Vuê o fevelin di

Daspò misdì 15.15

LUNIS AI 11 DI AVRÎL Operadôrs sanitaris, vigjii dal fûc e fuarcis dal ordin a saran impegnâts par garantî la sigurece dai citadins ancje in ocasion de Pasche e dal lunis di Pasche. Bisugne fâ atenzion ai incendis. Intes setemanis passadis, di fat, i pompîrs a son stâts impegnâts intune schirie di intervents par parâ une vore di fûcs, cualchidun ancje dolôs, in tantis bandis dal Friûl. La dì di Pasche, o vin ancje di stâ atents a non mangjâ a panze plene e a no bevi masse.



MARTARS AI 12 DI AVRÎL Bisugne stâ atents a lis trufis, ancje a Pasche. Raimondo Englaro, president dal Moviment difese dal citadin dal Friûl-Vignesie Julie, nus spieghe che al è necessari fâ atenzion cuant che o comprìn un ûf di Pasche e in particolâr o vin di stâ atents ae cualitât de cjocolate ma ancje a lis sorpresis, che a puedin deventâ un pericul pai plui piçui.



MIERCUS AI 13 DI AVRÎL Daspò doi agns di pandemie, la associazion culturâl "Un grup di Amîs" e presente la edizion 2022 de sacre rapresentazion de "Passion di Crist", un event une vore preseât inte nestre regjon. L'apontament al è par vinars sant, ai 15 di Avrîl, a lis 9 sot sere, su lis culinis di Cicunins di Feagne.



JOIBE AI 14 DI AVRÎL Dal ulîf passant pes ortensiis, bielononis, lis rosis dal pierçolâr, cussì delicadis, i sclopons, o rosis di cûr, e nol pues mancjâ il sclopit. La simbologjie des plantis e des jerbis tal periodi di Pasche: significâts, riflessions e liendis leadis al mont vegjetâl.



VINARS AI 15 DI AVRÎL La vuere in Ucraine, lis tantis dificoltâts leadis ae pandemie, i problemis, tancj, de nestre societât, cence dismenteâ la puaretât di tantis fameis, ancje inte nestre regjon. Adun cun pre Alessio Geretti, predi de diocesi di Udin e preseât curadôr des mostris di Dieç e di Cjase Cavazzini, o fasìn une riflession sul significât plui profont de Pasche 2022.

PROGRAMS PAR FURLAN – h 11.09





LUNIS AI 11 DI AVRÎL Novante vot traplants fats tal 2021, no cate ducj i problemis creâts de pandemie e un primât in Italie in rapuart ae popolazion. Al è chest il numar che al caraterize la ativitât dal Centri traplants dal Friûl Vignesie Julie logât a Udin che juste chê altre dì al à pandût la sô ativitât anuâl e dant merit par i risultât otignût, oltri che ai operadôrs dal sisteme sanitari regjonâl, al rapuart cu lis associazions che sul teritori in forme continue a lavorin par une sensibilizazions ae donazion dai orghins.



MARTARS AI 12 DI AVRÎL - Vot ricjercis da promozion dai dirits digjitâi al furlan te Ete di Mieç al profîl finanziari des impresis furlanis che a espuartin, fintremai a un teme centant di atualitât ancje se a son passâts passe cent agns: la profugance. Tal particolâr, chê dai furlans dopo la rote di Cjaurêt tra il 1917 e il 1918 che e sparniçâ cetantis fameis ator pe Italie. A son chescj cualchidun dai temis che a sot stâts frontâts di vot zovins ricercjadôrs de Universitât di Udin in gracie di ancje tantis borsis di studi metudis in pins de regjon par promovi il capitâl uman di cheste regjon. Cun lôr, i professôr dal ateneu che a an fat di referents sientifics



MIERCUS AI 13 DI AVRÎL - Seont i students, la scuele fate a distance cul computer e à funzionât sore il dut cuant che i docents a fevelin cul jutori des imagjinis e cuant che a inviavin discussions. Invezit, non lave par nuie ben – par il 43% - cuant che il professôr si meteve devant dal video a spiegâ. Se i professôrs scuasit ducj a tignivin la telecjamare vierte biel de lezion, i students lu fasevin par la metât. Cun di plui, in chel timp, lis relazions cui insegnants a son ladis piês e plui di mieç campion non si è sintût part de classe.



JOIBE AI 14 DI AVRÎL – «Vinars par il doman» o, ben, «Fridays for future», il moviment dai zovins che a intindin di pupilâ stîi di vite e di compuartament che a sein bogns di segnâ in cualchi forme positive i mudaments climatics in cors, e ispirât de ativist e zovine Greta Thunber, in Cjargne al continue a jessi une presince ative e, sore il dut propositive. A son cun di fat di cualchi zornade za fa lis manifestazion fatis in place - scuasit un siopar a pro di un mont che si puedi sostignî – par domandâ justizie sociâl e climatiche, in dì di vuê cundizions ancjemò plui necessariis cun ce che e sta passant la Europe. In cheste suaze al è stât presentât ancje un film che al conte la vite di zovins talians che si son cjapâts a pet cheste mission di cirî di mantignî la tiere vivibil par ducj e a dilunc.



VINARS AI 15 DI AVRÎL – La progjetazion tecnologjiche par la autonomie des personis disabii tai ambients dulà che a vivin, par fâ in maniere che si rivi a sta ben ducj tai puescj dulà che si vîf. Al è stât chest l'obietîf de ricercje che Mickeal Milocco Borlini al à davuelt tal Dipartiment Politecnic di Inzegnarie e Architeture de Universitât di Udin. Une vore che e je stade pussibil il gracie dal jutori de Regjon che e intint di sostignî il capitâl uman che in Friûl Vignesie Julie al puest contribuî a dâ svilup e ben stâ al teritori.

PROGRAMS PAR FURLAN h. 15.15



LUNIS AI 04 DI AVRÎL In ocasion de fieste dai arbui intes scuelis, Coldiretti e à decidût di plantâ un arbul par ogni provincie, in dut il teritori nazionâl. La iniziative, in colaborazion cun Campagna Amica, Terranostra, Coldiretti Donne Impresa e Fondazion Univerde, te provincie di Udin e je stade metude in vore tal istitût comprensîf di Tavagnà “Feruglio”.

MARTARS AI 05 DI AVRÎL Une stagjon plene di events te Risierve Regjonâl dal Lâc di Curnin, intal comun di Forgjarie. Il vie uficiâl des ativitâts al è fissât pai 24 di Avrîl cuntune cjaminade naturalistiche par scuvierzi lis floriduris de Vierte, a tacâ des orchideis. Il program de stagjon 2022 al è stât presentât intune conference stampe daspò doi agns di stop par vie de pandemie.

MIERCUS AI 06 DI AVRÎL Aquilee si prepare a dâ acet ai tancj turiscj che ogni an, vie pe biele stagjon, a visitin la citât romane. Tantis lis novitâts dal 2022 e tancj i events che a saran presentâts, tal rispiet des normis di sigurece leadis ae pandemie, che no je ancjemò finide dal dut. O fevelìn ancje di une novitât impuartante. Un imobil confiscât ae mafie, bandonât za di tancj agns, che al sarà recuperât e tornât a dâ ai citadins. Un segnâl une vore fuart di legalitât par dut il teritori regjonâl. Si trate di une proprietât, une vile cul parc, a Borc San Filìs.

JOIBE AI 07 DI AVRÎL Za di 24 agns, a Strassolt, un dai Borcs plui biei de Italie, si dan apontament, dôs voltis ad an, artiscj, artesans, esperts di plantis e decoradôrs che a rivin di dute Italie par dâ vite a une trame magjiche di storie, fantasie, creativitât e ambient naturâl. Daspò doi agns di sospension par vie de pandemie, e torne "In primavera fiori, acque e castelli", dai 8 ai 10 di Avrîl, intal Cjistiel di Strassolt Disore. Intal fin setemane de domenie Ulive, in vie dal dut ecezionâl, il cjistiel al tornarà a vierzi lis puartis al public.

VINARS AI 08 DI AVRÎL Al è dut pront par "Un fiore per la ricerca", une serade di beneficence inmaneade cul obietîf di cjapâ sù bêçs che a saran destinâts ai malâts oncologjics. L'apontament al è par sabide ai 9 di Avrîl, a tacâ des 20.00, a Dael: al è organizât des Seris Bearzot, in colaborazion cul Comitât Iniziativis Locâls di Vuanis e cun tancj ents e tantis aziendis dal teritori.

PROGRAMS PAR FURLAN – h 11.09

LUNIS AI 4 DI AVRÎL – Cemût si puedial rindi sostignibile une popolazion simpri plui vecje rispiet a une natalitât simpri plui basse? E cheste curve de societât cemût convivie cuntun lavôr che al domande di savê doprâ la tecnologjie, che al permet di lavorâ a distance in graciis di internet e po cu la realtât aumentade e chê virtuâl? Cun di plui, cemût si puedial frontâ il dirit a jessi assistûts e la consecuence di un lavôr simpri plui parziâl o no continuatîf di bande des personis che a dan assistence a anzians e malâts? Cualchi rispueste a dutis chestis domadis e rive di un grup di studiôs dal dirit de Universitât dal Friûl che, juste in chestis zornadis, al à inmaneât un apontament su chescj argoments.


MARTARS AI 5 DI AVRÎL – Agriculture e tensions internazionâls: il Nord Italie al à di inviâ une transizion agriecologjiche par aumentâ la capacitât de agriculture di resisti ai shocks internis e esternis. Sbassâ la intensitât de produzion zootecniche e aumentâ la diference tra lis culturis -par sostignî il redit agricul e chel alimentâr- e je une strade necessarie. Al è chest il contribût di ideis che lis associazions di Legambiente di Friûl-Vignesie Julie, Emilie-Romagne, Lombardie, Piemont e Venit a àn metût adun intun document condividût che a àn firmât.


MIERCUS AI 6 DI AVRÎL – Risorsis, imprescj e servizis par difindi impresis e lavoradôrs artesans: e je cheste la ricjece e la dimension strategjiche dai ents bilaterâi in di dì vuê par frontâ lis tensions internazionâls che si fasin sintî ancje su la economie dal teritori dulà che si vîf. Lu à metût a clâr in chestis zornadis l'Ebiart, l'Ent bilaterâl artesan Friûl-Vignesie Julie, che al à pensât ancje a gnûfs servizis par lâ incuintri aes situazions dulà che i operaris no rivin a jessi plui autonoms.


JOIBE AI 7 DI AVRÎL - «Profîi finanziaris de internazionalizazion des impresis dal Friûl-Vignesie Julie»: al è il teme svilupât de ricercje fate dal Dipartiment di Siencis economichis e sociâls de Universitât dal Friûl di bande di Rubina Romanello, cun responsabil sientific il professôr Josanco Floreani. Un ricercje che e à vût la poie de Regjon, motivade a sostignî lis risorsis umanis di chenti. Il lavôr al à studiât i profîi des impresis che a àn une partecipazion di Friulia, la finanziarie de Regjon.


VINARS AI 8 DI AVRÎL – Il non al stuzighe une vore: «Solâr (o ben cjast) furlan». E je une gnove imprese cooperative nassude de fusion tra la coop cerealicule Vieris di Cjasteons di Strade e la coop Morenica Cereali di Feagne, une nassude tal 1976 e chê altre tal 1974, dutis dôs part di Confcooperative F-VJ. La gnove realtât, che par talian si clame «Granaio Friulano», e movimentarà 1,2 milions di cuintâi di cereâi – tra blave, forment, vuardi –, vueli e soie, puartâts di 900 contadins socis, par un valôr di passe 24 milions. Tal patrimoni societari a son ancje 3 centris di essicazion e 6 coloniis cun 14 dipendents.

PROGRAMS PAR FURLAN h. 15.15



LUNIS AI 28 DI MARÇ L'Ecomuseu des Aghis al à fat partî une campagne a favôr dal Parc des Rosis di Dartigne. Di proprietât di Eleonora Garlant e Valentino Fabiani, il parc al à une straordenarie colezion di rosis antighis, classichis e inglesis, botanichis e rampighinis: al è un dai plui impuartants parcs amatoriâi di rosis a nivel european, visitât, intai agns, di une vore di personis di dute Italie e dal forest. I bêçs cjapâts sù cu la campagne a saran doprâts par finanziâ un percors formatîf par un zovin apassionât di botaniche. Vincjecinc agns fa, a Dartigne, Valetino al à regalât a Eleonora trente plantis di rosis par l'aniversari di matrimoni. Di 30 plantis a son deventadis 1600, intun spazi vert di cirche 9 mil metris cuadrâts.

MARTARS AI 29 DI MARÇ Officina Fratelli Seravalle al è un progjet dai fradis Alessandro e Gianpietro Serravalle. La ricercje timbriche, che e je tipiche de musiche plui sperimentâl e leade a lis avanvuardiis storichis e no dome, e ven veicolade di scanaladuris buinis di morbidî e rindi plui facile di capî, ancje par cui che nol è espert, la musiche che e ven fûr.

MIERCUS AI 30 DI MARÇ La associazion Scriptorium Foroiuliense e à fat partî cors di talian par permeti ai rifugjâts che a rivin de Ucraine e che a scjampin des zonis di vuere di ambientâsi miôr intal nestri Paîs. La associazion di San Denêl e pues contâ sul jutori di volontaris ucrains che a son a stâ in Friûl ma e cîr gnûfs volontaris par puartâ cheste iniziative ancje in altris zonis de regjon e de Italie. La associazion e je pronte, duncje, a replicâ il model ancje in altris realtâts.

JOIBE AI 31 DI MARÇ Ai 3 di Avrîl dal 1077 al è stât istituît il Stât Patriarcjâl furlan, une entitât statâl tra lis plui grandis potencis de Europe centrâl e de Italie, in chei agns. La Patrie dal Friûl al è un dai esemplis di forme di aministrazion cuntune fonde democratiche. Al è stât un dai sistemis plui evolûts in chei agns. Ce vuelial dî, in dì vuê, celebrâ ancjemò chest aniversari?

VINARS IL 01n DI AVRÎL I fonts a son di 35 mil euros. A son destinâts ai ents locâi de aree di lenghe furlane des regjons Friûl-Vignesie Julie e Venit che a vuelin valorizâ la lenghe, la storie e la culture furlane, in ocasion dai 3 di Avrîl. E sarà Vît, tal Friûl ocidentâl, a dâ acet ae Fieste de Patrie dal Friûl dal 2022: l'event che ogni an e ricuarde la date di costituzion dal Stât patriarcjâl furlan, ai 3 di Avrîl dal 1077. Ancje pe edizion numar 45, la Agjenzie Regjonâl pe Lenghe Furlane - ARLeF e à publicât un bant par sostignî lis manifestazions culturâls realizadis dai ents locâi che a insiorin il calendari colaterâl ae "Fieste". A son a disposizion 35 mil euros.

PROGRAMS PAR FURLAN – h 11.09

LUNIS AI 28 DI MARÇ – Il Banc alimentâr dal Friûl-Vignesie Julie si met in rêt cui Bancs dal rest de Europe e cun chel de Ucraine par dâ continuitât ae alimentazion dai citadins che a son restâts te sgnangassade Ucraine e a chei che a son sfolâts tai Paîs dulintor. E je la ativitât che la struture furlane e à inviât in chestis setemanis, in zonte al lavôr par garantî prodots alimentârs a chei che a àn dibisugne sul teritori regjonâl. Chel pe Ucraine, par altri, al è un impegn pensât za sul imprin par jessi puartât indevant ancje par un timp lunc.

MARTARS AI 29 MARÇ – «Incuintri al doman. Produzion agricule e mangjative. Inovazion globâl e locâl»: al è chest il teme pensât di Udin e Gurize Fieris par preparâ Agriest 2023, la grande fiere dal mont agricul dal an che al ven. Trê incuintris par un confront cun tancj di lôr su la inovazion dilunc dute la filiere e un troi che si siere doman, miercus ai 30 di Març, da lis dôs e mieze, in presince in Fiere ma ancje vie web, sul teme: «Ricercje, mangjative e agriculture».


MIERCUS AI 30 MARÇ – Il restaur tant che ocasion par creâ lavôr e pe promozion des impresis che a lavorin cun cualitât e specializazion. Al à un aspiet sociâl e economic, in plui che chel di tignî cont il tesaur architetonic e artistic dal Friûl, il bant de Fondazione Friuli che ancje chest an al met a disposizion 600 mil euros par che sul teritori si metin a puest fabricâts e oparis impuartantis pe comunitât e che a contribuissin a rinovâ e rinfuarcî la identitât e la coesion comunitarie. Tra lis novitâts, la creazion di un archivi online par dutis lis voris bielzà puartadis a bon fin.


JOIBE 31 MARÇ - Si clame «Pachamama» e al à l'obietîf di promovi il rûl de femine te afermazion de sigurece alimentâr e il dirit a une juste alimentazion in 20 comunitâts di campagne dai Dipartiments di La Paz e Cochabamba in Bolivie. Chi la gran part de popolazion e vîf in cundizions di miserie. Si trate di un progjet seguît in Friûl dal Cevi e che cumò al ven sostignût cun ce che si rivarà a cjapâ sù cu la mostre «Terra» di Sebastiao Salgado, vierte tal cjistiel di Dartigne.


VINARS IL 1n DI AVRÎL – A son necessaris «ricercje, alfabetizazion, cussience e rêts di servizis eficientis » par frontâ tal miôr mût pussibil la endometriosi, une malatie che e cjape dentri sù par jù dal 10 al 15 par cent de popolazion feminine, in Friûl-Vignesie Julie 23 mil feminis. Cun di plui, si à di meti dentri tai Lea, ven a stâi tai Nivei di assistence di fonde, i progestinics, pal moment la uniche cure disponibile, e che e varès di jessi sore nuie. A son chescj i temis saltâts fûr te cunvigne inmaneade a Udin de Associazion Endometriosi F-VJ.

PROGRAMS PAR FURLAN h. 15.15

LUNIS 21 MARÇ Al è stât inaugurât a Osôf il percors "Anello di San Rocco", intal ambît dal progjet "Fvg in movimento 10 mila passi di salute", che al è stât promovût di bande de Regjon e realizât di Federsanità Anci Fvg in colaborazion cu la direzion centrâl salût, il Dipartiment di siencis economichis e statistichis de Universitât dal Friûl e Promoturismo Fvg. Si trate di un percors pedonâl nassût par pandi la difusion di une culture dal moviment e dal benstâ metint dongje la ativitât fisiche e la osservazion dal paisaç. Pe sielte dal percors al è stât coinvolzût ancje l'Ecomuseu, che al à descrit e documentât il segnât, adun cun l'assessorât ae sanitât dal Comun di Osôf e al personâl dal ufizi tecnic.

MARTARS 22 MARÇ Il Comun di San Michêl dal Tiliment al ricuarde la figure e la opare dal poete, scritôr e studiôs Nelso Tracanelli, nassût a San Michêl dal Tiliment intal 1934 e muart a Tisane intal 2002. Tracanelli al è stât un convint sostenidôr de necessitât di meti dongje il mandament di Puart al Friûl. Al à scrit une vore di libris e al à colaborât ativementri ae riviste La Bassa tant che president.

MIERCUS 23 MARÇ Il progjet "Canamus cm modulo", par cure de Schola aquileiensis, al viôt la prime incision integrade dai "discanti" di Cividât. Si trate di un grup di dodis polifoniis primitivis trascritis in dîs codis. Al è un corpus une vore ric. Il cd publicât de cjase editore Nota di Udin al ufrìs un librut cun notis interpretativis, une prefazion dal musicolic Franco Colussi e un saç di Alessandra Ignesti.

JOIBE 24 MARÇ A Pradaman e je une realtât, nassude di un grup di zovins, che e lavore par dâ acet e judâ i rifugjâts che rivin da lis zonis di vuere, in Ucraine. Human Advisor Project e sta lavorant ancje par costruî une scuele in Afriche. E je ative ancje une colaborazion cun Lilt Udin.

VINARS 25 MARÇ Storiis che lassin cence flât, di personis che a àn pierdût dut. A son une vore i citadins ucrains metûts in zenoglon di bande de vuere. La situazion e je dificile par ducj, ancje par lis besteutis. A son personis che scjampin de vuere adun cui cjans, gjats e altris animâi, che fasin part de famee ancje intai moments di dificoltât. Lis struturis che a dan acet ai animâi a son in delîr e tantis associazions, ancje inte nestre regjon, a si son ativadis par dâ une man.

PROGRAMS PAR FURLAN – h 11.09

LUNIS AI 21 DI MARÇ Si clame Comission Paritetiche e e je formade di 6 personalitâts: trê che lis nomene il Consei regjonâl e trê il Stât. La sô mission? Preparâ i schemis des normis di atuazion, ven a stâi documents juridics un grum ben pensâts e organizâts che, te suaze des leçs nazionâl e des regulis europeanis, a puedin meti in pratiche i aspiets dal Statût di Autonomie de Regjon restâts ancjemò dome su la cjarte. Cualis sono lis consecuencis pai citadins?

MARTARS AI 22 DI MARÇ - «Stin dongje ae Patrie»! Cun chest sproc il mensîl La Patrie dal Friûl e da apontament par vinars ai 25 di Març, a lis 20.45, alì dal Teatri San Zorç di Udin par une serade di informazion, riflession e culture ispirade al rûl di chest sfuei che di agnorums al continue a jessi un pont di riferiment par une informazion necessarie se si à voie di capî il Friûl di vuê e vê cussience di ce che al è stât. Un grum di artiscj si son dâts dongje ae redazion par cheste ocasion.

MIERCUS AI 23 DI MARÇ – Vie Ermes di Colorêt a Udin, di cualchi zornade in ca, no à dome un gnûf for dulà che si fâs un cuintâl di pan in dì, di dîs tipologjiis diferentis. E à ancje un progjet di comunitât, in graciis de cooperative Des Friûl di Mieç che, a partî di une iniziative dal 2014 dai Comuns di Merêt, Flaiban, Sedean e Basilian, e à metût in pîts dute la filiere di produzion, dal forment ae pagnoche, dant lavôr e pussibilitât di microeconomie al teritori. Cumò i citadins dal borc udinês a son deventâts socis, pûr di tornâ a vê un bon pan su la puarte di cjase.

JOIBE AI 24 DI MARÇ –Si clame «Codice Rosso»: e je la leç che dal 2019 e cjape dentri une lungje liste di situazions li che si verifiche la violence dentri des cjasis e cuintri des feminis. Cun di plui, la leç e previôt une forme plui svelte dai procediments, une volte che si à denunziât. Dut câs, lis robis no somein tant cambiadis in chescj doi agns, daûr di ce che e à sostignût la Cisl regjonâl te sô cunvigne, che e domande plui magjistrâts e plui formazion par chei che a àn di aplicâ cheste gnove leç.

VINARS AI 25 DI MARÇ –Dopo cuatri agns di ricercje tai archivis comunâi, nazionâi e di famee, Giovani Duratti al conte Antonio Feruglio: l'om, l'alpinist, l'antifassist, l'aministradôr public e l'esponent de culture citadine. Nus conte ancje il contest storic e sociâl dulà che la sô biografie si svilupe, dutun cu la storie de Societât alpine furlane, dal Friûl e de Italie in chei agns di contrast tra la associazion alpinistiche e la politiche dal Fassisim. “Montagne e politiche dal prin Nûfcent in Friûl” al è l'interessant sottitul dal libri.

PROGRAMS PAR FURLAN h. 15.15

LUNIS AI 14 DI MARÇ Rosanna Zuliani, une artiste di Strassolt, intal comun di Çarvignan, e à decidût di screâ la sô prime mostre, une esposizion di cuadris, dissens e ogjets che a contin i pinsîrs, lis emozions e la vite de artiste di Strassolt. La mostre "Ieri, oggi e domani. Emozioni di vita" e sarà ospitade intal Foladôr dal Cjistiel disot, a Strassolt, ai 4 di Mai, a lis sîs sot sere. Lis ufiertis a saran destinadis ai volontaris de associazion "Via di Natale" di Davian, che e da acet ai pazients in terapie al Cro di Davian e ai lôr parincj.

MARTARS AI 15 DI MARÇ Adun cul dotôr Maurizio Ruscio, responsabil sientific dal laboratori unic de aziende sanitarie universitarie di Triest, e al dotôr Pierlanfranco D'Agaro, responsabil dal laboratori di igjiene e sanitât publiche dal Dipartiment di medisine dai servizis de Asugi, o fevelìn dal andament de pandemie, cu la diminuzion dai infets e dai ricoverâts intai ospedâi, e di ce che o vin di spietâsi pai prossims mês. Ai 31 di Març e je fissade la scjadince dal stât di emergjence.

MIERCUS AI 16 DI MARÇ Une competizion là che i partecipants si sfidin a colps di contis curtis. Ogni mês un teme e une conte di mandâ. Une classifiche che si inzorne, tantis storiis di scrivi e di lei e une jurie tecniche, cun di plui il judizi dai letôrs. Un campion par ogni stagjon, un campion dai campions e un premi finâl. Une maniere par impegnâsi e par stiçâ la creativitât dilunc dal an e tignî vive la Ostarie di Contecurte.

JOIBE AI 17 DI MARÇ E je tacade la stagjon turistiche 2022 des Grotis di Vilegnove, un tesaur naturâl de Alte Val Tor, che, intai ultins agns, al à clamât dongje un public une vore numerôs, destinât a cressi inmò in graciis des tantis iniziativis in program pai prossims mês. Pont di fuarce di une anade che e sarà pardabon speciâl, al è il passaç dal Zîr de Italie, ai 27 di Mai. La setemane passade al è stât ancje screât il gnûf percors turistic iluminât, che al puarte fin te sale Regjine Margarite. A van indenant ancje i lavôrs pe instalazion dal gnûf implant inte gnove galarie di acès.

VINARS AI 18 DI MARÇ De art ae musiche adun cun nûf musis. TEDxUdin (acronim par Technology Entertainment Design) al riflet su la bielece. A distance di trê agns dal ultin event, si torne in presince, sabide ai 19 di Marc, a lis 15.30 daspò misdì, li dal Teatri “Giovanni da Udine”, intal cjâf lûc furlan, cuntun apontament là che il public in sale al podarà assisti ai intervents di nûf preseâts relatôrs. Leams, Identitât, Art, Cussience, Ironie, Lengaç, Musiche, Sostevivibilitât e Cognossince a saran lis nûf musis protagonistis dal event.

PROGRAMS PAR FURLAN – h 11.09

LUNIS AI 14 DI MARÇ – Firmâts acuardis tra il Carnia industrial park e i Comuns di Çurçuvint, Fôr Davôtri, Fors Disore, Paluce, Paulâr, Sudri e Trasaghis, che a previodin di slargjâ planc a planc la operativitât dal Consorzi industriâl, des zonis urbanistichis dai Comuns di Damâr, Tumieç e Vile Santine e des zonis artesanâls dai Comuns de mont. Lis aziendis di chescj puescj a podaran cussì domandâ i contribûts par gnûfs invistiments, previodûts de Regjon, cu la pussibilitât di fâ domande a tacâ di vinars stât, ai 11 di Març.

MARTARS AI 15 DI MARÇ -Motîfs pratics a rindin la ativitât dal turisim peât ae pescje specifiche e un grum diferent di chê dai agriturisims. Cumò la Regjon e à dât a cheste forme di economie une sô leç specifiche, che e je stade fate buine dal Consei regjonâl juste cualchi zornade indaûr. Par chest, Fedagripesca di Confcooperative e spere cumò che cheste ativitât e puedi vê un disvilup e ufrî gnovis oportunitâts economichis ai operadôrs de pescje dal Friûl-Vignesie Julie.


MIERCUS AI 16 DI MARÇ – Tal rapuart di Confcooperative F-VJ 2020-2021, la plui part dal timp de pandemie, a son lâts in negatîf i setôrs de culture, dal turisim, de agriculture, de pescje e de produzion e lavôr. Ben, invezit, la bancje Bcc e in positîf ancje la cooperazion sociâl e lis buteghis cooperativis. Gnûfs problemis sui belançs cu la incressite dal cost de energjie. Al tocje il miliart il valôr de produzion des aziendis che a fasin riferiment a cheste organizazion.


JOIBE AI 17 DI MARÇ – L'agroalimentâr e il post pandemie a metin su la taule plui di une riflession in Friûl-Vignesie Julie, in cont di ce che al spiete ai 26 prodots Dop e Igp. La nestre e je la setime regjon par impat economic dal setôr. Cun di fat, sul teritori si sta rinfuarcint la idee des filieris curtis, par no jessi masse debii cuant che al sucêt alc di grâf tal mont. Cun di plui, la filiere che e cree plui valôr economic pes impresis e je chê dal vin, che e à sul teritori dut ce che i covente, a diference di chê dal formadi e di chê de cjar.


VINARS AI 18 DI MARÇ - «Cu la anime in Friûl. Il cardinâl Eduardo Francisco Pironio». Al è chest il titul dal prin ritrat par talian dal gardenâl che la Glesie di Rome e à declarât juste cualchi zornade fa “servidôr di Diu”, prin pas par lâ indevant te strade de santitât. A comissionâ la opare che e je stade metude tes mans di Pape Francesc al è stât il grup di amîs che il gardenâl al veve a Percût, il paîs di dulà che so pari e sô mari a partirin pe Argjentine, dulà che lui al jere nassût, ultin di 22 fradis. Scrite di Ferruccio Tassin, cheste opare pandie bielzà aspiets che a fasevin capî une strade cussì sflandorose in vite e in muart di chest predi cussì peât al Friûl?

PROGRAMS PAR FURLAN – daspomisdì 15.15/15.30

LUNIS 07 FEBRÂR
E va indenant la rassegne culturâl "in file", inmaneade di bande de associazion culturâl I Colonos. Intal program al è ancje un event che al si clame "A ce ponti se la gnot sentinele?”. A son anciemo doi i incuintris fin ai 20 di fevrâr. Domenie ai 13 di fevrâr apontament cun la conference “Profii barbarics furlans par un’Europe che e vignarà” e domenie ai 20 di fevrâr “Patriarcje ta la fumate”, leture seniche.

MARTARS 08 FEVRÂR
La capsule dal timp, ideade di bande dal Comun di Cosean e instalade inte place dai Artiscj, a Cosean, e sarà vierte indaûr ca di cent agns. La aministrazion, inmò, e vûl realizâ ancje une meridiane che e fasarà lûs, une volte ogni an, propri li de capsule.

MIERCUS 09 FEVRÂR
Si clame YOUpalTUBO: une iniziative fate dai zovins, pai zovins: vot fantats fra i 20 e i 28 agns che a contin su YouTube lis lôr passions ai lôr coetanis, cjapantju dentri midiant di videos là che la ironie e je l’ingredient principâl. Intai mês passâts la Agjenzie Regjonâl pe Lenghe Furlane e à publicât in rêt un bant cul obietîf di cjatâ fantats che a vessin voie di contâ e di condividi i lôr interès, par furlan, ma no dome. E je nassude une piçule “scuadre” di youtubers. Un grup svariât par capacitâts linguistichis, etât, passions, lavôr e lûc di divignince (Fane, Tumieç, Ruvigne, Basilian, Udin, Riçûl, San Denêl), ma che in curt al è stât bon di creâ rubrichis divertentis par frontâ i temis plui diviers. Midiant di chest gnûf canâl YouTube i fantats a podaran informâsi e informâ, imparâ e insegnâ, cjapâ o dâ ispirazion, ognidun cul so stîl.

JOIBE 10 FEVRÂR
Adun cun Marina Brollo, che e fâs part dal grup di lavôr sul lavôr agjil, fevelin di smart woring e in particolâr di cemût che chest strument al pôl deventà motîf di inclusion ma ancje di esclusion.

VINARS 11 FEVRÂR
Il Strolic Furlan tai agns al à simpri dât atenzion a la grafiche, afidade a pitôrs tant che Ernesto Mitri, Renzo Tubaro, Fred Pittino, Emilio Caucigh; a vuê invezit grafics e ilustradôrs a son figuris professionâls autonomis, che a somein ai disegnadôrs di graphic novel e di fumets, dispès ancje autôrs dai tescj. La Societât Filologjiche Furlane e à volût dâur visibilitât cuntune mostre itinerant par cure di Gabriela Bucco e Dani Pagnucco, che e met adun lis oparis des ilustradoris e dai ilustradôrs che a àn colaborât ae redazion dal Strolic Furlan e dal Lunari pal 2022.

LUNIS AI 7 DI FEVRÂR
Ogni progjet al varà di jessi svilupât tignint iniment dôs finalitâts: fâ tornâ indaûr il procès di spopolament de mont e incressi la economie dal teritori. Cun di plui, i progjets a varan di rivuardâ la rivoluzion verde, chê digjitâl, la istruzion, ogni forme di iniziative par tignî dongje la comunitât. E po la culture, che di chestis bandis e à un valôr di identitât cetant fuart. Par Avrîl, al varà di jessi pront un catalic di progjets di puartâ in Regjon. Intant si lavore par cjapâ i bêçs dal Pnrr. Al è chest il vivôr che si respire te Valcjanâl e te Cjanâl dal Fier.

MARTARS AI 8 DI FEVRÂR
Dâ a ducj i interessâts tantis plui informazions pussibilis e po dute la professionalitât che e covente par puartâ sul teritori, par mieç di progjets interessants, i bêçs metûts a disposizion dal Pnrr, il Plan di riprese e resilience. Al è chest l'obietîf de Cooperative Cramars, che juste in chescj dîs e à inmaneât un incuintri cun ents publics e socis par capî lis necessitâts e viodi cualis che a puedin jessi lis ufiertis. La Cooperative, di fat, e à 25 agns di esperience in cont di progjets europeans.

MIERCUS AI 9 DI FEVRÂR
«Par vinci si à di convinci». Al è stât chest il sproc operatîf di Fausto Schivi, origjinari di Pontebe, inzegnîr al Politecnic di Milan, che al à puartât tai agns Sessante dal secul passât il Moviment Friûl a jessi une realtât di popul, tant che al rivà a mandâ trê di lôr in Consei regjonâl. Autonomist, europeist prin ancjemò che la Europe Unide e fos cemût che la cognossin cumò, ecologjist prin di Greta, al fasè deventâ l'ideâl de Universitât dal Friûl un progjet praticabil. Al murì ai 25 di Zenâr dal 1972.

JOIBE AI 10 DI FEVRÂR
I paîs dilunc dal Tiliment, tal mieç dal so cors, a son une vore in vuaite. No par vie che e sedi stade anunziade cualchi aluvion ma pes oparis che, propit par fâ in maniere che il flum nol vadi fûr dai siei margjins, a saressin tornadis su la croniche. Ven a stai lis cassis di espansions e lis oparis a vuâl dal puint di Pinçan. Cun di fat, si cjatin tal gnûf Plan di gjestion dal pericul aluvions fat bon de Autoritât di bacin des Alps di soreli a mont. Il Pat pe Autonomie al à domandât cont ae Regjon. Ospit: Massimo Moretuzzo, conseîr regjonâl dal Pat pe Autonomie.

VINARS AI 11 DI FEVRÂR
«Tecnichis di lavorazion des cjars». Ven a stai un cors par deventâ becjârs. E je cheste la iniziative inviade di Confcommercio Udin cul grup Federcarni Macellai e il Cefp F-VJ di Codroip. Il cors al è inviât te suaze dal progjet Pipol, che al da ai zovins e a chei che a àn di tornâ tal mont dal lavôr la pussibilitât di fâ cors une vore professionalizants e che a dan buinis pussibilitâts pal lavôr. Il cors al dure 500 oris, miezis di teorie e miezis di pratiche, in 10 becjariis.