مايحدث في كلية تقنيات الحاسوب غوط الشعال

قال تعالى:
{كل نفس ذائقة الموت وإنما توفون أجوركم يوم القيامة فمن زحزح عن النار وأدخل الجنة فقد فاز وما الحياة الدنيا إلا متاع الغرور}

"هذا ما وعد الرحمن فأنجز وعده تفنى الخلائق ويبقى الملك لله وحده"

انتقل إلى جوار ربه الصديق والزميل/ وائل الغالي
الذي وافته المنية بعد صراع مع المرض

نعزي أنفسنا وكل أهله وزملائه وأحبابه بهذا المصاب الجلل
داعين الله سبحانه أن يغفر له ويرحمه ويسكنه الفردوس الأعلى مع الأنبياء والشهداء والصالحين وحسن أولئك رفيقا
اللهم أبدله دارا خيرا من داره وأهلا خيرا من أهله وأدخله الجنّة بغير حساب ولا سابق عذاب وأعذه اللهم من عذاب القبر ومن عذاب النار
اللهم عامله بما أنت أهله ولا تعامله بما هو أهله واجزه اللهم عن الإحسان إحسانا وعن الإساءة عفوا وغفرانا

معلومة
للي يعلق ويقول "ترجمة قوقل"

راهو ترجمة قوقل مرتبطة بنموذج الذكاء الاصطناعي gemini واللي يعتبر نموذج متطور .. ويقدر يفهم سياق الجملة إلى حد ما

خش جرب بنفسك واكتب أي اسم من الأسماء الفضيحة اللي نزلوهم الكلية .. وحتلقى إن قوقل حيغير الترجمة حسب السياق

يعني باختصار
ترجمة قوقل بريئة من الفضيحة

لذلك أعتقد والله أعلم إنهم ترجمو الأسماء بالوافي الذهبي أو أي مترجم من سنة 1900
..

يلا
قلتولي تحول رقمي وتطور وبلا بلا بلا
فضحتونا الله يهديكم 😑

بعد فضيحة الأسماء متاع أمس
المفترض نشوفو أي رد فعل من الكلية

وأعتقد في أشخاص لازم ترجع تقرا من جديد

خير يا شباب @متابعين

بمناسبة نجاح عملية الأستاذ #سالم ورجوع بصره

في مقترح من د. Saied Akka بأن انديرو حفلة بهذه المناسبة

واحني كـ #طلبة و #خريجين كتقديرا وعرفانا منا للأستاذ #سالم ولتاريخه الطويل في لازم تكون عندنا مساهمة في الأمر هذا

نبو انديرو حاجة تليق بالأستاذ وبتاريخه المشرف في الكلية

لذلك اللي يبي يساهم معانا يتواصل معاي على الخاص
https://www.facebook.com/nooreddin.4185

ومشكورين جميعا

اشهر منصة لعملات الرقيمة تتضامن مع ليبيا

منصة Binance تعلن علي Airdrop بيقمة نص مليون دولار جراء السيول و الفيضانات التي اصابت ليبيا
كل ليبي فعل حسابه باثبات العنوان قبل 11 سبتمبر بيعطوه عملة BNB
مايعادل 100$ و كان اتبت عنوانه بعد المدة هذه بينزل في حسابه 25$

مع مطالب الطلبة وبشدة

ومن واجب إدارة الكلية التحقيق في الشكاوي المقدمة من الطلبة ضد بعض أعضاء هيئة التدريس وعلى رأسهم المسجل العام

وأعتقد إن اللي طالبينه من أبسط حقوقهم

..

بعد 20 سنة لن يذهب الطالب السعودي أو القطري أو الاماراتي أو الكويتي إلى كندا أو أمريكا أو بريطانيا للتعلم
لأنه سيتلقى نفس جودة التعليم في بلده وبأرخص التكاليف

إحقاقا للحق

حسب كلام جماعة إتحاد طلبة كلية تقنية الحاسوب ـ طرابلس إن التكريم والدرع كان مقدم للأساتذة واستلمه عميد الكلية نيابة عنهم
ولكن التلاعب بالكلمات من قبل صفحة كلية تقنية الحاسوب طرابلس - المكتب ﺍﻹﻋﻼﻣﻲ صوّر أن التكريم هو للعميد لشخصه
..

شكرا لاتحاد الطلبة على بادرتهم الطيبة
وارجو من صفحة المكتب الإعلامي تعديل المنشور بما يتماشى مع الحقيقة
..

يلا
وللحديث بقية ..

المنطق يقول

- تكريم طلبة أوائل .. ماشي
- تكريم أساتذة متعاونين .. لفتة جميلة
..

باهي تكريم العميد شن موقعه من الإعراب 🤔
ممكن حد يتكرم ويعطيني أسباب التكريم 😒

وإلا هي جو
All my people love me
..

زعمك من دفع حق الدرع والتكريم .. وإلا على حساب الكلية 🫣

يلا
وللحديث بقية ..

قال رسول الله ﷺ:

{إن الله وملائكته وأهل السموات والأرض حتى النملة في جحرها وحتى الحوت ليصلون على معلم الناس الخير}

بمناسبة تكريم عدد من الذي تم أمس في الكلية

كلمة شكر في حق كل معلم أدى الأمانة خير أداء
..

أما بالنسبة للتكريم متاع أمس 😉

فللحديث بقية ..

أولا .. ألف مبروك لكل الناجحين .. واسأل الله التوفيق لمن لم يوفق في النجاح هذا الفصل

ثانيا ..
علاش أسلوب التلقيح المستخدم في الفقرة الأولى للمنشور ؟؟

يا والله أسلوب راقي وخلاص

لا تعرفها صفحة رسمية للكلية .. لا صفحة تعبر عن رأي أصحابها

يلا
وللحديث بقية ..

نتيجة الفصل الدراسي ربيع2021

البعض مستغرب في انتهاج صفحة كلية تقنية الحاسوب طرابلس - المكتب ﺍﻹﻋﻼﻣﻲ لنهج تقييد التعليقات على المنشورات في الصفحة

عن نفسي لا أستغرب هذا النهج .. لأنهم سائرون على نفس النهج الخاص بصفحة وزارة التعليم التقني والفني - ليبيا
..

بس نصيحة للقائمين على الصفحتين .. وهمسة في أذن المسؤولين في الكلية والوزارة على حد سواء

المحبة والاحترام أمران لا يمكن فرضهم بأي وسيلة
لابد أن يكون الاحترام نابع من احترامنا لأنفسنا
والمحبة نابعة من محبتنا للآخرين

وقبل كل شيء التواضع
فمن تواضع لله رفعه
..

وللحديث بقية

كمثال بسيط على دعم إدارة الكلية الحالية لطلبتها وخريجها
..

في سنة 2017 شاركنا في مسابقة NI GSD musabaka الإقليمية المؤهلة للتصفيات النهائية المنظمة من شركة National Instruments

(المنشور عن المسابقة 👇)
https://www.facebook.com/w.happens/photos/a.234604396588163/1225065270875399/
..

المهم
لأننا شاركنا باسم الكلية في المسابقة طلبنا ورقة رسمية من الكلية كإجراء روتيني من ضمن الأوراق المطلوبة بنحطوها مع البحث اللي مشاركين به

5 سنين فاتو على هالقصة .. والورقة لتوا ما طبعوهاش 😂😂
..

الحمد لله مشاركتنا كانت ناجحة
وتحصل مشروعنا على تقييم 78/100 .. وهذا فخر لو تعلمون عظيم بالنسبة لمسابقة فيها المشاركين من 21 دولة ومشاريع بالمئات

والمشاركين محصلين دعم من كلياتهم .. واحني مدعومين من الأهل والأصحاب وبعلاقاتنا الطيبة مع الناس
..

يلا

وللحديث بقية ..

في يوم ما كانت الكلية تطمح للتطوير ولها رؤية وتخطيط استراتيجي للرفع من كفاءة طلبتها

الله يذكر بالخير د. عميد الكلية السابق اللي حاول يقدم حاجة
وسعى وبمبادرة شخصية منه إنه يوزع مجهزة لطلبة قسم التحكم الآلي
وكانت المبادرة إن الحقيبة حتوزع على طلبة القسم في كل بداية عام دراسي (كل فصلين)

ولكن للأسف انتهى الحلم وتم وأده في مهده بإقالة الإدارة السابقة
..

والسؤال

وين المبادرات اللي في مصلحة الطالب ..؟؟

- وين مبادرات وزارة التعليم التقني والفني - ليبيا
- وين مبادرات إدارة الكلية الحالية

أصلا حتى مبادرة إنشاء كلية تقنية الحاسوب طرابلس - المكتب ﺍﻹﻋﻼﻣﻲ كانت فكرة من عميد الكلية السابق د.
..

يلا

وللحديث بقية ..

بمبادرة من المجلس العملي بكلية تقنية الحاسوب طرابلس , سيتم منح حقيبة الكترونية لطلبة قسم التحكم بالكلية .

هذه المبادرة خاصة بالكلية و ليس لها علاقة بإدارة الكليات أو وزارة التعليم العالي .

و هذا ما يميزها و يميز طلبة كليتنا عن غيرهم .

الأهم من الوصول إلى القمة .. هي المحافظة على مكانك في القمة

وكليتنا كانت في قمة الكليات من جميع النواحي
- تنظيم ونظافة
- هيئة تدريس والموظفين
- مناهج تعليمية
- معامل تدريب
- هيكلية على أعلى المستويات
- الرؤية والهدف والتخطيط الاستراتيجي
- الموارد المؤسسية
- القيادة والإدارة

وغيرها الكثير مما امتازت به كليتنا في السابق
وهذا ما جعل لها اسم ومكانة عالية
وكانت النتيجة خريجين أكفاء مشهود لهم بالكفاءة والمهارة في مختلف المجالات
حتى لقد أصبح مجرد الانتماء لهذه الكلية العريقة مصدر فخر واعتزاز ما بعده فخر في ليبيا
..

ولكن شن فضل من أيام المجد الغابر ؟؟
لا موارد ولا إمكانيات ولا أعضاء هيئة تدريس راضيين حتى يتعاونو مع الكلية
مناهج قديمة لم يصل إليها التطوير والتنقيح من أول ما حطوها
تشوشت الرؤية ومعاش في طموح إلا تحصل كرسي ومنصب تكوش بيه على غيرك

- مرافق تعليمية مدمرة
- معامل نصها واقفة
- مكتبة مسكرة
- لا رؤية لا هدف
- لا قيادة ولا إدارة
- التنظيم والنظافة لما بيجو ضيوف (تتنظف من فوق لفوق)
..

وين وزارة التعليم التقني والفني - ليبيا
وين دور الوزارة في دعم الكليات التقنية اللي تحت مسؤوليتها
وين دورها الرقابي
وين رؤية الوزارة في تطوير المؤسسات التعليمية التقنية
..

يا إدارة الكلية يا جماعة كلية تقنية الحاسوب طرابلس - المكتب ﺍﻹﻋﻼﻣﻲ
وين دوركم
أصلا وينكم من الأساس
هل مجرد اجتماع روتيني كل بداية فصل دراسي يكفي ..؟؟!!

كرامة الطلبة ممتهنة
وصلنا لدرجة الطالب مش لاقي نظيفة بيش يقضي حاجته (أكرمكم الله)
مش لاقي مكان نظيف يقعمز فيه بين المحاضرات
..

والله اللي صاير شيء يُبكي العين ويُدمي القلب

مش لاقي كلمات توصف اللي وصلاته الكلية
..

لا حول ولا قوة إلا بالله

وللحديث بقية ..

بالشوية يا جماعة الخير

شن ذنبي تحاولو تخترقوني 🤔
وإلا زعمك صدفة 😂😂

يلا ..
مش مشكلة .. محاولة فاشلة ما تضرش

للحديث بقية ..

بخصوص موضوع الطالبة

عدة أشخاص تواصلو معاي بالخصوص
والكل متفق على إن مجلس تأديبي لمجرد منشور على الفيس حاجة مبالغ فيها

ولكن وبعد ما قريت المنشور اللي كتباته الطالبة ما شفتش حاجة ممكن نعتبروها جارحة .. كلها "تلقيحات" عادية
ومع هذا مبدأ الحرية يعطينا مساحة للانتقاد حتى ولو كانت بطريقة شديدة

ومن هنا أتمنى من السيد #عميد الكلية أ. عقيل محمد عقيل يشوف الموضوع
فلو كان المجلس التأديبي وما جرى فيه بسبب منشور على الفيس .. فياريت يوقف هالمهزلة ومعاش تتكرر في الجديد
مش حلوة في حق إدارة الكلية تنزل لمستوى تقعد تتبع الطلبة شن كتبو وشن قالو في الفيس
..

مصيبة لو فاضيين لدرجة اتبعو في الطلبة وكل حاجة تنكتب اديرو منها راس موضوع
..

بالله نبو نسكرو الموضوع هذا
عندي حاجات أهم في الكلية نبي نتكلم عليها

رانا وصلنا لدرجة #الطلبة مش لاقيين لائقة .. ومن غير ما نكمل فهمكم كفاية

وللحديث بقية ..

توا خلونا من صورة الجهاز اللي دارتلنا مشكلة

أنا حاولت نختار أخف صورة ممكنة
ولكن قلة انتباهي خلاني نختار صورة في موضوع ثاني

يلا ..
مازال عندنا ملفات حنفتحوها إن شاء الله
وعادي لو أي حد عنده فيديو أو صورة للوضع المزري للكلية .. ويبي يشارك بها يبعتها على الخاص
بس بالله رجاء خاص فكوني من صور وفيديوات 💩💩 (أكرمكم الله) .. مش ناقصني قلبة بطن 🤢🤮

وللحديث بقية ..

بالشوية خلي نستوعب كمية الـ🤬 اللي سمعته

طالبة تأخرت 3 دقائق تُمنع من دخول الامتحان
ولما كتبت منشور تشكي في الظلم اللي صار عليها
تعرضت لظلم أكبر منه .. ودارولها مجلس تأديبي
..

بداية عندي كلمة للي قرر (اسمعها بصوت #صاحب أحمد العادي)

يعني انت بدل ما تكحلها تعميها .. وبدل ما تحل مشكلة ادير مشكلة أكبر
..

اني قبل ما ننشر أي حاجة في الموضوع نبي نشوف رد أ. Agil Agil ممكن الراجل ما عنداش علم بمجلس تأديبي في حق طالبة ظلما وعدوانا

مع العلم إن الموضوع منشور في صفحة الكلية الرسمية كلية تقنية الحاسوب طرابلس - المكتب ﺍﻹﻋﻼﻣﻲ اللي مفروض يتابع فيها ومسؤول عن كل ما ينشر فيها
..

وبالنسبة للأستاذة الفاضلة اللي فرحانة بالمنصب

للحديث بقية ..

السلام عليكم

ليا هلبا ما نشرتش على الصفحة

ولكن لفت انتباهي موضوع منتشر في قروبات الكلية
شن قصة #الطالبة اريحا قنيدي ؟؟