Sarpaylawka - စာပေလောက

"ဦးနှောက် နှင့် ငွေ ယှဉ်တွဲအသုံးချခြင်း" " ငွေရှာနည်း စိတ်ပညာ "
(The Psychology of Money)
စာအုပ်ကနေပေးတဲ့ သင်ခန်းစာ ၁၀ ခု

၁။ ဘက်မျှနေပါစေ

ကြွယ်ဝချမ်းသာစေဖို့ တစ်ခုတည်းသောနည်းလမ်းကတော့ ခြိုးခြံချွေတာခြင်း နှင့် ကြောက်စိတ်တို့ကိုပေါင်းစပ်လိုက်ဖို့ပါပဲ။ ငွေရှာတဲ့အခါ အကောင်းမြင်ပြီး စွန့်စားရဲရမယ် ဆိုပေမယ့် စွန့်စားခြင်းရဲ့ ဆန့်ကျင်ဘက် ကိုလည်း လိုအပ်ပါတယ်။

၂။ မော်တော်ကားထဲကလူရဲ့ ဝိရောဓိ ဥပမာ

သင် ပိုင်ဆိုင်တဲ့စည်းစိမ်တွေကို သင်ကိုယ်တိုင်လောက် ဘယ်သူကမှ အထင်ကြီးမက်မောကြတာ မဟုတ်ပါဘူး။ တခြားလူတွေ အထင်ကြီး နှစ်သက်လာအောင် လူတွေက သူတို့ပိုင်ဆိုင်တဲ့ စည်းစိမ်တွေကို ထုတ်ဖော်ပြသကြပါတယ်။ ဒါပေမယ့် လူတွေက သင့်ကို သဘောကျနှစ်သက်ကြတာမဟုတ်ပဲ တကယ်က သူတို့ သဘောကျနှစ်သက်တာ သင် ပိုင်ဆိုင်တဲ့စည်းစိမ်တွေကိုပါ။

၃။ အလိုမကြီးပါနှင့်

အချိန်နဲ့ အမျှကြီးထွားနေတဲ့ လိုချင်တက်မက်စိတ်ကို ရပ်တန့်နိုင်ခြင်းဟာ အလွန်အရေးကြီးသော ငွေကြေးဆိုင်ရာကျွမ်းကျင်မှုတစ်ခုပါပဲ။ ဝယ်ယူသုံးစွဲသူတွေကိုယ်တိုင် ဖန်တီးနိုင်တဲ့ လူထိုင်မှုပုံစံ ဖြစ်ပေါ်လာတာဟာ သက်သေပါပဲ။ အရင်းရှင်စနစ်ဟာ နောက်ဆုံးပေါ်ပစ္စည်းတွေ ဝယ်ယူသုံးစွဲမှ လူရာဝင်မယ်လို့ ခံစားရစေပါတယ်။

၄။ ပေါင်းစပ်မှု ကနေဖြစ်တည်လာတဲ့ တိုးပွားလာခြင်း အယူအဆ

ငွေကို သူ့ရဲ့ ပင်ကို သဘော သဘာဝ အတိုင်း တိုးပွားလာခွင့်ပေးလိုက်ပါ။

၅။ စီမံကိန်းတွေချမှတ်ထားဖို့ လိုအပ်တယ် ဆိုပေမယ့်…

စီမံထားတဲ့ အတိုင်းဖြစ်မလာတဲ့အခါ စီမံနိုင်အောင် ပြင်ဆင်ထားနိုင်ဖို့က အရေးကြီးဆုံးပါ။ ဘဝမှာ ဖြစ်တတ်ပါတယ်။ အကောင်းဆုံးအတွက် စီမံထားသလိုမျိုး အဆိုးဆုံးတွေကို ရင်ဆိုင်နိုင်အောင်လည်း စီမံကိန်းတွေ ပြင်ဆင်ထားသင့်ပါတယ်။

၆။ သင် ဘယ်လောက် အမှားများနေပါစေ တစ်ခါလောက် မှန်ကန်သွားရုံနဲ့ သင်ချမ်းသာနိုင်ပါတယ်

ကံကောင်းတယ် ကံဆိုးတယ်ဆိုတာ သင့်ရဲ့ အမြင်ပေါ်မှာပဲမူတည်တာပါ။ ငွေကြေးနဲ့ ပတ်သက်ရင် ရေရှည်အတွက်ပဲ အလုပ်လုပ်ပါ။

၇။ ရင်းနှီးမြှပ်နှံမှုကနေရလာတဲ့ အကြီးမားဆုံးသော အကျိုးအမြတ်ဆိုတာ အချိန်ကိုလိုသလို စီမံခန့်ခွဲနိုင်ခြင်းပါ

ငွေရဲ့ တကယ့်အရေးအပါဆုံးသော စွမ်းအားဆိုတာ သင့်ရဲ့ အချိန်တွေကို လိုအပ်သလို စီမံခန့်ခွဲခွင့်ပေးတာပါပဲ။ သင့်မှာသာ ငွေရှိနေရင် သင် ဘယ်အချိန်မှာပဲဖြစ်ဖြစ် သင် လုပ်ချင်တာကိုလုပ်နိုင်ပါတယ်။

၈။ လူသားဆန်မှုကို မြှင့်တင်ပါ

ငွေပိုစုနိုင်မယ့် အထိရောက်ဆုံးနည်းလမ်းကတော့ ဝင်ငွေတိုးအောင် လုပ်တာထက်စာရင် လူသားဆန်မှုကို မြှင့်တင်ဖို့ပါ။ အနာဂတ်အတွက် ဆုံးဖြတ်ချက်တွေချတဲ့ အခါ မိမိရဲ့ အတ္တကို ဘေးချိတ်ထားဖို့လိုပါတယ်။ အထူးသဖြင့် ရေရှည်ပန်းတိုင်များကို သတ်မှတ်တဲ့ အခါမှာပေါ့။

၉။ တကယ့် ကြွယ်ဝချမ်းသာမှုကို သင် မမြင်တွေ့နိုင်ပါဘူး

ကျွန်တော်တို့ မျက်စိနဲ့ မြင်တွေ့နိုင်တဲ့ အရာတွေဖြစ်တဲ့ မော်တော်ကား၊ အဝတ်အစား၊ နေအိမ် စတာတွေ အပေါ်မူတည်ပြီး ကြွယ်ဝချမ်းသာမှုကို သတ်မှတ်ကြတာပါ။ ငွေကြေးဆိုင်ရာ အောင်မြင်မှုတွေကိုလည်း အပေါ်ယံ အပြင်အဆင်တွေအပေါ် မူတည်ပြီး သတ်မှတ်ကြတာပါ။ ဒါပေမယ့် တကယ့် ကြွယ်ဝချမ်းသာမှုဆိုတာ ထင်သာမြင်သာ ရှိနေတာ မဟုတ်ပါဘူး။

၁၀။ အရာရာတိုင်းက အမြဲတမ်း တည်မြဲနေတာ မဟုတ်ပါဘူး

သင်ဟာ ဝင်ငွေတစ်ခုတည်းအပေါ် မှီခိုနေတာဆိုရင် တချိန်ချိန်မှာ ကပ်ဘေးဆိုက်နိုင်ပါတယ်။ မတူကွဲပြားတဲ့ ဝင်ငွေရလမ်းကြောင်း နဲ့ ကျွမ်းကျင်မှု များကို ရှာဖွေတည်ဆောက်ပါ။

===

နိယာမ (Same as Ever)
အနာဂတ်အတွက် အစီအမံတွေရေးဆွဲကြတဲ့အခါ ကျွန်တော်တို့ မကြာခဏ မေးတတ်တာရှိပါတယ်။
" လာမယ့်နှစ်မှာ စီးပွားရေးက ဘယ်လိုဖြစ်လာမလဲ။ " ဒါမှမဟုတ် " နောက်လာမယ့် ဆယ်နှစ်မှာ ဘာတွေကွာခြားသွားမှာလဲ။ "

ဒါပေမယ့် ကြိုတင်ခန့်မှန်းရတာ ခက်ပါတယ်။ အနာဂတ်ကို ပုံဖော်ပေးမယ့် အရေးကြီးတဲ့ အဖြစ်အပျက်များကို ပင်ကိုအားဖြင့် မှန်းဆလို့မရပါဘူး။

အဲဒီအစား အခြားမတူတဲ့ မေးခွန်းကို ကျွန်တော်တို့ ပြောင်းမေးသင့်ပါတယ်။

"အခုကနေစပြီး နောက်လာမယ့် ဆယ်နှစ်မှာ မပြောင်းလဲတာ ဘာတွေဖြစ်မလဲ။"

"အခုကနေစပြီး နောက်လာမယ့် နှစ်တစ်ရာမှာရော မပြောင်းလဲတာ ဘာတွေဖြစ်မလဲ။"

ကြိုတင်မသိနိုင်တဲ့ အနာဂတ်အတွက် ဘယ်တော့မှ မပြောင်းလဲတဲ့ အသိပညာများဟာ မသေချာမရေရာတဲ့ ခန့်မှန်းချက်များထက် ပိုအသုံးဝင်ပြီး ပိုအရေးကြီးပါတယ်။ " နိယာမ " စာအုပ်ထဲမှာ ရောင်းအားအကောင်းဆုံး စာရေးဆရာက ဘဝ ၊ အမူအကျင့် နှင့် စီးပွားရေးများဟာ အမြဲတမ်းအတူတူပဲဆိုတာကို ဇာတ်လမ်းတို ၂၃ ခုဖြင့် ဝေမျှထားပါတယ်။

ဘယ်တော့မှ မပြောင်းလဲသော အသိပညာများကို စွဲကိုင်ထားမယ်ဆိုရင် စွန့်စားမှု ၊ အခွင့်အလမ်း ၊ မသေချာမရေရာတဲ့ အနာဂတ်တွေမှာ လမ်းကြောင်းရှာတာနှင့် ပတ်သက်ပြီး သင့်မှာ တွေးခေါ်နိုင်စွမ်းအသစ်တွေ အားကောင်းလာပါလိမ့်မယ်။ ရင်းနှီးပြီးသား အကြောင်းအရာ ၊ အဖြစ်အပျက်တွေကို လာမယ့်နှစ်တွေမှာ ထပ်ခါထပ်ခါ မြင်တွေ့ရတိုင်း သင် ခေါင်းတငြိမ့်ငြိမ့်နဲ့ ပြောမိပါလိမ့်မယ်။

" သြော် ၊ နိယာမ ပါပဲ။ "
Photo Amazon Australia

တစ်ချိန်က အမျိုးသမီးကလောင်များနဲ့၊အမျိုးသမီးထုကို ကိုယ်စားပြုအောင်မြင်ခဲ့တဲ့
တိုင်းရင်းမေဂျာနယ်မှာ ပါဝင်ခဲ့တဲ့ အမျိုးသမီးကလောင်ရှင်များရဲ့ ဝတ္ထုတိုများစုစည်းထားပါတယ်။
ဝတ္တုတို အပုဒ်နှစ်ဆယ်ပါဝင်ပြီး ဆရာမများရဲ့ ငယ်နုစဉ်လက်ရာများနှင့် တစ်‌‌ ခေတ်အခါက
လူနေမှုဘဝတွေကိုလည်း ခံစားရမှာပါ။

ရောင်းကုန်နဲ့ စင်များ

ရောင်းဖို့ ခင်းကျင်းပြသထားတဲ့ အရာဝတ္ထုတိုင်းအတွက် ဘေးပတ်လည်မှာ နေရာလွတ် အနည်းအကျဉ်းတော့ ရှိထားသင့်ပါတယ်။ သူတို့ဆီက ရောင်စဉ်ဖြာထွက်တာကို ခံစားမိစေဖို့ပါ။ တကယ်လို့ ပစ္စည်းတွေကို ပြွတ်သိပ်နေအောင် စီထားတယ်ဆိုရင် တစ်ခုချင်းစီကို သေချာမြင်ရဖို့ ခက်သွားနိုင်ပါတယ်။ နောက်ပြီး ကပ်စတန်မာရဲ့ မျက်လုံးအကြည့်တွေကို စွဲငင်မထားနိုင်တော့ဘဲ ဖြတ်တောက်ပစ်သလို ဖြစ်သွားစေပါလိမ့်မယ်။ ဒါဟာ အားလုံးအတူတူဖြစ်နေတဲ့ “ပစ္စည်း” အစုအပုံလိုက်အပေါ်မှာ အသုံးချလို့ မရပါဘူး။ ဥပမာ - စားစရာ စည်သွပ်ဘူးတွေကို ပိရမစ်ပုံစံ စီထားတဲ့အပုံ။

ရောင်းနေရတာထက် ပိုရောင်းပါ။ သင့်အနေနဲ့ ပစ္စည်းတစ်ခုက အဝယ်လိုက်လာပြီဆိုတာကို သတိထားမိတာနဲ့ စပြီး မီးမောင်းထိုးပြဖို့ လုပ်ပါ။ အဲဒီအခြေအနေနဲ့ သင့်တော်တဲ့ ဘယ်လိုနည်းလမ်းနဲ့မဆို ကပ်စတန်မာတွေ သတိမူမိအောင် လုပ်ဆောင်ပါ။ ကပ်စတန်မာတွေရဲ့ မျက်လုံးအကြည့်နဲ့ တတန်းတည်း ရှိနိုင်မယ့်နေရာကို ရွှေ့တာ၊ သို့မဟုတ် ငွေရှင်းကောင်တာအနီးမှာ ပြသထားတာ၊ သို့မဟုတ် ဆိုင်ထဲကိုဝင်လာတာနဲ့ ပထမဆုံး မြင်ရမယ့်နေရာမှာ စီထားတာ စသဖြင့်ပေါ့။

တကယ်လို့ ဘယ်ဌာနမှာ ဘယ်ပစ္စည်းက အရောင်းရဆုံးဖြစ်မလဲ မသေချာဘူးဆိုရင် ဌာနတစ်ခုတည်းထက်ပိုပြီး အရောင်းရဆုံးပစ္စည်းကို ခင်းကျင်းပြသထားပေးလိုက်ပါ။ တကယ်လို့ ပြထားတဲ့ နေရာဌာနတိုင်းမှာ အရောင်းသွက်နေတယ်ဆိုရင် အဲဒီနေရာတိုင်းမှာ ထားပေးလိုက်ပါ။

တကယ်လို့ အခင်းအကျင်းတွေ ခင်းကျင်းတဲ့နေရာမှာ အထောက်အကူတွေ၊ တိုင်တွေကို သုံးမယ်ဆိုရင် တစ်ခုသတိထားပါ။ ခင်းကျင်းထားတဲ့အထဲ ရောင်းကုန်အဖြစ် အမှတ်မှားစေမယ့်အရာမျိုးကို မသုံးပါနဲ့။ တကယ်လို့ ကပ်စတန်မာတစ်ယောက်က “သြော်… အဲဒါက ရောင်းဖို့ မဟုတ်ပါဘူး” ဆိုတဲ့စကားကို ကြားလိုက်ရရင် သင့်ဆိုင်ကို အလိုလို မုန်းသွားတတ်ပါတယ်။ သူတို့ရဲ့ စကားလုံးတွေ၊ အပြုအမူတွေထဲမှာ မဖော်ပြပေမယ့် ဘယ်တော့မှ သင့်ဆိုင်ကို ပြန်လာတော့မှာ မဟုတ်သလို ဘယ်သူ့ကိုမှလည်း ညွှန်းပေးတော့မှာ မဟုတ်ပါဘူး။ ရောင်းဈေးမေးပြီ ဆိုကတည်းက သူတို့ဟာ အဲဒီပစ္စည်းကို ပိုင်ဆိုင်ရတော့မယ်ဆိုတဲ့ ပျော်ရွှင်မှုကို ပုံဖော်ခံစားနေနှင့်ပါပြီ။ အဲဒီအချိန်မှာသင်က သူတို့ရဲ့ အပျော်ကို ရိုက်ချိုးဖျက်ဆီးပစ်လိုက်တာပါပဲ။ ဒါဟာ ရှေးဟောင်းပစ္စည်း အရောင်းဆိုင်တွေမှာ ပရိဘောဂ အခင်းအကျင်းနဲ့ ပတ်သက်ပြီး ဖြစ်လေ့ရှိတဲ့ ပြဿနာတစ်ခုပါပဲ။ မျက်နှာကျက် အမြင့်ကြီးတွေရှိတဲ့ ဆိုင်တချို့ကို ကျွန်တော်ရောက်ဖူးပါတယ်။ စင်တွေရဲ့ အပေါ်ဘက် နေရာအလွတ်တွေမှာ ရောင်းဖို့မဟုတ်တဲ့ အနုပညာ ပစ္စည်းတွေကို ခင်းကျင်းပြသထားတတ်တာ တွေ့ခဲ့ရပါတယ်။ ကျွန်တော်ကတော့ ဒါမျိုးအားမပေးပါဘူး။ ပြတိုက်လို စတိုးဆိုင်တစ်ခုဟာ ယင်ဓါတ်သိပ်များပါတယ်။ တကယ်လို့ သင့်ဆိုင်မှာ ရောင်းဖို့အတွက်လို့ ထင်ရလောက်တဲ့ ပစ္စည်းရှိနေမယ်၊ ဒါပေမဲ့ အဲဒီပစ္စည်းဟာ ရောင်းဖို့ မဟုတ်နေဘူးဆိုရင် ရောင်းရန်မဟုတ်ပါ ဆိုတဲ့တံဆိပ်သာ ကပ်ထားလိုက်ပါ။ အပြောင်းအလဲသေးသေးလေးက တိုးတက်မှု အကြီးကြီးကို ဖြစ်စေပါတယ်။ ဒီထက်ပိုကောင်းတဲ့ အကြံတစ်ခု ရှိပါသေးတယ်။ အဲဒီပစ္စည်းအပေါ်မှာ ဈေးနှုန်းအမြင့်ကြီး ကပ်ထားလိုက်တာပါ။

တကယ်လို့ သင်ကပ်ထားတဲ့ဈေးကို ပေးပြီးဝယ်မယ့်သူရှိလာမယ်၊ သင်ကလည်း အဲဒီဈေးရရင် ရောင်းလိုက်ဖို့ ဝန်မလေးဘူးဆိုရင်တော့ အဲဒီပစ္စည်းနေရာမှာ အစားထိုးဖို့ နောက်ထပ်ပစ္စည်း ကောင်းတဲ့အရာလေးတွေ ရှာလို့ရတာပေါ့။ ကပ်စတန်မာကို ပျော်ရွှင်ပါစေ။ ဒါဆို သူတို့ကလည်း သင့်ကို ပျော်ရွှင်စေမှာဖြစ်ပါတယ်။

ရာသီပေါ် အလှဆင်ပစ္စည်းတွေနဲ့ အသုံးအဆောင်တွေကလည်း လက်မလည်အောင် ရောင်းရတတ်ပါတယ်။ အထူးသဖြင့် နှစ်အကုန်ပိုင်းမှာပေါ့။ လူတွေက သင့်ဆိုင်ကိုလာပြီး ဝယ်ကြတာပါ။ ဆိုင်တစ်ဆိုင်မှာ ဘယ်လောက်အထိ ပြင်ဆင်ထားသလဲဆိုတာကိုကြည့်ပြီး အံ့အားသင့်ရအောင် လာကြတာ မဟုတ်ပါဘူး။ မင်သက်အံ့အားသင့်လောက်စရာ အပြင်အဆင်တွေက ရောင်းကုန်တွေနဲ့ ဖက်ပြိုင်နေတာမျိုး မဖြစ်ပါစေနဲ့။ ဆိုင်တစ်ဆိုင်အတွက် ရာသီစာ အပြင်အဆင်တွေထားရတာ သိပ်ပြီး မလိုအပ်ပါဘူး။ နောက်ပြီး ထိန်းသိမ်းရတာက ပိုအားစိုက်ရစေပါတယ်။ အလှပြ ပြတင်းပေါက်တွေက အကြည့်ကို ဖမ်းစားနိုင်စေတဲ့ အကောင်းဆုံး နေရာတွေပါပဲ။ ခရစ္စမတ်အချိန်မှာ သူနဲ့ကိုက်ညီတဲ့ လူ့ဘီလူးကြီးတစ်ကောင်ပါဝင်တဲ့ ဇာတ်ဝင်ခန်းတစ်ခုကို အလှပြ ပြတင်းပေါက်မှာ ပြထားတဲ့ဆိုင်တစ်ဆိုင်ကို ကျွန်တော် မှတ်မိပါသေးတယ်။ အဲဒါကို လူ့ဘီလူးအရုပ်တွေ ထုတ်လုပ်တဲ့ကုမ္ပဏီက ဒီဇိုင်းဆင်ပေးထားတာပါ။ အဲဒီ ဇာတ်ဝင်ခန်းထဲက လူတိုင်း၊ တိရစ္ဆာန်တိုင်းက လူ့ဘီလူးပုံစံ ဆံပင်စုပ်ဖွား၊ အားပါးတရ ပါးစပ်ဖြဲရယ်နေပြီး လက်နှစ်ဖက်ကို ဆန့်တန်းထားကြတာပါ။ မြင်တဲ့သူတိုင်း မပြုံးဘဲမနေနိုင်အောင် ဖြစ်စေပါတယ်။

ပြင်ဆင်ထိန်းသိမ်းခြင်းက အခင်းအကျင်းရဲ့ တစိတ်တပိုင်း ဖြစ်ပါတယ်။ နောက်ပြီး ဒါက လတ်ဆတ်တဲ့ချီဓါတ်ကို ဆိုင်ထဲ ဖိတ်ခေါ်သလို ဖြစ်စေပါတယ်။ ကပ်စတန်မာတစ်ယောက်အတွက် အမြင်မသင့်တဲ့ဧရိယာတွေ မရှိနေသင့်ပါဘူး။ အရောင်းခန်းမထဲက ပစ္စည်းတွေဟာ နေ့စဉ်တိုင်းလိုလို ဖုန်သုတ်သင့်ပါတယ်။ အရည်အသွေးမြင့် ကြက်မွေးဖုန်သုတ်တံက မရှိမဖြစ်ဆိုပေမယ့် ဈေးတော့ မသေးလှပါဘူး။ (နောက်ပြီး အရောင်ဆိုးထားတဲ့ အမွေးအတောင်တွေလည်း မဟုတ်ပါဘူး။) ကြမ်းပြင်က သန့်ရှင်းနေတယ်ဆိုရင် တံမြက်စည်းမသုံးပါနဲ့။ အဲဒီလိုလုပ်ခြင်းက ဖုန်ပိုထစေပါတယ်။ ဖုန်မှုန့်တွေကို ဖယ်ရှားဖို့အတွက် ဖုန်စုပ်စက်ကို သုံးပါ။ ဖုန်တက်နေတဲ့ စတိုးဆိုင်က သူ့ရဲ့ အရည်အချင်းရှိသလောက် တက်ကုန်ဖွင့်ဖို့ မဖြစ်နိုင်ပါဘူး။ ဒါကြောင့် သန့်ရှင်းရေးလုပ်ပါ။ အတော်ဆုံး သန့်ရှင်းရေးသမားဆိုတာ စက်ရုပ်တစ်ရုပ်လို သန့်ရှင်းရေးလုပ်သွားရုံ လုပ်တတ်တဲ့သူမဟုတ်ဘဲ ဖုန်ရှိမရှိကို ဘယ်လိုကြည့်ရမလဲ သိတဲ့သူ ဖြစ်ပါတယ်။ ငွေသိမ်းကောင်တာကို ကပ်စတန်မာတစ်ယောက်ရဲ့ အမြင်ကနေ သေချာဂရုစိုက်ပြီးကြည့်ပါ။

မကြာခင်ထွက်မည့် လက်လီအရောင်းဆိုင် ဖုန်းရွှေစာအုပ်မှ

ခင်းကျင်းနေရာချနည်း

ငွေနဲ့ပတ်သက်တဲ့နေရာတွေ

ကပ်စတန်မာတွေကို ငွေသိမ်းကောင်တာ အလွယ်တကူ ရှာတွေ့ပါစေ။ ဒါကိုက ငွေသိမ်းကောင်တာ ဘယ်မှာထားသင့်သလဲ ဆိုတာရဲ့ ပထမဆုံး ဥပဒေသဖြစ်ပါတယ်။ ဖြစ်နိုငမယ်ဆိုရင် ငွေသိမ်းဝန်ထမ်းကို အမြင်ကျယ်တဲ့နေရာ ရပါစေ။ အရောင်းခန်းမတစ်ခုလုံးကို မြင်နိုင်တဲ့ မြင်ကွင်းကျယ် ဖြစ်စေဖို့ ဆိုလိုတာပါ။ သူတို့ရဲ့ မြင်ကွင်းထဲမှာ ဖြစ်နိုင်မယ်ဆိုရင် စတိုးဆိုင်ဝင်ပေါက်ပါ ပါဝင်ပါစေ။ ကပ်စတန်မာက သင့်ရဲ့ ငွေသိမ်းအံဆွဲကို အမြင်ခံလို့ မဖြစ်ပါဘူး။ အဲဒီလို အမြင်ခံလိုက်ခြင်းက ကပ်စတန်မာကို အလွန်အမင်း အသာစီးပေးလိုက်သလို ဖြစ်စေပါတယ်။

စတိုးဆိုင် သေးသေးလေးတွေမှာဆိုရင် ငွေသိမ်းဝန်ထမ်းကသာ တစ်ဦးတည်းသော ဝန်ထမ်းဖြစ်ပါတယ်။ အဲဒီလိုသာဖြစ်နေပြီဆိုရင် ငွေသိမ်းကောင်တာကို နေရာချရာမှာ အတော်လေး သတိထားရပါလိမ့်မယ်။ ငွေသိမ်းဝန်ထမ်းကို ဝင်ပေါက်နဲ့ အရောင်းခန်းမ နှစ်ခုလုံးကို မြင်ရအောင် လုပ်ပေးထားပါ။ တကယ်လို့ အရေးပါတဲ့ အလှပြ ပြတင်းပေါက်တွေရှိနေမယ်ဆိုရင် အဲဒီလိုလုပ်ဖို့က နည်းနည်းတော့ လက်ဝင်ပါတယ်။ ဘေးကဖြတ်သွားသူတစ်ယောက်က ပြတင်းပေါက်ကနေ လှမ်းကြည့်လိုက်ရင် ငွေသိမ်းဝန်ထမ်းရဲ့ နောက်ကျော သို့မဟုတ် ဘေးတိုက်ကြီးကို မြင်နေရတာ သိပ်တော့ အဆင်မပြေပါဘူး။

ငွေသိမ်းကောင်တာ မျက်နှာပြင်ဟာ ရေရှည်အကြမ်းပတမ်း သုံးဖို့အတွက်၊ ကြည့်ကောင်းနေစေဖို့အတွက် ဘာအသားနဲ့ပဲဖြစ်ဖြစ် ရပါတယ်။ ကျောက်သားနဲ့ဆိုရင်တော့ အလွန်အေးစက် မာကျောနေလို့ ခြွင်းချက်ဖြစ်ပါတယ်။ သတ္ထုသားတွေကလည်း အလွန်အေးစက်ပြီး အစားအသောက် ရောင်းတဲ့ဆိုင်တွေအတွက် အကောင်းဆုံးပါပဲ။ သန့်ရှင်းရေးအလွန်ကောင်းတယ်လို့ အထင်ရောက်စေတာကြောင့်ပါ။ မှန်သားမျက်နှာပြင်ကလည်း သူ့ကို အောက်ကနေ ထောက်ခံပေးထားတဲ့ မျက်နှာပြင်ကို အစွန်းထွက်ပြီး ကျော်မနေသေးသရွေ့ အဆင်ပြေပါတယ်။

တကယ်လို့ ငွေသိမ်းကောင်တာက အင်္ဂလိပ်အက္ခရာ L ပုံစံဖြစ်နေရင်တော့ ဒါဟာ အဆိပ်မြှားလို့ခေါ်တဲ့ ကြမ်းရှရှစွမ်းအင်တစ်မျိုး ဖြစ်စေပါတယ်။ ကောင်တာရဲ့ချွန်ထွက်နေတဲ့ ဒေါင့်ချွန်းက အောက်ပါပုံအတိုင်း အခန်းအတွင်းဘက်ဆီ တည့်တည့်ကြီး ညွှန်ပြသလိုမျိုး ဖြစ်နေနိုင်ပါတယ်။ အဲဒီအဆိပ်မြှား ဦးမလှည့်သင့်တဲ့ နေရာနှစ်ခုရှိပါတယ်။ အဲဒါတွေကတော့ အရှေ့တံခါးနဲ့ ရုံးခန်းတို့ ဖြစ်ပါတယ်။

ချွန်နေတဲ့ ထောင့်ချွန်းကို အောက်ခြေကနေစပြီး အပေါ်ဆုံးအထိ လုံးပစ်လိုက်ပါ။ အောက်ဖော်ပြပါ ပုံက လုံးထားတဲ့ ထောင့်ချွန်းကို ပြပါတယ်။ ထောင့်ချွန်းတွေကို အပေါ်အောက်ထောင်လိုက် လုံးထားလိုက်တာဟာ စတိုးဆိုင်တွေအတွက် အမြဲတမ်းပိုကောင်းတတ်ပါတယ်။ အကြောင်းက အဲဒီလို လုံးလိုက်ခြင်းက အလိုက်သင့်အလျားသင့်ဖြစ်သွားစေပြီး လုံခြုံအန္တရာယ်ကင်းတဲ့ လမ်းကြောင်းတစ်ခု ဖြစ်သွားစေလို့ပါပဲ။ ကပ်စတန်မာတွေအနေနဲ့ အနားလုံးထားတဲ့ ကောင်တာတွေဟာ ပိုပြီးဖော်ရွေတယ်၊ ချဉ်းကပ်ရလွယ်တယ်လို့ ယူဆထားတတ်ကြပါတယ်။ တကယ်လို့ အဲဒီထောင့်ချိုးအကွေးဟာ တမျိုးတဘာသာဖြစ်နေပြီး ကျက်သရေရှိနေရင် ကပ်စတန်မာတွေက သူတို့ရဲ့ လက်တွေနဲ့ ပွတ်သပ်ကြည့်တတ်ကြပါသေးတယ်။ ဖမ်းစားနိုင်တဲ့ ပစ္စည်းတွေအတွက်တော့ နေရာကောင်းပါပဲ။

မကြာခင်ထွက်မည့် လက်လီအရောင်းဆိုင် ဖုန်းရွှေစာအုပ်မှ

လက်လီလုပ်ငန်းအောင်မြင်ဖို့ဆိုတာ မှန်ကန်တဲ့ပစ္စည်း၊ မှန်ကန်တဲ့ဈေးနှုန်းနဲ့ မှန်ကန်တဲ့ဝန်ထမ်းရဲ့ ရောင်းရေးဝယ်တာတို့ပေါ်မှာ မှီတည်ပါတယ်။ အဲဒါက သိသာထင်ရှားပြီး လက်လှမ်းမီတဲ့နေရာမှာ ဖွင့်လှစ်ထားခြင်းပေါ်မှာလည်း မှီခိုပါတယ်။ ဒီအရာတွေက ချီ ကို ဆွဲဆောင်နေတာပါပဲ။ ချီ ဆိုတာ ဖုန်းရွှေပညာမှာ ဘယ်လိုစွမ်းအင်မျိုးမဆိုကို ခေါ်ပါတယ်။ ကပ်စတန်မာဆိုတာလည်း ချီဓါတ်တစ်မျိုး ဖြစ်ပါတယ်။ သင့်စတိုးဆိုင်ထဲဝင်လာမယ်၊ သင့်ကို ပိုက်ဆံလာပေးမယ်။ ပြီးရင် အပြုံးကလေးနဲ့ ထွက်ခွာသွားမယ်ပေါ့။ ပိုက်ဆံဆိုတာကလည်း ချီဓါတ်တစ်မျိုးပါပဲ။ သင့်ရဲ့စတိုးဆိုင်ကလေးကို အသက်ဆက်ရှင်သန်နေစေမယ်၊ ပေးဆောင်စရာရှိတာတွေကို ပေးဆောင်နေနိုင်စေပါလိမ့်မယ်။

ယန်ဓါတ်ကို ရယူခြင်း
===
ယင်နဲ့ ယန်ဆိုတာ စွမ်းအင်အမျိုးအစားတွေလို့ သတ်မှတ်လို့ရပါတယ်။ အဖြူနဲ့အနက်၊ အဖိုနဲ့အမ စွမ်းအင်မျိုးတွေပေါ့။

အပြုသဘောဆောင်တဲ့ လက်လီဆိုင်အတွေ့အကြုံက ယန် ပါ။ ယန်ဆိုတာ တက်ကြွတယ်၊ အသက်ဝင်တယ်။ ယင်ဆိုတာကတော့ တက်ကြွမှုမရှိ၊ သေဆုံးနေတယ်ပေါ့။ လက်လီအရောင်းဆိုင်ဆိုတာ လူတွေ တည်ဆောက်ထားသမျှထဲမှာ ယန်ဓါတ်အများဆုံး အဆောက်အဦးပါပဲ။ သချိၤုင်းဂူဗိမာန်ဆိုတာ ယင်ဓါတ် အများဆုံးပါ။ အိမ်နဲ့ ရုံးခန်းတွေကတော့ အဲဒီအစွန်းနှစ်ဖက်ကြားမှာရှိပေမယ့် လုပ်ငန်းလုပ်ဆောင်နေတဲ့ ဆိုင်တစ်ဆိုင်လောက်တော့ ယန်ဓါတ် မများပါဘူး။ စတိုးဆိုင်တွေဟာ ယန်ဓါတ်ပါ။ အကြောင်းက လူအဝင်အထွက်တွေ၊ ငွေကြေး ပေးချေမှုတွေ ရှိနေလို့ ဖြစ်ပါတယ်။ အိမ်တစ်အိမ်ကို အားနည်းချိနဲ့စေတဲ့ တချို့ ယင်ပြဿနာတွေဟာ စတိုးဆိုင်တွေကို သိပ်ပြီး မထိခိုက်စေနိုင်ပါဘူး။ သူတို့တွေရဲ့ တက်ကြွတဲ့ အသက်ဓါတ်ကြောင့် ဖုန်းရွှေနည်းအားဖြင့် သူတို့ကိုယ်သူတို့ ကုသပြီးသား ဖြစ်နေစေတာကြောင့် ဖြစ်ပါတယ်။ (ယန်က အားကောင်းပြီး ယင်က အားနည်းပါတယ်။) နောက်ပြီး အဲဒီ အားသာချက်က ဖုန်းရွှေပြဿနာ အတော်များများကို ကျော်လွှားသွားစေနိုင်ပါတယ်။

အိမ်ဆိုတာ ပိုပြီး အေးဆေးငြိမ်သက်သင့်သလို ဆိုင်ဆိုတာက ပိုပြီး လှုပ်ရှားသက်ဝင်သင့်ပါတယ်။ ဒီစာအုပ်ထဲက အခန်း (၉)မှာပါတဲ့ အကြံဉာဏ်တွေကလွဲ ကျန်တာတွေကို အိမ်မှာလိုက်မလုပ်ပါနဲ့။

လှုပ်ရှားမှုက ယန်ဓါတ် အလွန်ဆန်ပါတယ်။ လက်လီလုပ်ငန်းရဲ့ အသုံးအများဆုံး အသုံးအနှုန်းက “လှည့်” တာပါ။ ဆိုလိုတာက လှုပ်ရှားမှုနဲ့ အချိန်တစ်ခုအတွင်းမှာ ဘယ်ပစ္စည်းက ရောင်းကောင်းလို့ ဘယ်နှစ်ကြိမ် ပြန်မှာရသလဲ (လှည့်လည်နေရသလဲ) ဆိုတာကို ဆိုလိုပါတယ်။ လှည့်တယ်ဆိုတာက သတ်မှတ်ထားတဲ့နေရာမှာ ဘယ်အရာက ဘယ်နှကြိမ်လောက် ရောင်းရသလဲကိုလည်း ကိုယ်စားပြုပါတယ်။ တက်ကြွတဲ့ ကပ်စတန်မာတစ်ယောက်ရဲ့စွမ်းအင်က အဲဒီစင်ဆီကို ဘယ်နှကြိမ်ရောက်လာပြီး ပစ္စည်းတစ်ခုကို ကောက်ယူမယ်၊ ပြီးရင် ဝယ်သွားသလဲပေါ့။ လှုပ်ရှားမှုများလေ ပိုကောင်းလေပါပဲ။ အဓိက ဆိုလိုရင်းကတော့ ငွေများများ လှည့်ပတ်နေပါတယ်ပေါ့။ “လှည့်တယ်” ဆိုတဲ့စကားလုံးက လက်လီစတိုးဆိုင်တွေရဲ့ “ယန်” အနှစ်သာရကို ထုတ်ပိုးထားလိုက်တာပါပဲ။ နေ့စဉ်တိုင်း စတိုးဆိုင်ကို အရှေ့ဆက်နိုင်စေဖို့ ကြိုးစားပါ။ ဆိုင်ရဲ့ယန်ဓါတ်က ထိရောက်မှုကို ခေါ်ငင်နေပြီး လှုပ်ရှားမှုတိုင်းအတွက် အင်ပြည့်အားပြည့် ဖြစ်စေပါတယ်။
မကြာခင်ထွက်မည့် လက်လီအရောင်းဆိုင် ဖုန်းရွှေစာအုပ်မှ

ငွေရှာနေတဲ့ မည်သူမဆို ပထမဦးဆုံး ဖတ်သင့်သည့် စာအုပ် ၂ အုပ်
===
ဦးနှောက် နှင့် ငွေ ယှဉ်တွဲအသုံးချခြင်း ( ငွေရှာနည်း စိတ်ပညာ )
ငွေရှာဖို့ သင် ဘယ်လိုပြုမူကျင့်ကြံသင့်လဲ
ငွေရှာတတ်ဖို့ရာ ပညာအရည်အချင်း၊ အဆက်အသွယ်၊ ကျောထောက်နောက်ခံ၊ ငွေကြေးအရင်းအနှီး စတဲ့ သင် သိထားတာတွေဟာ အရေးမပါလှပါဘူး။ အဲဒါတွေ ကောင်းကောင်း မရှိပဲနဲ့လည်း ကြွယ်ဝချမ်းသာ လာနိုင်ပါတယ်။

သင်ဟာ ဒေါ်လာ ရွှေ ကား အိမ်ခြံမြေ ဘာပဲအရောင်းအဝယ် လုပ်လုပ် Social Media Facebook ပေါ်မှာ နာမည်ကြီးနေတဲ့ မြန်မာနိုင်ငံမှငွေကြေးစီးပွားရေးနှင့် စီမံခန့်ခွဲမှုအဆင့်မြင့်ပညာရပ်များ ဆိုင်ရာ သင်တန်းကိုပဲတက်တက် ငွေနဲ့ ပတ်သက်ပြီး သင် ဘယ်လိုပြုမူကျင့်ကြံသလဲဆိုတာကပဲ အရေးကြီးလို့ပါ။

ငွေနဲ့ ပတ်သက်ပြီး မှန်ကန်တဲ့ သဘောထား အမြင်မထားတတ်ရင်၊ ပြုမူကျင့်ကြံပုံက လွဲချော်ခဲ့ရင် ဘယ်လောက်ပဲ ငွေကြေးချမ်းသာသည်ဖြစ်စေ အချိန်မရွေး ဆင်းရဲ ဒုက္ခရောက်သွားနိုင်ပါတယ်။ ထက်မြက်ပြီးဉာဏ်ကောင်းတဲ့ သူတွေကိုတောင်မှ ငွေနဲ့ ပတ်သက်တဲ့ ပြုမူကျင့်ကြံပုံကို သင်ပေးရခက်ပါတယ်။

ချမ်းသာကြွယ်ဝဖို့ဆိုတာ စိတ်နေစိတ်ထားက အဓိက ပြဿနာပါ။

ငွေရှာနေတဲ့ မည်သူမဆို ဒီစာအုပ်ကို ပထမဦးဆုံး ဖတ်သင့်ပါတယ်။

===

နိယာမ
အနာဂတ်အတွက် အစီအမံတွေရေးဆွဲကြတဲ့အခါ ကျွန်တော်တို့ မကြာခဏ မေးတတ်တာရှိပါတယ်။
" လာမယ့်နှစ်မှာ စီးပွားရေးက ဘယ်လိုဖြစ်လာမလဲ။ " ဒါမှမဟုတ် " နောက်လာမယ့် ဆယ်နှစ်မှာ ဘာတွေကွာခြားသွားမှာလဲ။ "

ဒါပေမယ့် ကြိုတင်ခန့်မှန်းရတာ ခက်ပါတယ်။ အနာဂတ်ကို ပုံဖော်ပေးမယ့် အရေးကြီးတဲ့ အဖြစ်အပျက်များကို ပင်ကိုအားဖြင့် မှန်းဆလို့မရပါဘူး။

အဲဒီအစား အခြားမတူတဲ့ မေးခွန်းကို ကျွန်တော်တို့ ပြောင်းမေးသင့်ပါတယ်။

"အခုကနေစပြီး နောက်လာမယ့် ဆယ်နှစ်မှာ မပြောင်းလဲတာ ဘာတွေဖြစ်မလဲ။"

"အခုကနေစပြီး နောက်လာမယ့် နှစ်တစ်ရာမှာရော မပြောင်းလဲတာ ဘာတွေဖြစ်မလဲ။"

ကြိုတင်မသိနိုင်တဲ့ အနာဂတ်အတွက် ဘယ်တော့မှ မပြောင်းလဲတဲ့ အသိပညာများဟာ မသေချာမရေရာတဲ့ ခန့်မှန်းချက်များထက် ပိုအသုံးဝင်ပြီး ပိုအရေးကြီးပါတယ်။ " နိယာမ " စာအုပ်ထဲမှာ ရောင်းအားအကောင်းဆုံး စာရေးဆရာက ဘဝ ၊ အမူအကျင့် နှင့် စီးပွားရေးများဟာ အမြဲတမ်းအတူတူပဲဆိုတာကို ဇာတ်လမ်းတို ၂၃ ခုဖြင့် ဝေမျှထားပါတယ်။

ဘယ်တော့မှ မပြောင်းလဲသော အသိပညာများကို စွဲကိုင်ထားမယ်ဆိုရင် စွန့်စားမှု ၊ အခွင့်အလမ်း ၊ မသေချာမရေရာတဲ့ အနာဂတ်တွေမှာ လမ်းကြောင်းရှာတာနှင့် ပတ်သက်ပြီး သင့်မှာ တွေးခေါ်နိုင်စွမ်းအသစ်တွေ အားကောင်းလာပါလိမ့်မယ်။ ရင်းနှီးပြီးသား အကြောင်းအရာ ၊ အဖြစ်အပျက်တွေကို လာမယ့်နှစ်တွေမှာ ထပ်ခါထပ်ခါ မြင်တွေ့ရတိုင်း သင် ခေါင်းတငြိမ့်ငြိမ့်နဲ့ ပြောမိပါလိမ့်မယ်။

" သြော် ၊ နိယာမ ပါပဲ။ "

Photo Amazon Australia

ရှစ်နှစ်နီးပါး မူအမျိုးမျိုးကို ဖတ်ရှုပြီးမှ ရေးသားခဲ့သော အသူရာ ဝတ္ထုကြီး

အသူရာ (ASURA) စာအုပ်ကြီးကို ရေးသားခဲ့သူ အိန္ဒိယ အမျိုးသား စာရေးဆရာ အာနန် နီးလက်ကန်တန် (Anand Neelakantan) က သူ့ရဲ့ လူမှုရေးကွန်ယက် စာမျက်နှာမှာ ဇွန်လ ၁၆ ရက်နေ့က အခုလို ရေးသားထားပါတယ်။

“ပတ်စာခွာ ဖျာသိမ်းပြီ။ 'မြားမြောင်လှသော ရာမာယဏများ မြောက်မြားလှသော သင်ခန်းစာများ' ကို နောက်ဆုံးအကြိမ် တည်းဖြတ်ကာ ပေးအပ်ခဲ့ပြီးဖြစ်သည်။ ၂၅ နှစ်နီးပါး ဖတ်လာခဲ့သော ရာမာယဏကို စုစည်း ပေါင်းချုပ်ထားခြင်းဖြစ်သည်။ HarperCollins မှ မကြာမီ ထုတ်ဝေမည်။ ယခုတော့ လွန်ခဲ့သော ငါးနှစ်ခန့်မှ လုပ်ကိုင်လာခဲ့ပြီး ပင်ဂွင်းစာအုပ်တိုက်မှ မကြာမီ ထုတ်ဝေတော့မည့် ကျွန်ုပ်၏ လက်ရာထူးဖြစ်သော ‘ဒေဝီ’ ကို ပြန်ကိုင်ဖို့ အလှည့်ရောက်လာခဲ့လေပြီ။”

အာနန်ဟာ ဒဏ္ဍာရီ သမိုင်းနောက်ခံ စာအုပ်ပေါင်း ၁၆ အုပ် ရေးသားထားပြီး ဖြစ်ပါတယ်။ Asura နဲ့ စတင်ခဲ့ပြီးတဲ့နောက်မှာ Ajaya, Vanara, Bahubali Trilogy, Asura Kids, Asura Way, Valmiki’s Women, The Rise of Kali, Shanta : The Story of Rama's Sister, Ravana's Sister နဲ့ မကြာခင် ထွက်တော့မယ့် ရာမာယဏ ပေါင်းချုပ်ကြီးဖြစ်တဲ့ Many Ramayanas, Many Lessons စာအုပ်တွေကို ရေးသားခဲ့သူ ဖြစ်ပါတယ်။

အာနန်ဟာ ရာမာယဏကို ကလေးဘဝကတည်းက လေ့လာဖတ်ရှုလာခဲ့ပုံ ရပါတယ်။ ဒီဇာတ်တော်ကြီးကိုပဲ များပြားလှတဲ့ မူမျိုးစုံကနေ ကိုးကားပြီး ဇာတ်ကောင်အမျိုးမျိုးနဲ့ လှည့်ပတ်ရေးဖွဲ့ပါတယ်။ အသူရာ စာအုပ်ကိုပဲ အောက်ပါအတိုင်း ပြောထားတာ ရှိပါတယ်။
“လွန်ခဲ့သော နှစ်ပေါင်း ၂၅၀၀ လောက်ကတည်းက ဇာတ်ကောင်တစ်ကောင် သို့မဟုတ် ဇာတ်ကောင်များစွာကို မဏ္ဍိုင်ပြု၍ ဘာသာစကားမျိုးစုံနှင့် ရေးဖွဲ့ခဲ့သော ရာမာယဏ မူကွဲပေါင်း များစွာရှိခဲ့ပြီး အိန္ဒိယမှာပင် မူကွဲပေါင်း ၃၀၀ မကရှိပေသည်။ အာနန်သည် အသူရာကို ရှစ်နှစ်နီးပါး မူအမျိုးမျိုးနှင့် တိုက်စစ် သုတေသနပြု၍ ရေးသားခဲ့သည်။”

ဒါ့ကြောင့်ပဲ အာနန်ဟာ စာအုပ်တစ်အုပ်ကို ဖြစ်တတ်ကဆန်း ရေးဖွဲ့တတ်သူ မဟုတ်ဘူးလို့ ကျွန်တော်တို့ ယူဆလို့ ရနိုင်ပါတယ်။ နှစ်ပေါင်းများစွာ လေ့လာကြိုးကုတ်ပြီးမှ ဇာတ်အိမ်ဖွဲ့ ရေးတတ်သူမို့ သူရေးသားတဲ့ စာအုပ်တွေဟာ အထောက်အထား ခိုင်လုံမှုရှိတယ်လို့ ယုံကြည်လို့ ရနိုင်ပါတယ်။ အသူရာမှာ သီတာက ရာဝဏရဲ့ သမီးဖြစ်နေတာကလည်း ဂျိန်း ရာမာယဏမူကို ယူခဲ့တာကြောင့် ဖြစ်ပါလိမ့်မယ်။ မူအမျိုးမျိုးအရဆို သီတာဟာ ဝေဒဝသီ ရဲ့ အဝတာရဖြစ်တယ်လည်း ပြောကြသလို၊ ဇနက္ကရဲ့ သမီးအရင်း ဖြစ်တယ်လို့လည်း ဆိုပြန်ပါတယ်။ ရာဝဏရဲ့ မိဖုရား မန္ဓောဒရီကို မျောက်အုပ်စုတွေ ဝိုင်းပြီး ဗလက္ကာရပြုတာကလည်း ထိုင်း ရာမာယဏ မူကနေ ယူထားတာ ဖြစ်နိုင်ပါတယ်။ အသူရာထဲမှာတော့ အောင်ဂွတ်ဦးဆောင်တဲ့ မျောက်စစ်သည်တွေက ဝိုင်းစော်ကားကြတာပါ။ ဟနုမာန်က ရာဝဏယောင်ဆောင်ပြီး စော်ကားတယ်လို့တောင် ထိုင်းမူမှာ တွေ့ရကြောင်း ရေးထားတာကို လေ့လာတွေ့ရှိရပါတယ်။

ဒါ့ကြောင့် အာနန်ဟာ မူကွဲတွေအများကြီးကို ကျေညက်အောင်လေ့လာပြီးမှ ဇာတ်လမ်းဖွဲ့ ရေးတတ်သူဖြစ်ကြောင်း ယုံကြည်လို့ရပါတယ်။ အခုလည်း သူပြောထားတဲ့ ‘၂၅ နှစ်နီးပါး ဖတ်လာခဲ့သော ရာမာယဏကို စုစည်း ပေါင်းချုပ်ထားခြင်းဖြစ်သည်’ လို့ ဆိုထားတဲ့ Many Ramayanas, Many Lessons စာအုပ်ကြီးက စိတ်ဝင်စားစရာကောင်းတဲ့ ရာမာယဏ ပေါင်းချုပ် စာအုပ်ကြီး တစ်အုပ် ဖြစ်လာမှာ သေချာပါတယ်။

ဧက

#အသူရာ
#ဧက
#စာပေ

ကျွန်တော့်ရဲ့ တယ်လီဂရမ် ချန်နယ်မှာလည်း ဝင်ရောက် ကြည့်ရှုနိုင်ပါတယ်။

https://t.me/ekaworks

" ကမ္ဘာကြီးကို လောဘစိတ် က မောင်းနှင်နေတာမဟုတ်ဘူး။ ဣဿာမစ္ဆရိယစိတ် ကသာ မောင်းနှင်နေတာဗျ။ "

သင်ဟာ ပျော်ရွှင်ချင်ရုံ သက်သက်ဆိုရင် အလွယ်တကူ ဖန်တီးရယူနိုင်ပါတယ်။ ဒါပေမယ့် သူများထက် ပိုပျော်ချင်တယ်ဆိုရင်တော့အမြဲတမ်း ခက်ခဲပါတယ်။ အကြောင်းကတော့၊ အခြားသူတွေဟာ ပိုပြီးပျော်ရွှင်နေကြတယ်လို့ ကျွန်တော်တို့ယုံကြည်ထားတာကြောင့်ပါ။ ယနေ့ခေတ် ကမ္ဘာပေါ်က လူတိုင်းမြင်နိုင်တဲ့ လူမှုကွန်ယက်မီဒီယာတွေမှာတော့ ပစ္စည်းအသစ်တွေ တိုးမြဲတိုးလာပါတယ်။ တခါတရံ တခြားလူတွေရဲ့ ကြွားလုံးထုတ် ၊ အယောင်ဆောင် ၊ ဖြီးဖြန်းတဲ့ လူနေထိုင်မှုပုံစံတွေကိုလည်း တွေ့နိုင်ပါတယ်။ သင်ဟာ အကောင်းတွေချည်း ထုတ်ဖော်ပြပြီး အဆိုးတွေကို ဖုံးဖိထားတဲ့ မြင်ကွင်းကိုသာ မီးမောင်းထိုးပြနေသော ပတ်ဝန်းကျင်မှ လူများရဲ့ဘဝများနှင့် ကိုယ့်ကိုကိုယ် နှိုင်းယှဉ်ပါတယ်။ စိတ်ပညာရှင် Jonathan Haidt အခုလို ပြောပါတယ်။ " လူတွေက ဆိုရှယ်မီဒီယာမှာ တစ်ယောက်နဲ့တစ်ယောက် အပြန်အလှန် ဖျော်ဖြေနေသလောက် သိပ်ပြီးအဆက်အသွယ်မလုပ်ကြဘူးဗျ။ " အခြားလူတွေ မောင်းနေတဲ့ မော်တော်ကား ၊ နေထိုင်တဲ့ အိမ် ၊ အကောင်းစားကျောင်းတက်နေတာ စတာတွေကိုပဲ သင်မြင်နေရတာပါ။ " အဲဒါတွေ လိုချင်တယ်။ ငါမှာ ဘာလို့ အဲဒါတွေ မရှိတာလဲ။ သူ့မှာ ရှိပြီး ငါ့မှာ ဘာလို့မရှိတာလဲ။ " စတာတွေကို အရင်မျိုးဆက်တွေထက်စာရင် ယနေ့ခေတ်မှာ ပိုမိုပြောဆိုလာကြပါတယ်။

ယနေ့ခေတ် စီးပွားရေးက အရာသုံးခုကို ဖန်တီးထုတ်လုပ်ပေးတဲ့နေရာမှာ အလွန်ကောင်းပါတယ်။

၁။ ကြွယ်ဝချမ်းသာမှု
၂။ ကြွယ်ဝချမ်းသာမှုကို ထုတ်ကြွားနိုင်မှု
၃။ အခြားသူများရဲ့ ကြွယ်ဝချမ်းသာမှုကို အထင်ကြီးအားကျနိုင်မှု

မကြာခင်ထွက်ရှိမည့် "ငွေရှာနည်း စိတ်ပညာ" နောက်ဆက်တွဲစာအုပ် "နိယာမ" မှ

ဦးနှောက် နှင့် ငွေ ယှဉ်တွဲအသုံးချခြင်း ( ငွေရှာနည်း စိတ်ပညာ )

ကံကောင်းလို့ချမ်းသာတာလား

လူတွေက သူတို့ရဲ့ အောင်မြင်မှုဟာ ကံကောင်းခြင်းကြောင့်ပါလို့ အပြောခံရရင် ယဉ်ကျေးမှုမရှိဘူးလို့ မှတ်ယူတတ်တာကြောင့် ကံကောင်းခြင်းကို တိုင်းတာဖို့ခဲယဉ်းပါတယ်။ ကံကောင်းခြင်းသည် အောင်မြင်မှု၏ နောက်ကွယ်က အချက်တစ်ချက်ဖြစ်တာကို မကြာခဏဆိုသလို လျစ်လျူရှုထားခြင်းဟာ ပုံသေကားချပ် တစ်ခုလိုတောင်ဖြစ်နေပါပြီ။

" ကမ္ဘာမှာ ရင်းနှီးမြှုပ်နှံသူပေါင်း ၁ ဘီလီယံလောက်ရှိပါတယ်။ အဲဒီထဲကမှ ၁၀ ယောက်ကသာ ကံကောင်းခြင်းဆိုတာမရှိပဲ ဘီလီယံနာ ဖြစ်လာမယ်လို့ သင်ထင်ပါသလား။ " ဆိုတဲ့ မေခွန်းအတွက် သင့်ရဲ့ အဖြေက ဘာဖြစ်မလဲ။

" မဖြစ်လာနိုင်ဘူး " လို့ပဲ အများစုက ဖြေကြမှာပါပဲမလား။ သူများအပေါ် အကဲဖြတ်ရာမှာ ကံကောင်းခြင်းဆိုတာ ရှိနေမှန်း သိထားတာတောင်မှ ကံကောင်းခြင်းကြောင့် အောင်မြင်တယ်ဆိုတာမျိုးဟာ သင့်အတွက် မနာလိုစရာ ဖြစ်နေပါလိမ့်မယ်။ ကိုယ့်ကိုကိုယ် အကဲဖြတ်ရာမှာတော့ ကံကောင်းခြင်းကြောင့် အောင်မြင်တယ်ဆိုတာမျိုးဟာ သင့်အတွက် လက်မခံချင်စရာ ဖြစ်နေပါလိမ့်မယ်။

Morgan Housel ၏ " The Psychology of Money " ( ငွေရှာနည်း စိတ်ပညာ ) စာအုပ်မှ
#ဦးနှောက်နှင့်ငွေယှဉ်တွဲအသုံးချခြင်း
#ငွေရှာနည်းစိတ်ပညာ

Photo credit WSJ

တည်ငြိမ်ခြင်းဟာ ရူးသွပ်ခြင်းဆိုတဲ့ မျိုးစေ့တွေကို ပျိုးထောင်ပေးတယ်

Hyman Minsky ဟာ သူရဲ့ အချိန်အများစုကို စိန့်လူးဝစ်ရှိ ဝါရှင်တန်တက္ကသိုလ်မှာ စီးပွားရေးပညာရှင်အဖြစ် ကုန်ဆုံးခဲ့တာပါ။ သူဟာ စီးပွားရေး တဟုန်ထိုး အတက်အကျ သဘာဝကို စိတ်ဝင်စားခဲ့သူပါ။ စီးပွားပျက်ကပ်များကို တိုက်ဖျက်ပစ်မယ်ဆိုတဲ့ စိတ်ကူးဟာ အဓိပ္ပာယ်မရှိသလို အမြဲဖြစ်မယ်လို့လည်း သူထင်ခဲ့ပါတယ်။ Minsky ရဲ့ အခြေခံရေသောက်မြစ်သီအိုရီကို " ငွေကြေးမတည်မငြိမ်ဖြစ်မှုအဆိုကြမ်း " ဟု ခေါ်ဆိုပါတယ်။

အဲဒီစိတ်ကူးဟာ သင်္ချာ နှင့် ဖော်မြူလာများအပေါ် မူတည်မနေပါဘူး။ အခြေခံအားဖြင့် စိတ်ပိုင်းဆိုင်ရာ ဖြစ်စဉ်တစ်ခုပါလို့ အခုလို ဖော်ပြခဲ့ပါတယ်။

စီးပွားရေး တည်ငြိမ်လာရင် လူတွေ အကောင်းမြင်လာလိမ့်မယ်။
လူတွေ အကောင်းမြင်လာရင် အကြွေးတွေယူလိမ့်မယ်။
လူတွေ အကြွေးနွံထဲနှစ်သွားရင် စီးပွားရေး မတည်မငြိမ် ဖြစ်လာမယ်။

တည်ငြိမ်ခြင်းဟာ မတည်ငြိမ်ခြင်းပဲဆိုတာ Minsky ရဲ့ မဟာအတွေးအခေါ် ပါ။ စီးပွားရေးကျဆင်းမှု လျှော့ပါးနေခြင်းဟာ တကယ်တော့ နောက်လာမယ့် စီးပွားရေးကျဆင်းမှုအတွက် မျိုးစေ့ပါ။ ဒါ့ကြောင့် ကျွန်တော်တို့ စီးပွားရေးကျဆင်းမှုကို ဘယ်တော့မှ အမြစ်ပြတ် ချေမှုန်းပစ်လို့ မရနိုင်ပါဘူး။

" ကာလကြာရှည်စွာ သာယာဝပြောလာမှုနှင့်အတူ တည်ငြိမ်သောစီးပွားရေးစနစ်တစ်ခု မှာဖြစ်ပေါ်တဲ့ ငွေကြေးဆိုင်ရာ ဆက်ဆံရေးသည် မတည်ငြိမ်တဲ့စနစ်တစ်ခုကို ဖြစ်စေသော ဘဏ္ဍာရေးဆိုင်ရာ ဆက်ဆံရေးဆီသို့ ကူးပြောင်းသွားပါတယ် " လို့ သူ ရေးသားခဲ့ပါတယ်။ ကိစ္စရပ်များ အဆင်ပြေမည်ဟူသော ယုံကြည်ချက် ကြီးထွားလာခြင်းက ရူပဗေဒနိယာမ ကဲ့သို့ပင် အဆင်မပြေသောအရာဆီသို့ ကျွန်တော်တို့ကို တွန်းပို့နေပါတယ်။

အဲဒီအရာက အတော်များများနှင့် သက်ဆိုင်ပါတယ်။

ကမ္ဘာမှာ အကျမရှိပဲ အတက်ချည်းရှိနေတဲ့ စတော့ဈေးကွက် ရှိတယ်ဆိုကြပါစို့။ ဈေးကွက်ကတည်ငြိမ်ပြီး စတော့ဈေးနှုန်းတွေဟာ တက်ဖို့ပဲ သေချာတယ်။

အဲဒါဆို သင် ဘာလုပ်မလဲ။

မကြာခင်ထွက်ရှိမည့် "ငွေရှာနည်း စိတ်ပညာ" နောက်ဆက်တွဲစာအုပ် "နိယာမ" မှ

ဦးနှောက် နှင့် ငွေ ယှဉ်တွဲအသုံးချခြင်း ( ငွေရှာနည်း စိတ်ပညာ )

ချမ်းသာဖို့နှင့် ချမ်းသာနေဖို့

အရင်းရှင်စနစ်ဟာ ခက်ခဲပါတယ်။ အဲဒီလို ခက်ခဲရခြင်း အကြောင်း အရင်း နှစ်ပိုင်းရှိပါတယ်။ တစ်ခုက ပိုက်ဆံရအောင်လုပ်တာနဲ့ ရထားတဲ့ ပိုက်ဆံကို ထိန်းသိမ်းတာပါ။ အဲဒီ နှစ်ခုအတွက် မတူညီတဲ့ ကျွမ်းကျင် လိမ္မာမှုမျိုး လိုအပ်ပါတယ်။

ပိုက်ဆံရဖို့က စွန့်စားရဲပြီး အကောင်းမြင်တတ်ဖို့ လိုအပ်တဲ့အပြင် ကိုယ်တိုင်လည်း ဝင်ရောက်လုပ်ကိုင်ဖို့ လိုအပ်ပါတယ်။ သို့သော် ရထားတဲ့ပိုက်ဆံကို ထိန်းသိမ်းဖို့ကျတော့ စွန့်စား ရဲတာနဲ့ ဆန့်ကျင်ဘက်ကို လိုအပ်တာပါ။ လူသားဆန်ဖို့နဲ့ ကိုယ်ဖန်တီး ထားတဲ့ အရာဟာ ခပ်မြန်မြန်ပဲ ဆုံးရှုံးသွားနိုင်တယ်ဆိုတာကိုလည်း ကြောက်ရွံ့ဖို့လိုပါတယ်။ ခြိုးခြံချွေတာခြင်းနဲ့ မိမိပြုလုပ်ခဲ့တဲ့ အရာ အချို့က ကံကြောင့်အောင်မြင်ခဲ့တယ်ဆိုတာကိုလည်း လက်ခံနိုင်ဖို့ လိုသလို အတိတ်က အောင်မြင်မှုရခဲ့တဲ့ ပုံစံအတိုင်း ထပ်ကာထပ်ကာ ပြန်လုပ်လို့ မရနိုင်ဘူးဆိုတာကိုလည်း လက်ခံထားဖို့ လိုပါတယ်။

Morgan Housel ၏ " The Psychology of Money " ( ငွေရှာနည်း စိတ်ပညာ ) စာအုပ်မှ

#ဦးနှောက်နှင့်ငွေယှဉ်တွဲအသုံးချခြင်း
#ငွေရှာနည်းစိတ်ပညာ

ဦးနှောက် နှင့် ငွေ ယှဉ်တွဲအသုံးချခြင်း ( ငွေရှာနည်း စိတ်ပညာ )

ကျွန်တော်တို့မှာ ရှိနေတဲ့ပြဿနာက ချမ်းသာတဲ့ စံပြပုဂ္ဂိုလ်ကို ရှာရတာလွယ်ပါတယ်။ သို့သော် ပေါများကြွယ်ဝတဲ့ သူများကို ရှာရခက်ပါတယ်။ ဘာဖြစ်လို့လဲဆိုတော့ အဓိပ္ပာယ်ဖွင့်ဆိုချက်အရ ၎င်းတို့ရဲ့ အောင်မြင်မှုဟာ ဖုံးကွယ်လျှို့ဝှက်စွာရှိနေလို့ပါ။

ပိုက်ဆံအများအပြားသုံးပြီး ပစ္စည်းဝယ်ယူတဲ့ ပေါများကြွယ်ဝတဲ့ သူတွေလည်း ရှိတော့ရှိတာပေါ့။ အဲလိုအခြေအနေမှာဆိုရင်လည်း ကျွန်တော်တို့ဟာ သူတို့ရဲ့ ပေါများကြွယ်ဝမှုကို မမြင်ဘဲ ချမ်းသာမှုကို ပဲမြင်ကြတာပါ။ သူတို့ ဝယ်စီးတဲ့ မော်တော်ကားဖြစ်ဖြစ်၊ သူတို့ သားသမီးတွေကို ပို့တဲ့ကျောင်းပဲ ဖြစ်ဖြစ်၊ အဲဒါတွေကိုပဲ မြင်ပါလိမ့်မယ်။ သူတို့ရဲ့ စုဆောင်းငွေပမာဏ၊ အငြိမ်းစားရငွေပမာဏ ဒါမှမဟုတ် ရင်းနှီး မြှုပ်နှံမှုပုံစံတွေကို ကျွန်တော်တို့ မမြင်နိုင်ပါဘူး။

Morgan Housel ၏ " The Psychology of Money " ( ငွေရှာနည်း စိတ်ပညာ ) စာအုပ်မှ

📚စာအုပ်ဆိုင်ထဲမှာ ရုပ်ရှင်ကြည့်မယ်ဆို 📽️

ဘယ်ရုပ်ရှင်ကြည့်မလဲ 🎞️🎬🍿

ကော်ဖီလား
ဝိုင်လား

ဖြေခဲ့ပေးပါ။

ဆရာမ သော်တာအေးလဲ့ရဲ့ အသူရာဝတ္ထုကြီးအတွက် အညွှန်း

ဆရာမ သော်တာအေးလဲ့ရဲ့ စာညွှန်းကို အများဖတ်ရှုနိုင်အောင် ပြန်လည်မျှဝေလိုက်ပါတယ်။ အသူရာအပေါ် ဆရာမ မြင်တဲ့အချက်တွေနဲ့ တင်ပြပုံက တကယ်ကို ကောင်းမွန်ပါတယ်။ အသူရာဟာ ဆရာမရဲ့စကားလုံးတွေကြောင့် ပိုပြီး အသက်ဝင်သွားတယ်လို့ မြင်မိပါတယ်။

***************

အသူရာ (ကျွန်ုပ်၏ဇာတ်လမ်းမှာ ရှုံးနိမ့်သူတို့၏အကြောင်းသာ ဖြစ်၏)
ဘာသာပြန် ဧက။ စာပေလောကတိုက်ထုတ်၊ ၂၀၂၃။
“တိုက်ပွဲကို အောင်နိုင်သူက အရာရာတိုင်းကို ယူဆောင်သွားမည်သာဖြစ်သည်။ ကျော်ဇောမှု၊ အသပြာ၊ တန်ခိုးအာဏာ။ မည်သူနိုင်နိုင် နိုင်သူကို မှန်သည်ဟုဆိုရသော် ထိုသူသည်လည်း မှန်နေဦးမည်သာဖြစ်၏။ စာဆိုတို့က အောင်နိုင်သူအကြောင်းကို စာဖွဲ့၍ ဆိုကြဦးမည်။ ကာလရွေ့လျောသောအခါတွင် ဒဏ္ဍာရီဖြစ်သွားပေလိမ့်မည်။ အောင်နိုင်သူက ပြစ်မျိုးမှဲ့မထင်သော လူအားလုံးထဲက အကောင်းဆုံးလူသား ဖြစ်သွားပေလိမ့်မည်။ အခြားသူများ အားလုံးကဲ့သို့ပင် သူသည်လည်း ဘဝတွင် အကောင်းအဆိုး နှစ်ရပ်စလုံးကို ကျူးလွန်လိမ့်ဦးမည်သာဖြစ်သည်။ သို့ရာတွင် လောကနိယာမသဘာဝအတိုင်း ကောင်းမှုကို ချဲ့ကားပြောဆို၍ မကောင်းမှုကို မေ့ပျောက်ပစ်ကြမည်သာဖြစ်သည်။ အကယ်၍ ထိုသူ၌ လူ့အဖွဲ့အစည်း ကျင့်ဝတ် ဥပဒေသများဖြင့် ဆုံးဖြတ်၍ မရနိုင်သော လုပ်ဆောင်မှုများ ရှိခဲ့သည်ဆိုပါမူ ထိုသူကို နတ်ဘုရားနှင့် ခိုင်းနှိုင်းကြပေလိမ့်မည်။ အကြောင်းမှာ ဘုရားကို မေးခွန်းထုတ်နိုင်သောသူ မရှိသောကြောင့်သာဖြစ်သည်။ ထို့ကြောင့်ပင် ကျွန်ုပ်၏တိုင်းပြည်၌ ဘုရားပေါများနေခြင်းဖြစ်၏။ မည်သည့်နည်းဖြင့် အောင်နိုင်သည်ဖြစ်စေ အောင်နိုင်သူအားလုံးက ဘုရား သို့မဟုတ် ဘုရား၏ ကိုယ်ပွားဖြစ်လာကြ၏။ ရှုံးနိမ့်သူများကတော့ အမြဲပြောင်းပြန်ဖြစ်နေမည်သာဖြစ်၏။
သို့တိုင် ထူးဆန်းသည်က ထိုအရာများအားလုံးကို ကျွန်ုပ် တစ်ခုမှ မကြောင့်ကြမိခြင်းပင်။ ကျွန်ုပ်သည် ပို၍ မြင့်မားသောဖွဲ့စည်းပုံစနစ်၌ မိမိ၏အရေးမပါမှုကို သိရှိရာက အတ္တကိုဗဟိုပြုလာခဲ့၏။ အကယ်၍ ပိုကြီးမားသော ဘဝဖွဲ့စည်းပုံထဲ၌ ကျွန်ုပ်က အရေးမပါဘဲ မထင်မရှား အစက်ကလေးတစ်စက်အဖြစ်သာ ရှိနေခဲ့မည်ဆိုလျှင် ကျွန်ုပ်အဖို့ တစ်ခုတည်းသော အရေးအပါဆုံးအရမှာ ကျွန်ုပ်သာြဖစ်သည်။ ကျွန်ုပ်သေလျှင် ကျွန်ုပ်အတွက် အရာအားလုံး ပြီးဆုံးသွားပြီဖြစ်၏။ ကျွန်ုပ်သေပြီးနောက် ပြည်သူပြည်သားများ ဘာဖြစ်ကြမည်ဆိုသည်မှာ ကျွန်ုပ်၏ ပြဿနာမဟုတ်၊ သေဆုံးခြင်းက နောက်ဆုံးဆုံမှတ်ဖြစ်ပြီး ဟိုမှာဘက်၌ ဘာမှမရှိသည်ကို ကျွန်ုပ်သိသည်။ ကျွန်ုပ်အတွက် ဝိဉာဉ်မရှိ၊ နိဗ္ဗာန်မရှိ၊ လွတ်မြောက်ခြင်းမရှိ၊ ငရဲမရှိ၊ ဘုရားမရှိ၊ နောင်ဘဝမရှိ။ ကျွန်ုပ်သည် မြေကြီးမှမြေကြီး၊ ရေမှ ရေ၊ လေမှလေ၊ မီးမှမီး အဖြစ်သို့ ပျောက်ကွယ်ကာ အရာအားလုံးရပ်တန့်သွားမည်သာ ဖြစ်၏။ သို့တိုင် အခွင့်ရခဲ့မည်ဆိုပါလျှင် နောက်တစ်ကြိမ် ပြန်လာချင်သေးသည်။ မည်သူကများ မလာချင်ရှိလေမည်နည်း” (ရာဝဏ)
အသူရာ (ဘာသာပြန်စာအုပ်) နဲ့ပတ်သက်ပြီး ရှေ့မှာလည်း ပို့စ်နှစ်ခုလောက် တင်ဖူးသေးတယ်။ ဆရာဧကက သူ့ရဲ့ လူမှုကွန်ယက်စာမျက်နှာမှာ ဘာသာပြန်လက်စ အပိုင်းအစတွေကို တင်ကတည်းက ဖတ်လာခဲ့တာပါ။ အပြည့်အစုံကိုတော့ ခုလို စာအုပ်ထွက်လာမှပဲ ဖတ်ဖြစ်တော့တယ်။ ဒီနှစ်အုပ်တွဲစာအုပ် ကိုယ့်လက်ထဲရောက်လာဖို့ အတော်ကို စောင့်လိုက်ရပါတယ်။ တကယ်လည်း စောင့်ပြီးဖတ်ရကျိုးနပ်တဲ့ စာအုပ်ပါပဲ။ စာအုပ်အကြောင်းအရာ ဇာတ်လမ်းရော၊ ဘာသာပြန်ရသရော ပြည့်ပြည့်ဝဝရှိတာမို့ ဒုတိယပိုင်းဆုံးသွားတော့ ပထမပိုင်းကို ထပ်ပြီးဖတ်ဖြစ်သေးတယ်။
အသူရာ (Asura) ကို စာရေးဆရာ Anand Neelakantan က ၂၀၁၂ ခုနှစ်မှာ ထုတ်ဝေခဲ့တယ်။ စာမျက်နှာ ၅၀၀ ကျော်ရှိပါတယ်။ မြန်မာဘာသာပြန်ကတော့ နှစ်တွဲပေါင်းကို စာမျက်နှာ ၈၀၀ နီးပါးပါ။ ရာဝဏကို အဓိကဇာတ်ကောင်နေရာထားပြီး ရေးခဲ့တဲ့ ဒီစာအုပ်ဟာ အာနန့်ကို နာမည်ကြီးစာရေးသူဖြစ်စေတဲ့အထိ ပေါက်မြောက်ခဲ့ပါတယ်။ နှစ်ထောင်ချီသက်တမ်းရှိတဲ့ ရာမာယဏဇာတ်တော်ကို ပုံစံအမျိုးမျိုးနဲ့ ချဲ့ထွင် ဖန်တီးရေးသားကြတာတွေရှိပါတယ်။ အာနန်ကတော့ ဒီဇာတ်လမ်းမှာ ရှုံးနိမ့်သူ ရာဝဏရဲ့ လူသားဆန်မှုကို ပြပြီး၊ အထူးသဖြင့် အခွင့်ထူးခံ၊ ဘုရားထူးခံများရဲ့ လူမှုစံနှုန်းတွေကိုတော့ နာနာကျည်းကျည်းနဲ့ သရော်လိုဟန်၊ တနည်း သံဝေဂလည်း ရတဲ့ပုံမျိုးနဲ့ ရေးခဲ့တာလို့ (တကိုယ်ရေ) ခံစားမိပါတယ်။ ရာဝဏကို ဇာတ်ကောင်ထားပြီး ရေးတာဟာ ဟိန္ဒူအသိုင်းအဝိုင်းအဖို့ စိတ်ကသိကအောက်ဖြစ်နိုင်စရာပေမဲ့ အိန္ဒိယမှာတော့ ဒီစာအုပ်နဲ့ပတ်သက်ပြီး ဘာသာရေးဆိုင်ရာ tolerance ရှိပုံရပါတယ်။ အနုပညာသမားရဲ့ လွတ်လပ်စွာဖန်တီးမှုကို အသိအမှတ်ပြုပုံပါပဲ။
စာအုပ်ရဲ့ ပထမတွဲက ရာဝဏရဲ့ အင်ပါယာထူထောင်ခန်း၊ ဒုတိယတွဲကတော့ သူရဲ့ ကျဆုံးခန်းပါ။ မြန်မာဘာသာပြန်ထုတ်တော့လည်း ပထမတွဲကို ရာဝဏမျက်နှာနဲ့ဖြစ်ပြီး ဒုတိယတွဲမှာတော့ ရာမမင်းသားရုပ်ပုံနဲ့ပေါ့။ မြန်မာဘာသာပြန်စာအုပ်အဖုံးအတွက် Kristina Udovichenko က သီးသန့် ရေးဆွဲပေးထားတယ်လို့ သိရပါတယ်။
ပုံမှန်ရာမာယဏဇာတ်တော်နဲ့ မတူတာက ဒီဇာတ်လမ်းမှာ သီတာဒေဝီဟာ ရာဝဏရဲ့ သမီးတော်ပါ။ ပရောဟိတ်တွေက ပြည်ဖျက်မယ့်သမီးလို့ ဟောခဲ့တာကြောင့် သီတာ့ကို ကလေးအရွယ်လောက်မှာ စွန့်ပစ်ခဲ့တော့ မိတ္ထီလာပြည်မင်းက မွေးစားထားတယ်။ ဒီလိုနဲ့ ရာဝဏရဲ့သမီးငယ်ဟာ အမျိုးအနွယ် ပိုင်းခြားပြီး ဇာတ်စနစ်ကျင့်သုံးတဲ့၊ တနည်း လူမှုစည်းဘောင်များပြီး လူတန်းစားခွဲခြားတဲ့ ဗြဟ္မဏစနစ်ကို ဆက်ခံတဲ့ ဒေဝမျိုးနွယ် ရာမမင်းသားနဲ့ လက်ဆက်တော့မယ်ဆိုတော့မှ အဖေဖြစ်သူက ပြန်လုတဲ့ဇာတ်ပေါ့။
ဇာတ်လမ်းမှာ အဓိက ဇာတ်ကောင်က ရာဝဏဆိုရင် ကျွန်တယောက်လိုမျိုး ရာဝဏ နိုင်ချင်တိုင်းနိုင်လို့ရ၊ ဖိနှိပ်ချင်တိုင်းဖိနှိပ်လို့ရတဲ့ သူ့ရဲ့တပ်သား ဘဒ္ဒရာဟာ ဒီဇာတ်ရဲ့ အကောင်းဆုံးဇာတ်ပို့ပါ။ အခန်းပေါင်း ၆၅ ခန်းမှာ ဇာတ်ကြောင်းကို ရာဝဏနဲ့ ဘဒ္ဒရာတို့ တခန်းစီ၊ တလှည့်စီ ပြောကြပါတယ်။ ဒဿမုခ (မျက်နှာ ၁၀ ခုရှိတဲ့ ဒဿ) ဆိုပြီး ရာဝဏကို ခေါင်း ၁၀ လုံး ရှိသူလို့ တင်စားကြပေမဲ့ ဒီစာအုပ်မှာတော့ ရာဝဏရဲ့ဆရာ မဟာဘာလီက ရာဝဏကို ဧကရာဇ်မင်းတပါးဖြစ်အောင် သွန်သင်တဲ့နေရာမှာ ‘ဒေါသ၊ မာန၊ ကြောက်စိတ်၊ တကိုယ်ကောင်းဆန်မှု’ အစရှိတဲ့ ဆယ်ပါးသောအရာတွေထဲမှာ ကျန်တဲ့ ကိုးပါးကို ပယ်ပြီး ဉာဏ်ပညာတခုကိုသာ လက်ကိုင်ထားဖို့ ပြောခဲ့တယ်။ ဒါပေမဲ့ ရာဝဏဟာ သူဟာ လူသားပဲမို့ လူသားဆန်မယ်။ ဒီ ဆယ်ပါးစလုံးဟာ သူ့မှာ ရှိနေမှာပဲ၊ မပယ်နိုင်ဘူးလို့ ခပ်တင်းတင်းဆိုခဲ့တယ်။ ဒါဟာ ရာဝဏကို ဒဿမုခ ဖြစ်စေခြင်းအကြောင်းပါပဲ။
အထူးသဖြင့် ဗြဟ္မဏသွေးတဝက်ရောတဲ့ ရာဝဏဟာ အသားအရေမည်းကြုတ်ပြီး ဆင်းရဲနုံချာလှတဲ့ သူတို့အသူရာတွေအပေါ် ဖိနှိပ်တဲ့ ဒေဝတွေကို နာကျည်းပေမယ့် အသူရာတောထဲမှာတော့ သူကိုယ်တိုင်ဟာ သူ့ကိုယ်သူ ဗြဟ္မဏသွေးပါသူဆိုပြီး အခြားသူတွေအပေါ်မှာ ခွဲခြားဆက်ဆံလိုစိတ်ရှိသူပါပဲ။ ဒီအငုံ့စိတ်ဟာ သူ ဘုရင်ဖြစ်လာတော့မှ သာပြီးထင်ရှားလာတယ်။ အထူးသဖြင့် အစေအပါးနဲ့ရခဲ့ပြီး သူကိုယ်တိုင် အသိအမှတ်မပြုတဲ့ သူ့သားအာဋိကာယကို မြင်တိုင်း စိတ်မလုံခြုံလှဘူး။ အာဋိကာယဟာ အသူရာမျိုးနွယ်တို့အတိုင်း အသားအရေမည်းညစ်ပြီး၊ ချွေးနံ့တထောင်းထောင်းနဲ့ ရုပ်ရည်ကြမ်းတမ်းသူ။ အာဋိကာယကို မြင်ရတိုင်း ရာဝဏဟာ သူ့ကိုယ်သူ ပြန်မြင်နေရသလိုပဲ။ အဲဒါကြောင့် အာဋိကာယကို မုန်းတယ်။
လင်္ကာထီးနန်းကို တည်ထောင်ခဲ့တဲ့တလျှောက် မြို့ရွာတွေ သိမ်းတုန်းက ရက်ရက်စက်စက်သ-တ်ဖြတ်ခဲ့၊ လုယက်ခဲ့တဲ့ ရာဝဏဟာ … ဘုရင်တပါးဖြစ်လာတဲ့အခါ ကောင်းမြတ်တဲ့ဂုဏ်အင်ကိုလည်း လိုချင်လာပြန်ရော။ ဒီအခါမှာ အရင်က သူ မထေမဲ့မြင်ပြုခဲ့တဲ့ ကျင့်ဝတ်တွေ၊ စံနှုန်းတွေ၊ နိုင်တဲ့နေရာမှာလည်း သူရဲကောင်းပီပီသသ နိုင်ရမယ်ဆိုတဲ့စိတ်မျိုးတွေ ရှိလာခဲ့၊ လိုက်နာလာခဲ့တယ်။ ဘာသာတရားရဲ့ ထိန်းချုပ်မှုတွေကို ရွံ့မုန်းပြီး လူအဖြစ် လွတ်လပ်စွာ ရှင်သန်စေလိုတဲ့ ရာဝဏဟာ၊ ဘုရင်အဖြစ် အောင်မြင်လာတဲ့အခါ ကံတရားဆိုတာကိုလည်း ယုံသလိုလိုနဲ့ ဝေဝါးစပြုလာတယ်။ အကြောက်တရားတွေ ကြီးလာခဲ့တယ်။ သမီးတော်ဟာ ပြည်ဖျက်မယ့်သမီးဆိုတဲ့ အဟောကိုလည်း ယုံကြည်ခဲ့တယ်။ ဗြဟ္မဏတွေနဲ့ ယှဉ်တိုင်း သိမ်ငယ်စိတ်က အမြဲရှိနေခဲ့တာပဲ။
ဘဒ္ဒရာကတော့ ရာဝဏထက် ပိုရှုံးတဲ့သူ။ ဘာလို့လဲဆိုတော့ အသူရာဖြစ်ရတဲ့အထဲမှာမှ ဘဝတလျှောက်လုံး ဘာတခုမှ မအောင်မြင်ခဲ့သူ။ ခွေးလို ဝက်လို အမျိုးမျိုးနှိမ့်ချခံခဲ့ရသူ။ ဒါပေမဲ့ ဘယ်တုန်းကမှ မအောင်မြင်ဘဲ ထားရာနေ စေရာသွားရတဲ့ ဘဒ္ဒရာကိုလည်း ရာဝဏက မုန်းပြန်တယ်။
ဒီစာအုပ်မှာ ဘဝင်မကျတာက သီတာဟာ ဖခင်အပေါ် မပြီးစတမ်း နားကျည်းနေတာတော့ သိပ်သဘာဝမကျသလိုပဲပေါ့၊ အမေဖြစ်တဲ့ မန္ဓောဒရီ ကြားဝင်ပေးလို့မရဘူးလားဆိုပြီး မချင့်မရဲဖြစ်မိတယ်။
ဒါပေမဲ့ ဒီဇာတ်လမ်းမှာ ကျွန်မအတွက် ထူးဆန်းတယ်လို့ ခံစားမိပေမယ့် ဒါဟာ သဘာဝကျတယ်လို့ လက်ခံမိတဲ့အကြောင်းတခုလည်း ရှိသေးတယ်။ အဲဒါက ရာဝဏဟာလည်း ဘဝရှိဦးမယ်ဆိုရင် လိုချင်နေသေးတယ်။ ဘဒ္ဒရာကလည်း ဘဝတလျှောက်လုံး ဘယ်လောက်ပဲ နိမ့်ကျစွာ ဖြတ်သန်းခဲ့ပါစေ၊ ဘဝရဦးမည်ဆိုရင် လိုချင်သေးပြန်သတဲ့။ ဒါပေမဲ့ တခုက.. ဗြဟ္မဏစနစ်အကြောင်း ရာမကို မေးခွန်းထုတ်မိလို့ ကွပ်မျက်ခံရတဲ့ ဆယ်ကျော်သက်လေး ရှမ်ဘူကာနဲ့ပတ်သက်လို့ပေါ့။ ရှမ်ဘူကာက ဘဒ္ဒရာက မြေးလေးလို ချစ်ရတဲ့သူ။ သူ့မြေးလေးကို ဒေဝတွေက ကွပ်မျက်တဲ့အခါ ဘဒ္ဒရာက တခုတွေးတယ်။ နောက်ဘဝရှိခဲ့ရင် သူ့မြေး ရှမ်ဘူကာဟာ ဇာတ်မြင့် ဒေဝအဖြစ် မွေးဖွားလာပြီး သူတို့ဇာတ်နိမ့်တွေကို ဖိနှိပ်နိုင်သူဖြစ်လာရင်လည်း မဆိုးပါဘူးဆိုပြီးပေါ့။ အဲဒီမှာတင် ကျွန်မမှာ စာဖတ်နေရင်း အတွေးကြောဆန့်မိသွားတယ်။ ‘ဇာတ်နိမ့်အဖြစ်မွေးလာပေမဲ့ ဇာတ်မြင့်တွေကို အနိုင်ယူနိုင်တဲ့သူဖြစ်လာပါစေလို့ မဆုတောင်းပဲ၊ ဘာဖြစ်လို့ ဇာတ်နိမ့်ကို ဖိနှိပ်နိုင်တဲ့ ဇာတ်မြင့်ပဲ ဖြစ်ချင်နေရပါလိမ့်’ လို့ တွေးမိသွားတာပေါ့။ ဒါပေမဲ့ ဇာတ်သိမ်းမှာတော့ ဘဝတလျှောက်လုံး အသက်ရှူပေါက်တောင် မချောင်ခဲ့တဲ့၊ ရှုံးမြဲရှုံးခဲ့တဲ့ ဘဒ္ဒရာဟာ အဲဒ္လိုဆန္ဒရှိရခြင်း အဖြစ်ကို နားလည်စာနာမိပါရဲ့။ လူ့သဘာဝရဲ့ အမှောင်ခြမ်းကို ဒီလိုပြက်ပြက်ထင်ထင် ပြနိုင်ခြင်းကပဲ ဒီ အသူရာ ဝတ္ထုကို ကျွန်မ စွဲရခြင်းအကြောင်းပါပဲ။
“ဦးနှောက်နှင့် နှလုံးသား ပေါင်းစပ်ခြင်းယုတ္တိဗေဒကို လူးကာလှိမ့်ကာ စမ်းတဝါးဝါးလုပ်ရင်း တစ်ကိုယ်တည်း ရှိနေသောအချိန်များ၌ အိန္ဒိယ၊ အသူရာအင်ပါယာနှင့် သန်းပေါင်းများစွာသော လူမည်းတို့၏ ကံကြမ္မာကို ထာဝရ ဆုံးဖြတ်ချက်ချလိုက်၏။ ဦးနှောက်၏စကားကို နားထောင်ခဲ့သည်ရှိသော် ကံကြမ္မာက ကွဲပြားကောင်းကွဲပြားသွားပေမည်။ သို့သော် ကျွန်ုပ်ဆိုသည်မှာ အမြဲတစေ စိတ်ပြင်းပြမှု၏ သားကောင်ပင် ဖြစ်သည်။ ရာဝဏအဖြစ် အသက်ရှင်ခဲ့ပြီး ရာဝဏအဖြစ် သေသွားမည်သာဖြစ်သည်။ ရာမကဲ့သို့ ပြီးပြည့်စုံသောလူ၊ ဘုရားတစ်ပါးအဖြစ်ကို ကျွန်ုပ်မရည်ရွယ်လို။ ကျွန်ုပ်တိုင်းပြည်၌ ဘုရားမရှား၊ လူသားရှား၏” (အသူရာ၊ ဒုတွဲ၊ စာ ၁၉၂-၂၉၃)

စာညွှန်းအတွက် ဆရာမကို ကျေးဇူးတင်ပါတယ်။
အသူရာကို ကြိုက်နှစ်သက်တဲ့အတွက်လည်း ဂုဏ်ယူမိပါတယ်။