؟؟
=يادكتور أنا محامى وعلطول قضايا ومحاكم !

_فى ضغط عصبى الفترة دى؟؟؟
=لك ان تتخيل انا مدرس ومابقتش أستحمل المناهدة!

_ فى ضغط عصبى الفترة دى؟؟؟
=احنا دكاترة زى بعض مش محتاج اوصفلك!

_فى ضغط عصبى الفترة دى؟!
=يادكتور أنا حامل!!! ، حامل الهم والغم من ولاد ال**** اللى فى الشغل!

بفكر ألغى الفقرة دى من أسئلة العيادة، وأخليها مثلا قول " " بعدين الأرض تفتح على زوحليقة ترجع الحالة للشغل تانى 😂

ويجيلهم نوبات هلع ويقعدوا يصرخوا يادكتوووووور خاااااالد مابنحبش الهزاااار دة وفجأة يلاقى المدير نازل من الزوحليقة اللى جنبه 🤣🤣🤣

كل واحد فى شغلانة فاكر أن هو بس اللى تعبان ومضغوط !، لكن الحقيقة كلنا بنعانى ومحتاجين نساعد بعض نعدى اللى باقى من عمرنا من غير فرهدة ولاضغط وسكر وجلطات وجرى فى أنصاص الليالى ،ياريت والله كان الكركدية بيعالج كل دة فعلا ونقعد تبقى كشوفاتنا عن الكركدية سخن ولا بارد ؟! ونعمل فيديوهات أزاى تعرف الكركدية أصلى ولا مغشوش؟!! وهنعمل بردو deal مع مزارع الكركدية ومعامل قياس نسبة الكركدية فى الدم والدنيا هتبقى حلوة من غير لامضاعفات جانبية وجلطات وبهدلة ...هونوا على نفسكم واللى جنبكم وحبوا بعض علشان الحياة مش ناقصة وربنا 😄

_ إبراهيم، الناس " بترفّص" ونفذ جهدهم حتى على الترفيص !

= يستهلوا أكثر من ذلك ياصديقى!

_ هل هناك أكثر ؟!!

= نعم ... مص دمائهم حتى أخر قطرة !!!

_ يفرجها الله من عنده يا إبراهيم.

=لن يفرجها على أمثالهم !

_ألهذه الدرجة تظن أن الله يبغضهم ؟!!!

=أنظر إليهم ... إنهم يبغضون أنفسهم وأصواتهم وأفعالهم ويتقنون الخداع والغش والكذب ويتفاخرون بالظلم والإفتراء والتجويع ويحبون الدنيا والأموال والكراسى حتى وإن كان كرسى فى طابونة لن يتركوه ويخافون الموت ويكرهون لقاء الله لأن ما تراه الآن لا يساوى شئ فيما سنراه فى الأخرة !!!

_ نراه ؟!! لماذا جمعتنا معهم يا إبراهيم، نحن لسنا معهم ، نحن فقط نشاهد !!!

=كل من تراهم أيضا كانوا مشاهدين ياصديقى ...

من كتاب "اللى لسة ماصدرش "

ومن الجهود المبذولة لمنع حالات توقف عضلة القلب المفاجئ للرياضين إلغاء معظم مراكز الشباب بالمناطق الشعبية وبناء اى حاجة تجيب فلوس مكانها ...

بس فى جهاز بسيط كدة فى الصورة ممكن يبقى متواجد فى الملاعب ويتدرب عليه الرياضين لإنقاذ حياة اى لاعب حدث له أرتجاف بطينى أثناء الرياضة أدى إلى هبوط عضلة القلب لأنه بمثابة إنقاذ حياة >> جهاز الصدمات الكهربائية
Automated External Defibrillator AED

زى ما بيكون فى طفاية حريق فى كل مترو ، لازم يكون فى جهاز صدمات فى كل ملعب ، ونعمله إعلانات بردو وتدريبات وبرامج ولا هو احنا حلوين اوى فى الهيافة وبس ؟!!!

دعواتنا بالشفاء العاجل للاعب أحمد رفعت لاعب نادى فيوتشر لان حالته خطيرة وحرجة نتيجة توقف عضلة القلب فترة طويلة دون مساعدة طبية بإنعاش القلب او صدمات كهربائية...

والله مصر دى بتكون روعة بليل والناس نايمين

مش عارف علشان بليل ولا علشان الناس نايمين ؟!!

شوف هو الناس وشّ الصراحة وسكون الليل دة تحسه بيطبطب على الناس الجميلة البسيطة اللي زينا انا وانت وكل اللي صاحين دلوقتي وماحدش حاسس بيهم ، الوقت دة بتلاقى نفسك وتتنفس روحك، أحنا عباقرة البلد دى ونوره فى الظلام الحالك ، اللى هيشوف البوست الصبح ماتظطش انت مش معانا ياكابتن انت كنت نايم ..

ملحوظة : فى ناس كتير عرفت من البوست انى صاحى دلوقتي ،فقرروا يبعتلولى استفسارات طبية على الواتس آب ، أحب أقولهم وربنا مانا رادد علشان دة وقت التأمل والسكووون والصباح رباح واصطبح وقول ياصبح 😄

=إيه دة هو مرضى القلب هيصوموا أصلا ؟!!.. لأ 🙄
= بس أنا صحتي كويسة وأقدر أصوم ؟.. صوم
=طيب لو تعبت أفطر ؟!.. أفطر
=بس لو كويس أصوم ؟!.. صوم
=أنا باخد مدرات بول علشان عضلة القلب ضعيفة؟ أفطر.. صوم.. أفطر.. صوم 🙃

الحمد الله على نعمة الإسلام وأحكام الصيام ،فلم يترك شئ فى هذه الدين إلا وقد ذكره رب العالمين "برحمة واسعة"

(فمن شهد منكم الشهر فليصمه، ومن كان "مريضًا" أو على سفر فعدة من أيام أخر، يريد الله بكم اليسر ولا يريد بكم العسر)

ركز أوى فى يريد الله بكم اليسر ولا يريد بكم العسر ...

مريض القلب كلمة عامة لايمكن الأخذ بها كحكم عام لجميع المرضى، مريض ضعف عضلة القلب، غير قصور الشرايين التاجية، غير جلطة القلب، غير الحمى الروماتزمية، غير ضغط الدم المرتفع، غير، غير، كل دة قلب ولكل مريض حكمه حسب مرضه وحالته الصحية...

مريض القلب اللى لاجدال على أن يفطر فى رمضان لخطورة الصيام عليه >>>
_مرضى ضعف عضلة القلب اللى متشخص قريبا فى الشهور الأولى ومحتاج علاج مكثف بأنتظام وخصوصا مدرات البول.. يفطر

_ مريض جلطة بالقلب أو الذبحة الصدرية الغير مستقرة اللى ماعداش عليه ٣ شهور سواء ركب دعامات أو لأ.. يفطر

_ مريض مركب أكثر من دعامة بالشرايين التاجية حديثا ماعداش عليه ٣شهور .. يفطر

_ مريض الإرتفاع الشديد بضغط الشريان الرئوي المصاحب بضعف الجزء الايمن من عضلة القلب.. يفطر

_مريض جلطة الساق الحادة أو الشريان الرئوي الحادة وماعداش عليه 3 شهور.. يفطر

_ضيق "شديد" بأى صمام بالقلب (زى الأورطي أو الميترالي ).. يفطر

_جراحة قلب مفتوح ماعداش عليها ٣شهور.. يفطر

_أى مريض قلب حالته مستقرة وشعر بتعب مع الصيام ( ألام بالصدر، ضيق تنفس، دوخة ،نهجان ، إغماء، تورم بالجسم).. يفطر

فيما عدا ذلك وبشرط إستقرار حالته الصحية والقدرة البدنية على الصيام فليصم، وياخد باله بقي من الكلمتين الطعمين دول >>>

_ الفطار : لو هياخد علاجه على الريق يشرب ماية او لبن او عصير وبعدين ياخد العلاج، والفطار يكون كميات قليلة مايكلش حتى الأمتلاء.. علشان تاخد نفسك ياحج..الأكل بيسرع ضربات القلب ويوطي الضغط قليلا فى الانسان الطبيعي.. فانت هيبقي طيارات حضرتك مش ضربات قلب 😀.. كميات قليلة وكل تانى بعد الترويح .

_ ياعرقسوس ،شفا وخمير 😀.. بالنسبة لمرضى القلب والضغط لا شفا ولا خمير ، هى إيه خمير دي بقى؟! 🤔.. المهم ماتشربهوش علشان بيرفع الضغط، بس أنت عارف المصرى معروف بقوته وجبروته فممكن يحط نص كوباية عرق سوس على نص كوباية كركدية وبكدة يعمل شلل في الدورة الدموية ماتبقاش عارفة تدور يمين ولا شمال 😂
سؤال رمضان هى بتلف شمال ولا يمين بجد ؟!

_الماية من 2_3 لتر على مدار الوقت بين الفطار والسحور.. ماتجيش قبل الأذان بخمس دقايق تشرب إزازة وتحول معدتك لقربة ماية تطبق على مراوحك بليل وانت نايم وتصحينا الفجر 🤢
سؤال تاني ، هى إية مراوحك دى ؟!! هو انت عندك مراوح بجد ؟!!!

_المخلل والطرشي والموالح ممنوعة لانها بتحبس الماية فى الجسم وبترفع الضغط وكذلك العرقسوس، بتحب الحادق أعصر ليمون أو حط خل.

_الأدوية اللى بتتاخد فى الفطار وخصوصا لو فيها مدرات بول تبقى على فطار رمضان، وأدوية العشا على السحور ومهم جدا تأخر السحور لقبل اذان الفجر ماتتسحرش بدرى لتقليل ساعات الصيام، ومرضى السكر يرجعوا لدكتور السكر ولو سمح لهم بالصيام يبقى لازم يكون معاك جهاز قياس سكر بالبيت علشان لو قل أقل من 70 او زاد أكتر من 300 تفطر بلا تردد.

ال٧٠٠ رسالة اللى على الواتس اب أخد علاجى إزاى فى رمضان ؟؟؟ أهو 👆 ... ابعتها لزمايلك علشان الدكاترة مش بتعرف ترد على ٣٠٠ تليفون فى اليوم 🤕😬

_ أخيرا ربنا جعل الصيام رحمة وزيادة فى الصحة وسمح "للمريض" بالإفطار ومن رحمته أن ترك لنا كأطباء تحديد من يفطر ومن لايفطر حسب حالته علشان لا أنا أأثم بإجتهادي فى منع الضرر عنك، ولا أنت كمريض تأثم بالإفطار..

ماتنسوش تسئلوا أهل الدين عن كفارة الإفطار...

يابخت كل واحد ربنا كتب له الصيام السنة دى ، وياهناه المريض اللى أستجاب لنداء ربه من السماء بأن يفطر حبا فيه وخوفا عليه، أحنا بنصوم لربنا وبنفطر "كمرضى" بأمر ربنا بردو ولا ينقص من أجرك شئ طالما كنت تنوى الصيام ومنعك المرض...

يريد الله بكم اليسر ولا يريد بكم العسر.

كم انت رحيم بعبادك يا الله ،والله إنا نحبك ونحب من أحبك ،فاجعل حبنا لمن أحبك شفاعة لنا ...

مواعيد رمضان أول تعليق ، كل سنة وأنتم طيبين.

لا مدخن لا ضغط ولاسكر ورغم ذلك جلطة بالقلب الساعة ٣ فجرا، والسبب ضغوط الحياة !!!

هونوا على نفسكم لأن الضغوط النفسية والتوتر المستمر من أسباب زيادة لذوجة الدم وحدوث الجلطات فعلا...

مع تيم قوى جاهز للطوارئ على مدار ال ٢٤ ساعة بفضل الله أصبح كابوس جلطة القلب يسهل التعامل معه وإنقاذ المريض ببساطة بدون ذكريات حزينة ولا مؤلمة أو حتى يحس أن الموضوع بالخطورة اللى بيسمع عنها 💪

جلطة القلب بالشريان التاجي الأيسر الأمامى(السهم الأحمر شريان مسدود ومختفى تماما) فى سن الشباب تمثل خطورة كبيرة لذلك الشريان دة أسموه >>>

" widow maker heart attack "

لأنه الشريان المغذى لأكتر من ٥٠% من عضلة القلب وإنسداده يهدد الحياة 😬

بفضل الله تم توسيع الشرايين بالبالون وتركيب دعامات دوائية ورجع تدفق الدم لعضلة القلب بشكل طبيعي (السهم الأخضر وظهور الشريان الأيسر الأمامى من جديد)

🎈 مهم فى حال حدوث جلطة بالقلب >>> (ألم مستمر أكتر من ربع ساعة فى منتصف الصدر كأن سكاكين بتقطع أو حجر تقيل، ويسمع الوجع فى الرقبة والكتف الشمال )
1.التواصل السريع مع دكتور القلب.
2.علاجات السيولة فى الدقائق الأولى(قرصين برليك ٩٠ مج و٤ أقراص أسبوسيد ٧٥ مج)
3.التدخل السريع بالقسطرة فى الوقت الذهبى ( أول ٦ ساعات من الجلطة ).

الفيديو كاملا للأطباء فى أول تعليق

مصر الجديدة : 01208142006
التجمع الخامس : 01158862675
حدائق القبة : 01060568564

حالة صعبة جدا ومعقدة، معظم الحالات دى يتم تحويلها لجراحة قلب مفتوح وزراعة شرايين ولكن ... 😬

مش هتصدق لو قولتلك ان الصورة دى داخل غرفة القسطرة مباشرة بعد إجراء عملية قسطرة علاجية بدلا من جراحة القلب المفتوح (ببنج موضعى وبدون تخدير كلى أو جرح وغرز جراحية 💪)

الحالة صعبة إنسداد مزمن معقد (CTO) بالشريان التاجي الأيمن، وتضايقت متعددة بالشرايين التاجية اليسرى (الأسهم الحمراء ) ، يعنى ال ٣ شرايين التاجية فيهم تضيقات شديدة وسدد كمان !!!

بعد شرح الحالة للأهل وصعوبتها وأن ممكن بإذن الله علاجها بالقسطرة بدلا من عملية القلب المفتوح قالوا >>> ( توكل على الله يادكتور واشتغل )

تمكنا بفضل الله من إجراء قسطرة علاجية وتوسيع كل التضيقات بالبالون بما فيهم الشريان التاجي الايمن المسدود انسداد مزمن ( CTO ) وتركيب ٤ دعامات دوائية وعودة تدفق الدم داخل الشرايين بشكل طبيعى (الأسهم الخضراء ) ونتيجة رائعة الحمدلله ✌️💪

تقدمنا كثيرا فى إجراء حالات القسطرة المعقدة اللى زمان كنا نحولها جراحة قلب مفتوح من غير تفكير، دلوقتي بنقدر نعملها بالقسطرة العلاجية نظرا للتطور الكبير فى الأدوات المستخدمة من قساطر دقيقة واسلاك خاصة 💪✌️

الصورة بعد ثوانى من إجراء العملية ومن خلال اليد واستاذ عبد المنعم بيقولى >>> هاتصور وانا واقف أفضل علشان خاطر الناس تعرف إنك دكتور شاطر وثقتي فيك كانت فى محلها من ساعة ماشوفتك فى العيادة 😀

وخرج من العمليات ماشياً يطمئن أهله وهم مش مصدقين، قولتله أرتاح على الكرسى بقى علشان ماتتحسدش 😆
وتانى يوم خرج من المستشفى بالسلامة الحمد لله.

كتير بسئل نفسى لماذا يكرمنى ربي ؟؟؟
واسعى لمعرفة السبب علشان أحافظ على نعمه ، لان الضامن لكرم ربنا عليك هو شكرانك وحمدك لنعمته واستغلالها فيما يرضيه، فتفضل مستور طول حياتك...

ثم يأتى الرد من مريضة جاتلى زيارة مرة واحدة بالعيادة والله لا اتذكر حتى شكلها...
الحالات دى بتخلينا نعيش ونكمل - رغم مشقة المهنة وآلامها - ونصبر ونحتسب ونحزن ونفرح .

قصتها ببساطة انها شابة صغيره ٣٣ سنة وجاتلى تاريخها المرضى انها عملت دعامتين بالشريان التاجي الأيسر ، وبعدها بفترة قصيرة حصل لها جلطة بالجزء الخلفى من عضلة القلب لأنسداد نفس الشريان اللى ركبت فيه دعامة ، فعملت دعامة ثالثة ، كل دة مع أطباء آخرين ولم أرها قبل ذلك، ولكن مازلت تعبانة ؟!!!

وبعد لف ٦ شهور على الأطباء المتابعين لها وعملولها العملية وغيرهم التعب والنهجان مازال مستمر فجاتلى !

قعدت وطلعت كل الاوراق وشوفت كل سيديهات العمليات والتحاليل والفحص والتاريخ المرضى وفحص طبي وايكو جديد ورسم قلب ، وطبعا العيانين برة في الرسبشن يقعدوا يقولوا هو الدكتور بيطول اوووى في الكشف كدة ليييييية ويتخانقوا واللي يتقمص ويسحب الكشف ويمشى ، وانا فى ملكوت تانى ...

فاكتشف بالفحص الطبى صوت لغط يٌسمع بصعوبة من إرتجاع بالصمام الميترالي ، لكن بالأيكو يظهر ارتجاع شديد بالصمام الميترالي مع تغير وضعية المريضة !!!

كل دة نتيجة معلومة ماتفوتش البحث عنها كطبيب مع أى مريض جاله جالطة بالجزء الخلفى من عضلة القلب ويشكى بعدها من نهجان !
Suspicion of papillary muscle rupture should be considered in any patient following inferior myocardial infarction complaining of shortness of breath !

ارتجاع شديد بالصمام الميترالي نتيجة جلطة القلب اللى حصلت يظهر بصعوبة فى الإيكو ، وبعد الوصول للتشخيص صارحتها بأن الصمام الميترالي محتاج تغير بجراحة قلب مفتوح وفى أقرب وقت ( انت متخيل لفة على عشروميت دكتور ودة فى جلسة واحدة بيقولها يلا روحى أعملى قلب مفتوح بكرة وكاتبلها تقرير كمان دة مابيهزرش !!! )، طبعا انهيار وعياط وبكاء، هو الحل كدة والشفاء بإذن الله ،وكتبت علاج مؤقت لحين إجراء العملية فى اسرع وقت والعرض على جراحة القلب والصدر ...

خلاص نسيت وشوفت المريض اللى بعده واللى بعده واللى بعده...

وبعدين تجيلك رسالة من حد فاكرك وبيدعيلك ولك أثر دائم فى حياته وانت لا تعلمه ولا تذكره ... شكرا

والله الطب دة فى حد ذاته معجزة إلهية

{فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا (10) يُرْسِلِ السَّمَاءَ عَلَيْكُم مِّدْرَارًا (11) وَيُمْدِدْكُم بِأَمْوَالٍ وَبَنِينَ وَيَجْعَل لَّكُمْ جَنَّاتٍ وَيَجْعَل لَّكُمْ أَنْهَارًا (12) }

ألف مبروك لمنتخب قطر الفوز ببطولة كأس آسيا لأغنى بلد فى العالم وهردلك للمنتخب السعودي اللى محتاج يشتغل على نفسه أكتر الفترة الجاية ويجيب لعيبة بتعرف ترقّص ...

_لقد أكتشفت يا إبراهيم

= لا لا تكتشف ياصديقي!

_دعنى أتحدث !!!

= لا لن أدعك تتحدث مرة أخرى، تظن نفسك مكتشف وترى مالا يراه غيرك ولكن الحقيقة يعلمها الجميع إلا أنت ولا أحد يتكلم، ألم تسئل نفسك لماذا ؟!! لماذا رأيتهم كالفئران؟!! ، أنت صديقي وأحبك وأنا لست معهم لأخيفك وأخرس صوتك، ولكن بالله عليك أتركهم ، أتركهم لمصيرهم المحتوم وأتركنى فالحياة مستحيلة ولا أحتمل كتم أنفاسك!

_ إبراهيم...

من كتاب د/خالد حامد "اللى لسة ماصدرش "

_ أكتشفت كذبه يا إبراهيم، فهو يجذب النساء مستغلا طول قامته وشعره الكثيف وقوامه الممشوق ويقول للناس أنتم نانوس العين، ولكنهم جهلاء لايفقهون شئ فى تشريح العين مثلى، لا يوجد داخل العين شئ أسمه نانوس يا إبراهيم ! ، والعجيب أنهم يصفقون !!!

= لا تبالى ياصديقى فقد خرجنا من الساحة بفائدة كبيرة، لقد أخذت باكتة بانجو وخمسمئة جنية !

_ ولماذا تعطيهم لى يا إبراهيم؟!! وما المقابل؟!!

= لا تسئل، فأنت صديقى ونانوس قلبى ...

من كتاب د/خالد حامد " اللى لسة ماصدرش "

ماهذة العصابة العاتية؟! ، إنهم أقوياء جدا ويهابهم الجميع، لقد أصبح الناس مثل الفئران تختبأ فى بعضها البعض ولا أحد يصدر صوتا، حتما ستكون نهايتهم يا إبراهيم...

من كتاب خالد حامد " اللى لسة ماصدرش " !

_الاهتمام بممارسة الرياضة يحمى من الاصابة بالتناحة والبلادة وبالتالى الحد من مرض الخنوع والذل خصوصا بين الشباب والأطفال.

_ ممارسة الرياضة تعمل على تعزيز صحة وقوة العضلات وعلاج الاكتئاب والضغط النفسى، كما أنها تحمى الجسم من الإصابة بالأمراض المزمنة والتخلص من الخلايا الخبيثة المنتشرة فى الجسد !

_الوقاية من إصابة القلب النابض، والحفاظ على العقل المفكر وحماية الجسد كله واستعادة الحياة للخلايا الميتة المتعفنة !

_ التخلص من الدهون المترهلة المدلدلة تحت جلباب الكروش والسداغ .

_ الدعم للرياضة والرياضين بالكلمة والمال والأنفس لاستعادة النشاط والحيوية لهذة الأمة ...

هؤلاء هم الأبطال الحقيقين ...

عندما كنت ب لبنان الجميلة الرائعة ، وقررت أن لا أزورها مجددا !!!

بلد تتمتع بطبيعة لم أرى مثلها فى أى مكان جبال وخضرة وبحار وكهوف من الجنة.

لا انسى أحساسى داخل مغارة جعيتا فى احد كهوف لبنان المدهشة ، تشعر وكأنك فى حلم جميل، كهف واسع مكيّف ربانى وداخله نهر مائه شديد الصفاء تتحرك فيه بقارب !!!
كيف يحدث هذا وكيف أوجد أنا داخل هذا الكهف ؟!!

ولكن ...

البلد مشلول تماما ، ناسه حزينة وكئيبة ، البلد مظلم جدا مساء فلا يوجد كهرباء ، الشباب معطل فى ظلمة الطرقات وكذلك النساء! ، المتسولين فى كل مكان ، تشترى زجاجة الماء ب ٥ ألالف ليرة لبنانى حتى أن العامل بالماركت يفشل فى الحساب إذ ما أخذت أكثر من منتج عملية حسابية ضخمة لا يقدر عليها المتاجر البسيطة، المولات لا أحد يشترى الجميع متفرج ، سائق التاكسي حزين، ويتر المطعم لا يضحك، مرفأ بيروت المدمر بالميناء مازال على حاله وأصبح مزاراً ورمزاً للأنهيار ، خدمات الفندق لا تقبل عملة البلد فقط بالدولار !!!

ليس هذا فحسب بل حينما تجلس على البحر تسمع صوت حسن شاكوش وعنبة وفيجو الدخلاااااااوى ...

خير اللهم أجعله خير.

انتظروا فيديو كيف نعالج الأزمات الإقتصادية بالبطيخ 🍉🍉🍉

تحية أحترام وتقدير لجنوب افريقيا وعظمة اليمن وأهلها الكرام ، ولا عزاء للخونة والمنافقين والمنتفعين بتوع الأبراج والجدران والبراميل !!!