Media Sunda Mangle

Frida Nursanti

DESAINER TI TATAR SUNDA
NGALANGLANG MANCANAGARA

Boga élmu pangaweruh, kamampuh jeung kaludeung, desainer batik teureuh Sunda Frida Nursanti kiwari beuki kasohor. Lain ukur di nusantara, tapi ogé di mancanagara. Saperti nu anyar-anyar ieu, karya koléksi batik brand Frida Aulia Indonesia, matak ngirut bangsa deungeun saperti warga Amerika jeung Australia.

***

Miang ka jauhna, saperti sering diangkir dina kagiatan fashion show kelas dunya, nurutkeun Frida Nursanti, lain lantung tambuh laku, lain lunta tanpa seja. Da, kagiatanana téh, lian ti némbongkeun kapunjulan raksukan bangsa Indonesia, ogé ngawanohkeun produk busana batik has bangsa urang, hususna Jawa Barat.
"Alhamdulillah, waktos ngiringan New York Indonesia Fashion Week atanapi NYIFW 2023 di Amerika, seueur nu katajieun pisan kana batik wastra Nusantara, hususna hasil desain brand Frida Aulia Indonesia. Kitu deui dina paméran sareng fashion show di Melbourne, Australia, seueur nu kabitaeun kacida kana motif batik sareng craft has Bogor Jawa Barat téh. Ieu buktos, kabeungharan poténsi bangsa di pasar dunia, kacida saé," ceuk Téh Frida mimiti nepikeun obrolanana disela-sela kasibukanana di Australia ngaliwatan média sosial WhatsApp.
Beuki loba kagiatan di nagri batur, pangalaman ogé beuki nambahan, nu saterusna mah pasar usaha batikna ogé beuki ngalegaan. Tah, nu kaalaman ku ieu alumni SMP jeung SMA Pasundan 1 Bandung ogé kitu. "Margi ti aalit ogé cita-cita mah hoyong janten guru, atuh pami ka luar negeri ogé sakantenan sok bari ngawulang ogé. Sapertos waktos ka Amerika ngiring ngadugikeun ka mahasiswa Fashion Institute of Technology kumaha cara ngadamel batik angklung sareng mekarkeun batik nu saé motifna sareng nu pikabitaeun," pokna deui.
Loba kasempetan kawas kitu, ceuk ieu alumni Magister IPB deui, teu weléh muji sukur ka Gusti. Kituna téh lantaran salaku desainer, dirina gé boga karep geusan mekarkeun kaunggulan poténsi lemburna ka mancanagara, sapertina waé ka Rusia, Brunai Darusalam, Amerika, Australia jeung nagara-nagara lianna.
Kitu deui bisa mintonkeun has batik Nusantara hususna batik has tatar Sunda di saperti di Philadelphia, desainer Frida ogé teu ngarasa leutik haté. Malah nu aya, beuki ngarasa ludeung, da ahirna bisa aub jeung desainer kawéntar lianna, saperti Troy Anthony (Amerika), Natasha Khan (Pakistan) ogé Dr. Rosa Rumaseuw, Theodora Matrutty, Stephanie Zhang, ogé Zuebarqa by Benz.
"Di Amerika, alhamdulillah karya batik koléksi Neng Geulis pada mikareueus. Harita nampilkeun motif angklung, lawang salapan endah, mulyaharja, sempur nu diadumaniskeun sareng kaén tenun, lurik sareng perca ti Bogor Barat. Kitu deui di Australia nyandak téma buricak burinong, nu kantenan nu hadir di Argyle Square Melbourne ogé katajieun pisan," ceuk ieu garwa Zakaria, nu nepi ka kiwari geus ngahasilkeun 46 motif batik nusantara nu ogé ngandung carita séwang-séwangan.
Frida Aulia mémang geus sababaraha kali miluan Fashion Show, di antarana: Gold Coast Fashion Week, Ajang Fashion Internasional di Gold Coast Australia & Sustainable Fashion &Wellbeing Marker KIRRA HILL Méi 2023, Festival Indonesia Moscow 2017-2019, Fashion Show Tunggal di Brunei Darusalam. Kitu deui, sering diangkir dina kagiatan penting keur ngawanohkeun batik kajayaan nusantara, saperti dina balapan MotoGP di Sirkuit Mandalika - Lombok.
"Kantenan nu langkung utamina mah, batik Bogor sareng Indonesia tiasa ngadunya, sareng UMKM tiasa majeng. Numawi kitu, tarékahna kaunggulan batik kedah diwanohkeun ka sadayana, kalebet ka pasar internasional. Saperts di Australia, alhamdulillah nyandak hasil nu nyugemakeun. Atuh bonusna mah, waktos paméran ogé, produk batik Frida Aulia kaical sadayana," pokna deui.
Sangkan batik mawa daya tarik atawa pikabitaeun, mémang perelu ayana inovasi, nu di antarana nu mampuh ngagambarkeun has bangsa Indonesia. Tah, palebah dieu, Téh Frida ogé ngawanohkeun Batik Peta Indonesia jeung Batik Peta Dunia. Tinimbanganana, batik peta Indonesia téh, jinek mangrupa gambaran kaéndahan gugusan pulo sarta rupa-rupa ragam budaya di Indonesia, nu ahirna bisa ngahiji sastra nusantara.
“Simabdi ogé ngadamel Peta Indonesia dina salembar batik, nu dilebetna aya rupi-rupi motip ikon has Kota Bogor, nu mémang janten has design Batik Neng Geulis by Frid Aulia Indonesia,” ceuk Frida tandes bari nambahkeun, yén batik peta Indonesiana diwarnaan sogan, hideung semu coklat nu dijerona dibéré motip Kebun Raya Bogor jeung motip Lawang Salapan nu jadi ikon Kota Bogor.

Nété Tarajé Nincak Hambalan

Upama Téh Frida nu dumukna di Perumahan Bogor Baru Taman, Jalan Cimandiri Blok A3 No. 5 Bogor kiwari bisa suksés, singhoréng mimitina mah henteu lungsur langsar. Komo deui nu ngaranna usaha mah, apan maju atawa turun oge geus ilahar pisan. Ngan nyakitu, keur Téh Ida mah, dina kaayaan usaha ceuk paribasa ngalaman 'dihandap' teu jadi matak leutik haté, malah jadi pamecut sangkan dina saban waktu bisa ngahudang sumanget keur leuwih maju.
Tah, dina nataras usaha Téh Frida ogé, kasebutna nété tarajé nicak hambalan. Hartina, teu ujug-ujug. Malah, harita mah, teu ieuh kapikir bakal kasebut jadi 'fashion designer' atawa bisa makalangan ka mancangara. Lantaran, ieu wanoja anu lahir di Bandung 26 Maret 1977, harita mah ukur jadi supplier hijab kalawan barangna mah nu batur. Ngan sangkan beuki laku, mangka lila-lila beuki kapikir, kudu aya ciri hasna. Ahirna Téh Ida ogé jadi muka produk sorangan, kalawan ti waktu ka waktu beuki aya pupurieunana.
Jinekna, diresmikeun 'FridAulia' nu diadegkeun 3 Januari 2014. Atuh ti waktu ka waktu usahana beuki mekar jeung ngalegaan, kalawan jadi laluasa ngadesign sorangan sarta dilengkepan ku muka sababaraha outlét butikna Neng Geulis di Bogor jeung di tempat lianna.
Beuki lila beuki maju, atuh Téh Frida beuki loba préstasi jeung pangajén. Sapertina waé tina kagiatan Fashion Show & Fashion Display (2017-2021), Discovery Indonesia Fashion Show KJRI Istanbul Turki 2021, Festival Indonesia-Moscow Rusia (2017-2019), Mumbai Expo (2017), Remarkable Indonesian Brunei Darussalam 2019 jeung 2020 sarta The Best Mentoring Group Mentoring Leader DPP HA IPB (2021).
Kamekaran dunya bisnis ‘fashion’ mémang moal aya tiisna. Malah dina ganti poé, sok aya waé busana-busana anyar nu diembarkeun ka pasar atawa ka masarakat.
Salaku wanoja nu mémang deuih tigin dina pasipatan soméah tur teu weléh napel adat katimuran, tangtu dina dunya raksukan ogé, ceuk Frida, lain waé sual mampuh miluan ‘fashion’ nu keur usumna, tapi ogé sual milih raksukan nu ramah, élegan, ogé bener-bener luyu jeung nu dipikabutuhna. Lantaran kitu, neueul kana poténsi di Tatar Sunda Jawa Barat ogé, hususna Bandung, sakitu kawéntarna ku jujuluk ‘Kota Sejuta Mode’, malahan kaasup Kiblat Fashion Indonesia. Margi kitu, dina harepan ieu wanoja Sunda ogé, karya-karyana bisa leuwih dipakaresep ku urang mancanagara.
Kiwari, ieu ibu ti dua putra Dafa jeung Diza, mekarkeun usaha batik kalawan bari masarkeun ka jauhna, harepan jauhna mah, geusan miara jeung ngamumulé kareueus produk asli bangsa, hususna produk batik. "Mudah-mudahan sabada miéling hari batik nasional, rayat langkung ngamumulé produk budaya batik, ngaranggo batik sareng tiasa numuwuhkeun pangrajin batik sareng ningkatkeun ékonomina," ceuk Frida Nursanti nutup obrolanana.*** (RH)