Pro Lact

كأنه كترانين الاشخاص يلي بوزعوا معلومات عن الرضاعة الطبيعية وتغذية الرضع ع السوشال ميديا، بشكل عشوائي وغلط وهني ما معهم اي شهادة بتدعم انهم مجازين ليعطو هيك معلومات؟
فوق التعدي ع غير اختصاصات ياريت بتكون شي صح، ياريت معلومة صح، ياريت اصلا مهتمين بصحة الأطفال ع قدما مهتمين يجيبو views... ع حساب اهم موضوع بالقارة ل هو تغذية الاطفال.
انتبهوا.. انتبهوا مين عم يعطيكم معلومات وشو اختصاصه وشو مجاله، واسألوا ياترى شو دارس؟ ماخد شو؟شو هي الجامعة او المدرسة؟ مرخصة؟ درس كم ساعة ع يومان ومسمي حالك مختص؟ ولو كان بالمجال الطبي، شوفوا اذا اكمل اختصاصه او لا بالمجال هيدا، او حتى بيشتغل بالمجال هيدا...
ما تدفعوا وقتكم وجهدكم وحتى مصرياتكم بالمكان الغلط لتشتروا شي غلط.
من شوي شفت صفحة عم تتحجج ب عمكم غوغل ك مرجع للمعلومات الغلط.. وتدعم اقوالها بناء ع غوغل... وترشد فوقها ع شي سوبر غلط بتغذية الرضع.
يعني لقد اعذر من انذر... انتبهوا على اصابيعكم انتوا وعم تقلبوا وشوفوا مين هني اهل الاختصاص وفعلا اذا مجازين او لا.

انا تأكدت انه الأمهات مجانين🤯.. ايه نعم.. نحن مجانين..
ايمتى مننسى وجع الولادة والسهر والتعب والتحمل والتربية والركض بركض وفنجان القهوة والشاي او المته (كرمال ما حدا يزعل) البارد لمنشربه من وقت ما منطل بالأبيض لمناخد تسمية مدام، ومنرجع تسمية أم... ايمتى؟
لا مش بس تولدي وتسمعي صوته🥳
بس نشوف بيبي صغير ونشم ريحة ولد عمره كم يوم ومنبلش نساوي حرارة ونحوص ع بيبي صغير...ونحوص اخ ياقلبي 😍
ايه نعم..
انا اول مجنونة واعترف بهالشي، كلما روح استشارة وشوف newborn بدووووب بدووووب بصير فكر "اخ ياقلبي بدي بيبي"
وبس يتجدب ويتاوب ويتجعلك هيك مع الطزطوز لبتبرم مع كل جسمه الصغير🥹💔🥹
بعدها.. عقلي يعود الى صوابه، فعليا عقلي 🧠بيطرق قلبي❤️ كفين وبذكرني بالتعب وانو عندي ولد عمره سنتين بعد ما نضفته من الحفاض.
نعم..
ويلكم تو كريزي هود معروفة ايضا aka ماذر هود.
والله يطعم كل أم ناطرة تشوف الخطين وتحمل هالكائنات الجميلة ❤️

بيان رقم 2
هيدا البيان ما خصه بشي معين ولكن بشكل عام، ولكن في فمي ماء وبدي احكي...👌🏼
اصلي انا موجوع🤕

من بعد ما تاخدو "رأي طبي" عن غروبات الفيسبوك او السوشال ميديا، و تسموه "استبيان" بما انه التجارب الشخصية معيار لتبنو ع اساسهم قرارات مصيرية وتشملو ولادكم فيها، وخصوصا انا عم احكي عن استشارات وأدوية، وتعفسوا، ما تجو تحكوا ع الانبوكس الحكيم او المختص من بعد التعفيس وتتوقعوا يجاوب بكومنت صغير وانو مارح تاخدو من وقته، او انه ما يقول لازم فحصية. مثال بسيط، بس قول لازم شوفك او لازم استشارة او لازم موعد، بيختفو ببطلو يحكو بغيبوووو حص ملح وبدوب كأنه أنا متوفرة 24/7 وبنطو ليشتكو بيرجعو هاااا بيرجعو بيشكووووو انو ماعم بردو وبدنا موعد وانو كله "سؤال" هو بكون مصيبة😀
لأن انا شبت، ما معقول يلي عم يصير... شبت.. ما بقا اسكت بدي ابرش يلا.
ترقبوني بالبيان يلي بعده.

بيان رقم واحد:
دوستينكس او حبة الفطام او الضراب السخن ما تاخديه لتفطمي، لتفطمي ما تاخدي دوا، مافي دوا للفطام..
مخاطره كبيرة، وما بوقف التحجير..
ولبتاخده وبتروح مسنجر لتحكيني وتسأل ليش ماراح التحجير وشو بتساوي مش رح رد عليها، لان ما منحكي اخصائي من بعد ما نساوي مصيبة ونقلو تعا صلح،المفروض وللازم يصير انكم تتذكرونا قبل ما تعفسو، مش من بعد التعفيس. عنجد مش عم امزح ما بقا رد ع اي سؤال هيك، طلع الشعر ع لساني وانا قولها. دوستينكس مش دوا للفطام، مش دوا للتحجير، مش دوا بشيل الحليب وماحيالله بينوصف.
انتهى البيان..

ليش ما بنام ع بطنه، ليش مش ع جنبه؟
https://youtu.be/v5PsZ0pQfOk?si=SBArmC4zrDyKd30s
احضروه وخبروني.. شو كنتو بتعرفو عن النوم الآمن؟

نوم آمن safe sleep ماذا يعني النوم الآمن للأطفال؟لماذا هذا الموضوع مهم؟لانه يحمي الأطفال من الموت المفاحئ الذي يرتبط بالاختناق.واحد اسبابه هو النوم الغير الآمن.

فيني آكل لحمة نية، او سوشي🍣🍥
ورضع؟ 🤱🏼
ايه، فيكي🐣
انتبهي بس انو👇🏼
🥩مصدر اللحوم يكون نظيف وموثوق.
🐟السمك ما يكون النوعية العالية بالزئبق. السلمون منيح، التونا النية ما تكتري منها كتير وكل يوم تاكليها لان النية غير المعلبة فيها نسبة اعلى من الزئبق.
وصحتين!

اختبار، اختبار🎤
🍉منطمنكم بعدها عايشة الصفحة
ومنطمنكم، فيكي ترضعي انتي وزعلانة🥺😢
وفيكي ترضغي انتي ونقزانة🤕
وفيكي ترضغي انتي ومنسم بدنك سم🤢
وفيكي ترضعي انتي وعم تبكي😵‍💫
وشو كمان؟
كل هالأشخاص يلي ع تيكتوك وع صفحاتهم قاعدين يهولو فيكم وما ترضعي انتي وزعلان ونقزانة وحليبك بينقل الزعل وهالأخبار ما الو اي اساس علمي... وتجميع لايكات يا حلوات😝
ولهلق العلم بقول انو لو في نسب الكورتيزول عالية بالحليب ما بتأثر ع الطفل ومش هي سبب انه مزعوج او عم يبكي.
🍉 اه ولو طلعلك وحدة تقلك طاقة ايجابية وسلبية وقرارها الشخصي كمان خبروها كرامة الطاقات كلها ما منترك طفل من دون حضن امه، لان بكل بساطة هرمون الحب بعدل مزاج الأم والطفل مع الرضاعة👌🏼
ف بهالسنة هي، بخبركم، اهتمو بحالكم❤️
وما تخافو من تهويل اي شخص بيطلع وبيحكي تحت اي تسمية انفلونسر او مش مارق من حد مكونات حليب الأم.. لان لحالهم هني بسمو بدنها للوحدة بس تحضرهم واخبارهم العوجاء
🐄واهم شي انو بدن البقرة يلي عم ينحلب ليل نهار وبعيدة عن عجلها مش مليان كورتيزول و"زعل".. اخ ع التسويق شو وصلوا فيه اشواط.🐮
يلا..
هالسنة خلصت والحبيبة دمائها مهدور وحقها مغتصب، وشعبها صاحب عزيمة لا تُكسر، والجنوب في حرب ويواسي الحبيبة.. ومش عارفة شو اتمنى غير ربنا يكون معنا، ويعطينا العزم والعزيمة والصبر.. ويحمي عيلكم ورح نضل بنفسية قوية نحنا وجيرانا.

🍉فاطمة-أماني مستشاراتان دوليتان في الرضاعة الطبيعية وتغذية أطفال الرضع IBCLC🤱🏼

أهلنا بفلسطين، قلوبنا معكم❤️❤️
إن شاء الله تكونوا بخير

IBCLCs, today is your day -- thank you for the important work you do to support breastfeeding families worldwide! Nearly 36,000 IBCLCs in 131 countries working to advance global public health is certainly something to celebrate. Happy IBCLC Day!

اليوم، لبسنا هالصبي ع المدرسة، وحطينا هالترويقة لهالبنوت، وقعدت اتصفح الفايسبوك.
بلاقي بوست الأم خايفة وعتلانة هم لأن حكيم الأطفال عم يجبرها تبلش بالحليب الصناعي (يلي هو مقطوع وغالي) من دون سبب علمي ملموس، وبس قالتله "اخصائية رضاعة" قالت هيك، قلها مش اختصاص حقيقي هيدا او مافي شي اسمه اخصائية رضاعة.
نسف مجال علمي عمره 70 سنة معترف فيه بكل الجامعات والمستشفيات الجامعية، بيتطور، وبيتجدد، عليه أبحاث كتير، وبيتعلم بالجامعات برا لبنان وبقلب لبنان كمان، وداخل بالنظام الصحي بالبلدان المتطورة، وبقلب المستشفيات وما بتصير المستشفى صديقة للطفل من دون الاخصائي/ة بالرضاعة الطبيعية وهيدا واحد من المجالات لتاخد كريديت المستشفى عليه كمان وفي دول باتقدم هالخدمة مع نظامها الصحي خارج المستشفى وبتعطي حتى مكنات لسحب الحليب.. وفوق انه الاطباء والممرضات والقابلات وغيرهم كتير بتتخصص بهالمجال وبتدرس مش بتاخد كم دورة مكثفة وبتوصل للبورد وغيره وغيره.. بكل ثقة نسف الاختصاص.

طيب مافي شي اسمه اخصائية رضاعة ع راسي كبينا هالاختصاص بالزبالة، طيب ليش عم تنزع نظامه الغذائي للطفل وتعرضه لسوء تغذية بما انه الاهل ما قدرتهم يشترو حليب صناعي؟ في سبب او لا؟🤔

اذا بفوت ع بيت وفي اطافيل صغار، وبكون البيت مرتب بحس بعدم الراحة صراحة وأستغرب.. مش لان غلط بس لان اتعودت ع الالعاب حولي وصراحة، بطلت استغرب اذا بلاقي شغلة المفروض تكون بمحل معين محطوطة بمكان تاني كلياً...
عادية صارت.
سنة رابعة امومة.

Live اليوم
يلي بحب يحضر اهلا وسهلا
ما تنسوا تدعمونا ب follow
ويلا نقو بعد وقولوا التيكتوك كله مسخرات، هيانا عم نعطي ونصنع محتوى جميل فرجونا دعمكم😏😬🥰🥰
لينك التيكوتك https://www.tiktok.com/?_t=8YshygPK2z4&_r=1
لينك تيكتوك ريان
http://tiktok.com/
@

شو الشي يلي بتقولي ياريت خبروني ياه قبل ما إحبل؟

متل ما وعدناكن, هاي تفاصيل ورشة العمل للحوامل. فيكن تحكوني لتعرفوا تفاصيل أكتر وتحجزوا محل❤
#حوامل #رضاعةطبيعية #برولاكت #استشاريةرضاعة
(أماني)

ماذا غيرت بك الأمومة؟
بعيداً عن المشاعر الجياشة وهيك.. بكل تجرد..
مقاسي🤣

كان عاماً مليئاً بال......
بالنسبة إلي، كان عاماً من دون نوم.
وإنتو؟
تنعاد عليكم بالأفضل والحامل تولد بالسلامة، والمشتهي الله يطعمه، ويلي عم ترضع الله يقويها💜

We are URGENTLY looking for donor human milk in Beirut/Dahye area. If you have, plz whatsapp me +961 71 397 821

مطلوب حليب من أمّ متبرّعة بشكل طارئ في منطقة بيروت/الضّاحية.
Amani

مساالخير يا احلا أهل، بما اننا سجلنا من 30 سنة لهلق اول عدوى بال الكوليرا والoutbreak احتمال موجود يعني احتمال تنتشر موجود بما انها عدوى بتنتقل بالمياه الملوثة والطعام الملوث، لهيك..

ما رح اطوشكم بالأشياء الطبية وكيف يصير وقاية، انا فاطمة من منبري هذا عم اكتبلكم عن *الحليب* وعن غذاء الطفل للازم ننتبه عليه، لان هيك عدوى بتسبب جفاف قوي بسرعة للطفل، وربما وفاة من دون تدخل سريع. 🧐
لهيك ركزولي شوي، ما تنام بين القبور ولا تشوف منامات وحشة صح؟😀

🍼يلي بيعطي حليب صناعي فورميلا بودرة او حليب بودرة، انتبهو للمي يلي عم تحضرو فيها القنينة،
🍼بتغلو المي لمدة دقيقة او 2 وبتتركوها تدفى شوي وبتحضرو الحليب ان كان لطفل عمره 3 اشهر وما فوق.
🍼اذا الطفل اقل من 3 أشهر، تذكير انه العلبة وحليباتها بيجو غير معقمين، لهيك بتغلو مي وبتزيديهم للحليب بسرعة لقتل اي بكتريا... ف هي النقطة بشدد عليها وانا مع نساويها ليصير الطفل سنة 😅

🍼النقطة الثانية موجهة لكل حدا بيعطي قنينة شوماكان بقلبها انشالله بس مي، بتجلي القنينة وبتفكفك ابو لاخترعها لتنضفها منيح، وبترجع بتعقمها ان كان بمي مغلية او ميكرويف او معقم العادي، البراد او الثلاجة ما بتعقم القناني. وطبعا محل ماعم تحضرها نضيف، ما حدا يطلع يقول مناعة وهالحكي الفاضي مناعة ما منلحس الأرض 👍
🍼اذا انتم بمكان بلش فيه اصابات، واذا عندكم القدرة المادية تشترو فورميلا مسبقة التحضير اشترو ما تقصرو من هالناحية. واتبعو ارشادات وزارة الصحة والجمعيات المتكاتفة لحل هالقضية والفريق الصحي.

اذا بترضعي رضعي وما تعتلي هم بس غسيل اليدين واجب شرعي وديني واخلاقي وانساني وطبي يلي هو شومابدكم تعتبروه، بس واجب غسيل اليدين شي اساسي. ما تنسو تغسلو ايديكم بمي وصابون قبل ما تعملو اي شي.

🍎🍅🌽ولتعقيم المي والخضرة لان هيدا البوست موجه لكل الأطفا، ل هي جزء من بوست الوزارة كيف بتزيدو كلور او اودكس حسب شو متعارف ع اسمه بمحيطكم.

ودمتم بخير، ما تعملو حالة خوف، شوي وقاية وبيمشي الحال.
ما بدي وصيكم شير للبوست ليوصل الصوت.
صحة اطفالنا مسؤوليتنا
#كوليرا #لبنان #سوريا
#غذاء

طيب ركزو معي لأن صار واصل الفيديو كتير والانبوكس كله عم يسأل وتيكتوك كمان عم يسأل، وغروبات الامهات عم تسأل عن الموتيليوم motillium..
ما فيني صور واحكي فيديو وفرجيكم قديش انا قلقة لان شوب وما في كهربا😪
لما يعطو معلومة بالمطلق والعنوان العريض "الموتيليوم بزيد هرمون برولاكتن" هو صح، بس مش صح، ليش؟
كم امرأة مرضعة عم تعاني مشاكل انتاج حليب او بتعتقد عندها مشاكل بالانتاج بدها تشتري موتيليوم ويمكن بوصفة او من دون وصفة لان هي اساسا بتكون قلقة وخايفة انه انتاجها مش صح، وكلنا عنا هالقلق احيانا؟
وكم حدا بدو يفكر اذا اخدت حبة هالدوا خلص يعني قدرت ترضع وصار عندها كتير حليب؟
لو في حبة دوا بتحل قصة الرضاعة ما كان وجد اختصاص اسمه رضاعة طبيعية وتغذية الرضع🥹
لتفهمو اكتر شو مقصدي:

اولآ هيدا إلو بروتوكول المستشارة الدولية او اخصائية الرضاعة بتمشي مع الأم عليه بعد شو؟ بعد ما نكون فحصنا البايبي ك رضاعة ووزن ونمو وتابعنا ملاحاظات طبيب الأطفال، وشفنا انه في انتاج قليل لسبب من الأسباب ومنبلش هالدوا مع اشراف طبيب الأم وطبيب الأطفال ليسمحولنا فيه لأن هيدا الدوا ممكن يضر مرضى قلب معينين ان كانو اطفال او الأم بأثر على rhythm وفي كمية معينة منعطيها لعدد معين من الايام مع مراقبة الرضاعة الطبيعية او سحب الحليب.. ومنغير بالدوزات حسب المتابعة، ما حدا بيوصفو عن وعي ومعرفة من دون ما يتابع الأم ع فكرة.

لهيك مش كل معلومة بتطلع بالمطلق ك عنوان عريض تمشو فيها لوحدكم، في تفاصيل كتير كتير لازم ننتبهلها وما تاخدي دوا ليزيد الحليب من دون متابعة اخصائية الرضاعة لأن يمكن ما بدك دوا، وهي الحالة عند كتار امهات بفكرو انتاجهم خفيف وهو فعلا تمام ومناسب، ويمكن هالدوا ما يناسب حالتك بكل بساطة او ما يناسب عمر الطفل. ويمكن فينا نستعيض بغير امور قبل ما نوصل للدواء.
دمتن بخير وانشالله كون وضحتلكم هالفكرة.
#موتيليوم #برولاكت

في شي مستفز قريته اليوم، لدرجة مافيني اسكت.
وهو هالجملة التالية
"ل ما معها تروح ترضع"
يعني يلي ما معها مصاري، ترضع.
بكل بساطة..
هالناس لبتفكر هيك يمكن بيعتقدو حدود حياتهم هي أكل وشرب ونوم. ما أكتر.
ولكن أكتر عبارة مستفزة هي فوق انهم قسمو المجتمع بين غني يعني ما برضع لأن عنده privilege وفقير يعني برضع ولاده..؟! 🤯
هينة واو مش عارفة!😵‍💫
فوق التقسيم هيدا،😏
قررو انو الرضاعة🤱🏽 سهلة وهينة وبسيطة وكل النساء عندها الدعم للازم والوسائل النفسية والوقت للازم ببلد مأمن كل وسائل نجاح العائلات وبهمه صحة أطفالنا؟؟؟؟ او انو ستاتنا كانت ترضع ما في اهون منها بس نسوان هالزمن خسعين؟🤔 ماهي ما في اهون من اننا نلوم الأم هينة كتير🤓

او انو Option الحليب الصناعي👩🏾‍🍼 أهون؟ ما هو يا اما عم يعطوه غلط او انهم مش عم بعقمو قناني او عندهم منبع مستدام حليب صناعي؟ او مش فهمانين كيف بيتحضر؟! لهالقد معتبرينها هينة؟

ما الخيارين مش هينين!🤧

كتير هينة نقول للأم ترضع، اقتراح سوبر جديد وحلو وما حدا سبق عليه فعلآ هيدا الاقتراح هو نفسه لبقولوه للأم الحامل لبطنها قدامها وهو "لشو عم تحبلي بهيك وضع" او حتى "نظراتهم الغلط" وهني ما بيعرفوها بعد.. ولا فهمانين شو عاشت او شو صاير معها.. كأنهم رح يدفعو عليها هني ويخلفو عنها🥹

بفت.. شو عايشين ع زمن الاقطاعيين نحنا او كيف؟ حدا رجع بالزمن؟ مين لعب بال settings يرجع يزبطهم.

يا ادعموهم ولو بكلمة طيبة يا ما تقترحو أي شي ما بيضمن حل او شخص يساعدها. 😁

هلق هو صح اسبوع الرضاعة.. بس بتعرفو قديش بياخد وقت بس لتطعمي الأطفال؟ يعني ك تغذية الطفل بشكل عام؟
تفكير...
وتحضير؟
وبدك تعطيهم غذاء مناسب، ومش أي غذاء لااااا.
بدك تحضريه صح..
يعني بدك تفيقي راااايقة...🥴
تقومي ع مطبخك وع خصرك بني آدم صغير متشوق يحط ايديه بأي شي..🐣
وبتوقفي تفكري هيك..🤔
شو معقول روق طفل الصبح؟😶‍🌫️
شو معقول غديه؟🤨
عشيه؟🙄
طيب كم كمية المي للازم يشربها؟😬
طيب بجيب شي من الصيدلية؟😮‍💨
بفتش على شي صحي أكتر؟🤤
او لا بحضرهم بالبيت انا؟😪
شو الصح؟😐
بعطي بيضة كاملة او بقسم الصفار والبياض؟
بيطلعلو حليب بقر او لا؟
بسخن حليبي او بحط فورميلا؟
بعطي حليب او برضع قبل او بعد الأكل؟
طيب اذا ما أكل؟
طيب بعطي مهروس او بيوري او بعطي BLW؟؟؟ ..... اخ يا راسي دخت.😵‍💫
لحظة آخد نفس🥵

وبمناسبة التغذية ليكو هالصوص🐣 عمرها 6 أشهر😵‍💫
يا فرحتي🥹😂

صورة طازجة لجوليا هي وعم تاكل شوفان مخلوط مع بذور الشيا والكتان سريع التحضير وزدت عليهم انا موز، ومليان حديد أهم شي، لأن انا ما كان معي وقت فيق رايقة عندي شوووغووووول،
وبنفس الوقت بدي شي صحي سريع واضمن وجبة مرتبة
الوجبة برعاية ملاك محمد الراعي 😍 babychef شوفو هون اذا ضايعين شو تطعموهم🥹 وكبسو هي الكبسة تبع الfollow عند ملاك، تنسوش 🫡
تنسسسووووش

https://instagram.com/babychef.lb?igshid=YmMyMTA2M2Y=

👨🏻‍🍼👩🏾‍🍼🤱🏽🤱🏻اذا بترضعي EBF او بتعطي mix او بس بتسحبي حليب EP او ما بترضعي بتعطي بس فورميلا، انا من هالمنبر بقلك
يعطيكييييي مليون زليون ترليون عافية لأن مهمة اطعام الطفل وتغديته مهمة صعبة، بتاخد مجهود عقلي وجسدي ووقت وصبر..
وقت تحضير ووقت لتقري وتتعلمي شو الأصح وشو المسلمات انهم غلط.. تغذيتهم مسؤولية كبيرة، ومهمة، وما فيها أي shortcuts غش🫣
تغذيتهم مهمة ❤️

أسبوع الرضاعة!
مين اكتر شخص دعمكم وشجعكم على هالمشوار؟

مرحبا ماميز.
الخبرية الجديدة إنّو قرّرت بلّش أعطي دروس تحضيرية للرضاعة الطبيعية للحوامل.
مبدئيّاً، الدروس رح تكون على مرحلتين. أوّل وحدة أونلاين والتانية وجهاً لوجه ضمن منطقة الضاحية الجنوبية. رح بطلعكن عالتفاصيل قريباً.

أماني❤