Usmile

اللغة الانكليزية.. والطب.. وطريق أمريكا

اللغة مفتاح بيفتح أبواب وبفك أغلال, واللغة الانكليزية بالذات هي أكبر استثمار علمي استثمرته بحياتي. قدرتك على التعامل والتفكير بلغة تانية قدرة كثيرة الأهمية وقليلة الشعبية. ومشروع مدى الحياة ما بوقف اذا خلصت كورس معين أو نجحت بفحص موحد.

الهدف الأخير طويل المدى من تعلم اللغة: أن تكتب وتتكلم بطلاقة كافية لان تكون مقنع بأي سياق رسمي وغير رسمي, وتستهلك المحتوى المقروء والمسموع بسرعة وفهم مكافئين للمتحدثين الأصليين بتلك اللغة.

الهدف قصير المدى: النجاح بالامتحانات الموحدة مثل USMLE , OET والتحدث بطلاقة غير معيقة مع أقل عدد أخطاء ممكن ولهجة غير منفرة.

البداية: تطوير اللغة مشروع يستهلك كل ما تخصص له من الوقت والجهد. والبداية أبكر ما يمكن هو الحل الأمثل. أنا بديت المشروع بالمرحلة الثانوية بالمدرسة عن طريق الاشتراك بمعهد لمدة سنة ونصف تقريبا. ومن وقتها للان عم طور وحسن ما استطعت.

ما بنصح بتأجيل الموضوع ل(الصيف, بعد التحضيرية, بعد ما احصل ع USMLE, بعد ما اطلع عامريكا, الخ) الموضوع طارئ ومهم لكل خطوات الطريق وتأخير البداية فيه من اسباب تعسير ولبكة مالها داعي.

كمية الناس يلي موجودين بامريكا ولغتهم سيئة كبيرة فوق الوصف, وجزء كبير منهم نجح بالدخول عالماتش, الموضوع يلي ممكن يكون مطمئن, لكن الحقيقة انو موضوع الناس يلي انرفضو أو تعاملو معاملة دونية بسبب نقص الطلاقة موجود وما كتير بينحكى عنو.

على الجانب المعاكس, اللغة الجيدة للأجنبي (بسبب ندرتها نسبيا) عامل مساعد بخلي الشخص يلي عم تتعامل معو يرتحلك وقد يبديك عن غيرك من المتقدمين. ونحن كوننا أجانب بحاجة لكل عامل مساعد تحت الشمس حتى نرفع نسبة القبول.

النصيحة أن يخصص الشخص جزء من وقته بشكل مستمر لتحسين اللغة, ولصعوبة هالموضوع الأفضل بناء هيكل الدراسة واستهلاك المحتوى الدراسي, السنمائي, التواصل الاجتماعي, الخ.. باللغة الانكليزية مع نية تعلم الكلمات والقواعد والقدرة على استخدامها في المستقبل.

التسويف: أسباب التسويف هي وجود أولويات قد تبدو أهم من هالموضوع مثل النجاح بمواد الجامعة, أو بصعوبة بعض الناس بتجازف وبتعطي الأولوية لدراسة USMLE, وبعد كل هاد بيتم فتات وقت يا دوب بكفي للتنفس. الحل: أولا النظر للموضوع بحجمو الصحيح وانه أهم ببعض الجوانب من USMLE نفسو, والحل الثاني هية البداية المبكرة ومعاملة الموضوع كمعركة طويلة الامد لا نهاية لها. وهيك شوي شوي بلاقي الشخص نفسو صار مستواه مناسب وكل مالو عم يتحسن بدون عناء واضح.

السبب التاني للتسويف ويلي قد يكون أضر: عدم الوعي بالمشكلة.. كتير منا عم يدرس الطب دراسة مكملة أو رئيسية باللغة الانكليزية, وجزء نجح بامتحانات المعادلة, وجزء تاني انتج أوراق بحثية باللغة الانكليزية, وهالموضوع يعني بشكل كبير أن مستوى اللغة جيد لا جدل. المشكلة هالشخص رح يوصل لامريكا ويبلش يحكي, ورح يلاقي انه اشتغل بشكل كبير عالمهارات الاستهلاكية (القرائة والسماع) ومهاراتو الاستخدامية للغة متواضعة ان لم تكن معدومة (الكتابة والمحادثة). المحادثة والكتابة ما بيخلقو من العدم لمجرد انك اشتغلت عالمهارات التانية, وهنة نص اللغة, النصف يلي بعد ما تصير بأمريكا بصير هو النصف الأهم بكتير حالات.

النصيحة انك تطور المهارات ال٤ بالتوازي بحيث تصير لما تقرا شي تستفاد منه بالمحادثة, ولما تسمع شي تحسن تطبقو كتابة الخ..

المعاهد وأهميتها:
الفائدة الرئيسية من التسجيل بمعهد هي الالتزام بالاضافة لبناء الاساسات بشكل افضل من اذا عم تشتغل لحالك. المعهد مالو وسيلة مدى الحياة لهيك استخدمها بالبداية لتاخد دفعة قوية, ولكن العامل الرئيسي بالتحسن هو الجهد يلي عم تبذلو ضمن تسجيلك بالمعهد وبالمرحلة لي بعد.

المعهد الجيد هو يلي بيبني المهارات ال٤ بتوازن, مثل انو ينظم محادثة بين الطلاب ضمن الجلسة, يعطي وظايف كتابية كتير, الخ..

حاول تاخد اللغة من متحدث أصلي أو شبه أصلي, لأن هدفك بالنهاية انك تتعامل بشكل رئيسي مع السكان الاصليين للبلد لي رايح عليها أكتر من الأجانب عن هي البلد

الأفلام والمسلسلات وفائدتها:

فائدة كبيرة جدا بالذات يلي بيستخدمها بنية تعلم اللغة, من وسائل الاستفادة منها استخدام الترجمة الانكليزية مع او بدون الترجمة العربية مع استخدام معجم انكليزي-انكليزي او انكليزي-عربي ضمن المشاهدة. انك تفهم شي من السياق وتطنش ترجمتو مو دايما بصالحك لأن إذا ما عرفت معنى المصطلح احتمال كبير ما تحسن تستخدمو (بدك تصرف جهد).

المشكلة هي ان مو كل الناس عندها الوقت والاهتمام لتتفرج وأنا شخصيا ماعت شفت شي من عدة سنوات. البديل هو المحاولة قدر الإمكان تبديل المحتوى العلمي والمحتوى المخصص للتسلية بمحتوى أجنبي والاستفادة منه بنفس الطريقة.

وصولك لأمريكا لا يعني بشكل تلقائي تحسن اللغة, أكيد رح تتعلم بشكل أسرع بكتير بسبب إحاطتك بأجانب وعامل الضرورة, ولكن مع غياب النية احتمال تتم لغتك متواضعة سنين طويلة ويوجعك راسك بسبب هالموضوع.

التسجيل الصوتي والسماع من الطرق الجيدة لتحسين النطق والمحادثة بشكل عام.

محادثة الأجانب ما عاد موضوع صعب بوجود الانترنت ومن الوسائل هي discord وبعض التطبيقات يلي بتوصلك بأجانب مقابل انك تعلمن عربي متل Tandem.
المشكلة انو كتير اجانب (أمريكان بالذات) كانو يرسبو بالانكليزي بالمدرسة ومو شرط تتعلم منهم بنفس جودة تعلم من محتوى مشغول عليه بشكل سابق (محاضرات, وثائقيات, الخ).
حاول تختار الشخص الفصيح وتحكو بسياق علمي ان امكن حتى تستفيد من اللغة الرسمية مو بس اللغة الشائعة.

لا تقنع حالك وتقول (انا انكليزيتي منيحة), من مصلحتك انك تقنع حالك انها مو منيحة حتى تتم عم تحسن, والسؤال الصح هو"هل صارت انكليزتي جيدة بما فيه الكفاية لأتفوق عغيري من الأجانب (غير الأمريكان) بالماتش؟"

أهمية اللهجة: اللهجة الجيدة عامل إيجابي (بسبب ندرتها) وبحبوها كتير. اللهجة السيئة (المثال الشائع لهجة بعض الهنود) مالها عائق كبير (بسبب شيوعها) بس المهم يكون في فصاحة واستخدام صحيح للقواعد والمفردات, ساعتها اللهجة موضوع ثانوي. النصيحة انك تشتغل عاللهجة بحيث ما تكون تقيلة وتحكي بشكل انيق, لانو موضوع مع الوقت مالو صعب وبساعد.

الشخص يلي مالو حاطط ببالو السفر اكيد لسا ينصح يشتغل عاللغة بنفس الجهد او جهد اكبر لان محا يكون حواليه عوامل مساعدة متل يلي ساكن ببلد متحدث باللغة. الانكليزي هي لغة العلم حاليا وللاسف لح يتعذب يلي ما بيشتغل عليها وين ما راح.

الدراسة باللغة الانكليزية (من مصادر متل UW, BnB, AMBOSS) رح تحللك موضوع اللغة الطبية وبالبداية صعبة بس بتتعود عليها بسرعة.

تجربة الOET ثانوية ومافيها شي مميز, التحضير الو هو تقوية المهارات ال٤ بشكل رئيسي (عالمدى الطويل) والتدريب عالفحص نفسو بشكل ثانوي قبل الفحص بفترة وجيزة, ورح احكي عليه ببوست قادم.

الحصول على سكن:

السكن هو من أهم المواضيع الواجب دراستها قبل أو أثناء السفر إلى أمريكا, تكلفة وموقع السكن يلي رح تأمنو هية تقريبا يلي لح تحدد تكلفة الإقامة بأمريكا بشكل عام.

العوامل التي يجب توفرها بالسكن المطوب:

الأمان: أمريكا ليست بلد آمنة بشكل مثالي, في شيوع للجريمة ولهيك أهم عامل باختيار السكن انو يكون بمكان آمن نسبيا. طريقة التحقق من هالشي انك تشوف حدا معرفة او تتعرف عحدا من أهل المنطقة يخبرك عالأمان. في طرق تانية تشوف عن طريق الانترنت (على سبيل المثال تقييم المدارس بالمنطقة قد يعكس مستوى الأمان) ولكن ما جربت هي الطرق.

القرب عالمشفى: حسب مكان المشفى يلي بدك تتدرب فيه, احتمال كبير يكون هالعامل مو متوفر. المشافي أحيانا بتنبنى بمكان غير مأهول أصلا واجباري بدك سيارة لتوصل. ببعض المشافي الموجودة بالمدينة, لازم تعمل دراسة مقارنة للقرب والتكلفة, اذا المكان قريب على المشفى مسافة مشي ممكن توفر عحالك اجار سيارة يلي ممكن كتير تكون أغلى من البيت نفسو (المواصلات العامة ضعيفة ومو دايما يعتمد عليها). حط اللوكشين تبع السكن وتبع المشفى عgoogle maps وشوف المسافة بيناتن مشي. موضوع المشي بيخضع لعوامل تانية متل امان المنطقة والأحوال الجوية. بكل الأحوال, انك تلاقي مكان ما بتحتاج فيه لسيارة مو كتير شائع واذا زبطت بتكون لقطة لا تروحا عليك.

الفرش: لازم يكون البيت مفروش بما فيه الكفاية لتلبية الحاجة للي بدو سكن مؤقت. يلي قاعد ومطول ممكن ياخد شي فاضي.

وجود ناس بالبيت: أفضل حل لسكن رخيص هو انك تاخد بيت مشترك أو غرفة مشتركة. كلما زادت التشاركية قل السعر وزاد الازعاج. الشي المناسب انو يكون البيت والمطبخ مشترك والحمام خاص, ولكن الرياح لا تجري بما تشتهي السفن, السكن يلي تأمن معك سلوت فيه ولو مؤقتا ومشي أمورك. وجود شركاء السكن الو ايجابيات كتير خصوصي لحدا جاية جديد عالبلد ومو كلو سلبيات.

السعر: أرخص شي ممكن تلاقيه حسب خبرتي ٥٠٠ بالشهر (غرفة و حمام خاصين ببيت مشترك) , والأسعار مالها سقف. عادي جدا تلاقي غرفة ببيت مشترك طالبين فيها ٢٠٠٠ بالشهر. السعر بيفرق كتير حسب الولاية, المدينة, الحي.. والأهم من هيك, بيفرق كتير حسب الوسيلة يلي أمنتو عن طريقا. البيت يلي أمنتو عن طريق معارف احتمال كبير يكون ارخص بمراحل من البيوت يلي بتلاقيها على مواقع التاجير أو عن طريق مكاتب.

AirBnB:
موقع تأجير مفروش ومثالي للسكن المؤقت.
فيه ميزات كتير وتأمين بيضمنلك انك تلاقي السكن متل ما محطوط بالصور وبورجيك تقييمات للسكن وللشخص يلي موفرو.

معلومات عن الموقع:
الموقع هو أغلى وسيلة تقريبا لإيجاد سكن ولكنو الأريح.
الأسعار فيه بتتراوح بين ٥٠-٢٠٠ يوميا, وممكن ببعض الأماكن تلاقي ب ٣٥ او ارخص عالليلة بس هالشي نادر.
الأفضل تحجز فيه قبل بوقت لأن البيوت المنيحة أو الرخيصة بتطير بسرعة وبتم عندك خيارات غير مناسبة اذا كنت مستعجل.
احتمال تضطر تحجز شقة ما عليها مراجعات, اذا كان الشقة جديدة بس الزلمة عندو أكتر من شقة شوف المراجعات عالزلمة لأن بجوز يكون بتم عم ينزل شققو القديمة على انها جديدة مشان يخلص من التقييمات السلبية.
دايما حاكي الزلمة صاحب الشقة عن طريق التطبيق قبل ما تحجز, لأن هالشي بخليك ترتحلو وتسالو اذا عندك أسئلة.
في وسيلتين انك تاخد البيت نفسو يلي بالموقع بشكل ارخص, اول وسيلة ممنوعة وهية انك تحاكيه عن طريق الموقع تطلب رقمو وتتفقو عسعر أرخص مشان تخلصو من النسبة يلي بتاخدها الشركة, التانية قانونية انك تطلب منو ينزلك بالسعر عن طريق الموقع نفسو ويبعتلك special offer, كونك جاية من سوريا وطالب عايف حالك رح يساعدك تقنعو والطريقة بتزبط.
حتى اذا فاصلت, أسعار هالموقع غالية وأرخص شي عالاطلاق لقيتو فيه هو 900 بالشهر لغرفة وحمام مشترك. اذا مستعد تتحمل شوية غلبة زيادة بتلاقي ارخص اكيد بطرق تانية.
اذا حجزت واطريت تلغي, كتير شقق ما بتسمح بهالشي وما برجعولك مصاري, بس احكي مع الزلمة واحكيلو شو صار واحتمال كبير يوافق يرجعلك, خصوصي اذا صار هالحكي قبل تاريخ الاجار بفترة معقولة.
من المناسب انك تحجز كم يوم عن طريق الموقع لبين ما تلاقي سكن أفضل.
في موقع تاني نفس الترتيبة اسمو vrbo. لقيتو أغلا والخيارات فيه أقل, بس مستاهل نظرة.

RotatingRoom.com:

من المواقع الجديدة والمناسبة جدا.
موقع مجاني وغير ربحي بيوصل الطلاب يلي بدهم سكن مؤقت مشان الستاجات بطلاب ساكنين ناح الجامعة وعندهم سكن زيادة (غرفة عادة).
الايجابيات انو غالبا يلي حاطط البيت طالب طب, مشاركتو حتكون اريح بكتير من غيرو وممكن تقضو وقت مع بعض.
الموقع بنيتو فاشلة نوعا ما لهيك دور عحدا حاطط معلومات التواصل (يفضل رقم مبايل) وحاكيه فورا اتفق معو.

مجموعات العرب عالفيسبوك, الجوامع, الكنايس, الخ..
أحسن وأرخص طريقة انك تستاجر من حدا من المجتمع تبعك, رح تقضي وقت حلو مع ناس قريبين عليك.
مو شرط توصل لهالناس قبل ما تسافر, ممكن تلاقي حدا يساعدك بس تصير هنيك
دور عالجوامع القريبة عن طريق غوغل وتواصل معهم أو كون متواجد هنيك أوقات الصلاة
انضم لمجموعات الفيسبوك يلي بتمثلك بهالمنطقة (على سبيل المثال عرب هيوستن) وطلوب غرفة اجرة.
مو اكيد دغري رح تلاقي لهيك حجوز شي مؤقت لبين ما تلاقي شي بهي الطريقة

سبل أخرى ونصائح:

تواصل مع المشفى يلي رايح عليه واسالن اذا بساعدوك تلاقي سكن رخيص أو اذا هنة بامنو سكن

تواصل مع الدكتور يلي رايح لعندو وقلو اسالي طلابك او موظفينك اذا حدا عندو غرفة زيادة, أو يصورلك البوسترات يلي الطلاب لازقينها بالحرم الجامعي

لا تدفع security deposit الا اذا واثق جدا بالشخص, احتمال كبير ياكلها عليك

تجنب المواقع يلي بيكثر فيها النهب متل craiglist مشان ما يخطفوك ويبيعوك قطع غيار

تجربة OET : يتبع..

دليل الأعزل في بلاد الفرنجة (أمريكا)

اذا تم الحصول على الفيزا.. شو النتيجة؟
النتيجة هية شخص سوري بعمرو ما طلع الا شلفة حجر عبيروت سميناها سفرة احتراما للمعبر والبهدلة لي عالحدود, ومعو فيزا. لهيك حابب احكي عن لوجستيات مهمة لشخص هلق بدو يطلع عسى يحمي حالو من عواقب الخطأ, في وضع لا يغفر الخطأ.

حجز الطيارة:

باستخدام موقع Google Flights بامكانك تشوف وتقارن شو ارخص وقت تسافر فيه نسبيا. لكن بدك تحط فلتر على الخطوط التركية, القطرية, والاماراتية أو ما شابهها. أي خط بينزل ترانزيت باوروبا ممكن يعملك مشاكل (كسوري) واحتمال يرجعوك. هالحكي مالو تجربة شخصية ولكن بشهادة كل الناس يلي استشرتهم قبل ما اطلع. لهيك اي حدا بدو يطلع عخط اوروبي, ياخد بالو من موضوع الترانزيت ويتاكد. في بعض المواقع متل Kayak بتعطي نتيجة قريبة على Google Flights بس التاني استخدامو اسهل وبخليك تحجز من موقع الخطوط مباشرة , بريحك من غلاظة التواصل مع طرف تالت.

عادة الشخص يلي طالع ما بيعرف امتا بالزبط بدو يرجع وما بدو يلتزم بتاريخ معين لان ما بيعرف شو بدو يصير معو. ولكن للاسف معظم المطارات (مطار بيروت بتجرتي) بدها تكت رجعة مشان تطلعك والا بخلوك تحجزا وانت هنيك. الحل:

1- تاخد روحة رجعة بعدين خلي الرجعة مفتوحة مشان ترجع امتا ما بدك (انا حكيت مع الدعم الفني تبع الخطوط وهنة عملولي ياها).
2- تجيب تكت رجعة رخيصة (ولو اوروبية) مستقلة عن تكت الروحة بس منشان تعدي المطارعليها, وساعتا بدك تتاكد من سياسة الالغاء او اعادة الحجز عن طريق هي الخطوط. بشكل عام الخطوط بيقلولك نحن منلغيلك الحجز حتى بعد فترة بس بياخدو نسبة من المبلغ ما بعود منطفي انك تلغي, لهيك الأفضل تحجز التذكرة لي بدك ترجع عليها فعلية وما تفوت بسكة الغاء الحجز.

يفضل تكون الطيارة بتنزل مباشرة بالولاية يلي بدك تطلع عليها, السبب هوة التحقيق يلي بصير اول ما توصل عامريكا بغض النظر عن وجود الترانزيت, بس مو عكيفك لان مافي طيران مباشر لكل الولايات. الترانزيت عادة بشكل طبيعي بكون اقل من 3 ساعات, وعادة ما بكفي. الحل:

1- تحط ببالك تروح عليك الطيارة وتحاكي الخطوط تبعك بحطوك عالطيارة لي بعد, عادة ببلاش, قد تنام بالمطار او تطول كتير.
2- تحجز الكونكشن لحالك بس بدك تعمل دراسة مقارنة للتكلفة (ضمنا تكلفة الشناتي)
3- تحظظ معك وتاخد الطيارة عالوقت

- الطيارة اذا عالخطوط القطرية فيها اكل وجبة قبل الدوحة و3 وجبات بين الدوحة وامريكا
- الطيران الامريكي مافيه اكل
- الطيران القطري فيه وايفاي (بطيء) ساعة ببلاش وبتشتري طول الرحلة ب10$ (بدك تعمل لوغين من موقع طلبو من المضيفة اول ما تطلع)

التحقيق اول ما توصل:

جوازك بايدك، واخيراً وصلت للبلد لي عم ترسمها بأحلامك من سنين، حواليك ناس من مختلف الجنسيات حاملين شناتيهم وماشيين، مع غزارة بالشقر يلي ما كنت متعود عليهم. بس الحقيقة، انت ما وصلت، لسا في خطوة مع انها روتينية وبشدة، وما لازم تكون مخيفة، تحمل خطر انها ترجعك عبلدك، او تاثر بشكل كبير عخطط السفرة.. The Inspection

الخطوة الاولى اول ما توصل وقبل التحقيق، هوة انك تجيب شناتيك (بعد ما يشيكو عالباسبور) لان حتى لي عندو ترانزيت، الخطوط يلي وصلتك عامريكا بتسلمك الشناتي وبتقلك بالسلامة، مافي تحويل تلقائي للشناتي.. بعدها بحولوك عمكتب التحقيقات، بتسلم عليهم بيقلولك استريح واستنا دورك، لا تناقشهم انو عندك طيارة لان بيعرفو.

بيمر عليك محقق او اكتر (٢ بحالتي) وبيقلولك تفضل معنا، بفتشو غراضك شغلة شغلة وبيفتحو كل الشناتي، لح يسالوك "شوهي" كتير لهيك كون جاهز توصف، الوراق بالذات رح يعدو يقروها وبدك تقلن مين وشلون تعرفت عكل زلمة. بعدها بياخدو كلشي جوالات معك ياها وبيروحو عغرفة خاصة، وانت بتستنا بالمكتب، اخر الشي بيجي الموظف وبيطلب منك تعبي استمارة وبيعد بناقشك فيها، هون المهم الصدق وما تجيب سيرة شي الو علاقة بالقعدة اكتر من اللازم، او تحويل الفيزا، عادي طبعاً اذا قلت انا ناوي اجي لهون مرة تانية مشان الماتش او شي تاني، المهم انك رح بترجع. سالوني عن كل خططي وانا جاوبتن بصدق.

سؤال مهم: اديش ناوي تعد؟
الجواب: خطتي الاصلية اني اعد شهرين، ولكن بعد ما وصلتني الفيزا اجتني دعوة تانية عمشفى جديد وانا اذا انختملي اكتر من شهرين حابب اعد هالفترة كمان.

- الفيزا السياحية الستاندر تبعا انك بتعد ست شهور. بس في ناس بيختمولن اقل، يعني عالحظ ومزاجية الضابط ونوعية اجوبتك.
- الضابط بحالتي كان احلى من كاسة الشاي الحورانية، حتى لما فتش الشنتا كلو تم عنفس الطوية، وكان محترمني كتير كوني بالمجال الطبي وهالحكي.
- انا فتت من مطار ميامي وبقولو في فرق كبير بين المطارات (مطار بوسطن عسبيل المثال عطى شب متل حالتي شهر ونص عقد الستاج تبعو ولا يوم زيادة، ومعروف عنو الغلاسة ولو انو قد تكون اشاعة).
- مو شرط يختمولك وانا ما كان بدن يختمولي لان السستم ماعت اتطلب هالشي، انا طبعاً حبيت بارك الجواز وقلتلو اختملي يستر عاختك، قام ختملي
- الطيارة لي بعد راحت عليي (كالمتوقع) ولكن للامانة كان ممكن لحق لو ركدت، بس مافي حيل وكنت مفكر رح لحق. حاكيت الrebooking center موجود عند احدى البوابات وحطوني عطيارة لي بعد ببلاش (كان في نطرة حوالي ٣ ساعات)
- نصيحة يلي بدو يطلع يقدم عفيزا ياخد معو شنتا فيها احتياجات أمريكا مشان فورا يشمع الخيط.
- شنتا وحدة احسن من شنتين لأن الشناتي بغلبو وبكلفو بالسفر. اشتري شنتا بأمريكا قبل ماترجع وعبيها غراض. وانتبه لحدود الوزن طبعا (23 كغ عالقطرية)

الحصول على سكن:
يتبع..

US B1/B2 visa: approved
تجربة قبول فيزا B1
الحمدلله..

الجنسية: سوري صرف
الإقامة: سوري صرف
سجل السفر: الجواز فارغ عدا لبنان والإمارات
الوضع الدراسي: طالب سنة سادسة جامعة دمشق
الوجهة: observerships
السفارة: دبي

كل خطوة من هالطريق فيها تحدي بطريقة مختلفة. ومع كل خطوة ببين اكتر انو الإحباط يلي عم ننشرو بمحيطنا بدون ما نحس مسؤول عن قتل مستقبل شباب كتير فضلو انو، قبل ما يخطو الخطوة الأولى، ما يخوضوا المعركة من الأصل.

التحضير:

التحضير بلش قبل ٨ شهور لما سمعت انو المواعيد لبعد سنة على الأقل. بلش البحث عن طريق موقع تابع لوزارة الخارجية الامريكية بيعطيك تقدير لفترات الانتظار عالفيزا https://travel.state.gov/content/travel/en/us-visas/visa-information-resources/wait-times.html

هاد الموقع مو دقيق لعدة أسباب:

اولاً بعض السفارات بتعطي موعد مستعجل لاسباب دراسية متل الستاج (وبعضن لا)

ثانياً المواعيد بتتغير مع الوقت وممكن تفتح مواعيد جديدة قريبة باي وقت ولازم تتم متابع (التغيير ممكن لعدد مرات لا محدودة وببلاش بسفارة دبي، في حال عملتو قبل مدة كافية) , وهاد يلي صار معي ومع عدة أشخاص قدموا معي

اتخذت قرار اني قدم بدبي بعد دراسة عدة عوامل:

في شخص (هندي) نصحني بشدة بالتقديم بسفارة دبي، ما كان في سمعة سيئة ضد السوريين هنيك، شيكت عموقع السفارة ومالك بحاجة اقامة بالامارات، الدفع ممكن عن طريق النت، السفر لدبي تكلفتو مشابهة نوعاً ما للأردن، وقت قدمت انا كانت مواعيد الأردن ٩٩٩ يوم وبيروت كانت سنة بالاضافة انو سمعتها سيئة مع السوريين (ولو انو مافي شي اكيد.)

اول شي حجزت موعد بشهر آذار ٢٠٢٣ لي كان اقرب موعد، وكانت مفاجئة لان كانت فترة انتظار طويلة قريب السنة، على خلاف الشي لي شفتو ع الرابط تبع وزارة الخارجية (مو دقيق ولا يعتمد عليه)

صرت افتح رابط السفارة (تبع إعادة الحجز) كل يوم لشيك اذا في مواعيد قريبة، وآخر الشي وصلت لموعد بشهر ١٠ يلي لقيتو كتير مناسب.

عبيت الds160 قبل ما احجز مشان اخد رقم وحطو بموقع السفارة مشان احجز. بس ما كملتو لان ما بعرف شي عن الخطة تبعي غير دكتور واحد وعدني يبعت دعوة وما بعتا لسا، طبعاً لاني ما قدمتو انحذف بعد شهر واضطريت اعمل واحد تاني برقم تاني، هاد كان شي منيح لاني حطيت معلومات دقيقة وحديثة وصورة حديثة لالي لما طلعت عالسفارة, مع ذكر انو في خطوات زيادة بصير لما تصير جوا اذا كنت مغير الds160 وبتاكل خناقة اذا ما عرفت تغيرو لما تصير جوا.

بلشت دور عفرص تدريب بمشافي من وقتا وتميت هيك شهور حتى تعرفت عكذا حدا بعتولي رسائل دعوة مع شعار المشفى وتوقيع عالدعوة.

تحضير الوراق بلش قبل بكم يوم عدا حساب البنك يلي عبيتو قبل بكم شهر وعملت فيه حركة (ما سالوني عليه) كلشي وراق رح تاخدا حتكون احتياط بالغالب لأن بيسألوا عورقة او تنين بالكتير وممكن ما يسألو.

Ds160:
لما عبيتو المرة التانية جاوبتن عكل المعلومات بالتفصيل وبصدق، حطيت اني طالب (كتير مهمة وبينتبهو عليها)، و حطيت حساباتي عمواقع التواصل. بالاخير بدك تطبع تاكيد الds160 وتاكيد انو عندك موعد وفاتورة الدفع للموعد. واخدت معي كشف حركة البنك كان موصل لست صفحات من كتر الحركة. وهي ملخص الوراق لي اخدتا معي (استخدمت اول تلاتة):

DS160 confirmation
Appointment confirmation (المهم يكون عليه التاريخ)
Observership invitation
Payment receipt
Bank statement
Dean’s letter of recommendation (أوضح ورقة بتقول انت باي سنة ومتى بتتخرج، وبتطلع بالانكليزي ما بدها ترجمة)
Certificate of promotion (وثيقة ترفع مترجمة، بس ما صدقتا من الوزارة، دليل تاني عاني طالب)
5x5 photo
Letter of sponsorship (ما استخدمتا وما بنصح فيها خصوصي اذا كان كفيلك بأمريكا)
Sponsor bank statement (تابعة للي فوق)
Location of residence in the US
Other irrelevant docs

قبل باسبوع تدربت ع الاسئلة الشائعة وشفت فيديوهات وتجارب عاليوتيوب، وقبل تلت ايام طلعت عدبي، قبل بيوم رحت شفت المكان وكيف بدي روح عليه، وسالتن هنيك شو جيب معي حتى فوت لجوا وشو فيني فوت معي، فيك تفوت أي شي عدا اللابتوب وبحطولك ياه بالامانات، ولحتى تفوت بتورجيهم الباسبور، بس اذا احتجت بتكون جايب معك اكيد الاثباتات التانية، متل الDS160 appointment confirmation

وقت المقابلة لبست قميص وبنطلون رسمي وطلعت بتسريحتي العادية (شعر قصير ودقن طويلة ممشطة، مافي داعي لتقصير الدقن) وصلت متاخر عالمقابلة نصاعة، ماحدا حاكاني وكاني جاية عالوقت، اول ما تفوت بتوجيهم الباسبور وبيطبعولك عليه باركود، بتفوت بعدا ع الأمانات واخر الشي عالقاعة الرئيسية.

يلي مغير الDS160 متل ما انا عملت اول ما يفوت بعد الأمانات يخبرن عالاستقبال مشان يطبعولو باركود جديد عالباسبور.

جوا السفارة في عدة خطوات، الخطوة الأولى بيبعتوك عشباك يتاكد من الDS160 ويسألك كم سؤال، هون اذا مغير الDS160 برجعوك عالاستقبال.

الخطوة التانية بياخدو البصمات.

الخطوة التالتة هية المقابلة، وكل خطوة فيا انتظار طويل، امة الله كلا كانت بالسفارة ومن كل الاشكال والألوان والجنسيات، هون عرفت اني مو جاية عالمكان الغلط لان متعودين عكترة الجنسيات وكان في سوريين كتير.

وانا عم بعمل الخطوة الأولى كان في شب عم يقابل بالشباك جنب مني وكان شكلو مرتب كتير، انكليزيتو منيحة، وساكن بدبي من زمان، وانا عم احكي هالحكي مع حالي سمعت الموظفة عم ترفضو بكل دم بارد، هوة انصعق وقلا "ليش؟!" طبعاً عطتو ورقة ال214B وما عطتو سبب فعلي. هون قررت اني جاية عدبي سياحة ومارر حتى سلم عالموظفين بالسفارة مو اكتر..

كان معي عالدور واحد ايراني وواحد سوري، ٢ روس، وواحد مصري.

السوري:
شوف الشباك رقم (٣) هاد الئم واحد، كلو راجع معو جوازو (مرفوض)، ليك هدول الروسيين التنين هلق شوف كيف حينرفضو..

الإيراني:
شوف الشباك رقم (٦) كتير شكلا حبابة وعم تقبل الكل
انا:
حبيبي هلق شفت واحد انرفض عندا وبدون سبب واضح

فجأة بتجي الموظفة، وبتبعت الإيراني عرقم (٦) والسوري عرقم (٣)، وانا عرقم (٥) والمصري كان ادامي

وانا عم استنا دوري, عم شوف ناس عم ترجع مع جوازاتها, وناس عم تنرفض. ولما وصل الدور للناس لي حكيت عنها.. الروس انقبلو, والسوري انقبل, والإيراني انقبل, والمصري قدامي انقبل, واجا دوري..

Good morning, may I see your passport?

Good morning! Here you go..

(هون ببلش يبين الثقة بالنفس من ضحكتك وصوتك, حاول تخلي الموظف مرتاح معك لأقصى الحدود وكون واثق ولو كنت متوتر)

What is the purpose of your visit?

In preparation for the 2024 medical residency match, I, as a final year medical student, need to accumulate some clinical experience inside the US, and for that reason, I registered for two observerships, and I was accepted, and this is the purpose of my visit.

(الموظف عم يحاول ياخد قرار بأسرع وقت ممكن, وعبء الإثبات عليك مو عليه, لهيك الجواب عن السؤال هاد لازم يكون متوسط لا كلمة ولا موضوع تعبير, اذا عندك شي بدك تحكيه عن طلعتك وليش هية مهمة, حاول تلخصو بهالسؤال, انا مرقت اني طالب كمان بفرد مرة يلي هوة من اثباتات اني بدي ارجع)

Do you have an invitation for that?

Of course here they are..

(الوراق كلا مصنفة بمصنف يلي فيه صفحات نايلو, ومرتبة حسب الأهمية وحسب ترتيب الاسئلة المعتاد)

Ok, so how’d you locate these physicians?

I contact people who I know are already physicians in the US, tell them my situation, send my resume, if they like it, they can offer the opportunity. Some want to help, some don’t, these physicians have decided to offer me the rotation.

(هون ببين مع الموظفة انك شاغل وتعبان حتى حصلت على هالفرصة ومو بس شاري الكتف من النت, وببين من الجواب قديشك صريح وصادق, وانك عم تتواصل مع ناس عرب انت بالاصل بتعرفن وما عندك مشكلة تقلا هالشي بصدق)

You want to do both of them?

Yes, each is around 30 days..

Who is funding your visit?

I am, I work..

(اذا عندك شي مرتبط بمحور السؤال, احكيه.. مرة تانية, انت المسؤول انك تقنعن وما لازم يسحبو المعلومات منك سحب.. هنة بحبو لي بيشتغل بشكل عام.. هون انا ماعرضت عليها ورقة البنك, بس قعدت دور عليها مشان اذا طلبتا, قالتلي لا تدور عليها ما بدي ياها, بشكل عام لا تعرض وراق لان هنة بقررو شو بدن يشوفو)

What do you do?

There is this exam called USMLE, an exam that you take to practice medicine in the US, I coach for that.

What is the name of the exam again?

U S M L E

Ok, so your visa has been approved, your passport should be ready in about a week.

Can it be done more quickly? Or can I drop it off later?

Are you returning back to Syria?!!!

Yes..

Ok, give me the paper?

Here you go.. (الله يستر..)

Ok it should be ready by tomorrow, bring this with you..

هل هذا الاستثناء أم القاعدة (حصول طالب الطب السوري على فيزا سياحية مشان روتيشن)؟

القاعدة أنه لا يوجد قاعدة.. من الشي يلي شفتو بالسفارة, السوري وغيرو من شتى الجنسيات عم ياخدو الفيزا, ومو نادرا. انك ماعم تسمع تجارب مو يعني مافي حدا عم ينقبل. معظم لي عم يطلعو انت ما عم تدرا فين ولا رح تدرا. القاعدة شبه الأكيدة انو لي بحط الموضوع ببالو لح ينقبل اخر الشي, ولو انرفض مرة بجرب مرة تانية, بفيزا تانية,بمكان تاني, أو بتحضير مختلف.

امتى بلش بالموضوع؟

حجوز موعد السفارة وبلش دور عفرص قبل بسنة من الطلعة, ويلي مو متاكد يحجز موعد وبعدين إذا بدو يأجلو بأجلو.

هل التقديم بسفارة دبي بحاجة لاقامة اماراتية؟

لا.. كلشي انت بحاجتو هوة فيزا سياحية للامارات مدتا شهر وبتطلع لاي حدا (انا طلعتا عن طريق مكتب, مع تأمين وتكتات طيران)

هل قوة المشفى بتلعب دور بالقبول؟

لا أبدا.. الا اذا كانو رح يتواصلو مع السفارة (وهالشي نادر) فما بعرف بهي الحالة. وانا عندي احساس انو الدعوة من المشافي الكبيرة ممكن تضرك. بس بشكل عام المهم يعرفو انك صادق وجدي ومالك جايب هالورقة حجة مشان تطلع وبس.

شو أهمية سجل السفر travel history؟

كتير كانت هاممتني هالقصة وكنت ناوي اطلع عبلدان تانية بس مشان عبي الجواز, وما حسيتا شغلة مهمة بعد ما قدمت أبدا, الحمدلله وفرت مصاري.

B1 vs. J1?

الفيزا السياحية اصعب بنفس الوقت بدا التزام اقل ومتطلبات اقل. فرصة الأبحاث صعب تطلع لطالب ولو اني ما جربت. وبدها التزام مادي وارتباط لفترة طويلة. وبالنسبة الي الروتيشن بتاخد الأولوية بالنسبة للماتش. يلي طالع بعد ما تخرج وقدم الستبات منطقي انو يقدم على فيزا ريسرش.

شو بكلف موضوع الفيزا بشكل عام؟

الموعد 160$ والسفرة عدبي ب1000$ تقريبا.

شو أفضل سفارة قدم فيها؟

يبدو انو سفارة الأردن من الأفضل ولو انو تجربتي بدبي كانت ايجابية والتكاليف متقاربة, سفارة عمان عم تعطي مواعيد مستعجلة مشان الروتيشن وهاد الشي بيعطيها أفضلية لان مافي مواعيد قريبة اذا بدك تمشي نظامي.

هل قوة اللغة الانكليزية بتلعب دور؟

يلي بيلعب دور انو يكونو متطمنين الك ومقتنعين فيك, وطلاقة اللغة اكيد بتساعد بهالشي. انك بتتلبك بالحكي هالشي رح يوترك زيادة والتوتر ممكن يعيقك. بس مو يعني لي ما معو لغة قوية محا ينقبل, ولو انو أكيد بتساعد.

بالنهاية بدي قول انو الفيزا مو مضمونة, ولما ارجع ما بعرف رح اخدها مرة تانية ولا لا. ومو هاد المهم.. المهم انك حاولت, وانك رح تتم تناضل مشان مستقبلك ومستقبل عيلتك مهما كانت الظروف صعبة وبصيص الأمل بعيد. إن الله مع الصابرين.

طيب طلعت الفيزا, وبعدين؟
يتبع..

السفر إلى لبنان.
أقرب وأسهل طريقة للطالب السوري أنو يتقدم لUSMLE هي عن طريق مركز Amideast ببيروت. السفر للبنان بآخر فترة صار موضوع متعب ومكلف كتير, وبضيف هم زيادة فوق هموم التحضير. هي محاولة لتلخيص الاجراءات والوثائق المطلوبة حاليا للسفر الى لبنان. (جميع المعلومات بتاريخ 10 حزيران 2021 وقابلة للتغيير والتفاوت)

السفر حاليا لغرض تقديم الUSMLE حصرا بالطيران أما العودة فممكن بالطيران أو بالبر.

حجز تيكيت الطيارة إما على الخطوط السورية أو أجنحة الشام. بالحالتين الرحلة عم تكون متاخرة بالليل (الانطلاق 10 – 12 وقد تضل لل1 لتطلع من مطار بيروت) وبتكلف 365000 ليرة, بتحجز عن طريق مكتب باستخدام جواز سفر صالح وما بدك شي تاني. مواعيد الرحلات مالها يومية بالتالي بدك تحاول تحجز وقت بناسب موعد فحصك قبل باسبوعين.

بتحتاج حجز فندقي إجباري بعدد ليالي إقامتك بلبنان (حد أقصى 15 يوم), الفنادق بتتراوح بين 25 و 50 دولار عالليلة وفي أغلى بس أرخص ما بتلاقي (بموسم الصيف). قد تحتاج تحجز كتير ليالي حسب موعد الطيارة وموعد الفحص. الطريقة الأفضل هي انك تحاكي حدا بلبنان يحجزلك لأن أسعار الحجز من ضمن لبنان بتفرق كتير عن اذا بدك تحجز أونلاين. الحل للشخص يلي ما بدو يقعد بالفندق هو الحجز الوهمي. بتحاكي حدا ضمن لبنان وبجبلك حجز بعدد أيام اقامتك بلبنان وعليه توقيع وختم الفندق وبياخدو مبلغ أقل بكتير من لو بدك تقعد عندهم. بس انتبه يكون عليه ختم PAID باللون الأحمر لأن كتير بدققو عورقة الحجز الفندقي. بإمكانك كمان تتفق مع الفندق بحيث تقعد عدد أيام عندن والباقي وهمي مشان تمر عالحدود. أنا قعدت بفندق May Flower بالحمرا بيبعد مشي 35 دقيقة عن مركز Amideast (مدة آمنة في حال تسكر الطريق) وفي مواصلات.

الPCR اجباري حتى للملقحين بكلف 126 الف ل.س وبتم حجزو عن طريق موقع وزارة الصحة (أو عن طريق المكتب) وبتصلك النتيجة بنفس اليوم او بعد بيوم على الأيميل ولازم تطبعا بالملون. الورقة بيجي عليها تاريخين, تاريخ إجراء المسحة وتاريخ استلام النتيجة. الأمن عالحدود السورية بشوفو تاريخ النتيجة ومدتها 72 ساعة. بالتالي إذا استلمت نتيجتك الخميس الساعة خمسة, معك للأحد الساعة خمسة لتمر من الحدود السورية بالرجعة وإلا انت بحاجة لPCR بلبنان قبل ما ترجع. فيك تقول للمخبر يلي عم يعملك ال PCR انو يتأخر عمدا بالنتيجة بتكسب وقت إضافي. بس تدخل عمطار دمشق بالروحة لح يطلبو منك 50$ سعر وصلPCR تاني إجباري بدك تعملو بلبنان ومالو علاقة بالPCR يلي عملتو بسوريا ولا يلي لح تعملو بلبنان قبل ما ترجع. هاد الفحص بتعملو بس توصل عمطار بيروت وما بيعطوك نتيجتو إلا اذا كانت إيجابية لهيك ما بفيدك بالرجعة. في حال احتجت تعمل PCR تالت بلبنان تكلفتو 10$ بمخابر الحكومة يلي بعطلو وسبت وأحد.

الشباب بحاجة إذن سفر من شعبة التجنيد بشوفوها بالمطار والوحيد النهائي بجيب صورة من دفتر الجيش والدفتر.

التفتيش بالمطار السوري انت وحظك وقد يكون حسب الخطوط يلي طالع عليها, بجوز ما يخلوك تفوت أكل وشرب أبدا عالشنتا يلي معك بالطيارة, أنا طلعت على الخطوط السورية والشنتا ما تفتشت أبدا.

بالمطار بدهم يكون معك 2000$ لازم يشوفوهم.

المواصلات, بس تطلع من مطار بيروت بدك تركب تكسي من المطار عالفندق وكتير غالية ($20-30) الحل انك تكون محاكي حدا من قبل يستناك بالمطار وياخدك بسعر معقول. المواصلات بقلب بيروت هي التكاسي نفسا بس بتشتغل بنظام سيرفيس, أي سيارة ممكن تكون تكسي وبتعرف من لون الآرمة (أحمر) إذا أخدك عنظام سيرفيس بياخد 5000 لبناني عالراكب, واذا تكسي فاتفقو عالسعر قبل ما تطلع (طلعت ب 10000 من May Flower ل Amideast). وحمل تطبيق خرايط مشان ما تضيع, Maps.me بيشتغل أوفلاين ازا محمل الخريطة وبياخدك وين ما بدك.

بس توصل علبنان لا تتعامل بالدولار أبدا وصرف لبناني فورا لأن الأسعار بتفرق معك. إذا ما بتعرف حدا يصرفلك محلات المجوهرات ومحلات كتير تانية بتكتب "صراف" عالواجهة وبتصرفلك لبناني.

بس توصل اشتري خط جوال لبناني لأن اذا احتجت تحكي وما معك خط ما حدا رح يساعدك. ممكن تفعل خدمة تجوال وبتكلفك الدقيقة 1300 ليرة بس ممكن ما تشتغل معك والأضمن انك تجيب خط لبناني أو استعار خط من حدا بتعرفو.

في تطبيق اسمو Covidlebtrack كانو يطلبو انك تكون محملو عالمبايل وعامل حساب عليه بس ما طلبوه مني أبدا.

كتير مهم تتعرف عحدا بلبنان يمشيلك امورك لأن حيكون عندك فحص متعب ومو ناقصك أبدا الشنططة الزايدة تبع السفر.

لا حدا يطلع قبل الفحص بيوم لأن حركة خطيرة ومرهقة نفسيا وما بتعرف شو بصير معك, تأجيل الفحص تكلفتو أعلى بكتير من يومين زيادة بلبنان.

الرجعة عسوريا بالبر أو بالطيارة, البر أرخص بكتير وأريح إذا في حدا يجي ياخدك من الحدود السورية, ساعتها لح تدفع 30-40$ من بيروت للحدود اللبنانية,و 20-40 الف ل.س من الحدود اللبنانية للحدود السورية من التكاسي يلي بتكون عالحدود. بموضوع التكسي دايما لازم تفاصل وتفهم الأسعار وكلما سالت تكاسي أكتر لح تلاقي أرخص.

بالرجعة عن طريق البر عندك وقفة عند الأمن اللبناني ورح يشوفو جوازك وال PCR و 100$ (بس بشوفوها) ووقفة عند الأمن السوري ورح يشوفو نفس الوراق بس هون رح ياخدو ال 100$ ويعطوك مكانها 250 الف ل.س.

إجمالي التكلفة حوالي 340$
365 الف ل.س تيكيت طيارة, 126 الف ل.س PCR بسوريا, 50$ PCR بمطار لبنان, 20$ PCR تانية بلبنان (مخبر خاص) , 90$ حجز الاوتيل والرجعة عالحدود (دفعتن دفعة وحدة للشخص يلي مشالي أموري) 70 الف ل.س فرق صرف إجباري عند الحدود السورية و 20 الف ل.س تكسي من الحدود للحدود.

ملخص الوثائق
جواز السفر, تيكيت الطيارة, حجز فندقي, PCR, إذن سفر من شعبة التجنيد أو دفتر الجيش للوحيد النهائي, 2000$, واكيد الpermit تبع الUSMLE.

USMLE STEP1
تجربة يوم الفحص
الدخول الى المركز الساعة 7:30 بالكتير (في حال فحصك 8:00)
لازم تاخد معك جواز السفر والscheduling permit يلي بيبعتوه ال ECFMG لما تحجز ال Eligibility period (مطبوع) بشوفو الجواز وبيتاكدو منو بعدين بيقلولك تستنا شوي لبين ما يجهزو الكومبيوتر, بعدها بياخدوك عغرفة المراقبة (الي ناح الغرفة يلي فيها الكومبيوترات) وهنيك بيعطوك خزانة بتوسع شنتا صغيرة ومفتاحها, اي غراض تانية ما بتوسع بالخزانة او ما بدك تقفل عليها (مشان السرعة وقت الاستراحة) بتحطها فوق الخزانة عادي.

بعدها بتم تفتيش كل الجيب وتحت البنطلون وقفا الكمامة والكزلك وبيتاكدو من الجواز و بيعطوك قلم وورقة شخبطة مشان الفحص وبيطلبو منك تنقل عليها رقم ال CIN يلي بكون موجود بالscheduling permit واجباري بدك تدخل هاد الرقم عالكومبيوتر ببداية كل بلوك, وبإمكانك قبل ما تفوت تطلب منهم سدادات أذان سفنج.

بتدخل عغرفة الفحص عندك مربع فيه كومبيوترك, شاشة الكومبيوتر كبيرة وفي جنبو سماعات صوتية وسماعات عازلة للصوت مريحين وبيعزلو حتى لو بتلبس كزلك,بالبداية في test للسماعات الصوتية للتأكد انو شغالين, بعدها بتدخل رقم ال CIN وبتبدأ بال tutorial, يلي لازم تعملو skip مشان تكسب ربع ساعة زيادة لوقت الاستراحة وبعدها بتبدأ بأول بلوك.

شكل الواجهة تبع الفحص متل Uworld و في بالزاوية مؤقتين واحد للبلوك يلي انت فيها (ساعة) والتاني للفحص ككل (8 ساعات) وفي 3 حجوم للخط.

معك استراحة ساعة بالمجمل ضمنا الربع ساعة تبع الtutorial. كل استراحة بتطلع بتاخد غراضك يلي بدك ياها وبتطلع عغرفة الانتظار وبحقلك تطلع برا المركز, في حمام بالمركز وفيك تاكل وتشرب وتفتح تلفونك ضمن المركز.

لازم يرافقك جواز السفر وين ما رحت بالاستراحة وضمن الفحص وبشوفوه بعد كل استراحة, بعد كل استراحة في تفتيش متل اول مرة بياخد تقريبا دقيقة في حال ما كان في حدا غيرك عم يتفتش.

نصائح:
• فترة آخر شهر: النوم بكير يوميا من قبل شهر والاستيقاظ بالوقت يلي لازم تفيق فيه يوم الفحص (6 ل 6:30).
التدريب على حل الأسئلة واستراتيجية الامتحان أهم بكتير من المراجعة بهي الفترة.

• آخر أسبوع: حتكون الدراسة قليلة كتير وعميل بحسابك تكون خالص كلشي قبل هالاسبوع مشان ما تنضغط نفسيا. اجراءات السفر ليلي بدو يسافر كتير متعبة وبتشغل البال لهيك الأفضل ما يكون في ضغط دراسي فوق منها.

• آخر يوم: يفضل تحجز فندق قريب عالمركز اخر يومين قبل الفحص, قد يكون عجقة او تتسكر الطرقات فلازم يكون على الأكثر مسافة نصف ساعة مشي. اليوم يلي قبل الفحص فيق 6 ل 6:30 وممكن تحل اسئلة فترة ساعة او لا تدرس شي أبدا وحاول تعمل اي شي بعيد عن الدراسة.

النشاط الفيزيائي قبل بيوم لح يساعدك تهدي مخك وتنام منيح.
بنصح بمشي مدة ساعة لساعتين يلي لح يخلوك تنام منيح بنفس الوقت ما بيأثر عليك التعب.

قبل بيوم بتجهز كل أغراضك وفطورك وقهوتك وبتجهز أواعيك يلي بدك تلبسهم بالفحص أو بتلبسهم قبل ما تنام بفرد مرة.

بنصح بلبس بنطلون قطن وكنزة قطن مع أقل عدد ممكن من الجيب يلي لح يتفتشو أول كل بلوك.

• الأكل: مافي شي ثابت بهالموضوع, الأكيد أنو أي شي بدك تعملو بالفحص جربو قبل حتى تعرف شو بناسبك.

الأكل عالفطور والاستراحات لازم يكون خفيف النشا والسكر وعالي البروتين والدسم, ممكن تجيب بروتين بارز, بس ازا ما لقيت أو ما بدك, تمرتين ومكسرات (فستق جوز كاجو..) بيفو بالغرض, وممكن حتى ما تجوع وما تاكل أبدا وما تتأثر بس جرب هالشي قبل الفحص. وخود معك مي أكيد.

• القهوة ومشروب الطاقة: القهوة بتزيد التركيز وبتخفف الشعور بالتعب ولكن بتعمل إدرار, الشي يلي ممكن يكون مزعج كتير يوم الفحص, ازا اطريت تدخل الحمام وانت عم تحل البلوك هالشي لح ياخد تقريبا 4 دقايق أو أكثر من وقت البلوك. الاستراحات بشكل عام بتحمي من هالشي لهيك أكيد الأحسن انك تاخد أستراحة بعد كل بلوك. خود معك قنينة قهوة بحيث تكفيك ازا احتجتا ومافي داعي تشربا كلا. مشروب الطاقة ما جربتو.

• الكمامة: الكمامة إجبارية من لحظة دخول المركز للحظة الخروج منو, الكمامة مزعجة جدا للنفس وبتطلع بخار بغبش عالكزلك للناس يلي بتلبس كزلك. أي محاولة لتنزيل الكمامة عن أنفك لح تاكل تنبيه وتالت تنبيه بوقفو الفحص. الحل: اشتري كمامة 3M بدون فلتر (كمامات الفلتر ممنوعة) مريحة وفي بأعلاها حديدة لما تضغطا عالأنف بتمنع البخار أنو يغبش عالكزلك. من تحت فيك ترفع الكمامة شوي بفوت هوا وما بينتبهو عليك.

• سيتامول: ممكن يوجعك راسك بالفحص لهيك خلي معك ظرف سيتامول عيار 1000.

• في حال ما نمت منيح: ما انتها الكون, جهازك الودي مارح يتركك ورح تكون مركز وتحل صح وطبعا لح يكون في صعوبة وتعب أكتر.

• الفحص: الأسئلة قريبة جدا على Uworld من ناحية الصعوبة وممكن تلاقيها أسهل حتى. الوقت لح يكفيك وزيادة ازا كنت متدرب منيح عالتوقيت قبل. الأسئلة مركزة على العلوم الأساسية مو السريرية, الآليات الإمراضية ,آليات العمل الدوائية أساسات علوم الخلية والفيزيولوجيا هي أهم شي, والأسئلة ذات المحتوى السريري عم يكون هدفها بالنهاية السؤال عن معلومات أساسية.

استراتيجية الفحص هي الجمع بين مهارتين, الأولى هية قراءة السؤال كاملا والخيارات كاملة والتفكير منيح بالسؤال لتلاقي الإجابة مع استبعاد الاجابات الغلط. قرائة السؤال عدة مرات والبحث عن كلمات مفتاحية مو غلط وممكن تحللك اسئلة صعبة كتير. الاستراتيجية التانية هية انك تكون سريع ودائما عينك عالوقت فلا كتير تفكر بالسؤال السهل اختار وامشي. في حوالي 80 سؤال مو محسوبة علامتن وحاطينلك ياهم مشان يجمعو احصائات عن هي الاسئلة ويشوفوها ازا بتستاهل تنحط بالفحص أو تتعدل أو تنحذف. هي الأسئلة موزعة عالفحص ومافيك تعرفها. بالتالي عطي السؤال أقصى جهدك وامشي.

قراءة اخر سطرين والخيارات أول: هالطريقة منيحة إذا كان الوقت مو مكفيك على حساب انو معدل أخطاء التسرع لح يزيد فاتجنبها في حال كان معك وقت.

الوقت يلي بزيد بامكانك تنهي البلوك وينضاف على وقت استراحتك. اذا كنت عاطي كل سؤال كامل جهدك ضمن البلوك مافي داعي تراجع شي لأن متل ما ممكن تغير الغلط للصح ممكن تغير الصح للغلط. راجع الأسئلة يلي ما لحقت تفكر فيها منيح وتركتها خوفا عالوقت وعملتلها flag والوقت يلي بزيد كسبتو للاستراحة.

الفحص لا يخلو من أسئلة مجنونة الصعوبة, طريقة التعامل معها هي انك تعتبرها أسئلة عادية وتختار أقرب جواب عالمنطق وعالشي يلي دارسو. إياك تشلف شي ما بتعرفو.

الفحص طويل جدا وبحاجة لصبر, بس تخلص لا تفكر أبدا بالأسئلة ولو حسيت حالك طلعت مو منيح, مافي شي لح يغير النتيجة. انت بتستاهل استراحة عظيمة للجهد الجبار يلي قمت فيه وان شا الله حتشوف نتيجتو متل ما بتستاهل وأكتر.