Sukhi Ayurvedic Medical Center

දියවැඩියා රෝගීන් ගේ ස්නායුගත ආබාධ සඳහා
+++++++++++++++

ආයුර්වේද ප්‍රතිකාර මගින් සාර්ථක ප්‍රතිඵල
==================

දියවැඩියාව යනු ලෝකයේ බොහෝ මිනිසුන් දිගුකාලීනව රෝගීන් බවට පත් කරන තවත් එක් රෝගයකි. එය පුද්ගලයින් එකවර මරණයට පත් කරන රෝගයකට වඩා වෙනත් සංකූලතා නිසා රෝගියාගේ ජීවිතය බොහෝ සෙයින් දුෂ්කරතා වලට ගොදුරු කරන රෝගයක් වේ. දියවැඩියාව නොසලකා හැරීමෙන් හා නිසි ප්‍රතිකාර නොලැබීමෙන් චිරකාලීනව වෙනත් බොහෝ රෝග වලට හේතුවේ. ඒ අතර හෘදරෝග, රුධිර පීඩනය වැඩිවීම, ස්‌නායු දුබලතා, ඇල්ෂයිමර්ගේ රෝගය (මතක ශක්තිය හීන වීම), ඇස්‌ පෙනීමේ දුර්වලතා, කන් ඇසීමේ දුර්වලතා, වකුගඩු ආබාධ, අත්පා හිරිය, ශරීරයේ කල් පවතින තුවාලවල, මදසරු භාවය ආදිය විශේෂයෙන් සඳහන් කළ හැකිය. රුධිරයේ සීනි මට්ටම පාලනය කළත් මෙම රෝග තත්වයන් සුව කරගැනීමට අවධානයෙන් හා සැලකිල්ලෙන් යුක්තව වෛද්‍ය උපදෙස් අනුව ප්‍රතිකාර කළ යුතුය. මෙම රෝග තත්වයන් කල් තබා හඳුනා ගැනීමෙන් රෝගියා ගේ ජීවිතය පහසු කරවන ආකාරයෙන් එම තත්වයන් පාලනය කළ හැකිය.

මෙම ලිපිය තුළින් විශේෂයෙන් ම සාකච්ඡා කරනුයේ දියවැඩියා රෝගීන්ට ඇතිවන ස්නායු දුබලතාව හෙවත් neuropathy තත්වයන් පාලනය කිරීමේ ලා ආයුර්වේද ප්‍රතිකර්ම යොදාගන්නා ආකාරය සම්බන්ධයෙනි. දියවැඩියා රෝගීන් හට ඇති වන ස්නායු ආබාධ ප්‍රධාන ප්‍රභේද හතරක් තිබේ. මෙහි පළමු වර්ගය වන පර්යන්ත සමමිතික ස්නායු ආබාධ (peripheral symmetric neuropathy) වලදී කෙළවර ස්නායු වලට හානි වීමෙන් එය අත් සහ කකුල් හිරි වැටීම ලක්ෂණය කොට ඇති වෙයි. එසේම බොහෝ රෝගීන් අතර බහුලව දක්නට ලැබෙන තත්වය ද මෙය වේ. දෙවැනි වර්ගය වන ස්වතන්ත්‍ර ස්නායු ආබාධ (autonomic neuropathy) වලින් සිරුරේ ආහාර ජීර්ණය, මුත්‍රා පිට කිරීම, හෘද ස්පන්දනය වැනි ක්‍රියාවන් කෙරෙහි බලපාන ස්නායු වලට හානි සිදුවේ. තුන්වැනි වර්ගය වන්නේ උරස් හා කටී ප්‍රදේශ වල ස්නායු මූල හරහා බලපාන අවිදුර ස්නායු ආබාධ (proximal neuropathy) ලෙසය. තුන්වැනි වර්ගය තනි තනි ස්නායු හානි වීමෙන් ඒවායේ ක්‍රියාවට බලපාන කේවල ස්නායු ආබාධ (mononeuropathies) ලෙස හඳුන්වයි.

මුලින්සඳහන් කළ පර්යන්ත ස්නායු ආබාධයේ දී හිරිවැටීම, වේදනාව, පුපුරුගැසීම, දැවිල්ල වැනි ලක්ෂණ අත්වල හෝ පාදවල ඇඟිලි වලින් පටන් ගෙන ඉහළට ගමන් කරනු දැකිය හැකිවේ. එසේම අතපය වල මාංශ පේශි වල තානය නැති වීම ද ඒවාට සීතල උණුසුම හෝ වෙනත් තුවාල වීමක් නොදැනීම ද ඇතිවේ. මෙම හේතුව නිසා රෝගියාට සමබරතාව නැතිවී ඇදවැටීම ද ඉඩ තිබේ. මේ තත්වය වැඩි දියුණු වීමෙන් Charcot’s joint නමැති ආබාධය ඇති වුවහොත් බර දරන සන්ධි දිරායාම නිසා ඒවා බිඳී යාමට ඉඩ තිබේ.

විශේෂයෙන්ම මෙම ස්නායු ආබාධය සහිත රෝගීන් හට කෙළින් හිට ගැනීමේ හා ඇවිදීමේ අපහසුතා ඇතිවීම බහුලව සිදුවේ. එසේම මෙහි තවත් සංකූලතාවක් ලෙස සංවේදන අඩු වීමෙන් තුවාල වීම මෙන්ම ඒවා පැසවීම හෝ සුවවීමට කල්ගතවීම හෝ කුණුවීම (gangrene) නිසා අත්පා වල කොටස් ඉවත් කිරීමට පවා සිදුවේ. එම නිසා මෙවැනි රෝග ලක්ෂණ නොසලකා හැරීමත් නිසි වෛද්‍ය ප්‍රතිකාර නොලැබීමත් නිසා රෝගීන් අකාලයේ ආබාධිත තත්වයට පත්වේ.

ස්වතන්ත්‍ර ස්නායු ආබාධ වල දී බඩපපුව දැවිල්ල, ඔක්කාරය, මළබද්ධය හෝ අතීසාරය, කථාව අපහසු වීම, ගිලීමේ දුර්වලතා, කුඩා ප්‍රමාණයක් ආහාර ගැනීමෙන් පසු කුසපිරී ඇති බව හැඟීම, ආහාර ගෙනපැය කිහිපයකින් වමනය, හිටගෙන සිටින විට කැරකිල්ල හෝ කලාන්තය, හිටගෙන සිටියදී රුධිර පීඩනය පහළ යාම, වමනය, හෘද ස්පන්දනය වැඩිබව, සිසිල් පරිසරයක පවා අධික දහදිය දැමීම, මුත්‍රා කළ පසු මුත්‍රාශය හිස් නොවූ බව දැනීම, ;ලිංගික බෙලහීනතාව, විකෘති ස්පර්ශ දැනීම (dysesthesia), ඇසිපිය හා මුහුණේ පේශි එල්ලා වැටීම, පේශි සංකෝචනය හා දුර්වලතාව වැනි ලක්ෂණ ඇති විය හැකිය. අවිදුර ස්නායු ආබාධ වලදී සිරුරේ පහළ කොටසේ වේදනාව, බොහෝ විට කකුල් ආශ්‍රිත වේදනාව රෝගීන් අත්දකින ලක්ෂණයකි. එසේම කේන්ද්‍රීය ස්නායු ආබාධ හා කපාල ස්නායු ආබාධ වලදී ඇස් පෙනීම දුර්වල වීමත් බොහෝ සෙයින් ද්විත්ව දර්ශනය (double vision) ඇතිවීම ද සිදුවේ. මෙවැනි අවස්ථාවක අක්ෂි රෝගයට වඩා ස්නායු ආබාධය කෙරෙහි අවධානය යොමු කළ යුතුය.

බොහෝ දියවැඩියා රෝගීන් මෙම ස්නායු ආබාධ තත්වයන් හඳුනාගන්නේ රෝග ලක්ෂණ උග්‍ර වූ පසු ප්‍රමාද වී නිසා රෝගියාට සිදුවන හානිය ද බරපතල වේ. එහෙත් කල් තබා රෝගය හඳුනාගැනීම හා නිසි ප්‍රතිකාර වලට යොමුවීමෙන් ඉතා සාර්ථකව රෝග ලක්ෂණ පාලනය කොට රෝගියා ගේ ජීවන ගුණාත්මය වැඩි දියුණු කිරීමට ආයුර්වේද ප්‍රතිකාර වලට හැකියාවක් තිබේ. මෙහිදී රෝගියාගේ සිරුර තුළට අභ්‍යන්තර ඖෂධ ලබා දීමෙන් ස්නායූ පටක යම් ආකාරයකින් පිළිසකර කිරීමත් බාහිර ප්‍රතිකාර මගින් ස්නායු ක්‍රියාව උත්තේජනය කිරීමත් මගින් රෝගියාට පහසුවක් ලබා දීම සිදුවේ. නාඩිබලකාරක හා රසායන චිකිත්සාව මගින් සිරුරේ පටක අලුත්වැඩියා කිරීම මෙන්ම නාඩිපෝෂක තෛල වර්ග අභ්යංගය හරහා මාංශ පේශි ශක්තිමත් කිරීම ද කළ හැකි බව අපේ අත්දැකීමයි. එසේම ශරීර අභ්‍යන්තරයට යොදන ඖෂධ වලින් හෘදය, වකුගඩු, අක්මාව හා මොළය යන ඉන්ද්‍රියන් ගේ ක්‍රියාකාරිත්වය වැඩි දියුණු කිරීමට අවශ්‍ය වන බලපෑම තිබෙන බව පර්යේෂණ වලින් හෙළිවී තිබේ. ඒවායේ බලපෑම වඩාත් ඵලදායී වීම සඳහා රෝගී චර්යාව, සත්කාරය සහ ආහාරපාන රටාව ද සාධනීය ලෙස වෙනස් කළ යුතුය.

ආයුර්වේද ප්‍රතිකාරය පුද්ගල-කේන්ද්‍රීය නිසා හැම විටම රෝගියාගේ ශරීර ප්‍රකෘතිය, රෝගයේ බරපතලකම, පාරිසරික තත්වයන්, ප්‍රධාන රෝගය සමඟ බැඳුණු වෙනත් රෝග, ගනු ලබන ඖෂධ වර්ග ආදී බොහෝ සාධක චිකිත්සාව සාර්ථක කරගැනීමේ ලා වැදගත් වේ. එබැවින් ඒ ඒ රෝගියාගේ තත්වය අනුව සකස් කළ ප්‍රතිකාර පද්ධති වඩාත් ප්‍රායෝගික නිසා රෝගීන් ගේ ආහාර පාන රටාව, දෛනික ජීවන පුරුදු හා මානසික සෞඛ්‍යය වැනි අතිරේක කරුණු ද මෙවැනි චිකිත්සා ක්‍රමයක් තුළ වැදගත් තැනක් ගනියි. මෙවැනි රෝගීන් ගේ භාරකරුවන් ද රෝගය පාලනය කරගැනීමේ ලා බොහෝ සෙයින් උපකාර කළ යුතු අතර ඔවුන් ඉවසීමෙන් හා අවධානයෙන් වෛද්‍ය උපදෙස් අනුව කටයුතු කළ යුතුය. එහෙත් රෝගියාගේ සෞඛ්‍යය පෙර තිබූ තත්වයට යළි පිළිසකර කිරීම ගැන සහතිකයක් නැත. එසේම මෙවැනි නිදන්ගත තත්වයන් නිට්ටාවට සුව කරන බව පවසා මුදල් ගසා කන ව්‍යාජ වෛද්‍යවරුන්ගෙන් ද ප්‍රවේශම් විය යුතුය.

වෛද්‍ය ඩැනිස්ටර් එල්. පෙරේරා

අර්ශස් රෝගය

අරිවත් ප්‍රාණාන් ශෘණා'ති හිනස්ති ඉති අර්ශ:
සතුරෙකු මෙන් පණ පෙලනුයේ අර්ශස් නම්වේ.

අර්ශස් රෝගය යනුවෙන් හදුන්වනු ලබන්නේ මල මාර්ගයේ කෙලවරෙහි ඇති ගුද වලි ඇසුරු කරමින් ඇති වන මාංශ අංකුරවේ.එය,

1)ප්‍රවාහිනි

2)විසර්ජනි

3)සංවරණි

යනුවෙන් හැදින්වේ .අර්ශස් රෝගය මහා රෝග අටට අයත් එක් රෝගයකි.
අර්ශස් රෝගය බඩවැල හා ගුදය ආශ්‍රිතව ඇති වී බොහෝ පීඩා ඇති කරන රෝගයකි.
ජනවහරෙහි,

මූලගින්න

මූලරෝගය

මූලග්ගාය

යනුවෙන් මෙය හැදින්වේ.

අර්ශස් ඇති වීමට හේතු

*විරුද්ධ ආහාර ගැනිම

*නියමිත පරිදි නියමිත ආහාර නොගැනීම.

*ඌශ්න තීක්ෂණ විදාහි ආහාර ගැනිම

*අජිර්ණ ආහාර ගැනිම

*මේ අති මෛථුනය සේවනය

*අපහසු අසුන් භාවිතා කිරිම

*ග්‍රර්භණින්

*මානසික හේතු

යන හේතු අර්ශස් රෝගය සදහා බලපායි.

අර්ශස් ප්‍රභේද

ශුෂ්ක අර්ශස්

ස්‍රාවී අර්ශස්

දෝෂ අනුව අර්ශස් ප්‍රභේද

1)වාතජ අර්ශස්

2)පිත්තජ අර්ශස්

3)කඵජ අර්ශස්

4)සන්නිපතජ අර්ශස්

5)රක්තජ අර්ශස්

6)සහජ අර්ශස්

වාතජ අර්ශස්

වාතය බහුල කොට ඇති අර්ශස් වලදී ,

*අර්ශස් අංකුර වියලිවේ.

*කළු අරුණ වර්ණයෙන් යුක්තවේ.

*මැලවුනු ස්වභාවය

*රටඉදි හැඩයක ස්වභාවය

*අග කෙලවර තියුණුවේ.

*මල බද්දය ප්‍රමුඛ ලක්ෂණයකවේ.

පිත්තජ අර්ශස්

*අර්ශස් අංකුර රතු හෝ කහ පාටට හුරුය.

*තැටමීම සමග රෝගය වැඩිවේ.

*සුලුවෙන් ලේ වැගිරීම.

*ස්‍රාව පිලිගදින් යුක්ත වීම

*අක්මාවේ පැහැයට සමාන නිල් හෝ කහ පාට ගුද කීල ඇත .

කඵජ අර්ශස්

*කඵජ අර්ශස් වලදි ස්‍රාව තිබිය හැක .

*කහ හෝ නිල් පාටට හුරුය .

*බෙලෙසුල් ස්‍රාව ඇත

*අර්ශස් අංකුර ලොකුය.

සන්නිපතජ අර්ශස්

සන්නිපාතජ අර්ශස් වල දෝෂ තුනේම ලක්ෂණ ඇත.

සහජ අර්ශස්

උපතින් හෝ දෙමාපියනගේ උරුමයෙන් ඇති වීම

රක්තජ අර්ශස්

*නුග අරලු මෙන් රතු තැඹිලි පැහැය

*ඔලිද ඇට වලට සමානය

*රුධිරය පිටවේ.

අර්ශස් රෝග ලක්ෂණ

පුරවාදැමිම(උදර ආධ්මානය)

ආහාර හරියට නොදිරවීම(අග්නි මාන්දය )

ආහාර අරුචිය

ශරිරයේ බර බව

අලස බව

තුනටිය,තට්ටම් ,ඉකිලි ආශ්‍රිත වේදනාව.

යන ලක්ෂණ ඇති විය හැකිය.

අර්ශස් රෝගයට ප්‍රතිකාර කිරිමේදී හේතු වැලක්විය යුතුයි.රක්තාර්ශස් හැරුණු කොට අනෙක් අවස්ථාවලදී මල පිට වීම අඩුය.

පත්‍යාපත්‍ය

*මලබද්දය වැලැක්වීම

*ආහාර දිරවීමට පහසු කර වීම

*කෙදි සහිත ආහාර අනුභවය

*වතුර වැඩි පුර පානය

*උෂ්නාධ්ක ආහාර පාන වලින් වැලකිම .

* විශේෂයෙන් පාන්පිට් සහිත කෑමෙන් වැලකිම

ප්‍රතිකාර

ඕනෑම අර්ශස් ප්‍රභේදයක් ඇති අය එක දිගට දිගට දින 14 කරල් සැබෝ,කොහිල අල ,හීනටි හාල් දමා කැද සාදා බීමෙන් අර්ශස් රෝගය බොහෝ දුරට වලක්වා ගත හැකිය .

ඉහත දක්වා ඇති අයුරින් කටයුතු කිරිමෙන් අර්ශස් උපද්‍රව ඇති වීම වැලකිය හැකියි .රක්තජ අර්ශස් වලදි පලමුව රක්තය පිට වීම වැලකිය යුතුයි .
අර්ශස් රෝගයේදී තැටමීම නිසා බඩවැල පහත් වීම සිදුවේ.අර්ශස් රෝගයට නිසි ප්‍රතිකාර නොගෙන සිටිමෙන් භගන්දර ඇති විය හැකියි .එව්ට ශල්‍යකර්ම කිරිමට සිදුවේ.නිසි වෛද්‍ය උපදෙස් පරිදි දේශීය ප්‍රතිකාර මගින් අර්ශස් රෝගය සම්පූර්ණයෙන් සුව කල හැකිය.

පාරම්පරික වෛද්‍ය ශිෂ්‍ය
***කේ වින්ධ්‍යානි සමරකෝන්***

උපුටා ගැනීමෙන් වලකින්න

Dr.Roshan panagoda
Arawwala,
Pannipitiya,
0710373002

Dr. Roshan Panagoda
0710373002
Arawwala
Pannipitiya.