ዤል ቀለም

Muheba Ekram (@muhebaekram) • Instagram photos and videos 0 Followers, 0 Following, 1 Posts - See Instagram photos and videos from Muheba Ekram ()

==== መናሜ ====

የጀመሩይ ኡንገ -የግዶሬም ለግዶሬ
ዬዴ እጄጉያን- እዊሌ ያንድሬ።

ጉፎቾም ብዮቃኝ - ብያስናግረኝ ቆፈ
ተሜኛት በልጠፈ:-
ተልጄጅ መች ያበቃው
አስር ግን ብሎድቅም-አስር ግን እነቃው

ስረም እትረታኝ - ደለ ቁጭ ጉፉቾ፣
እለውቀር ወደኮ -እለዋንዥ የሬርቾ።

እለውቃን ቡንገ - ቱስቤ እታቀሪኝ
ለቆፈ ቆፋንኩ - ቆፈ ወዳህ ፍሪኝ።

አያም እፈታያን-ወደል መናም አለኝ
አስናግሮት ህደገ -ሂንሸአላህ በለኝ።

===የዳሪ ሙሰፋ

=== ተሜኛቴ ===

ሹክር የጂጂ ላለ' - በለ ግዝ ሀለፍኮ
ኡሃን ተዌሼሆ - ሊ አያም ተረፍኮ።

የምባረይ ጉፉቾ - ያዱንያይ ቆፈ
በፍረኮት ያልፉያን-ተሜኛት በልጠፈ።

በሰብር እቄራያው - ዪንደር ተሜኛቴ
ቲሶጅ ገናን አያም - ትልነቀ በምኜቴ።

ሰበበክ ላጂጎት - የቆቴ እኬስላው
አላን ያሾክረ - አያመይ እመስላው
ያውጄይ ባረረብኝ-የጌሰይ ያትማስላው

ራጋይ አያም ትዬድ - ሀጅሲ እመጫን
የመሼ ቢመስልም-ሀደነግ ሀይር ዮጫን

ጎሽቴ በቃጠረይ - መተግ እለትፈተ
ሀውጄ ተዮን ቢቀር - ጢተም እለውከተ
ተሜኛት እለቀር - ሁን የባለይ ወክተ።

የልባለይኮ ለዮን - የምንግዝን ክቸ
ሁልም ግዝ ዮናነይ-ሁን ቲለይን ብቸ

=== የዳሪ ሙሰፋ

ኡንጋይ.......

ሂ የምባረት ኡንገ-ያመጫኔ ዮስዳን
ሀደ ግን ያወጨ - ሀደ ግን ያወርዳን።

ምነም ግዶር ብዮን-ዬድብያሁይ ኡንገ
ቡንገ በልቃነኩ - ጄጃው ሀደ ነገ።


ቆፈ ብያስናግረኝ-ብሎድቅም እነቃው
ተልጄጅ መች ያበቃው

ዉደቆት የፈሬ - ኡንገ እለነቀ
ህንሽቴት ጄጄሆ -ጎሽቴንተላበቀ።

ቅነበ ቢጢለኝ - ብዮቃኝ ጉፉቾ፣
እለውቀር ፈሬሆ - እለዌድ የሬርቾ።

እላቃሪኝ ቡንገ - እለረታኝ ቆፈ
ሁለምከ ያልፉያን - ተሜኛት በልጠፈ።

አያም እፈታያን-ወደል መናም አለኝ
እጄጀ ያንዢያው - አለህ እላትማለኝ።

===የዳሪ ሙሰፋ

==== በሰላት አትምጪ ====

ሀረመ ትልገበ - ጥርመቻሽ አይምጠ
በዝክር በሰላት- ለሳለይ ላስላምጠ።

ክቸ ጥርመቼየ - ገናም ወክተ ያሽተ
በሰላት አትምጬ- አታውጪኝ ተጎሽተ።

ቅብለ በቃነንኩ - እሰግዳው እመስላው
ለሰላት ያርመ -ያሽነ ሀሳብ ያትማስላው።

ዪልቢስ ውስዋሰኮ- በሰላት አትምጪ
ባያም ሀምስተ ግን - ተጥርመቼ ውጪ።

ቴትከ ለስገድኒ - በጀመ ላርመ
ዱንየ ጥርመቻሽ - አይግበ ሀረመ።

ደጂ አዱንየ
አታብለሽቢኝ ኒየ፤

ተስላመትኮ ትሎጭ - ቂሬ አድኒብጪኝ
በሰላት አትምጬ -ተረህመት አታዉጪኝ።

====//====
የዳሪ ሙሰፋ

=== ኒቃባምቴ ===

በመውጠ ትልረክቤት - ኢኔየ በልቃበ
ጦፌሆ ተላንዤት - ለበስት ኒቃበ።

ለብተር ተሜኜሆ - የቆሬሆት ጣመ
የደሌ ተሌውዴት-ጥማጠምት ጤመ።

በምን እላዬታው - ተገረጃይ ጉት
ከፈትኮ ለላንዤት - ሀጂነብዬንት፤
በደሌ ትትገበ - ደነሽ ተክናነብት።

ሀነይ ዱፋ ዱመሽ - ባታተይ ክሜንተ፣
የሰብ ቀልብ ያጠፍ ናር-ዘፍ ቲል ኪም ኤተ

ኢንሸ ከልበዦይኮ - ኑርከ ያምብራዛን
ቆረሽ ማልተ ባንዙይ - አሮት ያትብሬዛን።

ሀነይ ቀስረ ኡፍተሽ - በኒቃብ ሰተርተይ
የቴሀመኝ እልቢስ - ሀዱሻው ሴተርተይ።

በኒቃብም ኢትራን - ሀበርሸ ጉኒከ
ሀበይ ተክናነብት - ዮስዴታው በኒከ።

ሀራም አሼቤታን- ተልበስ እሼዤታው
ዘገሬ ትትገበ - በሀላል ያንዤታው።

=== የዳሪ ሙሰፋ

=== "ቶጵያን አትንኮት" ===

ምነም ዜገ ብቶን - እንጅ ብያንጥሬት
"ቶጵያን አትንኩ" -ህንዣትን ዬንጠሬት።

ባሎ ነብያችን(ሰዐወ)-ዱሮን ያዋለኩይ
በነኩይ ህንዣትን-ሀበሻን አትንኩይ።

ጣልያንም ለፋን - ያጃው ባለ ጠፋን
ፈረንጅ ቢቆልጥም- ዳንገሽ አላለፋን
እንግር ትያገቢ - ወልድሽ እትናደፋን።

ሀኢመይ ሀበሸ -ሀውጄም ሆነ ዱሮ
ለመሶ እንጅ እሎብ- የባዴ ህንዳሮ።

አውሮፐ አሜሪከ - ቢከሽ ገናም የምጠ
ሱዳን መይ ቲጤማይ-እሰቻን ያስላምጠ።

ግብጥም እቴዝቢ-ቢገርናነይ መውጠ
ድችራይ የሚሌ - ሰብሸ ቲንጬ የውጠ።

=== የዳሪ ሙሰፋ

=== የዌጅነት መራርቼ ===

ሙርቾ ጅበጀብነ - የሶፌነይ ጡርቤ
ሀውጄም እሴማኛን-የቶትናይ ጥምቤ

ዪኒኖይ ጥርሬ - ያንጩሌይ ጨለቆ
ቂሌይ ቲትፌቀሪ - ቲኖፊ ሾምቦቆ።

ጉቶ አካምቤሌ፣የካሌ ከምበሌ፦

ሀይሎካ ሆ ባሌ - ምራቾት አመጤ
ያብልጮ ጋር መኔ -ሀጅስ ብተር ወጤ፤

አፈረ ቲደፍቂ - ዶቆ ትያዶቂ
ሀደግን ቲትዋቂ - ሀነምግን ቲሲቂ
ወዶ አዳፋኜ - ዲነተይ ቲዚቂ፤

ቡሹልነ ተገርዶ - ቦቅሽነ ተሳንቸ
ትላትጃጅነይሙ - ሻንቆን ተጉራቸ፤

ባጃይ ወንደበነይ - የዋልነቢ ዘክተ
የድሮይ መትፊቀረ-የዌጅነተይ ወክተ፤
አቴሬኝ ጥርመቼ - የሬርቾ ጌበተ።

ፈጅር ተሼነኔ - ገፓተይ ቲቴሪ
ተርተም በያቴሪ - ሩብተም በያጤሪ
ዳኘ መች ያትኬሽ ናር-ሌቄ ተልነጠሪ።

ቀልብ የቻለ ሁልም - ቀልብከ ነጠራን
የዌጅነት መራርቼ -መርነት ባቱም ቀራን።

===የዳሪ ሙሰፈ

=== የሰብ በሰር ===

የሰብ በሰር ብሎት-ሰብ ንጦት ምንያሻን
ላዱንያም ቦዝን - አሄራም ያብላሻን።

የሼጣን ሉክተኘ - የክዝብ መላንቾ
ሄማት ታታታውሬሽ- በፌስ ቡክ በሜልቾ፤

ሰብ ተሰብ ታትፋጄሽ - ሀደይ ታዲ ጊቾ
ብላሽ አትባሎትን - አትላሎትን ብቾ።

አይምን አዳላሺኝ -ሀውጄም አልትቀጣው
ጤሼ ተመለጋን - የሰብ ሀይብ እኒጣው
የሰብ ሀጥም እጊጣው፤

ቡስል ቡሲ ታለ-ክዝብ ሄማት ያቅላምጣው
ሀረመት ባሽ መሰ -ተሰብ ታለህ ወጣው።

====የዳሪ ሙሰፋ

=== ጥርመቼን እነብሬን ===

አለህ ባበሀይ ዱም - ቤዘ አጥራምትቢ
ለሰብ ቦዝ አይትሚኝ-ሼጣን አይጊብትቢ
ሸር፣ ሹፍራ ሹፍሮ - ቆንጦ አይሪብትቢ።

የጌሰይ ንባረት - ሀውጄን ያቤዙያን
ለሰብ የትሜኑዪ- በገግን ያንዙያን።

ዱሚ አፈረይኮ-ያቡይ ግዝ ያበቅላን
አረም የዘረቢ - አረመም እነቅላን።

ጌስ ያውጄን ተሜኛት-ሴስት የጌስን ኒየ
ጥርመቼን እነብሬን - ሀሳብን ዱንየ።

የሰብ ጥርመቼከ - ላቶረረ በልቀር
ተሜኛት በዛሂር - ምጦትከ እለቀር።

ያንዙያነይ አለም- ጥርመቼን ያለቀይ
ቤዘ ቤዛይ ተሚኝ - ኒያህ አታጥቀይ።

✍️የዳሪ ሙሰፋ

=== ሰብ አለ ===

ቦደቅኩ ለልነቃው - ሰበ ተልቴሀምኩ
ሰብ ለሰብ ደውነተ - ሁኖተክ አመንኩ።

ሀድ ሰብ ቢቦዥም - ሀድ ሰብ እቤዣን
ወክት የጣለ ወክተ-የታቼናይ ያንዣን።

ቦዝ ቦዘይ አቲንዞ-ሰብ ኤለ አትበሉ
ሰብነት የገባይሙ - በጉት ጉት አሉ።

አለ የሰብ ሙለ - አለ የሰብ ጎፈ
ቢክል ዋ በስረይም-ዠሬ እለጠፈ።

ሰብም ሰብ እጢላን-ሰብም ሰብ እነቅላን
ደረቲ ያቴንጫን- ደረቲ ያጠቅላን።

ሰብ ለሰብ ህንጭናን-ሰብ ለሰብ ደውነትን
ቦዝ ሁኖት ቦዝነትን - ፈይነት ፈይነትን
…………………ሁልምከ ሰብነትን።

ቦዝ የጥፈፈ እለሊ -ሰብነት ያትቃጥቡያን
የቦዘይ ህንጭነ - በፈያይ ያጥቡያን።

=== የዳሪ ሙሰፋ

♦♦ ያሳር ዋንጫ ♦♦
=======

የናት ድርሻ - ይህ ሆኖባት
ሰማይ ቀርቦ - ቀን መሽቶባት
ክብሯን ገፎ - ጊዜ ጥሏት
ፅዋ ልትቀምስ - ከጠኔው ቋት
ያሳር ዋንጫ - ሸክም ሰጣት
======== ♦
በሞት ሽረት - በምጥ ስቃይ
ያለ ዳባሽ - ያለ አይዞሽ ባይ
አጋዥ አልባ - ከትቢያው ላይ
ውድ አብራኳን-ተገላግላው ባደባባይ
ሁሉን ችላ - በፈገግታው ነገን ልታይ ።
======== ♦
አለም ጠቦ - ችግር ከቦሽ
ማኖር ስትችይ - መኖር ትተሽ
የትም ብትሆኝ - እማይከብድሽ
ልክ የሌለው - ጥበብ ኣለሽ
የምታልፊው - እናት ሁነሽ
ጎጆ አጥተሽ -ሃሩር ብርዱ ያላስቆመሽ
እናት አለም- ለካ ላንቺ ልጅ ነው ቤትሽ፣
ሁሉን ማያ - መስታወትሽ ።
====//====
ከመርጀን ኑረዲን የተወሰደ