ຂ່າວສານ ພາຍໃນ

____ພິທີສະເຫຼີມສະຫຼອງ ວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວ-_____
ພິທີສະເຫຼີມສະຫຼອງ ວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວຄົບຮອບ 69 ປີ (20 ກໍລະກົດ 1955-20 ກໍລະກົດ 2024 )ໄດ້ຈັດຂຶ້ນ ໃນວັນທີ 18 ກໍລະກົດ 2024 ໂດຍໃຫ້ກຽດເຂົ້າຮ່ວມຂອງ ທ່ານ ປອ ວິໄລວົງ ບຸດດາຄຳ ກຳມະການສູນກາງພັກ ລັດຖະມົນຕີ ກະຊວງພາຍໃນ, ທ່ານ ນ. ຄຳພູນ ແກ້ວສະຫັວນ ປະທານສະຫະພັນແມ່ຍິງ ກະຊວງພາຍໃນ, ທ່ານ ປ້າບົວຄຳ ພົມມະຈັນ ວິລະຊົນແຫ່ງຊາດ ມີ ຄະນະສະຫະພັນແມ່ຍິງກະຊວງພາຍໃນ, ຄະນະຫ້ອງການ, ສະຖາບັນ, ສູນ, ຕາງໜ້າຈາກອົງການຈັດຕັ້ງກຳມະບານ, ຊາວໜຸ່ມ ແລະ ເອື້ອຍນ້ອງສະມາຊິກ ກະຊວງພາຍໃນ ເຂົ້າຮ່ວມ.
ໃນພິທີສະເຫຼີມສະຫຼອງຄັ້ງນີ້ ໄດ້ຮັບຊົມການສະແດງສິນລະປະວັນນະຄະດີ ແລະ ຮັບຊົມການສະແດງເຄື່ອງນຸ່ງຮົ່ມ ແລະ ຊຸດຊົນເຜົ່າທີ່ເປັນເອກະລັກສະເພາະຂອງຊາດລາວເຮົາ ຂອງ 3 ອົງການຈັດຕັ້ງມະຫາຊົນ ແລະ ສະມາຊິກສະຫະພັນແມ່ຍິງກະຊວງພາຍໃນ. ໃນພິທີ ຍັງໄດ້ຮັບຟັງ ທ່ານ ປ້າບົວຄຳ ພົມມະຈັນ ວິລະຊົນແຫ່ງຊາດ ເລົ່າຄືນເຖິງມູນເຊື້ອການຕໍ່ສູ້ກູ້ຊາດ ຂອງກອງກຳລັງໄຟເພດຍິງ ໃນຂະບວນການປະຕິວັດຕໍ່ສູ້ກູ້ຊາດຂອງເອື້ອຍນ້ອງແມ່ຍິງລາວ ເຊິ່ງທ່ານໄດ້ຍົກໃຫ້ເຫັນເຖິງຄວາມອົງອາດກ້າຫານ, ນໍ້າໃຈເສຍສະຫຼະ ແລະ ຄວາມຈົ່ງຮັກພັກດີ ຕໍ່ປະເທດຊາດ ຂອງເອື້ອຍນ້ອງແມ່ຍິງລາວ.
ທ່ານ ປອ ວິໄລວົງ ບຸດດາຄຳ ກຳມະການສູນກາງພັກ ລັດຖະມົນຕີ ກະຊວງພາຍໃນ ໄດ້ກ່າວຕໍ່ພິທີວ່າ ການຈັດພິທີໃນຄັ້ງນີ້້ແມ່ນມີຄວາມໝາຍຄວາມສໍາຄັນຢ່າງຍິ່ງ ເພາະເປັນການສຶກສາອົບຮົມໃຫ້ສະມາຊິກສະຫະພັນແມ່ຍິງ ມີຄວາມຮັບຮູ້ເຂົ້າໃຈກ່ຽວກັບປະຫວັດການກໍາເນີດ, ເຕີບໃຫຍ່ຂະຫຍາຍຕົວຂອງອົງການຈັດຕັ້ງສະຫະພັນແມ່ຍິງລາວ ພ້ອມທັງປູກຈິດສໍານຶກໃນການອະນຸລັກຮັກສາ ແລະ ເສີມຂະຫຍາຍຄຸນລັກສະນະທີ່ເປັນມູນເຊື້ອຂອງແມ່ຍິງລາວ.

ຊົມເຊີຍວັນສ້າງຕັ້ງສະຫະພັນແມ່ຍິງລາວຄົບຮອບ69ປີ

............ເອກອັກຄະລັດຖະທູດແຫ່ງ ສາທາລະນະລັດ ອິນເດຍ ເຂົ້າຢ້ຽມຂໍ່ານັບ ລັດຖະມົນຕີກະຊວງພາຍໃນ...........
ທ່ານ Prashant Agrawal ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງສາທາລະນະລັດ ອິນເດຍ ປະຈໍາ ສປປ ລາວ ໄດ້ເຂົ້າຢ້ຽມຂໍ່ານັບທ່ານ ປອ ວິໄລວົງ ບຸດດາຄໍາ ລັດຖະມົນຕີກະຊວງພາຍໃນ ໃນວັນທີ 18 ກໍລະກົດ 2024 ນີ້ ທີ່ກະຊວງພາຍໃນ.
ທ່ານ ປອ ວິໄລວົງ ບຸດດາຄໍາ ລັດຖະມົນຕີກະຊວງພາຍໃນ ໄດ້ກ່າວຕ້ອນຮັບຕໍ່ການເຂົ້າຢ້ຽມຂໍ່ານັບໃນຄັ້ງນີ້ ເພື່ອເປັນການຮັດແໜ້ນຄວາມສາມັກຄີ ແລະ ສາຍພົວພັນຮ່ວມມືລະຫວ່າງສອງຊາດ ທີ່ມີມາດົນນານ, ພ້ອມທັງ ກ່າວຊົມເຊີຍຕໍ່ການຈັດຕັ້ງປະຕິບັດວຽກງານຂອງທ່ານເອກອັກຄະລັດຖະທູດໃນໄລຍະຜ່ານມາ ແລະ ຍັງໄດ້ຕີລາຄາສູງໃນການຮ່ວມມືໃນຕໍ່ໜ້າ ໃນການປະກອບສ່ວນເຂົ້າໃນການພັດທະນາປະເທດຊາດ ແລະ ປະກອບສ່ວນເຂົ້າໃນການຊຸກຍູ້ສາຍພົວພັນ ລາວ-ອິນເດີຍ ໃຫ້ນັບມື້ນັບມີການຂະຫຍາຍຕົວ. ທັງສອງຝ່າຍຍັງໄດ້ໂອ້ລົມປຶກສາຫາລື ແລກປ່ຽນຄວາມຄິດເຫັນ ແລະ ຂໍການສະໜັບສະໜຸນ ໃນດ້ານວຽກງານຕ່າງໆ ເປັນຕັ້ນ ວຽກງານການຄຸ້ມຄອງ ພະນັກງານ-ລັດຖະກອນ, ວຽກງານການຄຸ້ມຄອງພົນລະເມືອງ; ການແລກປ່ຽນບົດຮຽນ ກ່ຽວກັບ ການສ້າງ ແລະ ປັບປຸງບັນດານິຕິກໍາຕ່າງໆ; ການພັດທະນາພື້ນຖານໂຄງລ່າງວຽກງານເຕັກໂນໂລຊີ-ຂໍ້ມູນຂ່າວສານ ໂດຍສະເພາະ ແມ່ນບົດຮຽນກ່ຽວກັບການຄຸ້ມຄອງພົນລະເມືອງ ທີ່ມີຈຳນວນພົນລະເມືອງທີ່ຫຼາຍຂອງປະເທດອິນເດຍ ແລະ ການແບ່ງປັນຂໍ້ມູນຂ່າວສານ ລະຫວ່າງກັນ ກ່ຽວກັບວຽກງານ ການພັດທະນາ ແລະ ຄຸ້ມຄອງຊັບພະຍາກອນມະນຸດ; ການສະໜັບສະໜູນທາງດ້ານຍານພາຫະນະ ແລະ ອຸປະກອນໄອທີ ເພື່ອຊຸກຍູ້ ແລະ ອໍານວຍຄວາມສະດວກໃຫ້ແກ່ພະນັກງານ-ລັດຖະກອນ ທີ່ລົງເຄື່ອນໄຫວວຽກງານຕາມພາລະບົດບາດຂອງຕົນຢູ່ທ້ອງຖິ່ນ.
ໃນໂອກາດນີ້ ທ່ານເອກອັກຄະລັດຖະທູດ ໄດ້ສະແດງຄວາມຂອບໃຈເປັນຢ່າງສູງ ມາຍັງທ່ານລັດຖະມົນຕີກະຊວງພາຍໃນ ທີ່ໄດ້ໃຫ້ກຽດຕ້ອນຮັບການຢ້ຽມຂໍ່ານັບໃນຄັ້ງນີ້ ແລະ ທ່ານຍັງໄດ້ເຊື້ອເຊີນການນໍາຂັ້ນສູງຂອງກະຊວງພາຍໃນ ໄປຢ້ຽມຢາມ ແລະ ທັດສະນະສຶກສາ ກ່ຽວກັບ ວຽກງານຄຸ້ມຄອງພະນັກງານ-ລັດຖະກອນ, ວຽກງານຄຸ້ມຄອງພົນລະເມືອງ ລວມໄປເຖິງການແລກປ່ຽນບົດຮຽນໃນລະດັບຂັ້ນບໍລິຫານ ແລະ ວິຊາການ ນໍາຕື່ມ. ທ້າຍນີ້ທັງສອງຝ່າຍຍັງໄດ້ໃຫ້ຄໍາໝັ້ນສັນຍາວ່າ ຈະສືບຕໍ່ຂະຫຍາຍການພົວພັນ ແລະ ການຮ່ວມມື ໃນຂົງເຂດວຽກງານດ້ານຕ່າງໆໃຫ້ເກີດດອກອອກຜົນນັບມື້ນັບຫຼາຍຂຶ້ນ.

..........ກອງປະຊຸມເຜີຍແຜ່ກົດໝາຍວ່າດ້ວຍເອກະສານ, ຄໍາແນະນໍາກ່ຽວກັບການຈັດຕັ້ງປະຕິບັດ
ກົດໝາຍວ່າດ້ວຍເອກະສານ ແລະ ວຽກງານຄຸ້ມຄອງ-ສຳເນົາເອກະສານ..........
ໃນລະຫວ່າງວັນທີ 16-17 ກໍລະກົດ 2024 ກົມເອກະສານແຫ່ງຊາດ ກະຊວງພາຍໃນ ໂດຍສົມທົບກັບພະແນກພາຍໃນແຂວງຄໍາມ່ວນ ໄດ້ຈັດກອງປະຊຸມເຜີຍແຜ່ກົດໝາຍວ່າດ້ວຍເອກະສານ, ຄໍາແນະນໍາກ່ຽວກັບການຈັດຕັ້ງປະຕິບັດກົດໝາຍວ່າດ້ວຍເອກະສານ ແລະ ສໍາມະນາວຽກງານຄຸ້ມຄອງ-ສໍາເນົາເອກະສານຂຶ້ນ ພາຍໃຕ້ການເປັນປະທານຂອງ ທ່ານ ວົງເພັດ ຈິດປັນຍາ ຮອງເລຂາພັກແຂວງ ໂດຍມີບັນດາທ່ານຕາງໜ້າຈາກການຈັດຕັ້ງອ້ອມຂ້າງແຂວງຄໍາມ່ວນ ແລະ ຕາງໜ້າຈາກ 10 ຕົວເມືອງ ທີ່ຂື້ນກັບແຂວງຄໍາມ່ວນເຂົ້າຮ່ວມ.
ຈຸດປະສົງຂອງກອງປະຊຸມແມ່ນ ເພື່ອສ້າງຄວາມເຂັ້ມແຂງໃຫ້ແກ່ການຈັດຕັ້ງຂັ້ນສູນກາງ ແລະ ທ້ອງຖິ່ນ ໄດ້ຈັດຕັ້ງປະຕິບັດກົດໝາຍວ່າດ້ວຍເອກະສານໃຫ້ມີຄວາມເປັນເອກະພາບກັນ ແນ່ໃສ່ການຄຸ້ມຄອງລັດດ້ວຍກົດໝາຍ ປະກອບສ່ວນເຂົ້າໃນການສ້າງສາພັດທະນາປະເທດຊາດ, ຫັນວຽກງານເອກະສານເຂົ້າສູ່ລະບຽບການ ແລະ ເປັນທັນສະໄໝເທື່ອລະກ້າວ.
ໃນກອງປະຊຸມຄັ້ງນີ້, ທ່ານ ນ. ທອງຈັນ ແກ້ວແສນຫອມ ຫົວໜ້າກົມເອກະສານແຫ່ງຊາດ ກະຊວງພາຍໃນ ໄດ້ເຜີຍແຜ່ກົດໝາຍວ່າດ້ວຍເອກະສານ ສະບັບເລກທີ 69/ສພຊ, ລົງວັນທີ 20 ມີຖຸນາ 2019 ເຊິ່ງກົດໝາຍດັ່ງກ່າວປະກອບມີ 10 ພາກ, 18 ໝວດ ແລະ ມີ 100 ມາດຕາ. ໃນນັ້ນ, ທ່ານໄດ້ຍົກໃຫ້ເຫັນຄວາມໝາຍຄວາມສໍາຄັນ ແລະ ຈຸດປະສົງຂອງກົດໝາຍວ່າດ້ວຍເອກະສານ ຊຶ່ງໄດ້ກໍານົດຫຼັກການ, ລະບຽບການ ແລະ ມາດຕະການກ່ຽວກັບການສ້າງ, ການຄຸ້ມຄອງ, ການນໍາໃຊ້ ແລະ ການຕິດຕາມກວດກາວຽກງານເອກະສານ ເພື່ອເຮັດໃຫ້ການເຄື່ອນໄຫວວຽກງານດັ່ງກ່າວເປັນລະບົບ, ມີປະສິດທິພາບ, ເປັນເອກະພາບ ແລະ ທັນສະໄໝ ແນ່ໃສ່ປົກປັກຮັກສາ ແລະ ອະນຸລັກເອກະສານທີ່ມີຄຸນຄ່າທາງດ້ານປະຫວັດສາດ, ວັດທະນະທໍາ, ສັງຄົມ ແລະ ອື່ນໆ ປະກອບເປັນຂໍ້ມູນຂ່າວສານເຂົ້າໃນການສຶກສາຄົ້ນຄວ້າ ແລະ ເປັນຫຼັກຖານອ້າງອີງ. ພ້ອມດຽວກັນນັ້ນ, ທ່ານຍັງໄດ້ເຜີຍແຜ່ຄໍາແນະນໍາກ່ຽວກັບການຈັດຕັ້ງປະຕິບັດກົດໝາຍວ່າດ້ວຍເອກະສານ ສະບັບເລກທີ 02/ພນ, ລົງວັນທີ 09 ມີນາ 2021 ເພື່ອຜັນຂະຫຍາຍເນື້ອໃນບາງມາດຕາຂອງກົດໝາຍໃຫ້ລະອຽດ, ຈະແຈ້ງ ແລະ ຮັດກຸມ ແນໃສ່ຈັດຕັ້ງປະຕິບັດໃຫ້ຖືກຕ້ອງຕາມຫຼັກການ ແລະ ມີຄວາມເປັນເອກະພາບກັນໃນຂອບເຂດທົ່ວປະເທດ.
ນອກຈາກນີ້, ຜູ້ເຂົ້າຮ່ວມຍັງໄດ້ສໍາມະນາກ່ຽວກັບວຽກງານຄຸ້ມຄອງ ແລະ ສໍາເນົາເອກະສານ ເປັນຕົ້ນແມ່ນເຕັກນິກການຮ່າງເອກະສານໃຫ້ຖືກຕ້ອງຕາມອົງປະກອບ ແລະ ຮູບແບບທີ່ໄດ້ກໍານົດໄວ້ໃນກົດໝາຍ ແລະ ຄໍາແນະນໍາຈັດຕັ້ງປະຕິບັດກົດໝາຍເທື່ອລະກ້າວ, ວຽກງານຄຸ້ມຄອງເອກະສານ ແລະ ວຽກງານສໍາເນົາເອກະສານ ໂດຍໄດ້ເນັ້ນໃສ່ການທ້ອນໂຮມເອກະສານປະຫວັດສາດຂອງແຂວງ, ຂອງຊາດ ມາໄວ້ພະແນກພາຍໃນແຂວງຄໍາມ່ວນ ແລະ ເລືອກເຟັ້ນເອກະສານທີ່ມີຄຸນຄ່າຖາວອນ ແລະ ມີຄວາມໝາຍສໍາຄັນລະດັບຊາດ ເພື່ອມອບໃຫ້ກະຊວງພາຍໃນ ປົກປັກຮັກສາໄວ້ຢ່າງລວມສູນເປັນເອກະພາບ, ການຈັດລະບົບເອກະສານ, ການກໍານົດຄຸນຄ່າເອກະສານ, ການຂື້ນສະຖິຕິ, ການປົກປັກຮັກສາເອກະສານ, ການນໍາໃຊ້ເອກະສານ ແລະ ທໍາລາຍເອກະສານທີ່ໝົດຄຸນຄ່າ.
ພາບ-ຂ່າວ:ກົມເອກະສານແຫ່ງຊາດ

.....ກອງປະຊຸມໃຫ່ຍ ຄັ້ງທີ I ຂອງໜ່ວຍຊາວໜຸ່ມ ກົມຄຸ້ມຄອງຫົວໜ່ວຍວິຊາການ ແລະ ພາລະກອນ....
ກອງປະຊຸມໃຫ່ຍ ຄັ້ງທີ I ຂອງໜ່ວຍຊາວໜຸ່ມ ກົມຄຸ້ມຄອງຫົວໜ່ວຍວິຊາການ ແລະ ພາລະກອນ ກະຊວງພາຍໃນ ໄດ້ຈັດຂຶ້ນໃນຕອນບ່າຍວັນທີ 18 ກໍລະກົດ 2024 ໂດຍໃຫ້ກຽດເຂົ້າຮ່ວມ ຂອງ ສະຫາຍ ທອງສະຫວັນ ປັນຍາວິຈິດ ເລຂາໜ່ວຍພັກ ຫົວໜ້າກົມຄຸ້ມຄອງຫົວໜ່ວຍວິຊາການ ແລະ ພາລະກອນ ແລະ ສະຫາຍ ພົງຊາຕີ ເຄືອເຂົາວັນ ຮອງເລຂາ ຄະນະບໍລິຫານງານຊາວໜູ່ມ ປະຊາຊົນປະຕິວັດລາວ ກະຊວງພາຍໃນ, ມີຄະນະໜ່ວຍ, ສະມາຊິກຊາວໜຸ່ມຂອງກົມ, ຜູ້ຕ່າງໜ້າຈາກໜ້າອົງການຈັດຕັ້ງກຳມະບານ, ແມ່ຍິງ ຂອງກົມ ແລະ ບັນດາແຂກທີ່ຖືກເຊີນເຂົ້າຮ່ວມ.
ກອງປະຊຸມຄັ້ງນີ້ ຄະນະໜ່ວຍຊາວໜຸ່ມ ກົມຄຸ້ມຄອງຫົວໜ່ວຍວິຊາການ ແລະ ພາລະກອນ ໄດ້ຜ່ານບົດສຳຫຼວດການນຳພາ ຂອງຄະນະໜ່ວຍຊຸດເກົ່າ ໃນໄລຍະ 5 ປີ ຜ່ານມາ ເຊິ່ງໄດ້ຍົກໃຫ້ເຫັນເຖິງ ສະພາບການນຳພາລວມ, ຜົນງານທີ່ພົ້ນເດັ່ນ, ຂໍ້ສະດວກ ແລະ ຂໍ້ຄົງຄ້າງ ໃນການເຄື່ອນໄຫວຊີ້ນໍາ-ນຳພາໃນໄລຍະ 5 ປີຜ່ານມາ ຈາກນັ້ນ ຄະນະໜ່ວຍຊາວໜຸ່ມຊຸດເກົ່າ ກໍ່ຂື້ນກ່າວອຳລາໜ້າທີ່. ກອງປະຊຸມ ຍັງໄດ້ພ້ອມກັນຄັດເລືອກເອົາຄະນະໜ່ວຍຊາວໜຸ່ມຊຸດໃໝ່ ຂອງກົມຄຸ້ມຄອງຫົວໜ່ວຍວິຊາການ ແລະ ພາລະກອນ ຈຳນວນ 03 ສະຫາຍ ໂດຍໄດ້ເຫັນດີເປັນເອກະພາບເລືອກເອົາ ສະຫາຍ ພູວົງ ສີສົມບັດ ເປັນເລຂາໜ່ວຍ, ສະຫາຍ ວັນດີ ແກ້ວອຸດົມໄຊ ເປັນຮອງເລຂາ ທັງເປັນປະທານກວດກາ ແລະ ສະຫາຍ ນ ທິບພະພອນໄຊຍະທອງເພັດ ເປັນກໍາມະການໜ່ວຍ.
ກອງປະຊຸມ ຍັງໄດ້ຮັບຟັງການໂອ້ລົມຂອງ ສະຫາຍ ທອງສະຫັວນ ປັນຍາວິຈິດ ເລຂາໜ່ວຍພັກ ຫົວໜ້າກົມຄຸ້ມຄອງຫົວໜ່ວຍວິຊາການ ແລະ ພາລະກອນ ເຊິ່ງໄດ້ຍ້ອງຍໍຊົມເຊີຍຕໍ່ຜົນສຳເລັດໃນການປະຕິໜ້າທີ່ໃນໄລຍະຜ່ານມາ ແລະ ໄດ້ຮຽກຮ້ອງໃຫ້ຄະນະໜ່ວຍຊາວໜຸ່ມຊຸດໃໝ່ ຕ້ອງປຸກລະດົມບັນດາສະມາຊິກຊາວໜຸ່ມໃຫ້ເອົາໃຈໃສ່ເຂົ້າຮ່ວມ ຂະບວນຕ່າງໆ ທີ່ກະຊວງຈັດຂຶ້ນ, ບັນດາສະມາຊິກຊາວໜຸ່ມ ຕ້ອງໄດ້ເອົາໃຈໃສ່ເຂົ້າຮ່ວມຂະບວນການດ້ວຍຄວາມຫ້າວຫັນ ຮັກສາມູນເຊື້ອຄວາມສາມັກຄີພາຍໃນໜ່ວຍ ພ້ອມກັນປະຕິບັດໜ້າທີ່ຂອງຕົນໃຫ້ລ້ອນໜ້າທີ່.
ນອກນີ້ ສະຫາຍ ພົງຊາຕີ ເຄືອເຂົາວັນ ຮອງເລຂາຄະນະບໍລິຫານງານຊາວໜຸ່ມປະຊາຊົນປະຕິວັດລາວ ກະຊວງພາຍໃນ ຍັງໄດ້ເນັ້ນໜັກໃຫ້ສະມາຊິກຊາວໜຸ່ມຂອງກົມຄຸ້ມຄອງຫົວໜ່ວຍວິຊາການ ແລະ ພາລະກອນ ເປັນຕົ້ນແມ່ນການຄົ້ນຄວ້າ, ເຊື່ອມຊຶມກຳແໜ້ນ ແລະ ຈັດຕັ້ງປະຕິບັດກົດລະບຽບຂອງຊາວໜຸ່ມປະຊາຊົນ ປະຕິວັດລາວ ເຂົ້າສູ່ພາກປະຕິບັດຕົວຈິງຢ່າງມີປະສິດທິຜົນ; ສືບຕໍ່ຈັດຕັ້ງປະຕິບັດຂໍ້ແຂ່ງຂັນ 4 ບຸກຂອງໜ່ວຍຊາວໜຸ່ມ ໃຫ້ເປັນຂະບວນການຟົດຟື້ນ ຕາມແຜນການທີ່ໄດ້ວາງອອກ; ເອົາໃຈໃສ່ຊີ້ນໍາ-ນໍາພາ, ຕິດຕາມ, ກວດກາການປະຕິບັດພາລະບົດບາດ, ໜ້າທີ່ຄວາມຮັບຜິດຊອບຂອງຕົນ ໂດຍສະເພາະວຽກພັດທະນາກົງຈັກການຈັດຕັ້ງ ຊຶ່ງເປັນວຽກທີ່ລະອຽດອ່ອນ ແລະ ຕ້ອງໄດ້ຄົ້ນຄວ້າ ທາງດ້ານນິຕິກຳກ່ຽວຂ້ອງ ໃຫ້ເລິກເຊິ່ງເຖິງຖອງ, ເອົາໃຈໃສ່ຄົ້ນຄິດ, ໜູນໃຊ້ ແລະ ຈັດຕັ້ງປະຕິບັດເຂົ້າໃນຂະບວນການວຽກງານຕົວຈິງໃຫ້ໄດ້ດີ ແລະ ມີປະສິດທິຜົນສູງສຸດ.

ພາບ ແລະ ຂ່າວ: ວັນດີ ແກ້ວອຸດົມໄຊ
ກົມຄຸ້ມຄອງຫົວໜ່ວຍວິຊາການ ແລະ ພາລະກອນ

...............ຍົກລະດັບວຽກງານຈັດຕັ້ງ, ກໍ່ສ້າງພັກ-ພະນັກງານ ໃຫ້ ພະນັກງານຫຼັກແຫຼ່ງ ກະຊວງພາຍໃນ ຊຸດທີ IV ................
ວັນທີ 15 ກໍລະກົດ 2024 ນີ້ ກະຊວງພາຍໃນ ໄດ້ເປີດບັ້ນຝຶກອົບຮົມວຽກງານຈັດຕັ້ງ, ກໍ່ສ້າງພັກ-ພະນັກງານ ໃຫ້ ພະນັກງານຫຼັກແຫຼ່ງ ຂອງກະຊວງພາຍໃນ ຊຸດທີ IV ປີ 2024, ໂດຍການເປັນປະທານຂອງ ສະຫາຍ ນ. ລີວົງ ລາວລີ ກໍາມະການສໍາຮອງສູນກາງພັກ ຄະນະປະຈໍາພັກກະຊວງ ຮອງລັດຖະມົນຕີກະຊວງພາຍໃນ, ເຂົ້າຮ່ວມມີ ຕາງໜ້າຂາກຄະນະຈັດຕັ້ງສູນກາງພັກ ມີບັນດາສະຫາຍຄະນະພັກກະຊວງ ຄະນະຫ້ອງການ ບັນດາກົມ ສະຖາບັນ ສູນ ແລະ ມີສໍາມະນາກອນ ທີ່ເປັນສະມາຊິກພັກ-ພະນັກງານຫຼັກແຫຼ່ງຂອງກະຊວງພາຍໃນ 58 ສະຫາຍ ເຂົ້າຮ່ວມ.
ສະຫາຍ ນ. ລີວົງ ລາວລີ ກໍາມະການສໍາຮອງສູນກາງພັກ ຄະນະປະຈໍາພັກກະຊວງ ຮອງລັດຖະມົນຕີກະຊວງພາຍໃນໄດ້ມີຄໍາເຫັນໂອ້ລົມຕໍ່ນັກສໍາມະນາກອນ ວ່າ: ວຽກງານກໍ່ສ້າງພັກເປັນວຽກຍຸດທະສາດສຳຄັນຂອງພັກ ຕ້ອງໄດ້ສືບຕໍ່ນໍາເອົາບົດຮຽນທີ່ໄດ້ຝຶກອົບຮົມໃນຄັ້ງນີ້ໄປຄົ້ນຄວ້າຄືນຢ່າງເລິກເຊິ່ງ ແລະ ກໍາແໜ້ນແຕ່ລະເນື້ອໃນເພື່ອນໍາໄປຈັດຕັ້ງປະຕິບັດໃຫ້ຖືກຕ້ອງຕາມແນວທາງນະໂຍບາຍຂອງພັກ, ຍຶດໝັ້ນ ແລະ ເປັນເອກະພາບຕໍ່ແນວທາງປ່ຽນແປງໃໝ່ຂອງພັກ, ອຸດົມການຂອງພັກບົນເສັ້ນທາງກ້າວຂຶ້ນສັງຄົມນິຍົມເທື່ອລະກ້າວ, ຍົກສູງຄວາມສາມາດນຳພາ ແລະ ລັກສະນະນຳໜ້າຂອງພັກ, ເອົາໃຈໃສ່ຈັດຕັ້ງປະຕິບັດວຽກງານປ້ອງກັນພັກ-ພະນັກງານໃນໄລຍະໃໝ່ຢ່າງເຂັ້ມງວດ ຕັ້ງໜ້າຄົ້ນຄວ້າແນວທາງນະໂຍບາຍຂອງພັກກ່ຽວກັບວຽກງານປ້ອງກັນພັກໃຫ້ເລິກເຊິ່ງ ປັບປຸງທັດສະນະຫຼັກໝັ້ນທາງດ້ານການເມືອງ ແນວຄິດ ຈຳແນກມິດ-ສັດຕູໃຫ້ຈະແຈ້ງ, ຍົກສູງສະຕິພັກ ສະຕິຊາດ ປົກປັກຮັກສາຄວາມລັບຂອງພັກ ຂອງຊາດ ຢ່າງເຂັ້ມງວດ, ຍົກສູງຄຸນນະພາບການນຳພາຮອບດ້ານຂອງການຈັດຕັ້ງຕົນ ເປັນຕົ້ນ: ຍົກບົດບາດເປັນແກນນໍາທາງດ້ານການເມືອງ, ບົດບາດນຳພາການເຄື່ອນໄຫວກໍ່ສ້າງພາຍໃນພັກ, ຕັ້ງໜ້າກໍ່ສ້າງໜ່ວຍພັກໃຫ້ປອດໃສ, ເຂັ້ມແຂງ, ໜັກແໜ້ນທາງດ້ານການເມືອງ, ແນວຄິດ, ການຈັດຕັ້ງ ແລະ ແບບແຜນນຳພາ, ປັບປຸງວິທີນຳພາຂອງໜ່ວຍພັກ, ສ້າງສະມາຊິກພັກໃຫ້ຖືກຕ້ອງ ແລະ ມີການປ່ຽນແປງເຂົ້າສູ່ຄຸນນະພາບໃໝ່ຢ່າງຈະແຈ້ງ ພ້ອມທັງເພີ່ມທະວີການກວດກາຕີລາຄາແບ່ງປະເພດຄຸນນະພາບການຈັດຕັ້ງຮາກຖານພັກ ແລະ ສະມາຊິກພັກໃຫ້ເປັນປົກກະຕິ ເພື່ອຮັບປະກັນໃຫ້ແກ່ການຄົງຕົວ ແລະ ການຂະຫຍາຍຕົວຂອງພັກ, ເຮັດໃຫ້ພັກມີຄວາມປອດໃສ, ເຂັ້ມແຂງ ແລະ ໜັກແໜ້ນ, ເອົາໃຈໃສ່ການຄຸ້ມຄອງ, ບໍາລຸງກໍ່ສ້າງພະນັກງານດ້ານຕ່າງໆ ເພື່ອສາມາດກຳໄດ້ທາງດ້ານຈຳນວນ, ຊີວະປະຫວັດ ແລະ ການເຄື່ອນໄຫວຂອງພະນັກງານ ພ້ອມທັງຕີລາຄາປະເມີນຜົນ ແລະ ສ້າງແຜນກຳນົດພະນັກງານ ເພື່ອເປັນບ່ອນອີງໃນການແຕ່ງຕັ້ງ, ຍົກຍ້າຍ, ສັບປ່ຽນໜ້າທີ່, ນຳໃຊ້ການເລື່ອນຊັ້ນຂອງພະນັກງານ ຢູ່ໃນແຕ່ລະຂົງເຂດຢ່າງເໜາະສົມ, ປະຕິບັດຕາມນະໂຍບາຍດ້ານຕ່າງໆ ທີ່ພະນັກງານ-ລັດຖະກອນໃຫ້ຖືກຕ້ອງຕາມລະບຽບການວາງອອກ.
ຊຸດຝຶກອົບຮົມຄັ້ງນີ້ຈະດໍາເນີນເປັນເວລາ 10 ວັນວມມ ສໍາມະນາກອນ ຈະໄດ້ຄົ້ນຄວ້າເອກະສານຕ່າງໆ ປະກອບມີ: ທັດສະນະຂອງພັກປະຊາຊົນປະຕິວັດລາວ ກ່ຽວກັບວຽກງານກໍ່ສ້າງພັກ, ລະບົບການເມືອງຂອງ ສປປ ລາວ ໃນເງື່ອນໄຂໃໝ່, ຍົກສູງຄຸນນະພາບການຈັດຕັ້ງຮາກຖານພັກ, ຍົກສູງຄຸນນະພາບການຄຸ້ມຄອງສະມາຊິກພັກ, ຍົກສູງຄຸນນະພາບ ສ/ຊ ພັກ ແລະ ວຽກງານຂະຫຍາຍພັກ, ວຽກງານປ້ອງກັນພັກ-ພະນັກງານໃນໄລຍະໃໝ່, ແບບແຜນການນໍາພາ ແລະ ຫຼັກການລວມສູນປະຊາທິປະໄຕຂອງພັກ, ການດຳເນີນຊີວິດໜ່ວຍພັກ, ທັດສະນະຂອງພັກຕໍ່ພະນັກງານ ແລະ ວຽກງານພະນັກງານ, ວຽກງານຄຸ້ມຄອງພະນັກງານ, ວຽກງານສ້າງແຜນກຳນົດພະນັກງານນໍາ-ຄຸ້ມຄອງ, ການສ້າງມາດຕະຖານພະນັກງານ, ການສ້າງແຜນກໍ່ສ້າງ-ບໍາລຸງພະນັກງານນໍາພາ-ຄຸ້ມຄອງ, ຄວາມຮູ້ພື້ນຖານກ່ຽວກັບທິດສະດີຈັດຕັ້ງ ແລະ ການສ້າງໂຄງຮ່າງການຈັດຕັ້ງ, ການກະກຽມ ແລະ ກຳເນີນກອງປະຊຸມໃຫຍ່, ທີ່ຕັ້ງ, ພາລະບົດບາດ, ໜ້າທີ່, ສິດ ຂອງຄະນະຈັດຕັ້ງແຕ່ລະຂັ້ນ, ຄວາມຮູ້ພື້ນຖານກ່ຽວກັບວຽກກວດກາ, ຄວາມຮູ້ພື້ນຖານວຽກງານໂຄສະນາກໍ່ສ້າງພັກ-ພະນັກງານ, ການຄົ້ນຄ້ວາ-ສັງລວມ ແລະ ການຄຸ້ມຄອງເອກະສານວຽກງານຈັດຕັ້ງ.

___ກອງປະຊຸມ ຄະນະກຳມະການຂໍ້ມູນຂ່າວສານພູມສາດຫ່ງຊາດ ເພື່ອສືບຕໍ່ປຶກສາຫາລືກ່ຽວກັບ ຮ່າງແຜນຍຸດທະສາດ ວຽກງານໂຄງລ່າງພື້ນຖານຂໍ້ມູນຂ່າວສານພູມສາດແຫ່ງຊາດ ຂອງ ສປປ ລາວ___
ໃນວັນທີ 10 ກໍລະກົດ 2024 ຜ່ານມາ, ກະຊວງພາຍໃນ ໃນນາມປະທານ ຂອງຄະນະກໍາມະການຂໍ້ມູນຂ່າວສານພູມສາດແຫ່ງຊາດລາວ ໄດ້ຈັດຕັ້ງກອງປະຊຸມ ເພື່ອສືບຕໍ່ປຶກສາຫາລືກ່ຽວກັບ ຮ່າງແຜນຍຸດທະສາດ ວຽກງານໂຄງລ່າງພື້ນຖານຂໍ້ມູນຂ່າວສານພູມສາດແຫ່ງຊາດ ຂອງ ສປປ ລາວ ຂຶ້ນ ທີ່ເມືອງວັງວຽງ, ແຂວງວຽງຈັນ ໂດຍການເປັນປະທານຂອງທ່ານ ນາງ ລີວົງ ລາວລີ ຮອງລັດຖະມົນຕີກະຊວງພາຍໃນ ພ້ອມທັງເປັນປະທານ ກຳມະການຂໍ້ມູນຂ່າວສານພູມສາດແຫ່ງຊາດ, ມີບັນດາທ່ານໃນຄະນະຊີ້ນໍາລວມ, ຄະນະວິຊາການ, ກອງເລຂາ, ຜູ້ຕາງໜ້າຈາກອົງການກອຍກາປະຈໍາລາວ, ບັນດາທ່ານຊ່ຽວຊານຈາກສະຖາບັນຄົ້ນຄ້ວາການຕັ້ງຖິ່ນຖານຂອງມະນຸດ ສ.ເກົາຫລີ ແລະ ຜູ້ຊົງຄຸນວຸດທິ ຊຶ່ງມາຈາກ 10 ກະຊວງ 18 ພາກສ່ວນເຂົ້າຮ່ວມທັງໝົດ 38 ທ່ານ.
ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອສືບຕໍ່ລະດົມແນວຄວາມຄິດ-ຄໍາຄິດເຫັນໃສ່ສອງຮ່າງເອກະສານ ທີ່ໄດ້ນໍາສະເໜີຜ່ານໃນກອງປະຊຸມຄັ້ງທີ 1 ຂອງຄະນະດັ່ງກ່າວທີ່ໄດ້ຈັດຂຶ້ນໃນວັນທີ 25 ມິຖຸນາ 2024 ທີ່ຜ່ານມາ ຊຶ່ງລວມມີ: ຮ່າງຍຸດທະສາດວຽກງານພຶ້ນຖານໂຄງລ່າງຂໍ້ມູນຂ່າວສານພູມສາດແຫ່ງຊາດ ແລະ ຮ່າງຫລັກການຂຽນຊື່ພູມີປະເທດລົງໃນແຜນທີ່.
ໃນກອງປະຊຸມ ທ່ານ ນາງ ລີວົງ ລາວລີ ຮອງລັດຖະມົນຕີກະຊວງພາຍໃນ ປະທານກອງປະຊຸມໄດ້ຍົກໃຫ້ເຫັນເຖິງຄວາມສໍາຄັນຂອງແຜນຍຸດທະສາດວຽກງານຂໍ້ມູນຂ່າວສານພູມສາດແຫ່ງຊາດ ຊຶ່ງຈະກາຍເປັນບ່ອນອີງອັນສໍາຄັນໃນການເຄື່ອນໄຫວວຽກງານຂອງຂະແໜງການ ເພື່ອຫລີກລ່ຽງການສ້າງຂໍ້ມູນທີ່ຊໍ້າຊ້ອນກັນ, ເປັນການສ້າງຂໍ້ມູນພື້ນທີ່ມີຄວາມແນ່ນອນຊັດເຈນສູງສະໜອງໃຫ້ທຸກຂະແໜງການເພື່ອເອົາໄປນໍາໃຊ້ເຂົ້າໃນການວາງແຜນ, ການຈັດຕັ້ງປະຕິບັດ, ການກວດກາ ແລະ ການປະເມີນຜົນຂອງທຸກກິດຈະກຳທັງພາກລັດ ແລະ ເອກະຊົນ. ນອກນັ້ນ, ກອງປະຊຸມໄດ້ພ້ອມກັນປຶກສາຫາລືກ່ຽວກັບພາລະບົດບາດ ແລະ ຄວາມຮັບຜິດຊອບຂອງຄະນະກຳມະການຂໍ້ມູນຂ່າວສານພູມສາດແຫ່ງຊາດ ຊຶ່ງລວມມີ ຄະນະຊີ້ນໍາ, ຄະນະວິຊາການ ແລະ ກອງເລຂາ ເພື່ອໃຫ້ຮັບຮູ້ ແລະ ເຂົ້າໃຈຈະແຈ້ງກ່ຽວກັບພາລະບົດບາດຂອງຕົນ ທັງນີ້ກໍເພື່ອເຮັດໃຫ້ການຈັດຕັ້ງປະຕິບັດວຽກງານຂອງແຕ່ລະຄະນະມີຄວາມໂລ່ງລ່ຽນ, ໃນຕອນທ້າຍຂອງກອງປະຊຸມ ຜູ້ເຂົ້າຮ່ວມໄດ້ລະດົມຄໍາຄິດເຫັນເພື່ອສ້າງແຜນການເຄື່ອນໄຫວຂອງຄະນະກຳມະການຂໍ້ມູນຂ່າວ ສານພູມສາດແຫ່ງຊາດໄລຍະ 6 ເດືອນທ້າຍປີ 2024 ແລະ 6 ເດືອນຕົ້ນປີ 2025 ເພື່ອເປັນບ່ອນອີງໃນການເຄື່ອນໄຫວຂອງຄະນະດັ່ງກ່າວຕື່ມອີກ.
ພາບ-ຂ່າວ:ກົມແຜນທີ່ແຫ່ງຊາດ

.........ກອງປະຊຸມວຽກງານການປົກຄອງທ້ອງຖິ່ນ ທົ່ວປະເທດ ຄັ້ງທີ I.........
ໃນວັນທີ 12 ກໍລະກົດ 2024 ກະຊວງພາຍໃນ ແລະ ຫ້ອງວ່າການສໍານັກງານນາຍົກລັດຖະມົນຕີ ໄດ້ຈັດກອງປະຊຸມວຽກງານການປົກຄອງທ້ອງຖິ່ນ ທົ່ວປະເທດ ຄັ້ງທີ I ໄລຍະ ປີ 2021-2023 ແລະ ທິດທາງ, ແຜນວຽກຈຸດສຸມຮອດປີ 2025 ທີ່ຫໍປະຊຸມແຫ່ງຊາດ, ນະຄອນຫຼວງວຽງຈັນ ພາຍໃຕ້ການເປັນປະທານ ຂອງທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ, ຜູ້ຊີ້ນໍາວຽກງານຂົງເຂດການປົກຄອງ ແລະ ວັດທະນະທໍາ-ສັງຄົມ; ມີບັນດາທ່ານ ລັດຖະມົນຕີ-ຮອງລັດຖະມົນຕີ, ເລຂາທິການສະພາແຫ່ງຊາດ, ເຈົ້າແຂວງ-ຮອງເຈົ້າແຂວງ, ຮອງເຈົ້າຄອງນະຄອນຫຼວງວຽງຈັນ, ຜູ້ຕາງໜ້າຈາກອົງການຈັດຕັ້ງພັກ-ລັດ, ຜູ້ຕາງໜ້າຈາກພະແນກພາຍໃນ, ຫ້ອງວ່າການປະຈຳແຂວງ ແລະ ນະຄອນຫຼວງວຽງຈັນ ພ້ອມດ້ວຍແຂກຖືກເຊີນ ຈາກພາກສ່ວນທີ່ກ່ຽວຂ້ອງ ເຂົ້າຮ່ວມ.
ຈຸດປະສົງກອງປະຊຸມ ແມ່ນເພື່ອພ້ອມກັນສະຫຼຸບຕີລາຄາຄືນ ສະພາບການຈັດຕັ້ງປະຕິບັດວຽກງານຂອງອົງການປົກຄອງທ້ອງຖິ່ນ ໃນໄລຍະທີ່ຜ່ານມາ ໂດຍສະເພາະ ການຈັດຕັ້ງຜັນຂະຫຍາຍແນວທາງຂອງພັກ ແລະ ນະໂຍບາຍຂອງລັດ ສູ່ວຽກງານຕົວຈິງ ຢູ່ບັນດາຮາກຖານທ້ອງຖິ່ນ ໂດຍສຸມໃສ່ຊອກໃຫ້ເຫັນດ້ານດີ ທີ່ຈະຕ້ອງໄດ້ສືບຕໍ່ຮັກສາ ແລະ ເສີມຂະຫຍາຍໃຫ້ກວ້າງອອກ, ດ້ານອ່ອນ-ຂໍ້ຄົງຄ້າງ ທີ່ຈະຕ້ອງໄດ້ສຸມໃສ່ແກ້ໄຂໃຫ້ໄດ້ ຢ່າງຈິງຈັງ.​ ພ້ອມກັນນັ້ນ ກໍ່ເພື່ອວາງທິດທາງແຜນການໃຫ້ແກ່ການພັດທະນາການປົກຄອງທ້ອງຖິ່ນໃນຊຸມປີຕໍ່ໜ້າ ໂດຍສະເພາະ ການປະຕິບັດບັນດາຄາດໝາຍໃຫຍ່ ທີ່ສູນກາງພັກໄດ້ກໍານົດໄວ້ ໃນມະຕິຂອງຄະນະບໍລິຫານງານສູນກາງພັກ ວ່າດ້ວຍສືບຕໍ່ຍູ້ແຮງການຜັນຂະຫຍາຍແນວທາງປ່ຽນແປງໃໝ່ສູ່ລວງເລິກ ສ້າງການຫັນປ່ຽນທີ່ເຂັ້ມແຂງ, ເລິກເຊິ່ງ ແລະ ຮອບດ້ານ ໃນການນໍາພາຂອງພັກ ໃຫ້ເປັນຮູບປະທໍາ, ທັງເປັນການປະກອບສ່ວນ ເຂົ້າໃນການປັບປຸງລັດຖະທໍາມະນູນ ແຫ່ງ ສປປ ລາວ ໃຫ້ສອດຄ່ອງ ແລະ ຄົບຖ້ວນສົມບູນກວ່າເກົ່າ.
ໃນກອງປະຊຸມທ່ານ ປອ ວິໄລວົງ ບຸດດາຄໍາ ລັດຖະມົນຕີກະຊວງພາຍໃນ ໄດ້ຜ່ານບົດສະຫຼຸບວຽກງານການປົກຄອງທ້ອງຖິ່ນ ທົ່ວປະເທດ ຄັ້ງທີ I ໄລຍະ ປີ 2021-2023 ແລະ ທິດທາງ, ແຜນວຽກຈຸດສຸມຮອດ ປີ 2025; ຈາກນັ້ນ ກອງປະຊຸມຍັງໄດ້ຮັບຟັງການສະເໜີບັນດາເນື້ອໃນສຳຄັນ ຈາກຜູ້ຕາງໜ້າຂະແໜງການ ຂັ້ນສູນກາງ ແລະ ທ້ອງຖິ່ນ ຈຳນວນໜຶ່ງ ເປັນຕົ້ນແມ່ນ ການຄຸ້ມຄອງບໍລິຫານລັດ ຕິດພັນການພັດທະນານະຄອນຫຼວງວຽງຈັນ ໃນໄລຍະໃໝ່ ຕາມມະຕິ 107/ກມສພ, ລົງວັນທີ 30 ເມສາ 2020; ບົດຮຽນ ແລະ ຜົນການຈັດຕັ້ງປະຕິ ບັດດຳລັດ 414/ລບ, ລົງວັນທີ 10 ທັນວາ 2019 ແລະ ວຽກງານເຂດແດນເຊື່ອມຕໍ່ ຂອງແຂວງໄຊສົມບູນ; ການກະກຽມການສ້າງຕັ້ງຕາແສງ ຂອງແຂວງສະຫວັນນະເຂດ; ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງແຂວງສາລະວັນ; ການຄຸ້ມຄອງບໍລິຫານລັດ ຂອງອົງການປົກຄອງແຂວງຫຼວງພະບາງ ຕາມພາລະບົດບາດທີ່ກໍານົດໄວ້ໃນກົດໝາຍ; ການຄຸ້ມຄອງ ແລະ ປະສານງານ ໃນເຂດເສດຖະກິດພິເສດ ສາມຫຼ່ຽມຄໍາ; ການປັບປຸງກົງຈັກການຈັດຕັ້ງ ແລະ ກໍານົດຕໍາແໜ່ງງານ ຂອງແຂວງໄຊຍະບູລີ; ພາລະບົດບາດຂອງອົງການປົກຄອງ ພາຍຫຼັງສ້າງຕັ້ງເປັນນະຄອນປາກເຊ; ການກະກຽມການສ້າງຕັ້ງເທດສະບານ ເມືອງທ່າແຂກ; ການຈັດສັນງົບປະມານ ຕິດພັນກັບການແບ່ງຂັ້ນຄຸ້ມຄອງ ຂອງຂະແໜງການເງິນ; ການແບ່ງຂັ້ນຄຸ້ມຄອງ ທີ່ຕິດພັນກັບຂະແໜງໂຍທາທິການ ແລະ ຂົນສົ່ງ ແລະ ຂະແໜງແຜນການ ແລະ ການລົງທຶນ; ການກຳນົດຊື່ເອີ້ນອົງການປົກຄອງທ້ອງຖິ່ນ ແລະ ຊື່ເອີ້ນຫົວໜ້າອົງການປົກຄອງທ້ອງຖິ່ນແຕ່ລະຂັ້ນ ຕາມທິດນຳ ທີ່ກຳນົດໃນມະຕິ ສະບັບເລກທີ 05/ຄບສພ, ລົງວັນທີ 05 ກັນຍາ 2023. ນອກຈາກນີ້, ບັນດາຜູ້ເຂົ້າຮ່ວມກອງປະຊຸມ ຍັງໄດ້ປະກອບຄໍາເຫັນ ຕໍ່ບັນດາເນື້ອໃນຫົວຂໍ້ ທີ່ໄດ້ນໍາມາສະເໜີໃນກອງປະຊຸມຄັ້ງນີ້ ຢ່າງກົງໄປກົງມາ ດ້ວຍຄວາມຮັບຜິດຊອບສູງ ເອົາຈິງເອົາຈັງ, ຊອກເຫັນບັນຫາ ແລະ ເຮັດໃຫ້ບັນຫາຕ່າງໆທີ່ຕັ້ງຂຶ້ນມານັ້ນ ໄດ້ຮັບການຄົ້ນຄວ້າຢ່າງເລິກເຊິ່ງ, ລະອຽດຖີ່ຖ້ວນ ແລະ ມີທາງອອກທີ່ເປັນຮູບປະທຳຕົວຈິງ ເພື່ອສ້າງການຫັນປ່ຽນຢ່າງແຂງແຮງ, ເລິກເຊິ່ງ, ຮອບດ້ານ ໃນວຽກງານການປົກຄອງທ້ອງຖິ່ນ ຕາມທິດທາງທີ່ກອງປະຊຸມໃຫຍ່ ຂອງພັກວາງອອກ.
ໃນໂອກາດກ່າວປິດກອງປະຊຸມ, ທ່ານ ຮອງນາຍົກລັດຖະມົນຕີ ໄດ້ມີຄຳເຫັນສັງລວມເນື້ອໃນການດຳເນີນກອງປະຊຸມຄັ້ງນີ້, ພ້ອມທັງ ສະແດງຄວາມຍ້ອງຍໍຊົມເຊີຍ, ຕີລາຄາສູງ ຕໍ່ເນື້ອໃນ ແລະ ພາກສ່ວນຮັບຜິດຊອບ ໃນການກະກຽມ ແລະ ເຂົ້າຮ່ວມກອງປະຊຸມ. ໃນຕໍ່ໜ້າ ເພື່ອສືບຕໍ່ປັບປຸງອົງການປົກຄອງທ້ອງຖິ່ນ ໃຫ້ມີຄວາມເຂັ້ມແຂງໜັກແໜ້ນ, ສອດຄ່ອງ ເໝາະສົມ ແລະ ສາມາດເຄື່ອນໄຫວປະຕິບັດໜ້າທີ່ຢ່າງມີປະສິດທິພາບ; ຮັບປະກັນໃຫ້ການຄຸ້ມຄອງລັດ, ຄຸ້ມຄອງ ແລະ ພັດທະນາ ເສດຖະກິດ-ສັງຄົມ ດຳເນີນໄປບົນພື້ນຖານລັດຖະທໍາມະນູນ, ກົດໝາຍ ແລະ ລະບຽບການ ກໍ່ຄື ກົດໝາຍວ່າດ້ວຍການປົກຄອງທ້ອງຖິ່ນ ເຮັດໃຫ້ທ້ອງຖິ່ນ ສາມາດປະຕິບັດພາລະບົດບາດ ຄຸ້ມຄອງບໍລິຫານລັດ ແລະ ແກ້ໄຂວຽກງານໃນເຂດແຄວ້ນທ້ອງຖິ່ນຕົນຢ່າງມີປະສິດທິພາບ, ມີການພັດທະນາຢ່າງຮອບດ້ານ, ມີຄວາມສະຫງົບປອດໄພ, ຊິວິດການເປັນຢູ່ຂອງປະຊາຊົນໄດ້ຮັບການປົວແປງດີຂຶ້ນເປັນກ້າວໆ, ທ່ານຮອງນາຍົກລັດຖະມົນຕີ ໄດ້ເນັ້ນໜັກໃຫ້ເອົາໃຈໃສ່ວຽກງານບາງດ້ານຕື່ມ ເປັນຕົ້ນ: 1). ການປັບປຸງການແບ່ງຂັ້ນຄຸ້ມຄອງ ເພື່ອສ້າງຄວາມເຂັ້ມແຂງຂອງລະບົບບໍລິຫານລັດໃນໄລຍະໃໝ່ ຕ້ອງໄດ້ສືບຕໍ່ປັບປຸງແກ້ໄຂ ໂດຍສະເພາະ ດ້ານວິທີການ ແລະ ມາດຕະການຈັດຕັ້ງປະຕິບັດ ມອບໃຫ້ບັນດາກະຊວງ, ອົງການຂັ້ນສູນກາງ ສົມທົບກັບຂະແໜງການຂອງຕົນ ຢູ່ຂັ້ນທ້ອງຖິ່ນ ກວດກາຄືນການແບ່ງງານ, ແບ່ງຄວາມຮັບຜິດຊອບ ແລະ ກວດກາຄືນບັນດານິຕິກໍາອັນໃດ ທີ່ບໍ່ສອດຄ່ອງໃນເງື່ອນໄຂປັດຈຸບັນ ແລະ ອັນໃດບໍ່ທັນມີ ກໍ່ຕ້ອງໄດ້ຄົ້ນຄວ້າສ້າງຂຶ້ນຕື່ມ ເພື່ອເຮັດໃຫ້ການຄຸ້ມຄອງບໍລິຫານ, ການພັດທະນາປະເທດ ດໍາເນີນໄປດ້ວຍດີ, ທົ່ວເຖິງ ແລະ ຖືກຕ້ອງ; 2). ການສ້າງຕັ້ງເທດສະບານ ຕ້ອງໄດ້ພ້ອມກັນຈັດຕັ້ງປະຕິບັດ, ບໍ່ໃຫ້ລັ່ງເລ, ສົງໃສ ແລະ ຕັ້ງບັນຫາຂຶ້ນອີກ. ພ້ອມກັນນີ້ ເພື່ອຮັບປະກັນໃຫ້ເທດສະບານ ສາມາດເຄື່ອນໄຫວວຽກງານບໍລິຫານ ແລະ ບໍລິການຕົວເມືອງ ໄດ້ຢ່າງເປັນລະບົບຄົບຊຸດ, ມີປະສິດທິພາບ, ປະສິດທິຜົນ ມີຄວາມຈໍາເປັນຕ້ອງໄດ້ມີນິຕິກໍາຮອງຮັບ ໂດຍສະເພາະ ແມ່ນວຽກງານການເງິນຂອງເທດສະບານ ເຊິ່ງກະຊວງການເງິນ ຈະຕ້ອງໄດ້ຮີບຮ້ອນຄົ້ນຄວ້າພິຈາລະນາ ເພື່ອໃຫ້ເທດສະບານ ແລະ ນະຄອນ ມີຄວາມສະດວກ, ຄ່ອງຕົວໃນການນໍາໃຊ້ງົບປະມານ ເພື່ອຊຸກຍູ້ຄວາມເປັນເຈົ້າການ ໃນການຄຸ້ມຄອງ ແລະ ຈັດຕັ້ງປະຕິບັດ ນໍາໃຊ້ງົບປະມານຢູ່ເທດສະບານ, ນະຄອນ ໃຫ້ແຕກຕ່າງຈາກເມືອງທົ່ວໄປ ແລະ ຮັບປະກັນສະຖຽນລະພາບ ດ້ານການສະໜອງງົບປະມານ ໃນທົ່ວປະເທດ; 3). ໃຫ້ກະຊວງພາຍໃນ ສົມກັບພາກສ່ວນກ່ຽວຂ້ອງ ຂັ້ນສູນກາງ ແລະ ທ້ອງຖິ່ນ ຮີບຮ້ອນຄົ້ນຄວ້າສ້າງນິຕິກໍາ ເພື່ອກະກຽມໃຫ້ແກ່ການສ້າງຕັ້ງຕາແສງ ໃຫ້ມີຄວາມສອດຄ່ອງ ແລະ ເໝາະສົມ ເປັນຕົ້ນ ດ້ານກົງຈັກການຈັດຕັ້ງ, ຂອບເຂດສິດ ແລະ ໜ້າທີ່ໃນການບໍລິຫານລັດ; ການສ້າງຕັ້ງຕາແສງ ຕ້ອງເຮັດຢ່າງມີຈຸດສຸມ, ມີແຜນການລະອຽດ ຈາກນັ້ນ ຈຶ່ງສະຫຼູບຖອດຖອນບົດຮຽນ ແລະ ຂະຫຍາຍໄປທົ່ວປະເທດ; 4). ການປົກຄອງໃນເຂດທີ່ເປັນຕົວເມືອງ ແລະ ເຂດຊົນນະບົດ ແມ່ນມີຄວາມແຕກຕ່າງກັນ ໂດຍສະເພາະ ດ້ານພາລະບົດບາດ ແລະ ໜ້າທີ່ ເຊິ່ງມີຄວາມຈໍາເປັນຢ່າງຍິ່ງ ຕ້ອງມີກົນໄກຄຸ້ມຄອງບໍລິຫານ ແລະ ມີຮູບແບບການປົກຄອງສະເພາະ ທີ່ແທດເໝາະ. ​ສະນັ້ນ, ບັນດາກະຊວງ, ອົງການທີ່ກ່ຽວຂ້ອງຂັ້ນສູນກາງ ຕ້ອງໄດ້ເອົາໃຈໃສ່ຄົ້ນຄວ້າຢ່າງລະອຽດຖີ່ຖ້ວນ ເພື່ອແນໃສ່ສ້າງໃຫ້ເຂດດັ່ງກ່າວ ກາຍເປັນຫົວຈັກ ແກ່ດຶງການພັດທະນາຂອງເຂດແຄວ້ນ ແລະ ຂອງປະເທດ ບົນພື້ນຖານຮັບປະກັນໄດ້ຄວາມສະອາດຈົບງາມ, ຄວາມສະຫງົບ ແລະ ຄວາມເປັນລະບຽບຮຽບຮ້ອຍຂອງສັງຄົມ.

ຂ່າວ: ກົມປະຊາສໍາພັນ ຫສນຍ, ພາບ: ຫ້ອງການ ກະຊວງພາຍໃນ

.........ກະຊວງພາຍໃນ ເຜີຍແຜ່ນິຕິກໍາວຽກງານບໍລິຫານ ຂອງລັດຖະບານ..........
ວັນທີ 10 ກໍລະກົດ 2024 ນີ້ ກະຊວງພາຍໃນ ໄດ້ຈັດກອງປະຊຸມເຜີຍແຜ່ບັນດານິຕິກໍາກ່ຽວກັບວຽກງານບໍລິຫານ ຂອງລັດຖະບານ, ໂດຍການເປັນປະທານຂອງທ່ານ ປອ ວິໄລວົງ ບຸດດາຄໍາ ລັດຖະມົນຕີກະຊວງພາຍໃນ, ມີຮອງລັດຖະມົນຕີ, ອາດີດຄະນະນໍາ, ພະນັກງານອາວຸໂສບໍານານ, ມີຄະນະກົມ ແລະ ພະນັງານລັດຖະກອນທີ່ສັງກັດຢູ່ບັນດາກົມ, ຫ້ອງການ, ສະຖາບັນ ແລະ ສູນ ເຂົ້າຮ່ວມ.
ທ່ານ ປອ ວິໄລວົງ ບຸດດາຄໍາ ລັດຖະມົນຕີກະຊວງພາຍໃນ ໄດ້ກ່າວຕໍ່ກອງປະຊຸມວ່າ ການຈັດກອງປະຊຸມຄັ້ງນີ້ ເພື່ອໃຫ້ພະນັກງານ-ລັດຖະກອນໄດ້ເຂົ້າໃຈກ່ຽວກັບຫຼັກການ, ລະບຽບການລວມ ແລະ ມາດຕະການໃນການຄຸ້ມຄອງ ແລະ ນໍາໃຊ້ງົບປະມານຂອງລັດ ແນໃສ່ປູກຈິດສໍານຶກໃຫ້ ຄະນະພັກ, ຄະນະນໍາ, ພະນັກງານ-ລັດຖະກອນ ກະຊວງ ໃນການປະຢັດ ແລະ ຕ້ານການຟູມເຟືອຍ; ການສ້າງແຜນງົບປະມານ ແລະ ຈັດຕັ້ງປະຕິບັດລາຍຈ່າຍງົບປະມານຂອງລັດ ເພື່ອໃຫ້ຖືກຕ້ອງ, ສະດວກ, ວ່ອງໄວ, ໂປ່ງໃສ, ສອດຄ່ອງກັບການຈັດຕັ້ງປະຕິບັດຕົວຈິງ, ສາມາດກວດສອບໄດ້, ມີປະສິດທິພາບ ແລະ ເປັນບ່ອນອີງໃນການຈັດຕັ້ງປະຕິບັດໃຫ້ເອກະພາບ ທົ່ວກະຊວງພາຍໃນ.
ຈາກນັ້ນ, ຜູ້ເຂົ້າຮ່ວມຍັງໄດ້ຮັບຟັງການເຜີຍແຜ່ຄໍາແນະນໍາ ກ່ຽວກັບການຕິດຕາມ, ຊຸກຍູ້ ແລະ ປະເມີນຜົນຈັດຕັ້ງປະຕິບັດທິດຊີ້ນໍາຂອງລັດຖະບານ ສະບັບເລກທີ 73/ຫສນຍ ລົງວັນທີ 26 ເມສາ 2024 ຈາກທ່ານ ວັນນະ ບຸບຜາ ຫົວໜ້າຫ້ອງການ ກະຊວງພາຍໃນ, ຮັບຟັງດໍາລັດວ່າດ້ວຍລົດຂອງລັດ ສະບັບເລກທີ 599/ລບ ລົງວັນທີ 9 ກັນຍາ 2021, ຂໍ້ຕົກລົງ ວ່າດ້ວຍການສະສາງລົດຂອງລັດ ສະບັບເລກທີ 169/ລບ ລົງວັນທີ 28 ທັນວາ 2023, ຄໍາແນະນໍາ ການຈັດຕັ້ງປະຕິບັດ ຂໍ້ຕົກລົງ ວ່າດ້ວຍການສະສາງລົດຂອງລັດ, ແຈ້ງການ ສະບັບເລກທີ 0589/ກງ ລົງວັນທີ 15 ກຸມພາ 2024 ຈາກທ່ານ ສົມບູນ ລັດຕະນະພອນ ຮອງຫົວໜ້າກົມຄຸ້ມຄອງຊັບສິນແຫ່ງລັດ ກະຊວງການເງິນ ແລະ ຮັບຟັງການເຜີຍແຜ່ຂໍ້ຕົກລົ ງ ວ່າດ້ວຍການນໍາໃຊ້ງົບປະມານບໍລິຫານຂອງລັດ ສະບັບເລກທີ 0200/ກງ ລົງວັນທີ 25 ມັງກອນ 2023 ຈາກ ທ່ານນາງ ທອງຈັນ ສຸລິນພູມີ ຮອງຫົວໜ້າກົມງົບປະມານແຫ່ງລັດ.

............ເອກອັກຄະລັດຖະທູດໄທ ເຂົ້າຢ້ຽມຂໍ່ານັບ ລັດຖະມົນຕີກະຊວງພາຍໃນ...........
ທ່ານນາງ ມໍລະກົດ ສີສະຫວັດດີ ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງຣາຊະອານາຈັກໄທ ປະຈໍາ ສປປ ລາວ ໄດ້ເຂົ້າຢ້ຽມຂໍ່ານັບທ່ານ ປອ ວິໄລວົງ ບຸດດາຄໍາ ລັດຖະມົນຕີກະຊວງພາຍໃນ ໃນວັນທີ 9 ກໍລະກົດ 2024 ນີ້ ທີ່ກະຊວງພາຍໃນ.
ທ່ານ ປອ ວິໄລວົງ ບຸດດາຄໍາ ລັດຖະມົນຕີກະຊວງພາຍໃນ ໄດ້ກ່າວຕ້ອນຮັບຕໍ່ການເຂົ້າຢ້ຽມຂໍ່ານັບໃນຄັ້ງນີ້ ເພາະເປັນການຮັດແໜ້ນຄວາມສາມັກຄີ ແລະ ສາຍພົວພັນຮ່ວມມືລະຫວ່າງສອງຊາດ ທີ່ມີມາດົນນານ, ພ້ອມທັງ ກ່າວຊົມເຊີຍຕໍ່ການຈັດຕັ້ງປະຕິບັດວຽກງານຂອງທ່ານເອກອັກຄະລັດຖະທູດໃນໄລຍະຜ່ານມາ ແລະ ຍັງໄດ້ຕີລາຄາສູງໃນການຮ່ວມມືໃນຕໍ່ໜ້າ ໃນການປະກອບສ່ວນເຂົ້າໃນການພັດທະນາປະເທດຊາດ ແລະ ປະກອບສ່ວນເຂົ້າໃນການຊຸກຍູ້ສາຍພົວພັນມິດຕະພາບ ລາວ-ໄທ ໃຫ້ນັບມື້ນັບມີການຂະຫຍາຍຕົວຂຶ້ນຕື່ມອີກ
ທ່ານເອກອັກຄະລັດຖະທູດ ໄດ້ສະແດງຄວາມຂອບໃຈເປັນຢ່າງສູງ ມາຍັງທ່ານລັດຖະມົນຕີກະຊວງພາຍໃນ ທີ່ໄດ້ໃຫ້ກຽດຕ້ອນຮັບການຢ້ຽມຂໍ່ານັບໃນຄັ້ງນີ້ ແລະ ຍັງໄດ້ໃຫ້ຄໍາໝັ້ນວ່າ ຈະສືບຕໍ່ຮ່ວມມື ແລະ ສົ່ງເສີມວຽກງານໃນດ້ານຕ່າງໆໃນເກີດດອກອອກຜົນ ເພື່ອນໍາເອົາຜົນປະໂຫຍດມາສູ່ປະຊາຊົນ ສອງຊາດ ລາວ-ໄທ.

____ກອງປະຊຸມໃຫຍ່ສະມາຊິກ ຄັ້ງທີ III ຂອງກໍາມະບານຮາກຖານກົມແຂ່ງຂັນ ແລະ ຍ້ອງຍໍ___
ວັນທີ 05 ກໍລະກົດ 2024 ນີ້ ກໍາມະບານຮາກຖານກົມແຂ່ງຂັນ ແລະ ຍ້ອງຍໍ ກະຊວງພາຍໃນ ໄດ້ຈັດກອງປະຊຸມໃຫຍ່ສະມາຊິກ ຄັ້ງທີ III ຂຶ້ນ ໂດຍການເປັນປະທານຮ່ວມ ຂອງ ສະຫາຍ ນິມມະວົງ ອິນທະວົງ ເລຂາໜ່ວຍພັກກົມແຂ່ງຂັນ ແລະ ຍ້ອງຍໍ, ສະຫາຍ ຕ໋ອງ ພູມມີພັນ ຄະນະພັກກະຊວງກະຊວງພາຍໃນ ຄະນະບໍລິຫານງານສະຫະພັນສູນກາງກໍາມະບານລາວ ປະທານຄະນະບໍລິຫານງານກໍາມະບານກະຊວງພາຍໃນ ແລະ ສະຫາຍ ໄຊຍະພອນ ສີຈໍາປາ ປະທານກໍາມະບານຮາກຖານກົມແຂ່ງຂັນ ແລະ ຍ້ອງຍໍ, ເຂົ້າຮ່ວມມີ ສະຫາຍ ນ ກັນຍາ ແສງແກ້ວວົງພະຈັນ ຄະນະຮັບຜິດຊອບບຸກຄະລາກອນກໍາມະບານກະຊວງ, ໜ່ວຍສະຫະພັນແມ່ຍິງ, ຊາວໜຸ່ມ ຂອງກົມແຂ່ງຂັນ ແລະ ຍ້ອງຍໍ ພ້ອມດ້ວຍສະມາຊິກກໍາມະບານຮາກຖານກົມແຂ່ງຂັນ ແລະ ຍ້ອງຍໍ ເຂົ້າຮ່ວມ.
ໃນກອງປະຊຸມສະຫາຍ ໄຊຍະພອນ ສີຈໍາປາ ປະທານກໍາມະບານຮາກຖານກົມແຂ່ງຂັນ ແລະ ຍ້ອງຍໍ ໄດ້ຜ່ານບົດລາຍງານການເມືອງ ໃນໄລຍະ 05 ປີ ຜ່ານມາ ແລະ ທິດທາງແຜນການ 05 ປີຕໍ່ໜ້າ ໂດຍໄດ້ຍົກໃຫ້ເຫັນດ້ານດີ, ດ້ານອ່ອນ ແລະ ຂໍ້ຄົງຄ້າງໃນການຈັດຕັ້ງປະຕິບັດວຽກງານກໍາມະບານ; ພ້ອມກັນນີ້ ຜູ້ແທນກອງປະຊຸມຍັງໄດ້ຮັບຟັງການຜ່ານບົດສໍາຫຼວດການນໍາພາລວມຂອງຄະນະກໍາມະບານຮາກຖານກົມແຂ່ງຂັນ ແລະ ຍ້ອງຍໍ, ຜ່ານຂໍ້ຕົກລົງ ວ່າດ້ວຍການ ບົ່ງຕົວແຕ່ງຕັ້ງຄະນະກໍາມະບານຮາກຖານກົມແຂ່ງຂັນ ແລະ ຍ້ອງຍໍ ຊຸດໃໝ່ ຈໍານວນ 03 ສະຫາຍ ຄື: ສະຫາຍ ໄຊຍະພອນ ສີຈໍາປາ ເປັນປະທານ, ສະຫາຍ ພອນທອງ ອັກຄະວົງ ເປັນຮອງປະທານ ທັງເປັນປະທານກວດກາ ແລະ ສະຫາຍ ນາງ ໄພທູນ ສີພົມພັກດີ ເປັນກໍາມະການ. ໃນກອງປະຊຸມຍັງໄດ້ປ່ອນບັດເລືອກເອົາຜູ້ແທນສົມບູນ ຈໍານວນ 06 ສະຫາຍ ແລະ ສໍາຮອງ 01 ສະຫາຍ ໄປຮ່ວມກອງປະຊຸມໃຫຍ່ ຄັ້ງທີ III ຂອງສະຫະພັນກໍາມະບານກະຊວງພາຍໃນ.
ໂອກາດນີ້ ສະຫາຍ ນິມມະວົງ ອິນທະວົງ ເລຂາໜ່ວຍພັກກົມແຂ່ງຂັນ ແລະ ຍ້ອງຍໍ ໄດ້ມີຄໍາເຫັນຕໍ່ກອງປະຊຸມ ໂດຍສະຫາຍໄດ້ສະແດງຄວາມຍ້ອງຍໍຕໍ່ຜົນງານທີ່ຍາດມາໄດ້ໃນໄລຍະ 05 ປີຜ່ານມາ ເຊິ່ງສະມາຊິກກໍາມະບານໄດ້ມີຄວາມສາມັກຄີເປັນປຶກແຜ່ນ, ມີຄວາມເສຍສະຫຼະ, ມີນໍ້າໃຈບຸກບືນຕື່ນຕົວ ແລະ ຈູບຈ້າວຫ້າວຫັນເພື່ອຜ່ານຜ່າຂໍ້ຫຍຸ້ງຍາກໃນການຈັດຕັ້ງປະຕິບັດວຽກງານ, ຄຽງຄູ່ກັບດ້ານດີ ກໍມີບາງຂໍ້ຄົງຄ້າງທີ່ບັນດາສະຫາຍຄະນະກໍາມະບານຮາກຖານ ພ້ອມດ້ວຍສະມາຊິກກໍາມະບານ ຂອງກົມແຂ່ງຂັນ ແລະ ຍ້ອງຍໍ ຈະຕ້ອງໄດ້ເອົາໃຈໃສ່ຈັດຕັ້ງປະຕິບັດ ໃນຕໍ່ໜ້າເປັນຕົ້ນແມ່ນ ການຄົ້ນຄວ້າເຊື່ອມຊຶມກໍາແໜ້ນນະໂຍບາຍ, ມະຕິ, ຄໍາສັ່ງຂອງພັກ, ກົດໝາຍຂອງລັດ ໂດຍສະເພາະແມ່ນ ກົດໝາຍວ່າດ້ວຍກໍາມະບານລາວ ແລະ ນິຕິກໍາກ່ຽວກັບວຽກງານກໍາມະບານໃຫ້ເຂົ້າໃຈເລິກເຊິ່ງເຖິງຖອງ ລວມທັງການຈັດຕັ້ງຜັນຂະຫຍາຍເນື້ອໃນຂໍ້ແຂ່ງຂັນ 05 ເປັນເຈົ້າ, ການມີສະຕິຕື່ນຕົວຕໍ່ການຈັດຕັ້ງ, ການຂົນຂວາຍເຂົ້າສູ້ຂະບວນການຕ່າງໆ ແລະ ການຈັດຕັ້ງປະຕິບັດວຽກງານວິຊາສະເພາະທີ່ຮັບຜິດຊອບໃຫ້ມີຄວາມເຂັ້ມແຂງ ແລະ ຜົນສໍາເລັດ ເປັນກ້າວໆ.
ນອກຈາກນີ້ ສະຫາຍ ຕ໋ອງ ພູມມີພັນ ຄະນະພັກກະຊວງ ປະທານຄະນະບໍລິຫານງານສະຫະພັນກໍາມະບານ ກະຊວງພາຍໃນ ໄດ້ໂອ້ລົມຕໍ່ ຄະນະກໍາມະບານຮາກຖານຊຸດໃໝ່ ຕ້ອງເອົາໃຈໃສ່ປັບປຸງແບບແຜນວິທີນໍາພາ, ນຳພາຈັດຕັ້ງປະຕິບັດລະບອບຮ່ວມຊີວິດຢ່າງປົກກະຕິໂດຍ ໃຫ້ມີເນື້ອໃນເລິກເຊິ່ງ ມີການຕຳນິກໍ່ສ້າງເຊິ່ງກັນ ແລະ ກັນ, ເສຍເງິນບໍາລຸງຢ່າງປົກກະຕິ, ຂະຫຍາຍສະມາຊິກກຳມະບານຢ່າງຕໍ່ເນື່ອງ, ເປັນຕົວແທນປົກປ້ອງສິດຜົນປະໂຫຍດ ອັນຊອບທຳຂອງສະມາຊິກກຳມະບານ, ຊຸກຍູ້ການປະຕິບັດນະໂຍບາຍ ແລະ ສະຫວັດດີການສັງຄົມຕໍ່ສະມາຊິກກຳມະບານ. ສືບຕໍ່ຈັດຕັ້ງຜັນຂະຫຍາຍເນື້ອໃນກອງປະຊຸມ ໄປຄົ້ນຄິດ, ໝູນໃຊ້ ແລະ ຈັດຕັ້ງປະຕິບັດໃນຂະບວນການວຽກງານຕົວຈິງໃຫ້ໄດ້ດີ ແລະ ມີປະສິດທິຜົນສູງ.

___ກອງປະຊຸມໃຫ່ຍ ຄັ້ງທີ III ຂອງໜ່ວຍຊາວໜຸ່ມ ກົມແຂ່ງຂັນ ແລະ ຍ້ອງຍໍ____
ກອງປະຊຸມໃຫ່ຍ ຄັ້ງທີ III ຂອງໜ່ວຍຊາວໜຸ່ມ ກົມແຂ່ງຂັນ ແລະຍ້ອງຍໍ ກະຊວງພາຍໃນ ໄດ້ຈັດຂຶ້ນໃນຕອນບ່າຍວັນທີ 4 ກໍລະກົດ 2024 ໂດຍໃຫ້ກຽດເຂົ້າຮ່ວມ ຂອງ ສະຫາຍ ນິມມະວົງ ອິນທະວົງ ເລຂາໜ່ວຍພັກ ຫົວໜ້າກົມແຂ່ງຂັນ ແລະ ຍ້ອງຍໍ ແລະ ສະຫາຍ ອາໂນລັກ ສິດທິເດດ ເລຂາຄະນະບໍລິຫານງານຊາວຫນຸ່ມປະຊາຊົນປະຕິວັດລາວ ກະຊວງພາຍໃນ, ມີຄະນະໜ່ວຍ, ສະມາຊິກຊາວໜຸ່ມຂອງກົມ, ຜູ້ຕາງໜ້າຈາກໜ້າອົງການຈັດຕັ້ງກຳມະບານ, ແມ່ຍິງ ຂອງກົມ ແລະ ບັນດາແຂກທີ່ຖືກເຊີນເຂົ້າຮ່ວມ.
ກອງປະຊຸມຄັ້ງນີ້ ຄະນະໜ່ວຍຊາວໜຸ່ມ ກົມແຂ່ງຂັນ ແລະ ຍ້ອງຍໍ ໄດ້ຜ່ານບົດສຳຫຼວດການນຳພາ ຂອງຄະນະໜ່ວຍຊຸດເກົ່າ ໃນໄລຍະ 5 ປີ ຜ່ານມາ ເຊິ່ງໄດ້ຍົກໃຫ້ເຫັນເຖິງ ສະພາບການນຳພາລວມ, ຜົນງານທີ່ພົ້ນເດັ່ນ ຂໍ້ສະດວກ ແລະ ຂໍ້ຄົງຄ້າງ ໃນການເຄື່ອນໄຫວຊີ້ນໍາ-ນຳພາໃນໄລຍະ 5 ປີຜ່ານມາ ຈາກນັ້ນ ຄະນະໜ່ວຍຊາວໜຸ່ມຊຸດເກົ່າ ກໍ່ຂຶ້ນກ່າວອຳລາໜ້າທີ່. ກອງປະຊຸມ ຍັງໄດ້ພ້ອມກັນປ່ອນບັດຄັດເລືອກເອົາຄະນະໜ່ວຍຊາວໜຸ່ມຊຸດໃໝ່ ຂອງກົມແຂ່ງຂັນ ແລະ ຍ້ອງຍໍ ຈຳນວນ 03 ສະຫາຍ ໂດຍໄດ້ເຫັນດີເປັນເອກະພາບເລືອກເອົາ ສະຫາຍ ເຊັ້ງຢ່າງ ເປັນເລຂາໜ່ວຍ, ສະຫາຍ ສາຍຄໍາ ວົງສະໝຸດ ເປັນຮອງເລຂາ ທັງເປັນປະທານກວດກາ ແລະ ສະຫາຍ ເຮືອງສີ ສໍແສງເດືອນ ເປັນກໍາມະການໜ່ວຍ.
ກອງປະຊຸມ ຍັງໄດ້ຮັບຟັງການໂອ້ລົມຂອງ ສະຫາຍ ນິມມະວົງ ອິນທະວົງ ເລຂາໜ່ວຍພັກ ຫົວໜ້າກົມແຂ່ງຂັນ ແລະ ຍ້ອງຍໍເຊິ່ງໄດ້ຍ້ອງຍໍຊົມເຊີຍຕໍ່ຜົນສຳເລັດໃນການປະຕິໜ້າທີ່ໃນໄລຍະຜ່ານມາ ແລະ ໄດ້ຮຽກຮ້ອງໃຫ້ຄະນະໜ່ວຍຊາວໜຸ່ມຊຸດໃໝ່ ຕ້ອງປຸກລະດົມບັນດາສະມາຊິກຊາວໜຸ່ມໃຫ້ເອົາໃຈໃສ່ເຂົ້າຮ່ວມ ຂະບວນຕ່າງໆທີ່ກະຊວງຈັດຂຶ້ນ, ບັນດາສະມາຊິກຊາວໜຸ່ມ ຕ້ອງໄດ້ເອົາໃຈໃສ່ເຂົ້າຮ່ວມຂະບວນການດ້ວຍຄວາມຫ້າວຫັນ ຮັກສາມູນເຊື້ອຄວາມສາມາກຄີພາຍໃນໜ່ວຍ ພ້ອມກັນປະຕິບັດໜ້າທີ່ຂອງຕົນໃຫ້ລ້ອນໜ້າທີ່.
ນອກນີ້ ສະຫາຍ ອາໂນລັກ ສິດທິເດດ ຄະນະບໍລິຫານງານຊາວໜຸ່ມປະຊາຊົນປະຕິວັດລາວ ກະຊວງພາຍໃນ ຍັງໄດ້ເນັ້ນຫນັກໃຫ້ສະມາຊິກຊາວໜຸ່ມຂອງກົມແຂ່ງຂັນຍ້ອງຍໍ ເປັນຕົ້ນແມ່ນການຄົ້ນຄວ້າ, ເຊື່ອມຊຶມກຳແໜ້ນ ແລະ ຈັດຕັ້ງປະຕິບັດກົດລະບຽບຂອງຊາວໜຸ່ມປະຊາຊົນ ປະຕິວັດລາວ ເຂົ້າສູ່ພາກປະຕິບັດຕົວຈິງຢ່າງມີປະສິດທິຜົນ; ສືບຕໍ່ຈັດຕັ້ງປະຕິບັດຂໍ້ແຂ່ງຂັນ 4 ບຸກຂອງໜ່ວຍຊາວໜຸ່ມ ໃຫ້ເປັນຂະບວນການຟົດຟື້ນຕາມ ແຜນການໄດ້ວາງອອກ; ເອົາໃຈໃສ່ຊີ້ນໍາ-ນໍາພາ, ຕິດຕາມ, ກວດກາການປະຕິບັດພາລະບົດບາດ, ໜ້າທີ່ຄວາມຮັບຜິດຊອບຂອງຕົນ ໂດຍສະເພາະວຽກພັດທະນາກົງຈັກການຈັດຕັ້ງ ຊຶ່ງເປັນວຽກທີ່ລະອຽດອ່ອນ ແລະ ຕ້ອງໄດ້ຄົ້ນຄວ້າ ທາງດ້ານນິຕິກຳກ່ຽວຂ້ອງ ໃຫ້ເລິກເຊິ່ງເຖິງຖອງ, ເອົາໃຈໃສ່ຄົ້ນຄິດ, ໜູນໃຊ້ ແລະ ຈັດຕັ້ງປະຕິບັດໃນຂະບວນການວຽກງານຕົວຈິງໃຫ້ໄດ້ດີ ແລະ ມີປະສິດທິຜົນສູງສຸດ.

___ກອງປະຊຸມເຜີຍແຜ່ເອກະສານວຽກງານການເມືອງ-ແນວຄິດ ແລະ ມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ,
ໜັກແໜ້ນ ປະຈຳປີ 2023, ມອບບັດໃຫ້ສະມາຊິກພັກສົມບູນ ຊຸດທີ VI
ທີ່ຂື້ນກັບອົງຄະນະພັກກະຊວງພາຍໃນ___
ກະຊວງພາຍໃນ ຈັດກອງປະຊຸມເຜີຍແຜ່ເອກະສານວຽກງານການເມືອງ-ແນວຄິດ ໃຫ້ ພະນັກງານ-ລັດຖະກອນ ກະຊວງພາຍໃນ ຂຶ້ນ ໃນວັນທີ 03 ກໍລະກົດ 2024 ໂດຍການເປັນປະທານ ຂອງ ສະຫາຍ ປອ ວິໄລວົງ ບຸດດາຄຳກຳມະການສູນກາງພັກ ເລຂາຄະນະພັກກະຊວງ ລັດຖະມົນຕີກະຊວງພາຍໃນ ມີ ຄະນະປະຈຳພັກ, ຄະນະພັກກະຊວງພາຍໃນ, ບັນດາເລຂາ, ຮອງເລຂາໜ່ວຍພັກ ຄະນະໜ່ວຍພັກ, ສະມາຊິກພັກ ແລະ ພະນັກງານຫຼັກແຫຼ່ງ ຂອງ ກະຊວງພາຍໃນ ເຂົ້າຮ່ວມ.
ໃນກອງປະຊຸມ ສະຫາຍ ປອ ວິໄລວົງ ບຸດດາຄຳ ກຳມະການສູນກາງພັກ ເລຂາຄະນະພັກກະຊວງ ລັດຖະມົນຕີກະຊວງພາຍໃນ ໄດ້ໃຫ້ກຽດເຜີຍແຜ່ກ່ຽວກັບຍົກສູງຄວາມສາມາດນຳພາ ແລະ ຄວາມເປັນແບບຢ່າງນຳໜ້າ ຂອງສະມາຊິກພັກ ແລະ ຮັບຟັງ ສະຫາຍ ນິສິດ ແກ້ວປັນຍາ ຮອງເລຂາຄະນະພັກກະຊວງ ຮອງລັດຖະມົນຕີກະຊວງພາຍໃນ ຂຶ້ນເຜີຍແຜ່ ກ່ຽວກັບຕັ້ງໜ້າຝຶກຝົນຫຼໍ່ຫຼອມ ຄຸນທາດການ ເມືອງ ແລະ ຄຸນສົມບັດສິນທຳປະຕິວັດ, ເດັດດ່ຽວແກ້ໄຂປະກົດການຫຍໍ້ທໍ້ ໃນຖັນແຖວພະນັກງານ, ສະມາຊິກພັກ. ຈາກນັ້ນ ສະຫາຍ ນ. ລີວົງ ລາວລີ ກຳມະການສຳຮອງສູນກາງພັກ ຮອງລັດຖະມົນຕີ ກະຊວງພາຍໃນ ໄດ້ຂຶ້ນຜ່ານແຜນການກະກຽມດຳເນີນກອງປະຊຸມໃຫ່ຍຜູ້ແທນຄັ້ງທີ III ຂອງອົງຄະນະພັກກະຊວງພາຍໃນ ສະບັບເລກທີ 01/ຄພພນ, ລົງວັນທີ 17 ມັງກອນ 2024 ແລະ ຜ່ານຄຳແນະນຳການກະກຽມ ແລະ ດຳເນີນກອງປະຊຸມໃຫ່ຍໜ່ວຍພັກ.
ໃນຕອນບ່າຍຂອງວັນດຽວກັນ ກໍ່ໄດ້ມີພິທີມອບ-ຮັບໃບມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2023 ແລະ ມອບບັດໃຫ້ສະມາຊິກພັກສົມບູນ ຊຸດທີ VI ທີ່ຂື້ນກັບອົງຄະນະພັກກະຊວງພາຍໃນ, ໂດຍໃຫ້ກຽດມອບໂດຍ ສະຫາຍ ປອ ວິໄລວົງ ບຸດດາຄຳ ກຳມະການສູນກາງພັກ ເລຂາຄະນະພັກກະຊວງ ລັດຖະມົນຕີກະຊວງພາຍໃນ , ເຊິ່ງມີ 14 ໜ່ວຍພັກ ທີ່ໄດ້ຮັບຮອງເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2023 ແລະ ມີ ສະມາຊິກພັກສົມບູນ ຈຳນວນ 26 ສະຫາຍ, ຍິງ08 ສະຫາຍ ທີ່ຂື້ນກັບອົງຄະນະພັກ ທີ່ໄດ້ຮັບບັດສະມາຊິກພັກສົມບູນ ຊຸດທີ VI.
ສະຫາຍ ປອ ວິໄລວົງ ບຸດດາຄຳກຳມະການສູນກາງພັກ ເລຂາຄະນະພັກກະຊວງ ລັດຖະມົນຕີກະຊວງພາຍໃນ ມີຄຳເຫັນໂອ້ລົມວ່າ ໃຫ້ບັນດາສະຫາຍ ເອົາໃຈໃສ່ຄົ້ນຄວ້າ ໃຫ້ຮັບຮູ້, ເຂົ້າໃຈຢ່າງເລິກເຊິ່່ງຕໍ່ກັບຄວາມໝາຍ, ຄວາມສໍາຄັນຂອງກອງປະຊຸມໃຫຍ່; ກໍາແໜ້ນການ ຍົກສູງບົດບາດການນໍາພາຂອງພັກໃນວຽກງານຕ່າງໆ, ຝຶກຝົນຫຼໍ່ຫຼອມຕົນເອງດ້ານຄຸນທາດການເມືອງ, ຄຸນສົມ ບັດສິດທໍາປະຕິວັດ, ເດັດດ່ຽວແກ້ໄຂປະກົດການຫຍໍ້ທໍ້ຕ່າງໆ; ເສີມຂະຫຍາຍປະຊາທິປະໄຕ; ເປັນເຈົ້າການອຸທິດສະຕິປັນຍາແລະເຫື່ອແຮງເຂົ້າໃສ່ໜ້າທີ່ການເມືອງທີ່ໄດ້ຮັບມອບໝາຍ. ພ້ອມກັນນັ້ນ, ກໍ່ນໍາເອົາເນື້ອໃນຕ່າງໆໄປຈັດຕັ້ງປະຕິບັດໃຫ້ຖືກຕ້ອງ ແລະ ເປັນເອກະພາບ. ສ່ວນໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ກໍ່ເປັນສິ່ງໜຶ່ງທີ່ສະແດງເຖິງນາມ ມະຍົດອັນລໍ້າຄ່າຂອງພັກ ໃນການນຳພາ-ຊີ້ນໍການຈັດຕັ້ງປະຕິບັດໜ້າທີ່ການເມືອງ ຂອງການຈັດຕັ້ງພັກ ແລະ ສະມາຊິກພັກໃນແຕ່ລະໄລຍະ ໂດຍສະເພາະແມ່ນການນຳພາຜັນຂະຫຍາຍແນວທາງ ນະໂຍບາຍ ຂອງພັກ, ກົດໝາຍຂອງລັດ ໄປພ້ອມໆກັບການຍົກສູງຄຸນນະພາບຂອງໜ່ວຍພັກ ແລະ ສະມາຊິກພັກ ໃຫ້ມີການຫັນປ່ຽນຢ່າງຕັ້ງໜ້າ, ປັບປຸງແບບແຜນວິທີເຮັດວຽກຂອງຄະນະໜ່ວຍພັກ. ສະມາຊິກທຸກ ສະຫາຍໄດ້ສຸມສະຕິປັນຍາ, ເຫື່ອແຮງ ເຂົ້າໃນການ ປະຕິບັດໜ້າທີ່ການເມືອງທີ່ໄດ້ຮັບມອບໝາຍ ສົມ ກັບເປັນແກນນໍາໃນລະບົບການເມືອງຢູ່ຂັ້ນຮາກຖານຢ່າງແທ້ຈິງ.ສຳລັບສະມາຊິກພັກສົມບູນທີ່ມີເງື່ອນໄຂຮັບບັດສະມາຊິກພັກໃນຄັ້ງນີ້ ແມ່ນມີຄວາມໝາຍສຳຄັນ ເພາະເປັນເອກະສານທີ່ຢັ້ງຢືນເຖິງຖານະນາມຂອງສະມາຊິກພັກປະຊາຊົນປະຕິວັດລາວ ທັງນຳໃຊ້ເຂົ້າໃນ ການເຄື່ອນໄຫວວຽກງານຂອງພັກຕາມທີ່ກຳນົດໄວ້ໃນກົດລະບຽບພັກເພື່ອຄຸ້ມຄອງສະມາຊິກພັກເຮັດໃຫ້ ຄະນະພັກຂັ້ນຕ່າງໆສາມາດຕິດຕາມ, ກວດກາສະມາຊິກພັກໄດ້ງ່າຍ, ທັງເປັນການຄຸ້ມຄອງການຈັດຕັ້ງ ພັກ ແລະ ປ້ອງກັນພັກ, ສະກັດກັ້ນກຸ່ມຄົນທີ່ບໍ່ຫວັງດີສວຍໂອກາດປອມແປງ, ເລັດລອດເຂົ້າໃນການ ຈັດຕັ້ງພັກຈົ່ງພ້ອມກັນຮັກສາບັດດັ່ງກ່າວ ໄວ້ໃຫ້ດີ ແລະ ນຳໃຊ້ໃຫ້ຖືກເປົ້າໝາຍ, ຖືກຕ້ອງຕາມຫຼັກການ.

.......ລັດຖະມົນຕີກະຊວງພາຍໃນ ຕ້ອນຮັບ ເອກອັກຄະລັດຖະທູດສິງກະໂປ.......
ທ່ານ ປອ ວິໄລວົງ ບຸດດາຄໍາ ລັດຖະມົນຕີກະຊວງພາຍໃນ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ຊູເດັດ ມາເນຍ ເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງສິງກະໂປ ປະຈໍາ ສປປ ລາວ ໃນວັນທີ 02 ກໍລະກົດ 2024ນີ້ ທີ່ກະຊວງພາຍໃນ.
ໃນໂອກາດດັ່ງກ່າວ, ທ່ານ ປອ ວິໄລວົງ ບຸດດາຄໍາ ໄດ້ສະແດງຄວາມຕ້ອນຮັບ ແລະ ຊົມເຊີຍ ຕໍ່ ທ່ານ ທ່ານ ຊູເດັດ ມາເນຍ ຢ່າງອົບອຸ່ນ ທີ່ໄດ້ມາປະຕິບັດໜ້າທີ່ການທູດ ຢູ່ ສປປ ລາວ ຊຶ່ງເປັນການປະກອບສ່ວນເສີມສ້າງສາຍພົວພັນມິດຕະພາບ ແລະ ການຮ່ວມມື ອັນສະໜິດແໜ້ນ ລະຫວ່າງ ສອງປະເທດ ລາວ-ສິງກະໂປ ທີ່ເຄີຍມີມາແລ້ວນັ້ນ ໃຫ້ນັບມື້ຂະຫຍາຍຕົວກ້າວເຂົ້າສູ່ລວງເລິກ. ທ່ານ ປອ ວິໄລວົງ ບຸດດາຄໍາ ລັດຖະມົນຕີກະຊວງພາຍໃນ ໄດ້ສະແດງຄວາມຂອບໃຈ ພ້ອມທັງ ຕີລາຄາສູງຕໍ່ລັດຖະບານສິງກະໂປ ທີ່ໄດ້ປະກອບສ່ວນໃຫ້ການຊ່ວຍເຫຼືອ ສປປ ລາວ ໃນໄລຍະຜ່ານມາ ແລະ ຫວັງວ່າ ລັດຖະບານສິງກະໂປ ຍັງຈະສືບຕໍ່ໃຫ້ການຊ່ວຍເຫຼືອ ສປປ ລາວ ເປັນຕົ້ນແມ່ນ ການຍົກລະດັບຄວາມຮູ້ຄວາມສາມາດໃຫ້ແກ່ ພະນັກງານ-ລັດຖະກອນ ແລະ ວຽກງານອື່ນໆທີ່ກ່ຽວຂ້ອງ ອີກດ້ວຍ.
ທ່ານ ຊູເດັດ ມາເນຍ ເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງສິງກະໂປ ປະຈໍາ ສປປ ລາວ ຍັງໄດ້ສະແດງຄວາມຂອບໃຈ ຕໍ່ການຕ້ອນຮັບທີ່ອົບອຸ່ນຂອງທ່ານລັດຖະມົນຕີກະຊວງພາຍໃນ ກໍຄືລັດຖະບານລາວ ແລະ ຮູ້ສຶກຍິນດີເປັນຢ່າງສູງທີ່ໄດ້ມີໂອກາດມາຈັດຕັ້ງປະຕິບັດວຽກງານຢູ່ທີ່ ສປປ ລາວ ໃນຄັ້ງນີ້.